Oni Kakuti Mangasunge Fu Yekova Na Ruru Ngbaduseyo
“Ako Mbori, kpotore yo ru nyanyaki, kpotore yo ru nyanyaki!”—ATAMBUAHE 57:7.
1. Tipagine rengbe ani tini ka duna kido wa ga Davide?
YEKOVA rengbe ka sa rani ani ru nyanyakii rogo gu idapase nga ga aKristano tipa wa ka ani zi tirani kuti gu ndikidi pambori nga ga aKristano ni agu amoyambu naima kpara gayo raka fuko. (ARomo 14:4) Sidu tie, ani rengbe ka duna kido wa kina gu bake Atambuahe nangia Davide nga guko nabibia ki ya: “Ako Mbori, kpotore yo ru nyanyaki.” (Atambuahe 108:1) Kangia ngbaduraniyo niruruhe, si asa rani ani mangi agu arugute du tipa gaani kparatise fu Mbori. Na ni ngera ani kubeko tipa arugute na tipa ome, ani rengbe ka ru zanga wo, ki du nyanyakii rogo gaani diaberã na ida ni agu aboro kakuti ruru mangapai, “nimángi ga Gbia sunge zaza dedede.”—1 AKorindo 15:58.
2, 3. Gine nga rogo gu ga Pauro afugo ngarasahe yo du nikekehe rogo 1 AKorindo 16:13?
2 Agu afugo gu mokedi nangia Pauro agumbaha ka ngarasa agu apefuo Yesu nadu Korinda yo mbata nangarasa agu aKristano angarasa du areme a, ko aya: “Oni ngére, oni rú nyanyaki rogo idapase. Oni dù wa akumba, oni dú nyanyaki.” (1 AKorindo 16:13) Rogo pa-Giriki, agi azinahe re dunduko ni agu afugo nafura tipa gupai namanga amanga awere, sidu kini ngarasi aboro i naandu kumbatayo na mangaapai kindi. Rogo gi rugute re yo nga gine?
3 Ani rengbe ‘kaa ngera’ rogo toroyo ni soga ani ga Bakitingbanga apai na ki du mbembedii na Mbori. (Yakoba 4:7, 8) Pa kido ani kuti Yekova naundo rani ani nye ni kpamiakpamia rani kuti akuarani na ka ‘ru nyanyakii rogo gu idapase nga ga aKristano.’ Ani, kodihe kuti gu dungu adee du dagba rani, ‘nandu kumbatayo wa akumba’ rogo mangasunge fu Mbori ni atakipande Kindo zanga gunde. (Atambuahe 68:11) Ani ‘nadu nyanyakii’ ni ngera ani kindi kube gu Barani nga ga ngbangbaturũ ko tipa ome ani mangi gupai nani ko akpinyemuhe.—AFiripoio 4:13.
4. Gini apai ani amangi ka zio bapatiza ki dani aKristano?
4 Ani ayugu gupai nga ani ima idapa ndikidi idapase ho ani akpara gaani raka ni fu Yekova na ngbaduraniyo dunduko na ani ki yugu gi kparatise re ni rindosi yo rani kutii ime yo. Ono gine nasa rani ani zi bapatiza? Bambatapai nga, ani agbia ruru inohe nga ga Fugo Mbori. (Yoane 17:3) Gi inohe re asonosi idapase rogo rani yo na ki sa rani ani saberã, ani kini rungo tipa gu iraira apai ani amangihe kusayo. (Amokedi 3:19; AEbere 11:6) Fuo gure, ani a’aria gaani ida, mbiko ani asagiirani na iraira apai tipa ka raka gu raka duna ngbanya kuti gupai Mbori akpinyemuhe. (ARomo 12:2; AEfeso 4:23, 24) Fuo gure, ani afu kpee fu Yekova ya ani naida na ngbaduraniyo dunduko ka kpara gaani raka fuko. (Matayo 16:24; 1 Petero 2:21) Ani asana Mbori tipa ka duna wene sangbakpotoyo na i ki bapatizi rani ni yuguyugu kpia gaani kparatise. (1 Petero 3:21) Pa maa ani gipai re kuri rani yo nika undo rani ani kakuti maa berã rani kuti asadatise ka raka ringbisihe kuti agu arugute du tipa gaani kparatise fu Yekova na ka nye kuti mangasunge ko na ruru ngbaduseyo.
