‘Oni Kakuti Wene Mangaapai Dagba Rikaaboro’

“Oni írisi aboro dunduko. Oni kpí nyemu awirina.”—1 PETERO 2:17.

1, 2. (a) Gini fugo badungura apangbanga tipa i kusihe kurogo awaraga pangbanga agumbaha tipa aDezire Yekova? (b) Tipagine aDezire Yekova amanga asadatise ti ni nyanyakii ka kakuti nyanyakipa wene andiko nga ga mangapai?

TIPA dungu agarã kusayo, badungura apangbanga tipa i kusihe kurogo awaraga pangbanga rogo gu gbata nga Amarillo, du rogo gu papara Amerika nga Texas, abiki dungu akanisa nibakiakia rogo gu rago re na ki fu tingidapai tipa agu apai ko abikihe. Ko abi gu kura badona aboro pambori sa nadu tigayo kia ti akurayo. Ko ayaa: “Tipa agarã biata, mi anandu ku pati ga aDezire Yekova kikindigi adunguratise yo nga gu i naamangaha na agarã dunduko rogo gu ba nga Amarillo Civic Center. Wa mi akoditire na yo kini ta dagbayo, anga regbo aduho kandara bara sa mi abinga boro ni nazo gundö, ni nazaki ngba kopo nga ga buda ka mbiraha, watadu ka gumba gbegbere fugo te. I angia gigiri aboro kisusi, na wene sino yo, kini vodi tiyo na iriiri arokoo, nigu wene sino aboro mi abinga aguyo wa yo mbata ya.” I aima digo nikeke ngbatunga gu tambua rimo aDezire Yekova re rogo awaraga yo. Tipagine agu aboro adunga ti idapase na aDezire Yekova ya naatambua yo ti ni dedede?

² Dedede, i naatambua ga Mbori aboro tipa gayo wene sino mangaapai. Wa vura duhe nga, dungu aboro airisanga arugute te, aDezire Yekova nabi nyanyakipa wene andiko nga ga mangaapai ni gupai si aida i mangihe nipapara gayo irisombori. I ima ino gupai nga, gayo mangaapai nayugo kpiapai tipa rimo Yekova na tipa rimo agu awirinayo nga aKristano na i ima ino gupai a nga, gayo wene mangaapai naye na tambuahe tipa gu rengo i ayugoho fu aboro. (Yoane 15:8; Tito 2:7, 8) Ani binga wai tie rengbe ani ka kakuti gaani wene mangaapai na kita mangaha were kini songodi wene rimo Yekova na rimo gako aDezire na ki binga wai rengbe ani ka gbia undo be mangaha wo.

Agu Aborokporo Nga AKristano

3. Gine si aida agu aborokporo nga aKristano banda gayo aborokporo behe?

³ Ani makianga pa gaani mangaapai dagbarani nga aborokporo. Gu buku nafura tipa gu ranirii nga ga pambori du rimoho nga, Die Neuen Inquisitoren: Religionsfreiheit und Glaubensneid (Gu Vovo Awisigopai Du Awere: Ranirii nga ga Pambori Gbiati Kpi Kura Aboro Pambori), nga gu gu kumba akehe du rimoko nga Gerhard Besier gbiati Erwin K. Scheuch, si naya wee: “Gupai nyakipaha bangiri [aDezire Yekova] nga ka banda gayo aborokporo ngba kparakpara gene.” Gupai re nga rengo, mbiko dungu apai gu duho areme naida i banda aborokporo behe. Agude gu duho nga “abasasangba avunguyo” gbiati gu sosono aboro nga “airasakparakpa” watadu duni “airazanga rugatise.” (2 Timoteo 3:2, 3) Akporo nga agu arago arogotise ataka kpata dagbayo rogoho; nga gu ba avunguagude amanga gbegberee fu awiriyo rogoho watadu ka gindigo yo kini mere kurogo kura aba; nga gu rago agude asamungu kuti avunguyo rogoho, kini ingimangasunge na kere angua na kini mangi wasiwasi kodaba, watadu si nga gu rago agude aru rogoho ka ora kusayo. Agi apai dunduko re nga sangbana gu gbegbere ome nga ga ‘gu toro nga ga zegino.’ (AEfeso 2:1, 2) Si naida ani banda gaani aborokporo be gu toro re. Rogo gini gene? Ni irisa ani gu ga Yekova arugute du tipa aborokporo.

