Oni Ru Nyanyakii Rogo Gaoni Ida Tipa ka Gbia Nyenye Unga
KA SI du nga si naida oni mangi nunguro bangiri sungburasungbura baime, gini ngbatunga kurungba ka oni idi ka ndu nani? Ya mo oni zoro kurogo gu tooni kurungba i asehe rogo ngua watadu gu kurungba ka oni siaha nga gu kikiihe i ambakadihe wenengai rogo marã? Si nawira oni sia gu bakerehe i ambakadihe rogo marã, mbiko si duna ome ti ni ka ndu bangiri gu sungburasungbura ime duna bakere ome angirihe.
Wa ani asusa rogo gi zegino duna fudifudiapai rogoho nikerehe re, ani nagbia tirani na agu apai du nikpakarakpakaraha wa ka kurungba agbiatihe ti ngiri baime. Nikpiapai, kina rii paranga aboro yo rengbe ka vundo ti kura aregbo na i ki bi tiyo nga ngbakinga bayo rogo gi zegino du aberã na sangisangiapai rogoho nikina vunduvunduhe re te. Agu aboro tona gu raka nga ga aKristano bambeda kusayo, rengbe ka du kindi na bete akapa tipa ka raka gu raka re. Zavura bete gu kura aboro naima digo nimangisunge fu Mbori wenengai tipa dungu agarã, rengbe ka du niasadiasadiyo mbiko agu apai i aamaabangiriyo tipaha ata manganga nabaha dunduko te.
Ngbatunga agu aberã re nivovo pai te. Ti kura aregbo, ga Yekova ruru amoyambu anabi tiyo abi rogo kereapai, wa Mose, Eyobo, na Davide abi tiyo. (Pa Geda Aboro 11:14, 15; Eyobo 3:1-4; Atambuahe 55:4) Wa si avura du wo, gayo gene raka angia ga agu aboro naima ziotiyo kuti Yekova. Gayo wene kpiapai nangarasa rani ani du kinawo zanga wo, ono Satana Bakitingbanga naida ka nyaga rani kusayo ti gene nyenye unga. (Ruka 22:31) Sidu, wai rengbe ani ka ru “nyanyaki rogo idapase yo” zanga wo? (1 Petero 5:9) Na wai rengbe ani ka nyakasa akuarani aidipase?
Yekova Naida Ani Ru Nyanyakii
Ka ani du niruru rani fu Yekova, ko nikaa undo rani kindi tipa ani ru nyanyakii. Gu bake Atambuahe nangia Davide agbia tiko ti dungu kpakarakpakaraapai, ono ko anakido kina kuti Mbori na ki bibia ki ya: “[Yekova] akusi re rogo gbigbita due yo, rogo gbedegbede pere, ko ki ta maa ndure auru mbia, ki nyakasi gimi agene.”—Atambuahe 40:2.
Yekova nanyakasa rani ani so “gu wene vura nga ga idapase” tipa wa ka ani rengbe ka ‘kakuti nyenye unga.’ (1 Timoteo 6:12) Ko nambakada apai tipa rani a tipa ani nye zanga wo na ki dibe gu vura nga ga toro ani asoho. Gu mokedi nangia Pauro angarasi akurako aKristano i “nyáki anyaka rogo Gbia, na rogo gu ome nga ga gako tandu” na ki “úkadi ga Mbori ũvura dunduko . . . [tipa i] rengbe ka ru aru sa ga bakitingbanga birĩ.” (AEfeso 6:10-17) Ono gine rengbe ka sa rani ani ti? Na waigu rengbe ani ka sovura kuti gu kereapai re?
