Yekova Nafu Ome Fu Guni Bati Omeni
‘Yekova nafu ome fu guni bati omeni, na gu ni adu nga ome tini ya ko nakiisa omeni.’—YESAYA 40:29.
DIGIDO ga Yekova ome tini te. Nakii gu ome du rogo agu ahe ko akusihe! Gu atom [atomu] du gbua tooni—nga guhe i ameka ahe dunduko nani—si ni wiri umbaha gbe da ti gupai nga togotogo ime sa na kama birioni abirioni atomu vuruhe yo.a Gu unga ahe dunduko du auru gaani kpotosende naraka mbiko gu ome naye be gu mangapai nga ga atomu bangiri uru yo. Ono bakio ome nga ga uru wai si aidaha tipa si songodi raka auru kpotosende? Kpotosende nagbia kina wiri tooni bete gu ome nga gu uru akusaha. Si ki vura du wo, “gu tooni papara ome nga ga Uru nga gu Kpotosende agbiaha . . . bakioho wa bara 100,000 susi gu ome dunduko agu abambakadaahe nga ga zegino amangasunge nani,” wogu gu bagedi anamba nga Sir Fred Hoyle agumbaha rogo gako buku nga Astronomy.
2 Singia ani naberãpa atomu watadu ani nagbe berãrani sa gu haurago du riwara, ga Yekova bakere ome naba kina gunde tirani. Zanga kapa, si du ko arengbe tini ka yaa: “Oni túka bangironi ku ari yo gbe ka bi nga: da nafu agi ra re? Ko nakusi ra na rimbasara ni gedigedi ra, ko nayamba ra dunduko ti rimora; mbiko gu babakere ome nga ga gako tandu, na mbiko ko nanyaka rogo tandu yo, a nga gu ru sa nakpa te”! (Yesaya 40:26) Ii, Yekova na “babakere ome” tiko, na ko nga Mburu gu ‘bakere tandu’ i amangisunge nani ka kusa haurago nabaha.
Si Naida gu Ome Susi gu nga ga Aboro
3 Baraho adunga digido ome Mbori ni tini ya, ome aboro nabata abata tigayo. Agu arago dunduko ani andu kurogo, ani nabi agu aboro yo omeyo naima bata. I nazinga rameyo na kina zingo ome, kini ndu ka mangasunge watadu ku sukuru yo na zingo ome, kini yego ku kporo yo na zingo ome, na kini ndu ka ra angianga na kina zingo ome gbua ya, ono na mbugo. Gu kurayo naberã gupai nga ka i nindunga andu kurogo kura rago ka gbianga gu wiri ongoda i aidaha wa kina boro pai re. Ni ga Yekova amoyambu, omerani nabata abata a, mbiko gaani raka nga ga futise fu Mbori naida nyanyaki asadatise. (Marako 6:30, 31; Ruka 13:24; 1 Timoteo 4:8) Na gu kura dungu apai gu duho nabatasa omerani.
4 Wa vura du ani nga aKristano, ani nibandabanda rani be gu fudifudiapai namanga aboro dunduko te. (Eyobo 14:1) Kaza, ariapai nga ga mosoro, watadu gu kura kpakarakpakaraapai namanga aboro dedede rogo raka yo rengbe ka sa rani kpotoraniyo zere, si kini sa rani ani rungbura. Kurii gi kpakarakpakaraapai re, gu kura a’asada gu duho namanga kina aguyo i arungosiyo tipa gayo ruru mangapai. (2 Timoteo 3:12; 1 Petero 3:14) Mbiko gu soapai naye be zegino na mbiko gu sogote duho tipa gaani sunge tungusapa Kindo, bete rani rengbe ka mbu gbe ki da ti gupai nga ani tona kaa berãpa zera ti ngba ga Yekova sunge. Kurii gure, Satana Bakitingbanga namangasunge na agu agene dunduko du beko kini asadi tiko ka sa rani ani mbu gaani kakuti ruru mangapai fu Mbori. Wai tie, rengbe ani ka gbia gu ome nga ga toro nga gu ani aidaha si sa rani ka omerani batinga ani mbu mangasunge ya?
