Oni Moiberã Roni Fuo Ga Mbori Iiriwo Mangaapai
“Ako Yekova gi Mbori, mo angeesi gamo iiriwo mangaapai na gamo aberã . . . kono du ani ni; i arengba nga na ringbisa ha na mo te!”—ATAMBUAHE 40:5.
1, 2. Gini gopai du berani tipa ga Mbori iiriwo mangaapai, na ginipai si aida gere fõngbaduraniyo ani mangihe?
HO ONI ageda Baibiri ni, oni rengbe ka bi gupai ni kina ipo nga Mbori amangi iiriwo apai tipa gu gako aboro nadu mbata, nangia aYisaraere. (Yosua 3:5; Atambuahe 106:7, 21, 22) Ka si vura du nga Yekova arimisonga tiko areme kurogo agu apai nga ga aboro wa gure te, ani nabi gopai tipa gako iiriwo mangaapai pati rani ni dunguhe. Sidu, ani na ndupai kina berani tipa koda fugo rani kuti ga bake Atambuahe niyaa: “Ako Yekova, na nge gamo mangaapai! Mo amangi he dunduko na tatamana; kpotosende hi be gamo ũkumuko.”—Atambuahe 104:24; 148:1-5.
2 Dungu aboro areme nabasapa ngbatunga gu ziazia gopai du tipa ga Bakusiahe mangaapai re watadu kini kaha. (ARomo 1:20) Ono tipa rani tigaani, si gu daada ani berẽkurii gu mangaapai re na ki da ti gu digisopai daada ringbisihe kuti gaani ba na gaani tindiro barabangiri Bamangi rani. Eyobo kapita 38 dati 41 nafu bawene undo tipa gipai re, mbiko yo ngaha re, Yekova agbeberã Eyobo kuti kura Gako kparakpara iiriwo mangaapai. Ani wisiginga bete gu nyanyakipa sakaapai Mbori akusihe re.
Gu Mangaapai Duna Ome na Ni Iiriwoho
3. A wa duhe nikekehe rogo Eyobo 38:22, 23, 25-29, gini ahe Mbori asanahe tipaha?
3 Ti kura regbo sa, Mbori asana Eyobo ki ya: “Mo ariminga kurogo abambu igo fäkäfäkä morogumba, watadu mo abinga abambu igo morogumba, nga gu mi naabandaha tipa rago fudifudipai, tipa uru kpata na uru vura?” Rogo dungu apapara gaani kpotosende, fäkäfäkä morogumba gbiati morogumba ni agu ahe i abihe dedede rogo raka yo. Mbori aafura kindi niyaa: “Da nasari gene fu fufu mai, na gene fu ikpiragumba? ka ye na mai ku rogo gu ringara adu nga aboro ni ya, na ku rogo gu ngbakungba adu nga aboro ni ya; ka ungasi ngbakungba na bate; ka manga sende si kusi nvuo. Bavungu mai ti ni? na da navungu togotogo ndomo? Rukumbu da yo zerarago aye ni? Na gu dododo kputakputa pusi mai nga ga ngbangbaturũ, da nabatika ha?”—Eyobo 38:22, 23, 25-29, “oni ringbisingaha na NW.”
4-6. Rogo gini gene duhe nga ga aboro inohe tipa fäkäfäkä morogumba gbua ni kina betehe?
4 Aguyo naraka rogo gu riko aboro amangapai ni gbäräkägbäräkä kina kumbatayo na kini idi ka ndu nunguro, i rengbe ka bi fäkäfäkä morogumba ni guhe nagbarasapa nunguro beyo. Ono tie, dungu kura aboro nabi gu fäkäfäkä morogumba re tigayo nibawene he, nga gu nasa sende garã nibawenehe kini fu amamu tipa kparakpara mangaapai. Ni du oni na gu ga Mbori sanahe re berã roni yo, ya mo oni na wene inohe tipa gu fäkäfäkä morogumba re, na tipa wai a du bangeraha? Ii, ani ima ino wai bakere bakioho angera, isoke ani avura bi kpia gugudoho watadu ani avura bi kina boro bakioho nzunzu. Ono ginipai tipa gi misimisi morogumba re nibasasa? Oni ini wai du bangeraha, isoke nga ka wisigoho rogo gu rago si aenge rogo?