Oni Banda Tironi be agu Apai Nabafa Aboro
Si nipatatamana ani tingidi gi nyanyakipa pai re: Agu adiaberã ani amangaha nasa padu gaani nyaka nga ga aKristano niwenehe watadu nigbegberehe. Aparanga nagbia tiyo ti ngbatunga agu adiaberã du wa pa gu sunge i ka zio ho ki saha ni gayo nyenye sunge, pa susa na wirikapai nga ga sukuru kumbatayo kindi, na pa gu boro i ka manga rogatise na ni. Sosono aboro rengbe ka diaberã singia i nika ga na kporo kurogo kura ba watadu ka dia kura sunge berewe kubeyo. Ani namanga adiaberã na a’uru dunduko tipa wai ani ka mangasunge na gaani regbo na tipa kura dungu apai a. Gine nika undo rani ani mangi gu diaberã nga ga tatamana nga gu nika undo rani ani ru nyanyakii niga Mbori amoyambu? Kristano sa ni dee naima digo nimangisunge fu Mbori tipa dungu agarã ayaa: “Mi naasanahe tipa Yekova undo re ho mi naamanga adiaberã ni. Mi ima ida kuti gupai nga, si ninyanyakipa pai ka manga agu arugute du rogo Ziazia Kekeapai, gu i agumbaha pati agu adunguratise nga ga aKristano, gu abaakumba afuhe, na gu du rogo agu abuku du mburuhe rii Ziazia Kekeapai.”
Ho ani amanga diaberã ni, si aduni wenepai ka ani sana tirani ki ya: ‘Fuo agarã bisue watadu bawe tona areme, mi aduna ngbarago na gu diaberã mi aida ka mangaha re, watadu fuöho aturanga te mi ki bira tire? Mi namanga asadatise ka rugatire na gupai nga, gu diaberã mi ka mangaha re adianga re kusayo rogo rengo yo tee ono si nika fu bee tipa mi naasona rogo toroyo?’—AFiripoio 3:16.
Pa mbu agu aKristano naima zio bapatiza gene fu asada watadu ka mbu tiyo ka ye mbembedii kuti kuo ga Mbori andiko, asa gu kurayo i raki gu raka nadu na fudifudiapai rogoho. Bete agu aboro i akusi yo kusayo rogo dungurati mbiko i azi tiyo kuti manga ingapai zanga sa gayo berã, amangi bakere asadatise tipa i karaga yo berewe kurogo dungurati, ono ti kura aregbo, ka i aimanga ya i ki kusi yo berewe kuzagi yo, mbiko pa manga yo kina wirina gu ingapai re berewe. Ya mo nduhe rengbe ka du nga i akparanga fu Mbori tipa ko undo yo i ‘ne gbegberẽpai na ki zí tiyo kuti gupai ngba angba’ tee? (ARomo 12:9; Atambuahe 97:10) Ani dunduko si aida ani “nimbakadi ruru agene tipa [ndurani].” (AEbere 12:13) Ani wisiginga bete agu apai tie rengbe ka undo rani ani nye nyanyakii rogo toroyo.
Oni Ru Nyanyakii Rogo gu Mangaapai Nga ga AKristano
Gene sa dagba agu akuraha rengbe ani rogoho ka nye kuti gaani oto abaangira kindi tipa nyenye unga nga ka rimiso tirani kurogo sunge tungusapa Kindo bakere gbe. Ii, gu gaani sunge tungusapai nga ga aKristano nga nyanyakipa undo nasa ngbaduraniyo na gaani aberã si dunguratihe kina kuti manga gupai Mbori akpinyemuhe na ki sigiraha nyanyakii kuti berãpa gbia gu mosoro nga nyenye unga. Nibipa gipai re, Pauro angarasi aKorindo ki ya: “Betedi awirinami, oni dú nyanyaki, zanga wo, nimángi ga Gbia sunge zaza dedede, bambiko oni ini ya gaoni sunge adu nga gbua rogo Gbia yo te.” (1 AKorindo 15:58) Gu fugo nga “dú nyanyaki,” si nayugopa ‘guhe sigira yo ho ku baha.’ Na gu fugo Giriki i asaha nga “zanga wo,” si rengbe ka yugo gupai nga, boro ‘ambunga tini i zaki gu gire vo ni tini nani kuti rorõihe te.’ Sidu, pa dingiso ani tirani na sunge tungusapai rengbe ka sigira rani kungba gu gaani gene mangaapai nga ga aKristano. Pa undo ani kura aboro i ye ka ino Yekova nasa gaani raka si duna rogoyo ti ni na kini ye na ngbarago fu rani.—Amokedi 20:35.
