‘Ko Ambedambeda Na Oni’

“[Mbori] aturã nga na ani wa sa te.”—AMOKEDI 17:27.

1, 2. (a) Ho ani naangera ni kuari yo ka bi gu badungu akerekuru du ngbangbaturũ yo, gini sanahe rengbe ani ka sana tirani nani nibipa Bakusiahe? (b) Wai Ziazia Kekeapai akido rani ya aboro na kikiipayo bangiri Yekova?

YA MO oni ningerenga rogo gu yuru du rago ari yo niziaziaha ki binga gu badungu akerekuru du ngbangbaturũ yo iriwo rago ki zinga roni? Pa gu ndurumo akerekuru gbiati bakio gu haurago du ari yo naba kina kiki tirani ni iiriwoho. Rogo gi iiriwo bariwara haurago re, kpotosende gbua nga kungbo wiri tooni he rogoho. Ya mo gure nayugo gupai nga, gu Mbori nga Bakusiahe, “nga gu Ko nga Bahe ki susi auru kpotosende dunduko,” niba tumbatumba ko kuari gbe ka ba berãpa aboro adunga tiko ya watadu niba tuturũ ko na ni iiriwo ko ka si adunga wa ka aboro ini pai tipa ko yaa?—Tambuahe 83:18.

² Ziazia Kekeapai nakido rani ya Yekova nabi aboro na kikiipayo bangiriko. Nirengo, Fugo Mbori nangarasa rani ani gbata ko, si nayaa: “Ko aturã nga na ani wa sa te.” (Amokedi 17:27; 1 Pekapai 28:9) Nirengo, ka ani tona kaa mbeda koyo du Mbori ni, ko akaragapai akaraga kuti gaani asadatise. Ngba gini gene? Agu afugo du rogo gu gaani veresi nga ga gu gara nga 2003 nafu gi bawene karagapai nafu ngbarago ku ngbaduseyo re, nga: ‘Ko ambedambeda na oni.’ (Yakoba 4:8) Ani wisiginga pai tipa bete gu iiriwo agamahe nga gu Yekova naagamaha ni inapai fu agu aboro du mbembedii na ko.

Gu Gamahe Yekova Afuhe fu Boro

3. Gini gamahe Yekova naafuhe fu agu aboro nambeda koyo du ko ni?

³ Bambatapai nga, Yekova na bawene agamahe beko du niigiigihe tipa gako amoyambu. Gu pagbia na agu akumuko dunduko, gbiati agu awirikapai nga ga agu asukuru nga ga gi zegino re, ka si funga gi gamahe re fu boro te. Si nga gu gamahe du tipa boro nisani, kina Yekova sa afuhe fu kina agu aboro du mbembedii na ko. Gini gamahe du ngaha? Fugo Mbori nafu karagapai kini yaa: “Ka . . .mo atumba fugo ro ku ari tipa rugatinapai, ka mo agbata ha wa feda ki nita tipa ha wa okooko ũkumuko; si du mo ka ruga tiro ti ni na pa gunde ti Yekova, ki bi gu inahe nga ga Mbori. Bambiko Yekova nafu tatamana.” (Asanza 2:3-6) Oni berẽnga gupai nga, agu aboro nga airazangarengba rengbe arengba ka “bi gu inahe nga ga Mbori”! Gu gamahe re nga gu inohe du rogo Fugo Mbori, nga gu i aringbisaha kuti “okooko ũkumuko.” Tipagine i aringbisaha ti ni kuti okooko ũkumuko?

4, 5. Tipagine ka i ringbisi “gu inahe nga ga Mbori” ti ni kuti “okooko ũkumuko”? Oni yugungaha na kpiapai.

