Gu Ngbarago Naye Fu Boro Mbiko Ka Ni Kuti Ruru Mangaapai
“Gu maku nga ga Yekova nakumukosi boro, ko nagbia nga rungo kuti ni te.”—ASANZA 10:22.
1, 2. Tipagine si aida ani bandatirani ti ni ti nye kaa berã kina kurii agu apai nika manga kumbatayo?
KUMBA sa nga boro Amerika nibawisigipai dudunguroo tipa raka ayaa: “Maaberãse nyanyakii tipa gupai nika manga kumbatayo . . . nasa gupai nga ka ani gbianga ngbarago ti gu raka nga gu du ani nani awere re ya.” Gipai re nirengo tipa agu agude namaaberã yo tipa kina agu apai i nika mangaha fuo sona yo, bangiriyo kini go ti gu weneapai rengbe yo ka gbiaha ti gu regbo du yo kindi ni agude daho i nasusi gu regbo re ni.
2 Zavura ani a nga airisi Yekova, ani rengbe arengba kadu na ngbatunga gu berã re. Oni makianga agu apai rengbe arengba ka manga naye re. ADezire Yekova nangera tipa ka bi gu regbo ga Mbori kidohe tipa paradizo nika da nidigisidigisihe auru kpotosende. Ani nasunguda gu raka na nyemuhe nga gu kaza, gbinza, ima kpotose na arungo nikaa dunga rogoho ya. Wa vura duhe niwenepai fu boro ni duna maabangirise tipa ngbatunga raka wa gure, ono tie ginipai ka mangi ka ani nye kaa berã kina kurii agu amaku Mbori nakido rani tipaha kumbatayo si ki sa rani ka ani berẽnga berewe kurii agu amaku ani agbiaha rogo toroyo ti gi regbo re ya? Nairiwo wai ka boro biratini ka ni aberã wa gure! Ani rengbe arengba kadu na gberarago na si ki ‘fu kaza ngbaduse furani bambiko gaani maabangirise amanganga kuo ani aberãpaha kuho ni’ te. (Asanza 13:12) Ka ani duna fudifudiapai gbiati kpakaraapai rogo gaani raka yo, si rengbe arengba ka sa gupai nga ani zere rogo toroyo. Si kini sa rani ani duna kina gu bipai nga ga kpakanahe kuba gupai nga ani ru nyanyakii ho du kpakaraapai ni. Ani rengbe ka ne ngbatunga agi apai re ka ani aberãkurii agu amaku du berani awere rogo toroyo.
3. Ginipai ani ka wisigoho rogo gi papara kekepai re?
3 Asanza 10:22 nayaa: “Gu maku nga ga Yekova nakumukosi boro, ko nagbia nga rungo kuti ni te.” Ya mo anga gu sonakumbatayo rogo toroyo nga ga ga Yekova amoyambu nga aguyo du ti gi gaani regbo re nigu maku rengbe ka sa rani anidu na ngbarago te? Ani makianga bete kura apai tipa pa zugö rani rogo toroyo na ani ki bi gupai nzunzu si ayugoho furani nitirani. Pa dia ani regbo tipa ka berãkurii agu amaku Yekova nafuhe kurii gu ‘ruru aboro nata kina rogo gayo rurupai’ re nika nyakasa gaani diaberã tipa ani ndu kindi kumbatayo kaa mangasunge na ngbarago fu gu Barani du ngbangbaturũ yo, nga Yekova.—Asanza 20:7.
‘Agu Amaku Nafu Ngbarago Furani’ Awere
4, 5. Gini yugopai nga ga Ziazia Kekeapai oni nitironi abihe na nyanyaki paha, na tipagine?
