Ga Mbori Kindo Ima Mbeda Ka Batasa Aboro!
“Ga ngbi [“kindo,” NW] yé, Ani mángi rogo kpotosende wa mo akpi nyemu he, wa du he ngbangbaturũ yo.”—MT. 6:10.
1. Gine nangia gu banguapai Yesu anaayugoho?
HO Yesu Kristo atungusipai ni rii bagangara yo, ko akodi kpia kparakpee kurogoho nga gu nagurusi sangba gu banguapai ko anaayugoho. Ko ayugupai fu apefuoko i takpara fu Mbori kini yaa: “Ga ngbi [“kindo,” NW] yé, Ani mángi rogo kpotosende wa mo akpi nyemu he, wa du he ngbangbaturũ yo.” (Mt. 6:9-13) Yesu “amerẽ rogo abaakporo na akporo dunduko nitungusi pai ki niyugu gu wene pangbanga nga ga ga Mbori ngbi.” (Ruka 8:1) Kristo angarasi apefuoko ki yaa: “Oni gbáta gako ngbi mbata, na gako rurupai.” (Mt. 6:33) Fuo wisigo oni gi papara kekeapai re, oni gbata agene tipa ka mangasunge na agu apai du rogoho tingba gaoni sunge tungusapai. Nikpiapai, oni bi wai si aida oni karagapai sa agi asanahe re: Ya mo nyakipa gu pangbangaa nga ga Kindo anyaka? Gine si aida i batasi aboro behe? Wai ga Mbori Kindo nika batasa aboro?
2. Wai nyakipa gu pangbangaa nga ga Kindo?
2 Yesu afura tipa tungusapai kumbatayo ki yaa: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Mt. 24:14) Gu wene pangbangaa du tipa ga Mbori Kindo, si nga nyanyakipa pangbangaa. Si nirengo nga nyanyakipa pangbangaa kisusi rogo zegino! Rogo adungurati bangehe nasusi 100,000 rogo zegino, aDezire Yekova du bangeyo wa amirioni saba natungusapai kini ya fu aboro wee i aima sigira gu ga Mbori Kindo re. Pa sigira yó gu Kindo re nga wene pangbangaa bambiko si nayugo gupai ngawee Mbori ima maa gu zogarago nika dia agu apai nga ga kpotosende kubehe ka mbakadaha. Gupai Yekova akpinyemuhe nika manga tiibe gu zogarago nga ga Kindo auru kpotosende herẽ a wa duhe ngbangbaturũ yo.
3, 4. Ho gupai Mbori akpinyemuhe nika manga ni auru kpotosende, gini apai nikaa manga herẽ?
3 Gine nika manga fu ngbatunga aboro dunduko ho gupai Mbori akpinyemuhe nika manga ni auru kpotosende? Yekova nika “[wéga] aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.” (Yugo. 21:4) Aboro awokanga te na i akpikongo te, bambiko boro ho nika dia ingapai na zanga rengba ti avunguni te. Gu kpikpi aboro du payo rogo ga Mbori berã, i nikadu na mamu ka raka nyeanye kindi, mbiko Ziazia Kekeapai nakidohe niyaa: “Ruru aboro azinga be kpio na iraira yo a, a wa agi yo namaa bangiriyo re a tigayo.” (Amo. 24:15) Avura, akaza, watadu gomoro, si adunga berewe te. I asa kpotosende niparadizo. Zavura kina agu anyaa du awere nikere ra, ami adu na pazereda na aboro na dagba ra a.—Tam. 46:9; 72:16; Yes. 11:6-9; 33:24; Ruka 23:43.
4 Mbiko ngbatunga gu iiriwo amaku gu Kindo re nika ye nani, si du Ziazia Kekeapai afura ti ni kumbatayo tipa raka na agi afugo wasa re: “Bayee aboro adía kumbo ringara, ki du na ngbarago tipa gu wenepia du kpaima.” Ono ginipai nika manga tipa agu aboro namanga gbegberẽ apai? Ziazia Kekeapai nayaa: “Fuo rago ngbutuko, gbegberẽ boro adú nga ho berewe te.” Ono “agu yo nasunguda Yekova i adia kumbo ringara.”—Tam. 37:9-11.