Oni Kakuti Gbata Ruru Inohe Kindi
5. Tipagine si aida tini ani kakuti dia gu inohe nga ga Ziazia Kekeapai kindi?
5 Tipa ani raki ringbisihe kuti agu arugute du tipa gaani kparatise fu Mbori, ani du wa ka ani aadia gu inohe kindi nga ga Ziazia Kekeapai nga gu nasonosa idapase. Nga gu ngbarago ani adu nani ka ri gu riahe nga ga toro ho ani ainipa ga Mbori rengo ni ti bambata regbo! (Matayo 24:45-47) Agu “ariahe” re aduni wenehe, na si arigi rani wenengai rogo toroyo. Awere si ni nyanyakipa pai ani naari gu beedi riahe nga ga toro kindi tipa ngbaduraniyo nye kindi niruruhe ani ki nye ni gu ga Yekova amoyambu naima kparatiyo fuko.
6. Wai i avura undo roni oni sonosi tambuahe ngbaduroniyo tipa gu rengo nga ga Ziazia Kekeapai?
6 Si naida boro mangi bakere asadatise tipa ka gbia gu inohe nga ga Ziazia Kekeapai. Si wa kina gbata gu kumuko i aigihe, nga gu naida nyanyaki sunge tipa ka kusaha. Ono nairiwo gu mosoro ngaha, nga boro gbia kina boro “gu inahe nga ga Mbori”! (Asanza 2:1-6) Ho batungusipa Kindo awisigi Ziazia Kekeapai ni na oni ti bambata regbo, ni avura mangasunge na gu buku nga, Gu Inohe Nandu sa Nyenye Unga. Oni avura dia bakere regbo ka nyasa na akapita nibasasa, isoke oni avura dia regbo susi bara sa kuti bangisa kapita sa. Oni agbia undo wa ni anigedi agu averesi i ake kina paha gbua na wa ni anisakipai tipaha. Kangia bangiripai aduho nadu ni nyanyakihe tipa oni giarogoyo, ni anisakirogoyo fu roni. Gu boro nananungusa wisigo Ziazia Kekeapai na oni anambakada ti ni wenengai, kini kpari fu Mbori tipa gako ziazia toro, na kini undo roni oni sonosi tambuahe ngbaduroniyo tipa rengo.
7. Gine nasa boro ni rẽ tipa yugo ga Mbori rengo fu kura aboro?
7 Si adaada ni mangi gi bakere asadatise re, mbiko Pauro akepai ki ya: “Gu ni i ayugo . . . pai ayugo fu ni ni nigamu ngbatunga wene ahe agama dunduko fu gu ni nayugo pai.” (AGaratio 6:6) Gu fugo Giriki i asaha herẽ nayugo gupai nga, i sigira gu yugopai nga ga Fugo Mbori ku berã gu boro yo ‘i ayugo pai funi’ na ku ngbaduni yo a. Pa yugo yo pai fu roni wa gure nasa roni oni rẽ ni bayugupai fu kura aboro. (Amokedi 18:25) Tipa oni rengbe ka manga agu arugute wenengai du tipa gaoni kparatise fu Mbori, oni du wa ka oni kakuti banda tironi wenengai rogo toroyo na ki ru nyanyakii ni ka oni kuti wisigo Fugo Mbori kindi.—1 Timoteo 4:13; Tito 1:13; 2:2.
