Ziazia Toro Nafu Tandu Furani Tipa Ani Sovura Kuti Aʹasada Na Zerakpotoseyo
“Oni adía tandu ho Ziazia Toro ka ye ni ku ri roni.” —AMO. 1:8.
1, 2. Ginihe Yesu akidopaha fu gako abawiriki, na tipagine i aida guhe re aida ti ni?
YESU aima ino gupai nga gako abawiriki arengbanga ka manga agu apai dunduko ko aya fuyó i mangihe na kina gu ome nadu tiyo te. Fuo berãko kuriipa gu bakere sunge tungusapai nadu fuyó kumbatayo, na ki berẽkuriipa ome avurayo gbiati gu rungbura nga ga borose, ko abi gupai ziazia nga si naida Mbori fu ome afu fuyó. Sidu, mbata fu Yesu ga ku ngbangbaturũ yo, ko akido gako abawiriki ki yaa: “Oni adía tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na digida sende yo.”—Amo. 1:8.
2 Gu ga Yesu kidohe re atona ka digiso tihe rago Pendekote rogo gu garã nangia 33 F.B.K. ho ziazia toro ayeni kurii gako abawiriki tipa i ndu ka hiiso Yerusarema na sunge tungusapai. Anga boro ho narengbe ka rugusa gayó sunge te. (Amo. 4:20) Ga Yesu ruru abawiriki kodihe na ani a naida gu tandu aida Mbori afuhe re “da ti digido zegino.”—Mt. 28:20.
3. (a) Oni sakingo pai tipa gu kparakparapai du dagba toro na tandu. (b) Ginipai rengbe gu tandu Yekova afuhe ka undo rani ani mangihe?
3 Yesu agumba gupai fu gako abawiriki nga ‘i agbia tandu ho ziazia toro ka ye ni kuriyó.’ “Tandu” kia ti “toro.” Ga Mbori toro, nga gako zaaza ome, nga gu ome ko amaaha kurogo boro yo watadu kurogo he yo tipa si mangi gupai ko akpinyemuhe. Ono tie, tandu nga gu ‘rengba du boro nani ka mangapai.’ Tandu rengbe kadu adu ti boro gbua ka sunge adunga ti ni ya daho ní nika berãpa mangapai ni nani. Sidu tie, ani rengbe ka ringbisa ziazia toro kuti gu ome karaba ninaambiisa beteri, na ki ringbisi tandu kuti gu ome du rogo gu beteri i nambiisihe. Gu tandu Yekova afuhe fu gako amoyambu rogo gako ziazia toro yo naundo rani nibasasa tipa ani mangi agu apai dunduko si aidaha be agu aKristano naima kparatiyo fu Yekova, na ki sovura kuti agu apai rengbe ka gbia rani.—Oni gedi Mika 3:8; AKorosaio 1:29.
4. Ginipai ani ka wisigoho rogo gi kekeapai re, na tipagine?
4 Wai du gu ome ani agbiaha be ziazia toro niyuguyuguhe? Gini ngbatunga apai rengbe ani ka mangaha nisangbana gu ome nga ga ziazia toro? Wa ani amanga ome tipa kaa mangasunge fu Yekova ngba ruru gene, ani nagbiatirani na dungu akpakarapai nga gu naye be Satana, be gako zogarago, watadu be kina gaani zangarengba. Si ninyanyakipa pai ani dibe agu akpakarapai re tipa ka kpatagara kuti rurupai, kini tungusipai dedede, na ki banda wene pagume dagbarani na Yekova. Ani makianga pa wai ziazia toro aundo rani ani sovura kuti aʹasada, mbugo, gbiati zerakpotoseyo.
