Oni Wiriki Bawene Bayugupai

“Oni ndú . . . ki sa arikaaboro dunduko ni abawiriki, . . . ki nirugu yo a i niká kuti agu apai dunduko mi arugu roni kuti ni.”—MATAYO 28:19, 20.

1, 2. (a) Wai duhe nga ani dunduko rogo kura agene nga abayugupai? (b) Ho daha ni ti yugopai, gini kparakpara sunge fu yo ho fu ndikidi aKristano du kia?

ONI nga bayugupai? Ii, rogo kura agene, ani dunduko nga abayugupai. Ti agu aregbo dunduko oni naayugo gene fu gu boro nunguro ingi, ho oni ayugo wai ni si aida gaoni badiasunge mangi kurapai, watadu ho oni ayugo wai ni fu gude ni vo gani giri rakata, gure nga oni nayugopai fuyo. Pa undo oni aboro rogo ngbatunga agu gene re naye na ngbarago fu roni, anga wo tee?

² Ho daha ni ti yugopai, ndikidi aKristano na gu kparakpara sunge beyo du tigaha kia. I fu gu sunge fuyo nga i ‘sa aboro ni abawiriki kini yugupai fuyo.’ (Matayo 28:19, 20) Ani na amamu berani a rogo adungurati ka yugopai ti kura aregbo. I nasia agu akumba rẽ i mangisunge rogo dungurati ni “amoyambu na [ni] abayugupai” tipa ka sonosa dungurati. (AEfeso 4:11-13) Rogo gu gayo mangaapai nga ga aKristano i naamangaha na a’uru dunduko, i nangarasa gu sosono adee nyaki rogo inohe i duni ‘abayugu gupai ngba angba’ fu gu paranga adee ata sonanga rogo inohe ya. (Tito 2:3-5) Ani dunduko i azungodi rani ani ningarasi akuarani aidipase, na ani rengbe ka irisa gu rugute re ni manga ani sunge na Ziazia Kekeapai ka sonosa akuarani. (1 ATesaroniko 5:11) Nga gu mamu ngaha ani duni abayugu Fugo Mbori na ka fu gu nyanyakipa apai nga ga toro fu kura aboro nga gu rengbe ka undo yo tipa gbanga regbo!

3. Wai rengbe ani ka mbakada gaani birĩ inohe rogo yugopai?

³ Ono, wai rengbe ani ka mbakada gaani birĩ inohe rogo yugopai? Bambatapai nga, ni wirika ani Yesu nga Bawene Bayugupai. Kura aboro rengbe ka bakabangiriyo ki ya: ‘Ono wai rengbe ani ka wirika Yesu? . . . Ko angia rengberengbe boro.’ Rengo ngaha, ani arengbanga ka duni rengberengbe abayugupai te. Wa vura duhe wo, ani kindi rengbe arengba ka manga asadatise ka wirika Yesu rogo gu gene ko anayugopai ngbaha ka ani avuranga du na wene birĩ be rani vurũ ya. Ani sakinga pai tipa wai rengbe ani ka mangasunge na agu agene biama ko anayugopai ngbaha, nga fura na taata afugo, sana wene asanahe, ruru sakapai, na gu yugopai na kpiaapai daada.

Ani Saha Si Du Taata

4, 5. (a) Tipagine du taata afugo ti ni ni bangua sino yugo agu arengo nga ga Ziazia Kekeapai? (b) Tipa gaani yugopai duni taataha, tipagine si aida gupai ti ni nga ani kparia agu afugo ani amangasunge nani?

⁴ Gu bambata arengo nga ga Fugo Mbori ni kpakarakpakarapai te. Rogo kparakpee, Yesu ayaa: “Mi natambua ro, Ako Buba, . . bambiko mo aoko agi apai re bangiri airatatamana na arugutinapai, ki kusi he fu fogo agude.” (Matayo 11:25) Yekova asa gako ringbisapai si duni yuguyuguhe fu kina agu aboro duna ruru ngbaduyo yo nga aboro umbasitise. (1 AKorindo 1:26-28) Rogo gi gene re, taata afugo nga bangua sino tipa ke agu arengo nga ga Ziazia Kekeapai.

