Agu Amaku nga ga Kindo Rengbe Arengba ka Duni Gaoni

GU MOKEDI ni Kristano nangia Pauro anafura zukazuka rogo bete gu bangua afugo nadu ti gako regbo. Ko agbia gu wirikapai rengbe yo ka ringbisaha areme kuti gu nga ga bakere sukuru [univeresiti]. Ko agbia ngbarago be gu weneapai dunduko gbiati rengo tipa apai nga gu nadu tipa ga Roma boro ringara. (Amokedi 21:37-40; 22:3, 28) Agi adezirepai dunduko re arengbe ka sa ko ko da ni irakumuko na ni baworimo. Si ki vura du wo, ko ayaa: ‘Agu ahe nanakiiso pa re, si adu nga bangire ni he te, mbiko Kristo. Si bangire wa kina mirĩ ahe, ya mi bi Kristo.’ (AFiripoio 3:7, 8) Tipagine Pauro agumbapai tini wa ngbatunga gure?

Ni gu boro i aini ko mbata ti gu rimoko nga Saura boro Taruseu na ni barungosi aguyo ‘naka kuti Gene,’ Pauro ada ni idipase fuo i fu yuguyugupai fuko tipa gu Yesu nazingibekpio na pako ki duni taasitaasihe. (Amokedi 9:1-19) Tipa Pauro, gipai namangi ko ngba gene Damaseke re ayugu gupai fuko zanga kango nga Yesu angia gu Masiya i akidohe tipa ko, watadu Kristo, nga gu boro si adu nga ni adu kumbatayo ni bazogo gu Kindo i akidohe tipaha. Si aye a na bakere ariapai rogo ga Pauro gene raka, wa duhe niyuguyuguhe rogo gu gako nyanyaki gumbapai du kuari re. Ka pehe rogo kura afugo, mbiko du ko ni bagumba rengo na ruru ngbaduko yo, Pauro asaberã ko.—AGaratio 1:13-16.

Rogo Baibiri yo, gu fugo nga “saberã,” i nasaha dedede ti gu pa-Giriki du rogoyo ngburungburu nga “inopai kusa,” nga gu du kia ti gu nga “ino boro pai kumbatayo.” Ngba gi gene re, saberã nakoda aria boro gani berã, gani sino, watadu gani ringbisapai, nga ka ka gu gani kuru agene nadu mbata kini bihe ni gbegberehe. (Amokedi 3:19; Yugoti 2:5) Tipa gupai nadu tipa Pauro, ko aambunga gupai namangi ko ngba gene Damaseke re si nye gbua kina ngbadukoyo watadu si du gbua ni gu yuguyugupai nga ga pambori te. Tipa ko, si angia zingisa ko rameyo ko ini gu rengo nga, gu gako gene raka nadu mbata nga ga zanga inopa Kristo, si angia kungbopai. Ko aini gupai a nga, tipa ka gbia undo be gu gako vovo inohe ko adu nani tipa Kristo, ko du wa ka ko mangipai tipa ka mbakada gako gene raka.—ARomo 2:4; AEfeso 4:24.

Gu Ariapai Naye Na Amaku

Mbata kusayo, ga Pauro inohe tipa Mbori aye gbe rogo gu be-pambori nangia ga aFarusi, nga gu ko adu rogo. Gayo aida aduna bakere nyemu tatamana nga ga aboro na sinoatise. Mbiko gayo asokote nga ga pambori, Pauro azanga ino gupai ka ko adu ngangara tipaha. Wa ko avura kaa berãha ya ko aandusunge Mbori, nirengo, ko aasovura kuti ko.—AFiripoio 3:5, 6.

Fuo gbia ko ruru inohe tipa Kristo na gako sunge rogo ga Mbori ringbisapai, Pauro abi gupai nga si aaida ko siapai: Ya mo ko arengbe ka nye ni Farusi na kini ngi be pakio pako gbiati gako taarimo, watadu si aidi ko aria gako gene raka ki tona kaa manga agu apai dunduko si aaidaha tipa Mbori idi na gako pai? Si ni pa ngbarago nga, Pauro amangi ruru siapai, mbiko ko ayaa: “Zee amanga nga re na wene pangbanga te; bambiko si nga ga Mbori tandu sa bata fu agu yo dũ ka idi pase; fu aYudo mbata, fu aGiriki a.” (ARomo 1:16) Pauro ada ni ngangara batungusi wene pangbanga tipa Kristo na tipa Kindo.

Fuo dungu agarã kusa, Pauro agumba gupai fu akurako aKristano nga: ‘Mi aberãnga ha ya mi aima diaha tigimi te. Ono gipai sa re mangi mi, nga mi atingidanga pa agu ahe nadu sa yo te, mi nadusia gu ringbisiringbisi he du kumbatayo sa dia gu mosoro du ti ga Mbori yambahe ariyo rogo Kristo Yesu yo.’ (AFiripoio 3:13, 14) Pauro agbia undo be wene pangbanga mbiko ko agindigo agu apai na ngbadukoyo dunduko nananyaga ko kusayo tipa Mbori, sidu ko ki tona na ngbadukoyo dunduko kaa gbata agu asasa nadu na ngbanya dagbaha na ga Mbori ringbisapai.

Ginipai Rengbe Oni ka Mangaha?

