Ginipai Si Aida AKristano Mangihe Areme?

NDIKIDI aKristano arimisongo tiyo areme kurogo birĩ-zogarago te. Tipagine? Mbiko i napekafuo ga Yesu kpiapai. Ko afura tipa gako abawiriki ki yaa: “Aboro zegino nga yo te.” Na ki ya tipa tiko wee: “Wa kina re adu nga ni boro zegino ya.” (Yoane 15:19; 17:14) Ani wisigingo bete ndu agu apai si aidanga aKristano rimisi tiyo ti ni kurogo birĩ-zogarago ya.

1. Aboro arengbanga ka manga apai dunduko te. Ziazia Kekeapai nagumba gupai nga, ome ti aboro watadu rengba beyo tipa ka zoga tiyo te. Gu nebi nangia Yeremaya akepai ki yaa: “Anga si fu gu boro nata tipa ka ruga gani diandue te.”—Yeremaya 10:23.

A wa duhe nga i akusanga aboro tipa i gu ngbawege ngba gayo ome te, kinawo a duhe nga i akusanga aboro tipa i zogotiyo nisayo te. Bakeke kuru apangbanga sa nga David Fromkin afura tipa ndu gupai adunga gene ti ni be gu zogarago nga ga aboro ya ki yaa: “Gu zogarago du awere nga ga wiri aboro; sidu, kpakpa aboro nga yó na agu apai i aberãpa mangaha kumbatayo. I na kina bete ome beyo.” (The Question of Government) Anga iiriwopai ngaha te ka bi gupai Ziazia Kekeapai aya ti ni furani wee, ka ani kidongo kuti wiri aboro ya!—Atambuahe 146:3.

2. Gu ome nga ga gbegberẽ atoro namaapai kuriyo awere. Ho Satana afu gu zogarago nga ga zegino ni fu Yesu, Yesu atinga kango nga Satana na ome beko tipa ka fu agu akindo nga ga zegino dunduko fuko te. Nirengo, Yesu ayambu Satana kusa nga “kindo zegino.” Fuo bete agarã kusa, gu mokedi nangia Pauro afura tipa Satana ki ya ko nga “mbori gi zegino re.” (Yoane 14:30; 2 AKorindo 4:4) Pauro akepai fu akurako aKristano ki yaa: “Gaani kenahe . . . sa azogo zegino nga ga gi bitimo re sa rimbasa agu atoro nga ga gbegberẽpai yo rogo agu arago du ngbangbaturũ yo.” (AEfeso 6:12) Gbegberẽ atoro nga agu aboro nzunzu nazoga gi zegino re zanga aboro inihe. Wai rengbe gu rengopai re ka maapai kurii gu bipai du ani nani tipa birĩ-zogarago?

Ani berẽnga kurii gi kpiapai re: A wa gu ime nafu na bakere ome narengbe ka fu na tooni kurungba, kinawo a kere gbegberẽ atoro agbe gu zogarago nga ga aboro. A wa bagbe kurungba arengbanga ka rugusa gu ime re ti fu na kurungba ya, birĩ-zogarago arengbanga ka manga wiripai kandara tooni tipa ka manga ariapai ti gu maapai kurii du gbegberẽ atoro nani te. Agu atoro re namanga ome tipa ka gbarasa aboro naabayo dunduko na ki ye ‘na rungo fu kpotosende.’ (Yugoti 12:12) Sidu, ndikidi ariapai rengbe ka ye be kina gu boro du na bakere ome kisusi Satana na gako adaimona. Gu boro re nga Yekova Mbori.—Atambuahe 83:18; Yeremaya 10:7, 10.

3. Ndikidi aKristano nara niriyo fu kina ga Mbori Kindo sa. Yesu gbiati gako abawiriki aima ino gupai nga regbo adu kinaho Mbori nika sigira zogarago ngbangbaturũ yo tipa si zogorago ku auru kpotosende. Ziazia Kekeapai nayamba gu zogarago re nga ga Mbori Kindo na kini yugu gupai nga Mbori sia Yesu Kristo tipa ko du nigaha Bakindo. (Yugoti 11:15) Wa si adu nga gu Kindo re nika manga ariapai na aboro dunduko, Yesu amoi “gu wene pangbanga nga ga ga Mbori ngbi [kindo]” nibangua gupai ko aayugoho fu aboro. (Ruka 4:43) Ko ayugupai fu gako abawiriki nga i nikpari ki niyaa: “Ga ngbi [kindo] yé.” Tipagine? Mbiko tii gu Kindo re, gupai Mbori akpinyemuhe nika manga ngbangbaturũ yo, na auru kpotosende ane.—Matayo 6:9, 10.

Ono ginipai nika manga tipa gu zogarago nga ga aboro? Ziazia Kekeapai nagumba gupai nga agu azogarago nga ga ‘zegino dunduko,’ i nika gbarasaha agbarasa. (Yugoti 16:14; 19:19-21) Kangia boro idi kuti gupai nga ga Mbori Kindo nika gbarasa agu azogarago nga ga boro dunduko, si rengbe ka za ní ti songoda birĩ-zogarago. Nirengo, ka si du nga ní nasongoda gu zogarago nga ga aboro, gure nga ní nga vura Mbori.

Wa vura duhe nga ndikidi aKristano arimisongo tiyo kurogo birĩ-zogarago te, ya mo gure nayugo gupai nga i na nyemu ka undo aboro rogo gu dagbarago i araka rogoho te? Ani bingo gu karagapai fuyo ho rogo gu kekeapai naye fuo gere.

[Blurb on page 6]

ADezire Yekova nasongoda ga Mbori Kindo angianga birĩ-zogarago ya