⁵ Ho oni awisigo Ziazia Kekeapai ni na boro kporo watadu ho oni akaraga tironi ni ka ndu ka biko agu aboro berewe nayugu nyemu rengo, wai rengbe oni ka yugopai fuyo rogo agu afugo du taata? Wenepai, ginipai ani awirikihe be Bawene Bayugupai? Tipa agu aboro gi ko wenengai nanadegatuyo kuti fugoko naangianga “airainahe” ya, Yesu anafura rogo agu afugo nadu taata i arengbe ka giarogoyo. (Amokedi 4:13) Tipa gaoni yugopai du taata, gu bambatapai si aidaha beroni nga ka kparia agu afugo oni amangasunge nani. Si aidanga ani mangisunge na nyanyaki afugo watadu kpakarakpakara afugo tipa ka sa gu rengo nga ga Fugo Mbori aboro idi kuti ni te. Ngbatunga gu ‘kikindigi afugo’ re rengbe ka gundesi aboro, gbe aguyo duna kina bete wirikapai watadu duna kina bete inohe gbua beyo. (1 AKorindo 2:1, 2) Gu kpiapai nga ga Yesu nayugo gupai nga, taata afugo nga gu sia boro ho wenengai nayugo rengo na bakere ome.

6. Wai rengbe ani ka ne yugo dungu apai susi ome ti bangisa regbo sa fu gu boro nawisigo Ziazia Kekeapai?

⁶ Tipa ka sa yugopai si du taata, si naida ani banda tirani a be yugo badungu apai ti bangisa regbo sa fu gu boro nawisigo Ziazia Kekeapai. Yesu anaberãpa gu ngbanda aberã nangia ga gako abawiriki. (Yoane 16:12) Si naida ani mangi kina gu bangisapai re a na gu boro ani awisigopai na ni. Ni kpiapai, ho ani anungusa wisigopai ni na boro rogo gu buku nga, Gu Inohe Nandu sa Nyenye Unga, si aidanga ani sakirogo apai yo na afutufutuhe dunduko te.a Na si aidanga gupai a nga ani oro rii agu apai re te, si ki du wa, gupai nyakipaha gbe nga ka nyasa ringbisiringbisi bakio kekepai. Kuba gure, si ni pa tatamana ani mbu kina agu apai du tipa gu boro nawisigopai re si ringbisi bakio gupai ani kaa wisigoho. Gu sasa ani aida ka da ti ni nga ka undo gu bawisigipai re ni da ni ga Kristo bawiriki na ni bairisi Yekova. Si naida ani di agu aregbo dunduko rengbe ka duho tipa ka undo gu boro duna nyemu rengo tini nawisigopai re ni girogo gupai ziazia ni awirikaha. Ngba gi gene re, rengo rengbe ka rimo ku ngbaduniyo na ki sa ni ni guari sa sunge.—ARomo 12:2.

7. Gini aberã fu yo ho rengbe ka undo rani ani yugupai rogo gu gene duni taataha ho ani amanga gumbapai ni rogo dungurati?

⁷ Ho ani amanga gumbapai ni rogo dungurati, gbe ka si du nga vovo aboro gu sungu pati dunguratise, wai rengbe ani ka fura “ni gu fugo ipi pa gia ha”? (1 AKorindo 14:9) Oni wisiginga agu aberã biata fu yo ho nga gu rengbe ka fu undo. Bambatapai nga, oni sakirogo agu afugo aboro ainonga ha ya nga gu si aida oni mangisunge nani. Gu rugatinapai gbia ani he rogo Fugo Mbori ima fu kura afugo fu rani du kia ti ga dungu aboro. Ka ani aida ka mangasunge na agu afugo du wa ‘ruru kangara moyambu,’ ‘kura avusende,’ ‘Bakere Babera,’ si idi gupai nga ani sakirogoyo na taata afugo nga gu nasa rogoyo si du ziazia. Uepai nga, ani he gumba dungu apai. Pe dungu afugo, na zadapai ni torotiri rengbe ka zeresa nyemupai ngbadu aboro yo. Sa pai si du taata naye mbiko boro mbu kura apai kusayo nga gu adunga sunge ti ni ya. Biatapai nga, ka oni asadinga ka fura tipa dungu apai ya. Rogo gaani wetekapai, ani rengbe ka kura bara dungu gu futufutuapai ngba angba. Ono si ni wenepai ani dungura kina bete memeapai nga gu ani andu ka fura tipaha, kini gumba kina agu apai nasongoda gu memeapai re na nga gu rengbe ani ka zakarogoyo ziazia vuru gu regbo fu yo ho fu rani.

