Gu Rugute Du Wa Dahabu, Aboro Rengbe Arengba ka Mangasunge Nani
Wa dungu aboro avura nibi Gu Rugute Du Wa Dahabu ni ga Yesu yugopai tipa sino, ono tie ko nitiko ayaa: “Gi yugopai [re] nga gimi te, ono si nga ga gu ko nakedi re.”—Yoane 7:16.
II, RENGO du nga gupai ko agumbaha re, baenge gupai Yesu ayuguhe kodihe kuti gu i ainihe kusa ni Gu Rugute Du Wa Dahabu, nga gu boro nakedi Yesu, nga Bakusiahe, nga Yekova Mbori.
Gupai Mbori aidihe ti tonatona apai nga aboro dunduko mangi akurayo a wa i akpinyemu aboro mangi yo. Ko amoi wene kpiapai nga ga manga wenepai fu akurase rogo gu gene ko akusi aboro rogo: “Mbori ki fu boro ni kpiako, kpia Mbori Mbori afu ko ni; kumba na de ko afu yo.” (Bambata Pai 1:27) Gere nayugo gupai nga, rogo nyemuse, Mbori afu bete kina boro gako bangua asino fu aboro tipa i rengbe ka gbia ngbarago be raka rogo pazereda, na kini mangi apai kina kubani sa, na ki rengbe kaa mangaha wo nyeanye kindi. Gu sangbakpotoyo Mbori afuhe fuyo, wa ka i arabaha wenengai, ka si arengbe ka ruga yo i nimangi fu akurayo a wa i akpinyemu aboro mangi fuyo.
Gbangbati Adiba Wene Sino
Wa duhe tie nga aboro atona gayo raka nibawenehe wa gure, ginipai nzunzu namangi? Ka pehe na taata afugo, aboro atona kaa yugo gu gbegbere sino nga gbangbati. Dungu aboro ima ruga tiyo na pa gu pangbanga du rogo Ziazia Kekeapai tipa gupai bambata aboro ue ni arogotise amangihe, nga gu du nikekehe rogo Bambata Pai kapita 3. Satana, nga gu boro nasogote ga Mbori ruru andiko dunduko, angarasi Adamu na Eva, i mangipai ni gbangbati ni ka yo ga Mbori zogarago tipa ka ra ngba riyo na kaa dia aberã tipa apai nitiyo. Anga gi gayo mangaapai nga ga gbangbati na samungu re agbarasanga apai ni bakerehe kina kubara yo sa te, ono si aye a na kere asangbanaha kurii atitayo kumbatayo dunduko. Gure angia ziazia yugo gbegbere sangbana basapa gu yugopai aboro aye ka ino ho kusa ni Gu Rugute Du Wa Dahabu. Ni sangbana gupai re, “gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”—ARomo 5:12.
Ono tie, wa ngbatunga aboro avura sa giiyo ti gu wene agene nga ga Yekova Mbori, ko agindigonga yo te. Ni kpiapai, Yekova afu aNdiko fu gu rikaaboro nangia aYisaraere si yugu gene fuyo. Si ayugupai fuyo i mangi aboro a wa i akpinyemu aboro mangi fuyo. Agu aNdiko re afu arugute tipa wai si aidi i nimangi akanga, awirinyaure, na adekurugbo. Si ayugu gupai si aida i mangihe na agu aboro nazubo akurayo, agu aboro natuka akurayo kini sanahe tipa i tumo riyo, na agu aboro nadi ga akurayo ahe. Manga boro agu andiko nadu tipa pa banda borose, ayugu gupai nga ni aidanga ka fu kaza fu kura aboro te. Andiko adu kinaho a tipa pa kodaba. Yekova agurusi sangba agi aNdiko re kurogo agu afugo nga: ‘Oni kpínyemu akuaroni a wa oni akpinyemu tironi’ nga gu fugo Yesu agumbaha berewe kusa. (Pa Amotumo 19:18; Matayo 22:39, 40) Agu aNdiko re afura a tipa wai si aidi aYisaraere nimangi fu gu kungbo aboro naaraka dagba yo. Agu aNdiko re azinahe fuyo niyaa: “Ka oni rúngosi nga kungba boro ya, bambiko oni ini gu pai du ku ngbadu kungba boro yo dũ, bambiko wa oni adu ni kungba aboro Ezipeta yo.” Ka pehe rogo kura afugo, gupai i aidaha be aYisaraere nga i duna nunga agu aboro naadunga na gene beyo ya.—Gate 23:9; Pa Amotumo 19:34; Pa Fu Rugute ni Ue he 10:19.