5 Gu kura aboro adi dungu bawe agarã kaa wisigo misimisi morogumba na kini dekpiaha. Gu tooni morogumba re rengbe ka duna dungu kama kputakputa ime rogo nibakiakia nga gu duni bawene sikisosikisoho. Gu buku nga Atmosphere nayaa: “Pa nge angbatunga misimisi morogumba ningia kuru pangbanga, wa aboro birĩ-inohe avura ninyakasi gupai vurũ nga pai ho naka na gu si he wira kuraha te, anga agu ho ue i abingoho nawira tihe te. Gu kumba nga Wilson A. Bentley, nga guko namangi bakere wisigopai tipa agarã susi 40 kaa wisigo gi misimisi morogumba re na kini dekpiaha na gu undo nga ga maikorosukopu, abinga agu ue nawiri tihe gbe te.” Na ka i vura bi agu akuraha ue wiri tihe wa abi, nga gupai ka gumbanga mangi ya, ya mo gure rengbe ka aria gu iiriwo pai nirengo du tipa padu gu misimisi morogumba re ni badunguhe nibakiakia?
6 Oni tingidinga pa ga Mbori sanahe: “Mo ariminga kurogo abambu igo fäkäfäkä morogumba?” Dungu aboro naberãpa rungbutorungbuto mai ni agu abambu du fäkäfäkä morogumba niigiigihe kurogo. Oni rengbe ka berãpa nduge kurogo abambu igo gi misimisi morogumba re tipa ka gida dendekere arikoho na ka wirika wai si aenge? Gu buku nafu tingidapai tipa dungu apai nga ga birĩ-inohe nayaa: “Gu sino apai namanga bebere unduguru kputakputa ime yo na wai si aenge, nga gu nasa togotogo ime rogo dubo si kputa ho du bazerarago ni nga (-40°C), si ni gupai i ata gianga rogoyo ya.—Atambuahe 147:16, 17; Yesaya 55:9, 10.
7. Waigu du bakio ga aboro inohe tipa mai?
7 Ginipai tigaha tipa mai? Mbori asana Eyobo ki ya: “Bavungu mai ti ni? na da navungu togotogo ndomo?” Gu bangisa buku nafu tingidapai tipa dungu apai nga ga birĩ-inohe re nayaa: “Mbiko gu kpakarakpakara agene wege ata ngbaha na mbiko gu bakio gundugundu ime du rogo wege nibakiakia na bange gu mbusuru ahe du rogo, si ni gasigasipai ka ringbisapa gu gene dubo arungbuto rogo ka na ni mai.” Ka pehe rogo taata afugo, aboro birĩ-inohe aima fu aberã sirisiri tipa kura apai, ono i arengbanga nirengo ka ringbisapa mai wenengai te. Si ki vura du wo, oni ima ino gupai nga, gi mai duna nyanyakipaha re naana ana, kini tudi kpotosende, kini songodi kurukuru ahe, kini sa unga si duho na ki du wenengai.
8. Tipagine ru gu fugo Pauro aru tini du nikekehe rogo Amokedi 14:17?
8 Anga oni ima ida kuti gu digisopai gu mokedi nangia Pauro ada tini tee? Ko angarasi aboro i bi gi iiriwo mangaapai re ni dezirepai tipa gu boro du kugii agi ahe re. Pauro aya tipa Yekova Mbori wee: “Ko ahe nga dezireko te, wa ko animangi wene pai, ki fu mai fu roni ngbangbaturũ yo, na rago ida riahe gbe, ki hihisi kpotoroni yo ni riahe na ngbarago.”—Amokedi 14:17; Atambuahe 147:8.
9. Waigu ga Mbori iiriwo mangaapai ayugo gako bakere ome?
9 Zanga kapa, Bamangi ngbatunga gu iiriwo apai nafu undo re na gu tatamana beko gbiati bakere ome adunga digidoho tini ya. Nibipa gako ome, oni berẽnga gipai re: I nayaa abavugumo mai nga gu naye wa sa na ikpirogumba namanga wa bara 45,000 rogo auru nibasasa, nga gu namanga susi amirioni 16 rogo garã sa. Gere nayugo gupai nga ti kina boro gi regbo re, si namanga wa 2,000. Gu rungbutorungbuto mai duna dendekere apaparaha nga gu naye na bangisa bavugumo mai gbiati bangisa ikpirogumba, si na ome ti ni bara bawe watadu susi ome gu kikindigi abundu i abafuhe ti regbo Ue Vura nga ga Zegino. Oni nabi bete gu ome re ni ikpirogumba. Kurii gupai nga si nafu gunde, ikpirogumba nafu undo rogo kusa ngbatunga gu papara wege nga nitrogen nga gu nada ti sende ka duni mbudu kurukuruahe kini dihe. Sidu, ikpirogumba nga yuguyugu ome, ono si nafu ndikidi aundo a.—Atambuahe 104:14, 15.