Wene Mangasunge na Asanahe

8, 9. Wai rengbe ani ka sia gu sanahe rẽarẽ kuti gupai ngba ti irakporo? Oni funga kpiaapai.

⁸ Oni tingidi gupai nga, Yesu angia bangbasia rogo mangasunge na asanahe ka sa gako abawiriki i gumba agu apai nadu berã yo yo na ka sa yo i berẽ na ka raba berã yo. Ni gako asanahe, Yesu anarimiso apai ku ngbaduyo yo zezeredii na si ki sa yo i mangipai. (Matayo 16:13, 15; Yoane 11:26) Wai rengbe ani ka mangasunge wenengai na asanahe wa Yesu?

⁹ Ho ani atungusapai ni kini tangara akporo, ani rengbe kaa sasana aboro tipa ka ba nyemupai tiyo, si kini zakigene fu rani ani fura tipa ga Mbori Kindo. Wai rengbe ani ka sia gu sanahe rẽarẽ kuti gupai du bairakporo na nyemuhe tini? Si naida ani nikparia agu apai du ku boro yo. Ho ani ambeda ni ku boro yo, ani kparia pati kpuni. Aũmbaro ho nga ga agude vurukporo, si kini yugu gupai nga agude kina rogo gu kporo re? Kangia wo duhe, ani rengbe ka sanahe ki ya, ‘Oni abakinga bangironi tipa wai zegino nika du ho awironi nika sona ni?’ (Atambuahe 37:10 11) Arifangura gu nge ange ti gu ngbadimo du ku gene yo, watadu giri aũtingida pa da iradii kporo dari yo ho rogo gu kporo re? Fuo duhe were, ani rengbe ka sanahe ki ya: ‘Ya mo oni naberãha ya regbo aduho aboro wa mo na mi were nika sungo kpuyo zanga gunde watadu zanga gunde ti ta bangiri agene?’ (Mika 4:3, 4) Tumbatumba rago gu duho tipa tura gbarigbari boro ngbaha kuari watadu kusende na gu gani kiti duna angbagida ti ni? Ka si du wo, ani rengbe ka sanahe ki ya: ‘Ya mo regbo aduho agu aboro dunduko naraka nika duna wene kpotoyo?’ (Yesaya 33:24) Oni rengbe ka bi dungu agu aberã fu yo du wa gere rogo gu buku nga, Reasoning From the Scriptures.b

10. Wai rengbe ani ka mangasunge na asanahe tipa ka ‘kusa’ agu aberã du rii bawisigi Ziazia Kekeapai yo na gu du ngbaduniyo, ono ginipai si aida ani moihe ku berã rani yo?

¹⁰ Wai rengbe ani ka mangasunge na asanahe wenengai ho ani awisigo Ziazia Kekeapai ni na aboro? Ani arengbanga ka ino agu apai du ngbadu aboro yo wa Yesu te. Wa vura duhe wo, sana ani he ni birĩ rengbe ka undo rani ani ‘kusi’ agu aberã du rii gu boro yo ani awisigopai na ni gbiati agu apai du ngbaduniyo. (Asanza 20:5) Ni kpiapai, ani ya ani nawisigo gu kapita nga, “Gupai Raka na Sinombori Afu Ngbarago Tini” du rogo gu buku nga Inohe. Si nasakapai tipa ga Mbori bipai tipa iraira mangaapai, meteka, na kura apai. Gu bawiriki re rengbe ka karagapai sa gu kekekeke asanahe re wenengai, ono ya mo ni idi kuti gupai ni awirikaha re? Ani rengbe ka sanahe ki ya: ‘Ya mo ru ga Yekova bipai aru bangironi tipa ngbatunga agu apai re?’ ‘Wai rengbe oni ka manga agi arugute nga ga Ziazia Kekeapai adunga ngburungburu re ya rogo gaoni raka?’ Ono tie, oni moi gupai ku berã roni nga, si naida oni naafu irisa fu gu bawiriki re na kini bi ni na kiki. Si aidanga ani sana agu asanahe nika ba zee bangiri gu bawisigi Ziazia Kekeapai re watadu nika payasi pani te.—Asanza 12:18.

