Oni Rengbe Arengba ka Duna Ndikidi Idapase

Ho garã Sarah Jayne aduni nga 19, i agumba gupai furi nga gu kaza nga kenisa ima zio ri na kini mangi ri rukumbu ri yo. Fuo gba yo gu kaza re, ri ahu behe, sidu ri ki tona ka duna maabangirise tipa raka kumbatayo. Ri adu nirengo na maabangirise gbe ki da ti gupai nga ho garãri aduni nga 20, ri aidihe fu wirina ko pazua ri na ri ki tona ka mbakada tiri tipa gayo rogatise. Rogo kina gu garã re, gu kaza re akaraga tihe berewe kuti ri, fuo gure, i ki gumba gupai furi nga kina bete aposo gbua nye koyo furi ri ki kpi. Sarah Jayne akpi rogo Banzinga rogo 2000, mbata fu garãri da ti 21.

GUPAI nazeresi ngba agu aboro naandu ka bi Sarah Jayne bambungua yo angia gari nyanyaki ida tipa raka kumbatayo, kodihe ku pati gari nyanyaki idapase kuti Mbori na kuti Fugo ko nga Ziazia Kekeapai. Wa ri avura kaa ngera bangiiri na kpio, ri aima ruga ti ri nzunzu na pa gari maabangirise tipa zingabekpio, nga ri abi abakureari abi berewe. (Yoane 5:28, 29) Ri ayaa: “Mi abi roni abi berewe wa du oni dunduko rogo ga Mbori vovo zegino.”

Gu kura aboro naberã gupai nga ngbatunga gu idapase re tini te. Ludovic Kennedy asanahe ki ya: ‘Gine nga gu ida i afura tipaha ya si nayugopa raka fuo kpio, anga si gbua nga gu ida nga ga agu aboro nabakabangiri yo tee, . . . nga gu i aya tipaha wee regbo nika ye i ka vudo yangara mbaya tini, fuo gure i ki vudi kura mbaya fu aboro i ye kurogo gu ati Edeni duna bere angua rogo tipa ka gbia ngbarago be wene apai na agu aboro naima ndu koyo mbata fuyo kodihe na aguyo nika ye kusa tingbafuo yo?’ Tipa gipai re, ani du wa ka ani sana gu sanahe natikango kuti gipai re. Ginigu ruu gbe, ka ida gupai nga “gi raka re nga gu yangara raka du berani, sidu ani mangi gupai rengbe ani ka mangaha kindi wa du rago re,” a wa Kennedy agumbaha, watadu si naida ani idi kuti Mbori na kuti gako mokido tipa zingabekpio? Sarah Jayne asia gu nga ka ida kuti zingabekpio. Waigu ri aye ka duna ngbatunga gu idapase re?

‘Oni Gbata Mbori na ki Gbia Ko’

Ka oni aida ka duna ida kuti boro na kini kido kuti ni, si naida oni ini ni na ki wiriki wai ni aberã na wai ni amangapai. Gi mangapai re nakoda gupai du ngbadu boro yo na gu du rogo gani berã a. Kinawo a duhe nzunzu ho si aida gupai ni be boro nga ni sonosi ndikidi idapase kuti Mbori. Si naida oni ini ko, ki wirikipai tipa asino ko, ka ino ko ni gu boro rengbe oni arengba ka kido kuti ko na ki asadi ka ino wai ko akakuti gako apai rogo agu apai dunduko ko agumbaha na gu ko amangihe.—Atambuahe 9:10; 145:1-21.

Gu kura aboro naberãha ya ka gipai re manginga te. I nayaa kangia Mbori ho ke, ko tuturũ ti aboro, ni gu boro ka i ainonga pai tipa ni wa gu sa ya. Boro kango sa asanahe ki ya: “Ka si du nga Mbori nga ndikidi boro a wa ko adu fu Sarah Jayne, . . . tipagine ko ayugonga tiko tini wo fu gu yangara rani ya?” Ya mo Mbori nirengo tuturũ ti aboro ka ba gbata ko adunga tini ya? Rogo ga Pauro fugo fu agu abakpinyemu tatamana na abawirikipai nadu Atenai yo, ko agumba gupai nga, “gu Mbori namangi zegino na ahe dunduko rogo yo” aima fu agu apai dunduko si aidaha tipa ka ‘gbata Mbori na ki bi ko.’ Nirengo, Pauro ayaa: “Ko aturã nga na ani wa sa te.”—Amokedi 17:24-27.

Wai tie rengbe oni ‘ka gbata Mbori na ki bi ko’? Kura aboro amangi gipai re ni bi yo agu ahe du pati yo rogo zegino. Tipa gu dungu yo, agu ahe du rogo zegino nisaha angia bakere gopai ka sa yo i idi gupai nga Bakusiahe kina tini nirengo.a (Atambuahe 19:1; Yesaya 40:26; Amokedi 14:16, 17) I naberã wa gu Pauro aberẽ, nga guko nayaa, “[gu ga Mbori] apai ka i abi nga ya nga gako nyenye tandu na sino Mbori i nabi he abi ziazia, tona kina ho rago aenge ni. I nabi he kina rogo agu ahe yo ko amangi.”—ARomo 1:20; Atambuahe 104:24.

