‘Mo Bátasi Tiro Na Aguyo Nadegatuyo Kuti Ro.’

‘Mo bérẽpa tiro dedede, na ga yugopai; bambiko manga mo wa gere mo abátasa tiro na aguyo nadegatuyo kuti ro.’—1 TIMOTEO 4:16.

1, 2. Ginipai nafõngbadu ndikidi aKristano yo i naandu kumbatayo kindi na gayo sunge batasa unga?

ROGO gu gbaria duni kparakparaha ni saha Thailand ku nodiyo, arogotise ue nga aDezire Yekova na’asada ka pe gu gayo vovo fugo wiriki yo ho na ngbatunga agu aboro naraka pavuru gangara. Tipa ka gumba gu wene pangbanga nga ga ga Mbori Kindo fu aboro gu gbaria re, agu arogotise ue re awiriki pa-Lahu.

² “Si ni kpakarakpakarapai ka ringbisapa gu ngbarago gbiati rengbabepai du ani nani wa ani amangasunge dagba agi aboro nasa ngbarago tirani re,” wogu gu wirina re agumbaha. “Ani nabi tirani nzunzu rogo digisidigisi Yugoti 14:6, 7, ani nitakipande wene pangbanga ‘fu arikaaboro, na ngbatunga aboro, na ngbatunga afugoyo.’ (Pigipigi kekeapai nga gaani.) Kina bete ngasu arago gbua nye koyo kindi nga gu wene pangbanga ata rimonga kurogo ya, na gi gbaria re nirengo nga gu sa dagbaha. Ani na aboro be rani nge susi aguyo rengbe ani ka wisigo Baibiri nayo dunduko.” Ziazia tie, agi arogotise ue re amaanga bangiriyo tipa ka batasa kina tiyo sa te, ono i namaabangiriyo a ka batasa aguyo nadega tuyo kuti yo. Ni aKristano, anga ani dunduko na maabangirise kaa manga kina gu bangisapai re tee?

‘Mo Bérẽpa Tiro Dedede’

3. Tipa ka batasa kura aboro, ginipai si aida ani mangihe mbata?

³ Gu mokedi nangia Pauro arugu Timoteo ya, ‘Mo berẽpa tiro dedede na gamo yugopai,’ na gipai re si tipa aKristano dunduko. (1 Timoteo 4:16) Nirengo, tipa ka undo kura aboro i gbia bata, ani du wa ka ani berẽpa tirani mbata. Waigu rengbe ani ka manga gere? Pai sa nga, ani du wa ka ani angera angera nibipa gu regbo ani araka rogo re. Yesu afu gupai i ainopai ti ni nga gu duna dungu apaparaha tipa apefuo ko ini gu regbo ‘digido gi sinoraka’ re ada ti ni. Si ki vura du wo, Yesu agumba gupai a nga ani ainonga gu regbo nzunzu si ka digo tini te. (Matayo 24:3, 36) Waigu si aida ani mangi sa gu rengopai re?

4. (a) Gini berã si aida ani du nani tipa gu yangara regbo nye koyo fu gi sinoraka re? (b) Gini berã si aida ani nehe?

⁴ Ani nibasasa rengbe ka sanahe ya, ‘Mi namangasunge na gu yangara regbo nye koyo fu gi sinoraka re ka batasa tire na aguyo nadega tuyo kuti gupai ani atungusaha? Watadu gupai mi aberãha nga, “Wa duhe nga ani ainonga gu regbo nzunzu digido rago ka ye tini te, mi anibakinga bangire tipaha te”?’ Gu berã gumba yo paha kusa re nikerehe. Si natagbagatihe nibasa na gu ga Yesu ngarasahe nga: “Oni mbákadi tironi . . . ; bambiko Wiri boro naye ti gu saa oni aberã nga pa ha ya.” (Matayo 24:44) Nirengo, anga gere nga regbo ani zere ti ngba ga Yekova sunge watadu kaa ngera kube zegino tipa ngbabase watadu rengbabepai te.—Ruka 21:34-36.