11. Rogo gini agene rengbe abagumbapai gbaiga ka mangasunge na asanahe wenengai?

¹¹ Abagumbapai gbaiga rengbe arengba a ka mangasunge wenengai na asanahe. Nga ka sana agu asanahe si aidanga aboro karagapai sani na fugo yo kuari ya, si rengbe ka undo aboro i berẽ na ka undo yo i sakipai rogo gayo berã. Yesu anamangasunge ti kura aregbo na ngbatunga agu asanahe re. (Matayo 11:7-9) Kurii gure, fuo bagumbapai tona fugo, ni rengbe ka sana asanahe ka yugo gu memeapai nani ni andu ka sakaha. Ni rengbe ka yaa, “Rogo gu gaani sakapai du areme, ani nandu ka wisigo agu akaragapai du tipa agu asanahe naye re . . . ” Fuo gure ti digido gani gumbapai, ni rengbe ka karaga tini sa agu asanahe re berewe kini fugu bangua bangiri apai.

12. Oni fu kpiapai ka yugo wai rengbe agu abaakumba duni aKristano ka mangasunge na asanahe ka undo kurayo idipase ni gbia wasa be Fugo Mbori.

¹² Rogo gu gayo sunge nga ga banda avusende, agu aKristano nga abaakumba rogo dungurati rengbe ka mangasunge na asanahe ka undo agu aboro ‘rungbura’ tipa i gbia wasa be Fugo Yekova. (1 ATesaroniko 5:14) Ni kpiapai, tipa ka undo gu boro duna gberarago tini, bakumba rengbe ka gbeberã ni kuti Atambuahe 34:18. Si nayaa: “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.” Tipa bakumba rugu tiko na gupai nga, gu boro zere kpotoniyo re nabi gipai re ya si tipa ni nitini, ko rengbe ka sana ni ki ya: ‘Kuti gipai re, da du Yekova mbembedii na ni? ‘Kpotoroniyo naarungo’ ti kura aregbo na ‘toro roni kini imi’? Kangia Yekova gu du mbembedii na ngbatunga agu aboro re a wa Ziazia Kekeapai agumbaha, anga gure nayugo gupai nga ko mbembedii na oni tee?’ Ngbatunga gu kido boro ni nunga re rengbe ka fu wasa fu gu boro narungo ngbaduniyo.—Yesaya 57:15.

Ruru Sakapai

13, 14. (a) Wai rengbe ani ka sakapai na gu boro nayaa ni aidanga ya Mbori kina ti ni te mbiko ni abinga ko te? (b) Tipagine si aidanga ti ni ani moi bangirani ya aboro dunduko nika ida gaani pai ya?

¹³ Ani naida ka rimisopai ku ngbadu aboro yo ni wene sakapai na yo na kini zomia yo tingba gaani sunge tungusapai. (Amokedi 19:8; 28:23, 24) Ya mo gure nayugo gupai nga, si naida ani wiriki mangasunge na kpakarakpakara gene sakapai tipa ka ruho ka sa aboro i idi kuti gu rengo nga ga Fugo Mbori? Wa gu sa te. Si aidanga ruru gene sakapai duni kpakarakpakaraha te. Gu ruru sakapai i agumbaha rogo taata afugo nidu dedede na bawene sangbanaha. Oni wisiginga kpiapai sa.

¹⁴ Wai rengbe ani ka karagapai fu gu boro nayaa ni aidanga kuti gupai nga Mbori kina ti ni te mbiko wa ni abinga ko ya te? Ani rengbe ka sakapai na ni riipa gu ndiko nga ga sa pai si mangi na sangbana gupai mangi. Ho ani abi sangbana gupai ni mangi, ani naida kuti gupai nga, pai kinaho nasaha si mangi. Ani rengbe ka ya: ‘Kangia oni tuturũ kusayo ti kporo kini mo ka kura bara wene duadua bambu rogo rago nga gu bambu hi be riahe (nga sangbana gupai mangi), oni idi gupai zanga kapa nga, boro du (nasaha si mangi) nadua gu bambu re na ki hisihe na ahe. Sidu, teketeke a, ho ani abi gu mbakadimbakadi ahe ni du rogo zegino na agu ariahe du kpaima auru kpotosende rogo gaha “gbamu” (nga sangbana gupai mangi), anga si niruru berã ka ida gupai nga, Boro du (nasaha si mangi) namangihe tee?’ Gu sakapai nga ga Ziazia Kekeapai du taata nagumba gipai re ngba bawene gene kisusi niyaa: “Bambiko abambu dunduko aboro du nadua ha; ono gu ko nadua ahe dunduko nga Mbori.” (AEbere 3:4) Wa vura duhe wo, ka gaani sakaapai vura ngba wai vurũ, anga aboro dunduko nika ida kuti ni te. Ziazia Kekeapai natingida rani na gupai nga, kina agu aboro sa ‘duna ruru berã’ nika sa tiyo ni aidipase.—Amokedi 13:48; 2 ATesaroniko 3:2.