4 Ndikidi inohe nga ga gu yugopai nga ga Ziazia Kekeapai. Agu aboro dunduko du rogo agu apambori du kina rimo aKristano gbua kuriihe, i naya tipa tiyo wee i na idapase a kuti Ziazia Kekeapai. Ono tie, i aidanga kuti gupai si ayugoho te. Zavura kina agu aboro du rogo bangisa pambori, gayo biapai nibakiakia nibi gupai nzunzu Ziazia Kekeapai ayugoho. Nairiwo wai du gayo idapase kia ti gu nga ga ga Yekova amoyambu! Zanga bipa gu ringara du ani rogoho, naapa asino atitarani, watadu ngbatunga rani, ani dunduko nairiso kina ndikidi Mbori nga guko ani naima ino rimoko. Anga ko nigu mbori du nitirinita ka i ainongo pai tipa ko ya te. (Pa Fu Rugute ni Ue he 6:4; Atambuahe 83:18; Marako 12:29) Ani ima ino gupai nga, i ima mbeda ka sigira gu sakapai nadu tipa ga Mbori bakere pagbia nga ga haurago, sidu, ani dunduko nibasasa gu sakapai re abi rani wa ani akakuti gaani ruru mangaapai koyo du ko ni. Ani ima ino gu rengo du tipa agu aboro nakpiki, na ani agundenga be gu Mbori i aya tipa ko wee ko nazo aboro rogo we-iferno watadu ka keda yo ku porokotorio yo te.—Batungusipai 9:5, 10.
5 Kurii gure, si nipa ngbarago furani ka ino gupai nga, ani aidanga kuti gupai nga ahe akuru nisaha te, nga gu yugopai arunga ya! Kuba gure, ani nga ga Mbori kusikusiahe, ko amangi rani nikpiako. (Bambata Pai 1:26; Maraki 2:10) Bake apapara Atambuahe abibia ki yaa: “Mi nafu atambuahe foro, bambiko mo ambakadi re na iiriwo banaru pai. Iiriwo ahe nga gamo mangaapai! Mo naina pa re nzunzu wenengaĩ.”—Atambuahe 139:14.
6, 7. Gini ariapai rogo gaoni raka yo watadu rogo gu raka nga ga kura aboro oni nainipai tipaha ya si aye na maku?
6 Ani nane wasiwasi mangaapai na gbegbere mangimangiapai. Agu azahe du tipa vugundö, bakere mbira buda gbiati vundo kodaba, si nigupai naima kumuko rogo aũgbandaka apangbangaa. Ono tie, dungu aboro areme andunga kuti agu azahe re te. Ginipai rengbe gu boro nape rengo ka mangaha ka ni wiriki gupai nga ndikidi Mbori nasoga agu apai asoga du paha kuari re, gbiati gupai nga, agu aboro dunduko namangaha, i naba kina bakere gberarago tiko? Oni ngere, ngbatunga gu boro nga bape rengo re nambu manga agu apai rogo gani raka yo ndikidi Mbori asogaha! (Yesaya 63:10; 1 AKorindo 6:9, 10; 2 AKorindo 7:1; AEfeso 4:30) Gu boro nape rengo rengbe ka manga gipai re mbiko ni naida ka sa ngbarago ti Yekova Mbori, kurii gure, ni nagbia kura amaku agbia wa ngbatunga gu nga, kaza azionga ni mbiko wasiwasi mangaapai te na ni nikadu na gu zereda nga ga berã.
7 Si nikpakarapai fu dungu aboro tipa i mbu gbegbere mangaapai. Wa vura duhe wo, rogo agarã nibasasa, bange aboro wa bawe akutu namanga ngbatunga gu ariapai re rogo gayo sino raka yo. I nakparatiyo fu Yekova na kini yugu gayo kparatise nizio yo bapatiza rogo ime, ngba gi gene re, i kini yuguhe gbaiga ya i ima mbu gu gbegbere mangaapai i anaamangaha mbata nga gu naaba kina gberarago ti Mbori. Nga gu wene kpiapai rengbe ka ngarasa rani re! Ani nagbia ngarasahe agbia ho ani anye ni zanga duni akanga fu ingaapai na gbegbere mangaapai.
