Gu Banguapai Nazaka Gene Kurogo gu Zegino nga ga Ngbarago

‘GU BANGISA boro sa nadu na ome kisusi, angianga kina rogo agi agarã kutu ue susi re ya, ono rogo gu kuru pangbanga dunduko nga ga aboro, ningia Yesu boro Nazareta,’ wogu gu waraga pangbanga nga Time agumbaha. Ho Yesu aduni auru kpotosende, gu dungu kutu aboro nadu na wene ngbaduyo yo ainanga kina kio pako sa te, ono i aini gupai a nga ko anaberã aberã tipa aboro. Sidu tie, si airiwonga tirani ka bi gupai nga i aida ka maa ko ni bakindo te. (Yoane 6:10, 14, 15) Wa si avura du wo, Yesu aka ka rimiso tiko kurogo agu apai nga ga birĩ zogarago.

MBURU ga Yesu mangapai wa gere adu rii apai kandara biata: ga Bako bipai tipa gupai aboro asiaha nitiyo tipa ka mangaha, nga gu nakodapa gu zogarago nga ga aboro; gupai kina boro Yesu nitiko arugu tiko na paha nga, aboro gu duho duna bakere ome tiyo ka i abinga yo nibangirise ya nasogote gu zogarago nga ga aboro zavura gu aboro a’asada tiyo ka saha ni wenehe vurũ; na ga Mbori ringbisapai ka sigira gu zogarago nga ga ngbangbaturũ si zogorago auru kpotosende dunduko. Wa ani kaa wisigo gi bangiri apai du biata re wenengai, ani nika bi ndu gupai ga aboro asadatise ka sa zegino ni bawene ba aboro niraki rogoho ati tini kuime. Ani nika bi wai a diabese nika du rogo manga gipai re.

Ya Mo Aboro Rengbe ka Zogatiyo Nisayo?

Ho Mbori akusi aboro ni, ko a’asia pazoga anyaa fuyo. (Bambata Pai 1:26) Ono pa zoga ngbatunga aboro adu tigaha tii ga Mbori bakere pagbia. Si aidi bambata kumba na bambata dee yugu gupai nga i nara fu Mbori ni giasangba ko ki he ri zuzu kparakpara ngua sa, nangia “ngua ina wenepai na gbegberẽpai.” (Bambata Pai 2:17) Ni gupai nafu gberarago, Adamu na Eva agbarasipa gayo ranirii ka siapai, ki basa fugo Mbori. Pa ri yo gu zuzu ngua Mbori azahe tipaha angianga kina kungbo dii gbua te. Si akoditihe na pa samungu kuti Mbori na gako bakere pagbia. Gu rukutu kekepai nasakarogo Bambata Pai 2:17 du tiihe kusende, rogo gu sasa fugo Ziazia Kekeapai nga The New Jerusalem Bible nayaa, Adamu na Eva aida “ka duna ranirii rogo apai dũ kini diberã tipa apai dunduko, gu du niwenehe na gu duni gbegberehe, nga gu berã nasa boro ka ni binga ti ni berewe ni gu boro i akusi ni akusa ya . . . Bambata ingapai angia sovura kuti Mbori na gako bakere pagbia.”

Mbiko gu nyanyakipa sakaapai tipa ga Mbori ruru mangaapai gu samungu re akusihe, Mbori ambu Adamu na Eva kodihe na atitayo i sia gu gayo gene raka i aidaha, fuo gure i ki sigira gayo andiko tipa gupai du niruruhe na gu duni irairaha. (Atambuahe 147:19, 20; ARomo 2:14) Si ki ta du were, aboro kini tona asadapa kaa sia agu apai nitiyo i aida ka mangaha. Ya mo i aduna diabese rogo gi gayo mangaapai re? Gu dungu kutu agarã susi kusayo ima undo rani ani rugu tirani na gipai re, gaani karagapai sani nga oó! Batungusipai 8:9 nayaa: “Boro nidu . . . ni gbia ku ri kura ni ka imisa ni.” Gi keke pangbanga nga ga ga aboro zogarago nga gu naba kina gberarago ti aboro re nanyakasapa du gupai nirengo du rogo Yeremaya 10:23: “Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te.” Kuru pangbanga nga ga aboro ima yugo gupai nga aboro na tandu beyo ka zoga tiyo wenengai zanga Bakusiyo te.