5 Tipa ka duna ome rogo toroyo, ani du wa ka ani akido kuti Yekova, nga gu Bakusiahe duna ome tiko dunduko. Gu mokedi nangia Pauro ayugu gupai nga gu sunge nga ga aKristano naida gu ome susi ga kpakpa aboro. Ko akepai ki ya: ‘Ani na gi kumuko re rogo agu a’akoro i ameke he rogo sende yo, ya gu bakere tandu susi ga aboro ye be Mbori, be rani te.’ (2 AKorindo 4:7) Mbedimbedi aKristano namanga “gu sunge nga ga mbakadapai dagbase” mbiko gu undo naye be agu abadiangbayo duna gu maabangirise nga ga kpotosende. (2 AKorindo 5:18, NW; Yoane 10:16; Yugoti 7:9) Wa duhe nga ani nga kpakpa aboro namanga ga Mbori sunge tiiworo rungosi, ani arengbanga kaa mangaha gbua mbiko kina gaani ome te. Yekova naundo rani rogo gu gene nga ga gako ziazia toro, na sidu gaani rungbura nafu taarimo fu gako ome. Nga gu wasa ani agbiaha be gu kido nga “Yekova nasongoda ruru aboro”!—Atambuahe 37:17.
‘Yekova Nga Gaani Nyanyakipa Ome’
6 Gu Barani nga ga ngbangbaturũ ko na “babakere ome” tiko na ko rengbe taata ka fu ome fu rani. Nirengo, i nagumba gupai fu rani nga: “[Yekova] nafu tandu fu gu ni he amaka ni, na gu ni adu nga ome ti ni ya ko nakiisa omeni. He amáka aparanga, mbugo amánga yo, paranga akumba atíwa atiwa be mbugo ni rengo; ono agu yo nakida kuti Yekova i aúngasi omeyo, i agúka wa adingimo nagu na apupora, i aóra, ka i ambú nga ya, i atá, ka he amáka nga yo ya.” (Yesaya 40:29-31) Mbiko gu soapai nandu kina kumbatayo, ani rengbe ti kura regbo ka bi tirani wa kina gu baoro oto anduni naima zezera ka gene adunga wa ka si oro na ni berewe kumbatayo ya. Ono digido agu abaangirã du tipa unga gudu barabangirani kumbatayo mbembedii, sidu si aidanga omerani bati wa gu sa te. (2 Pekapai 29:11) Vurarani, nga Bakitingbanga, nata wa kina gu “bahu nata ki nipoi,” na ko naida ka rugusa gaani sunge. (1 Petero 5:8) Ani tingidi gupai nga ‘Yekova nga gaani ome nga gaani vurakube,’ ki tingidi gupai a nga ko ima mbakada apai tipa ka ‘fu ome fu guni bati omeni.’—Atambuahe 28:7.
7 Yekova afu gu ome fu Davide si aida ko du nani tipa ka ndu kumbatayo kindi ki du nyanyakii barabangiri gu kikindigi aũkota ko agbia tiko tini. Si du Davide ake gupai tini na idapase dunduko gbiati kido nga: “Ani amánga pai ni ngarã [“na nyanyaki ome,” NW ] wa du Mbori na ani; bambiko ko nga gu ko nikasimba agu yo [ku sande] nafuda rani.” (Atambuahe 60:12) Yekova afu ome a fu Abakuka ko nyasi gako sunge nga ga nebi. Abakuka 3:19 nayaa: “Mbori nga Gbia, ko nga gi ome; ko namanga andure wa andu nzungba, ko nagasa re mi ndu ri gimi tumbatumba aba.” Gu kpiapai gbarii akuraha a nga ga Pauro, nga guko nakepai ki ya: “Mi rengbe na manga apai dunduko rogo [Mbori yo nga guko] nanyakasa re.”—AFiripoio 4:13.
8 Wa kina Davide, Abakuka, na Pauro, ani du wa ka ani duna idapase kuti ga Mbori tandu ka nyakasa rani na ki duna idapase kuti gako ome ka batasa rani. Ni ino ani gupai nga gu Gbia Bakindo nga Yekova nga Mburu gaani ‘nyanyaki ome,’ ani wisiginga pa gu bete agene rengbe ani ka gbia ome nga ga toro rogo be gu mbakadaapai nga gu Mbori afuhe fu rani kpaima.
