Da Nika Kpara Rani Kusayo Ti Ga Mbori Nyemuse?
“Nyemuse ti rani, bambiko ko nyemurani adu ti ko mbata.”—1 YOANE 4:19.
1, 2. (a) Tipagine du pa ino ani gupai tini nga aboro nakpinyemu rani akpi ni nyanyakipa pai? (b) Gada nyemuse ani aidaha bakere gbe?
WAIGU nyakipa ino gupai bangironi nga kura aboro gu duho nakpinyemu roni? Tona ho du aboro ni ni fogo yo da ho i nasono ni, i nazugo mbiko nyemuse. Oni abinga fogo gude na ni nadungo ni beri ni nyemusee? Dedede, wa gu gude re angera ku bangiri na ni yo ri nimamu ti ngbari, ka kina gine vura kaa manga pati ni, ni nazereda kube na ni ki duna ngbarago mbiko na ni nakpinyme ni. Ya mo oni natingida wai oni adu ti gu kura aregbo oni angia paranga fudifudiapai kini ye sa roni? (1 ATesaroniko 2:7) Ti kura aregbo, si avura du nga oni ainanga guhe oni aidaha te watadu oni ainanga gupai nzunzu naamanga roni te, wa si avura du wo, si aduni nyanyakipa pai nga oni aima ino ya baroni na naroni aduna nyemu roni tiyo! Ya mo pa ino oni gupai nga oni arengbe arengba ka gumba agu apai nanafuda roni fuyo watadu ka sana yo tipa pai afunga undo fu roni tee? Nirengo, guhe ani aidaha rogo gaani raka nabaha nga aboro kpinyemu rani. Ngbatunga gu nyemuse re nanyakasa gupai fu rani nga nyakipa rani anyaka bangiri aboro.
2 Gu ndikidi nyemuse avunguagude ayugoho fu wiriyo nasa ni ni sono wenengai. Sidu, padu ani na gu kido nga gu Barani nga ga ngbangbaturũ ko nga Yekova, nakpinyemu rani, ni nyanyakipa pai tipa undo rani ani du wenengai rogo toroyo na ka apai adunga ngbanduraniyo nafuda rani ya. Si rengbe ka du nga kura abagedi gi magazini re adunga na avunguyo nangere fuo yo nirengo te. Kangia wo si adu tipa roni, oni nyakasi tironi. Ka si vura du nga avunguroni akpinga nyemu roni te watadu i akpinga nyemu roni kuho ka i nimangihe kuho ni te, oni duna gu kido nga ga Mbori nyemuse nika dia baha.
3. Waigu Yekova nanyakasipa gako nyemuse fu gako aboro?
3 Rogo gako nebi nangia Yesaya, Yekova agumba gupai nga ‘bangiri nagude rengbe arengba ka go’ ti gu wirini du ti ngbamai, ono ka bangiri ko gonga tigako ti gako aboro te. (Yesaya 49:15) Teketeke a, Davide aduna kido ki ya: ‘Ka buba mbu re na nina, Yekova adia re adia.’ (Atambuahe 27:10) Nangbaa gu mokido re! Ka kina ginipai vura du tipa roni, kangia oni aima ye ki kpara gaoni raka fu Yekova Mbori na ki zi pagume na ko, gupai si aida oni naatingidaha dedede nga gu nyemuse du ko nani tipa roni kii kisusi gu du aboro nani tipa roni!
Oni Nye Rogo ga Mbori Nyemuse
4. Waigu i akido agu aKristano nadu rogo bambata kama agarã tipa ga Mbori nyemuse?
4 Gini regbo oni aini pa ga Yekova nyemuse tini ni bambataha? Si nawiraha nga, gupai namangi tipa roni awiri gu namangi tipa agu aKristano nadu rogo bambata kama agarã. Rogo gu ga Pauro waraga ko akehe fu aRomo, kapita 5 naringbisapa wai wenengai aboro ingapai ainidi tiyo na pa ga Yekova nyemuse, nga aguyo nadu mbata tururũ ti Mbori. Ani nageda gupai rogo veresi 5 nga: “Ga Mbori nyemuse i niuka ku kpotorani yo be gu Ziazia Toro fu ko [ho] fu rani.” Pauro nagbia kurapai kuti ni rogo veresi 8: “Mbori amoi dezire gako nyemuse fu rani nikpi Kristo tipa rani . . . [ho] ani adu[ni kindi] ni aboro ingaapai.”
