Ka Oni Mbunga be Manga Rurupai Ya
“Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.”—AGARATIO 6:9.
1, 2. (a) Tipagine si aida tini ani duna hipai tipa kaa manga ga Mbori sunge? (b) Waigu Abarayama ahipai, na gine naundo ko ko hipai wa gure?
NI ADezire Yekova, ani nagbia ngbarago be manga gupai Mbori akpinyemuhe. Ani nagbia wasa a rogo tinda gu gaani “gonga” nga ga sunge sa aboro ni abawiriki. (AGaratio 6:3) Wa vura duhe wo, mangasunge fu Yekova na fu Kristo nga taatapai dedede te. Gu mokedi nangia Pauro agumba gipai re ziazia ho ko angarasi akurako nga aKristano ni niyaa: “[Si naida] oni du na hipai, ya, fuo manga oni sangba Mbori, oni ki di gu mosoro i akido roni tipa ha.” (AEbere 10:36) Si naida ani duna hipai mbiko mangasunge fu Mbori rengbe ka du nikpakarakpakaraha.
2 Nirengo, ga Abarayama raka nga wene gopai tipa gipai re. Dungu aregbo aduho ko agbia tiko ti gu siapai nadu nikpakarakpakaraha na ki bi tiko rogo dungu fudifudiapai a. Gu rugute Mbori afuhe fuko tipa ko mbu gu wene raka nadu Ura yo adu gbua nga tonatona pai. Fuoho aturanga te, ko ki gbia tiko na dungu fudifudiapai, nga bakere gomoro, sogote be gako amurakporo, pa diako, sogote be agumeko, na gu rungosi nangia ga vura. Bakere asada adu kindi kumbatayo fuko. Ono ome Abarayama abatanga ti manga rurupai te. Gipai re nairiwo gbe ho ani aberã gupai ni nga, ko aadunga na Fugo Mbori beko dunduko, nga Ziazia Kekeapai wa gu du ani nani areme berani te. Wa si avura du wo, ko aima ino pai tipa gu bambata sangbanebi nga gu Mbori agumba gupai rogo nga: “Mi amáa sogote dagba roni na de, dagba atitaro na atitari a; ko ki mburu riro, mo ki mburu gidako.” (Bambata Pai 3:15) Mbiko padu ko ni gu boro si adu nga gu Tunga re aye rogo ngbatunga ko, Satana amoi berãko fuo Abarayama tipa kaa soga ko. Zanga kapa, pa ino Abarayama gipai re aundo ko ko hi gako asada na ngbarago.
3. (a) Tipagine si aida tini gu ga Yekova aboro du areme moibangiriyo tipa rungosi? (b) Gini ngarasahe AGaratio 6:9 afuhe fu rani?
3 Si naida gu ga Yekova aboro du areme moibangiriyo tipa rungosi. (1 Petero 1:6, 7) Nirengo, Yugoti 12:17 nagumba gupai fu rani nga Satana “[na]so vura” na gu yangara mbedimbedi yo. Mbiko gu dawedawe kodatise du dagba gu mbedimbediyo na “kura avusende,” si nasa gupai a nga ngbadu Satana naaima kuti gu kura avusende re. (Yoane 10:16, NW ) Ku pati gu rungosi rengbe aKristano ka gbia tiyo nani rogo gayo sunge tungusapai gbaiga, i rengbe ka gbia kura fudifudiapai a nga gu naye na asada fuyo rogo gayo raka yo. Pauro nangarasa rani niyaa: “Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.” (AGaratio 6:9) Ii, wa vura duhe nga Satana naida ka gbarasapa gaani idapase, ani du wa ka ani ru nyanyakii kini sovura kuti ko, na ki ru nyanyakii a rogo gaani idapase. (1 Petero 5:8, 9) Ginipai rengbe ka manga ni sangbana gaani ruru mangapai? Yakoba 1:2, 3 nasakarogoyo niyaa: “Awirinami, ho dungu ngbatunga asada ka ye ni fuo roni, oni ki sa ha ni kina ngbarago dũ; niini ya asada gaoni idapase namanga zadapase.”