Gu Mbakadaapai nga ga Toro Tipa ka Fu Ome fu Rani
9 Nyanyaki wisigo Kekeapai na gu undo naye be agu abuku nga ga aKristano rengbe ka fu ome fu rani na ki songodi rani. Bake Atambuahe abibia ki ya: “Boro maku nga gu boro . . . [du gani] ngbarago . . . rogo gu rugute nga ga Yekova, ni nageda gako ndika na worofugo ni kusende uru na yuru. Ni adu wa kina gu ngua i nirũ ti ngba di, si ki nizuku ti regboho, ka kpehe auga nga ya. Gu pai ni amanga, si adu na wenepia.” (Atambuahe 1:1-3, “oni ringbisingaha na NW.” ) A wa si aida ani ri riahe tipa kpotorani duna ome, si naida ani di gu riahe nga ga toro a kutii kpotoraniyo nga gu Mbori afuhe rogo Fugo ko na rogo agu abuku nga ga aKristano tipa si banda gaani ome nga ga toro. Sidu tie, si na nyanyakipaha kaa manga wene wisigopai kini berẽkuriipai.
10 Si nafu mosoro nirengo kaa berãkurii gu “dudungura apai nga ga Mbori.” (1 AKorindo 2:10) Ono gini regbo rengbe ani ka bi saa tipa berãkuriiapai? Wiri Abarayama nangia Yisaka ‘andu nyemu ho uru adesa ni ku ati yo ka berãkuriiapai.’ (Bambata Pai 24:63-67) Gu bake Atambuahe nangia Davide ‘anaberãkurii agu apai nga ga Mbori ti arago maarago yuru.’ (Atambuahe 63:6) Ani rengbe a ka wisigo Fugo Mbori na kini berẽkuriihe wiso, nyemu, yuru—nirengo, ti aregbo dunduko. Ngbatunga gu wisigopai re nandu na ani sa kura ga Yekova mbakadapai nga gu ko afuhe tipa si ninyakasi rani rogo toroyo—nga kparakpee.
11 Kpara fu Mbori dedede nga undo tipa ka fu ome fu rani. Ani ‘kakuti kparakpee kindi.’ (ARomo 12:12) Ti kura regbo, si naida ani sanahe zukazuka tipa tatamana na gu ome ani aidaha tipa ka sota na kura asada. (Yakoba 1:5-8) Ani tambua Mbori na kini taasirimoko a ho ani abi gako ringbisaapai ni si nimangi watadu ho ani abi gupai ni nga ko nyakasi rani ani ndu kumbatayo kindi rogo gako sunge. (AFiripoio 4:6, 7) Ka ani nye mbembedii na Yekova rogo kparakpee, ko ambunga rani wa gu sa te. Davide ayaa: “Oni ngére, Mbori nga gi mounda.”—Atambuahe 54:4.
12 Gu Barani nga ga ngbangbaturũ ko nafu ome fu rani na kini nyakasi rani rogo gu gene nga ga gako ziazia toro, watadu zaza ome mangapai. Pauro akepai ki ya: ‘Mi nakuka fu Baa, ko ídihe fu roni, ku sangba gu ũkumuko yo nga ga gako taarimo, ya oni nyaki ni tandu be gako toro kpotoroniyo.’ (AEfeso 3:14-16) Si naida ani kparikpee tipa ziazia toro, ki duna gu kido nga Yekova afuhe afu fu rani. Yesu aberẽkuriipai ki ya: Ka gude aasanahe tipa tĩo, ya mo gu bani duna nyemuse rengbe ka fu woo funi? Wa gu sa te. Sidu ko ki digisihe kuti gupai nga: “Wa du oni tigaoni nga gbegberẽ aboro ki ini pa gama wene ahe fu awironi, [ya mo gu] Baroni du ngbangbaturũ yo ko . . . [asusanga rogo] gama Ziazia Toro fu agu yo nasana ko, te?” (Ruka 11:11-13) Ani kparikpee na ngbatunga gu kido re na kini tingidi gupai dedede nga Mbori rengbe arengba ka sa gako ruru amoyambu i “nyaki na tandu” rogo gako toro.