Oni Tingidinga Pa Gaoni Saberã na Aria Ida
8. Wai rengbe boro ka kakuti manga sinombori?
8 Oni natingidapa gu ongoda oni agbiaha ho oni awiriki rengo ni ki sa gaoni berã na ki ini pa ga Mbori mbupai fu roni nga gu mburuhe adu rii ga Yesu motumo tumorii? (Atambuahe 32:1-5; ARomo 5:8; 1 Petero 3:18) Si nirengo nga, oni akpinga nyemu ka karaga tironi kurogo gu raka nga ga ingapai te. (2 Petero 2:20-22) Dagba gu kura apai, kparakpee dedede fu Yekova aundo roni oni kakuti gu mangaapai nga ga sinombori, kini raki ringbisihe kuti agu arugute nga ga gaoni kparatise, na ki nye kindi kuti mangasunge fu Yekova niruruhe.—2 Petero 3:11, 12.
9. Fuo dia ani ndurani kusayo ngba gene ingapai, gini gene si aida ani ndu ngbaha?
9 Fuo sa oni gaoni berã ni mbu oni manga ingaapai, oni susi kumbatayo kaa gbata ga Mbori undo tipa ngbaduroniyo nye niruruhe. Gupai namangi nzunzu nga, oni aandu ngba iraira gene ono oni ki sana gu boro ini bara nzunzu gene, ni ki yuguhe fu roni, oni ki tona ka ndu ngbaha. Ka oni inginga awere ngba gi gene re berewe ya. Oni kakuti kido kina kuti agu arugute nga ga Mbori, na oni ki diberã ka nye kina ku ngba gu gene nandu na boro sa unga.—Yesaya 30:20, 21; Matayo 7:13, 14.
Ka Bangironi Ya Gonga ti Gaoni Kparatise fu Mbori na Gaoni Bapatiza Ya
10. Gini bangiri apai si aida ani moihe ku berã rani yo nibipa gaani kparatise fu Mbori?
10 Oni moi gupai ku berã roni yo nga, oni akpara tironi fu Yekova rogo kparakpee fuko, na oni ki duna gupai bangironi nga ga mangasunge fuko niruruhe nyeanye kindi. (Yuda 20, 21) Kparatise fu Mbori nayugopa kpara boro ti ni tipa ka manga ziazia sunge. (Pa Amotumo 15:31; 22:2) Anga oni akpara tironi fu Mbori tipa guru regbo te, na anga aboro a oni akpara tironi ka ndusunge yo te. Si angia nyenye kparatise fu Bakindo Zegino dunduko, na pa raka oni ringbisihe kuti agu arugute du tipaha naida oni du niruru roni fu Mbori dati kpio. Ii, ‘singia ani ni unga rani watadu ani nakpiko, ani nga ga Yekova aboro.’ (ARomo 14:7, 8) Gaani ngbarago naru riipa ra ani fuko na kini mangi gupai ko akpinyemuhe na riipa nye ani kuti mangasunge fuko na ruru ngbaduseyo.
11. Tipagine si aida tini oni tingidipa gaoni bapatiza ni nyanyakipa pai?
11 Oni naatingidapa gaoni bapatiza dedede nga gu oni adihe ka yugopa gaoni kparatise nani fu Mbori na ngbaduroniyo dunduko. Anga i azi roni azio kuti gu bapatiza re te, mbiko oni nitironi nadiberã ka zioho. Oni ima diaberã awere tipa kaa manga gupai oni akpinyemuhe si duna ngbanya dagbaha na gupai Mbori akpinyemuhe rogo gaoni yangara raka kumbatayo? Oni asana Mbori tipa wene sangbakpotoyo na i ki bapatizi roni ni kpia gaoni kparatise fuko. Oni banda gu sangbakpotoroniyo re ni manga oni agu arugute du tipa gaoni kparatise, fuo manga oni he were, gu bakere maku nga ga Yekova aye kurii roni.—Asanza 10:22.
