‘Mi Akpara Nigbangaha Waĩ Tipa Undahe?’

Dee nga Jayne ayaa: “Gupai mi aidaha gbua nga ima-kpotose go kusayo tire!” Ri aduna gu kaza tiri nga kenisa si kini mere tii kpotoriyo dunduko. Wa ka gari aborokporo gbiati anakureari adu na gene beyo, ka i aima dia gu kaza re kusayo tiri. I akpari fu Mbori tipa ko undo ri. Ya mo ko adegetuko kuti gayó kpee naki mangipai tipaha?

MBORI ima rugatiko naapa agu apai namanga aboro mbiko Fugoko nga Ziazia Kekeapai nayaa: “Ũzegino dũ mongo niukaga omehe nimbu be ima kina ku awere.” (ARomo 8:22) Mbori ima inopai tipa gu badungu aboro duwa Jayne naima rogo aʹuru dunduko ti kpotoyo, ngbaduyó yo, na rogo gayó berã. Mbori nabi agu aboro abi du bangeyo nga amirioni 800 nara na gomoro, gu badunguyo gayó aborokporo ataka yó kporo yo, na gu badungu avunguagude nabakabangiriyo tipa agu apai du tipa awiriyo kumbatayo. Ya mo oni asananga tironi ka ino singia Mbori aguari rogo kura uru sa ka mangapai sa agi apai re? Ka si du nga ani na nyemu ka undo gaani aboro, ya mo Mbori, nga gu boro nakusi aboro, ko na nyemu ka undo yó tee?

Anga kina roni sa nasana ngbatunga agu asanahe re te. Bakuru kusayo mbata fu agarã wa 2,600, kumba nangia Abakuku aduna sanahe ngbako wakinagu du ngba aboro areme re. Ko asana Mbori ki yaa: ‘Ako Yekova, mi akpara nigbangaha waĩ tipa undahe, ka mo agianga ha ya? Watadu kpara foro mbikopa zuũ; ka mo abatasanga re ya? Tipagine mangi mo re ti ni mi naabi irairapai kini ngere kurii fudifudiapai? Gbarasahe du barabangire na zuũ; akpata nakura na akangu.’ (Abakuka 1:2, 3) Gu nebi nangia Abakuku re abi dungu kereapai aboro nimangihe ti ragoko. Ngbatunga agu apai re namanga areme na aʹuru dunduko na si nafu kina gberarago fu agu aboro duna nunga.

Ya mo Mbori abisirapa gupai abisira Abakuku agumbaha re? Oó. Ko aima degatuko kuti gu wene asanahe Abakuku asanaha re na ko ki fu wasa fuko na ki ngarasiko. Yekova Mbori anyakasi ga Abakuku idapase na gu kidohe nga, Ko nika digiso arungo adigiso. Agu afugo Mbori nafu maabangirise re, si rengbe arengba ka fu wasa furoni a wa si afuhe fu Jayne na gari aborokporo. Gu papara kekepai naye fuo gere nika karagapai sa agu asanahe naye re: Wai rengbe ani ka rugatirani na gupai nga, Mbori nangera angera fuo rani nirengo? Ginipai Mbori nika mangaha ka digiso arungo, na gini regbo du ko ka mangaha ti ni?