Dungurati—Nga Undo Tipa Nyakasa Rani
13 Yekova nafu ome fu rani rogo gu gene nga ga agu adunguratise nga ga aKristano. Yesu ayaa: “Ka aboro dungura tiyo ue na biata ni rimore, mi du kina yo dagba yo.” (Matayo 18:20) Ho Yesu amangi gu mokido ni re, ko aasakapai tipa agu apai si aida agu aboro nangbe mbatayo rogo apai yo rogo dungurati moiberãyo sani. (Matayo 18:15-19) Ono tie, rogo mangapai, gu fugo ko re a tipa gaani adunguratise dunduko, na kikindigi adunguratise, nga gu i naatonaha na kparakpee kini digisihe na kparakpee ti rimoko. (Yoane 14:14) Sidu, si ni mamu ka du pati ngbatunga agu adunguratise nga ga aKristano re, singia aboro pati ni ni kina beteyo gbua watadu dungu akutu aboro duho pati ni. Ani dunga tie na tambuahe tipa agi apai nga gu mbakadi yo ho si ninyakasi rani rogo toroyo re na kini fõngbaduraniyo ani kpinyemu akuarani na kini mangi wene asunge.—AEbere 10:24, 25.
14 Agu abaakumba nga aKristano nafu undo rogo toroyo na kini ngarasi awirina. (1 Petero 5:2, 3) Pauro anaundo agu adungurati ko anamangasunge rogo na kini ngarasi agu aboro nadu rogo, a wa kina gu agu ababiapai nata ata amangaha areme. Nirengo, ko anakpinyemu ka duna agu akurako nga aidipase tipa wa ka i aasonosa tiyo dagbayo na kini ngarasi tiyo. (Amokedi 14:19-22; ARomo 1:11, 12) Ani dunga tie na tambuahe dedede tipa gu gaani abaakumba du rogo gaani dungurati ki du a na tambuahe tipa gu kura ababiapai nga aKristano, nga aguyo namanga bakere papara sunge rogo nyakasa rani rogo toroyo.
15 Agu akuarani nga aidipase du rogo dungurati rengbe ka duni agu aboro ‘nangarasa rani.’ (AKorosaio 4:10, 11) Ni ndikidi ‘abadia ngbanya,’ i rengbe ka undo rani ti agu aregbo nga ga gberangbii. (Asanza 17:17) Ni kpiapai, ho i azaki ga Mbori amoyambu ni 220 rogo gu bataya zizi aboro nadu Sachsenhausen yo nga gu agu ababandarago nangia ga Nazi yo aabandaha rogo 1945, i andu kere nunguro tipa akirometere 200. I adungura tiyo kurogo arimbasa kini ndu, sidu aguyo kpotoyo adu nyanyakii kini tura aguyo kpotoyo aima rungbura rii gu bete rukutu aũtinda ahe duna anduhe nga angbagida. Sangbanaha angia gine? Ti regbo gu nduge kpio naimi agu aboro i aduna yo rogo gu bataya zizi aboro re susi 10,000, anga guni ho sa dagba aDezire Yekova nakpi te. Ngbatunga agu apangbanga re, nga gu i akusaha rogo agu abuku nga ga Watch Tower, kodihe na Buku Garã nga ga aDezire Yekova na gu buku nga ADezire Yekova—Abatakipande ga Mbori Kindo, nayugo gupai nga Mbori nafu ome fu gako aboro, tipa ka omeyo batinga ya.—AGaratio 6:9.b
Gaani Sunge Tungusapai Nanyakasa Rani
16 Rimisotise dedede kurogo manga sunge Kindo nanyakasa rani rogo toroyo. Ngbatunga gu sunge re naundo rani ani dungura berãrani kuti pa ga Mbori Kindo na ki duna pa raka nyeanye kindi bangirani na pa agu amaku ani ka gbiaha be gi maabangirise re. (Yuda 20, 21) Agu akidohe nga ga Kekeapai nga gu ani naafura tipaha gene gaani sunge tungusapai yo nafu maabangirise fu rani na si rengbe ka sa rani ani diberã wa gu nebi nangia Mika, nga guko nayaa: “Ani atá na rimo Yekova gaani Mbori nye anye kindi.”—Mika 4:5.