Yesu aidi na gipai re wenengai. Gupai nga boro ra ni rini zanga Mbori, ko asogoho kpakpaara. Ko ayaa: “Mi amanga nga pai ni tire . . . wa sa te, . . . mi namanga kina agu apai ngba ti [Mbori] waragoagira.” (Yoane 4:34; 8:28, 29) Sidu ni zanga Yesu duna asiahe be Mbori ka dia zogarago be aboro kubeko, ko aberãnga kandara pa diaha te. Ono tie, gere ayugonga gupai nga ko adu dindikodindiko tipa ka undo akurako aboro te. Kuba gure, ko amangi agu apai dunduko nadu kuvuru beko ka undo aboro i gbia bakere ngbarago kisusi ti gu regbo re na kumbatayo. Zavura unga ko, ko afuhe a tipa ka batasa ngbatunga aboro. (Matayo 5:3-11; 7:24-27; Yoane 3:16) Ono Yesu aima ino gupai nga “ahe na regboho ti ni dunduko,” kodihe kuti ga Mbori regbo ka sigira gako bakere pagbia kurii ngbatunga aboro. (Batungusipai 3:1; Matayo 24:14, 21, 22, 36-39) Oni tingidi gupai nga Edene yo, bambata avungurani amangi gupai gbegbere sino toro aidaha nga guko nafura rogo woo. Gere nayugo gu kura ndupai fu rani Yesu arimisanga tiko tini kurogo birĩ zogarago ya.

Gu Bazogo Zegino Duni Okooko Ko

Ziazia Kekeapai nagumba gupai fu rani tipa Satana ya ko asana Yesu ko ti sande ki irisi ko bara sa fuo gure ko ki fu “angbi fu ko zegino dunduko, na gaha taarimo.” (Matayo 4:8-10) Gupai namangi nzunzu nga, Bakitingbanga aidi ka fu gu zogarago nga ga zegino fu Yesu, ono kinaho ka Yesu mangi gupai ni ko aidaha. Yesu azionga ti gi gbina nga ga asada re te. Ono tie, ya mo asada nzunzu nangiaha? Ya mo Satana arengbe nirengo ka pe pa fu babakerehe wa gure? Ii, mbiko Yesu nitiko ayambu Bakitingbanga ya ko nga ‘bazogo zegino,’ na gu mokedi nangia Pauro aringbisi pako ni “mbori gi zegino re.”—Yoane 14:30; 2 AKorindo 4:4; AEfeso 6:12.

Rengo ngaha, Yesu aima ino gupai nga Bakitingbanga aidanga wene apai naamanga fu aboro te. Ko naringbisapa Satana ni “baimiaboro” na ni “bavungu azire na ni bavungu agu apai dunduko angianga rengo ya.” (Yoane 8:44, The Amplified Bible) Si ziazia tie nga, gu zegino “du ni zogozogo ho” be ngbatunga gbegbere sino toro wa guni re arengbanga ka du nirengo na ngbarago te. (1 Yoane 5:19) Ono Bakitingbanga anyenga anye na gi pagbia re beko kindi te. Yesu, du awere nga gu toro duna bakere ome tiko, nika ba Satana kusayo bambeda na ki wege fuo gako mangaapai nabaha kusayo.—AEbere 2:14; Yugoti 20:1-3.

Satana nitiko ima ino gupai nga gako auru zogarago ni bazogo gi zegino re nanyasa ni kina boro ipo. Sidu, ko na’asada tiko na ome ko dũ ni yangaraha ka manga aboro ka ba ruga yo adunga berewe tini ya, a wa ko amangihe mbata fu gu Ime Akangbii nadu ti rago Noa. (Bambata Pai 6:1-5; Yuda 6) Yugoti 12:12 nayaa: “Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.” Gu sangbanebi nga ga Ziazia Kekeapai kodihe kuti agu apai namanga rogo zegino nayugo gupai nga ani naraka ti gu regbo du mbembedii kuti digido gi “bete rago nye fu ko” re. (2 Timoteo 3:1-5) Aboro ima mbeda awere ka bata be gipai re.

Gu Zogarago Nika Ye na Ngbarago

Gu biata ndupai Yesu ahe rimiso tiko tini kurogo agu apai nga ga birĩ zogarago angia ko aima ino ya ti ringbisiringbisi regbo kumbatayo, Mbori nika sigira gu zogarago nga ga ngbangbaturũ si zogorago auru kpotosende. Ziazia Kekeapai nayamba gi zogarago re nga, ga Mbori Kindo, na si nangia gu banguapai Yesu anatungusa paha. (Ruka 4:43; Yugoti 11:15) Yesu ayugupai fu gako abawiriki i kparikpee tipa gu Kindo re ye, mbiko kina tii gu zogarago re sa aboro ka rengba ka manga ‘gupai Mbori akpinyemuhe auru kpotosende a wa duhe ngbangbaturũ yo.’ (Matayo 6:9, 10) Si rengbe ka mbu bangironi ya, ‘Kangia gi Kindo re nika zogarago auru kpotosende dunduko, ginipai nika manga fu gu zogarago nga ga aboro?’