Sovura Kuti Aʹasada
5. Wai gu rengbe kparakpee ka ngarasa rani?
5 Yesu aya fu apefuoko i nikpari kini yaa: “Ka mo ngbé nga fu rani ku mbata yo sa asada ya, Ono mo túka rani ti gbegberẽpai.” (Mt. 6:13) Yekova ahenga undo gu gako ruru amoyambu nga aguyo ka ya fuko wee, ko tuka yó be gbegberẽpai te. Ti gu kura regbo sa, Yesu ayaa: ‘Gu Baroni du ngbangbaturũ yo nagama ziazia toro fu agu aboro nasanako tipaha.’ (Ruka 11:13) Nangbaa gupai nga Yekova nafu gako ziazia toro afu furani, nga guhe naundo rani tipa ani mangi gupai du niruruhe! Rengo ngaha nga, anga pa fuko gako ziazia toro furani nika sa gupai nga ka aʹasada gbianga rani ya te. (1 Kor. 10:13) Ono ho ani agbiatirani ni na aʹasada, gure nga gu regbo nzunzu si aida ani kpari kakaka.—Mt. 26:42.
6. Wai Yesu akaragapai fu Satana?
6 Ho Bakitingbanga aʹasadi Yesu ni, Yesu adipai rogo Ziazia Kekeapai ki gumbaha fuko nikaragapai. Fugo Mbori aima du wenengai rii Yesu yo si du ko akaragapai ti ni niyaa: “Si ni keke he ya . . . Si ni keke he berewe ya . . . Satana, mo gúari erẽ! bambiko si ni keke he ya, ‘Mo irisi Gbia nga gamo Mbori mo rá fu kina ko.’” Nyemu Yekova na nyemu Ziazia Kekeapai nafõngbadu Yesu yo ko ka agu ahe Satana aidi ka fuhe fuko niasada. (Mt. 4:1-10) Tifuo Yesu dibe Satana na gu gako aʹasada re dunduko, Satana ambuko.
7. Wai Ziazia Kekeapai aundo rani ani sovura kuti aʹasada?
7 Wa duhe nga Yesu nga Wiri Mbori akido kina kuti Ziazia Kekeapai tipa ka diabe ga Satana aʹasada, si naida ani mangihe susi gu Yesu amangihe. Nirengo, tipa ka sovura kuti Satana na gako aboro dunduko ki dibeyo, si naida ani mangi nyanyaki asadatise tipa ka inido tirani na ga Mbori arugute na kini raki ringbisihe kutini. Badungu aboro natona ka raka ringbisihe kuti gupai Mbori akpinyemuhe fuo wirika yó Ziazia Kekeapai ki rugutiyo naapa ga Mbori tatamana na ruru mangaapai. “Gu pai nga ga Mbori” na gu ome ti ni nasaha si ‘ini agu aberã nga ga ngbaduse na gaha nyemuhe.’ (Eb. 4:12) Ka boro aageda Ziazia Kekeapai dedede na kini berẽkuriihe, si nika undo ní ní ini gu ‘rengo nga ga Yekova.’ (Dan. 9:13) Wa duhe wo, si naida ani niberẽkurii agu averesi nga gu nafura tipa agu arungbura du ani nani.
8. Gini apai rengbe ka undo rani ani gbia ziazia toro?
8 Gu kurapai naundo Yesu ko sovura kuti aʹasada ki dibehe nga, ko ‘ahi be ziazia toro.’ (Ruka 4:1) Tipa kadu wakina Yesu, si naida ani mbedi na Yekova nimanga ani sunge na gu dungu agene ko afu ziazia toro furani ngbaha. (Yak. 4:7, 8) Bete agu agene ko afu ziazia toro furani ngbaha nga, wisigo Ziazia Kekeapai, kparakpee, gbiati kodatise na akuarani aidipase. Dungu aboro bi gupai nga si niwenepai ka fu tiyo ti aregbo dũ ka manga agu apai nga ga toro, mbiko manga yó ho wo naundo yó i naaberã kina agu apai nga ga toro gbe.
9, 10. (a) Gini ngbatunga aʹasada namanga aboro amanga gbe rogo gaoni dagbarago? (b) Wai gu rengbe berãkuriipai na kparakpee ka nyakasa roni oni sovura kuti aʹasada zavura ho omeroni naima bata ni?