4. Gini asunge si aida agu aborokporo nga aKristano nibasasa mangihe fu akurayo?

⁴ Agu arogotise nga aKristano ima ino gupai nga, si naida i songodi tiyo dagbayo rogo agu apai du ngbaduyo yo, rogo gu nga ga toro, na gu du tipa kpotoyo. (1 AKorindo 7:3-5; AEfeso 5:21-23; 1 Petero 5:7) Agu avunguagude nga aKristano na bakere sunge beyo rogo ngera fuo awiriyo. (Asanza 22:6; 2 AKorindo 12:14; AEfeso 6:4) Na wa agude asona rogo agu akporo nga ga aKristano, i naino gupai a nga i na kina asunge beyo tipa ka mangaha. (Asanza 1:8, 9; 23:22; AEfeso 6:1; 1 Timoteo 5:3, 4, 8) Pa manga boro gu gani asunge du tipa gani aborokporo naida bakere asadatise, ziotise kuti pai, na ki duna nyemu yo tini na kini mbupa gani apai. Sidu tie, kuti gu bakio sunge aborokporo nibasasa amanga gu gayo asunge kuti ni Mbori afuhe fuyo, kinawo a i afu undo dagbayo na dagbayo na agu aboro du rogo dungurati. Gu nyakipaha gbe nga, i nafu irisa fu Yekova Mbori nga Baenge gu mbakadapai nga ga aborokporo.—Bambata Pai 1:27, 28; AEfeso 3:15.

Gu Padu Ni Awirina nga ga AKristano

5. Gini amaku ani agbiaha be kodatise na akuarani aKristano?

⁵ Wa du ani ni aKristano, ani a na asunge berani si aida ani mangihe fu agu akuarani aidipase duna ani rogo dungurati, na niyangaraha, fu ‘awirinarani rogo zegino dunduko.’ (1 Petero 5:9) Gaani pagume na agu awirinarani du rogo dungurati na nyanyakipaha tipa ani du wenengai rogo toroyo. Ho ani akoda tirani ni na akuarani aKristano, ani nagbia ngbarago be koda tirani na yo nga gu kodatise nangarasa rani na ani nagbia ngbarago a be gu wene riahe nga ga toro ani agbiaha be ‘ruru kangara moyambu.’ (Matayo 24:45-47) Kangia ani nika gbia tirani ti kpakarakpakaraapai, ani rengbe ka ndu fuo awirinarani tipa wene arugute du mburuhe rii agu arugute adunga ngburungburu ya nga ga Ziazia Kekeapai. (Asanza 17:17; Batungusipai 4:9; Yakoba 5:13-18) Ho du ani ni rogo zingo, awirinarani agindigonga rani te. Nairiwo gu maku nga ani duni papara ga Mbori riigbu!

6. Wai Pauro ayugu gupai nga, ani na asunge berani fu akuarani aKristano?

⁶ Wa vura duhe wo, anga ani rogo dungurati tipa kina rogoda apai sa be akuarani te; ani yo a tipa ka fuka apai fuyo. Nirengo, Yesu ayaa: “Ngbarago ho gbe rogo gamahe susi gu duhe rogo diaha.” (Amokedi 20:35, NW ) Gu mokedi nangia Pauro anyakasipa gu sino nga ga gamahe ho ko ake gupai ni nga: “Ani ká kuti gu kusapai nga ga gaani maabangirise, ka si wo nga ya; bambiko gu ko nakido he, ko nga irarengo. Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.”—AEbere 10:23-25.