5. Gini kpiaapai gu ga Yekova amoyambu nadu mbata fu gu regbo nga ga aKristano amoihe?

⁵ Gu kura gene nga gu rengbe ani ka yugo gupai nani nga ani naberãpa tirani aberã rogo nga kaa hipai ni aKristano. Gu ga Mbori amoyambu nadu mbata anahipai ahi kindi, singia i aduna maabangirise tipa ipiipi batasa yo watadu i adunga nani te. Fuo gumba ko pa gu kpiaapai nga ga ngbatunga agu adezire nadu mbata fu aKristano wa Ebere, Enoka, Noa, Abarayama, na Sara, Pauro ayaa: ‘I adianga digisidigisi sangba akidohe te, ono i abihe kumbatayo tuturũ ki dihe kugume, ki nikusi he ya aboro kura ringara nangia yo, ni tata aboro ri gi zegino re.’ I azeranga fu gu nyemupai nga ga du rogo gu bawene raka du taata te, watadu ka zera a sa gu sosodapai sa wasiwasi mangapai nadu pati yo a te, ono i anangera kakaka tipa ‘digisidigisi sangba akidohe.’—AEbere 11:13; 12:1.

6. Waigu gu bipai tipa bata nga ga agu aKristano nadu rogo bambata agarã a’aria gayo raka?

⁶ Agu aKristano nadu rogo bambata kama agarã abi tiyo a ni “nungunungu aboro” kurogo gi zegino re. (1 Petero 2:11) Zavura fuo batasa yo ndikidi aKristano be gu gbarasarago namangi Yerusarema yo rogo 70 ti Gaani Regbo, i ambunga tungusapai watadu ka karaga tiyo sa gu gene raka nga ga zegino te. I aini gupai nga bakere bata nasungudo aguyo nye niruruyo. Nirengo, zavura kusa rogo 98 ti Gaani Regbo, gu mokedi nangia Yoane ake gupai nga: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni [a]nye anye kindi.”—1 Yoane 2:17, 28.

7. Waigu aDezire Yekova nidu na hipai rogo agi aregbo re?

⁷ Rogo gi gaani aregbo re, aDezire Yekova aduna hipai rogo ga aKristano sunge, wa i avura gbia tiyo ti kere rungosi vurũ. Ya mo gayo hipai adu gbua? Wa gu sa te, mbiko Yesu akido rani ya: “Gu ni nikaru ki da ho ragoho ka diga ni, ni abáta abata,” singia gure adu wo ti digido gi kuru sinoraka re watadu ti digido gu ga boro raka du awere. Ti regbo zingabekpio, Yekova atingidapa gako ruru amoyambu dunduko nga aguyo nakpiki na ki fu mosoro fuyo.—Matayo 24:13; AEbere 6:10.

8. Waigu rengbe ani ka yugo gupai nga ani na tambuahe tipa gu hipai nangia ga agu aKristano nadu mbata?

⁸ Kurii gure, ani na ngbarago mbiko gu ruru aKristano nadu mbata anabakanga bangiriyo tipa kina pa gayo bata sa te. Nirengo, agu rani wirikipai tipa ga Mbori Kindo mbiko gayo asadatise, ani na tambuahe mbiko i ahipai rogo manga gu sunge Yesu afuhe fuyo nga: “Oni ndú tie, ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.” (Matayo 28:19, 20) A wa mamu nika duho kindi fu rani, ani rengbe ka yugo gu tambuahe re ni tungusa ani pai fu kura aboro nga aguyo ata gianga wene pangbanga ya. Ono tie, tungusapai gbua nga bambata diandue rogo sa aboro ni abawiriki.