Pa Zubo Rani
4. Waigu Satana azubo ga Mbori aboro rogo gako asadatise ka sa yo ka i kanga kuti gayo ruru mangapai fu Mbori ya?
4 Nirengo, ga Abarayama raka nayugopa agu ‘asada nibakiakia’ rengbe Kristano ka gbia ti ni nani areme. Ni kpiapai, si aidi ko mangipai tipa agu abasovura naye Sinara yo ka zubo aboro. (Bambata Pai 14:11-16) Sidu, si airiwonga ti rani ka bi gupai nga Satana nazubo rani na kini rungosi rani kindi te. Natona fuo nyasa Ue Vura nga ga Zegino, dungu aringara azahe ti gu sunge yugopai nga ga aDezire Yekova. Gu Buku Garã nga ga ADezire Yekova nga ga 2001 nafura tipa gu kere apai aKristano ahihe be avura yo Angola yo. Mbiko kido yo kuti Yekova, awirinarani rogo ngbatunga agu aringara re azi tiyo kindi kuti gayo sunge! I akaragapai sa gu rungosi re, angianga rogo zuũ watadu ni samungu ya, ono ni zio yo tiyo kuti sunge tungusapai, kini mangihe wo na birĩ.—Matayo 24:14.
5. Waigu rengbe agu aKristano nga aparanga ka gbia tiyo na rungosi sukuru yo?
5 Ono tie, anga rungosi dedede nga kina manga aboro ni zuũ te. Ni yangaraha, Mbori afu maku fu Abarayama ko ki batika akumbagude ue, nangia Yisamaere na Yisaka. Bambata Pai 21:8-12 natingida rani na gupai nga rogo kura uru sa, Yisamaere ‘asawia’ Yisaka. Rogo gu gako waraga ko akehe fu aGaratio, Pauro nayugo gupai nga gere angia kerepai susi gu mbaro nidu dagba agude, mbiko ko nayaa Yisamaere aarungosi Yisaka! (AGaratio 4:29, NW ) Ruhe aru tie ani bi gu sawia na gu gbegbere afugo agude agumbaha fu awirinarani sukuru yo ya si nga rungosi. Paranga Kristano sa du rimo ko nga Ryan atingidipa gu rungosi ko agbiaha be akurako sukuru yo. Ko ayaa: “Gaani guru nduge na baasi ku sukuru yo na gaani gate ku kporo yo na baasi anadia aminiti 15, ono si adu wa kina dungu asaa mbiko gu gbegbere afugo agude anagumbaha fere. I anazokoda kpotore na gu pangere nga ga waraga fuo faasa yo ho na gu we abaramu naziga gundö nani.” Ndu gi kere mangapai re angia gine? “Si adu mbiko gu wirikapai mi agbiaha rogo ga Mbori riigbu, nga gu nasa re mi du kia ti kura agude sukuru yo.” Wa si avura du wo, mbiko gu undo avungu ko afuhe fuko, Ryan arengbe ka hi gipai re kini mangi kina rurupai kindi. Aparangaa, gu sawia akuaroni amanga roni nani sukuru yo ima zeresa kpotoroni yo? Ka ome roni batinga ya! Ni hi oni pai kini mangi kina rurupai, oni rengbe ka ino parengo gu fugo Yesu nga: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re.”—Matayo 5:11.