Gini Digisopai Da Oni Tini?
10. Waigu rengbe oni ka karagapai sa agu asanahe ani abihe rogo Eyobo 38:33-38?
10 Oni berẽnga pa tironi ya oni kuba Eyobo, Mbori Tanduapai dũ kini sana roni. Si nawira oni aida gupai aida nga dungu aboro agbenga berãyo gbe sa ga Mbori iiriwo mangaapai te. Yekova nasana rani na agu asanahe ani agedaha rogo Eyobo 38:33-38. “Mo ini agu andika nga ga angbangbaturũ? Mo rengbe ka mbakada gu zogarago du yo wo auru kpotosende no? Mo rengbe na tumba fugoro si da ku amai yo, bafufu mai wandia ku ri ro? Mo rengbe ka keda aikpira gumba, ya si ndu, si ki ya foro, ‘Ani du re’? Da namoi tatamana ku rogo adubo? watadu da nafu rugatinapai ku rogo ndomo yo? Da rengbe ka geda amai be gani tatamana? Watadu da rengbe ka uka mai rogo agu amanguhe du ngbangbaturũ yo, ho nvutu nata guta ha ni, aunduhe ki me tihe wa sa nyanyaki?”
11, 12. Gini bete ahe nayugo gupai nga Mbori nga Bamangi iiriwo apai?
11 Ani wisigi kina bete agu apai gbua Eriu akusihe tipa sakaha na Eyobo, na ani bi kina bete agu asanahe Yekova asana Eyobo ko karagapai sani “wa kumba.” (Eyobo 38:3) Ani nayambaha nga “bete” asanahe mbiko rogo kapita 38 na 39, Mbori agbeberã ko sa kura iiriwo kusikusiahe kia. Ni kpiapai, si nga gu mbakadapai nga ga aũngbangbaturũ. Da ini gaha andika dunduko, watadu agu aringbisapai si amangasunge kuti ni? (Eyobo 38:31-33) Yekova agbeberã Eyobo kuti bete anyaa—nga bahu na gu zire du wa bakiki, gu meme nga ga nvuo ru na gu dongi nga ga nvuo ru, gu nyaa du wa gbeẽ na gu zire nga surutio (naamu), gu farasi duna ome na dingimo. Sidu, Mbori asana Eyobo ka ino kangia ko nafu gu kparakakparaka asino du ti agi anya re fura, nga gu nasa ra ami niraki na kini zugo. Oni rengbe ka gbia ngbarago be wisigo agi akapita re, gbe ka si du nga oni ni agu aboro nakpinyemu afarasi watadu kura anyaa.—Atambuahe 50:10, 11.
12 Oni rengbe arengba a ka wisigo Eyobo kapita 40 na 41, yo Yekova asana Eyobo ni berewe ko karagapai sa agu asanahe nadu tipa kparakpara anyaa ue. Ani ini agi anyaa re ya guru sa nga dupo, kii akio gbe na ki duna ome, na gu kura banaru ru nga gu ngondi nga ga Nile ru. Ami nibasasa nga iiriwo kusikusi anya nga agura rẽ arẽ ani gbegberã rani fuo ra. Awere, ani bingo gu digisopai si aida ani da ti ni.