‘Mo Berẽpa Gamo Yugopai’

9. Waigu rengbe ruru berã ka undo rani ani tona ka wisigo Baibiri na aboro?

⁹ Gu sunge fu yo ho fu rani akodanga kina tungusapai sa te ono si nakoda yugopai a. Yesu afu gu sunge fu rani nga ani yugupai fu aboro tipa i banda agu apai dunduko ko arugu yo nani. Rengo ngaha, rogo kura arago, kina bete aboro gbua si awira gupai nga i na nyemu ka wirikapai tipa Yekova. Ono duna gbegbere berã tipa gu rago ani atungusapai rogo rengbe ka kandasi gaani asadatise ka tona wisigo Baibiri na aboro. Yvette, nga nazakigene rogo gu rago gu kura awirina aya tipaha zuzuhe tini te, abi gupai nga agu ageno nanaye kurogo gu rago re nga aguyo naadunga na gu gbegbere berã re ya, atona kaa wisigo Baibiri na aboro. Fuo ri tona kaa bi apai ngba ruru gene, Yvette abi aboro a nga aguyo naidi ka wisigo Baibiri.

10. Gaani bangua sunge ni agu abayugupai nga ga Baibiri yo nga gine?

¹⁰ Gu kura aKristano nakapa ti sana agu aboro duna nyemu rengo tipa ka wisigo Baibiri na yo mbiko i naberã gupai nga i arengbanga ka nungusa wisigopai te. Rengo ngaha, ani na bakio abirĩ nibakiakia. Ono si ahõnga gupai berani nga ani du mbata na bakere birĩ tipa ka duni wene abayugu Fugo Mbori te. Gu ziazia pangbanga nga ga Baibiri na bakere ome ti ni, na Yesu ayaa aguyo du wa avusende ima ino fugo ndikidi Babanda avusende ho i agiaha ni. Si du tie, gaani sunge gbua nga, ka pe gu pangbanga ziazia nga ga Wene Babanda avusende, nga Yesu, a wa rengbe omerani nani.—Yoane 10:4, 14.

11. Waigu rengbe oni ka undo bawiriki Baibiri wenengai?

¹¹ Waigu rengbe oni ka pe ga Yesu pangbanga wenengai gbe? Bambatapai nga, oni inidi tironi na gupai Baibiri apehe tipa gu riipai oni awisigoho. Si naida oni girogopai yo mbata fu rengba oni ka yugoho fu kura aboro. Berewe a, oni asadi ka banda regbo gaoni wisigopai ni iriirihe na rogo pabakure. Abawisigipai, kodihe na rukutu agude, nawirikapai wenengai ho i nazeredi ni na bayugupai kini mangiyo rogo irisa na rogo weneringise.—Asanza 16:21.

12. Waigu rengbe oni ka ruga tironi na gupai nga gaoni bawiriki nagia rogo gupai yo oni ayugoho funi?

¹² Ni bayugupai, oni akpinga nyemu kina gupai gbua nga ka yugo arengo fu gaoni bawiriki ni naapehe ngbarini te. Oni undo ni ni girogo gupai ni awirikaha. Gu wirikapai gu bawiriki re agbiaha sukuru yo, gani inohe rogo raka, na gani inidotise na Baibiri aundo gani giarogo gupai yo oni ayugoho funi. Sidu tie, oni rengbe ka sana tironi ya, ‘Ni girogo agu averesi gumba yo kina paha zanga dia fugoho rogo gupai oni awisigoho re?’ Oni rengbe ka kusa agu apai du ngbaduni yo ni sasana oni ni na agu asanahe adunga karagapai tipaha gbua nga kina ii watadu oó ya, ono nga gu naida sakarogopaiyo. (Ruka 9:18-20) Ngba kura gene, gu kura abawirikipai gu duho nakapa ka sana abayugupai. Nimanga yo ho wo, i rengbe kaa ndu kumbatayo zanga i gi rogo gupai yo i awirikaha. Oni ngarasi abawirikipai i sana asanahe na i gumbapa gu bangiriapai fu roni i agianga rogoyo wenengai ya.—Marako 4:10; 9:32, 33.

13. Waigu rengbe oni ka undo gaoni bawirikipai ni da ni bayugupai?

¹³ Gu nyanyaki ndupai sa ani anungusa Baibiri tini na boro kporo nga ka undo yo i duni abayugupai. (AGaratio 6:6) Were, ni fugö oni gupai oni aima wisigoho, oni rengbe ka sana ni ni sakirogo memepai yo sa fu roni rogo taata afugo, ni kini mangihe wa ka ni asakarogoyo fu gu boro duhe funi ni bambata regbo giaha. Kusa, ho ka ni rẽ ni tipa ka ndu ku gene sunge tungusapai yo, oni rengbe ka yamba ni ni gasi roni ku atiyo. Si nawiraha ya rago angba angba tini wa oni kaa mangasunge na ni, na gaoni inohe aundo ni ni sonosi gani kido daaho ni ka rẽ ni ka ndu ku gene sunge tungusapai yo nisani.