7, 8. Wai ani ayugo gu sino nga ga gamaahe rogo gaani adungurati na tipa aKristano rogo kura aringara?

⁷ Rogo dungurati, ani ‘nakusapa gaani maabangirise’ ho ani akaragapai ni ti regbo adunguratise watadu ho ani amanga papara agu adunguratise ni re. Agu apai ani afubee sani re nangarasa awirinarani angarasa nirengo. Ani nangarasa yo a na gaani afugo mbata fu tona adunguratise na fuo nyasaha. Gure nga gu regbo rengbe ani rogoho ka ngarasa agu awirinarani du rurungburaa, na ka fu wasa fu aguyo narungo kpotoyo yo, na ka ngarasa aguyo nawoka. (1 ATesaroniko 5:14) Agu aKristano nga aperengo nagama ngbatunga agu agamahe re na ngbaduyo yo dunduko, na si nga gupai ninaazeresa ngba dungu agu aboro ninaandu ku pati gaani adunguratise yo ti bambata regbo wa i abi gu nyemuse du dagbarani.—Atambuahe 37:21; Yoane 15:12; 1 AKorindo 14:25.

⁸ Wa vura duhe wo, anga ani dingiso gaani nyemuse tipa kina agu aboro duna ani rogo dungurati te. Si nakoda gu kpamiatise nga ga awirina dunduko rogo zegino. Nikpiapai, gure nga ndu gupai du asanduki gamahe ti ni ho rogo aBambu Kindo dunduko tipa Gu Mosoro Du Tipa Dudua ABambu Kindo. Si rengbe ka du nga gaani Bambu Kindo niwenehe, ono ani ima ino gupai nga, dungu akutu akuarani aKristano rogo kura aringara na wene bambu beyo ka dunguratiyo kutiihe te. Ho ani akoda berani ni ka fuka agamahe tipa Gu Mosoro Du Tipa Dudua ABambu Kindo, ani nayugopa gaani nyemuse rogo gu mangaapai re tipa agu awirinarani re nibasasa wa ani avuranga ino yo ti kpotoyo ya.

9. Gini banguapai aDezire Yekova akpinyemu tiyo ti ni dagbayo?

⁹ Tipagine aDezire Yekova akpinyemu tiyo ti ni dagbayo? Mbiko Yesu arugu yo i mangihe wo. (Yoane 15:17) Na gu nyemuse du yo nani tipa akurayo nga go padu ga Mbori toro kuriyo wa du yo nibasasa na wa du yo nibadona. Nyemuse nga gu kura “zuzu Toro.” (AGaratio 5:22, 23) Wa aDezire Yekova awisigo Ziazia Kekeapai, kini du pati agu adunguratise nga ga aKristano, na kini kparikpee fu Mbori zanga piriga, i nasa yugo nyemuse nisino yo i ki vura niraki rogo gu zegino ‘gu nyemuse nga ga bakere bange aboro naima zera’ rogoho vurũ.—Matayo 24:12.

Mangapai na gu Zegino Ani Araka Rogoho

10. Gini sunge si aida ani mangihe fu agu aboro du rogo gi zegino du pati rani re?

¹⁰ Pa fura Pauro tipa “gu kusapai nga ga gaani maabangirise” natingida rani na pa gu kura sunge du berani. Gu kusapai nga ga gaani maabangirise nakoda tungusa wene pangbanga fu agu aboro ata danga ni agu awirinarani nga aKristano ya. (Matayo 24:14; 28:19, 20; ARomo 10:9, 10, 13-15) Ngbatunga gu sunge tungusapai re nga kura mangaapai nga ga gamahe. Padu boro rogo gi sunge re nadia regbo beni, naida ome, naida ni mbakadi tini sani, naida ni yugopai fu tini, gbiati manga ni sunge na agu ahe du beni. Wa vura duhe wo, Pauro akepai a ki ya: “Mi nga ga aGiriki borobape na aboro kura ringara a, na airatatamana na airamungo a. Si du, mi asó gima tungusa wene pangbanga ti ni fu roni du Roma yo a.” (ARomo 1:14, 15) Wa kina Pauro, ka ani nikponga wa ani atumo gi ‘bape’ re ya.

