Asanahe be Agedihe

Nibi gupai nga Yekova na nyemu mbupai fu aboro ti gayo ingapai mbiko gu motumo tumorii nga ga Yesu, tipagine si aida tini aKristano kusi gayo ingapai fu agu abaakumba du rogo dungurati?

A wa rengbe ani ka bihe tipa gupai nadu tipa Davide na Bataseba, Yekova ambupai fu Davide ti gako ingapai mbiko ko aduna ndikidi saberã, wa gako ingapai avura duni kerehe vurũ. Ho gu nebi nangia Natana aye ni koyo du ko ni, Davide akusi gako ingapai gbaiga ki ya: “Mi ingi pai kuti Yekova.”—2 Samuere 12:13.

Ono tie, anga Yekova naida na kina pa ga boro ndikidi saberã na ki mbupai funi ti gani ingapai te, ono ko nambakada kura apai rogo nyemuse tipa ka undo gu boro ingi re tipa ni hu rogo toroyo. Rogo gupai nadu tipa Davide, undo aye fuko be gu nebi nangia Natana. Areme rogo gu dungurati nga ga aKristano, akumba gu duho ima nyaka rogo toroyo, nga abaakumba. Gu bawiriki nangia Yakoba nasakarogoyo niyaa: “[Boro ho] dagba roni yo na kaza [rogo toroyo]? Ni yámbu ga kanisa abaakumba i ki kpari auru ni, niuka nzeme ku auru ni ni rimo Gbia. Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avú ni avu ti ni.”—Yakoba 5:14, 15.

Agu abaakumba duna birĩ rengbe ka fu undo gbe tipa ka zeresa gu ima du ngbadu gu boro ingapai yo nabira ti ni. I na’asada tiyo ka wirika Yekova rogo gayo mangaapai na gu boro re. I arakaya te, ka si vura du nga gu boro ingapai re gu rẽ arẽ tipa i fu nyanyaki rugute funi vurũ. Kuba gure, i nawisigo pa agu apai du gu boro re na zingoho ti gu regbo re, kini mangihe wo ni nunga. I na’asada tiyo ni zerangbaduse ka ruga berã gu boro re ni manga yo sunge na Fugo Mbori. (AGaratio 6:1) Ka si vura du nga gu boro re nikusi gani ingapai ni ti ni te, pai rengbe arengba ka fõngbaduniyo ho abaakumba naye ni koyo du ni ni ni kusihe, a wa si adu tipa Davide ho Natana andu ni fuo ko. Gu undo abaakumba afuhe rogo gi gene re naundo gu boro ingi ni ne gu kerepai nga ga manga gu ingapai re berewe na ki ne gu kere sangbanaha nga ka manga ingapai niwia.—AEbere 10:26-31.

Nirengo, si ni taatapai boro kusi gani ingapai fu kura aboro tipa ka ruho ka gbia mbupai te, nga gu ingapai kina zee amanga ni mbikoho. Si naida wingbaduse. Ono tie, oni berẽnga tooni kurii manga gupai du kia ti gure. Kumba sa nga guko nakpa ti kusa gako kere ingapai fu abaakumba rogo dungurati ayaa: “Ima adu ngbadureyo nga gu naaguaringa kusayo ya. Mi amangi nyanyaki asadatise ni kiiso mi gimi sunge tungusapai, ono mi anye kindi na gberarago mbiko gupai mi amangihe re.” Ko aberẽ gupai nga pa kusa ko gako ingapai fu Mbori rogo kparakpee aima rengba kuho, ono ziazia tie, si adunga wo te, mbiko aberã aata kindi riko yo wa kina gu namangi Bakindo Davide. (Atambuahe 51:8, 11) Nga gu wenepai tie ngaha ka dia gu wene undo kugume Yekova afuhe vurube abaakumba!