5. Waigu oni aye ka inopa bakio ga Mbori nyemuse na ka duna tambuahe tipaha?
5 Rogo gu gene du wa kina gure, ho i ayugu gu rengo ni du rogo Fugo Mbori fu roni na oni ki tona ka duna idapase, ga Yekova toro atona ka mangasunge ngbaduroniyo. Rogo gi gene re oni atona ka inopa bakio gupai Yekova amangihe ni keda ko gu Wiri ko ko akpinyemu ko gbe ko kpi tipa roni na oni ki tona ka duna tambuahe tipaha. Rogo gi gene re Yekova aundo roni oni rugutironi na pa wai nzunzu ko akpinyemu ngbatunga aboro. Ya mo pai azionga roni ngbaduroniyo ho oni aini gupai ni nga, wa i avura batika roni ni boro ingapai oni ki du tururũ ti Yekova, ko aima zaka gene fu aboro tipa i dipai kusayo riyo ki sa yo niruru yo i duna maabangirise tipa gu unga adunga digidoho tini ya tee? Ya mo nyemu Yekova azionga roni tee?—ARomo 5:10.
6. Tipagine rengbe ani ka bi gupai tini ti kura aregbo wa turu ani aturo ti Yekova?
6 Fuo gu nyemuse nga ga gu Baroni nga ga ngbangbaturũ ko ye na oni koyo du ko ni na fuo aria oni gaoni raka tipa ko idi na oni, oni akpara gaoni raka fuko. Awere tie, oni na ngbarago mbiko gu pazereda du dagba roni na Mbori. Ono wa vura duhe wo, oni nabi tironi ti kura aregbo wa turu oni aturo ti Yekova? Gupai re rengbe arengba ka manga rani dunduko. Ono oni tingidi gupai dedede nga Mbori a’arianga gako ringbisapai te. Gako nyemuse tipa rani kina ku baha a wa du uru, nga gu naambunga keda uruuru anzerehe na imaha ku auru kpotosende ya. (Maraki 3:6; Yakoba 1:17) Ono tipa rani tigaani, ani rengbe ka aria sino rani, kandara tipa bete regbo. Wa kpotosende ake kirikiri, bebere bakio kpakpuhe nasungo rogo bitimo. Teketeke a, ka ani sa tirani kusayo ti Mbori zavura tipa kina bete regbo gbua, ani bi gupai abi nga gaani pagume na ko mbedi ka gbera. Ginipai rengbe ani ka mangaha tipa ka mbakada gupai re?
7. Waigu rengbe wisigotise ka undo rani ani nye rogo ga Mbori nyemuse?
7 Ka ani bi gupai nga ani tuturũ na ga Mbori nyemuse angianga wa gu si adu mbata ya, si naida ani sana tirani ki ya: ‘Mi nabipa ga Mbori nyemuse gbua taata? Tona mi atona kaa sa giire tooni tooni ti gu unga Mbori nga ga nyemuse ko, kini yugu gupai rogo dungu agene nga gimi idapase nazera? Moi mi berã re amaa kina kuti “agu apai nga ga borose,” kuba maa mi he kuti agu apai “nga ga Toro”?’ (ARomo 8:5-8; AEbere 3:12) Kangia ani ima turuso tirani ti Yekova, ani rengbe ka tona kaa mbakada agu apai gbere tipa ka karaga tirani berewe kurogo wene pagume na ko. Yakoba nangarasa rani niyaa: “Oni mbédi na Mbori, ko ki mbedi na oni.” (Yakoba 4:8) Oni degeturoni kuti afugo Yuda nga gu nayaa: “Oni, abadiangba, oni ta sonosa tironi rogo gaoni ziazia idapase, nikpari rogo Ziazia Toro yo, oni bánda tironi rogo ga Mbori nyemuse yo.”—Yuda 20, 21.