Bakabangirise Na Auru Dunduko
6. Gini apai rengbe areme ka gbarasapa gu pagume du dagba aKristano?
6 Gu dungu a’asada ani agbia tirani nani areme nakoda agu apai dungu aboro abakabangiriyo tipaha na auru dunduko. Si aidi Abarayama hi gu fudifudiapai nakuru dagba gako ababanda anyaa na ga Roto ababanda anyaa. (Bambata Pai 13:5-7) Teketeke a, kpiko awirina tipa agu apai namanga fuyo na pa soga aboro sino akurayo, nga gu nakoda gu fugo nga ngbanga mbisimoko watadu mbisimori tire te rengbe ka gbarasa gu pagume du dagba awirina na ki rengbe a ka gbarasapa gu zereda nga ga dungurati. “Bambiko ho du kpiboro ni na kpata, yo du gbarakagbaraka pai ni na ngbatunga gbigbitapai dunduko.” (Yakoba 3:16) Nirengo, gu nyanyakipa pai duho nga, si aidanga ani mbu ruko tipa si gbarasipa zereda te, ono si naida ani mangipai a wa Abarayama amangihe, nga ka gbata kina gupai ngbaa ti kura aboro mbata fu gaani!—1 AKorindo 13:5; Yakoba 3:17.
7. (a) Ginipai si aida boro mangihe ka si du nga kurani nga Kristano imisi ni? (b) Waigu Abarayama amoi wene kpiapai nga ga banda wene pagume dagba ko na kura aboro?
7 Du ni boro zereda rengbe ka duni kpakarakpakarapai ho ani abi gupai ni nga wirina mangi fu rani gbegberee. Asanza 12:18 nayaa: “Gu boro . . . ho nagba sa fugo wa kina baso sa rũ he.” Gba sa gu fugo boro naidanga ka imisa kura ni nani ya rengbe arengba ka imisa kurani gbegberee. Gupai re naima berewe kisusi ka ani bi gupai nga boro kitingbaanga rani watadu ni gumba rimo rani fu kura boro. (Atambuahe 6:6, 7) Ono si aidanga gu gbegbere afugo i agumbaha bara Kristano sa ni ni mbu gani ruru mangapai te! Kangia ngbatunga gupai re namanga roni, oni duni bambata boro ka guari sa mbakadaha ni fura oni zezeredii fu gu boro imisi roni. (Matayo 5:23, 24; AEfeso 4:26) Oni duna nyemu mbupai fu gu boro re. (AKorosaio 3:13) Ni mbu ani kpipai, ani nazeresa agu apai du ngbadurani yo na gaani pagume ki karaga tihe berewe kubaha ni bawenehe. Abarayama akpinga pai kuti Roto te, mbiko ko aoro ka batasa Roto na gako aborokporo!—Bambata Pai 14:12-16.
Agu A’sada Kina Boro Aye Nani Kuri Ni
8. (a) Waigu rengbe aKristano ka ‘rupo tiyo na dungu arungo’? (b) Gine nasa Abarayama ko duna ruru bipai tipa aũzegino?
8 Rengo ngaha, kura asada kinaho kina boro aye nani kuri ni. Ni kpiapai, Yesu arugu apefuo ko ki ya: “Ka oni dúngura nga ũkumuko ni gaoni zegino ya, no ayawe agbarasa ahe ni na gbegbe, no airadĩ akua bambu ni nidĩ ahe.” (Matayo 6:19) Wa vura duhe wo, kura awirina ‘narupo tiyo na dungu arungo’ ni maa yo nyemu aũzegino mbata fu agu apai nga ga Kindo. (1 Timoteo 6:9, 10) Abarayama aduna nyemu mbupa aũzegino tipa ka fu ngbarago fu Mbori. “Mbiko idapase ko amoi kporo rogo gu ringara nga ga kidahe, wa rogo gu ringara nangia nga gako ya, ki nisungu rogo abamburoko na Yisaka na Yakoba a, nangia adikumbo gu kidohe [re] wa sa na ko, mbiko ko angere tipa gu bakporo du na nyanyaki mburuhe ti ni, du baduaha nga Mbori ni bamangihe a.” (AEbere 11:9, 10) Ga Abarayama maabangirise tipa “bakporo,” watadu gu zogarago nga ga Mbori aundo ko ka ko kidonga kuti kumuko ya. Anga si adu ni pa tatamana ka ani mangipai wa kina ko tee?