⁴ Ndupai sa nga, mbiko gu inohe du tipa Mbori, si na kikiipaha. Gu bawene mosoro sa dagba agu akuraha yo si afuhe fu aboro nga gu maabangirise nga ga nyenye unga. (Yoane 17:3) Ono zavura awere, gu inohe re nafu kumuko afu fu rani. Kpiapai tipa gipai re nga, nisangbana gaani wisigo Fugo Mbori sirisiri, ani ima bi agu akaragapai du tipa ngbatunga gu nyanyakipa asanahe nga: Rimo Mbori nga da? (Atambuahe 83:18) Ginipai nzunzu du tipa kpikpi aboro? (Batungusipai 9:5, 10) Ga Mbori ringbisapai nga gine tipa kpotosende na tipa ngbatunga aboro? (Yesaya 45:18) Ani ima ino gu bawene gene a ngbaa tipa raka nga gu du mbiko kakuti agu arugute nga ga tatamana nga ga Ziazia Kekeapai. (Yesaya 30:20, 21; 48:17, 18) Rogo gi gene re, ani na gu ruru arugute berani naundo rani tipa ani sovura na diabese kuti agu abakabangirise nga ga raka na ka peka fuo gupai nasonosa ndikidi ngbarago. Kurii agi apai re dunduko, gaani wisigo Fugo Mbori ima sa rani ani ini gu bawene asino nga ga Yekova na ani ki mbedi na ko. Ginihe rengbe ka duna kikiipaha kisusi dawedawe ngbanya na Yekova du mburuhe rii “gu inahe nga ga Mbori”?

⁵ Kura ndupai kinaho rengba ani ti ni ka ringbisa gu inohe du tipa Mbori kuti “okooko ũkumuko.” Wa kina dungu aũkumuko, ngenga ha rogo zegino gbe te. Dagba gu bange aboro naraka auru kpotosende wa sita kutu amirioni, aguyo nairiso Yekova bangeyo gbua wa amirioni sita, watadu boro 1 dagba aboro 1,000, bi “gu inahe nga ga Mbori.” Ka yugokpiapai tipa ka ino gupai nga, gu rengo nga ga Fugo Mbori si wa gu ũkumuko angenga be dungu aboro ya, ani wisiginga sanahe gbua sa nga ga Ziazia Kekeapai nga gu nayaa: Ginipai ninaamanga fu boro ti rago kpio ni? Ani ini gupai rogo Ziazia Kekeapai yo nga, mbisimo nakpi akpi na gupai nga kpikpi aboro ainonga pai te. (Yezekere 18:4) Wa vura duhe wo, gu kungbo aida nga kurahe kina rogo boro yo naraka araka fuo kpio ni, dungu apambori nga ga zegino ima ida kuti ni. Si nga bangua papara agu apambori nga ga Ngbiiakristano. Si kina wo rogo agu apambori nga ga aBuddha, ga aHindu, gu nga Jainisme, ga aMasarami, ga aShinto, gu nga Sikisme, gu nga Taoisme, na ga aYuda. Oni berẽnga pa gu badungu akutu amirioni aboro i anangi yo na gi bangisa zire yugopai re!

6, 7. (a) Kina gini aboro sa rengbe ka du na “gu inahe nga ga Mbori”? (b) Gini kpiapai nayugo gupai nga, Yekova ima fu gu mosoro fu rani nga ga dudungurobipai, nga gu nabitikpa be “airatatamana na arugutinapai”?

⁶ Tipagine adunga dungu aboro ti ni na ‘gu inohe beyo nga ga Mbori’ ya? Bambiko ka boro rugunga tini na gupai du rogo Fugo Mbori yo zanga gako undohe te. Oni rugutironi na gupai nga, gi inohe re gamahe du ngaha. Yekova nagamaha fu kina agu aboro idi ka gbata Fugoko rogo manga rurupai na umbasitise. Si rengbe ka du nga ngbatunga agu aboro re “na tatamana wa du pa borose te.” (1 AKorindo 1:26) Dungu aboro rengbe ka du dagbayo yo ‘ni agu aboro naawirikanga pai ya na ki du ni kungbo aboro.’ (Amokedi 4:13) Wa vura duhe wo, anga gu inohe na gu tatamana nga ga gi zegino re, si nga nyanyakipa pai te. Yekova nafu gu mosoro fu rani nga ‘gu inohe du tipa ko’ bambiko gu sino rani ko abihe ku kpotoraniyo.