13. Ga Mbori asanahe aduna gini sangbanaha kurii Eyobo, na gini sangbanaha si aida si du nani kuri rani?
13 Eyobo kapita 42 nayugo gupai nangia sangbana ga Mbori asanahe kurii Eyobo. Mbata fu gu regbo re, Eyobo aaberã kina pa tiko kisusi na pa kura aboro. Ono ni dia ko gu zukazuka rugapai kugume nadu rogo ga Mbori asanahe, Eyobo a’aria gako berã. Ko akusi gupai nga: “Mi ini he ni rengo ya mo rengbe ka manga apai dunduko, a nga pai ho mo aberã pa manga ha, ka i dingisa ha te. ‘Da nga gi ni re naoka rugapai zanga inahe?’ Si du mi agumba gu pai mi aruga nga tire na ni ya, nga agu apai du ni baiiriwo ho fere, nga gu mi aina nga pa ha ya.” (Eyobo 42:2, 3) Ii, fuo ko gbeberã ko fuo gu mangaapai nga ga Mbori, Eyobo agumba gupai nga agi apai re adu nibaiiriwoho fuko gbe. Fuo wisigo ani gi iiriwo kusikusiahe re, si naida ga Mbori tatamana na ome iriwo tirani a. Si naida si iriwo tirani ki da kuari? Ya mo gupai si aidaha gbua nga ga Yekova banaru ome na gako tandu iriwo tirani? Watadu si naida si fõngbaduraniyo ani ki mangipai susi gure?
14. Waigu Davide akaragapai sa ga Mbori iiriwo mangaapai?
14 Wenepai, ani nabi afugo wa kina gure rogo Atambuahe 86, nga gu Davide agumbaha, nga gu ko aima gumbaha mbata rogo kura fugo atumbuahe niyaa: “Angbangbaturũ ninataka pande gu taarimo nga ga Mbori; ari yo ninayugo pa sabeko. Uru ninagumba pai na uru, yuru ninayugo inahe na yuru.” (Atambuahe 19:1, 2) Ono Davide asusi kumbatayo kindi. Ani nageda gupai rogo Atambuahe 86:10, 11 nga: “Mo nga bahe, mo namanga iiriwo apai, kina ro sa nga Mbori. Ako Yekova, mo yúgu ga gene fere, mi nita kina rogo ga rengo; mo kpámia kpotore yo si gunde ti rimoro.” Ga Davide kiga be Bakusiahe mbiko Gako iiriwo mangaapai akodi gu gunde ti Mbori nga gu rẽ arẽ na Ko. Oni rengbe ka rugatironi na ndu gupai si adu tini wo. Davide aidanga ka fu gberarago fu Guko rengbe ka manga gi iiriwo apai re te. Ani aidanga a ka fu gberarago fuko te.
15. Tipagine ga Davide gunde ti Mbori ni irisa adaada tini?
15 Davide avura ino gupai nga wa duhe nga Mbori na bakere ome ti ko na kini rugupa mangasunge nani, ko rengbe arengba ka mangasunge nani kuti agu aboro ko aidanga na gayo pai ya. Tipa yo, gupai re wa kina pa kperẽ. Mbori asana Eyobo ki ya: “Mo ariminga kurogo abambu igo fäkäfäkä morogumba, watadu mo abinga abambu igo morogumba, nga gu mi naabandaha, tipa rago fudifudipai, tipa uru kpata na uru vura?” fäkäfäkä morogumba, morogumba, bavugumo mai, wege, na ikpirogumba ni agu ahe dunduko nga gako aũvura. Nairiwo gu ome nga ga zagino re!—Eyobo 38:22, 23, NW.
16, 17. Gini ahe nayugopa gu iiriwo ome du be Mbori, na waigu ko amangisunge na ngbatunga gu ome re mbata kusayo?
16 Isoke oni vura tingidapa gberangbii sa nga gu namangi rogo gaoni dagbarago—bavugumo mai, bakamikami wege, gu bavugumo nga ga morogumba, watadu gu kpuakpua ime mai naye na gberangbii. Ka yugo kpiapai, ti tonatona gu garã nangia 2000, bakere bavugumo abubuna arago Putu yo bangbanda sodiyo na dioyo. Si azeresi ngba wene abainipai tipa wege. Oto nyanyaki awege adu nga akirometere 200 vuru saa sa, si kini sipi rii dungu akutu abambu, ki bafu angua nga ga karaba kusande, na ki vavagadi kikindigi atarambiri. Oni asadinga ka bi kpia gipai re berã roni yo: Ti regbo gu bavugumo re, si amofo angua wa amirioni 270 watadu ka kukuoho beberehe, kina rogo gu paraki nga Versailles nisaha, du kusayo ti Paris, si amofo angua 10,000. Dungu aborokporo azanga we (karaba). Agu aboro nakpiki bange yo ambedi ka da ti 100. Agu apai re amangi dunduko vuru guru regbo. Nga gu riko ome!