5. Gine nika manga gi zegino du awere re?
5 Tipa agi apai re dunduko mangi, si naida i rogodi agu azogarago nga ga aboro, apambori na gu mbakadapai nga ga baga ahe kusayo. Gure nga kina boro gupai nzunzu gu zogarago nga ga ngbangbaturũ nika mangaha. Ziazia toro asa Daniere ko gumba sangbanebi ki yaa: “Rago agu abakindo re [nga agu abakindo du awere,] Mbori ngbangbaturũ amáa gu ngbi [ngbangbaturũ yo] nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.” (Dan. 2:44) Ga Mbori Kindo, nga gu zogarago nga ga ngbangbaturũ, si nika zogarago tie kurii gu vovo riko nga ga aboro. Mbori nika ye na “vovo angbangbaturũ na vovo kpotosende, nga gu ruru apai nikanye rogo ho.”—2 Pet. 3:13.
Bakere Zingo Duho Tipa I Batasi Aboro
6. Wai Ziazia Kekeapai aringbisapa gu gbegberẽ apai du rogo gi zegino re?
6 Ho Satana, Adamu, na Eva asamungu ni kuti Mbori, kini idi kaa diaberã nitiyo tipa gayó apai, gure nga i amoi nduyo na ga atitayo ngbagene kerepai. Fuo susa agarã 1,600, na mbata fu Ime Akangbii ye, “ga aboro gbegberẽpai adu ni bakere he gbe auru kpotosende, na gu biapai dunduko nga ga berã du kpotoyo yo, si adu ni kina gbigbita ha kindi.” (Bam. P. 6:5) Fuo susa agarã 1,300 kusa, Soromo abi gupai nga apai aima gbera kisusi ko ki kepai ki yaa: “Mi [nasambua] ga kpikpi aboro pai . . . na ima kpika, ki susi ga gu unga aboro du ni ungayo kindi. Ono gu ni ngba susi yo wa du yo ue nga kina gu boro i ata vunga nga ni nga gu ni ata bi nga gu gbegberẽ mangapai namanga tii uru no ya.” (Batu. 4:2, 3) Agarã wa 3,000 tingbafuo gu regbo re naye na ani kuti gi gaani regbo re, nga gu regbo gbegberẽ apai namoipai rogoho.
7. Tipagine du bakere zingo ti ni awere tipa Mbori batasi aboro?
7 Wa vura duhe nga gbegberẽ apai aima digo nimangi tipa gbanga regbo, bakere zingo gu du aduho awere susi gu nadumbata tipa ga Mbori Kindo ye ka batasa aboro. Agu apai mangi vuru agu agarã 100 susi, si ima gberã kisusi na si nagberã kina kumbatayo. Nikpiapai, riigbu sa nayaa: “Bange agu aboro nakpiki mbiko vura rogo [gu 20 kama agarã], si wa bara biata nga ga aguyo natona kpiko rogo bambata sa kama agarã ki da kurogo 1899.” (Worldwatch Institute) Natona rogo gu garã nangia 1914, dungu aboro susi amirioni 100 kpiki! Buku sa nayawee aboro wa amirioni 60 nakpiki ti regbo Ue Vura Nga ga Zegino. Wa gu kura rikaaboro ambakada agu aũvura ka i baha, si naimo badungu aboro na ki gbarasi kpotosende, aboro rengbe arengba ka imo badungu akurayó. Wa aboro navura sona rogo birĩ-inohe na rogo sunge aziga, gomoro na akaza naimo agude rogo garã sa bangeyo nasusi amirioni bisue.—Oni bi gu buku nga What Does the Bible Really Teach? (Gini Apai Nzunzu Ziazia Kekeapai Ayugoho?) kapita 9.