Agu Apai Ariatihe Tipa Boro Agbisanga ga Mbori Nyemuse Rogo Baha Te
8. Gini a’ariapai rogo gaani raka rengbe ka manga ni tunguotunguoho?
8 Dungu apai rengbe ka aria gaani raka rogo gi zegino re. Bakindo Soromo abi gupai nga “rago gbia kuti mamu namanga [rani] dũ.” (Batungusipai 9:11) Pai rengbe ka manga ni tunguotunguoho ki aria gaani raka nabaha. Pai rengbe ka manga nga, rogo uru sa kpoto rani wenengai, fuo girarago kere kaza rengbe ka zio rani. Gu gaani sunge marã ani amangaha rengbe ka wira gu sunge ka i ambunga rani tini ya, fuo girarago ani ki bi gupai nga ani ngbasunge te. Badiangba rani rengbe ka kpi ni tunguotunguoho. AKristano rengbe ka duna ngbarago tipa bete regbo be gu pazereda namanga rogo kura ringara, fuo gure aboro rengbe ka tunguo yo na zuũ nga ga rungosi. Isoke si rengbe ka du nga i kitingbaanga rani niwia, sidu mbiko gipai re i ki irasi ngbanga fu rani. Ii, anga raka nisigira sigiraha wenengai watadu ni guhe duni bandabandaha wenengai te.—Yakoba 4:13-15.
9. Tipagine ngbaha tini ani wisigi papara gu waraga i akehe fu ARomo kapita 8?
9 Ho gbegbere apai amanga rani ni, ani rengbe ka tona ka berã gupai nga Mbori ima gindigo rani na kini berẽ gupai a nga gako nyemuse tipa rani ima zera. Wa duhe nga ani dunduko rengbe ngbatunga gu kereapai re arengba ka manga rani, i nangarasa rani ani wisigi agu afugo wasa wenengai Pauro agumba duni kekehe rogo ARomo kapita 8. Ko agumba agu afugo re fu agu aKristano nadu ni mbedimbediyo ni toro. Ono si a tipa rani nga kura avusende, nga aguyo i nadipai kusayo riyo ki sa yo niruru abakurea Mbori, a wa Abarayama adu mbata fu regbo aKristano.—ARomo 4:20-22; Yakoba 2:21-23.
10, 11. (a) Gini akitangbaanga ga Mbori aboro avura yo naamangaha ti kura aregbo? (b) Tipagine agu akitangbaangase re afudanga aKristano tini nirengo ya?
10 Oni gedi ARomo 8:31-34. Pauro nasanahe niyaa: “Ka Mbori du fu rani, da ka du kuti rani?” Rengo ngaha, Satana na gako gbegbere zegino nasovura kuti rani. Avura rani rengbe ka kitangbaanga rani niwia, zavura rogo abambu pe ngbanga a nga ga ringara. I akitingbaanga kura avunguagude nga aKristano ya i nasoga awiriyo mbiko i aidanga pa gu sunge amonganga nga gu nakuo gu ga Mbori ndiko du tipa ne kure te watadu i ambunga awiriyo i rimisi tiyo kurogo agu apumbo nga ga apagano te. (Amokedi 15:28, 29; 2 AKorindo 6:14-16) I akitingbaanga kura ruru aKristano ya i nataburo kuti irangbii mbiko i aka ti imo akurayo aboro rogo vura watadu i aidanga ka rimiso tiyo kurogo agu apai nga ga birĩ zogarago te. (Yoane 17:16) Gu kura asogo aDezire Yekova agbandaka azire tipa yo rogo aũgbandaka pangbanga, kini kitingbaanga yo ya i nga aboro gu pambori du gayo mangaapai nikerehe.
11 Ono ka bangironi gonga ti gupai nga rogo agu auru nangia ga amokedi, aboro aya tipa yo wee: “Gi rika pai re, ani ini ya i nagumba pai kuti ni rogo zegino dũ.” (Amokedi 28:22) Pai ho ti gu zire kitangbaanga rani aboro amangaha re? Mbori du nadiapai kusayo rii ndikidi aKristano ki sa yo niruru yo mbiko gu gayo idapase moi yo mburuhe rii ga Kristo motumo. Tipagine ka Yekova mbu kpinyemu airisi ko tini fuo ko fu gu gamahe fuyo kiipaha kisusi, nga kina boro gu Wiri ko ko akpinyemu ko gbe? (1 Yoane 4:10) Awere tie fuo zingisa yo Kristo bekpio na ki moi ko ku kumbabe Mbori yo, ko nazungadihe tipa aKristano kakaka. Da duna rengo beni ka tikango ga Kristo sunge azaro tipa apefuo ko watadu rengbe ka bisirapa ga Mbori wene sarangbanga ku bara gako ruru amoyambu yo? Boro ho te!—Yesaya 50:8, 9; AEbere 4:15, 16.