15. Gini gene sakapai rengbe ani ka mangasunge nani ka nyakasapa ga Yekova asino na agene, na gini kpiaapai ue nayugo wai rengbe ani ka mangasunge na ngbatunga gu sakapai re?

¹⁵ Rogo gaani yugopai, singia gene sunge tungusapai yo watadu rogo dungurati, ani rengbe ka mangasunge na ruru sakapai ka nyakasapa ga Yekova asino na gako agene mangaapai. Gu ngba gbe nga gu gene sakapai nakoda ‘angbatika’ nga gu Yesu anamangasunge nani ti kura aregbo. (Ruka 11:13; 12:24) Mbiko wa i amaa mburu gi sakapai re rii gu kparakparapai du dagba apai ue, gi ngbatunga sakapai re rengbe ka sigira tihe nyanyakii ku berã boro yo. Ka ani aida ka yugo gupai fu aboro nga we-iferno ni gu yugopai arunga ya, ani rengbe ka yaa: ‘Gu baagude duna nyemuse arengbanga ka fu mbusa fu wirini ni zoga beni ku we yo te. Ka gupai re angbanga ti gu baagude nga kpakpa boro ya, angbatika gu Barani nga ga ngbangbaturũ ko duna bakere nyemuse tiko!’ (Yeremaya 7:31) Tipa ka yugo gupai nga, Yekova nangera angera fuo gako amoyambu wa du yo nibasasa, ani rengbe ka ya: ‘Kangia Yekova ima ino dungu amirioni akerekuru ti rimora nga kungbo ahe gbua, angbatika aboro nga aguyo nakpinyemu ko, nga agu aboro ko angbe yo na kikiipa kure Wiriko, nirengo ko nangera angera fuo yo!’ (Yesaya 40:26; Amokedi 20:28) Ngbatunga gu nyanyaki sakapai re rengbe ka undo rani ani rimisipai ku ngbadu kura aboro yo.

Gu Yugopai na Kpiaapai Daada

16. Tipagine du yugopai na kpiaapai ti ni na nyanyakipaha rogo yugopai?

¹⁶ Wene yugopai na kpiaapai ni gu kpura rengbe ani ka kpura gaani yugopai nani si nziri tu aboro yo. Tipagine du yugopai na kpiaapai ti ni ni nyanyakipa pai rogo yugopai? Bayugupai sa ayaa: “Pa rengba aboro ka berãpai zanga kpiaha du berã yo yo ni kpakarakpakarapai fu aboro i mangihe.” Yugopai na kpiaapai nasigira kpiaapai ku berã rani yo, kini undo rani wenengai gbe ani girogo vovo apai. Yesu angia bangbasia rogo yugopai na kpiaapai. (Marako 4:33, 34) Ani wisiginga wai rengbe ani ka mangasunge na gi birĩ yugopai re.

17. Gini apai biama nasa yugopai na kpiapai si du na wene sangbanaha?

¹⁷ Gine nasa yugopai na kpiaapai si duna wene sangbanaha? Bambatapai nga, si du wa ka si rẽarẽ tipa agu aboro ani apehe fuyo, ni gupai di ani he ti agu ahe agu aboro nadegatuyo naima rugatiyo na paha. Ani natingida gupai nga, Yesu anadia gako kpiaapai ti agu ahe aboro anabihe rogo gayo raka na a’uru dunduko. Uepai nga, gupai ani ayugoho na kpiapai, si du wa ka si rengbe na gupai ani afura tipaha. Ka pa ringbisaha nani arunga wenengai ya, gu kpiapai re rengbe ka sa agu aboro nagiaha ka i degenga tuyo ya. Biatapai nga, si aidanga yugopai na kpiaapai hi be gu futufutuapai adunga sunge ti ni ya te. Oni tingidi gupai nga, kina gu futufutuapai nada ada tipa Yesu gumbaha kina si ko anagumbaha ki he agu akuraha paha anyakanga ya. Biamapai nga, ho ani ayugopai ni na kpiapai, ani yugu wai ziazia si aida i mangihe. Ka si adunga wo ya, bete kura aboro ginga rogoyo te.