Oni Undo gu Bawirikipai re Ni Dani Bakurea Yekova

14. Gaoni banguapai nga gine ni bayugupai, na ginipai nika fubee oni duna diabese ka gbiaha?

¹⁴ Gu bambatapai agu abayugupai nibasasa nga aKristano aida ka da tini nga ka undo abawirikipai i dani abakurea Yekova. Oni amanga gere angianga na kina gaoni afugo sa ya, ono na gaoni kpiapai a. Yugopai na kpiapai na bakere ome tini kurii abawirikipai. Mangaapai na ome tini nirengo kisusi afugo, gbe nga ho daha ni ti rimiso wene asino ku ngbadu bawirikipai yo na kini fõngbaduniyo sa mangasunge zaaza. Ka ni bi gupai nga gaoni afugo na gaoni mangapai nakura mbiko gu wene pa gume du dagba roni na Yekova, pai rengbe ka fõngbaduniyo ni sonosi kina ngbatunga gu pa gume re a tigani.

15. (a) Tipagine duhe tini na nyanyakipaha tipa bawirikipai sonosi ruru ndu mangasunge Yekova? (b) Waigu rengbe oni ka undo gaoni bawirikipai ni naasona rogo toroyo kumbatayo?

¹⁵ Oni nakpinyemu gupai nga gaoni bawirikipai ndusunge Yekova mbiko ni nakpinyemu ko, angianga mbiko kina gupai gbua nga ni aidanga i gbarasi ni ti regbo Aramegido te te. Ni undo oni ni tipa ni sonosi ngbatunga gu ziazia ndu mangapai re, oni aniduahe na agu ahe nagasa we nga gu nika gasa agu a’asada nga ga gani idapase. (1 AKorindo 3:10-15) Iraira ndu mangapai, ngbatunga gu du wa bakere nyemu gupai nga ni ringbisi tini na oni watadu ni ringbisi tini na gu kura boro, afunga ome funi tipa ni sovura kuti gu mangaapai angianga ga aKristano ya te, na ka si ngarasinga ni a ni mangi rurupai te. Oni tingidi gupai nga, oni anyenga anye ni gani bayugupai kindi te. Baraho du oni ni na mamu beroni, oni rengbe ka ngarasa ni ni mbedi gbe koyo du Yekova ni ni geda ni Fugo Mbori na auru dunduko na kini berẽ kuriihe. Ngba gi gene re, kumbatayo gizo fuo nyasa gaoni wisigopai na ni, ni nikaa ndu kumbatayo kindi kaa dia “kpia gu wene apai” du Baibiri yo na gu du rogo agu abuku du mburuhe rii Baibiri.—2 Timoteo 1:13.

16. Waigu rengbe oni ka yugopai fu gaoni bawirikipai tipa ninaakpara gu kpee naye ngbaduseyo?

¹⁶ Oni rengbe ka undo bawirikipai a ni mbedi na Yekova gbe ni yugo oni pai funi ni naakpara gu kpee naye ngbaduseyo. Waigu rengbe oni ka manga gere? Isoke oni rengbe ka yugo ga Yesu kpia kparakpee funi, wa sa na gu kura dungu akparakpee naye ngbaduseyo nga gu duni kekehe Baibiri yo, wa ngbatunga gu du rogo atambuahe. (Atambuahe 17, 86, 143; Matayo 6:9, 10) Kurii gure, ho gaoni bawirikipai agia roni ni oni kini fu kpee mbata fu wisigopai na fuo nyasaha, ni nika ino gupai oni aberãha tipa Yekova. Sidu, si naida gaoni akparakpee niyugu gaoni rengo dedede na si kini yugu pa gaoni kusa apai gbayaga, na ki yugu gupai a nafõngbaduroniyo na gu nga ga toro a.