Karagapai sa gu sanahe re gu du rogo Daniere 2:44 nga gu nayaa: “Rago agu abakindo re [nga aguyo nazogarago ti digido gi zegino re] Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re [aboro amangihe re] rukutu ki digisi he dunduko, si ki nye anye kindi.” (Pigipigi kekeapai nga gaani.) Tipagine ga Mbori Kindo nika ‘kuadi’ agu azogarago tini nga ga kpotosende? Mbiko si nye kuti songoda gupai Mbori aidanga nani ya, nga aboro naasia apai nitiyo tipa ka mangaha nga gu Satana aengehe ati Edene yo bakuru kusayo. Kurii sogote gupai ka fu undo fu ngbatunga aboro, agu aboro na’asada tiyo ka songoda gupai re sa tiyo ni avura Bakusi zegino. (Atambuahe 2:6-12; Yugoti 16:14, 16) Sidu si naida ani sana tirani ki ya, ‘Ani nasongoda ga Mbori zogarago watadu ani nasovura kuti ni?’

Gada Bakere Pagbia Oni ka Siaha?

Tipa ka undo aboro i mangi diaberã rii mburu ruru inohe tipa gu zogarago i aidaha, Yesu afu sunge fu gako abawiriki i tungusi “gi wene pangbanga nga ga ngbi re . . . rogo zegino dunduko [“ni dezirepai fu rikaaboro dunduko,” NW ]” mbata fu da digido gi zegino re. (Matayo 24:14) Ada ini yo yo areme rogo zegino dunduko tipa tungusapa ga Mbori Kindo? I nga aDezire Yekova. Nirengo, gu kekepai nga, “Natakapande ga Yekova Kindo” aima digo nikuru ti sisi gi magazini re bakuru kusayo. Areme, aDezire wa amirioni sita rogo aringara susi 230 naundo aboro i gbia ruru inohe tipa gu Kindo re.a

Amaku Tipa Avuru ga Mbori Kindo

Yesu anamanga apai dedede ngba gu gene Mbori anakpinyemuhe. Sidu, kuba gupai nga ko sia pa ranirii na ki asadi ka songoda kina agi apai du rogo gi zegino re watadu ka mbakadaha rogo gu gene nga ga birĩ zogarago, ko amangisunge nyanyakii ka gbaraga agu apai nga ga ga Mbori Kindo, ni gu yangara ziga du tipa gu fudifudiapai du rogo zegino. Mbiko padu ko niruru ko wa gure, i afu gu mbatabakindo nga ga taarimo fuko ngbangbaturũ yo ni gako mosoro ko duni kina boro gu Bakindo nga ga gu Kindo re. Nga gu iiriwopa mosoro i afuhe fuko re tipa ra ko ni goko fu Mbori!—Daniere 7:13, 14.

Gu dungu aboro nawirika Yesu areme rogo maa ga Mbori Kindo mbata rogo gayo raka na kini mangi gupai Mbori akpinyemuhe nagbia ngbarago a be iiriwo gamahe, gu gamahe re nga gu mamu du yo nani ni avuru ga Mbori Kindo nga ga kpotosende. (Matayo 6:33) Baraho i ka duni ni azogo tii gi zogarago re, i asa yo ni rengberengbe aboro i ki duna gu maabangirise nga ga nyenye unga. (Yugoti 21:3, 4) Kurii gure, 1 Yoane 2:17 nayaa: “Zegino napaya apaya [“nago ago kusayo,” NW ], na gaha nyemuhe: ono gu ni ka amanga gu pai Mbori akpi nyemu he ni [a]nye anye kindi.” Nga gu ngbarago nikangia ha ani nye herẽ kindi auru kpotosende i nasaha ni paradiso fuo dia yo Satana na apefuo ko kusayo, yo vura nga ga rikaaboro, biriki rogo sunge bagaahe, na kungbo pambori nika dunga ni berewe ya!—Atambuahe 37:29; 72:16.

Ii, ga Mbori Kindo nga gu ndikidi banguapai nazaka gene kurogo gu zegino nga ga ngbarago, na daha ada i fura tipa gu pangbanga natakapandehe ni wene pangbanga. Ka si du nga oni ata tonanga ka wirika Yesu rogo maa agu apai nga ga kindo mbata te, tipagine ka oni adeganga turoni tini kuti gi wene pangbanga re ho aDezire Yekova nika ye ni berewe nani ku kpuroni yo ya?

[Gu rukutu kekeapai du bandu kpewaraga yo]

[Gu kpiahe du ti kpewaraga 4]

Kuru pangbanga nayugo gupai nga aboro arengbanga ka zoga tiyo wenengai zanga Mbori te

[Gu kpiahe du ti kpewaraga 4]

Mbiko wa du Satana nga bazogo gi ‘zegino’ du awere re, sidu ko arengbe tini ka pe pa fu ‘agu akindo dunduko nga ga zegino’ fu Yesu

[Gu kpiahe du ti kpewaraga 6]

Yesu ayugu gupai nga, tii gu zogarago nga ga ga Mbori Kindo, zegino aduni wene rago