17 Boro rengbe ka yamba bavugumo nga tunguotunguopai, gupai namanga i akedanga ha akeda ya, ka i aruganga paha ya. Ono tie, ginipai ka mangi, ka Guko duna tandu apai dũ mangi iiriwo pai ni ruga ko pa mangasunge na ngbatunga agu aome re ngba ruru gene? Ko amangi ngbatunga pai wa kina gure mbata kusayo rogo ga Abarayama uru, nga guko naini gupai nga Basapungbanga kpotosende dunduko aima wisigo gu gbegbere apai nga ga abakporo ue, nangia Sodomo na Amora. Si agbere gbe ki da ti gupai nga akpee dakpa koyo du Mbori ni, nga guko naundo ruru aboro dunduko i bati be gu sapangbanga nadu kurii agu abakporo re. Kuru pangbanga nayaa: “Yekova ki kedi baruti na we . . . si aye yo du Yekova ni ngbangbaturũ yo” kurii agi abakporo re. Gure angia iiriwo mangapai, nga gu nabanda gu ruruyo na kini gbarasipa gu gbegbere yo maabangirise adunga berewe tipa yo ya.—Bambata Pai 19:24.
18. Gini iiriwo apai Yesaya kapita 25 afura tipaha?
18 Kusa, Mbori asaringbanga kuti gu kuru bakporo nangia Babera, isoke nga gu bakporo fura yo tipaha rogo Yesaya kapita 25. Ko agumba gupai nga bakporo ada ni gburuwagburuwa bate: “Mo asa bakporo ni guguda, ki gbarasi bakporo nyanyaki ngapa; bambu bakindo nga ga kungba aboro adu nga ni bakporo berewe te, i adúa nga ha berewe wa sa te.” (Yesaya 25:2) Agu aboro ninaandu ka bi gu rago Babera adu rogo rengbe ka gumba gupai nga gipai re aima manga nirengo. Ya mo pa gbarasa Babera amangi ni mamu zanga i sogimaha aso? Oó. Kuba gure, ani rengbe ka dia gu berã kugume nangia ga Yesaya, nga guko nayaa: “Ako Yekova, mo nga gi Mbori; mi akíisa pa ro, mi asámbua, rimoro; bambiko mo mangi iiriwo apai, gu rugapai naadu mbata a rogo yososopai yo na rengo.”—Yesaya 25:1.
Gu Iiriwo Mangaapai Du Kumbatayo
19, 20. Gini digisidigisi Yesaya 25:6-8 rengbe ani kaa maabangirani tipaha?
19 Mbori aima digiso gu sangbanebi du kuari re bakuru kusayo, na kumbatayo, ko nika mangapai ni iiriwoho a. Rogo gi kapita re, nga gu fura Yesaya rogo tipa gu “iiriwo apai” nga ga Mbori, ani nabi gu sangbanebi rengbe ani ka kido kuti ni nga gu nika du nidigisidigisihe kumbatayo, a wa gu sapangbanga nadu kurii Babera adu nidigisidigisihe. Gini ‘iiriwo pai’ du du kidohe tipaha? Yesaya 25:6 nayaa: “Ri gi bagangara re Yekova nga ga arimbasa ko amánga pumbo fu aboro dunduko nga agu ariahe du na kina ku nzeme ti ni, nga pumbo imekakue ri agbooro ho, na agu ariahe hi ahi be nzeme meme, na imekakue ri agbooro ho i atogosi he ziazia.”
20 Nirengo, gu sangbanebi re nika du nidigisidigisihe rogo gu vovo zegino Mbori nakidohe tipaha, nga gu du barabangirani mbembedii kumbatayo. Ti gu regbo re, ngbatunga aboro aba omeyo be gu kpakarakpakaraapai nafuda badungu yo awere. Nirengo, gu sangbanebi du rogo Yesaya 25:7, 8 nafu ngbaanga ya Mbori amangasunge na gako ome nga ga kusaahe tipa ka manga iiriwo pai sa dagba agu naamanganga mbata ya: “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko, na gu gbarasarimo nga ga gako aboro ko adía ha auru kpotosende ku sa yo dunduko; mbiko Yekova gumba ha.” Gu mokedi nangia Pauro adipai kusa rogo gu tangaratangarapai re ki mangisunge nani ya Mbori nika karaga gu kpikpiyo berewe i duni ungayo, nga ka zingisa gu kpikpiyo bekpio. Nga gu iiriwo mangaapai nikangia gure!—1 AKorindo 15:51-54.