⁷ Oni makianga kpiapai sa nga. Dungu wene abawirikipai rogo Ngbiiakristano ima kusa bakere agu abuku nasakarogo agu apai du rogo Ziazia Kekeapai yo. Ngbatunga agu abuku nasakarogoapaiyo re, si rengbe ka sakapai tipa gu kuru apai namangi mbata kusayo, si rengbe ka yugorogo agu afugo nangia ga pa-Ebere na pa-Giriki, gbiati agu akuraha. Na gu gayo awirikapai re dunduko, ya mo ngbatunga gu wene abawirikipai re i bi ‘gu inohe nirengo du tipa Mbori’? Ya mo i rugu tiyo ziazia na gu banguapai du rogo Ziazia Kekeapai yo, nga gu nafura tipa dia gu gbarasarimo kusayo du ti ga Yekova bakere pagbia mbiko gu gako Kindo nga ga ngbangbaturũ? Ya mo i ini gupai nga, Yekova Mbori nipapara Tirinita te? Ono tie, ani ti gaani wa yo te, ndikidi inohe kina berani, tipa ngbatunga agu apai re. Tipagine? Bambiko Yekova ima fu maku fu rani nga ga dudungurobipai rogo gu rengo nga ga toro nga gu nabitikpa be dungu “airatatamana na arugutinapai.” (Matayo 11:25) Nangbaa gu gene Yekova naafu mosoro ngbaha fu agu aboro du mbembedii na ko!

‘Yekova Nabanda agu Aboro Dunduko Nakpinyemu Ko’

8, 9. (a) Wai Davide aringbisipai tipa gu kura maku du tipa agu aboro du mbembedii na Yekova? (b) Tipagine ndikidi aKristano aida ga Mbori bandahe ti ni?

⁸ Agu aboro du mbembedii na Yekova, i na gu kura mamu beyo nga, ka du kutii gu bandahe nga gako na ngbarago. Gu bake Atambuahe nangia Davide nadu na dungu fudifudiapai gbiati kpakarakpakaraapai, ko akepai ki ya: “Yekova du mbembedi na agu yo dunduko nakpara fu ko, na agu yo dunduko ninakpara fu ko ni rengo. Ko nadigisa gu nyemuahe nga ga agu yo nagunde ti ko, ko nagia gayo kpe ku ari a, ki nibatasi yo. Yekova nabanda agu yo dunduko nakpi nyemu ko; ono gbegberẽ aboro ko agbárasa yo dunduko.” (Atambuahe 145:18-20) Ii, Yekova mbembedii na agu aboro nakpinyemu ko na sidu ko ki rengbe na ipiso tiko ka fu karagapai fuyo kuti gayo akpee tipa undo.

⁹ Tipagine ani aida ga Mbori bandahe ti ni? Kurii padu ani rogo sangbana gu raka nga ga gi ‘gbegbere aregbo du nikpakarakpakaraha ka raka rogoho re,’ ndikidi aKristano kina boro ngbapai yo be gu bakere basovura kuti Yekova nga Satana Bakitingbanga. (2 Timoteo 3:1) Gu irabiriki nga vura rani re ima diaberã “ka rita” rani. (1 Petero 5:8) Satana narungosi rani, kini fudi rani, na kini asadi rani. Ko nagbata gene a tipa gu sino nga ga berã rani na gu du ngbaduraniyo a nga gu rengbe ko ka mangasunge nani. Ko na sásá berã ko yo nga: ka sa gaani idapase si rungbura na ka gbarasa parani rogo toroyo. (Yugoti 12:12, 17) Wa duhe nga gu vura rani nasovura kuti rani re ome tiko gbe, ya mo anga si ni gupai rengbe ani ka kido kuti ni wa ini ani gupai nga, ‘Yekova nabanda agu aboro abanda dunduko nakpinyemu ko’ tee?