Gupai Oni Akpinyemu ka Mangaha Ni Nyanyakipa Pai
12, 13. Gini pagume du dagba gupai ani akpinyemuhe na gaani kparatise fu Mbori na gaani bapatiza?
12 Nirengo, kparatise fu Mbori na bapatiza aye na bakere amaku fu dungu aboro rogo zegino dunduko. Ho ani ayugo gupai ni ni gaani bapatiza nga ga ime ya ani ima kpara gaani raka fu Mbori, ani nakpi nibipa gu kuru mangaapai ani anamangaha mbata, ono gere ayugonga gupai nga ani ima mbupa agu apai dunduko ani aida ka mangaha kumbatayo te. Ni du ani ni agu aboro i aima yugopai fuyo wenengai, pa kpara ani tirani rogo kparakpee fu Mbori na ki zi bapatiza angia gupai nzunzu kina rani nitirani aidi ka mangaha. Pa kpara ani tirani fu Mbori na ki zi bapatiza naida ani rugu tirani na pa gupai Mbori akpinyemuhe na kitaino aino kini mangihe. (AEfeso 5:17) Rogo gi gene re, ani kini wiriki Yesu, nga guko namangi kina gupai ko nitiko akpinyemuhe, nga kitaino aino kini zogo aũ sekangua sande ka zio bapatiza na ki fu tiko ka manga gupai gu Bako nga ga ngbangbaturũ ko akpinyemuhe.—Atambuahe 40:7, 8; Yoane 6:38-40.
13 Yekova Mbori aringbisi gupai tipa Wiriko nga ka sa ko ‘nirengberengbe ko mbiko rungo.’ Sidu, si aidi Yesu mangi gupai kina ko nitiko akpinyemuhe tipa ka hi agu arungo re niruru mangaapai. Tipa ka manga gupai re, ko afu “akpe na asarawati na nyanyaki akpe du na aume fu gu ko rengbe na batasa ko be kpio, fuo gia yo pako bambiko gako gunde ti Mbori.” (AEbere 2:10, 18; 5:7, 8) Ka ani yugu kina ngbatunga gu iriiri gunde ti Mbori re, ani rugu tirani aruga a na gupai nga Mbori ‘agia rani agia,’ na ani ki rengbe ka duna gu kido nga, Yekova asa rani asa ani ru nyanyakii ni gu gako aDezire naima kparatiyo fuko.—Yesaya 43:10.
Oni Rengbe Arengba ka Banda Ruru Ngbaduseyo
14. Tipagine si aida ani gedi Ziazia Kekeapai tini na auru dunduko?
14 Gine nika undo roni oni banda ngbaduroniyo niruruhe na ki sa roni oni mangi agu arugute du tipa gaoni kparatise fu Mbori? Ni maa oni gupai kurii roni yo nga oni naida kaa dia gu inohe du tipa Fugo Mbori nga gu nakio kina kumbatayo, oni nigedi Ziazia Kekeapai na auru dunduko. Gere nga gupai ‘ruru kangara moyambu’ naangarasa rani sani zanga piriga. I nafu gu rugute re mbiko pa raka ani kini mangi agu arugute du tipa gaani kparatise nakpinyemu gupai berani nga ani naata rogo ga Mbori rengo yo. Kangia ga Yekova riigbu nataino aino kini yugu aziree, ka i ngarasinga aDezire Yekova gbiakuti agu aboro i atungusapai fuyo i nigedi Ziazia Kekeapai te.
15. (a) Ginipai si aida boro wisigihe ho ni adiaberã ni? (b) Tipagine rengbe ani ka ya tini gu sunge marã aKristano amangaha si nga gu ue sunge fuyo?