9, 10. (a) Waigu nyemu worimo narengbe ka kusa asada? (b) Waigu rengbe wirina areme kaa mangapai wa ‘tooni pa boro’?
9 Oni binga gu kura papara gipai re. Ziazia Kekeapai nafu gi nyanyakipa rugute te: “Ka boro aberã pa tini, ya he a nga u, ka ni adu nga ni he ya, si wa ni nananga tini ananga.” (AGaratio 6:3) Kurii gure, i nangarasa rani ya “ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni.” (AFiripoio 2:3) Gu kura aboro naye na asada kuriyo mbiko i amanganga gi rugute re te. Ni du yo na nyemu gupai nga rimo yo naawo kuba du yo na nyemu manga “wene sunge,” kpotoyo yo nazera na rago ki gbere tiyo ho i agbianga amamu nga ga sunge ni rogo dungurati ya.—1 Timoteo 3:1.
10 Abarayama amoi wene kpiapai rogo ‘zanga berã pa tiko susi.’ (ARomo 12:3) Ho ko agbia Marekisedeke ni, Abarayama abingo tiko ya gako ngbanya na Mbori aima kiisa pako ti ga Marekisedeke te. Kuba gure, ni fu ko sa dagba bawe nga ga ahe dunduko fu Marekisedeke, ko abi pa Marekisedeke kuari ni boromotumo. (AEbere 7:4-7) Sidu, si naida aKristano naamangapai areme ni umbasitise kinawo kini bi tiyo ‘ni tooni pa aboro’ na ki he gbata gupai nga rimo yo naawo. (Ruka 9:48) Kangia agu awirina nangbe mbatayo rogo apai yo rogo dungurati ka na kura amamu nga ga sunge beroni, oni wisiginga tironi ni kina boro rengo ka ino gini asino roni si aida oni mbakadihe watadu ka ino singia oni nangera fuo apai wenengai. Kuba gupai nga ngbaduroni naaima tipa gu sunge i afunga ha fu roni ya, oni mangi gu sunge du beroni wenengai, nga sunge undo aboro i ini Yekova. Ii, “oni úmbasi tironi tie tii gu nyanyaki be yo nga ga Mbori ya ko tumba roni ho ragoho ka rengba ni.”—1 Petero 5:6.
Duna Idapase Kuti agu Apai I Abingo Ho Ya
11, 12. (a) Ginipai rengbe ka sa bete awirina rogo dungurati i mbu tungusapai niipo? (b) Waigu Abarayama amoi wene kpiapai ni raka ko gako raka nabaha ringbisihe kuti gu idapase ko adu nani kuti ga Mbori amokido?
11 Gu kura asada rengbe ka ye be gupai nga, digido gi gbegbere zegino re nawira si nakeesa akeesa. Kuti 2 Petero 3:12, si naida aKristano ‘ningere angera tipa ye gu uru nga ga Mbori.’ Ono tie, dungu awirina aima digo ni pidi gi “uru” re tipa agarã, gu kurayo tipa dungu abawe agarã. Ni sangbanaha, kpoto bete kurayo yo rengbe ka zera sidu i kini berẽ gupai nga si aidanga i tungusipai niipo te.
12 Berewe a, ani wisiginga ga Abarayama kpiapai. Ko aaraka gako raka nabaha kina kuti gu idapase ko adu nani kuti ga Mbori amokido, wa mamu avuranga duho nga agu amokido re adigo dunduko ti rago ko vurũ ya. Rengo ngaha, ko araki ni gbangaha ki bi wiriko nga Yisaka ko nasono. Ono si aidi dungu agarã susi mbata bange atita Abarayama niru ka du wa bange “akerekuru ngbangbaturũ yo” watadu “wa kina ngume pangba baime.” (Bambata Pai 22:17) Ono tie, ngbadu Abarayama aimanga watadu kpotokoyo ki zere be gupai re te. Si du gu mokedi nangia Pauro arengbe tini ka gumba gupai tipa Abarayama na gu kura nyanyakipa abaakumba nadu mbata nga: “[I akpiki] rogo idapase, ka i adia nga akidohe ya, ono i abi he mbata yo ki nipoi kuti ni tururũ , ki nikusi he ya aboro kura ringara nangia yo, ni tata aboro ri gi zegino re.”—AEbere 11:13.