11. Gini arugute adunga ngburungburu ya nga ga Ziazia Kekeapai narugapa gaani mangaapai na zegino, ono ginipai rugu ani tirani nani wa vura duhe wo vurũ?

¹¹ Ya mo kura sunge ho berani fu agu aboro angianga akuarani aidipase ya? Ii, nirengo, si kinaho. Rengo ngaha nga, ani ima ino gupai nga, “zegino dunduko du ni zogozogo ho be gbegberẽ ko.” (1 Yoane 5:19) Na ani ima ino gupai a nga, Yesu aya tipa gako abawiriki wee: “Aboro zegino nga yo te, wa kina re adu nga ni boro zegino ya.” Wa vura duhe nga aboro zegino nga ani te, ani naraka kina rogo zegino, na kini gbia undo behe. (Yoane 17:11, 15, 16) Fuo duhe tie were, asunge gu duho rogo zegino si aida ani mangihe. Gini asunga ngaha? Gu mokedi nangia Petero aima karagapai sa gu sanahe re. Ngbutuko mbata fu gbarasa yo Yerusarema, ko ake waraga fu agu aKristano nadu Asia Minor yo, sidu papara gupai ko akehe re naundo rani ani duna rugatinapai rogo agu apai ani mangaha rogo zegino.

12. Rogo gini gene du aKristano ni “nungunungu aboro . . . [ni] tata aboro,” fuo duhe tie wa gure, gine si aida i nehe?

¹² Bambatapai nga, Petero ayaa: “Abadiangba, mi nazungadi roni wa du nungunungu aboro nga oni, . . . [ni] tata aboro, oni né gu nyemuahe nga ga borose, nga gu naso vura na mbisimo.” (1 Petero 2:11) Rogo gu gene nga ga toro, ndikidi aKristano nga “nungunungu aboro . . . [ni] tata aboro,” mbiko gu ndikidipai moi aguyo duni mbedimbediyo bangiriyo tipaha, si nga ka gbia nyenye unga ngbangbaturũ yo, na aguyo i ayamba yo nga “kura avusende” tigayo namaabangiriyo ka raka rogo paradiso auru kpotosende nga gu nika ye mbembedii kumbatayo. (Yoane 10:16; AFiripoio 3:20, 21; AEbere 11:13; Yugoti 7:9, 14-17) Ono tie, gine nga gu nyemuahe nga ga borose gumba yo paha re? Si nakoda ngbatunga agu apai du wa nyemu ka duna kumuko, nyemu sa boro rimo ni si naawo, nyemu wasiwasi kodaba, na gu nyemupai ringbisi yo paha ni “kpihe” na “gbegberẽ nyemuahe.” —AKorosaio 3:5; 1 Timoteo 6:4, 9; 1 Yoane 2:15, 16.

13. Wai gu nyemuahe nga ga borose ‘asovura kuti mbisimorani’?

¹³ Ngbatunga gu nyemu ahe re “naso vura [aso nirengo] na mbisimo” rani. Si nagbarasapa gaani pagume dagbarani na Mbori na rogo gi gene re kini gbarasipa gu gaani maabangirise nga ga aKristano (nga gaani “mbisimo,” watadu unga). Nikpiapai, ka ani sonosi nyemu wasiwasi apai, wai ka ani rengbe ka fu tirani ni “unga ũmotumo, ni ziazia ha, . . . ngba fu Mbori”? Kangia ani nika zio ti gu gbina nga ga nyemu aũzegino, wai rengbehe ka du nga ani ‘nagbata kindo mbata’? (ARomo 12:1, 2; Matayo 6:33; 1 Timoteo 6:17-19) Gu gene ngbaa gbe nga ga manga gu kpiapai nga ga Mose, nga ka sa giirani kuti gu nyemuahe nga ga zegino, na ki moi ga Yekova sunge nibambatapai rogo gaani raka. (Matayo 6:19, 20; AEbere 11:24-26) Gupai re nga nyanyakipa banguapai tipa ka undo rani ani duna gu ngbanya dagbarani na zegino duni rengberengbehe.