10. (a) Wai Yekova naabanda gako aboro? (b) Gini bandahe nga gu nyakipaha anyaka gbe, na tipagine?

¹⁰ Ono wai tie Yekova naabanda gako aboro? Gako kidohe tipa banda rani afunga gene fu rani tipa ani zanga gu kpakarakpakaraapai du rogo gi zegino re te; na si ayugonga gupai a nga, si naida ko mangi kina iiriwo apai tipa rani te. Wa vura duhe wo, Yekova nabanda unga gako aboro abanda rogo abadona yo. Nirengo, ko ambunga Bakitingbanga ko nyasi ndikidi airisimbori kusayo auru kpotosende dunduko te! (2 Petero 2:9) Kurii agi apai re dunduko, Yekova nabanda rani rogo toroyo. Ko nafu agu ahe fu rani ani akpinyemuhe ka hipai rogo a’asada na ka banda gaani pagume dagbarani na ko. Ti yangara agu apai dunduko re, gu bandahe du rogo toroyo si nga nyanyakipa bandahe. Tipagine? A wa ani ka du kindi na ngbanya na Yekova, anga he ho watadu kpio, rengbe ka imisa rani nyeanye kindi te.—Matayo 10:28.

11. Gini aundo Yekova namangihe tipa banda gako aboro rogo toroyo?

¹¹ Yekova aima manga bakere mbakadaapai tipa agu aboro du mbembedii na ko ka banda yo rogo toroyo. Rogo Fugoko yo nga Ziazia Kekeapai, ko nafu tatamana fu rani tipa ani sovura na diabese kuti dungu ngbatunga a’asada. (Yakoba 1:2-5) Mangasunge na agu arugute du rogo Ziazia Kekeapai yo nga gupai nabanda boro abanda nitihe. Kurii gure, Yekova nafu “Ziazia Toro fu agu [aboro] nasana ko” tipaha. (Ruka 11:13) Gu toro re nga guhe duna bakere ome kisusi rogo haurago, sidu, si rengbe ka undo rani ani rengbe ka diabe ngbatunga a’asada dunduko nga gu rengbe ani ka gbia tirani nani. Rogo Kristo yo, Yekova afu ‘agamahe fu rani rogo aboro yo.’ (AEfeso 4:8) Agi aboro duna inohe rogo toroyo re na’asada tiyo nyanyakii ka yugo kina kpia ga Yekova dudunguro nunga ho i aundo akurayo airisimbori ni.—Yakoba 5:14, 15.

12, 13. (a) Ngba gini gene Yekova afu gu riahe fu rani rogoho nga ga toro ti regboho? (b) Ginipai oni aberãha tipa ga Yekova ambakadapai tipa ani du wenengai rogo toroyo?

¹² Yekova nafu gu kurahe berewe tipa banda rani nga: gu riahe nga ga toro ti regboho. (Matayo 24:45) Rogo gu gene nga ga agu abuku du berani, kodihe na agu amagazini nga Ngbaõbambu Sinziri gbiati Awake!, na rogo adunguratise, na kikindigi adunguratise,Yekova naundo rani na agu ahe ani akpinyemuhe ti kina gu regbo ani aidaha. Ya mo oni rengbe ka tingidapa gu regbo oni agi pai ba ga aKristano dunguratise yo, watadu pati kikindigi adunguratise nga gu nafõngbadu roni yo na ki nyakasi roni watadu ki fu wasa fu roni? Ya mo oni agedinga pai rogo magazini sa dagba agu akuraha du arimoho kuari re oni ki berẽnga gupai nga, si wa i akehe tipa kina roni?

