Oni Ru Nyanyakii, Si Ki Du Wa Oni Nabi Guko Ka I Abinga Ko Ni Ndikidi Bangirise Ya!
‘Mose aru nyanyakii, si ki du wa ko aabi guko ka i abinga ko na ndikidi bangirise ya.’—AEBERE 11:27.
1. Gini banarupai Yesu agumbaha tipa Mbori rogo gako Tungusapai rii Bagangara yo?
YEKOVA nga gu Mbori ka i abinga ko ni ndikidi bangirise ya. Ho Mose asana Ko ni tipa ka bi gako taarimo, Yekova akaragapai ki ya: “A nga boro sa ka bi re, ki nye ni ungani wa sa te.” (Gate 33:20) Na gu mokedi nangia Yoane akepai ki ya: “A nga boro sa nabi Mbori wa sa te.” (Yoane 1:18) Zavura kina Yesu Kristo, ho ko aduni auru kpotosende ni boro, ko arengbanga ka bi Mbori te. Ono tie, rogo gu gako Tungusapai nadu rii Bagangara yo, Yesu ayaa: “Aboro maku nga agu yo du ziazia kpotoyo yo, bambiko i abí Mbori.” (Matayo 5:8) Ginipai Yesu aaberãha?
2. Tipagine ani arengbanga tini ka bi Mbori na ndikidi bangirani ya?
2 Ziazia Kekeapai nafura tipa Yekova ya ko nga Toro, ka i abinga ko ni ndikidi bangirise ya. (Yoane 4:24; AKorosaio 1:15; 1 Timoteo 1:17) Sidu, anga gupai Yesu aagumbaha nga ani rengbe arengba nzunzu ka bi Yekova na ndikidi bangirani te. Rengo ngaha, mbedimbedi aKristano nika bi Yekova Mbori ngbangbaturũ yo i nazingisi yo bekpio na i ki dani atoro. Ono wa vura duhe wo, agu aboro “du ziazia kpotoyo yo” na ki duna gu maabangirise nga ka raka nyeanye kindi auru kpotosende rengbe arengba a ka ‘bi’ Mbori. Waigu rengbe gure ka manga?
3. Waigu rengbe aboro ka kparia bete asino Mbori?
3 Ani nawirikapai tipa Yekova ni kparia ani agu ahe wenengai ko akusihe. Rogo gi gene re, gako ome rengbe ka iriwo tirani na ki sa rani ani idi kuti ko ni gu Mbori nga Bakusiahe. (AEbere 11:3; Yugoti 4:11) Tipa gipai re, gu mokedi nangia Pauro akepai ki ya: “[Gu ga Mbori] apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi!” (ARomo 1:20) Sidu agu afugo Yesu du tipa pa bi Mbori, si nakoda gupai nga boro rengbe arengba ka kparia kura asino Yekova. Ruru inohe nasa boro ni kparia ngbatunga agu asino ko re, na boro nabihe rogo toroyo mbiko ‘gu bangirise nga ga kpotoseyo.’ (AEfeso 1:18) Afugo Yesu na gako mangaapai nayugo dungu apai a tipa Mbori. Si du Yesu aya tini wee: “Gu ni bi re ni bi Buba.” (Yoane 14:9) Yesu ayugu asino Yekova teketeke. Sidu, duna ani na inohe tipa ga Yesu raka na tipa gako yugopai rengbe ka undo rani ani bi bete asino Mbori watadu ka kpariaha.