15 Ho oni adiaberã ni tipa ka mangapai, dedede oni bihe si ka ka na oni ti manga oni agu arugute du tipa gaoni kparatise fu Yekova. Gere rengbe ka du tipa gaoni sunge marã. Oni namanga asadatise tipa gaoni sunge undo roni oni sono rogo ndikidi irisombori? Wa vura duhe dedede nga, agu aboro nafu sunge marã fu aboro naabi gupai nga, agu aKristano naima kpara gayo raka fu Mbori ni agu aboro rengbe yo ka kido kuti yo na nga wene abamangisunge, i ima ino gupai a nga, ga Yekova aDezire na kere nyemu aũzegino tiyo na kini idi ka pera mbatayo fu aboro rogo zegino na kini mangi abaangira na kura aboro tipa gu wene asunge nafu kumuko te. Gere wo mbiko anga gupai aDezire aida ka mangaha si nga i naida ka gbia kumuko, worimo, iriiripa sunge, watadu pagbia te. Tipa agu aboro naraka awere na kini mangi agu arugute du tipa gayo kparatise fu Mbori, gupai nyakipaha bangiriyo gbe nga pa manga gupai Mbori akpinyemuhe. Gu sunge marã i amangaha tipa si songodi yo rogo gayo raka, si fuyo gbua nga gu ue sunge, du paha kusende. Wa kina gu mokedi nangia Pauro, gu gayo sunge kiipaha gbe, si nga gu sunge tungusapai nga ga aKristano. (Amokedi 18:3, 4; 2 ATesaroniko 3:7, 8; 1 Timoteo 5:8) Oni namaa agu apai nga ga Kindo mbata rogo gaoni raka?—Matayo 6:25-33.
16. Ginipai rengbe ani ka mangaha ka ani du rogo gu bakabangirise adunga nduhe tini ya na si kini mangihe fu rani ni kpakarakpakaraha ani mangi agu arugute du tipa gaani kparatise fu Mbori?
16 Si vura du nga gu kura aboro kinaho ome bakabangiriyo ambedi ka fu riyo mbata fu i wiriki rengo. Ono nairiwo wai ngbaduyo ahi be ngbarago, be tambuahe, na be nyemu Mbori ho i adi gu maabangirise ni kugume nga ga Kindo! Pa berã yo kurii agu amaku i agbia ngbarago behe natona ti gu regbo re ka ndu kumbatayo rengbe ka undo yo i raki ringbisihe kuti agu arugute du tipa gayo kparatise fu Yekova. Ngba kura gene, kangia gupai namanga aboro rengbe na arago dunduko, nga agu apai si aidanga ani bakibangirani tipaha ya sa rani ani naabakabangirani kisusi, si kini kandasi ‘fugo Mbori’ kpotoraniyo a wa rengbe akiwe ka kandasi tama ahe ka si asonanga ki zuku rindihe ya, ginipai si aida ani mangihe? (Ruka 8:7, 11, 14; Matayo 13:22; Marako 4:18, 19) Ka oni bi gupai nga, gipai re ima tona ka manga roni watadu gaoni aborokporo, oni ba gaoni bakabangirise kurii Yekova na ki kparikpee tipa ko undo roni oni sono rogo nyemuse na ki duna tambuahe berewe wa gu oni adu nani mbata. Ka oni ba gaoni tindiro kurii ko, ko asongoda roni asongoda na ki fu ome fu roni oni nye kuti mangasunge fuko na ngbarago na ruru ngbaduseyo.—Atambuahe 55:22; AFiripoio 4:6, 7; Yugoti 2:4.