‘Oni Kakuti Wene Mangaapai’

14. Tipagine ani a’asada tirani ti ni wa du ani ni aKristano ka kakuti manga wene sino?

¹⁴ Ani nabi kura nyanyakipa rugute rogo gu kura ga Petero afugo nga: “Gaoni mangapai . . . du ni wene he ku bangiri aGendiria; wa i nagumba rimoroni ki ya aboro gbegberẽ apai nga oni, i ki taasi rimo Mbori rago ye ko mbiko bi yo wene mangaapai ti roni.” (1 Petero 2:12) Wa du ani ni aKristano, ani namanga asadatise nyanyakii ka du nikpiapai fu aboro. Ani namangasunge sukuru yo nyanyakii. Ba gaani sunge yo, ani namangasunge yo nyanyakii na zanga manga biriki, ka sino gaani bairasunge vura gbera vurũ. Rogo gu kporo duna aboro rogoho na gayo apambori nibakiakia, kangia kumba watadu dee nga dezire, ni namanga bakere asadatise ka irisa agu arugute adunga ngburungburu ya nga ga aKristano. Si naadunga dedede nitaatapai te, ono gupai ini ani he nga, gaani sino nga gu du nikpiapai nafu ngbarago fu Yekova na ki duna wene sangbanaha dedede kurii agu aboro angianga aDezire ya.—1 Petero 2:18-20; 3:1.

15. Wai ani aino gupai nga, aboro ima ino pa ga aDezire Yekova nyanyakipa andiko nga ga mangapai rogo arago dunduko?

¹⁵ Aboro nabi gu diabese du dungu aDezire Yekova nani rogo gu gayo kakuti gu sino mangaapai du nikpiapai fu aboro, nga gu du nikekehe tipa yo vuru agu agarã susi. Nikpiapai, gu waraga pangbanga du rimoho nga, Il Tempo nga ga Italy atingidipai tipa yo ki ya: “Agu aboro du tingba sunge na aDezire Yekova ni gayo abadiasunge naringbisa payo ni agu aboro amanganga biriki tingba sunge ya, ni agu aboro idi kuti gayo idapase si ki wiri wa si ni gupai i aberã kina paha ti aregbo dunduko; wa vura duhe were, i ima rẽ tipa aboro fu irisa fuyo tipa gayo kakuti ruru mangapai.” Gu waraga pangbanga du rimoho nga, Herald nga ga Buenos Aires du Argentina yo ayaa: “ADezire Yekova yugu gupai vuru agu agarã susi nga, i nga ngangara abamangisunge, namangasunge kakaka na zuzuhe ti ni, na kingia agu aboro-ringara nagunde ti Mbori.” Gu wene bawirikipai nga ga Russia ko du rimoko nga Sergei Ivanenko afura tipa aDezire ki ya: “ADezire Yekova nga agu aboro ini yo yo rogo zegino dunduko ni agu aboro akuonga andiko ya, na gbe, i ini yo ti gu sino yo nga ga zanga keesa rogo tumo gayo marã-ngbeti.” Fuo manga aDezire Yekova gayo bakere adunguratise rogo gu ba du tipa adunguratise Zimbabwe yo, gu dee nangera kurii gu ba re afura tipa yo ki ya: “Mi abi bete aDezire Yekova i nidungura awaraga sande na kini girisi abambu ageno. Fuo guari yo, gu bangimbaro re adu nigigirihe susi gu si adu mbata fu ye yo kurogoho. Gaoni sosono agude nga agisangbaa. Ka zegino dunduko nihinga be aDezire Yekova, gure nga gupai du mi na nyemuhe.”