13. (a) Waigu du aKristano areme wa kina “tata aboro” kurogo gi zegino re? (b) Tipagine Yekova nika ye tini na digido gi zegino re?
13 Kangia Abarayama araki gako raka nabaha ringbisihe kuti gu idapase ko adu nani kuti agu amokido nga ga Mbori nga gu nadu rago ko ‘kumbatayo kindi tuturũ,’ nairiwo wai si aida ani raki gaani raka tigaani ringbisihe kuti gaani idapase kuti agu amokido re, nga gu ima mbeda awere gbe! Wa kina Abarayama, si naida ani bi tirani “ni tata aboro” kurogo gi zegino nga ga Satana re, ka ani arakanga ringbisihe kuti gu kakaka nyemu ahe nga ga boro rani ya. Ni sino aboro, gupai du ani na nyemuhe nga gi “digida apai dunduko” re du herẽ wa du rago re, angianga si kindi mbembedii kumbatayo ya. (1 Petero 4:7) Si rengbe ka du nga ani nambu be kere akaza. Watadu zingo mosoro nafuda rani nyanyakii. Ono tie, si naida ani ini gupai nga, anga Yekova naye ka digiso gi zegino re tipa ka batasa kina rani sa be gi kere apai nafuda rani re te, ono ko naye nani a tipa ka sa rimoko si du ni ziaziaha. (Yezekere 36:23; Matayo 6:9, 10) Digido gi zegino re aye aye, angianga ti gu regbo ani aidaha ya, ono ti gu regbo Yekova naima ringbisaha.
14. Waigu aKristano agbia undo be ga Mbori hipai ti gi gaani regbo re?
14 Oni tingidi gupai a nga, “Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:9) Oni kparia gupai nga, Mbori “na gbanga hipai fu roni,” nga agu rani du rogo ga aKristano dungurati. (Pigipigi kekeapai nga gaani.) Si nawiraha nga, bete rani kinaho si aida ani di regbo tipa ka mbakada sino rani tipa wa ka ‘i bi rani ni yangaraha zezeredii, ka wiri biriko adúnga ti rani barangba ko na sirõ ya.’ (2 Petero 3:14) Sidu tie, ya mo danga ha fu rani ani duna tambuahe mbiko Mbori nahipai fu rani tee?
Gbia Ngbarago Fudifudiapai ki Vura Du Vurũ
15. Waigu Yesu arengbe ka kakuti gako ngbarago barabangiri a’asada, na waigu aKristano agbia undo rogo wirika gako kpiapai arame?
15 AKristano nawirika dungu apai areme ti vuro gu raka nangia ga Abarayama. Anga kina idapase sa ko adu nani te, ono ko adu a na hipai, tatamana, wingbaduse, na gu nyemuse nadu zanga gbangbati. Ko amoi iriso Yekova ni bambatapai rogo gako raka yo. Ono tie, si naida ani tingidi gupai nga, Yesu Kristo nga gu boro namoi gu bawene kpiapai kisusi si aida ani wirikihe. Ko agbia tiko a ti dungu a’asada, ono rogo agu a’asada re dunduko, ko anye kindi kuti gako ngbarago. Tipagine? Mbiko ko aaberã pa gu maabangirise nadu fuko kumbatayo. (AEbere 12:2, 3) Si du Pauro akparikpee tini ki ya: “Were, gu Mbori ninaafu hipai na wasa idinga ha fu roni oni duna kina gu bangisa sino berã dagba roni nadu ti Kristo Yesu.” (ARomo 15:5, NW ) Ka ani duna ruru sino berã, si rengbe ka sa rani ani duna ngbarago, Satana ki vura ka ye na aũkota ku ngba gaani gene vurũ.
