Ga Yekova Maku Nasa Rani Ni Airakumuko

‘Gu maku nga ga Yekova nakumukosi boro, ko nagbianga ima kuti ni te.’ —ASANZA 10:22.

1, 2. Tipagine ngbarago ayenga tini be kumuko ya?

GUPAI moipai rogo gu raka nga ga badungu aboro areme nga orafuo aũzegino. Ono ya mo aũzegino nasa yo i duna ngbarago nirengo? “Mi arengbanga ka tingidapa gu regbo rago agbere ti aboro wa gu duhe awere re te,” wogu gu waraga pangbanga nga The Australian Women’s Weekly apehe. Si agbia gupai kuti ni nga: “Si wa kina vunduvundupai, mbiko i nagumba gupai fu rani nga Australia ni gu ringara hi be aũkumuko, ya ga aboro raka angbanga mbata wa gu duhe awere te. . . . Wa vura duhe wo, agu aboro du rogo gu ringara re dunduko amaanga bangiriyo tipa wene apai kumbatayo te. Akumba na adee wa sa bi gupai nga he gu duho kpaa kusayo rogo gayo raka yo, ono i ainonga guhe nzunzu ngaha te.” Naruu gupai Ziazia Kekeapai agumbaha ya agu ahe du berani ayenga na ngbarago fu rani te na ka si funga unga a te!—Batungusipai 5:10; Ruka 12:15.

² Ziazia Kekeapai nayugo gupai fu rani nga, ga Mbori maku naye na bakere ngbarago kisusi. Tipa gipai re, Asanza 10:22 nayaa: ‘Gu maku nga ga Yekova nakumukosi boro, ko nagbianga ima kuti ni te.’ Dedede, aboro nagbia ima mbiko gu dungura kumuko nga ga ngbaduse. Si aru aru Pauro fu gu zahe nga: “Ono agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe nga gu narindasi aboro ku rogo gbarasa yo yo na kpio. Bambiko nyemu marã nga tarã ngbatunga gbegberẽapai dũ; agu yo nakpi nyemu he wo i aingi ainga ti idapase, ki nirupu tiyo arupa ni dungu arungo.”—1 Timoteo 6:9, 10.

3. Tipagine ga Mbori amoyambu agbia a’asada tini?

³ Ngba kura gene, agu aboro dunduko ‘kakuti degatuyo kuti fugo Yekova’ nagbia agu amaku ayenga na ima ya. (Pa Fu Rugute ni Ue he 28:2) Wa vura duhe wo, kura aboro rengbe ka sanahe ki yaa, ‘kangia Yekova agbianga ima kuti gako amaku te, tipagine tie dungu ga Yekova amoyambu arungo tini?’ Ziazia Kekeapai nayugo gupai nga gene gbua Mbori ambuhe fu agu a’asada naye sa rani, ono si naye nzunzu be Satana, be gako gbegbere zegino, na be gu zangarengba du ani nani. (Bambata Pai 6:5; Pa Fu Rugute ni Ue he 32:4, 5; Yoane 15:19; Yakoba 1:14, 15) Yekova nga mburu “wene [a]gamahe dunduko, na ziazia [a]ũgamahe dunduko.” (Yakoba 1:17) Sidu, gako amaku ayenga na ima wa gu sa te. Ani wisigingo bete gu ga Mbori wene agamahe ayenga na ima ya.

Fugo Mbori Nga Kikiipa Gamahe

4. Gini maku gbiakuti gamahe kiipaha kisusi ga Yekova aboro agbia ngbarago behe ti gi ‘digida rago’ re?

⁴ Nibipa ‘digida rago,’ Daniere ayaa: “[Ndikidi, NW ] inahe amáa pai.” Ono tie, ko anyakasi gupai re ni gbia ko gu fugo kuti ni nga: “A nga gu ni sa dagba gbegberẽ yo yo nikaruga tini na pai te; ono agu yo du ni airatatamana i nikaruga tiyo na ni.” (Daniere 12:4, 10) Oni berẽnga ha! Mbori nagumba Fugo ko, gbe nga gu fugo ko nga sangbaanebi rogo gu fugo tatamana ka gbegbere aboro arengbanga ka ruga tiyo na tii woroho ya, ono kina ga Yekova aboro sa naruga tiyo nani. Wiri Mbori akparikpee ki ya: “Mi natambua ro, Buba, Gbia ngbangbaturũ na sende, ya mo aoko agi apai re be airatatamana na airainahe, ki yugu he fu toni agude.” (Ruka 10:21) Nairiwo gu maku nga ka duna keke Fugo Mbori berani, nga Ziazia Kekeapai, nga guhe kiipaha kisusi, na ka du dagba agu aboro Yekova naidihe fuyo i duna gu dudungurobipai nga ga toro!—1 AKorindo 1:21, 27, 28; 2:14, 15.