Gu Ranigose nga ga AKristano

16. Gini pagume du dagbarani na abazogo nga ga zegino yo, na tipagine?

¹⁶ Petero afura a tipa gu pagume du dagbarani na abazogo nga ga zegino yo. Ko ayaa: “Oni gí agu arugute nga ga aboro dunduko mbiko Gbia, ki nigi pa bakindo wa du ko ni bahe, na pa abazogo, nga agu yo ko nasia yo tipa mbusa aboro gbegberẽpai na tipa tambua agu yo namanga wenepai. Bambiko wo du sangba Mbori ya rogo manga wene pai oni za fugo mumungo aboro.” (1 Petero 2:13-15) Ani nafu tambuahe tipa agu aundo ani agbiaha be gu zogarago namangaapai ngba ruru gene, na afugo Petero naruga rani ani irisi agu andiko nga ga gu zogarago re na kini tumo gaani marã-ngbeti. Wa vura ino ani gupai nga, abazogo na rengo beyo ka fu mbusa fu akuondiko nga gu rengo Mbori na’asia paha fuyo, gu banguapai ani ara ti ni fuyo nga “mbiko Gbia,” angianga mbiko gunde be gu mbusa ka i fuhe ya. Si nga gupai Mbori akpinyemuhe. Kurii gure, ani akpinga nyemu ka ye na gbarasarimo kurii rimo Yekova mbiko fu yo mbusa fu rani tipa manga ani gbegberepai te.—ARomo 13:1, 4-7; Tito 3:1; 1 Petero 3:17.

17. Ho “mumungo aboro” asoga rani ni, ginipai rengbe ani ka duna kido kuti ni?

¹⁷ Si ni gupai nafu kina gberarago nga, kura “mumungo aboro” duna pagbia beyo narungosi rani rogo kura agene, ngbatunga gu du wa songoda gu badona nga ga kura aboro i naapeka azire ti rimo rani. Wa vura duhe wo, ti ga Yekova ringbisiringbisi regbo, gayo afugo nidu niyuguyuguhe ni aziree, na i ki kisi ngbayo kindi ti gayo ‘mumungo afugo.’ Gu gaani sino nga ga aKristano nayugoho ziazia. Gure nga ndu gupai agu abamangisunge nga ga irangbii yo nga aperengo naatambua rani ti ni dedede ni amangi wene sino.—ARomo 13:3; Tito 2:7, 8.

Ga Mbori Akanga

18. Wa du ani ni aKristano, rogo gini agene rengbe ani ka gbarasapa gaani ranirii?

¹⁸ Petero afu rugute ki ya: “Wa du aboro raniri nga oni ka oni sá nga gaoni raniri ni ũdada gbegberẽpai ya, ono oni dú ni ga Mbori azogo.” (1 Petero 2:16; AGaratio 5:13) Areme, gu gaani inohe nga ga Ziazia Kekeapai nakusa gorani kusayo be gu zire yugopai nga ga pambori. (Yoane 8:32) Kurii gure, ani na ranirii ka siapai, sidu ani rengbe arengba ka sia gupai ani aida ka mangaha. Wa vura duhe wo, anga apai dunduko ani amangaha kodihe na gbegberehe mbiko ani ngba rirani te. Ho ani asia agu aboro ni ani aida ka sa yo ni gaani abadiasungo, na agu arokoo ani aida ka vodaha, gu sino mbakadarii ani aidaha, gu mbaro ani aida ka ngihe, na zavura gu riahe ani aida ka rihe na gu buda ani aida ka mbiraha, ani natingida gupai nga, ndikidi aKristano nga ga Mbori akanga, angianga agu aboro nafu ngbarago fu tiyo ya. Ani nasia gupai nga, ka mangasunge fu Yekova angianga ka duni akanga fu gu nyemu apai nga ga borose du tirani ya watadu ka mbiisa gu nyemu apai nga ga zegino nata ye kini go a ya.—AGaratio 5:24; 2 Timoteo 2:22; Tito 2:11, 12.