8. Gini arugute duho rogo Ziazia Kekeapai nga gu rengbe ka sa gupai nga aborokporo duna ngbarago?
8 Gu ramukporo duna ngbarago. Rogo dungu aringara, ramukporo nagbera kina kumbatayo dagba aboro. Dungu arogatise nadigo rogo mbutiseyo, si kini sa gupai nga agude nisungu na kina bakere gberarago. Rogo kura bete aringara Putu yo, dungu bange aborokporo nambeda kuti 20 rii kama du rogo agu akporo du kina kumba rogo yo zanga nairakporo watadu kina dee zanga bairakporo. Wai Yekova naundo rani ani ta ngba gu gene nga ga kakuti ruru mangaapai nibi gipai re? Ani nahõpai beroni, oni gedinga AEfeso 5:22–6:4, ka bi gu wene arugute Fugo Mbori afuhe fu akumbakuadee, dereakumba gbiati agude. Pa manga oni agu arugute peke yo paha rogo gu veresi re watadu agu akuraha duwa kinaha rogo Ziazia Kekeapai rengbe arengba ka nyakasa gaoni kodatise nga ga rogatise, si ki rengbe ka undo avungu agude i raba agude rogo wene gene, na gaoni ramukporo kini kadu na ngbarago. Anga gupai re nga gu maku rengbe ani kadu na ngbarago mbiko ho tee?
9, 10. Wai du gaani bipai kia ti gu nga ga agu aboro nga ga zegino yo nibi gupai nika manga kumbatayo?
9 Ani naa kido nga Mbori nika mbakada gu kpakaraapai nga ga gi zegino re ambakada barambeda kumbatayo. Zavura gu bakere asadatise nga ga aboro birĩ-inohe, na aboro birĩ-mbakadaahe gbiati gu bakere asadatise abazogo amangaha na ngbaduyo yo dunduko, kereapai kindi kinaho i ambakadanga ha ya. Kumba du rimoko nga Klaus Schwab i avungu ko Germani yo, nga guko nasigira gu riigbu nga gu nangera tipa ka ino agu apai nafuda aboro rogo zegino na kini gbata gene tipa ka mbakadaha, agumbapai bambeda kusayo ki yawee “agu akpakarapai namanga aboro rogo zegino, bangehe nakio kina kumbatayo na gu regbo si aida i mbakadihe rogoho, si nikina guruhe.” Ko afura tipa “gu kereapai namanga arikaaboro dunduko, gu duwa gu vura nga ga abamoi, pa gbarasa agu ahe naundo aboro, wa ngbatunga gu duwa dewa angua kusande, na zingo marã.” Schwab adigisi fugoko na gupai nga: “Awere tie si aida aboro kodi beyo tipa ka manga nyanyaki adiaberã niipo susi gu nadumbata tipa ka mbakada agu akpakarapai nafuda aboro auru kpotosende.” Wa gi 21 kama agarã re andu kumbatayo, aboro nabaka kina bangiriyo ya weneapai adunga kumbatayo te.
10 Nairiwo gu ngbarago ngaha ka ino gupai nga Yekova aima sigira gu mbakadapai nga gu rengbe ka mbakada gu kpakaraapai namanga rikaaboro areme dunduko vurube gu Kindo nga ga Masiya! Mbiko gu kindo re, ndikidi Mbori nika ‘manga pai vura nyasi’ auru kpotosende dunduko na “zereda ki du kpaima.” (Atambuahe 46:9; 72:7) Gu mbedimbedi Bakindo nga Yesu Kristo, ko nika ‘batasa airazingo ahe na airarungo, na ko atumo ungayo be pa bau na zuũ.’ (Atambuahe 72:12-14) Tiibe gu zogarago nga ga gu Kindo re, zingo riahe adunga te. (Atambuahe 72:16) Yekova nika ‘wéga aume ti bangirani kusayo dunduko. Kpio adúnga berewe te, rungo adúnga na akpe na ima a te, bambiko bambata apai aima nyasa.’ (Yugoti 21:4) I aima sigira gu Kindo re ngbangbaturũ yo, na si nika ye mbembedii ka mbakada agu akpakarapai dunduko du auru kpotosende.—Daniere 2:44; Yugoti 11:15.
11, 12. (a) Ya mo orafuo pa du pusiapusia rengbe ka ye na ndikidi ngbarago fu boro? Oni sakinga rogoyo? (b) Ginipai rengbe ka ye na ndikidi ngbarago fu boro?