5. Gine nga tatamana, na waigu rengbe ani ka gbiaha?

⁵ Wa ka “gu tatamana naye ari yo” naadunga berani ya, ka ani dunga na gu dudungurobipai nga ga toro te. (Yakoba 3:17) Tatamana nga birĩ mangasunge na gu inohe du boro nani kodihe kuti gu giarogopai yo du ni nani, nasa ni ni nyasi na kpakarakpakaraapai, kini neke kereapai, kini mangi agu apai ni aberãpa mangaha, watadu si nasa ni ni fu wene rugute fu kura aboro. Waigu ani agbia gu tatamana nga ga Mbori? Asanza 2:6 nayaa: “Yekova nafu tatamana; ngbako yo inahe nakura ni na rugatinapai.” Ii, Yekova afu maku afu fu rani ka ani akpara tipaha kindi, ko afuhe fu rani a wa ko afu ‘tatamana na rugatinapai’ fu Bakindo Soromo. (1 Abakindo 3:11, 12; Yakoba 1:5-8) Tipa ani gbia tatamana, ani du wa ka ani aadegaturani kindi kuti fugo Yekova ni wisigo ani Fugo ko dedede na kini mangi gupai ani awirikaha.

6. Tipagine duhe tini ni pa tatamana ani mangi ga Mbori andiko rogo gaani raka yo?

⁶ Ani rengbe ka bi gu bangua kpia apai du tipa ga Mbori tatamana rogo agu andiko nga ga Ziazia Kekeapai. Gi tatamana re naundo rani rogo dungu agene, ti kpoto rani, rogo berã rani, rogo agu apai du ngbadurani yo, na rogo toroyo. Ga bake Atambuahe bia aru aru nga gu nayaa: “Gu rugute nga ga Yekova si ziazia, nimbakadi mbisimo; gu dezirepai nga ga Yekova du ni nyanyaki he, ki nisa azangainahe i du ni airatatamana; gu ndika nga ga Yekova du ni ruru he, ningiisi kpotoyo yo; sangba Yekova du ziazia, ni hasi bangirise; gunde ti Yekova du gigiri, ki nye anye kindi; agu asarangbanga nga ga Yekova nga ndikidi he, ki du ni ruru he dunduko. Ka i kpi nyemu he susi dahabu, ii, susi ndikidi dahabu.”—Atambuahe 19:7-10; 119:72.

7. Gini apai naye ni sangbana basa ga Mbori ruru andiko?

⁷ Ngba kura gene, agu aboro nabasa ga Mbori ruru andiko agbianga gu ngbarago gbiakuti ranirii i agbataha te. Kumbatayo gizo, i aruga tiyo aruga na gupai nga ka boro sawianga Mbori te, mbiko boro ake kina guhe ni arũhe. (AGaratio 6:7) Gu dungu aboro nabasa agu andiko nga ga Ziazia Kekeapai nake kere sangbanaha wa gu nga duna gu mobara boro aaidanga ka du nani ya, gbia kere akaza, watadu gu kere asino nazio baha kuti boro. Ka i asanga berã yo ti gayo apai ya, gu gene i andu ngbaha re rengbe ka ndu na yo ni yangaraha kuti kpio, na isoke gu gayo mangaapai re rengbe ka sa Mbori ko gbarasi yo.—Matayo 7:13, 14.

