Gaoni Bipai Nga Gine Tipa Kpio?

KA KPOTORANI vura du zanga kaza watadu ani nga airakumuko, pa berã ani gupai nga ani nata na kpio sa, nazeresa kina kpotoraniyo wa ani amanga gaani asunge na a’uru. Pa kpio rani rengbe ka ye ti gu kura regbo ho ka ani ayara ni kugii gene yo watadu ho ka ani pi ni rii gaani barame. Ngbatunga agu agberango du wa gu abamoi ati nani kurii aboro gugorö rogo Mbirinvuo ti rameru 11 rogo 2001 New York City yo na Washington, D.C. yo re, nasa rani ani ini gupai nirengo nga, gu “yangara vura [rani]” nga kpio naimo aboro dunduko zanga bipa agu aba du yo rogoho rogo raka na zanga bipa garã yo a, na ti kura aregbo, si naimo akutu aboro vuru kina bete aminiti gbua.—1 AKorindo 15:26.

Wa vura duhe wo, kpio nga gupai nagbeberã dungu aboro. Anga pai ho rengbe ka du rogo waraga pangbanga ka sa aboro i duna nyemu dungu bangehe tipa ka gedaha watadu gu du rogo terevizioni rengbe ka gbeberã aboro ku kpakpu terevizioni yo susi gu pangbanga nga ga kpio aboro te, gu susi asusa gbe nga, pa kpio gu dungu aboro mangi kerepai yo i ki kpiki ti bangisa regbo sa. Si nawira ome aboro abatanga be gia pangbanga kpio aboro te, singia si aye be vura, be gu gberango nga ga zegino, be agu aboro nakuo ndiko, watadu be akaza. Ho kikiipa boro akpi ni, gure nga gupai nakpakara berewe bangiri aboro tipa kpio na kingia gu regbo aboro ayugo gayo bakere nunga tipa gbanga regbo tipa kpio gu boro re.

Anga kangoho riipa wai du ga aboro bipai tipa kpio nibakiakia te. Kpio ni gupai nagbeberã aboro kindi, nga kpio kura aboro. Ono tie, ho aboro angera ni bangiriyo na kina boro pa kpio yo nitiyo, si ni gupai i aidanga ka fura tipaha ya. Pa kpio kina boro rani nitirani ni gupai ani aidanga kandara ka berã tipaha ya.

Kpio Ni Gupai Adunga Ba Giarogoyo Tini Ya?

Gu berã nga uru adu kinaho ani ka kpiko naangbanga tirani te, na kinawo si nika nye kindi. Tipagine duhe tini wo? Si wo mbiko Mbori amoi nyemu raka nyeanye kindi kurogo rani yo. Kuti sangba Batungusipai 3:11, ‘Ko amoi nyenye apai a ku berã boro yo.’ Sidu, gu rengo nga kpio ni guhe ka aboro nehe te, asa aboro i naasota na apai rogo gayo aberã, nga gu tagbagatagbagaapai nandu kina kumbatayo. Tipa ka zeresa gi sota na berã re na ka ringbisa gayo nyemu raka nyeanye kindi, aboro asangi ngbatunga aida nibakiakia, kini kodi gu yugopai nga, mbisimo ni guhe zanga kpio na pa kura boro berewe fuo kpio ni kurogo kura kpotose.

Ka aboro vura pe kina ginipai tipa kpio, si nga guhe nafuda aboro na kini bagunde tiyo, na gunde be kpio ni gupai rengbe na arago dunduko. Sidu, si aidanga si iriwo tirani ka bi gupai nga, kpio nazeresa kpoto aboro yo te. Pai sa dagba agu apai kpio amangaha nga, si nayugopa gu raka nga ga orafuo kumuko gbiati orafuo pagbia kaa maapai rii kura aboro ni kungbo dogatise.

Kpio Nakpara Roni Kusayo ti Gaoni Aborokporo?

Ti agu aregbo nadu mbata kusayo, i animbu gu boro nawoka sa kpio watadu gu boro hõ gbegberee ni kpi kpuni nga gu rago ngbaa ti ni na ni aima inidoho. Gure nangia gupai i anamangaha ti agu aregbo i anakeka Ziazia Kekeapai, na kinawo duhe kindi areme a dagba kura aboro. (Bambata Pai 49:1, 2, 33) Ho du apai ni wa gure, aborokporo dunduko nadungura tiyo ku pati borokaza, na i ki rimisi agude a kurogo agu afugo i agumbaha. Gipai re nasa aborokporo nibasasa i bi gupai nga, anga bangisa boro sa duna nunga borokaza na kini ngere fuo ni te.

Gipai re na bakere kparakparapai tini na gu namanga dagba agu aboro nazahe ti fura tipa kpio, nga agu aboro nabi kpio ni gupai angbanga i fura tipaha ya, na nga gu fugo i aidanga ka koda agude kurogoho a ya, ya “si rengbe ka ye na bakere nunga susi ome agude.” Aboro nakpiko areme rogo agu agene duni bakiakia, dedede, i nakpiko nisanagayo. Wa vura duhe nga dungu aboro nakpinyemu ka kpi kpuyo, rogo pazereda na gayo aborokporo kini ngere fuo yo rogo nyemuse, gupai tie namanga fu dungu aboro nga, i nakpiko bambungua yo, dedede rogo ima gii bangiri gayo aborokporo, nivodivodiyo kuti agu aũsunge nga ga amonganga. Ngba kura gene, gu kura dungu aboro nakpiko zanga i ini ada nga yo, wa aguyo aboro arunosi tunga yo, aguyo nakpiko be ngbongi, be AIDS, be gu vura du dagba aboro ringara, watadu be kere rungo.

Gu Riipai Si Aida Ani Wisigihe

Ziazia Kekeapai azeresanga kpoto aboro yo tipa berãpa kpio te. Nirengo Batungusipai 7:2 naya fu rani wee: “Si ngba ka ndu ku kporo kpe yo ti ndu ku kporo pumbo yo; bambiko gure nga digida ga aboro pai dunduko.” Ho ani angera ni bangirani na gu rengo nga kpio ima da tirani, ani rengbe ka mbu agu apai ani naamangaha na a’uru dunduko tipa ka berã kurii wai du raka boro gbua ni kina wiri guruhe. Gere rengbe ka undo rani ani raki gu raka duna rogoyo tini kuba gupai nga kaa ngbuo angbuo rogo raka watadu ka gbarasa paha.

Gine nga gaoni bipai tipa kpio? Oni ima wisigo gaoni aberã, gaoni aida, gaoni amaabangirise, na agu apai oni agunde behe tipa ho gaoni raka nika digo ni?

A wa du gu sino apai du tipa raka, tandu be aboro ka sakarogo agu apai yo du tipa gu sino apai nga ga kpio na ka giarogoyo te. Gu yangara boro rengbe ka fura tipa gipai re wenengai na rengbe ani ka kido kuti ni nga kina Bakusirani sa. Bambiko “gugaabi unga du be [ko],” na ko ‘du pa bata bekpio beko.’ (Atambuahe 36:9; 68:20) Wa vura duhe wa si ni gupai nika iriwo ti rani, pa wisigo ani agu aida ngba ti aboro gbe du tipa kpio na kini ringbisihe na Fugo Mbori, nika fu wasa fu rani na ki ngarasi rani. Si nika yugo gupai fu rani a nga, anga kpio nzunzu nga digido apai dunduko te.

[Gu kpiahe du ti kpewaraga 4]

Pa berã ani gupai nga, kpio ni guhe ka ani nehe te, naundo rani ani raki gaani raka ngba ruru gene