11 Ani ima ino gupai nayee na ndikidi Ngbarago fu boro. Ginipai nzunzu naye na ndikidi ngbarago fu boro? Kumba sa duna inohe tipa ga aboro sino berãpai ayawee ngbarago na apaparaha biata, nga padu boro pusiapusia, rimisotise kurogo agu apai nga ga sunge na ga aborokporo, gbiati mangasunge na asásá bangirani watadu mangasunge tipa ka undo kura aboro. Dagba agu apaparaha du biata ko atangaraha re, ko anyakasipai tipa gu nga ga du boro pusiapusia ki yaa: “Gipai re ninyanyakipa pai bambiko dungu aboro namaaberã yo tipa ka gbia kina ngbarago.” Ginipai Ziazia Kekeapai agumbaha nibi gipai re?
12 Bakindo Soromo nga gu kumba nazogo gu ringara aYisaraere nadumbata ayaa: “Mi aya ku kpotore yo, ‘Mo rú nga, mi aásada ro na pa ngbarago; mo dù na ngbarago ti ro.’ Mo ngére, gere adu ni kina kungba pai tigaha a. Ya mi tipa mongo, ‘Si nga mumungo pai.’ na tipa ngbarago, ‘Gini he si amanga?’” (Batungusipai 2:1, 2) Ringbisihe kuti Ziazia Kekeapai, gu ngbarago boro agbiaha mbiko du ni pusiapusia, si gbua kina tipa guru regbo. Ginipai rengbe ani ka gumbaha tipa manga boro sunge? Ani na nyanyakipa sunge berani si aida ani mangihe, nga sunge tungusapa Kindo na sunge sa aboro ni abawiriki. (Matayo 24:14; 28:19, 20) Nitungusa ani pa gu bata fu kura aboro saki yo paha rogo Ziazia Kekeapai yo, gure nga ani namanga gu sunge rengbe ka ye na bata furani gbiati agu aboro nagiaha a ngbarani. (1 Timoteo 4:16) Nidu ani “[niga] Mbori abadiasunge,” ani ima ino gupai nga, “fu he ngba ti dia ha.” (1 AKorindo 3:9; Amokedi 20:35) Gi sunge ani amangaha re nasa gupai nga gaani raka du na rogoyo ti ni na si ki rengbe ka sa Bakusirani ko karagapai fu gu boro nasoapai kutiko, nga Satana Bakitingbanga. (Asanza 27:11) Nirengo, Yekova ima yugo gupai furani nga, pa ka ani kuti sinombori naye na ndikidi ngbarago nga gu adunga digidoho ti ni ya.—1 Timoteo 4:8.
13. (a) Rogo gini gene du gu Sukuru Nga ga Siokrasia ti ni furani nigu maku rengbe ani kadu na ngbarago mbikoho? (b) Wai oni nagbia aundo ti gu Sukuru Nga ga Siokrasia?
13 Ani na nyanyaki wene mbakadapai berani nga gu naraba rani rogo toroyo. Gu wirina nga Gerhard, nga bakumba rogo gu dungurati nga ga aDezire Yekova, ko atingidipa gu regbo ko adu niparanga, ki yaa: “Ho mi aduni niparanga, mi aduna kere kpakaraapai tipa ka fura. Ho aboro anaasosoda re ni, mi aniʹasadi ka fura ono ka mi afuranga wenengai ya, mi kini kongodi fugo akongoda. Kina zee naanizire na mi kidu naa bakere gberarago. Avungure ambakadipai tipa mi wiriki wai ka fura, ono gayo asadatise adunga na zuzuhe ti ni te. Gupai naamanga re re, si adu tipa gimi sino berã, angianga gupai nabipa kpotoboro ya. Wa si avura duwo, wene undo adu kinaho be Yekova, nga gu Sukuru Nga ga Siokrasia. Ho mi atona manga agumbapai ni rogo gi sukuru re, si afu ngara fere. Mi aʹasadi tire nyanyakii ka manga agu apai mi anaawirikaha. Wa mi aamangaha wo, sangbanaha adu niwenehe. Mi atona kaa fura zanga kongoda fugo, ka rago agberanga tire berewe wa mi anaafura ya, na mi aduna ngara berewe kutingba sunge tungusapai. Awere tie, mi namanga agumbapai amanga nga gu du tipa dungu aboro. Mi nafu bakere tambuahe fu Yekova, nga guko naraba re rogo gu gene nga ga gako sukuru tipa mi ini fugo dagba dungu aboro.” Ya mo anga gu gene re du Yekova araba rani ngbaha tipa ani mangi gako sunge nga gu rengbe ka sa rani ani duna ngbarago tee?