¹³ Gu ga Satana nyanyakipa ũvura duna sangbanaha ti ni, si nga zeresakpoto aboro yo, na ka sangbanaha henga manga rani te. Ko ima inoho wenengai nga, du ani na gberarago kuti gbanga regbo rengbe ka rungburasi rani, na ki sa rani ni mumungo rani fu apai si di berani. (Asanza 24:10) Ani naida undo, bambiko ho angaranga ani ni ya, Satana na’asada tiko ka gbia mamu ti gu zerakpotoseyo re. Agu amagazini nga Ngbaõbambu Sinziri gbiati gu kuraha nga Awake!, si nga agu amagazini duna agu apaparaha rogoho ti kura aregbo ninaaundo rani ani sovura kuti zerakpotoseyo. Tipa ngbatunga gu kura paparaha sa, wirina sa ni dee akepai ki ya: “Si mbedi ka du nga mi naageda gu paparaha re na a’uru dunduko, na si ki vura du wo kina aume ninaaga bangire yo. Mi naabanda ha mbembedii pati gimi barame wa ka si mbedi na mi tipa gedaha baraho kpotoreyo azera ni. Rogo agu apapara kekeapai du wa gere, mi naabi tire nga mi kina vurube Yekova yo nibandabanda re.”a Anga ani na ngbarago tirani be Yekova tipa undo ko rani na gu riahe nga ga toro ti wene regboho tee? Oni tingidi gupai nga, gako mbakadapai tipa ani du wenengai rogo toroyo, nga gu gopai nayugo gupai nga, ko mbembedii na ani, na ani ki du nibandabanda rani kutii gako bandahe.

Mbeda Koyo Du gu Ko ni ‘Nagia ga Aboro Kparakpee’

14, 15. (a) Gini gamahe nga gu Yekova afuhe nitiko fu agu aboro naye koyo du ko ni? (b) Tipagine du pa mbu gene ti ni nizakizakihe gbua koyo du Yekova ni rogo kpee yo nibakere mamu fu rani?

¹⁴ Oni arugunga tironi na gupai nga, ho aboro naagbia ome ni ka dia pagbia kubeyo, i naambedanga taata na agu aboro du kutii gayo pagbia tee? Wa vura duhe wo, ginipai tie du tipa Yekova Mbori tigako? Ya mo turũ ko aturo ki zanga duna nyemu agu afugo kungbo aboro apekaha fuko? Kuba gure, ko tigako wo te! Gu gamahe nga ga kparakpee, si nga gu kura gamahe nga gu Yekova agamaha fu agu aboro du mbembedii na ko. Ho du ani ni nirengo na gu mamu berani nga ka du na gene nizakizakihe gbua fu rani koyo du ‘Guko ni ninagia ga aboro kparakpee’ si nirengo nga bakere mamu. (Atambuahe 65:2) Tipagine?

¹⁵ Ani bingo gu kpiapai nga: Bangerekurii bakere basunge sa na dungu asunge beni tipa mangaha. Ni nadia berã tipa gini apai ni nika mangaha nitini, na ginigu ni nika fuhe fu kura aboro i mangihe. Teketeke a, gu Bakere Bakindo nga ga zegino ko na siapai beko kina wo ka diaberã tipa gini apai nga gu naida kina boro ko mangihe na ginigu ko nika fuhe tipa i mangihe. Oni berẽnga pa gu sunge Yekova afuhe fu gu Wiriko ko akpinyemuko gbe nga Yesu. Ko ‘a’asia pa sapangbanga’ fu Wiriko. (Yoane 5:27) Mbori amoi amaraika ‘ni zogozogo yo ku tii beko.’ (1 Petero 3:22) Yekova aima fu gu gako ziazia toro duna ome ti ni fu Yesu tipa si undo ko tipa ko ngbembatayo fu gako abawiriki rogo zegino. (Yoane 15:26; 16:7) Si du si arengbe arengba ti ni fu Yesu ko ya wee: “I asia pa ahe fere dunduko ku ngbangbaturũ yo na ku sende no.” (Matayo 28:18) Wa vura duhe wo, ho daha ni tipa pa gaani akparakpee, Yekova sia gupai nga, kina boro ko nitiko nikaa mangaapai tipaha. Gure nga ndugupai Ziazia Kekeapai aruga rani ti ni ya ani fu gaani akpee fu kina Yekova sa, kini mangihe wo ti rimo Yesu.—Atambuahe 69:13; Yoane 14:6, 13.