Si Ni Nyanyakipa Pai ka Rugatise na pa agu Apai nga ga Toro
4. Waigu aboro ayugo gupai areme nga i aruganga tiyo na pa agu apai nga ga toro te?
4 Areme, ngenga agu aboro duna idapase na ki duna ndikidi rugatise na pa agu apai nga ga toro te. Pauro ayaa: ‘Anga aboro dunduko duna idapase te.’ (2 ATesaroniko 3:2) Dungu aboro naora kina fuo agu apai ngba tiyo, zanga duna idapase kuti Mbori. Gayo iraira mangaapai na gayo zanga rugatise na pa agu apai nga ga toro nakiso bangiriyo ti bi yo Mbori na gu bangirise nga ga rugatinapai, mbiko gu mokedi nangia Yoane akepai ki ya: “Gu ni namanga gbegberẽpai ni abi nga Mbori te.” (3 Yoane 11) Bambiko wa ngbatunga agu aboro re abinga Mbori na ndikidi bangiriyo ya, i namangapai si ki du wa ko abinga agu apai i amangaha te. (Yezekere 9:9) I nabisirapa agu apai nga ga toro, sidu i arengbanga ka gbia “gu inahe nga ga Mbori” te. (Asanza 2:5) Sidu, si aru aru Pauro kepai ki ya: “Were boroboro adia nga agu apai nga ga ga Mbori Toro te; bambiko si du ni mumungo pai fu ni; ka ni ini nga ha te, bambiko i nawisiga ha ni Toro.”—1 AKorindo 2:14.
5. Agu aboro naberãpa agu apai nga ga toro rugu tiyo na ginipai?
5 Ono tie, ka ani aberãpa agu apai nga ga toro, ani apiriganga ti ino gupai nga, wa vura duhe nga Yekova ni gu Mbori nagbata kina ingahe ti aboro kindi te, ko ima ino gu regbo du ani na gbegbere aberã na gbegbere nyemu apai. Nirengo, “ga boro pai dũ si . . . ku bangiri Yekova, ko nakparia pa gani apai dunduko.” (Asanza 5:21) Kangia ingapai di berani, pai afõngbaduraniyo ani sa gaani berã na ki sana Yekova ko mbupai fu rani ti gaani ingapai mbiko ani nakpinyemu ko na ani akpinga nyemu ka imisa ko te.—Atambuahe 78:41; 130:3.
Gine Nasa Rani Ani Ru Nyanyakii?
6. Ru nyanyakii nayugo ginipai?
6 Wa vura duhe nga ani arengbanga ka bi Yekova na ndikidi bangirani te, ani tingidi gupai dedede nga ko nabi rani abi tigako. Pa ruga ani tirani na gupai nga ko kinaho ni unga ko na padu ani na kido nga ko mbembedii na agu aboro dunduko nakpara fuko nika undo rani ani ru nyanyakii, ki kakuti gaani ruru mangapai fuko. (Atambuahe 145:18) Ani rengbe ka du wa Mose, nga guko Pauro akepai tipa ko ki ya: ‘Mbiko idapase ko ambu Ezipeta, ka ko agundenga be ga bakindo zinga ya; bambiko ko aru nyanyakii, si ki du wa ko nabi guko ka i abinga ko na ndikidi bangirise ya.’—AEbere 11:27.
7, 8. Gine nasa Mose ko duna wingbaduse barabangiri Faro?
7 Ni manga Mose gu sunge Mbori afuhe fuko, nga ka kusa aYisaraere kusayo be sunge akanga Ezipeta yo, ko anakura dedede ku barabangiri gu kere bakindo nangia Faro ngbanga kpuko yo, nga gu ngbanga nahi be abarumbatayo rogo pambori na abarumbatayo nga ga abanzengere yo. Si nawiraha gbe nga, i asikiso agu akpiahe nga ga gayo ambori ti vuro abambu ngbanga yo. Ono wa vura duhe nga aboro arengbanga ka bi Yekova na ndikidi bangiriyo te, ko adu wa ndikidi boro bangiri Mose, ki du kia ti gu kpia ahe narukuba gu kungbo ambori nga ga Ezipeta yo, si du iriwo Faro atinga tini ti Mose ya!
8 Gine nasa Mose ko duna wingbaduse kaa kura dedede ku barabangiri Faro? Ziazia Kekeapai nagumba gupai fu rani nga, “Mose angia bayee boro ni rengo, ki susi agu aboro nadu ri kpotosende dunduko.” (Pa Geda Aboro 12:3) Sidu si ziazia nga, pa ga Mose nyanyaki rugatise na pa agu apai nga ga toro, na pa gako kido ya Mbori na ko afu gu ome fuko ko aidaha tipa ka fura kuba ‘Guko ka i abinga ko ya’ barabangiri ga Ezipeta kere bakindo. Gini bete agene agu aboro ‘nabi’ gu Mbori ka i abinga ko na ndikidi bangirise ya ayugo gayo idapase rogo areme kuti ko?