8. Tipagine du akpinyemu Fugo Mbori tini na ngbarago?

⁸ Ono tie, agu aboro nakpinyemu Fugo Mbori na kini mangihe rogo gayo raka yo nika gbia bakere amaku awere na gizo kumbatayo a. Ruhe aru fuyo i niberẽ gupai nga ga Mbori andiko ima kusa yo be apai, na i nirengo na ngbarago, ki duna nyanyaki maabangirise tipa gu regbo i ka zaka yo be ingapai na be kere asangbanaha. (ARomo 8:20, 21; Yakoba 1:25) Gi gayo maabangirise re nga parengo mbiko moi yo mburuhe rii ga Mbori bakere gamahe nga ga nyemuse, nga gu motumo tumorii nga ga bangisa Wiri ko, nga Yesu Kristo. (Matayo 20:28; Yoane 3:16; ARomo 6:23) Ngbatunga gu bakere gamahe re nayugo bakio ga Mbori nyemuse tipa aboro na kingia ngbaanga tipa agu amaku adunga digidoho tini ya, nga gu Yekova nika fuhe fu agu aboro dunduko kakuti degatuyo kuti fugo ko.—ARomo 8:32.

Ani Na Tambuahe Tipa gu Gamahe Nga Ziazia Toro

9, 10. Waigu ani agbia undo be gu ga Yekova gamahe nga ziazia toro? Oni funga kpiapai.

⁹ Gu kura ga Mbori gamahe nga ga nyemuse nga gu si aida ani duna tambuahe tipaha nga gako ziazia toro. Ti rago Pendekote rogo gu garã nangia 33 ti Gaani Regbo, gu mokedi nangia Petero angarasi gu rimbasa aboro nadu Yerusarema yo niyaa: “Oni sá gaoni berã i ki bapatizi roni dunduko ti rimo Yesu Kristo i di gaoni ingaapai ti roni; oni ki di gu ũgume nga Ziazia Toro.” (Amokedi 2:38) Areme, Yekova nafu gako ziazia toro fu gu gako amoyambu naima kpara tiyo fuko na nakpinyemu ka manga gupai ko akpinyemuhe. (Ruka 11:9-13) Bakuru kusayo, gi ome duni bakerehe kisusi rogo zegino re, nga ga Mbori ziazia toro, watadu gako zaza ome, afu ome fu agu akumba na adee nangia aidipase, kodihe na bambata aKristano. (Zekaraya 4:6; Amokedi 4:31) Si rengbe ka manga kina gu bangisapai re fu rani, ka ani vura gbia tirani ti agu apai nakiso gene be rani vurũ watadu gu fudifudiapai ka ye sa rani mbiko du ani ni ga Yekova aboro.—Yoere 2:28, 29.

¹⁰ Ani wisiginga gu kpiapai nadu tipa dee rimori angia Laurel, nga guri kere kaza azi ri na ri ki raki rogo akoro marã tipa agarã 37 fuo maa yo ri ku vuruhe yo.a Wa kere apai avura nifudi ri, ri atungusi fugo Mbori fu aboro kakaka da ti kpio ri. Fuo susa agarã, ga Yekova amaku adusia Laurel. Ni kpiapai, ri aundo aboro 17 i gbia gu ruru inohe nga ga Ziazia Kekeapai, wa ri avura nye ku bari rogo gari akoro marã ti aregbo dunduko vurũ! Gupai nadu tipa ri nasa rani ani tingidi gu fugo Pauro nga: “Ho mi nirungbura ni mi nidu ho nyanyaki.” (2 AKorindo 12:10) Ii, agu adiabese dunduko rengbe ani ka du nani rogo sunge tungusa wene pangbanga ayenga mbiko gaani birĩ na ome te, ono si naye mbiko ga Mbori undo be gako ziazia toro, nga gu ko afuhe fu agu aboro kakuti degatuyo kuti fugo ko.—Yesaya 40:29-31.

11. Gini asino ga Mbori toro asa agu aboro ‘naukadi vovo borose’ i yuguhe?

¹¹ Ka ani aadegaturani fu Mbori kini gisangba ko, gako toro azuka agu asino rogo rani yo nga nyemuse, ngbarago, zereda, gbanga hipai, mangapase, weneringise, zera, idapase, na rugatise. (AGaratio 5:22, 23) Gi “zuzu toro” re nga papara gu ‘vovo borose’ aKristano aukadihe kuba gu kuruhe nadu nikerehe i avura du nani mbata, nga gu nanasa yo i nimangi apai wa anyaa. (AEfeso 4:20-24; Yesaya 11:6-9) Gu zuzu toro nyakipaha gbe dagba agere nga nyemuse, mbiko si nga “rengberengbe dada tipa kpamiatise.”—AKorosaio 3:14, NW.