12, 13. (a) Gini sino apai watadu mangimangi apai arengbanga ka kpara rani kusayo ti ga Mbori nyemuse ya? (b) Ginipai Bakitingbanga aida ka mangaha ni ye ko na fudifudiapai kurii rani? (d) Tipagine du aKristano tini na diabese dunduko rogo apai?
12 Oni gedi ARomo 8:35-37. Kparakusayo ti kina rani wa du ani nibasasa, kura boro ho watadu kura he rengbe ka kpara rani kusayo ti ga Yekova nyemuse na ti ga Wiri ko, nga Kristo Yesu? Satana rengbe ka mangasunge na gako aboro nga ga kpotosende yo ka ye na dungu fudifudiapai fu aKristano. Vuru gu kama agarã susi, i arungosi dungu agu awirinarani nga aKristano rogo dungu aringara. Rogo kura aringara areme, awirinarani nambu na auru dunduko be gu fudifudiapai nga ga zingo mosoro. Gu kurayo nambu be gomoro watadu be zingo arokoo. Ginipai Bakitingbanga aida ka mangaha ni ye ko na gi kereapai re kurii aboro? Papara gupai ko aida ka mangaha kandara tooni nga, ka zeresa kpoto aboro yo ti ndikidi irisombori nga gu i amangaha fu Yekova. Satana naida ka sa rani ani idi gupai nga ga Mbori nyemuse tipa rani ima zera. Ono tie, ya mo wo duhe?
13 Wa kina Pauro nga guko nadi sangba Atambuahe 44:22 ki gumbaha, ani ima wisigo gu Fugo Mbori duni kekehe. Gupai ini ani he nga agi apai namanga rani nga gako “avusende” re, si mbiko rimo Mbori. Pa ziasi rimo Mbori na pa dia gbarasarimo kusayo ti gako bakere pagbia nikodikodihe kuti gipai re. Mbiko gi nyanyakipa sakapai re si du Mbori ambugene tini fu fudifudiapai, anga gindigo ko rani agindigo te. Ka apai vura gbera kubara rani yo wa kina gine, i nakido rani na gupai nga ga Mbori nyemuse tipa gako aboro, kodi rani nibasasa azeranga te. Ka pai vura wira wa si dibe rani, si asa rani ani duna diabese ka ani kakuti gaani ruru mangapai. Pa kido Mbori rani tipa gako nyemuse ka zeranga ya nanyakasa rani na kini songodi rani.
14. Tipagine Pauro aidi tini kuti ga Mbori nyemuse agberango ki vura nimangi aKristano vurũ?
14 Oni gedi ARomo 8:38, 39. Gine nasa Pauro ko idi kuti gupai nga he ho rengbe ka kpara aKristano kusayo ti ga Mbori nyemuse te? Zanga kapa, kina boro gupai namangi Pauro ti regbo gako sunge tungusapai nanyakasi ko kuti gu gako kido nga, agu agberango namanga rani, si azeresanga ga Mbori nyemuse tipa rani te. (2 AKorindo 11:23-27; AFiripoio 4:13) Kurii gure, Pauro aima ruga tiko na pa ga Yekova nyenye ringbisapai na agu apai ko amangihe tipa Gako aboro bakuru kusayo. Ya mo kpio nitihe rengbe ka gbarasapa ga Mbori nyemuse tipa agu aboro namangisunge fuko niruruhe? Wa gu sa te! Ho ngbatunga gu ruru aboro re akpiko ni, Mbori natingida payo atingida kindi rogo gako berã duni rengberengbehe, sidu ko azingisa yo azingisa ti gako regbo.—Ruka 20:37, 38; 1 AKorindo 15:22-26.
15, 16. Oni tangaranga bete agu apai ka rengbanga ka sa Mbori ko mbu kpinyemu gako ruru amoyambu tini ya.