Pauline, nga gu Kristano nadi agarã susi 30 nimokedi na kuti ngba manga kura asunge nga ga tungusapai ti aregbo dunduko nayaa: “Sunge tungusapai nabanda boro abanda, mbiko pa manga mi dezirepai fu aboro nanyakasa gupai fere nga mi na rengo bere.” Sangbana du boro na ngbatunga gu ida re naye dedede be manga ni gu kura asunge a nga ga aKristano, ngbatunga gu du wa du pati adunguratise tipa irisombori na kini wisigi Ziazia Kekeapai nisani zanga nyomoro.
Gu Nyemuse Nga ga Awirina Nanyakasa Rani
Padu ani nipapara gu riigbu nga ga agu airisimbori du rogo zegino dunduko na bakere ome ti ni na si rengbe ka nyakasa rani kurogo rengo yo. Nga gu maku ngaha ani kodi tirani na agu awirina duna nyemu akurayo tiyo rogo zegino dunduko! (1 Petero 2:17) Na ani rengbe arengba a ka nyakasa akuarani aidipase rogo rengo yo.
Oni makianga pa gu wene mangaapai nga ga undo gu ruru kumba nangia Eyobo anamanga. Zavura gu iraziree nangia Erifaza nayaa ko aafu wasa fu Eyobo, apai anyasi ngbako si ki idi ko idi gupai nga: “Gu pai mo agumba anyakasi gu boro naati, mo anyakasi rukusu rurungbura boro.” (Eyobo 4:4) Wa duhe tie were, ani naundo aboro? Wa du ani nibasasa, ani na gu tindiro kurii rani nga ga undo agu awirinarani nga ga toro yo tipa i hipai rogo manga ga Mbori sunge. Rogo gaani mangaapai na yo, ani rengbe ka manga sangba gu veresi naye re: “Oni nyákasi agu yo beyo narungbura arungbura, ki nyakasi agu yo du rukusuyo ni rurungbura ha.” (Yesaya 35:3) Sidu, tipagine ka oni amaanga ha ti ni ni gaoni sásá ka nyakasa akuaroni aKristano na ka ngarasa yo ti agu aregbo dunduko oni agbia yo ya? (AEbere 10:24, 25) Ka oni ngarasi yo na agu afugo nga ga tambuahe tipa gu gayo asadatise i amangaha kaa fu ngbarago fu Yekova kindi, si rengbe arengba nirengo ka undo yo i nye kindi nyanyakii ki duna maabangirise ka digiso agu abaangira na diabese i amangaha tipa nyenye unga.
Agu aKristano nga abaakumba rogo dungurati rengbe ka manga bakere asadatise ka ngarasa gu vovo aboro du rogo dungurati. I rengbe ka manga gipai re nifu yo aberã fuyo nga ga undo na ka fu wene arugute fuyo rogo Ziazia Kekeapai na nimanga yo sunge tungusapai na yo sa. Gu mokedi nangia Pauro anangarasa kura aboro dedede ho amamu anikuru ni. Ko aduna bakere nyemu ka bi agu aKristano nadu Roma yo tipa wa ka ko fu undo fuyo ninyakasa yo rogo toroyo. (ARomo 1:11) Ko anabi agu awirinako nadu Firipoi yo ni gako “ngbarago na kpakpari irisa” na ki ngarasi yo i “rú nyanyaki rogo gbia” yo. (AFiripoio 4:1) Fuo Pauro gi pa gu rungo awirinako adu rogoho Tesaronike yo, ko akedi Timoteo koyo tipa ‘ko nyakasi yo, ki ngarasi yo tipa gayo idapase; tipa ka i wonga be agberangbii ya.’—1 ATesaroniko 3:1-3.