Gu Nyemuse nga ga AKristano, Nga gu Gamahe Si Aida Ani Bihe Ni Nyanyakipa He

12. Waigu Tabita na gu kura aKristano nadu rogo bambata kama agarã ayugu gayo nyemuse?

¹² Gu nyemuse nga ga aKristano nga kura ga Yekova gamahe, nga gu daha ada fu rani ani bihe ni nyanyakipa he. Ga Mbori andiko nafu rugute tipa aboro mangihe, si ki vura du wo, gu nyemuse re nibakerehe gbe ki da ti gupai nga si nakpamia awirina i du sa, gu kpamiatise re kisusi gu rengbe gu nyemuse du dagba ndikidi agume ka mangaha. (Yoane 15:12, 13; 1 Petero 1:22) Ni kpiapai, oni berẽnga pa Tabita nangia wene sino Kristano naaraka rogo bambata kama agarã. “Ri agberẽ agberã be wene sabe na inapai ni gu ũbe ri anamanga,” gbe fu agu adekurugbo nadu rogo dungurati. (Amokedi 9:36) Agi adekurugbo re avura duna agume yo tini, ono Tabita aida ka manga gupai ri arengbe ka mangaha tipa ka undo agi adee re na ka ngarasa yo. (1 Yoane 3:18) Nga gu wene kpiapai Tabita ambuhe fu rani! Nyemu awirina afõngbadu Puriseka na Akuira i ‘fu goro yo tipa unga Pauro.’ Nyemuse afõngbadu Epafura, Ruka, Onesiforo, na kura awirina a i undo gu mokedi re ho ko aduni bambukiso yo Roma yo. (ARomo 16:3, 4; 2 Timoteo 1:16; 4:11; Firemona 23, 24) Ii, ngbatunga agu aKristano re areme ‘na nyemuse dagba tiyo,’ nga gu bawene gamahe be Mbori du maku kurihe nga gu nayugo yo ni ndikidi apefuo Yesu.—Yoane 13:34, 35.

13. Waigu rengbe ani ka yugo gupai nga ani na bakere tambuahe tipa gu gamahe nga ga agu awirina nga aKristano?

¹³ Pa gu nyemuse awirina ayugoho rogo gu dungurati nga ga aKristano bangironi ni nyanyakipa he? Oni na tambuahe tipa gu kodatise nga ga awirina du ani nani, nga gu du rogo zegino dunduko? Agi awirina re a nga gu bawene agamahe naye be guko du ari yo. Waigu rengbe ani ka yugo gupai nga kii payo akio bangirani? Ni manga ani ziazia sunge fu Mbori, ni karaga ani pai ti regbo adunguratise nga ga aKristano, na ni yugo ani nyemuse na gu kura zuzu ga Mbori toro.—AFiripoio 1:9; AEbere 10:24, 25.

‘Agamahe Rogo Aboro Yo’

14. Gine i aidaha be Kristano ka ni aida ka mangasunge ni bakumba watadu moyambu undo?

¹⁴ Agu aKristano nga akumba duna nyemu mangasunge ni abaakumba na ni amoyambu undo fu agu akurayo nga aidipase nakpinyemu ka manga wene sunge. (1 Timoteo 3:1, 8) Tipa wirina rẽ tipa agi asunge re, si naida ni du nga gu kumba ima nyaka rogo toroyo, ima ino Ziazia Kekeapai wenengai na ki du zaaza rogo sunge tungusapai. (Amokedi 18:24; 1 Timoteo 4:15; 2 Timoteo 4:5) Si naida ni yugu ti ni ni boro umbasitise, ni bayee boro, na ni boro zerangbaduse, mbiko ga Mbori amaku ayenga fu agu aboro nagu sa apai, nga aboro ruko, na duna kere nyemu apai te. (Asanza 11:2; AEbere 6:15; 3 Yoane 9, 10) Kangia gu wirina re nga kumbakudee, si naida ni ngia gu boro nangera kurii gani aborokporo dunduko rogo gu gene nga ga nyemuse. (1 Timoteo 3:4, 5, 12) Mbiko ni nabi agu akumuko nga ga toro ni nyanyakipa he, ngbatunga gu boro re nasa gupai nga Yekova fu maku funi.—Matayo 6:19-21.