16. Ginipai rengbe ani ka mangaha ka si wiri gupai nga ome fudifudiapai fu rii ome rani?
16 Ho ome fudifudiapai awira gupai ni nga si ima fu ri ome roni, oni tingidi gupai nga, a wa Yekova akpinyemu Abarayama, kinawo ko akpinyemu roni. Ko na nyemu gupai tiko nga oni duna diabese. (AFiripoio 1:6) Oni kido na ngbaduroni yo dunduko kuti Yekova, ki ini gupai nga, “a nga asada ye sa roni [nga gu du kia] te, kina gu ka boro hi he ahi. Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.” (1 AKorindo 10:13) Oni sonosi gu sino nga ga geda Fugo Mbori na auru dunduko. (Atambuahe 1:2) Oni kakuti kparakpee, kini sana Yekova ko undo roni oni hipai. (AFiripoio 4:6) Ko afu “Ziazia Toro [afu] fu agu yo nasana ko” tipaha. (Ruka 11:13) Oni gbia undo wenengai be agu apai Yekova nambakadihe tipa songoda roni rogo toroyo, wa gu nga geda agu abuku nasakarogo Ziazia Kekeapai yo. Oni gbata undo be awirina a. (1 Petero 2:17) Oni nimangi gu rurupai kindi nga ga du pati ga aKristano adunguratise zanga piriga, mbiko yo oni ka gbia gu ngarasahe ni oni aidaha tipa ka hipai. (AEbere 10:24, 25) Oni duna ngbarago mbiko oni ini gupai nga gaoni hipai nasa Mbori ko idi na gaoni pai na pa gaoni ruru mangapai nasa ko ko duna ngbarago ngbaduko yo!—Asanza 27:11; ARomo 5:3-5, NW.
17. Tipagine si aidanga tini kpoto aKristano yo zere i ki mbu gayo maabangirise ya?
17 Mbori akpinyemu Abarayama ni “badiangba” ko. (Yakoba 2:23) Wa si avura du wo, ga Abarayama raka ahi be gu fudifudiapai naye na a’asada gbiati gberangbii fuko. AKristano arengbanga ka maabangiriyo tipa kurapai kia ti gure rogo gi ‘yangara arame’ re te. Nirengo, Ziazia Kekeapai nagumba gupai fu rani nga, “gbegberẽ aboro agbérã ki susi na airanangahe a.” (2 Timoteo 3:1, 13) Kuba gupai nga kpotorani yo zere ani ki zanga duna maabangirise, ani rugu tirani na gupai nga, gu fudifudiapai ani agbia tirani ti ni re nayugo gupai nga ga Satana zegino ima mbeda ka digo. Si duYesu atingida rani tini na gupai nga, “gu ni nikaru ki da ho ragoho ka diga ni, ni abáta abata.” (Matayo 24:13) Sidu, ‘ka ani mbúnga be manga rurupai ya’! Ani wiriki ga Abarayama kpiapai, na ki du dagba “adikumbo akidohe mbiko idapase na hipai.”—AEbere 6:12.
Oni Nirugu Tironi Nani?
• Tipagine si aida tini gu ga Yekova aboro du areme duna maabangirise tipa a’asada na gberangbii?
• Rogo gini agene rengbe Satana ka zubo rani?
• Waigu rengbe aKristano ka nyasa gu zanga giatise ka du dagba yo?
• Waigu rengbe ruko na kiisopatise ka kusa asada fu boro?
• Rogo gini gene Abarayama amoi wene kpiapai rogo pido gu regbo Mbori ka digiso gako amokido tini?
[Gu kpiaahe du ti kpewaraga 18 na 21]
Dungu agu aKristano nga aparanga du rogo rungosi mbiko gu sawia nga ga akurayo
Ti rago Abarayama, pa digo ga Mbori amokido adu ‘kumbatayo kindi tuturũ,’ wa si avura du wo, ko aaraka ringbisihe kuti agu amokido re