17 Kina boro gaani pagume dagbarani na Yekova nanyaka wa ani amangasunge gbe na Kekeapai rogo yugopai fu kura aboro. Ni kpiapai, ho ani awisigo Baibiri ni na aboro rogo gayo akporo rogo gu buku nga Gu Inohe Nandu sa Nyenye Unga, si ni pa tatamana ka geda bete agu averesi yugu yo kina baraha na fuo gure, ani kini sakirogoyo. Gere naundo gu boro ani awisigopai na ni na kini nyakasi kina boro gaani giarogopai yo nga ga toro a. Kangia si ni kpakarakpakarapai fu gu bawisigipai re ni girogo kura berãpai nga ga Baibiri watadu kura sanza nga ga Baibiri, ani rengbe ka sungo na ni susi bara sa tipa ka nyasa kapita sa nga ga gu buku nga Inohe. Nga gu ngbarago ka ani du nani ka ani mbakadi tirani wenengai na kini asadi tirani gbe ka undo kura aboro i mbedi na Mbori!
18 Na agarã nibasasa, awirina namangasunge wenengai na gu buku nga Inohe ka undo dungu akutu aboro i da ni gu ga Yekova amoyambu naima kparatiyo, na gere nakoda undo gu dungu aboro naadunga mbata na inohe rogo Baibiri ya. Ni kpiapai, ho ko aduni kindi ni gudee, kumba rogo gu pambori nga ga aHindu Sri Lanka yo agi fugo Dezire Yekova sa ri nifura tipa Paradiso zanga ri ini nga ko nagiaha. Fuo susa bete agarã, ko aye koyo du ri ni, ni kina ipo, kumbaari ki tona wisigo Baibiri na ko. Nirengo, gu paranga kumba re anaye tipa wirikapai na auru dunduko, sidu i ki nyasi gu buku nga Inohe vuru guru regbo yo. Ko atona kaa du pati adunguratise nabaha, ki kpara tiko kusayo ti gako kuru pambori, na ki da ni batakipande Kindo. Ho i abapatizi ko ni, ko aima tona kaa wisigo Baibiri na kura boro nga guni ko aini ni.
19 Gbata agu apai nga ga Kindo mbata nafu gu ngbarago fu rani nanyakasa rani. (Matayo 6:33) Wa a’asada nibakiakia avura kaa manga rani, ani nandu kumbatayo kindi na ngbarago na kini takipande wene pangbanga zaaza. (Tito 2:14) Dungu rani namanga agu apai si aidaha rogo sunge zakagene, na gu kurayo gu duho namangasunge rogo agu arago du zingo rogo ni bakerehe tipa abatungusi wene pangbanga. Singia ani nasonosa agu apai nga ga Kindo na ngbarago rogo agi agene re watadu rogo kura agene, ani na kido nga bangiri Yekova agonga ti gaani sunge na gu nyemuse ani aayugoho tipa rimoko te.—AEbere 6:10-12.
Oni Ndu Kumbatayo Kindi Mbiko ga Yekova Ome
20 Rogo apai dunduko, ani yugunga gupai nga ani nakido kuti Yekova na kini ngere kubeko tipa ome. Ani rengbe ka mangaha wo ni gbia ani undo wenengai be gu mbakadaapai nga ga toro nga gu ko amangaha rogo gu gene nga ga gako ‘ruru moyambu.’ (Matayo 24:45) Wisigo Fugo Mbori nisase na wisigoho rogo dungurati be gu undo naye rogo agu abuku nga ga aKristano, gu kparakpee naye ngbaduseyo, gu undo nga ga toro naye be abaakumba, gu wene kpiaapai gu ruru akuarani nga aidipase amaaha, na manga sunge tungusapai dedede gudu dagba agu ambakadapai nanyakasa gaani pagume dagbarani na Yekova na kini fu ome fu rani ani ndu kumbatayo rogo gako ziazia sunge.