14, 15. Gini undo rengbe ani ka gbiaha niipo ti regbo fudifudiapai? Oni yugunga ha na kpiapai.
14 Ani na wene pagume dagbarani na Yekova na ani kini gbia undo be agu awirinarani nga aKristano, nga aguyo du rogo zegino dunduko. Katrin, nga gu wirinarani nidee naraka Germani yo, ri aduna bakere bakabangirise ho ri agi pa gu kere bazigizo ni namangi Asia yo bangbanda sudiyo na uroyo gbiati wai sangbanaha adu. Wiiri andu nunguro kurogo gu ringara nga Thailand ti gu regbo gu bakere sungburosungburo ime re amangi. Tipa dungu asaa wa 32, Katrin ainonga singia wiiri adu kindi niungari watadu ri adu dagba gu dungu aboro yo nahohoko watadu nakpiki i aageda bangeyo kina kumbatayo te. Nairiwo gu ngbarago ri adu nani ho wiiri ayambu ri ni rogo terefuni ka rugusa gupai bangiiri nga ri adu kinaho wenengai, pai amanga nga ri te!
15 Ginipai naundo Katrin ti agu aregbo nangia ga bakabangirise re? Ri akepai ki yaa: “Mi adi bakere gu regbo re kuti fu kpee fu Yekova. Mi abi gupai nga, gu kpee mi aafuhe re, si afu bakere ome fere gbiati gu zereda nga ga berã. Kurii gure, agu awirina nga ga toro yo nga aguyo duna nyemuse anaaye fuo re kini nyakasi re ti aregbo dunduko.” (AFiripoio 4:6, 7) Nairiwo wai ka rago agbera tiri ka ri adianga gu regbo re tipa kaa kparakpee fu Yekova ya, na ka agu awirina nangia ga toro yo re anyakasanga ri na afugo wasa ya! Gaani dawedawe pagume na Yekova gbiati Wiriko kodihe naapa koda ani tirani na gu riigbu nga ga agu awirina nga aKristano nigu mamu du nikparakparaha, du paha nibanyanyakihe na si aidanga ani bihe nitaatapai te.
16. Oni funga kpiapai nga gu nayugopa nyakapa gu maabangirise du tipa zingabekpio?
16 Ani na maabangirise ka bi gu gaani aboro berewe ani akpinyemuyo naima kpiko. (Yoane 5:28, 29) Ani bingo kpiapai tipa paranga kumba du rimoko nga Matthias, i asonosi ko ko ki da niboro sa dagba aDezire Yekova. Mbiko wa ko aruganga tiko naapa agu amaku nadu beko ya, ko abitikpa kusayo rogo gu dungurati nga ga aKristano ho ko aduni nisosono gude. Ko akepai bambeda kusayo ki yaa: “Mi anaasakanga pai na buba wenengai te. Rogo gu dungu agarã ani adihe na buba dunduko, ani aduna kina bakere zanga giatise dagbarani. Wa si avura duwo, buba aida gupai nga mi duna wene raka kumbatayo kindi. Ko akpinyemu re bakere gbe, nga gupai mi ainonga ho ti gu regbo nangiaha re ya. Rogo gu garã nangia 1996, mi asungu tingba-ba fuo buba ti gu regbo hee amako, ki zi beko ki nikpari nyanyakii kini hõpai beko kini yawee, mi na bakere gberarago tire tipa agu apai dunduko mi namangihe na mi nakpinyemu ko bakere gbe. Ono tie ko arengbanga berewe ka gia gupai mi aagumbaha te. Mbiko kaza aima diabeko, ko ki woki tipa kina guru regbo gbua ko ki kpi. Ka mi raki kumbatayo ki dati regbo zingabekpio ki bi buba berewe, ani ambakada agu apai ambakada nadu dagbarani naako. Nirengo, ko aduadu na ngbarago ka ino gupai nga wiriko awere ni bakumba na ko gbiati dia wiriko nga abazakigene.” Nairiwopa gu maku du ani nani tipa gu maabangirise nga ga zingabekpio re!