21. Gini iiriwo apai Mbori nika mangaha tipa gu kpikpiyo?
21 Gu kura ndupai berewe aume nga ga rungo nika go tini kusayo nga, i adia akaza kpotose kusayo. Ho Yesu aduni auru kpotosende, ko ahusi dungu aboro—kini zaki bangiri airavurari, ni zaki tu airangbionga, na kini fu ome fu agu aboro akaza angbundasi yo. Yoane 5:5-9 natangara gupai nga ko ahusi kumba nadu ni gbarigbari ko tipa agarã 38. Agu aboro nabi gipai re aberẽhe ya gere angia iiriwo mangapai. Na kinawo si adu nirengo! Ono tie, Yesu agumba gupai fuyo nga gu nika iriwo gbe nga pa zingisa ko gu kpikpiyo: “Ka gi iriwo nga ti roni re ya, bambiko ragoho nada, ho agu yo ka gia fugoko ni dunduko du rogo amurã yo, ki kuru; agu yo nanamanga wenepai sa gu zingabekio nga ga unga; agu yo nanamanga gbegberẽpai, sa gu zingabekpio nga ga sapangbanga.”—Yoane 5:28 29.
22. Tipagine rengbe gu rungorungo yo na aguyo i arungosi yo ka ngera kumbatayo tini na maabangirise?
22 Gure du wa ka si mangi mbiko gu boro kidohe tipa mangaha nga Yekova. Oni rugutironi na gupai nga ho ko ka mangasunge ni na gako ome, kini kedi gako ome karaga ahe kubaha, sangbanaha angia iiriwo pai. Atambuahe 72 nafura tipa agu apai ko ka mangaha rogo gu gako Bakindo nga Wiriko. Fuo gure, ruru aboro azugo. Zereda ki du rogo arago dunduko. Mbori abatasa gu rungorungo yo na aguyo i arungosi yo. Ko nakidohe niyaa: ‘Zende ahe azúko rogo ringara kpaima; si adu wó ri abaagangara yo; gaha zuzuhe adú wa kuru Rebanona; agu aboro du abaakporo yo azúga wa nvuo naakura ti sende!’—Atambuahe 72:16.
23. Si naida ga Mbori iiriwo mangaapai fõngbaduraniyo tipa ani mangi gine?
23 Ziazia tie, ndupai kina berani tipa gbeberã rani sa ga Yekova iiriwo mangaapai—nga agu apai ko amangihe mbata kusayo, gu ko amangaha areme, na gu ko ka mangaha kumbatayo mbembedii. “Yekova nga Mbori dú ni sambuasambua ko, nga ga aYisaraere Mbori, kina gu ko namanga iiriwo apai. I sámbua rimoko du ni taasitaasi he nye anye kindi; gako taarimo hísi zegino dunduko! Amina, na Amina!” (Atambuahe 72:18, 19) Si naida gure du nga gu riipai ani afura tipaha zaaza na agume rani gbiati gu kura aboro. Ii, ani “táki pande pa gako taarimo dagba arikaaboro, na pa gako iiriwo mangaapai dagba aboro dunduko!”—Atambuahe 78:3, 4; Atambuahe 96:3, 4.
Waigu Ka Oni Karagapai?
• Waigu agu asanahe i asana Eyobo nani anyakasa gupai nga ga aboro inohe na ngbandaha tini?
• Gini kpiaapai tipa ga Mbori iiriwo mangaapai nyakasi yo paha rogo Eyobo kapita 37 dati 41 nga gu zeresi ngbaroni?
• Si naida gaani karagapai du nga gine fuo wisigo ani bete ga Mbori iiriwo mangaapai?
[Gu kpiahe du ti kpewaraga 16]
Oni da ti gini digisopai tipa pusi morogumba na gu iiriwo ome nga ga ikpirogumba?
[Gu kekepai nayugo bara gu ba i adi kpiahe rogo]
snowcrystals.net
[Gu kpiahe du ti kpewaraga 18]
Oni sa ga Mbori iiriwo mangaapai ni gupai oni afura tipaha dedede na aboro