Si Naida Oni Duna Ziazia Kekeapai Beroni

Ono tie, tipa oni duna ndikidi idapase kuti Bakusiahe, si naida oni duna kura he beroni nga gu ko afuhe. Gine ngaha? Si nga Ziazia Kekeapai, nga gu Fugo Mbori gako toro adu kugiipa kehe. (2 Timoteo 3:16, 17) Boro rengbe ka yaa: “Ono mo runga mbata, . . . waigu rengbe mo ka ida kuti Ziazia Kekeapai ho mo abi gu kereapai abi ni agu aboro amangihe nayaa i napefuo Ziazia Kekeapai?” Rengo ngaha, kekekeke kuru apangbanga kinaho tipa gu biriki, kere sino na wasiro agu aboro du rogo agu akanisa nga ga Ngbiiakristano amangihe. Ono agu aboro dunduko duna ruru berã rengbe ka bi gupai nga agu aboro du rogo Ngbiiakristano nananga tiyo ananga gbua ya i napefuo agu andiko nga ga Ziazia Kekeapai.—Matayo 15:8.

Ziazia Kekeapai nitihe aima yaa dungu aboro ananga tiyo ya i nga airisimbori ono ki du nirengo ni agu aboro ‘naora rimo gu Bairayo nangbe yo.’ Gu mokedi nangia Petero ayaa, “[mbikoho] aboro apẽka gayo wasiwasi mangaapai a; aboro agúmba gbegberẽpai tipa gene rengo mbiko yo.” (2 Petero 2:1, 2) Yesu Kristo ayaa ngbatunga agi aboro re angia “amangi irairapai” nga aguyo si adu nga i aino yo wenengai ti gayo gbegbere mangaapai. (Matayo 7:15-23) Gu boro nabasa Fugo Mbori mbiko gu gbegbere mangaapai nga ga agu aboro du rogo Ngbiiakristano, ni wa kina guni naba gu waraga kusayo bakureani nikedihe funi na gu nduhe nga, gu boro ye nani funi nga gbegbere sino boro.

Ka boro adunga na Fugo Mbori beni ya, si ni gasigasipai funi ni duna ndikidi idapase. Kina rogo Ziazia Kekeapai sa Yekova ape gu rengo ni du tipa ko. Ko nasakarogo gu sanahe yo ninaapiriganga ngba aboro ya nga gu du tipa ndu gupai ko ambugene tini fu rungo na ima si nimangi aboro na gupai ko ka mangaha tipa agu apai re. (Atambuahe 119:105; ARomo 15:4) Sarah Jayne aye ka ida kuti gupai nga Ziazia Kekeapai nga gu Fugo Mbori gako toro adu kugiipa kehe. (1 ATesaroniko 2:13; 2 Petero 1:19-21) Rogo gini gene? Anga si adu wo mbiko kina gupai gbua nga avunguri nagumbaha furi te, ono si adu wo mbiko ri adi regbo ka wisigo gu goapai dunduko duho nayugo gupai nga Ziazia Kekeapai nga kparakpara yuguyugupai be Mbori. (ARomo 12:2) Ni kpiapai, ri akparia pa gu nyanyaki ome du Ziazia Kekeapai nani kurii gu raka nga ga agu aboro zi tiyo kuti gaha andiko. Mbiko gu undo ri agbiaha be ngbatunga abuku wa Ziazia Kekeapai—Fugo Mbori Watadu Fugo Aboro?,b ri awisigi gu dungu goapai du rogo nga gu nayugo gupai nga Mbori nadu kugiipa kehe.

‘Idapase Naye be Giapai’

Ono tie, anga kina duna Ziazia Kekeapai bese, watadu ka duna gu ida nga ga Mbori toro nadu kugiipa kehe rengbe kuho te. Pauro akepai ki ya: ‘Idapase naye be giapai.’ (ARomo 10:17) Gupai nasa boro ni duna idapase nga gia sangba Ziazia Kekeapai, angianga kina du nani bese gbua ya. Ho oni ageda Fugo Mbori ni na kini wisigihe, gure nga oni nagia gupai ko aida ka gumbaha. Zavura rukutu agude, i rengbe arengba a ka mangaha. Pauro nafura tipa Timoteo ya ko atona ka wirika “Ziazia Kekeapai” be nako na be titako ho ko “adu ni ni gude.” Ya mo gere nayugo gupai nga i amoipai amaa kurii ko ngba ome? Oó! I amaanga pai kurii Timoteo ngba ome watadu ka nanga ko wa gu sa te. I ‘asakipai na ko ko idi’ gupai ko agihe na ki idi gu ko agedihe.—2 Timoteo 1:5; 3:14, 15, NW.