Mangasunge ka Batasa Awironi

17. Waigu rengbe avunguagude ka undo awiriyo i nye ku ngba gu gene nga ga bata?

¹⁷ Rengo ngaha, dagba agu aboro ani aida ka batasa yo, i nga gaani aborokporo. Badungu agu agude nga awiri agu aKristano nga avunguagude nga ape rengo na i “nyanyaki rogo idapase yo.” Ono tie, si rengbe ka du nga, gu kurayo na tarã rengo dudunguroo ngbaduyo yo te. (1 Petero 5:9; AEfeso 3:17; AKorosaio 2:7) Dungu gi paranga aboro re nambu gu gene nga ga aKristano ho i ambeda ni ka da ni sosono aboro watadu ho da yo ni ni sosono aboro. Kangia vunguagude nga oni, ginipai rengbe oni ka mangaha tipa ka gupai re mbedinga ka manga ya? Bambatapai nga, oni rengbe ka asada tironi tipa ka kusa gu ramukporo duni wenehe. Wene ramukporo namaa wene mburupai tipa i naabi agu aboro na irisa duna pagbia beyo, ki duna tambuahe tipa wene asino, na ki duna wene pa gume dagbase na kura aboro. (AEbere 12:9) Sidu, dawedawe ngbanya dagba aborokporo rengbe ka duni gu mbudu sende rengbe ga gude pa gume na Yekova ka sona rogo. (Atambuahe 22:10) Nyanyaki aborokporo namanga apai kina sa wa boro sa—ka si vura ida gupai nga avunguagude mbupa gu regbo rengbe yo ka mangasunge nani tipa undo tiyo vurũ. Rogo gi gene re, oni rengbe ka yugopai rogo kpiapai fu awironi tipa wai rengbe yo kaa manga ruru adiaberã rogo gayo raka yo. Avunguagudee, guhe awironi aidaha gbe be roni gbe nga oni—gaoni regbo, ome, na nyemuse, angianga aũzegino ya. Oni nafu agi ahe re fu awironi?

18. Gini ngbatunga asanahe si aida avunguagude undo awiriyo i karagapai tipaha?

¹⁸ Si aidanga agu avunguagude nga aKristano berẽ gupai wa gu sa nga awiriyo adani aKristano nibasa ya. Daniel, nga bakumba na ni ba agude bisue, ayaa: “Avunguagude du wa ka i di regbo tipa ka dia agu akapa kusayo awiriyo arengbanga ka nehe ya nga agu akapa i naagbiaha sukuru yo na rogo kura arago. I du wa ka i undo awiriyo rogo zerangbaduse i gbia akaragapai sa ngbatunga agu asanahe du wa gu nga: ‘Ani naraka nirengo rogo yangara arame? Ya mo ndikidi pambori ho gbua kina sa? Tipagine duhe tini nga gu kuare nawira wa ni wenengai sukuru yo ni ni wene badiasungo te? Si ti aregbo dunduko ni irairapai ka kodaba mbata fu rogatise?’ ” Avunguagudee, oni rengbe ka kido kuti Yekova ko fu maku kurii gaoni asadatise, mbiko ko a na nyemu gupai nga awironi du wenengai.

19. Tipagine ngbaha tini gbe nga kina avunguagude wirikipai na awiriyo?

¹⁹ Gu kura avunguagude rengbe ka berã gupai nga i arẽnga tipa ka wirikapai na awiriyo te. Ono tie, si aidanga oni berẽ ngba gi gene te re, mbiko anga boro ho du rogo gu ba ngbaa kisusi gaoni ka yugopai fu awironi te. (AEfeso 6:4) Wisigopai na awironi ambu roni oni ini gupai du ngbaduyo yo na du berãyo yo kina boro ngbayo. Agu apai i agumbaha naye ngbaduyo yo watadu i nagumbaha gbua mbiko wa du wo duhe? I naida kuti gupai nirengo i awirikaha? Yekova ni ndikidi boro bangiriyo? Oni rengbe ka gbia akaragapai sa agi asanahe re na sa gu kura nyanyakipa asanahe ka kina roni ni tironi awisigopai na awironi.—2 Timoteo 1:5.