9. Gene sa dagba gu dungu agene rengbe ani rogo ka ru nyanyakii nga gine?
9 Gene sa dagba agu agene rengbe ani ka yugo gaani idapase rogo kini ru nyanyakii si ki du wa ani nabi Guko ka i abinga ko na ndikidi bangirise ya nga, tungusapai na wingbaduse rungosi ki vura du vurũ. Yesu aza gako abawiriki ki ya: “Aboro asóga roni asoga dunduko tipa rimore.” (Ruka 21:17) Ko agumba gupai a nga: “ ‘Moyambu nakia nga susi bairani te.’ Si ngia i arungosi re . . . i arúngosi roni arungosi a.” (Yoane 15:20) Nimangaha kuti sangba Yesu, fuoho aimanga fuo kpio ko te i ki tona ka rungosi apefuo ko rogo dungu agene, kaa serekpo yo, kini zi yo ku bambukiso yo, na kini taki yo. (Amokedi 4:1-3, 18-21; 5:17, 18, 40) Wa bavugumo nga ga rungosi avura ye kurii yo, ga Yesu amokedi na kura abawiriki akakuti tungusa wene pangbanga kindi zanga gunde.—Amokedi 4:29-31.
10. Padu ani na kido ya Yekova nabanda rani abanda naundo rani wai rogo gaani sunge tungusapai?
10 Wa kina Mose, bambata apefuo Yesu agundenga be gu dungu avura yo i anabi yo abi te. Ga Yesu abawiriki aduna idapase kuti Mbori, na ni sangbanaha, i arengbe ka hi gu kere rungosi nga gu naye kuriyo. Ii, i aru nyanyakii kindi si ki du wa i nabi Guko ka i abinga ko na ndikidi bangirise ya. Areme, pa nye ani kuti berã gupai nga Yekova abanda rani abanda nangarasa rani, kini sa rani ani duna wingbaduse zanga gunde be avura rani ho ani amanga gaani sunge tungusapa Kindo ni. Fugo Mbori nayaa, “gunde ti boro nare gbina, ono gu ni nakida kuti Yekova ni [a]du zezeredi.” (Asanza 29:25) Si ki ta du were, ani akaraganga tirani kusayo ni gunde be gupai nga i nika rungosi rani te; zee amanganga rani a na gaani sunge tungusapai te. Gaani idapase nafõngbadurani ani mangi dezirepai fu gaani amurakporo zanga gunde, na fu gaani abadiasunge, fu agu akuarani du ani na yo sukuru yo, na fu kura aboro.—ARomo 1:14-16.
Guko ka I Abinga Ko Ni Ndikidi Bangirise ya Nayugo Gene fu Gako Aboro
11. Kuti sangba Petero na Yuda, waigu bete agu aboro nadu rogo gu dungurati nga ga aKristano ayugu gupai nga i aruganga tiyo na agu apai nga ga toro te?
11 Idapase naundo rani ani bi Yekova ni gu boro nayugo gene fu agu aboro du rogo gako riigbu nga ga kpotosende. Ino ani gipai re nasa rani ani neke bisirapa agu awirina duna atindiro beyo rogo dungurati. Gu mokedi nangia Petero na gu wirina Yesu nangia Yuda afu zahe tipa kura aboro nga aguyo naaruganga tiyo na pa agu apai nga ga toro ya, kini fura gbegberee bara agu akumba nanaangbe kumbatayo rogo apai dagba aKristano. (2 Petero 2:9-12; Yuda 8) Ya mo ngbatunga agu aboro naabisirapa abaakumba re arengbe ka fura wa gure barabangiri Yekova wa ka si adu nga i nabi ko abi na ndikidi bangiri yo? Wa gu sa te! Ono mbiko ka boro binga Mbori te, si du agu akumba naaberã kina pa boroyo re aaruganga tiyo tini na gupai nga ko rengbe arengba ka sana yo i karagapai fuko tipa gayo mangaapai ya.
