Tipagine Du Irairapai Tini Ho Kisusi?

“Ka mo dí nga marã mobirimo ya, bambiko marã mobirimo ninafu vurari fu agu yo nangera, ki nigbarasi gu ngbanga nga ga ruru aboro.”—Gate 23:8.

AGARÃ susi kusayo 3,500, ga Mose Ndika asogo pa marã-mobirimo. Vuru gu kama agarã susi natona ti gu regbo re, agu andika nasoga pa irairapai amoipai nibakerehe gbe. Si ki vura du wo, rũ ndika adunga na diabese rogo za irairapai te. Marã-mobirimo natanga ngbabe badungu aboro na auru dunduko, na gu kura badungu aboro berewe gbe kini rungo ni sangbanaha.

Irairapai ima sona ki gbandaka rogo arago dunduko na ki da ni bakpakarakpakaraha gbe daa ti gupai nga si nagundesi aboro nga si nika rungburasi kina boro gayo riko. Rogo kura aringara, apai mbembedi dunduko i amangaha sa kinaho i anora kpabe boro yo ni. Fu marã-mobirimo fu gu boro du apai ku vurubeni nasa gupai nga boro susi rogo gu asada nga ga sukuru, i fu waraga asiahe fu boro tipa kama tarambiri, ni gbia sunge, watadu ngbanga ngba kubara ni yo. “Irairapai wa kina gu bibirikopai namaa rõrõi tindiro gbiati gberarago kurii aboro,” wogu Arnaud Montebourg, nga baini ndika Paris yo akpari ni nunga.

I namangasunge gbe na marã-mobirimo rogo agu arago i amangasunge bagaahe rogo. Gu kura abambakada ahe nafu biata dagba biama nga ga gaha mokiisa fu iraira kikindigipa aboro nga ga zogarago yo. Kuti sangba gu ga aNgirisi magazini nga The Economist, i nafu bawe rii kama nga ga agu akutu amirioni 25 rogo marã aMerikani i amangasunge nani na agarã dunduko rogo sunge baga abundu rogo dungu aringara ni marã-mobirimo fu agu aboro rengbe ka dani abangbehe kumbatayo. Wa bakio gi irairapai re amaapai, asangbanaha ima da ni kerehe. I nagumba gupai nga, vuru gu yangara bawe agarã susi, gu “pabakure” du rogo sunge bagaahe—nga gu iraira sunge bagaahe namanga wene apai fu kina gu bete airakumuko apai aima ngba fuyo—si ima gbarasa pa gu mosoro nga ga aringara nabaha.

Gupai namanga nga, agu aboro narungo kisusi be irairapai na gu zingo marã si aye nani nga rungorungo aboro—nga aguyo adunga wiri marã-mobirimo beyo wa gu sa tipa ka fuhe fu boro ya. Wa gu waraga pangbanga nga The Economist agumbaha ziazia, “irairapai gbua nga kura ngbatunga rungosi sa.” Ya mo i rengbe ka diabe ngbatunga gi rungosi re, watadu irairapai ni guhe ka i anengaha ya? Tipa ka karagapai sa gu sanahe re, ani du wa ka ani ini bete gu banguaapai mbata nga gu naye na irairapai.

Gini Apai Naye Na Irairapai?

Tipagine aboro asia gupai tini nga ka duna iraira sino kuba gupai nga ka duna ruru sino? Tipa kura aboro, duna iraira sino rengbe ka duni gu taata gene kisusi—watadu gu yangara gene nirengo—rengbe yo ka gbia guhe rogo i aidaha. Ti kura aregbo, fu marã-mobirimo rengbe ka duni wene gene tipa ka ne mbusa. Si nawira gupai nga—dungu aboro nga aguyo nabi agu aboro duna birĩ-zogarago, apurusi, na abasapungbanga i nidadi irairapai watadu kini mangihe a nitiyo napeka kina gayo kpiapai.

Wa irairapai akio kina kumbatayo, aboro nadiaha kugume si ki dani yangaraha ni gene raka. Agu aboro du gayo mosoro nirungorungoho ki tona kaa berã gupai nga kurapai ho rengbe yo ka mangaha fuo kina gure te. Si naida i sanahe a tipa marã-mobirimo ka i aida ka raka wene raka. Na ho i afunga mbusa ni fu agu aboro nadia marã-mobirimo watadu aguyo nafuhe ya, dungu aboro asonga vura berewe kuti irairapai te. “Bambiko wa i afu nga mbusa ni ipo fu bamangi gbigbitapai i nisari ngbanga ni ya, si du wiri aboro afu kpotoyo yo ti ni sa manga kina gbigbitapai,” wogu Bakindo Soromo apehe.—Batungusipai 8:11.

Ahe gu duho ue duna bakere ome nazugasi irairapai: nga ringi gbiati gbangbati. Mbiko ringi, iraira aboro nabasapa gu rungo gayo irairapai aye nani kurii kura aboro, sidu i kini rugusipa marã-mobirimo mbiko kina gupai gbua nga i nagbia undo behe. A wa i agbia undo be dungura aũzegino kisusi, kina wo a i ada ni ringiringi aboro kisusi. “Gu ni nakpi nyemu marã, marã anyasa nga gani nyemuhe te; watadu gu ni nakpi nyemu badungu ahe na mokiisa ku ri he,” wogu Soromo apehe. (Batungusipai 5:10) Nirengo, gbangbati rengbe ka duni wenepai tipa ka manga marã, ono si nye kuti gupai nga ga dada irairapai na kini dadi gu irairaapai adunga kuti ndika ya.

Gu kurapai si aidanga bangirise go tini ya nga gu sunge nga ga bazogo gi zegino re nga guko i abingo ko ya, nga guko Baibiri ayugo pako ya ko nga Satana Bakitingbanga. (1 Yoane 5:19; Yugoti 12:9) Satana nazugasi irairapai zaaza. Gu babakere marã-mobirimo nga gu i afuhe rogo pangbanga nga ga aboro dunduko angia gu Satana agumbapa fuhe fu Kristo. ‘Mi afu agu akindo foro dunduko nga ga zegino ka mo ti sande ki irisi re.’—Matayo 4:8, 9.

Ono tie, Yesu adunga ni iraira boro te, sidu ko ayugupai fu apefuo ko tipa i mangipai kinawo teketeke. Ya mo ga Kristo ayugopai rengbe ka du areme ni wene ũsunge tipa sovura kuti irairapai? Gu paparaha naye fuo gere nika wisigo gi sanahe re.