“Ko Nagbia nga Rungo Kuti ni Te”
17. Wai pa berã ani kurii agu amaku nga ga Yekova aundo rani?
17 Yesu Kristo afura tipa Bako du ngbangbaturũ yo ki yaa: “Ko nafu uru si kuru tipa agu yo nga gbegberẽ yo na agu yo nga wene yo a, ki kedi mai tipa ruru aboro na iraira yo a.” (Matayo 5:45) Ka singia Yekova Mbori nafu maku afu zavura fu iraira aboro gbiati gbegberẽ aboro, nairiwo wai tie rengbe ko ka fu maku fu agu aboro nata ngba gu gene nga ga kakuti ruru mangaapai! Atambuahe 84:11 nayaa: ‘Anga wenehe ho sa ka ko ká nani be agu aboro nata nzunzu te.’ Ho ani aberã ni kurii gu kparakpara bandahe na gu nunga Yekova nayuguhe fu agu aboro nakpinyemu ko, ngbaduraniyo nadu na tambuahe gbiati ngbarago!
18. (a) Ngba gini gene rengbe ani ka yawee Yekova agbianga ima kuti gako maku te? (b) Tipagine badungu gu ga Mbori aboro nakakuti manga rurupai arungo ti ni?
18 “Gu maku nga ga Yekova,” si nasa gako aboro i naazugo kumbatayo. Na ani naa kido nirengo ya “ko nagbia nga rungo kuti ni te.” (Asanza 10:22) Tipagine tie Mbori naambu asada na arungo ti ni si naamanga dungu gako aboro, nga aguyo nakakuti manga rurupai, si kini sa yo i nagbia bakere ima gbiati arungo? Ani nagbia kpakaraapai na aima mbiko nyanyaki nduapai biata. (1) Padu ani ni aboro ingapai. (Bambata Pai 6:5; 8:21; Yakoba 1:14, 15) (2) Satana na gako adaimona. (AEfeso 6:11, 12) (3) Gi gbegbere zegino ani araka rogoho re. (Yoane 15:19) Wa vura duhe nga Yekova nambu gbegbereapai ambu si nimangi rani, anga ko nga baengehe te. Nirengo, “Wene gamahe dunduko, na ziazia ũgamahe dunduko i nagama ha, si naye ari yo du Ba ni, nga Bafu aimarago.” (Yakoba 1:17) Ga Yekova maku ayenga na ima watadu rungo kurii rani wagusa te.
19. Ginihe napido agu aboro nandu kindi kumbatayo rogo kakuti ruru mangaapai?
19 Pa zugö ani kumbatayo rogo toroyo nakodapa sonosa ani dawedawe ngbanyaa dagbarani na Mbori. Ho ani asonosa dawedawe pagume ni dagbarani naako, gure nga, ani ‘naiga wene nyanyaki he fu kina rani sa gu rago nikaye yo, ani ki nye anye na ndikidi unga,’ nga nyenye unga. (1 Timoteo 6:12, 17-19) Rogo gu vovo zegino nga ga Mbori nga gu nika ye kumbatayo, ani aduadu na kumuko berani rogo toroyo gbiati aũzegino. Ndikidi unga nika duna amaku kpaima fu agu aboro ‘nadegatuyo sa fugo Yekova gaani Mbori.’ (Pa Fu Rugute ni Ue he 28:2) Nimanga ani nyanyaki diaberã, ani naandunga andu kumbatayo na ngbarago rogo kakuti ruru mangaapai.
Ginipai Wiriki Oni He?
• Tipagine duhe ti ni nigupai arunga ya tipa boro nye kaa berã nyanyakii tipa kina gupai du kumbatayo?
• Gini amaku ani agbia ngbarago awere behe?
• Tipagine ga Mbori ruru amoyambu arungo ti ni?