Agu amokedi nangia Pauro na Petero abi gu wene a’asadatise akurayo aidipase amangihe na nyanyakipaha na i ki duna tambuahe tipaha a. (AKorosaio 2:5; 1 ATesaroniko 3:7, 8; 2 Petero 1:12) Ani moiberã rani kinawo a fuo gu wene asino nga ga awirinarani na kuti gu vura i asoho na diabese ka nye kuti fu irisa fu Yekova zanga wo, angianga ka maaberã rani fuo agu apai rungbura yo rogoho ya.
Kangia ani na gbegbere aberã kuti kura aboro watadu ani nabisira payo abisira, ani rengbe tie zanga ani ini he, ka sa apai si du nikpakarakpakaraha fuyo i ru nyanyakii rogo idapase yo. Naruhe ani tingidi gupai nga, awirinarani ‘narungo arungo na kini gbandaka’ rogo gi zegino re! (Matayo 9:36) Rogo gu dungurati nga ga aKristano, si ruaru fu aKristano i moibangiriyo tipa ka gbia wasa na zambua rogoho. Sidu tie, ani dunduko manginga asadatise ka sonosa akuarani aidipase na ka undo yo i nye nyanyakii rogo rengo yo.
Gu kura aboro rengbe ka manga rani ti kura aregbo ngba gu gene rengbe ka sa rani ka ani runga nyanyakii ya. Ya mo daha ada ani mbu gu gbegbere fugo gumba boro ho bara rani watadu gu gbegberepai mangi ni he kuti rani si zeresi kpotoraniyo ti ga Yekova sunge? Ka ani mbunga boro ni gbe rani kusayo rogo gu ba du ani rogoho re ya!—2 Petero 3:17.
Ga Mbori Akidohe Nanyakasa Rani
Gu ga Yekova kidohe du tipa wene raka kumbatayo tii gu zogarago nga ga gako Kindo nafu gu maabangirise fu rani naundo rani ani nye kindi nyanyakii rogo rengo yo. (AEbere 6:19) Na gu ida du ani nani nga Mbori naakpanga ti digiso gako akidohe te nafõngbaduraniyo ani ‘ningere angera, na ki ru nyanyakii rogo idapase yo.’ (1 AKorindo 16:13; AEbere 3:6) Gu bete ga Mbori kidohe nawira si nakeesa akeesa rengbe ka maa gaani idapase rogo asada. Sidu, si ninyanyakipa pai kisusi ani duna rubangirise tipa boro ka ingisa rani na gani azire yugopai na ki nyaga rani kusayo ti gaani maabangirise.—AKorosaio 1:23; AEbere 13:9.
Gu gbegbere kpiapai nangia ga aYisaraere nga aguyo nakpiki mbiko i adunga na idapase kuti ga Yekova akidohe te, si naida si duni gupai naza rani. (Atambuahe 78:37) Kuba gupai nga ani du wa yo, ani runga nyanyakii, kini mangisunge fu Mbori niipiipihe rogo gi yangara areme re. Bakumba sa duna inohe ayaa: “Mi naraka na a’uru dunduko si ki du wa gu bakere[pa] uru nga ga Yekova nika ye gba.”—Yoere 1:15.
Ii, gu bakerepa uru nga ga Yekova ima mbeda ka da. Ono tie, anga pai ho si aida ani gunde behe te ka ani du mbembedii na Mbori. Ka ani zi tirani kuti gako ruru andiko totoroto na ki ru nyanyakii, ani rengbe arengba ka ora oto abaangira tipa nyenye unga ki duna diabese!—Asanza 11:19; 1 Timoteo 6:12, 17-19.
[Gu kpiahe du ti kpewaraga 19]
The Complete Encyclopedia of Illustration/J. G. Heck
[Gu kpiahe du ti kpewaraga 21]
Oni namanga agu apai dunduko rengbe oni ka mangaha tipa ka undo akuaroni aKristano i nye nyanyakii rogo rengo yo?