16. Tipagine rengbe ani ka kido ti ni kuti gupai nga, Yekova nagia gaani akparakpee agia nirengo?

¹⁶ Ya mo Yekova nadegatuko nirengo sa gaani akparakpee? Wa ka si adu nga ko aberãnga pa rani te, ka ko nazungodinga rani kini yaa ani “kpátagara kuti kpe kindi,” watadu ani ba agu apai nafuda rani ku auru ko yo te. (ARomo 12:12; Atambuahe 55:22; 1 Petero 5:7) Gu ruru amoyambu nadu ti agu aregbo i aakeka Ziazia Kekeapai adu na gu ndikidi maabangirise nga Yekova nagia ga aboro kpee agia. (1 Yoane 5:14) Rogo gi gene re, gu bake Atambuahe nangia Davide aya wee: “[Yekova] agia fugore agía.” (Atambuahe 55:17) Ani a, na nduapai berani dunduko ka kido kuti gupai nga, Yekova mbembedii na ani, tipa ka gia agu apai du berã rani yo dunduko na ka ino agu apai ani abakabangirani tipaha.

Yekova Nafu Mosoro fu Gako Amoyambu

17, 18. (a) Wai Yekova aberãpa gu ruru sunge gu gako aboro amangaha ko akusi yo duna tatamana? (b) Oni sakinga rogo gupai du rogo Asanza 19:17 nga gu nayugo gupai nga, gaani inapai adunga gbua zanga Yekova inipai tipaha te.

¹⁷ Pai ho rengbe kungbo boro ka mangaha watadu ka ká pa mangaha si ki gbarasipa ga Yekova ba ni Bakindo Zegino dunduko te. Wa vura duhe wo, Yekova nigu Mbori du mbembedii ka ida na gaani apai. Nirengo, ko nakiiso pa gu ruru sunge gu gako aboro amangaha ko akusi yo duna tatamana na kini berẽ paha nyanyakii. (Atambuahe 147:11) Gere berewe a, nga gu kura weneapai du agu aboro nani na ngbarago nga aguyo mbedi koyo du Yekova ni: Nga ko nafu mosoro afu fu gako amoyambu.—AEbere 11:6.

¹⁸ Ziazia Kekeapai nayugoho fu rani ziazia ya Yekova nabi gupai abi gako amoyambu amangaha na kikiipaha. Nikpiapai, ani nageda gupai nga: “Gu boro du na nunga rungorungo boro tini nafu he fu Yekova, tipa gani wene mangapai ko afú mosoro fu ni.” (Asanza 19:17) I ayugupa ga Yekova berãpa rungorungo aboro rogo gu ga Mbori Rugute ko afuhe kube Mose. (Pa Amotumo 14:21; 19:15) Wai Yekova abi gu gene ani awirika ko ngbaha rogo yugo nunga fu agu aboro nga airarungo rogo gaani mangaapai yo? Ho ani afu he ni fu rungorungo boro, zanga duna gu berã nga i nika fu kura he fu rani kubaha, Yekova nabi gere wa ka i yaa bape du fu ani he Fuko. Yekova nakido rani ka gasa gu bape re na inapai gbiati amaku. (Asanza 10:22; Matayo 6:3, 4; Ruka 14:12-14) Ii, ho ani ayugo nunga ni fu gu kuarani nga irisimbori, si nafu ngbarago afu ku ngbadu Yekova yo. Nangbaa gupai nga, gu Barani du ngbangbaturũ yo ima ino pai tipa gu gaani inapai ani amangaha fu akuarani gbua!—Matayo 5:7.