9 Gini aʹasada oni asovura kutini? Ya mo oni abingo tironi oni niba nyemu roni ti gu boro angianga gaoni badiarogatise ya? Ka si du nga oni nga gu boro atamanganga rogatise ya, ya mo nyemu manga mbakadapai tipa rogatise amangingo roni na gu boro angianga ndikidi idipase ya? Ho boro abi terevizioni ni watadu ho ní aweteka apai ni rogo Internet, guhe si aidanga Kristano bihe ya ima rengba ka gba wa ikpirogumba. Ka si du nga ngbatungapai wa gure aima manga roni, ginipai oni amangihe? Si nipatatamana ka boro berẽkuriipa wai rengbe mbugene fu gbegberẽpai bara sa watadu bara ue ka sa boro ní mangi kere ingapai. (Yak. 1:14, 15) Oni berẽnga pa gu gberarago ka oni baha ti Yekova, ti dungurati, na ti gaoni aborokporo ka oni mangi kere ingapai. Ono gigiri sangbakpotoyo tigaha naye be kakuti agu arugute nga ga Mbori. (Oni gedi Atambuahe 119:37; Asanza 22:3.) Ka oni gbiatironi na ngbatunga agu aʹasada re, oni mangi kpee fu Yekova tipa ko undo roni.
10 Gu kurapai kinaho si aida ani inihe tipa ga Satana aʹasada. Satana aye fuo Yesu na asada fuo gino Yesu riahe tipa aʹuru 40 ngbakungbo yo. Zanga kapa, Satana abi gupai nga gu regbo re nzunzu nangia wene regbo tipa ka asada Yesu. (Ruka 4:13) Satana nagbata kina boro gu regbo ngbaangba fuko tipa ka asada rani. Wa duhe tie wo, si naida gupai nga ani du nyanyakii rogo toro yo ti aregbo dunduko. Satana naasada boro gbe ti gu regbo biko gupai nga ní rurungburaa. Sidu, ka ani bi gupai nga omerani ima bata watadu kpotoraniyo ima zera, si naida ani kpari susi gu nidumbata fu Yekova tipa ko fu bandahe furani na ziazia toro.—2 Kor. 12:8-10.
Ziazia Toro Naundo Rani Ani Sovura Kuti Mbugo na Zerakpotoseyo
11, 12. (a) Tipagine kura aboro azera azera ti ni kpotoyo yo areme? (b) Ginihe rengbe ka fu ome furani ani sovura kuti zerakpotoseyo?
11 Wa du ani nikpakpa aboro, kura aregbo kinaho kpotorani yo azera azera. Gure nga gupai du areme rogo aba dunduko mbiko gu raka ani arakaha awere re, si ima hi be fudifudiapai. Isoke, agu apai namanga aboro ti gi gaani regbo re, si aamanganga aboro mbata te. (2 Tim. 3:1-5) Wa Aramegido ambeda, agu apai du wa zingo marã, rungo kpotose yo, na agu akuraha nasona kina kumbatayo gbe. Mbiko gipai re, ngbarani azeranga ti kura aregbo ka bi gupai nga kura aboro kinaho adunga wiri gene beyo wa ka i ngerefuo gayó aborokporo ya te. Omeyo nabata abata, na ome apai ima fu riyo. Ka si du nga wo duhe tipa roni, ginipai rengbe oni ka mangaha tipa ka sovura kuti gu asada re?
12 Oni tingidi gupai nga, Yesu akido gako abawiriki nga ko afu moundo afu fuyó, nga ga Mbori ziazia toro. (Oni gedi Yoane 14:16, 17.) Gu ga Mbori ziazia toro re nga guhe nyaki omehe kisusi rogo zegino naabaha. Yekova rengbe ka mangasunge na gako ziazia toro ka fu gu ome furani ‘susi gu ani aidaha’ tipa ka hi ngbatunga aʹasada dunduko. (Ef. 3:20) Kuti sangba gu mokedi nangia Pauro, ka ani akido kuti ziazia toro, ani nika gbia “bakere tandu susi” ka si vura du nga ‘i gbisi rani kirikiri.’ (2 Kor. 4:7, 8) Yekova akidongo gupai nga ko nika dia agu apai nafuda berãrani kusayo kina awere te, ono ko nafu gako ziazia toro furani tipa ani sovura kutini.—Frp. 4:13.