17. Wai rengbe ani ka sovura na diabese kuti kere a’asada?
17 Oni naakpara fu Yekova Mbori dedede, a wa oni anakpara ho oni aakpara gaoni raka ni fuko. (Atambuahe 65:2) Ho oni agbia tironi ni na asada ka manga gupai arunga ya watadu ho oni agbia tironi ni na kere asada, oni gbata gu rugute nga ga Mbori gbiati gako undo tipa ka mangaha. Oni moi pa gu zingo ku berã roni yo du tipa idapase, mbiko gu bawiriki nangia Yakoba akepai ki ya: “Ono ka zingo tatamana amanga gu ni dagba roni yo [tipa ni sovura nani kuti asada na ki dibehe], ni [kpatagara kuti] sána Mbori, [nga guko] ninafu he gbe fu aboro dunduko, azinga nga fu boro ya; ko ki fu he afu fu ni. Ono ni sána he ni idapase, ka ni sáki nga pa ko ya; bambiko gu ni nasaka pai ni wiri gu ngiri baime, yuge nita danda ha nituka ha ku sa yo. Si du ka gu borore berẽ nga ha ya ni adia he be Gbia ya. Boro berãpai ue du, ni rungburarungbura ni rogo gani apai dunduko.” (Yakoba 1:5-8) Ka ome asada wiri si ima susa ome rani, ani rengbe ka duna gu kido nga: “A nga asada ye sa roni te, kina gu ka boro hi he ahi. Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.”—1 AKorindo 10:13.
18. Ginipai rengbe ani ka mangaha ka gu kere ingapai ani aokoho arungburasi rani rogo gaani diaberã ka manga agu arugute du tipa gaani kparatise fu Yekova?
18 Ginipai ka oni mangi ka si du nga gu kere ingapai oni amangihe na ki okoho nafuda gaoni sangbakpotoyo na kini rungburasi roni ti manga oni agu arugute du tipa gaoni kparatise fu Mbori? Kangia oni aima sa gaoni berã ti ni, oni rengbe ka gbia wasa be ino oni gupai nga, ‘gu kpotoyo naima be rungo ingapai, Yekova apáyasinga ha te.’ (Atambuahe 51:17) Oni gbata undo be agu aKristano nga abaakumba, mbiko oni ini gupai nga, wa kina Yekova, i abinga pa gaoni nyemu mbakada pagume na gu Barani nga ga ngbangbaturũ ko ni taatapai te. (Atambuahe 103:10-14; Yakoba 5:13-15) Fuo zambuasi oni gu ome nga ga toro na ngbaduroniyo ki du niruruhe, oni arengba tie ka ruga gu gene oni aida ka ndu ngbaha na ki bipa manga oni agu arugute du tipa gaoni kparatise fu Mbori ni gupai rengbe oni arengba ka mangaha.—AEbere 12:12, 13.
Ani Nye Kuti Sunge Yekova na Ruru Ngbaduseyo
19, 20. Tipagine duhe tini ni nyanyakipa pai ani kakuti manga agu arugute du tipa gaani kparatise fu Mbori?
19 Rogo gi gbegbere aregbo re, si naida ani mangi bakere asadatise ka raka ringbisihe kuti agu arugute du tipa gaani kparatise fu Mbori na ki zi tirani kuti mangasunge fuko na ngbaduraniyo niruruhe. Yesu ayaa: “Gu ni nikaru ki da ho ragoho ka diga ni, ni abáta abata.” (Matayo 24:13) Wa duhe nga ani naraka rogo ‘yangara areme,’ digido zegino rengbe ka ye ti gu regbo ani ainongaha ya. (2 Timoteo 3:1) Kurii gure, anga boro ho dagba rani rugu ti ni na gupai nga ni adu adu kindi ni ungani gba te. (Yakoba 4:13, 14) Sidu, si nga nyanyakipa pai ani ta raka areme kini mangi agu arugute du tipa gaani kparatise fu Mbori!