19-21. (a) Wai ani abi agu aboro duna apagbia beyo rogo zegino? (b) Wai kura aboro ayugu gayo ‘nyemuse tipa awirina dunduko’? (d) Gine nga gu gaani sunge kiipaha kisusi?

¹⁹ Petero asusi kumbatayo ki ya: “Oni írisi aboro dunduko. Oni kpí nyemu awirina. Oni gúnde ti Mbori. Oni írisi bakindo.” (1 Petero 2:17) Wa duhe nga Yekova Mbori naidaha fu aboro i du rogo aba nga ga pagbia nibasasa, si naida ani fu gu irisa daada fuyo. Ani nafu kpee afu a tipa yo, tipa wa ka i mbu rani ani susi kumbatayo na gaani sunge tungusapai rogo pazereda na ki zi tirani kuti gaani sinombori. (1 Timoteo 2:1-4) Ono tie, ti kina gu bangisa regbo re, ani na ‘nyemu awirinarani dunduko’ tirani. Dedede, ani namanga kina weneapai tipa agu awirinarani nga aKristano, angianga gbegberepai ya.

²⁰ Nikpiapai, ho gu sogote nga ga angbatunga angaria ni rogo ringara sa rogo Afirika, gu ga aKristano sino mangaapai nangia ga aDezire Yekova adu tigaha kia. Gu waraga pangbanga du rimoho nga, Reformierte Presse nga ga gu ringara nga Switzerland atingidipai ki ya: “Rogo gu garã nangia 1995, gu riigbu i asigiraha tipa si ngere fuo agu arengo nga ga aboro Afirika, si aduna gopai behe ya akanisa dunduko narimisi tihe kurogo gu vura re kpara kina aDezire Yekova sa.” Ho pangbanga gi kerepai re adani rogo kura aringara rogo zegino, agu aDezire Yekova du Putu yo akedi riahe gbiati agu aziga nga ga bambungua niipo tipa si undo awirinayo gbiati kura aboro rogo gu ringara vura agbarasi paha re. (AGaratio 6:10) I airisi afugo Asanza 3:27 nga gu nayaa: “Ka mo niká nga na manga wenepai fu agu yo du he fu yo ya, ho rengbe mo arengba ni namanga ha.”

²¹ Ono tie, gu kura sunge gu duho si aida ani mangihe nga gu kiipaha kisusi gu nga ka fu irisa fu abazogo na kiipaha a kisusi gu nyemuse si aida ani yuguhe fu awirinarani. Gine nga gu sunge re? Petero ayaa: “Oni gúnde ti Mbori.” Ani na ga Yekova bape kurii rani susi gu nga ga aboro du kurii rani. Wai rengbe gure ka duni rengo? Na wai rengbe ani ka manga gaani asunge fu Mbori na fu irangbii ka ani arõanga arõa kubani kisusi ya? I nika karagapai sa agi asanahe re rogo gu paparaha naye fuo gere.

Oni Natingidaha?

• Gini asunge du be aKristano tipa i mangihe fu aboro na fu gayo aborokporo?

• Wai rengbe ani ka yugo gu sino berã nga ga gamaahe fu agu aboro du rogo dungurati?

• Gini sunge si aida ani mangihe fu agu aboro du rogo zegino?

• Gine nga bete agu aundo naye fu rani mbiko ka ani kuti nyanyakipa andiko nga ga mangapai?

[Gu kpiahe du ti kpewaraga 19]

Wai rengbe agu aborokporo nga aKristano ka duni agu aboro nafu ngbarago fu akurayo?

[Gu kpiahe du ti kpewaraga 20]

Tipagine aDezire Yekova akpinyemu tiyo ti ni dagbayo?

[Gu kpiahe du ti kpewaraga 20]

Ya mo ani rengbe ka yugo nyemuse fu awirinarani ka ani avuranga ino yo ti kpotoyo ya?