Isoke fuoho ata turanga wa gi oni gu wene pangbanga nga ga Kindo te. Ngba gu maabangirise angba tironi nga ga raka nyeanye kindi rogo paradiso? Si rengbe arengba ka ngba tironi a wa du sino aboro, mbiko ani dunduko i avungu rani na nyemu raka na ka gbia ngbarago be raka rogo pazereda na ngbabase. Baibiri nayugo gupai nga Mbori ‘amoi nyenye apai ku berãraniyo.’ (Batungusipai 3:11) Sidu si ni sino aboro kaa maabangirise tipa gu regbo aboro nikaa raka rogo pazereda na ngbarago nyeanye kindi. Sidu gure nga gupai gu wene pangbanga nga ga Kindo afuhe fu rani.

Ono tie, tipa ka sa gu maabangirise re ni ndikidipai, si naida oni wisigipai tipa ka ino guhe du gu wene pangbanga re tipaha. Gu mokedi nangia Pauro arugu rani ki ya: ‘Oni kparia pa guhe Mbori akpinyemuhe nga gu duni wenehe nzunzu, ni ziaziaha.’ (ARomo 12:2) Sidu wa kina Pauro, fuo gbia oni inohe na giarogopaiyo, oni du wa ka oni siapai sa.

Ngba kura gene, si rengbe ka du nga oni aima duna kura ngbatunga aida tipa gaoni raka kumbatayo. Oni tingidi gupai nga, Saura aima duna gako aberã tini tipa Mbori mbata fu da ko ni gu mokedi nangia Pauro. Ono kuba gupai nga kaa sungudo iiriwo yugoti be Mbori, tipagine ka oni amakianga gupai re tini na nyanyaki berã ya? Oni sananga tironi ki ya: ‘Mi ini gupai nzunzu Mbori akpinyemuhe tipa ngbatunga aboro gbiati kpotosende? Gini gopai rengbe mi ka fuhe tipa ka songoda gimi aida nani? Gu gimi gopai re rengbe ka ru nyanyakii ka i wisigihe rogo gu imarago nga ga Fugo Mbori, nga Baibiri?’ Pai ho nika gbera fu roni ka oni wisigi agu aida nga ga gaoni pambori rogo gi gene re te. Nirengo, si naida oni mangihe wo, mbiko Baibiri nangarasa rani niyaa: “Oni ásadi apai dunduko; oni ká kuti gu du ni wene he nyanyaki.” (1 ATesaroniko 5:21) Na wai tie, anga gupai nyakipaha nga Mbori idi na ga boro pai tee?—Yoane 17:3; 1 Timoteo 2:3, 4.

Agu abarumbatayo nga ga pambori yo rengbe ka kidopa nyenye raka fu rani kumbatayo. Ono ka i amaanga mburu gu kidohe re rii gu yugopai nga ga Baibiri ya, si aundonga rani tipa ani gbia agu amaku nga ga ga Mbori Kindo te. Rogo gu gako Gumbapai nadu rii Bagangara yo tambua yo ho gbe, Yesu azahe nyanyakii niyaa: “Agu yo naya ti re, ‘Gbia, Gbia,’ i aríma nga ku rogo gu ngbi [kindo, NW ] nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo.”—Matayo 7:21.

Oni kparia gupai Yesu anyakasipaha tipa gbia agu amaku nga ga ga Mbori Kindo, nga manga gupai Bako akpinyemuhe. Ka gumbapai ngba kura gene, gupai nawira si na sinombori rogo, anga si nidingisoro nga Mbori ima ida nani te. Nirengo, Yesu andu kumbatayo niyaa: “ ‘Dungu aboro nikaya fere ni gu rago re wẽ, Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?’ Ono mi akúsa ha fu yo ki ya, ‘Mi aína nga roni wa sa te; oni gúari pati re, amangi irairapai.’ ” (Matayo 7:22, 23) Ziazia tie, gupai duna nyanyakipaha nga ani rugutirani na gupai nga ani ima duna ruru giarogopaiyo tipa gupai du wene pangbanga nga ga Kindo tipaha na fuo gure, kini mangipai ringbisihe kuti ni.—Matayo 7:24, 25.

Undo Kinaho

Tipa agarã susi 100, aDezire Yekova aima digo nitungusi gu wene pangbanga nga ga ga Mbori Kindo. Rogo gu gene nga ga kekekeke abuku na rogo gu gene nga ga fugo na ngbaa, i naundo aboro rogo zegino dunduko tipa i gbia ruru inohe tipa guhe nga Kindo, tipa agu amaku si ka ye nani, na gupai si aida boro mangihe tipa ka gbia ngbatunga agu amaku re.

Ani nangarasa roni oni karagapai wenengai sa gu pangbanga aDezire Yekova atungusaha. Ni dia oni wene pangbanga kugume na kini mangi sangbaha, oni rengbe ka gbia dungu amaku—angianga kina awere sa ya, ono kumbatayo a ho ga Mbori Kindo nikaa zoga kpotosende ni nabaha.—1 Timoteo 4:8.

Oni mangipai kina awere, mbiko agu amaku nga ga ga Mbori Kindo ima mbeda!

[Gu kpiahe du ti kpewaraga 7]

Rogo gu gene nga ga kekekeke abuku na rogo gu gene nga ga fugo na ngbaa, aDezire Yekova natungusa gu wene pangbanga nga ga ga Mbori Kindo