20 Gu mokedi nangia Petero anyakasi gipai re rogo gako ue waraga. Ko ayugu gupai nga, a wa agu aboro naadunga na sinombori tiyo ya akpiki rogo Ime Akangbii, kinawo a duhe tipa gu kpotosende du awere, nga gu narukuba gu gbegbere riko nga ga aboro, nga aguyo i ka gbarasa yo rogo ‘ga Yekova uru.’ Sidu, Petero apoi kuari ki ya: “Wa du agi ahe re nikadu ni gbandakagbandaka ha oni [ni]ka du ni gini ngbatunga aboro tipa manga ziazia apai na sinombori?” Ko angarasi yo a ki ya: “Were abadiangba, wa . . . oni [naima ino] pa agi apai re mbata, oni bánda tironi gu ingapai nga ga gbegberẽ aboro [gbiati zire abayugupai], si ka ndu ka ngbe fu roni ku mbata yo, oni ki ti pati gaoni ru nyanyaki.” (2 Petero 3:5-17) Nagberehe ka pai mangi nga, i ingisi gu boro naima zio bapatiza ni ki da ti digido gani raka ni gu boro naabandanga ngbaduniyo niruruhe ya!
21, 22. Wai sangba Atambuahe 57:7 ada nirengo tipa Davide, na wai si amanga tipa ndikidi aKristano?
21 Gaoni diaberã ka manga agu arugute du tipa gaoni kparatise fu Mbori rengbe ka nyaka ka oni bandapa gu uru ngbarago ku berã roni yo nangia ga gaoni bapatiza, na ki nasa Mbori tipa undo tipa afugo roni na gaoni mangaapai sa ngbaduko si ngi. (Asanza 27:11) Pai aamanganga mbata nga Yekova fu gberarago fu gako aboro ni zanga ko manga agu apai ko akido yo tipaha te, na nirengo, si daada ani duni ruru rani fuko. (Atambuahe 94:14) Ko ainipai fu Davide na ki duna nunga ko tiko, ni kandasi ko ga avura Davide aburo i aamangaha tipa ko na ki batasi ko. Ni du Davide na tambuahe tipa gipai re, ko atakipande gako nyemuse tipa gako Batasi ya si adu nyanyakii, na zanga wo. Na bakere nunga, ko abibia ki ya: “Ako Mbori, kpotore yo ru nyanyaki, kpotore yo ru nyanyaki! Mi abí bia, ii mi abí bia atambuahe!”—Atambuahe 57:7.
22 Wa kina Davide, ndikidi aKristano awonga rogo gayo kparatise fu Mbori te. Na angbaduyo yo niruruhe, i natambua Yekova tipa gu bata na bandahe i agbiaha, na kini bibia sambuohe fuko na ngbarago. Ka si du nga ngbaduroniyo niruruhe, si nikaa kido kina kuti Mbori, na mbiko gako undo, oni rengbe arengba ka manga agu arugute du tipa gaoni kparatise fuko. Ii, oni rengbe arengba ka du wa gu “ruru boro” bake Atambuahe abibia tipa ni ki ya: “Ni agunde nga be gbigbita pangbanga te; kpotoni yo du nyanyaki, nikida [kina] kuti Yekova.” (Atambuahe 112:6, 7) Ni du oni na idapase kuti Mbori na kini kido kina kuti ko nabaha, oni rengbe arengba ka raka ringbisihe kuti agu arugute du tipa gaoni kparatise fu Yekova na ki kakuti mangasunge fuko na ngbaduroniyo niruruhe.
Oni Natingidaha?
• Tipagine si aida tini ani nye kindi kuti dia ruru inohe nga ga Ziazia Kekeapai?
• Tipagine si aida tini ani banda pa gaani saberã na pa gaani aria ida ku berã rani yo?
• Wai tingida ani pa gaani bapatiza na kparatise fu Mbori aundo rani?
• Gine nika undo rani ani nye kuti mangasunge fu Yekova na ngbaduraniyo niruruhe?
[Gu kpiahe du ti kpewaraga 28]
Oni nabandapa gaoni du wenengai rogo toroyo ni geda oni Fugo Mbori na auru dunduko?
[Gu kpiahe du ti kpewaraga 28]
Pa sa ani gu sunge tungusapai nga ga aKristano ni gaani bangua sunge naundo rani ani mangisunge fu Yekova na ngbaduraniyo niruruhe