Apai Biata Rengbe ka Undoro Mo Du Niwene Bayugupai
1. Tipagine si aida ani asadi ti ni ka mbakada gaani gene yugopai?
1 ADezire Yekova dunduko nga abayugupai. Singia bambata regbo du ani andu ka fura na boro, ani nakaraga tirani ka bi gu boro ani afura na ní, watadu ani nawisigo Ziazia Kekeapai na boro, ani narimiso pai ku berãniyo. Na anga gupai ani ayugoho nga kungbopai te. Ani nayugo “Ziazia Kekeapai” nga gu rengbe ‘ka fu tatamana fu boro sa bata.’ (2 Tim. 3:15) Nga gu bakere momu ngaha! Apai gi du biata re nga gu rengbe ka undo rani ani mbakadi gaani gene yugopai.
2. Wai rengbe ani ka yugopai ngba taata gene?
2 Yugopai ngba taata gene: Ho ani naini gupai ni wenengai ani ayugopai tipaha, si nitaatapai bangirani go ti gupai nga gupai re rengbe arengba kadu nikpakarakpakaraha fu gu boro ainongo ho ya. Sidu tie, ho mo ayugo Ziazia Kekeapai fu boro, ka mo gumbanga badungu apai susi omeni ya. Ono si naida mo gumba kina memeapai. Anga wene yugopai sa nga kina gumba badungu afugo te. (Snz. 10:19) Na gupai ngba gbe nga ka geda kina agu averesi nga memehe. Fuo geda veresi, mo nyakasi kina gu paparaha nabi gupai oni asakaha. Gu ga Yesu yugopai naadu rii bagangara yo, nga gu keyo paha rogo Matayo kapita 5 kuti 7, si na nyanyakipa arengo rogoho, ono wa vura duhe wo, Yesu agumba agu apai re ngba taata gene na kina bete afugo gbua.
3. Wai nyakipa akpiapai, na gini angbatungaha ngba gbe?
3 Akpiapai: Akpiapai nasa boro ní berẽ, si nazingisa kpoto boro yo, na si nasa boro ní tingidipai. Ka mo berẽnga ha nga si naida mo du mbata nikina wene bagumba apangbanga mo kini ru kaa fu wene akpiapai ya. Yesu anaafu guruguru akpiapai dedede, na si anidu taata. (Mt. 7:3-5; 18:2-4) Gu kungbo sura keyo ho ti kpewaraga rengbe arengba ka undo gbe. Ka mo berẽ tooni, mo rengbe arengba ka gbia akpiapai ka mangasunge nani.
4. Wai rengbe ani ka mangasunge na asanahe ngba wene gene?
4 Asanahe: Asanahe nasa gamo bawiriki Ziazia Kekeapai ní berẽ. Sidu tie, si naida mo du na zerangbaduse fuo fu mo sanahe. Ka mo fu sanahe kina ro ki karagapai sani niipo, mo iningo nzunzu singia gamo bawiriki Ziazia Kekeapai girogo gupai yo re te. Ka ní karagapai niirairaha, kuba gupai nga mo fu ruru karagapai funi nibasa, si angba gbe ka mo sana kina kura asanahe nga gu rengbe ka sa ní ní ini gupai re. (Mt. 17:24-27) Ono kina rengo du nga, boro ho dagbarani nga wene bayugupai kisusi te. Si du tie Ziazia Kekeapai angarasa rani ti ni ki yawee ani moiberãrani fuo gaani yugopai ti aregbo dũ. Ka ani mangihe wo, ani gbia nyenye aundo agbia na agu aboro ka gihe ku ngbarani.—1 Tim. 4:16.