15 Ka gu gaani raka du areme vura ye na kina gini gberango fu rani, singia gu tunguotunguopai nasa boro ni gbari, gu kaza nandu na boro sa kpio, watadu kere zingo mosoro, pai ho rengbe ka gbarasapa ga Mbori nyemuse tipa gako aboro te. Zavura agu amaraika kii ome yo gbe, wa gu maraika nabasasangbaa ki sa tiko ni Satana, arengbanga ka rugusa Yekova ti yugo ko gako nyemuse fu gako amoyambu kpara tiyo fuko te. (Eyobo 2:3) Agu azogarago nga ga aboro rengbe ka zahe ti gu sunge nga ga ga Mbori amoyambu, ka kiso yo ku bambukiso yo, ka rungosi yo na ka ya tipa yo ‘i ni agu aboro azogarago aidanga na yo ya.’ (1 AKorindo 4:13) Ngbatunga gu soga rani be rikaaboro adunga nduhe tini re ya rengbe ka sa aboro i naarungosi rani, ono si asanga gu Bakere Bakindo nga ga zegino dunduko ko gindigo rani te.
16 Wa du ani ni aKristano, si aidanga ani gunde be agu apai Pauro ayambuhe nga “agu apai du awere,” nga agu apai namanga, gu sino apai du rogo zegino, watadu ‘agu apai nika ye’ gizo kumbatayo ya si rengbe ka gbarasapa ga Mbori nyemuse tipa gako aboro te. Wa aboro zegino na gbegbere amaraika avura nisovura kuti rani nyanyakii, ga Mbori nyemuse kina giirani ka songoda rani. Ka “ari yo, na dudungura rago” kandasinga ga Mbori nyemuse tipa rani te, a wa Pauro anyakasihe. Ii, agu apai dunduko nakpinyemu ka rungburasi rani, watadu agu apai dunduko naida ka maapai kurii rani ni bakerehe, arengbanga ka kpara rani kusayo ti ga Mbori nyemuse te; na anga boro ho a i akusi ni akusa rengbe ka gbarasapa gu pagume du dagba Bakusiahe na gako ruru amoyambu te. Ga Mbori nyemuse arengbanga ka zera te; si nyeanye kindi.—1 AKorindo 13:8.
Oni Bi ga Mbori Weneringise nga ga Nyemuse Nyeanye Kindi Ni Guhe Duna Kikiipaha
17. (a) Tipagine duhe tini nga gbia ga Mbori nyemuse duni “wene he ki susi unga”? (b) Waigu ani ayugo gupai nga ani nabi ga Mbori weneringise nga ga nyemuse ni kikiipa he?
17 Waigu nyakipa ga Mbori nyemuse bangironi? Oni naberã wa gu Davide aberẽ nga guko nakepai ki ya: “Bambiko ga weneringise ni wene he ki susi unga, si du mi atáasa rimoro ni ngbare. Si du mi asámbua ro ti ni wa du mi ni ungare; mi atúmba abere ku ari ti rimoro”? (Atambuahe 63:3, 4) Nirengo, ya mo he ho rogo gi zegino re nga gu rengbe ga boro raka ka fuhe ngbaa kisusi pa gbia ni ngbarago be ga Mbori nyemuse na be gu ruru pabakure du dagba ni na ko? Ni kpiapai, ya mo ora boro fuo gu sunge zegino nika ye na kumuko funi ngbaa kisusi gu zereda nga ga berã na gu ngbarago naye mbiko gu dawedawe pagume du dagba ni na Mbori? (Ruka 12:15) Bete aKristano agbia tiyo ti sia pai sa dagba gu du ue nga gindigo yo Yekova kini raki kindi watadu ka sia padu na ko ki kpiki. Gure amangi tipa dungu aDezire Yekova rogo agu abataya nangia ga Nazi tipa zizi aboro ti regbo Ue Vura nga ga Zegino. Kparakusayo ti kina wiri bete bange aguyo gbua, dungu awirinarani asia gupai nga ka nye rogo ga Mbori nyemuse, ki duna nyemu ka kpi ka si rengbe wo. Agu aboro nanye niruru yo rogo ga Mbori nyemuse rengbe ka duna gu kido nga ga gbia nyenye unga kumbatayo beko, nga guhe zegino arengbanga ka fuhe fu rani ya. (Marako 8:34-36) Ono ga Mbori nyemuse nakoda kura apai susi gu gbua nga ka fu nyenye unga.