18. Wai rengbe ani ka gbia wene yugopai na kpiaapai?

¹⁸ Wai rengbe ani ka gbia wene yugopai na kpiaapai? Si aidanga ani berẽpa gbanga yososo pangbanga te. Gu yugopai na kpiaapai duni guruhe rengbe ka du na wene sangbanaha kisusi. Oni asadi gbua ka berã kurii gu kpiaapai nga ga gupai oni asakaha. Ni kpiapai, ani ya ani nasaka gupai du tipa ga Mbori mbupai, na ani naida ka yugo gu bangiripai gumba yo paha rogo Amokedi 3:19 na kpiapai, nga gu rago nafura tipa Yekova ya ko ‘nagbandaka’ ingapai kusayo watadu ko nawegaha kusayo. Gure nisaha nga nyanyaki fugo sanza, ono gini nzunzu kpiapai rengbe ani ka mangasunge nani ka yugo gupai re, ani rengbe ka yamba rimo gbandaka? watadu wirã? Ani rengbe ka ya: ‘Ho Yekova ambupai ni fu rani ti gaani aingapai, ko nawegaha kusayo wa ko di wirã kini mo ka wegaha kusayo nani (watadu ka gbandakaha kusayo na gbandaka).’ Anga si taata bangiri boro go ti ngbatunga gu yugopai na kpiaapai re te.

19, 20. (a) Wari rengbe ani ka bi wene yugopai na kpiaapai ni? (b) Gine nga bete gu kpiaapai nga ga wene yugopai na kpiaapai nga gu i aima kusaha du rogo gaani abuku? (Oni bi sanduki a.)

¹⁹ Wari rengbe oni ni ka bi gu yugopai na kpiaapai daada, kodihe kuti kina boro gu kpiaapai namangi amanga? Oni gbataha rogo agu apai namangi rogo gaoni raka watadu rogo agu apangbanga nibakiakia namangi akuaroni aidipase. Ani rengbe arengba a ka sia yugopai na kpiaapai ti dungu kura ahe, nga gu nakoda unga ahe na agu ahe adunga unga rogoho ya, aũkporo, watadu gu pangbanga nagbe dagbarago. Wene gene ka gbia wene yugopai na kpiaapai nga ka ngera tipaha, ‘ka bi’ agu apai namanga na a’uru pati rani. (Amokedi 17:22, 23) Buku sa nga gu nafura tipa gumbapai gbaiga nayaa: “Gu bagumbapai naida ka duni wene bagumbapai nabi agu apai namanga rogo ga aboro raka na agu apai i amangaha, kini fura na ngbatunga aboro dunduko, kini wisigi apai wenengai na kini sanahe daa ho ni ka giarogopai yo ni, kini dungura dungu agu apai rengbe ni ka mangasunge nani rogo gani yugopai na kpiaapai ho ni ka idaha ni.”

²⁰ Gu kura bangiriba kinaho berewe hi be yugopai na kpiaapai, nga Ngbaõbambu Sinziri, Awake!, na gu kura abuku aDezire Yekova akusihe. Oni rengbe ka wirika dungu apai ni kparia oni wai agi abuku re amangasunge na yugopai na kpiaapai.c Ni kpiapai, ani dinga gu yugopai na kpiaapai i amangisunge nani rogo gu 11 genewaraga du rogo kapita 17 rogo gu buku nga Inohe. Si naringbisa gu sino aboro duni kparakakparakaha rogo dungurati kuti agu atarambiri nibakiakia naora pati roni bangiri gene. Gine nasaha si duni wenehe? Oni kparia gupai nga, di yo ho ti agu apai namanga na a’uru dunduko, si mbembedii kuti gupai i asakaha, na pa wai si aida i mangihe, ni ziaziaha. Ani rengbe arengba ka mangasunge na gu yugopai na kpiaapai i aima kusaha rogo abuku wa ani ayugopai fu aboro, isoke kini ariaha tipa si rẽ na gu zingo nga ga gu boro ani awisigo Ziazia Kekeapai na ni watadu ka kodaha kurogo gaani gumbapai gbaiga.