12. Gini sino si aida ani du nani tipa agu aboro nangbe kumbatayo rogo apai rogo dungurati?
12 Rengo ngaha, gu dungurati nga ga aKristano na agu aboro rogo duni kpakpa yo. Aguyo namangasunge ni abaakumba namanga iraira apai amanga nga gu rengbe ka fuda rani ti kura aregbo. Si ki vura du wo, Yekova namangasunge na ngbatunga agu akumba re i nibanda gako avusende. (1 Petero 5:1, 2) Agu akumba na adee duna gu berã nga ga toro, i rugu tiyo na gupai nga, gere nga gene sa dagba gu dunguhe Yekova aruga gako aboro rogo. Sidu, ni aKristano, ani nane gu sino nga ga bisirapa aboro na kpakanahe, ono ani nayugo irisa tipa ga Mbori mbakadapai. Ni gia ani sangba agu awirina nangbe mbatayo rogo apai dagba rani, ani nayugo gupai nga ani nabi Guko ka i abinga ko na ndikidi bangirise ya.—AEbere 13:17.
Bi Mbori Ni Gaani Bakere Bayugupai
13, 14. Pa bi Yekova ni Bakere Bayugupai nayugo ginipai fu roni?
13 Gu kura ba gu duho naida ani duna gu bipai rogo nga ga toro. Yesaya afura kumbatayo ki ya: “Bangironi abí gaoni Bayugupai abi.” (Yesaya 30:20) Si naida ani duna idapase ka ino gupai nga Yekova du nayugopai fu rani rogo gako riigbu nga ga kpotosende. (Matayo 24:45-47) Bi ani Mbori ni gaani Bakere Bayugupai nga kina kakuti wene sino wisigo Ziazia Kekeapai na du dedede pati adunguratise nga ga aKristano te, si nakoda dungu apai. Si nakoda gbia undo wenengai be gu mbakadaapai Mbori nambakadihe tipa rani rogo toroyo. Ni kpiapai, si naida ani moiberã rani susi gu nidu mbata fuo gu rugute Yekova afuhe rogo Yesu yo, tipa ka ani abitikpanga ki tiwi kusayo rogo toroyo ya.—AEbere 2:1.
14 Ti kura aregbo, si naida kparakpara asadatise tipa ka gbia bakere undo be gu riahe nga ga toro. Ni kpiapai, si rengbe ka du nga ani na gu sino tirani nga ga zanga maaberãse fuo agu averesi nga ga Ziazia Kekeapai nga gu bi ani he ni kpakarakpakaraha ka giarogoyo. Ho ani ageda Ngbaõbambu Sinziri na Oni Zingi Rameyo! ni, isoke si rengbe ka du nga ani naguka aguka rii kura apaparaha mbiko ani na nyemu gupai agu apaparaha re asakapai tipaha te. Watadu ani nambu berã rani si naberẽ kura apai kia ti regbo adunguratise nga ga aKristano. Ono ani rengbe arengba ka maaberã rani fuo gupai i awisigoho re ka ani asakaha berã rani yo wenengai. Gaani bakere tambuahe tipa gu yugopai nga ga toro nga gu ani agbiaha nayugo gupai nga ani ima ino ya Yekova nga gaani Bakere Bayugupai.
Ani Du Wa Ka Ani Karagapai fu Mbori
15. Waigu gu kura aboro amangipai si ki du wa Yekova abinga yo te?
15 Mbiko gupai gbe nga gbegbere apai ima maapai rogo gi ‘yangara arame’ re, si na nyanyakipaha ani duna idapase kuti Guko ka i abinga ko na ndikidi bangirise ya. (Daniere 12:4) Birika aboro na wasiwasi kodaba ima maapai na arago dunduko. Rengo ngaha, si ni pa tatamana ka tingida gupai nga, Yekova nabi gaani mangaapai abi ho aboro arengbanga ni ka bi rani ya. Bangiri kura aboro ago ti gipai re. Ho aboro abinga yo ni ya, i rengbe ka manga agu apai Ziazia Kekeapai asogaha. Ni kpiapai, gu kurayo asonga vura kuti gu asada nga ga bi kere ambaro na ka bi kundiri aboro rogo Internet, rogo terevizioni, na rogo gu kura vovo ahe du areme te. Wa duhe nga boro rengbe arengba ka bi ngbatunga agu ahe re rogo gu ba duni rogo nisani, gu kura aboro amangipai si ki du wa Yekova abinga yo te.