8. Gine gu zogarago nga ga aboro vuru dungu agarã nayuguhe?
8 Aboro ima kpa rogo gayó asadatise ka dia gbegberẽ apai kusayo. Agu ariigbu nga ga birĩ zogarago, ga bagaahe, na ga pambori, si aima kpa ti ye na zereda, zugö ahe wenengai gbiati wene auwa-kpotose fu aboro. Kuba gupai nga si ye na aziga kuti agi apai nafuda ngbatunga aboro re, si aye na kina kura fudifudiapai kuti ni. Ka pe rengo, gu dungu agarã susi aboro azogo tiyó rogoho, si ima yugo rengo gu fugo gu nebi nangia Yeremaya agumbaha ki yaa: “Gu pai nga ga boro si rogo ni yo te, gu boro nata, pa ruga gani apai si rogo ni yo te.” (Yere. 10:23) Ii, “boro nidu . . . ni gbia ku ri kura ni ka imisa ni.” (Batu. 8:9) Kurigure, “ũzegino dũ mongo niukaga omehe nimbu be ima kina ku awere.”—Rom. 8:22.
9. Gini sino apai ndikidi aKristano amaabangiriyo ya si nikaa manga amanga rogo “kusa rago”?
9 Ziazia Kekeapai aima fura tipa gi gaani regbo re kumbatayo ki yaa: “Rogo kusa rago gbegberẽ rago aye.” Fuo gu sangbanebi re fura tipa agu apai si adu nga si nikaa manga rogo yangara arame tiibe gu zogarago nga ga aboro, si ayaa: “Gbegberẽ aboro agbérã ki susi na airanangahe a.” (Oni gedi 2 Timoteo 3:1-5, 13.) Gure nga gu sino apai aKristano amaabangiriyo nga si nika manga amanga, mbiko “zegino dunduko du ni zogozogo ho be gbegberẽ ko” nga Satana. (1 Yo. 5:19) Ono tie, gu wene pangbangaa duho ngawee Mbori nika batasa agu aboro nakpinyemu ko. Ko nika batasa yó be gi zegino nagberã kina kumbatayo re.
Gu Yangara Boro Nika Batasa Aboro
10. Tipagine du Yekova ti ni nga gu yangara boro nika batasa aboro?
10 Wa oni atungusa wene pangbangaa, oni gumba gupai fu aboro nga kina Yekova sa nga gu boro rẽ ka batasa aboro. Kinako sa duna tandu beko na duna nyemu ka batasa gako amoyambu be gbegberẽ apai. (Amo. 4:24, 31; Yugo. 4:11) Yekova abatasa gako aboro abatasa na ki digisi gako ringbisapai, mbiko ko azungahe ki yaa: “Ni rengo wa berẽ mi he, wo si ka ye ka du, na wa berẽ mi pa ha, wo si ka ru.” Gako ‘apai nga gu nakura ngbako yo; si akaraganga tihe fuko gbua te.’—Oni gedi Yesaya 14:24, 25; 55:10, 11.
11, 12. Gini kidohe Mbori nafuhe fu gako amoyambu?
11 Yekova ima kidohe ya ko nika batasa gako amoyambu abatasa ho ko ka ye ni ka sapangbangaa gbegberẽ aboro. Ho Mbori akedi Yeremaya ni ko ndu ka fura zanga gunde fu kere aboro ingapai, ko ayaa: “Ka mo gúnde nga be yo ya.” Tipagine? “Bambiko mi du na mo ka batasa ro.” (Yere. 1:8) Wakina gure a, ho Yekova aaida ka gbarasa Sodomo na Amora ni, ko akedi amaraika ue i ndu ka batasa Roto na gako aborokporo rogo gu ba re. Fuo gure, “Yekova ki kedi baruti na we si na ku ri Sodomo na Amora.”—Bam. P. 19:15, 24, 25.
12 Yekova rengbe arengba ka batasa aboro rogo zegino dunduko nga agu aboro namanga gupai ko akpinyemuhe. Ho ko agbarasi gbegberẽ aboro ni na Ime Akangbii, ko “abatasi Noa nangia batungusi rurupai, na kura aboro saba.” (2 Pet. 2:5) Yekova abatasa ruru aboro abatasa berewe ho ko ka imo gbegberẽ aboro ni. Fugoko nayaa: “Oni gbáta Yekova, oni dunduko nga bayee aboro ringara, . . . oni gbáta rurupai, oni gbáta umbasitise; si ngia i aõka roni rago ga Yekova zinga.” (Zef. 2:3) Gupai nika manga nga ‘ruru aboro nika ráka zegino, ono gbegberẽ aboro i ka mofa yó kusayo’ ti regbo gu imo aboro nika manga rogo zegino dunduko re.—Snz. 2:21, 22.