13. (a) Wai paranga degude sa agbia ngara ka sovura kuti kaza? (b) Ya mo oni iningo pa ngbatunga agu aboro duwa gure?
13 Oni bingo gupai du tipa nazakigene nga Stephanie du garãri nga 19. Ho garãri aduni 12, gu kaza nayosorasi papara boro azi ri. Tona ti gu regbo re ka da ku awere, i gbari bara ue, na gu kaza re mangi ri berewe bara ue ki yosorasi gu papara ri du ku garebeyo na ki sa gupai nga nduge du furi nikpakarapai na ka ri naangeranga wenengai ya. Ri nabanda omeri tipa agu apai nyakipaha gbe, ngbatunga gu nga agu adunguratise nga ga aKristano na sunge tungusapai. Ri nabi wai abi Yekova aundo ri tipa ri naahi agu apai namanga ri. Agu apangbanga du tipa awirina rogo agu awaraga du mburuhe rii Ziazia Kekeapai ri naagedaha tipa si naangarasa ri ti agu aregbo rago agberã tiri. Awirina ima songoda ri bakere gbe nike yó awaraga furi watadu nipe yó agu apai furi nangarasa ri mbata fu adunguratise watadu tifuoho. Agu aboro a ri ayugo Ziazia Kekeapai fuyó nayugo gayó tambuahe tipa gu asadatise ri amangaha nindu yó ku kpuri yo tipa ri naawisigo Ziazia Kekeapai naayó. Stephanie natambua Yekova nibakerehe tipa gipai re. Gu veresi ngba tiri gbe nga gu du rogo Atambuahe 41:3, ri abi gupai nga si adigisi tihe kuti ri.
14. Ginipai si aidanga ani mangihe ho du ani ni na bakere bakabangirise ya, na tipagine?
14 Ho du ani ni na mbugo watadu na bakere bakabangirise, si aidanga ani berẽ gupai nga tipa ka dia gu bakabangirise re kusayo, si naida ani zanga manga agu apai nga ga toro te. Ka ani mangihe wo, si du nikere mumungo diaberã rogo gaani raka. Tipagine ka si du ti ni nikere mumungo diaberã? Si du wo mbiko gupai nga, agu apai duwa wisigo Ziazia Kekeapai, sunge tungusapai, na nduge tipa adunguratise du naundo rani ani gbia ziazia toro. Agu apai nga ga toro ti aregbo dunduko naye na wasa fu boro. (Oni gedi Matayo 11:28, 29.) Dedede, gu kura awirina kinaho ninaaye tipa adunguratise omeyo naima bata, ono ho dunguratise anyasa ni, si nadu wa ka i ya omeyo ima karagatihe.
15. (a) Ya mo Yekova nakidohe nga kina ko nika mangapai tipa Kristano nye niruru ní zanga ní mangi ome nitini? Oni sakingo ho ringbisihe kuti gupai Ziazia Kekeapai agumbaha. (b) Ginihe Mbori akidoho nga ko nika fuhe furani, na gu mokido re nasa rani ani sana tirani na gini sanahe?
15 Si nirengo nga, anga si nitaatapai ka nye niruru Kristano te. Si naida bakere asadatise. (Mt. 16:24-26; Ruka 13:24) Wa vura duhe wo, Yekova ima rengba ka undo gu boro omeni naima bata na gako ziazia toro. Gu nebi nangia Yesaya akepai ki yaa: “Agu yo nakida kuti Yekova i aúngasi omeyo, i agúka wa adingimo nagu na apupora, i aóra, ka i ambú nga ya, i atá, ka he amáka nga yo ya.” (Yes. 40:29-31) Wa duhe tie wo, si naida ani sana tirani na gu sanahe nga, Boro ginipai nzunzu nasa rani ani berẽ gupai nga manga agu apai nga ga toro naba kina mbugo tirani?