19. (a) Tipagine rengbe ani ka du ti ni na kido nga agu apai ani amangaha dunduko gene sunge tungusapai yo na sunge sa aboro ni abawiriki Yekova nika bihe abi na kikiipaha? (b) Ngba gini gene Yekova afu mosoro tipa gu sunge i amangaha ka songoda gako Kindo nani?

¹⁹ Yekova nabi agu apai abi na nyanyakipaha ani amangaha tipa gako Kindo. Ho du ani ni mbembedii na Yekova, gupai sa duho si aidaha nga ani mangisunge na gaani regbo, ome, na agu ahe du berani ki du tingba gu sunge nga ga Kindo kini sa aboro ni abawiriki wa rengbe ani ka mangaha na ome rani dunduko. (Matayo 28:19, 20) Ti kura regbo, ani rengbe ka berã gupai nga, ani namangaha nikina wiri umbaha gbua. Gu ngbaduraniyo nga ga zangarengba rengbe ka sa rani ani nibakibangirani abaka singia gu sunge ani amangaha si nafu ngbarago fu Yekova. (1 Yoane 3:19, 20) Ono Yekova nabi agu agamahe abi aboro agamaha dunduko na nyanyakipaha ka si vura du ni umbaha ono ki du nigu gamahe kina nyemuse afõngbadu boro yo ni gamuhe, ko nabihe abi na kikiipaha. (Marako 12:41-44) Ziazia Kekeapai nakido rani niyaa: “Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko.” (AEbere 6:10) Nirengo Yekova natingidapa gupai atingida oni amangihe tipa gako Kindo na kini fu mosoro tipaha, zavura gu tooni he vurũ. Kurii gu dungu amaku nga ga toro du berani awere, ani rengbe ka ngera kumbatayo tipa gu ngbarago nika du rogo gu vovo zegino naye re, yo Yekova nika zaka beko ni niinapai ka fuka agu ahe rẽarẽ tipa aboro du nani beyo fu aguyo dunduko du mbembedii na ko!—Atambuahe 145:16; 2 Petero 3:13.

20. Rogo gu garã yo nikangia 2003, gini gene rengbe ani ka banda agu afugo rogoho nga ga gu veresi nga ga garã ku berã rani yo, na gini sangbanaha ka si ye na ni fu rani?

²⁰ Rogo gu garã yo nabaha nikangia 2003, ani sananga tirani singia ani namanga gu asadatise nandu kumbatayo ka mbeda na gu Barani du ngbangbaturũ yo. Ka singia ani namangaha wo, ani rengbe ka rugatirani na gupai nga, ko amanga gupai amanga fu rani ko akidohe tipaha. Nirengo, ‘Ka Mbori renga ziree te.’ (Tito 1:2) Ka singia oni mbedi koyo du ko ni, ko ambedambeda na oni. (Yakoba 4:8) Na gini sangbanaha rengbe ani ka bihe? Ani nika du awere na bakere amaku ki du na gu maabangirise nga ka mbeda na Yekova kisusi gu nidu mbata nyeanye kindi!

[Gu rukutu kekeapai du bandu kpewaraga yo]

Oni Natingidaha?

• Gini gamahe Yekova naafuhe fu agu aboro du mbembedii na ko?

• Gini mbakadapai Yekova namangihe tipa ka banda gako aboro rogo toroyo?

• Tipagine duhe ti ni nimamu ka duna zakizaki gene berani gbua tipa kparakpee fu Yekova nibakere maku fu rani kisusi?

• Wai Ziazia Kekeapai ayugo gupai nga, rago nangbaangba ti Yekova tipa gu ruru sunge gu gako aboro amangaha ko akusi yo duna tatamana?

[Gu kpiahe du ti kpewaraga 15]

Yekova ima fu maku fu rani gbiati dudungurobipai kurogo agu arengo yo nga ga toro

[Gu kpiahe du ti kpewaraga 17]

Yekova nabanda aboro rogo toroyo

[Gu kpiahe du ti kpewaraga 18]

Yekova mbembedii na ani, ko ima mbakada tiko tipa gia gaani akparakpee dunduko