20. Waigu rengbe avunguagude ka manga gayo wisigopai nga ga aborokporo si duna ngbarago na ni wenehe?

²⁰ Waigu rengbe oni ka banda gu mbakadapai nga ga gu wisigopai nga ga gaoni aborokporo fuo tona oni he kindi? Joseph, nga bakumba ni bavungu tooni kumbagude na degude, nayaa: “Wa kina gu kura awisigo Baibiri dunduko, si naida aboro gbia ngbarago be gu wisigopai nga ga aborokporo, si ki du ni guhe aboro dunduko apidoho na nyemuhe. Tipa ka gbia gure dagba gaani aborokporo, si aidanga ani zitirani kina kuti bangisa ringbisiringbisipa regbo te. Gaani wisigopai rengbe ka dia saa sa, ono ka si vura du ti kura aregbo nga ani gbua na kina aminiti bawe, ani nawisigopai kindi a. Pai sa nga gu nanyakasa gaani wisigopai rogo poso nga ani nasa tirani wa agu aboro du rogo Gimi Buku Apangbanga nga ga Baibiri kini mangi gupai i amangihe.a Gu nyakasapai na gu giarogopaiyo si aye nani nyakipaha kisusi gu dungu agenewaraga ani agedaha.”

21. Gini regbo rengbe avunguagude ka yugopai fu awiriyo?

²¹ Rengo ngaha, yugopai fu awironi adigonga kina kuti gu ringbisiringbisi aregbo du tipa wisigopai te. (Pa Fu Rugute ni Ue he 6:5-7) Gu Dezire nadu Thailand yo i ni gumba pako ti tonatona gi paparaha re nayaa: “Mi natingidapa wai kindi wenengai gbe Buba anadia re ku gene sunge tungusapai yo, ani kini si gaani angbagida, kurogo gu tuturũ rago nadu fu gaani dungurati tipa tungusapai rogo. Nirengo, gu wene kpiapai nga ga avungurani na gayo yugupai fu rani ti regbo apai dunduko naundo rani ani diberã ka rimo sunge tungusapai ti aregbo dunduko. Agu apai ani awirikihe re anye anye kindi berãrani yo. Mi namangasunge kindi rogo gu tuturũ aba nga ga gu rago re!”

22. Ginipai nika manga be ‘berã oni pa tironi na gaoni yugopai’?

²² Barambeda rogo kura uru sa, ti kina boro wene regbo, Yesu nika ye ka manga ga Mbori sarangbanga kurii gi sinoraka re. Gu banarupai re ada ni gu pangbanga nga ga haurago, ono ga Yekova ruru amoyambu nikaa mangasunge ko na pa nyenye bata barabangiriyo. Oni namaabangironi ka du dagba yo, wa sa na awironi na gaoni abawiriki Baibiri? Sidu oni tingidi gupai tie nga: ‘Mo bérẽpa tiro dedede, na ga yugopai; ki ka kuti agi apai re; bambiko manga mo wa gere mo abátasa tiro na aguyo nadegatuyo kuti ro.’—1 Timoteo 4:16.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Si naida gaani berã du nga gine, wa ani ainonga regbo ga Mbori sarangbanga nzunzu ya?

• Rogo gini agene rengbe ani ka ‘berãpa gaani yugopai’?

• Waigu rengbe oni ka undo bawirikipai ni da ni bakurea Yekova?

• Tipagine duhe tini na nyanyakipaha nga avunguagude di regbo ka yugopai fu awiriyo?

[Gu kpiahe du ti kpewaraga 27]

Gu rago duni iriirihe gbiati pabakure nakiiso nyemu wirikapai

[Gu kpiahe du ti kpewaraga 31]

Satise ni agu aboro du rogo agu apangbanga nga ga Baibiri na kini mangi gupai i amangihe, wa ngbatunga pa ga Soromo sarangbanga anatakuari ue, nasa gu wisigopai nga ga aborokporo si duni pa ngbarago