Yekova anafu maku fu aYisaraere kindi a wa i adu niruru yo kini mangi gako aNdiko. Ho i aduni ti regbo gu zogarago nangia ga Davide na ga Soromo, gu rikaaboro re aduna maku gbiakuti ngbarago na ki rengbe be aũzegino. Ani nageda gupai rogo kuru pangbanga nga: “AYudo adu ni dungu yo na aYisaraere a, wa kina gu ngume du pangba baime yo ni ngenge yo, i aniri riahe ki nimbiri he ki ningi angi. AYudo ki nisungu zezeredi na aYisaraere, aboro dunduko ki nisungu tii gayo bakakue na tii gayo vurumo.”—1 Abakindo 4:20, 25.
Si ni pa gberarago nga, gi gayo zereda na wene bayo re aimanga gbe te. Wa aYisaraere avura duna ga Mbori Ndiko beyo, i amanganga ha te; i ambu gayo gbangbati si kandasi berãpa akurayo. Gipai re, kodihe kuti gayo samungu kuti ndikidi pambori, amoi yo rogo fudifudiapai wa i adu nibasasa na wa rikaaboro. Ni yangaraha tie rogo gu garã nangia 607 Mbata fu Gaani Regbo, Yekova ambu aBabero i gbarasi gu Kindo nangia ga aYuda, na gu bakporo nangia Yerusarema, na gu bawene yekaru nadu yo. Tipa gini ndupai ko aidihe tini gipai mangi re? “Bambiko oni agia nga sangba re te, oni ngére, mi akéda sunge tipa agu angbatunga aboro du ku nodiyo dunduko, wo poi Yekova, na tipa Nebukadenesara bakindo aBabero, nga gi moyambu, mi ki ye na yo kuti gi ringara re na kuti araki rogo ho, na kuti agu arikaaboro dunduko du kirikiri; mi agbárasa yo kpakaya, ki sa yo ni ũkiga, ni ũumohe, ni ngbi nyenye ugure.” (Yeremaya 25:8, 9) Nagbere gu sangbana gindigo ga Yekova ziazia iriso re!
Kpiapai Tipa ka Wirikaha
Tipa Yesu Kristo tigako, anga ko ayugu kina Gu Rugute Du Wa Dahabu gbua te, ono ko amoi bawene kpiapai kisusi a nimanga ko ho nga kina boro ko nitiko. Ko anangera wenengai fuo aboro tipa i du wenengai ti kpoto yo. (Matayo 9:36; 14:14; Ruka 5:12, 13) Ti kura regbo sa ho ko aduni pati gu gbata nangia Naina, Yesu abi dekurugbo dagba aboro naakpara ni nunga be pa kpio bangisa wiiri ni kumbagude i nindu na kangba ko ka kpisidoho. Ziazia Kekeapai natangara gi pangbanga re kini ya: “Ho Gbia abi ri ni, nungari ki nimangi ko amanga.” (Ruka 7:11-15) Gu fugo i asaha nga “nungari ki nimangi ko amanga,” kuti gu buku nasakarogopai yo nga Vine’s Expository Dictionary of Old and New Testament Words, rogoyo nga “pai afõngbadukoyo.” Ko aini wai gipai re aaima ngbaduriyo, sidu si ki sa ko ko guari ka mangapai ka zeresa gu ima re. Nairiwo wai gipai re afu ngbarago fu gu dekurugbo re ho Yesu azingisi gu paranga ni re na “ki fu ko fu nako”!
Ni yangaraha tie, ni manga ko pai ringbisihe kuti ga Mbori ringbisapai, Yesu ataino aino kini mbu tiko fu aboro i rungosi ko na ki fu unga ko a ka tumorii ngbatunga aboro nani tipa i rengbe ka zaka yo kusayo ka i adunga berewe ni akanga fu ingapai na fu kpio ya. Gere angia gu babakere kpiapai kisusi nga ga manga boro Gu Rugute Du Wa Dahabu.—Matayo 20:28; Yoane 15:13; AEbere 4:15.