16. Ginipai rengbe ani ka mangaha tipa ka ne mbugo gbiati zerakpotoseyo?
16 Fugo Mbori nangarasa rani nga ani idi pa ‘agu apai duna nyanyakipaha gbe.’ (Frp. 1:10, NW) Gu mokedi nangia Pauro aringbisi gu gene raka nga ga Kristano kuti oto abaangirã ki yaa: “Ani mói rõrõi he ku sa yo dunduko . . . , na ani ki oro gu oto du fu rani ku mbata yo kindi.” (Eb. 12:1) Gupai ko aagumbaha nzunzu nga, ani mbu orafuo agu ahe adunga sunge ti ni ya, agu ahe nadia bakere regbo berani, si andu ka batasa omerani. Si rengbe kadu nga ani namangasunge ti aregbo dunduko. Sidu, ka si du nga aregbo dunduko omeroni abata, si naida oni asadi ka wisigo gu regbo gaoni sunge marã adiaha beroni, gu regbo oni adiaha ku gene agu apai yo nga ga wasa, na bakio wai oni angi ambaro. Si naida ruru berã sa rani ani ini pa agu azangarengba du ani nani na ki mbu fu tirani tipa agu ahe adunga sunge ti ni bakere gbe ya.
17. Ginipai rengbe ka zeresa kpoto kura aboro yo, ono gini kido Yekova namangihe nibi gipai re?
17 Si rengbe kadu a nga gu kura rani kinaho kpotoraniyo azera mbiko gupai nga ani nabi gupai nga digido zegino naima aima. (Snz. 13:12) Gu boro kadu na ngbatunga gu berã re, ní rengbe ka gbia undo ti agu afugo du rogo Abakuka 2:3 nga gu nayaa: “Yuguyugupai nasunguda ragoho kindi; si naipisa tihe sa digidaha si aré nga zire te. Ka si du wa si ayé yee, mo súngudi he; si ayé aye ni rengo, si aíma nga te.” Yekova ima kido rani nga digido gi zegino re nika ye kina boro ti gu regbo si aida si ye ti ni.
18. (a) Gini akidohe nangarasa roni? (b) Wai ani ka gbia undo ti gu kekeapai naye fuo gere?
18 Ga Yekova ruru amoyambu dunduko nangera kumbatayo tipa gu uru mbugo gbiati zerakpotoseyo nikaa dunga ti ni ya, ho aboro nikadu ni dunduko ‘niparanga’ yó. (Eyo. 33:25) Zavura awere a, ziazia toro ima rengba ka nyakasa kpotoraniyo ka ani afu tirani dedede kaa manga agu apai nga ga toro. (2 Kor. 4:16; Ef. 3:16) Ka oni mbunga gberarago si sa roni oni zanga gu nyenye amaku du kumbatayo ya. Agu aʹasada dunduko ani agbiatirani nani singia gu naye be mbugo watadu zerakpotoseyo nika nyasa anyasa, ka si anyasanga awere nibasa ya, si nika nyasa anyasa rogo ga Mbori vovo zegino. Rogo gu kekeapai naye fuo gere, ani nika wisigopai tipa wai ziazia toro aundo aKristano i sovura kuti arungosi, na kuti soapai be akurase, na ki hi dungu ngbatunga arungosiro.
Gaoni Karagapai Nga Gine?
• Wai geda Ziazia Kekeapai anyakasa rani?
• Wai kparakpee gbiati berãkuriipai anyakasa rani?
• Wai rengbe oni ka dia agu apai kusayo rengbe ka zeresa kpotoroniyo?
[Gu kpiahe du ti kpewaraga 26]
Agu adunguratise nga ga aKristano rengbe arengba ka zingisa rani rogo toro yo