15, 16. Ada yugu tiyo ni ‘agamahe rogo aboro yo’? Oni funga akpiapai.

¹⁵ Ho agu awirina namangasunge ni abaakumba anyakasa tiyo ni ni abatungusi wene pangbanga, ni ababanda avusende, na ni abayugupai, i nasa rani ani duna tambuahe tipa yo ni ‘agamahe rogo aboro yo.’ (AEfeso 4:8, 11) Si rengbe ka du nga agu awirina nagbia undo be gu sunge agi abaakumba amangaha re ayugonga gayo tambuahe tipaha dedede te, ono Yekova nabi agu apai abi gi ruru abaakumba amangaha re. Bangiriko agonga ti gu nyemuse i ayugoho tipa rimo ko ni manga yo sunge fu gako aboro te.—1 Timoteo 5:17; AEbere 6:10.

¹⁶ Oni berẽnga pa gupai nadu tipa gu ngangara bakumba nandu ka bi gu degude ni Kristano amonganga aambeda ka gba gu kaza nadu ti dudu ri. Gu dee nangia nakurea avungu gu degude re akepai tipa gi bakumba re ki ya: “Sino ko angba gbe, ko asongodi rani, kini ngere fuo rani. . . . Ko asana rani ka kparakpee tipa rani fu Yekova. Wa gu bakumba re aakpara, ba gu degude re [angianga Dezire Yekova ya] aagbida tikitiki, na aume kini ga bangiri gu kura aboro dunduko nadu bambungua yo. Nga gu wene kparakpee gu bakumba amangihe re, na nga gu nyemuse Yekova ayuguhe fu rani ka keda gako moyambu ti kina boro wene regbo!” Gu kura Dezire afura tipa agu abaakumba naye ka bi ri, ri ayaa: “Ho i ambeda ni ku pati gi barame rogo gu papara bambungua duna kparakpara aũsunge rogo nga ga amonganga, mi aini gupai nga ka kina ginipai vura manga tona awere ka ndu kumbatayo, mi ahihe ahi. Mi agbia ngara na berã re ki zeredi.” Boro ho rengbe ka ngbe ngbatunga gu mangaapai nga ga weneringise re? Wa gu sa te! Si nga gamahe be Mbori, nga gu rengbe boro ka gbiaha kina rogo gu dungurati nga ga aKristano.—Yesaya 32:1, 2.

Gu Gamahe Nga Sunge Tungusapai

17, 18. (a) Gini gamahe nga ga sunge Yekova nafuhe fu gako aboro dunduko? (b) Gini undo fu Mbori he tipa si sa rani ani mangi gaani sunge tungusapai wenengai?

¹⁷ Anga irisa ho boro narengbe ka gbiaha kisusi gu nga ka mangasunge fu Yekova, nga Bahe kisusi te. (Yesaya 43:10; 2 AKorindo 4:7; 1 Petero 2:9) Wa vura duhe wo, ngbadimo gu mamu nga ga du ti sunge tungusapai nizazaha fu agu aboro dunduko naida nirengo ka mangasunge fu Mbori, singia i nga aparanga watadu sosono aboro, akumba watadu adee. Oni nagbia undo be gi nyanyakipa gamahe re? Kura aboro rengbe ka ka ti manga gi sunge re ya i arẽnga tipa mangaha te, ono oni tingidi gupai nga Yekova nafu ziazia toro fu agu aboro namangasunge fuko, sidu gupai ani arengbanga ka mangaha ya, gako toro nika undo rani ani mangihe.—Yeremaya 1:6-8; 20:11.

¹⁸ Yekova fu gu sunge nga ga tungusapa Kindo fu gu gako amoyambu duna umbasitise, angianga fu agu aboro duna nyemu kiisopa tiyo na nakido kina kuti gayo birĩ ya. (1 AKorindo 1:20, 26-29) Aboro umbasitise ima ino agu apai i arengbanga ka mangaha ya, sidu i kini kido kina kuti Mbori tipa gako undo wa i atungusapai. I na tambuahe a tipa gu undo ko afuhe rogo gako “kangara buruku.”—Ruka 12:42-44; Asanza 22:4.