Agu Aboro Namanga Gu Rugute Du Wa Dahabu
Ya mo aboro ho ti gi gaani regbo re naraka kuti Gu Rugute Du Wa Dahabu? Ii, i kina tini, i amanganga ha kinaho du apai ni ni wenehe fuyo te. Ni kpiapai, ti regbo Ue Vura nga ga Zegino ti regbo gu zogarago nangia ga Nazi Germani yo, aDezire Yekova akakuti gayo idapase kuti Mbori na ki kakuti kpinyemu akurayo na ka i aidanga ka mbu manga Gu Rugute Du Wa Dahabu ya. Wa Irangbii rogo gu ringara re avura asia aboro tipa i sogo aYuda dunduko na kini mangi fuyo gbegberee, aDezire tigayo akakuti manga Gu Rugute Du Wa Dahabu kindi. Zavura rogo gu bataya nangia ga zizi aboro, i aangera fuo akurayo aboro kindi, wa gu riahe nadu beyo avura du gbua ni kina betehe, i aafukaha afuka fu agu aYuda naakobo be gomoro na fu agu aboro naangianga aYuda a ya zanga kparakapai dagba aboro. Kurii gure, wa irangbii avura zinahe fuyo ya i rogodi aũvura kubeyo ka imo aboro nani, i aka gipai re, a wa i adunga na nyemu kura aboro imi yo ya. Waigu ka i arengbe ka imo agu aboro si adu nga i kpinyemu yo a wa i akpinyemu tiyo? Mbiko pa ka yo pa manga gipai re, anga i akedi dungu yo kina ku bambukiso yo gbua te, ono i akedi yo koyo a tipa i kpiki yo.—Matayo 5:43-48.
Wa oni ageda gi papara kekepai re, oni nagbia undo be gu kura kpiapai nga ga manga Gu Rugute Du Wa Dahabu. ADezire Yekova kparia gupai nga, areme dungu aboro narungo zanga i duna maabangirise na zanga undo duho tipa yo. Mbiko gipai re, si du aDezire aguari tini nitiyo ka fu tiyo ka undo kura aboro i wirikipa gu maabangirise du rogo Ziazia Kekeapai na pa gu wene arugute du rogo. Si dunduko nga papara gu sunge nga ga yugopai i amangaha rogo zegino dunduko susi gu i naamanga mbata. Sangbanaha nga gine? Nirengo, kuti gu sangbanebi du awere nikekehe rogo Yesaya 2:2-4, i aima digo ‘niraba badungu arikaaboro na pa gako agene tipa i nipekehe,’ nga gu rikaaboro du bange yo awere susi amirioni sita rogo zegino dunduko. Ka pepai ni sanza, i ima wirika wai ka ‘tá gayo abasape ni marã sopabino, na gayo abaso ni marã kuya ngua.’ I ima gbia zereda na bayo ki ima ngba rogo gi fudifudi aregbo re.
Ginipai Tipa Roni?
Oni berẽnga kuriipa gu ima na rungo basa Gu Rugute Du Wa Dahabu naye nani kurii ngbatunga aboro natona ti regbo samungu Edene yo nga gu Satana Bakitingbanga atonaha. Yekova ima ringbisapai tipa ka aria agi apai re bambeda kurogo gu baha si adu rogo mbata. Rogo gini gene? “I ayugu Wiri Mbori tipa gi pai re, nga ko gbarasi ga bakitingbanga mangaapai.” (1 Yoane 3:8) Gipai re amanga ti regbo ga Mbori zogarago nga ga Kindo, vurube gu iratatamana nga Yesu Kristo, nga guko nayugu Gu Rugute Du Wa Dahabu na kini raki kuti sangbaha a.—Atambuahe 37:9-11; Daniere 2:44.
Davide, nangia Bakindo agu aYisaraere nadu mbata ayaa: “Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te. Ni namanga apai ni inapai na uru pitipiti, ki niunda aboro, ngbatungani ki du ni aboro maku.” (Atambuahe 37:25, 26) Oni aidanga gupai nga dungu aboro areme narogada ga aboro ahe na kini gburihe kuba i ‘naamanga apai ni inapai fu aboro na kini undo yo’ tee? Ziazia tie, manga boro Gu Rugute Du Wa Dahabu rengbe ka ndu na ni sa zereda na bani ki ngba agba mbiko si namaa boro ngba gene gbia maku awere na ka gbia agu akuraha kumbatayo ti regbo ga Mbori Kindo. Ga Mbori Kindo nika wega gbangbati kusayo nabaha kodihe kuti wega gbegbereapai auru kpotosende kusayo na si nika diaba gi iraira sino zogarago nga ga aboro re na ki ye na gu sino mangaapai nga ga Mbori. Fuo gure, aboro dunduko nika gbia ngbarago be raka tii Gu Rugute Du Wa Dahabu.—Atambuahe 29:11; 2 Petero 3:13.
[Gu kpiahe du ti kpewaraga 5]
Anga Yesu Kristo ayugu kina Gu Rugute Du Wa Dahabu gbua te, ono ko amoi bawene kpiapai kisusi a nimanga ko ho nga kina boro ko nitiko
[Gu kpiahe du ti kpewaraga 7]
Manga boro Gu Rugute Du Wa Dahabu rengbe ka ndu na ni sa zereda na bani ki ngba angba