18. Tipagine du nyenye unga tini na bakere nyemuhe wa gure?
18 Wa vura duhe ni gasigasipai ka raka nyeanye kindi zanga Yekova, oni asadi ka berẽnga pa wai ka raka du ka boro raki ni gbangaha gbe zanga undo be Bakusirani. Si aduni kungbopai, zanga ndikidi ringbisapai du tipaha. Yekova ima fu wene sunge fu gako aboro i mangihe rogo gi yangara arame re. Sidu, ani rengbe ka duna gu kido nga, ho Yekova nga Bakere Baringbisiapai nika digiso gako aringbisapai ni ki fu nyenye unga fu aboro, gu raka re ahi be wene iiriwo apai fu rani tipa wirikaha na ka mangaha. (Batungusipai 3:11) Ka ani vura wisigopai wa kina gine vurũ vuru gu dungu akutu agarã nikaa ye, regbo adunga ho ani ka ino “[ba]dungura nga ga gu ũkumuko nga ga Mbori tatamana na inahe” nabaha dunduko te.—ARomo 11:33.
Baroni na Nyemu Roni Tiko
19. Gini mokido Yesu Kristo anyakasi paha berewe fu gako abawiriki?
19 Rogo gu diwi nga Nisana ti rameru 14, rogo gu garã nangia 33 ti Gaani Regbo, ti regbo gako yangara riahe nga ga nyemu na gako ruru amokedi 11, Yesu agumba dungu apai fuyo ka ngarasa yo nibipa agu apai naapidoyo kumbatayo. I dunduko namongo zi tiyo kuti Yesu rogo gako a’asada, na kina boro yo nitiyo ainipa gako nyemuse tipa yo. (Ruka 22:28, 30; Yoane 1:16; 13:1) Fuo gure Yesu ki kido yo ki ya: “Buba nakpi nyemu roni akpi ni tiko.” (Yoane 16:27) Nairiwo wai agu afugo re avura undo agu abawiriki re i inipa gu nunga yo nadu ti gu Bayo nga ga ngbangbaturũ ko!
20. Ginipai oni nadiberã ka mangaha, na gine rengbe oni ka duna kido tipaha?
20 Dungu agu aboro du awere ni unga yo ima mangasunge fu Yekova tipa dungu bawe agarã. Zanga kapa, mbata fu gi gbegbere zegino re digi, ani nika gbia tirani agbia ti kura dungu a’asada. Ka oni mbunga ngbatunga agu a’asada re watadu gu fudifudiapai re si rimisi akapa ku berã roni yo tipa ga Mbori ndikidi nyemuse tipa roni ya. Anga si ni gupai si aida i nyakasihe anyakasa te: nga Yekova na nyemu roni tiko. (Yakoba 5:11) Wa du ani nibasasa, ani mangi gupai si aida ani mangihe, kini irisi ga Mbori arugute niruru mangapai. (Yoane 15:8-10) Ani manginga sunge na agu amamu dunduko ka du berani tipa ka taasarimo ko. Si naida ani nyakasi tirani kuti gaani diaberã ka mbeda na Yekova rogo kparakpee na kini wisigi Fugo ko. Ka kina ginipai vura manga rogo gu uru du gba, ka ani amanga agu apai dunduko du ku vuru berani na ome rani dũ ka fu ngbarago fu Yekova, ani anye rogo pazereda, ki duna gu kido nga gako nyemuse tipa rani azeranga te.—2 Petero 3:14.
Gaoni Karagapai Nga Gine?
• Tipa ani banda tirani wenengai rogo toroyo na ka banda agu apai du ngbaduraniyo, gada nyemuse ani aidaha gbe?
• Gini apai arengbanga ka sa Yekova ko mbu kpinyemu gako amoyambu ya?
• Tipagine duhe tini nga du boro na ga Yekova nyemuse ngbaa “ki susi unga”?
[Gu kpiahe du ti kpewaraga 8]
Ka ani bi gupai nga ani tuturũ na ga Mbori nyemuse, ani rengbe arengba ka mbakada apai kubaha
[Gu kpiahe du ti kpewaraga 9]
Pauro aima ruga tiko na ndu gupai i aarungosi ko tini