13. Wai Yekova nika batasa gu gako amoyambu naima kpiko?
13 Ono tie, badungu ga Mbori amoyambu naima kpiko be akaza, arungosi, na gu kura anduhe. (Mt. 24:9) Wai tie Mbori nika batasa agiyo re? A wa ani niima gumbaha mbata, “ruru aboro azinga [azinga] be kpio na iraira yo a.” (Amo. 24:15) Nairiwo wai si afu ngbarago furani ka ino gupai ngawee anga he ho rengbe ka ká na Yekova ti batasa gako amoyambu te!
Ruru Zogarago
14. Tipagine du ani ti ni naa kido ya ga Mbori Kindo nga ruru zogarago?
14 Wa oni atungusapai fu aboro, oni sakirogopai fuyó ya ga Yekova Kindo nga ruru zogarago. Si wo mbiko si nayugokpia agu asino nga ga Mbori duwa ruru sarangbangaa, ruru mangaapai, na nyemuse. (Pa Rug. 32:4; 1 Yo. 4:8) Mbori sia Yesu Kristo ko zogorago rogo gu Kindo re, nga gu boro rẽ gbe ka zoga kpotosende. Yekova ambakadipai a tipa ka dia mbedimbedi aKristano du bangeyo nga 144,000 i ndu ka zogarago na Kristo ngbangbaturũ yo.—Yugo. 14:1-5.
15. Oni gumbanga pa gu kparakparapai du dagba ga Mbori Kindo na gu zogarago nga ga aboro.
15 Nairiwo gu kparakparapai nikadu dagba gu zogarago nga ga Yesu gbiati agu abadiangbako du bangeyo nga 144,000 na gu zogarago nga ga kpakpa aboro! Abazogo gi zegino re nidu dedede nga kere sino aboro na kini rimisi avuruyo kurogo avura si kini ye na kpio dungu aboro. Si nga ndu gupai Ziazia Kekeapai aya ti ni furani wee ka ani kidongo kuti boro “adu nga undahe be ni” ka batasa aboro ya! (Tam. 146:3) Ono tipa Kristo, ko nika zoga aboro niwene sino. Yesu ayaa: “Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. Oni dí gi gonga ku gorõroni, ki wiriki pare; bambiko bayee boro nga mi nga irazerangbaduse, oni ki bi ongoda tipa mbisimoroni. Bambiko kii nga gi gonga te, na gi tindiro ni aakpura ha.”—Mt. 11:28-30.
Yangara Arame Ima Mbeda ka Digo!
16. Wai gi yangara arame re nika digo?
16 Gi zegino re aima rimo yangara arame, watadu “kusa rago” tona rogo gu garã nangia 1914. (Mt. 24:3) Mbembedii kumbatayo, guhe Yesu ayambuhe nga “bakere gberãngbi” nika tona. (Oni gedi Matayo 24:21.) Gu gberãngbii gu aamanganga waha mbata re ya, si nika nyasa riipa ga Satana zegino naabaha dunduko. Ono wai bakere gberãngbii nika tona? Na wai si nika digo?
17. Ginipai Ziazia Kekeapai agumbaha tipa tonatona bakere gberãngbii?
17 Bakere gberãngbii nika tona wa ikpirogumba. Ii, “rago Gbia” nika ye nitunguotunguoho “Ho i ka ya ni, ‘Zereda, ngba barani angba.’” (Oni gedi 1 ATesaroniko 5:2, 3.) Gu bakere gberãngbii fura yó tipaha kumbatayo re nika tona ho arikaaboro nikaa berã ni ya i ima mbeda ka mbakada agu apai nafuda aboro. Pa gbarasa “Babera Duna Bakere Ome Ti Ni,” nga bariwara ngbii zire pambori, si nika tunguo aboro atunguo. Kina ngba abakindo gbiati kura aboro nika zera wa i ka bi gupai nga i saringbangaa kuti Babera.—Yugo. 17:1-6, NW, 18; 18:9, 10, 15, 16, 19.