Gu Ramukporo nga ga Ngbarago Nga Bawene Gamahe

19. Gini apai nasa avunguagude i duna diabese rogo sonosa agude?

¹⁹ Rogatise na gu ramukporo nga ga ngbarago nga bawene agamahe be Mbori. (Ruta 1:9; AEfeso 3:14, 15, NW ) Agude a nga nyanyakipa “ũkumbo naye be Yekova” kini fu ngbarago fu avunguyo nga aguyo nasonosa yo i duna sinombori. (Atambuahe 127:3) Kangia vunguagude nga oni, oni kakuti degaturoni kuti fugo Yekova kini yugupai fu awironi ringbisihe kuti Fugo ko. Agu aboro namanga gipai re abi gupai nga Yekova nasongoda yo na kini fu bakere maku fuyo.—Asanza 3:5, 6; 22:6; AEfeso 6:1-4.

20. Ginipai rengbe ka undo agu avunguagude awiriyo nambu ndikidi irisombori?

²⁰ Wa agu avunguagude nagunde ti Mbori avura ni yugupai fu awiriyo wenengai, gu kura awiriyo nambu ndikidi irisombori fuo sona yo. (Bambata Pai 26:34, 35) Gere rengbe ka fuda avunguyo ngbaduyo yo nyanyakii. (Asanza 17:21, 25) Ono tie, kuba gupai nga gayo maabangirise go kusayo nabaha, tingida pa ga Yesu sanza tipa ingiingi paranga rengbe ka undo yo i duna maabangirise. Wa gu gude re avura guari kusayo kporo na ki mere gene gbegbere mangaapai yo, kusa, ko akaraga tiko kua bako yo, nga guko nadi ko kugume na ngbarago na ni nyemuse. (Ruka 15:11-32) Ka kina ginipai vura manga, gu ruru aKristano nga avunguagude rengbe ka duna gu kido nga Yekova ima ruga tiko na pa agu apai du tipa yo, ko naberã payo aberã, na ko asongoda yo asongoda.—Atambuahe 145:14.

21. Da si aida ani degeturani kuti fugo ni, na tipagine?

²¹ Wa duhe were, si naida ani ini guhe nzunzu kiipaha rogo gaani raka yo. Ani naora kakaka fuo dungura aũzegino, nga gu rengbe ka ye na ima fu rani na fu gaani aborokporo? Watadu ani naora fuo “wene gamahe dunduko, na ziazia ũgamahe dunduko” nga gu naye be “Bafu aimarago”? (Yakoba 1:17) Satana, nga “irazire” naida ani mangisunge tipa kumuko ki zanga ngbarago na ki zanga unga. (Yoane 8:44; Ruka 12:15) Ono Yekova naberãpa rani nyanyakii kini idi gupai nga ani duna ngbarago. (Yesaya 48:17, 18) Sidu tie, ani kakuti degaturani kuti fugo gu Barani nga ga ngbangbaturũ ko nga guko duna nyemu rani tiko na ani kini gbia ‘ngbarago be’ fugo ko. (Atambuahe 37:4) Ka ani aandu ngba gu gene re, ga Yekova kikiipa agamahe na amaku asa rani ni airakumuko, na zanga si fu ima kandara tooni fu rani.

[Gu rukutu kekeapai du bandu kpewaraga yo]

Oni Natingidaha?

• Wari rengbe ani ka gbia bakere ngbarago ni?

• Bete agu agamahe Yekova afuhe fu gako aboro nga gine?

• Tipagine du sunge tungusapai tini nga gamahe?

• Ginipai rengbe avunguagude ka mangaha tipa ka gbia ga Mbori maku wa i asonosa awiriyo?

[Gu kpiahe du ti kpewaraga 14]

Oni na tambuahe tipa gu ga Mbori gamahe nga keke Fugo ko?

[Gu kpiahe du ti kpewaraga 15]

Wa apai avura duni gbegberehe ku bara Laurel Nisbet yo, ri anatungusa fugo Mbori fu aboro kakaka

[Gu kpiahe du ti kpewaraga 16]

Wa kina Tabita, i naino agu aKristano du areme ti gayo mangaapai nga ga nyemuse

[Gu kpiahe du ti kpewaraga 17]

Agu aKristano nga abaakumba nangera fuo akurayo nga aidipase mbiko nyemuse