21. Gini mosoro naye fu boro mbiko du ni niwene bayugu Fugo Mbori?

²¹ Gu mosoro duho tipa duni wene bayugupai nibakerehe. Ho ani ayugopai ni fu aboro, ani nakpara guhe du berani fuyo; ani nafu bete agu ahe nga gaani tipa si undo yo. Ngbatunga gu gamahe re naye na ngbarago, mbiko Ziazia Kekeapai nayaa: “Ngbarago ho gbe rogo gamahe susi gu duhe rogo diaha.” (Amokedi 20:35, NW ) Tipa agu aboro nga abayugu Fugo Mbori, gu ngbarago re naye fuyo mbiko i ini gupai nga, i nafu gu nyenye he kiipaha gbe fu aboro, nga gu rengo du tipa Yekova. Ani rengbe a ka gbia gu ngbarago naye be ino ani gupai nga, ani nawirika Bawene Bayugupai, nga Yesu Kristo.

[Gu rukutu kekeapai du bandu kpewaraga yo]

[Sanduki ti kpewaraga 31]

Oni Natingidapa gu Yugopai na Kpiapai Naye Re?

Agi apai naye re, nga bete wene yugopai na kpiaapai. Tipagine ka oni azaranga waraga ti ni bara gu yugopai na kpiaapai re na ki kparia wai si afu undo ka songoda gupai i asakaha ya?

• Wa kina gu rugute du tipa mbakada tarambiri abambakadihe afuhe, Ziazia Kekeapai nga gu buku du tipa yugopai na tipa fu rugute nga gu naye be Bakusirani.—Gu Inohe Nandu sa Nyenye Unga, kpewaraga 7.

• Pa gumba oni gupai oni aberãha wa kina zumo kandi fu boro. Oni rengbe ka zumo ru yee watadu oni rengbe ka zumo ru na bakere ome u ki rengbe ka imisa gu boro oni azumo ru funi.—Gu Inohe Nandu sa Nyenye Unga, kpewaraga 144.

• Fuo gba yo kaza ti boro, agu agire i ka rungo bangiri oro nani nika banda oro si furudi. Diaha kusayo mbata fu wi oro rengbe ka fu igira. Teketeke a, agu azogarago nga ga aboro namanga gu sunge nga ga kpamia aboro i du sa, daho ga Mbori Kindo nika tona zoga kpotosende ni nabaha. Pa soga boro gu zogarago re wa kina kafa agu agire kusayo i arungu oro nani mbata fu wi he.—Gu Inohe Nandu sa Nyenye Unga, kpewaraga 133.

• Wa gu kekepai geyo ho ti mbia, ingapai aima du nikekehe ni dudunguroho rogo kure bambata avungurani yo.—Gu Inohe Nandu sa Nyenye Unga, kpewaraga 58.

• Sangbaatoro namanga kina gu sunge fu adaimona maahe ku bangiri gbina yo naamangaha fu abamangi anyaa: Si nayamba anyaa watadu azire ku bangiri gbina yo.—Gu Inohe Nandu sa Nyenye Unga, kpewaraga 111.

• Gu ome nga ga karaba na asino gu ũsunge ti ni si afu ome fuhe te, teketeke a, ome-unga na asino ti ni wa ga gu boro si afu unga funi te.—Gu Inohe Nandu sa Nyenye Unga, kpewaraga 82.

• I rengbe ka ringbisapa agu aboro pambori adunga na ruru inohe beyo ya kuti gu bamangisunge yambu yo ni ni ye ka mbeda rangi ti vuro bambu ono ni kini mbedihe na gu rangi bairakporo nagumbanga paha funi ya mbiko ni adeganga tuni wenengai kuti agu arugute i afuhe funi te.—w 02 4/1 kpe. 4.

Oni Natingidaha?

• Wai rengbe ani ka sa gaani yugopai si duni taataha ho ani anungusa wisigo Ziazia Kekeapai ni na boro kpuni? ho ani amanga gumbapai ni gbaiga rogo dungurati?

• Wai rengbe ani ka mangasunge na wene asanahe ho ani atungusapai ni kini tanga ti akporo?

• Wai rengbe ani ka mangasunge na ruru sakapai ka nyakasapa asino Yekova na gako agene?

• Wari rengbe ani ni ka gbia gu yugopai na kpiaapai daada?

[Gu kpiahe du ti kpewaraga 28]

Ndikidi aKristano nga abayugu Fugo Mbori

[Gu kpiahe du ti kpewaraga 29]

Abaakumba rengbe ka mangasunge na asanahe ka undo akurayo aidipase nani tipa i gbia wasa rogo Fugo Mbori