Kinawo a i asakipai na Sarah Jayne ri idi kutipai. Wa kina agu aboro Beroya nadu rogo bambata kama agarã, ri “adi pai wenengaĩ [be avunguri na kura abayugupai] ka berã ha.” A wa du sino agude, ri aidi gupai avunguri agumbaha furi ho ri aduni ni tooni degude. Kusa fuo sona ri, anga agu apai dunduko i ayuguhe furi ri aidihe ku bitimo te. Ri ‘anawisigo Ziazia Kekeapai na uru dunduko, singia agi apai wo re.’—Amokedi 17:11.

Oni Rengbe Arengba ka Duna Ndikidi Idapase

Oni rengbe arengba a ka duna ndikidi idapase, nga gu ngbatunga idapase Pauro aringbisipaha rogo gako waraga fu agu aKristano nangia aEbere. Ko afura tipa ngbatunga gu idapase re ya si nga “ndikidi he, du aboro na maabangirise mbiko ho nga wisiga pa agu ahe i abi nga[ha] ni bangirise ya.” (AEbere 11:1, pigipigi kekeapai nga gaani.) Ni du oni na ngbatunga gu idapase re, oni aruga tironi nzunzu na gupai nga agu apai dunduko oni amaa bangironi tipaha, kodihe kuti ga Mbori mokido ka zingisa aboro be kpio, ada ada ni parengo. Oni aye ka ida gupai a nga ngbatunga gu maabangirise re naye mbiko gu ndikidi mokido Yekova namangihe, angianga mbiko gupai oni aida si mangi fu roni ya. Oni aruga tironi na gupai nga Yekova naakpanga ti manga agu apai kido ko he tipaha wa gu sa te. (Yosua 21:45; 23:14; Yesaya 55:10, 11; AEbere 6:18) Ga Mbori mokido tipa vovo zegino adu fu roni ni ndikidipai wa si kinaho wa du rago re. (2 Petero 3:13) Na oni abi gupai ziazia na gu bangironi nga ga idapase nga Yekova Mbori, Yesu Kristo, na ga Mbori Kindo nga ndikidi apai, angianga ziree ya.

Anga i mbu roni nisaroni oni wiriki wai ka duna idapase te. Ku pati gupai nga ko sa Fugo ko si duho fu aboro dunduko, Yekova ima fu agu adungurati nga ga aKristano rogo zegino dunduko nga gu du gaha sunge nga ka undo agu aboro duna ruru ngbaduyo yo i wiriki wai ka duna idapase kuti Mbori. (Yoane 17:20; ARomo 10:14, 15) Oni di agu aundo dunduko kugume Yekova afuhe rogo gu riigbu re. (Amokedi 8:30, 31) Na wa duhe nga idapase nga zuzu ga Mbori toro, oni kparikpee zanga piriga tipa gu toro re si undo roni oni duna ndikidi idapase.—AGaratio 5:22.

Ka rago gberenga tironi mbiko agu aboro nati kango na aguyo dunduko duna idapase kuti Mbori na kuti Fugo ko na kini sawia yo ya. (1 AKorindo 1:18-21; 2 Petero 3:3, 4) Nirengo, ndikidi idapase nga nyanyakipa he tipa ka nyakasa roni rogo gaoni vura kuti gu zubohe nga ga agu aboro re. (AEfeso 6:16) Sarah Jayne abi gupai re ni parengo, si du ri anangarasa agu aboro tini dunduko nanandu ka bi ri bambungua yo i nyakasi gayo idapase. Ri anagumba gupai dedede fuyo nga, “oni sa rengo ni gaoni, . . . oni wisigi Fugo Mbori. Ka oni guaringa kusayo pati ga Mbori riigbu ya. Oni kakuti kparakpee. Oni mangi ga Yekova sunge zaaza.”—Yakoba 2:17, 26.

Ho dee abi ga Sarah idapase ni kuti Mbori na kuti zingabekpio, nga gu dee ninaangera fuo aboro kaza bambungua yo, ri ayaa: “Mo na nyanyaki ida kuti gipai re nirengo, anga wo tee?” Ho i asana ri ni tipa ndu gupai nasa ri ri duna ngbatunga gu maabangirise re apai ki vura nifudi ri vurũ, ri ayaa: “Si wo mbiko mi na idapase kuti Yekova. Ko nga bawene bakureami, na nyemu ko ti re gbe.”

[Footnotes]

[Caption on page 6]

Timoteo atona ka wirika “Ziazia Kekeapai” be nako na be titako ho ko “adu ni ni gude”

[Caption on page 6]

I adihe rogo “Mbaro-Yugo Kpia Kusaahe,” nga ga 1914

[Caption on page 6]

I atambua aboro Beroya mbiko i anawisigo Ziazia Kekeapai na auru dunduko

[Gu kpiahe du ti kpewaraga 7]

Gupai nasa boro ni duna idapase kuti Ziazia Kekeapai nga giaha na kini irisi sangbaha, angianga kina du nani bese gbua ya

[Gu kpiahe du ti kpewaraga 7]

“Mi abi roni wa du oni dunduko rogo ga Mbori vovo zegino”