18. Ginipai Yekova nika mangaha ho Satana nika zubo gako aboro ni?
18 “Yuguyugu he adu rogo uru na diwi na akerekuru,” na “gu pai i aina pai ti ni nga ga Wiri boro ngbangbaturũ yo.” Fuo si tona manga wo, si aida ani ‘tumba rirani ku ariyo; bambiko rago tumo rani nambeda.’ (Ruka 21:25-28; Mt. 24:29, 30) Fuo gure, Gogo nika aria tiko fuo ga Mbori aboro. Ono nibipa agu aboro naida ka zubo ga Yekova ruru amoyambu, fugoko nayaa: “Gu ni nazadi roni ni azadi kina rindi bangiriko.” (Zek. 2:8) Sidu, ga Satana asadatise ka imo yó adunga na diabese te. Tipagine? Mbiko gu Bakerepa Bakindo nga Yekova nika guari nibasa ka batasa gako amoyambu.—Yeze. 38:9, 18.
19. Tipagine rengbe ani kadu ti ni naa kido ya ga Mbori abanzengere nika nyasa anyasa riipa ga Satana zegino?
19 Ho Mbori nika guari ni sa rikaaboro na vura, ‘i aino aino ya ko nga Yekova.’ (Yeze. 36:23) Ko nika keda gako abanzengere nga amaraika tiibe Kristo Yesu i ye ka gbarasa ga Satana zegino naabaha dunduko. (Yugo. 19:11-19) Ho ani atingida gupai ni nga bangisa maraika rogo yuru gbua sa naimi “aboro 185,000” nangia avura Mbori, si nasa rani ani du naa kido ya agu amaraika re nika nyasa anyasa riipa ga Satana zegino naabaha dunduko ti regbo Aramegido. (2 Aba. 19:35; Yugo. 16:14, 16) Fuo gure, i amaa Satana na gako adaimona ku bambukiso yo tipa agarã sa kutu. I kini imi yó niyangaraha.—Yugo. 20:1-3.
20. Gine Yekova nika mangaha na gako Kindo?
20 Fuo manga gipai re, kpotosende kini giri be gbegberẽ mangimangiapai, na kina ruru aboro kini raki nyeanye kindi auru kpotosende. Ti gu regbo re, Yekova kini du nga Bakere Batasi. (Tam. 145:20) Mbiko gu ga Yekova Kindo re, ko nika dia gbarasarimo kusayo ti gako bakere pagbia, ki ziasi rimoko, na ki digisi gako ringbisapai tipa kpotosende. Oni gbianga ngbarago tingba gaoni sunge tungusapai wa oni atungusa gi wene pangbangaa re na kini undo agu aboro ‘du na nyemu gbia nyenye unga’ i kparia gupai ngawee ga Mbori Kindo ima mbeda ka batasa aboro!—Amo. 13:48, NW.
Oni Natingidaha?
• Wai Yesu anyakasipa wai nyakipa Kindo?
• Tipagine du zingo ho ti ni areme tipa batasa aboro susi gu nadumbata?
• Gini apai rengbe ani ka maabangirani tipaha ya si nikaa manga ti regbo bakere gberangbii?
• Wai Yekova nika yugo gupai nga ko nga Batasi?
[Gu kpiahe du ti kpewaraga 16]
Fugo Mbori aima fura kumbatayo tipa gu sunge tungusapai namanga rogo zegino dunduko
[Gu kpiahe du ti kpewaraga 18]
Wa Yekova abatasi Noa na gako aborokporo, Ko rengbe arengba a ka batasa rani
[Gu kpiahe du ti kpewaraga 20]
Yekova “awéga aume ti bangiriyo ku sa yo dunduko. Kpio adú nga berewe te”—Yugo. 21:4.