16. Gine rengbe ka undo rani ani mangipai ringbisihe kuti ga Yekova tumbatumba andika?
16 Si ni wenepai ani moi afugo Pauro ku berã rani yo: ‘Ani nibasasa akaragapai akaraga fu Mbori.’ (ARomo 14:12. NW ) Si naida ani rugu tirani na gupai nga, agu aregbo dunduko ani amanga ingapai, ani naingapai kuti Yekova. Ino ani gipai re aundo rani ani mangipai ringbisihe kuti gako tumbatumba andika na kini neke wasiro. Ziazia Kekeapai natingida rani na gupai nga: “A nga boro sa he du ni kusikusi ni ku bangiriko te, ono apai dunduko du ni kundirihe ni zaza ha bangiri gu ko ani ka mbakada gaani apai fu ko.” (AEbere 4:13) Rengo ngaha, ani du wa ka ani karagapai fu Mbori, ono gu banguapai nzunzu ani amanga gupai tini Yekova akpinyemuhe na kini irisi gako ruru andika nga, ani nakpinyemu ko gbe. Sidu ani duna rubangirise rogo ngbatunga agu ambaro ani asiaha kaa bihe, na singia ani nga akumba, ani duna rubangirise tipa gaani mangapai dagba rani na adee na kina gu bangisa rubangirise re ki du a dagba agu rani nga adee na akumba.
17. Yekova nabi rani na nyemu ginipai tiko?
17 Yekova na nyemu rani tiko gbe, ono gure ayugonga gupai nga ko napido rani ani mangi ingapai tipa ko ruho ka fu mbusa fu rani te. Kuba gure, ko nabi rani na nyemu rani tiko gbe, ki duna nyemuse wa kina gu gu baagude naida ka manga wenepai fu agu awirini nagia sangba ni nidu nani. Nga gu wasa si afuhe fu rani ka ino gupai nga, gu Barani nga ga ngbangbaturũ ko na ngbarago tiko mbiko gaani idapase na “ko nafu mosoro fu agu yo nagbata ko”! (AEbere 11:6) Gaani idapase dunga tie dunduko kina kuti Yekova na ani ‘kini mangi pako na ngbaduraniyo dunduko.’—1 Pekapai 28:9.
18. Mbiko gupai nga Yekova nabi rani abi na kini bi gaani ruru mangaapai, gini mokido Ziazia Kekeapai afuhe fu rani?
18 Asanza 15:3 nayaa: “Bangiri Yekova du rogo arago dũ, ki ningere ku ri gbigbita aboro na wene aboro a.” Ii, Mbori nangana gbigbita aboro na kini mangi yo ringbisihe kuti gayo mangaapai. Ono ka ani du dagba “wene aboro,” ani rengbe ka ino gupai nirengo nga Yekova nabi gaani ruru mangapai abi. Nairiwo wai si anyakasa gaani idapase ka ino gupai nga ‘gaani sunge rogo Gbia yo gbua te’ na ka ino gupai a nga, guko ka i abinga ko na ndikidi bangirise ya ‘bangiriko agonga ti gaani sunge te, na ti gu nyemuse ani ayuguhe ti rimoko’!—1 AKorindo 15:58; AEbere 6:10.
Yamba Yekova Ko Wisigi Rani
19. Bete agu aundo naye be padu ani na nyanyaki idapase kuti Yekova nga gine?
19 Wa du ani ni ga Yekova ruru amoyambu, nyakipa rani anyaka bangiri ko. (Matayo 10:29-31) Wa vura duhe nga bangirani abinga ko te, ko rengbe arengba ka du fu rani ni ndikidi boro, na ani ki rengbe ka bi gaani pagume dagba rani na ko ni guhe duna nyanyakipaha. Padu ani na ngbatunga gu sino re tipa gu Barani nga ga ngbangbaturũ ko naye na dungu aundo fu rani. Gaani nyanyaki idapase naundo rani ani duna gigiri ngbaduraniyo barabangiri Yekova. Duna gu idapase adunga na biriki tini ya naundo rani a ani mbu raka nibangba ue, kaa manga kura apai ni gbuko. (1 Timoteo 1:5, 18, 19) Gaani nyanyaki idapase kuti Mbori nasa rani ani moi wene kpiapai fu agu aboro du pati rani, na si rengbe ka duna wene sangbanaha kurii yo. (1 Timoteo 4:12) Kurii gure, ngbatunga gu idapase re nasa rani ani mangipai wa Yekova aidaha, si kini fu ngbarago fuko.—Asanza 27:11.