21 Gu gaani rungbura nga ga aboro ki vura du, Yekova anyakasa rani anyakasa ani mangi gupai ko akpinyemuhe ka ani akido kuti ko tipa undo. Ni ino ko pa gu zingo du tipa ngbatunga gu undo re, gu mokedi nangia Petero akepai ki ya: ‘Ka boro amangasunge, ni mangihe wa ni namangaha ni gu ome Mbori nafuhe.’ (1 Petero 4:11) Na Pauro ayugupa gako kido kuti gu ome fu Mbori he ho ko aya ni wee: ‘Mi nangi angi mbiko rungbura mi, ti regbo zingo ahe, mbiko asengahe, mbiko arungosi, mbiko fudifudiapai, tipa rimo Kristo; bambiko ho mi nirungbura ni mi nidu ho nyanyakii.’ (2 AKorindo 12:10) Ani yugunga kina gu bangisa kido tie re na ki nifunga taarimo fu gu Gbia Bakindo nga Yekova, nga guko nafu ome fu guni omeni nabati.—Yesaya 12:2.
[Gu rukutu kekeapai du bandu kpewaraga yo]
a Rogo gu geda anamba nga ga Amerika, i nake gi namba re nga 1 na aziro fuoho 20.
b Nga gu Watchtower Bible and Tract Society of New York, Inc. akusihe (si dunduko rogo pa-Ngirisi).
Waigu Ka Oni Karagapai?
• Tipagine ga Yekova aboro aida gu ome tini susi gu nga ga aboro?
• Gini gopai duho rogo Kekeapai nayugo gupai nga Mbori nafu ome afu fu gako amoyambu?
• Gini bete mbakadaapai nga ga toro Yekova namangihe si ninyakasi rani?
• Waigu rengbe ani ka yugo gupai nga ani nangera kube Mbori tipa ome?
[Asanahe nga ga wisigopai]
1. Oni yugunga kpia gu ome du rogo agu ahe Mbori akusihe.
2. Yesaya 40:26 nagumba gini memepai tipa ga Yekova ome?
3, 4. (a) Gini bete apai rengbe ka batasa omerani? (b) Gini sanahe naida ani wisigihe?
5. Tipagine si aida gu ome tini susi gu nga ga aboro tipa ani ndu kumbatayo na gu sunge nga ga aKristano?
6. Waigu Kekeapai akido rani na gupai nga Yekova nga Mburu gaani ome?
7, 8. Gini gopai duho tipa gupai nga Yekova anyakasi Davide, Abakuka, na Pauro?
9. Gini nyanyakipa sunge agu abuku nga ga aKristano amangaha rogo riga rani?
10. Gini regbo rengbe ani ka bi saa tipa wisigopai na berãkuriiapai?
11. Tipagine si aida tini kparakpee dedede duna banyanyakipaha bangirani?
12. Tipagine si aida tini ani sana Mbori tipa gako ziazia toro?
13. Waigu si aida ani nibi agu adunguratise nga ga aKristano?
14. Gini undo ani agbiaha be gu asadatise agu abaakumba nga aKristano amangaha?
15. Waigu du agu akuarani nga aidipase rogo gaani dungurati ni agu aboro ‘nangarasa rani’?
16. Waigu manga sunge tungusapai dedede anyakasa rani rogo toroyo?
17. Gini aberã fu yo ho tipa wisigo Baibiri na aboro rogo akpuyo?
18. Oni yugukpia wai i amangasunge wenengai na gu buku nga Inohe.
19. Wa ani agbata agu apai nga ga Kindo mbata, ginipai rengbe ani ka duna maabangirise tipaha?
20. Waigu rengbe ani ka yugo gupai nga ani nangera kube Yekova tipa ome?
21. Waigu agu amokedi nangia Petero na Pauro ayugu gupai nga ani na zingo tipa gu ome Mbori naafuhe?
[Gu kpiahe du ti kpewaraga 22]
Kina boro gaani pagume dagbarani na Yekova nanyaka wa ani amangasunge na Baibiri kaa yugopai fu kura aboro