20, 21. (a) Tipagine ngbaha angba tini bangiri Yekova du kuri rani? (b) Waigu rengbe ani ka manga sangba Atambuahe 139:23, 24?
20 Ka ani du nirengo ni airatatamana, ani aduna ngbarago Yekova naabanda rani. Anga ani aduna kina nyemu gupai sa nga ko naangana rani te, ono ani aduna nyemu gupai a nga ko wisigi gaani aberã na gaani mangaapai sirisiri. Rogo kparakpee, si gu daada ani sana Yekova ko wisigi rani tipa ka bihe singia ani na iraira nyemu apai rogo rani yo. Nirengo, ko rengbe ka undo rani ani dibe gaani fudifudiapai kini mangi gu ariapai si aida ani mangihe. Gupai gu bake Atambuahe nangia Davide akehe gu ru aru: “Ako Mbori, mo wísigi pa re, ki ini pa kpotore yo! Mo asadi re, ki ini gimi berã pa apai! Mo ki bi he, si ngia gene gbegberẽpai rogo re yo, ki ngbe ku mbata yo fere ngba nyenye gene!”—Atambuahe 139:23, 24.
21 Davide azungadi Yekova ko wisigi ko ka bihe singia “gene gbegberẽpai” adu rogo ko yo. Anga ani na nyemu Mbori wisigi ngbaduraniyo ka bihe singia ani na iraira aberã, wa kina gu a bake Atambuahe asana ko ko mangihe tee? Sidu tie, rogo idapase, ani sana Yekova ko wisigi rani. Ono ginipai si aida ani mangihe, ka si du nga ani ni fudifudi rani be gu ingapai ani amangi watadu pai ho rogo raniyo nafuda rani? Ka si du wo, ani kparikpee zanga piriga fu gaani Mbori nga Yekova, na ani ki duna umbasitise tipa gu rugapai naye be gako ziazia toro gbiati gu rugute du rogo Fugo ko. Ani rengbe ka duna gu kido nga, ko afu undo afu fu rani tipa ani ndu ngba gu gene nika ndu na ani sa nyenye unga.—Atambuahe 40:11-13.
22. Si naida gaani diaberã du nga gine tipa Guko ka i abinga ko na ndikidi bangirise ya?
22 Ii, Yekova afu maku afu fu rani na nyenye unga ka ani aamanga agu apai ko akpinyemuhe. Rengo ngaha, ani du wa ka ani idipa gako ome na gako pagbia, a wa gu mokedi nangia Pauro aidihe ho ko akepai ni ki ya: “Awere irisa dú fu nyenye Bakindo, na taarimo, nga gu ko ka azirã nga ya, ka i abi nga ko a ya, nga bangisa Mbori du na tatamana nye anye kindi. Amina.” (1 Timoteo 1:17) Ani yugunga ngbatunga gu irisa Yekova naye ngbaduseyo re zanga piriga. Ka kina ginipai vura manga, ani ka kuti gaani diaberã nyanyakii tipa kaa ndu kumbatayo nyanyakii si ki du wa ani nabi Guko ka i abinga ko na ndikidi bangirise ya.
Gaoni Karagapai Nga Gine?
• Waigu rengbe aboro ka bi Mbori?
• Ka si du nga Yekova wa ndikidi boro fu rani, waigu ani ka mangapai ho i arungosi rani ni?
• Pa bi ani Yekova ni gaani Bakere Bayugupai nayugo ginipai?
• Tipagine si aida tini ani duna nyemu gupai nga Yekova wisigi rani?
[Gu kpiahe du ti kpewaraga 14]
Mose agundenga be Faro te, ko aamangapai wa ko nabi Yekova abi, nga gu Mbori ka i abinga ko na ndikidi bangirise ya
[Gu kpiahe du ti kpewaraga 17]
Ka ani ya manginga pai si ki du wa Yekova arengbanga ka bi rani ya te
[Gu kpiahe du ti kpewaraga 19]
Ani nagbata ga Mbori inohe kakaka mbiko ani nabi ko ni gaani Bakere Bayugupai