Ani Kakuti Padu Ani ‘Ninungunungu Aboro’
“Mi nazungadi roni wa du nungunungu aboro nga oni, nga tata aboro, oni né gu nyemuahe nga ga borose.”—1 PET. 2:11.
GAONI KARAGAPAI NGA GINE?
Tipagine rengbe ani ti ni ka ya ti mbedimbedi aKristano i nga nungunungu aboro?
Rogo gini gene du “kura akandoro” ngbaha wa nungunungu aboro?
Ginipai oni angera tipaha kumbatayo?
1, 2. Ada gu Petero aya tipa yó “nungunungu aboro,” na tipagine ko ayambuyo ti ni nga “nungunungu aboro”?
BETE agarã wa 30 fuo ga Yesu ku ngbangbaturũ yo, gu mokedi nangia Petero ake waraga fu gu ‘nungunungu aboro naadu nisiasia yo, nga aguyo naadu ni gbandakagbandaka yo ku Pondo yo, na Garatia yo, na Kapadokia yo, na Asia yo, na Bitunia yo.’ (1 Pet. 1:1) Si tie ziazia nga, pa manga ko sunge na gu fugo nga “siasia yo,” ko aafura tipa agu aboro naadu wa ko nga aguyo i ambedi yó niziazia toro na ki ‘vunguyo berewe nivovo yó kurogo unga maabangirise’ tipa i zogarago na Kristo ngbangbaturũ yo. (Oni gedi 1 Petero 1:3, 4.) Ono tipagine ko aya ti ni tipa yó wee, “nungunungu aboro nga oni, nga tata aboro”? (1 Pet. 2:11) Na rogo gupai re nga gine furani areme baraho duhe ni nga rogo zegino dunduko, ka aDezire Yekova du nga 650, mbedimbedi Kristano nadu gbua sa?
2 Si arẽarẽ ko mangisunge na gu fugo nga “nungunungu aboro” tipa mbedimbedi aKristano rogo bambata sa kama agarã. A wa duhe nirengo tipa gu yangarayo du areme, i anyenga anye kindi auru kpotosende ane te. Pauro nangia mbedimbedi boro dagba gu “umba rika aboro” re, ko ayaa: “Bambiko gaani ngbi du ngbangbaturũ yo, yo ani asunguda Batasi ku ho ni nga Gbia Yesu Kristo.” (Rk. 12:32; Frp. 3:20) Wa duhe nga gayo “ngbi du ngbangbaturũ yo,” ti regbo kpio, mbedimbedi aKristano naga ku ngbangbaturũ yo kurogo gu raka du niwenehe zanga kpio. (Oni gedi AFiripoio 1:21-23.) Si du rengbe ani ti ni ka ya wee, i nga “nungunungu aboro” auru kpotosende ane tii gi ga Satana zogarago re.
3. Gini sanahe nakura tipa “kura akandoro” awere?
3 Na ginipai du tigaha tipa “kura akandoro”? (Yo. 10:16) Ya mo i na gu maabangirise beyo rogo Ziazia Kekeapai tipa ka raka auru kpotosende nyeanye kindi? Nirengo, gure nikangia kpuyo nyeanye kindi! Ono wa vura duhe wo, wadu rago re, i a nga kina nungunungu aboro. Rogo gini gene?
“ŨZEGINO DŨ MONGO NIUKAGA OMEHE”
4. Ginipai agbia zegino arengbanga na mangaha ya?
4 Wa duhe nga Yekova nambugene fu gi ga Satana zegino re si nindu kindi kumbatayo, aboro dunduko kodihe na aKristano nikaa gbiatiyo agbia na arungo mbiko sangbana ga Satana samungu kuti Yekova. Ani nagedapai rogo ARomo 8:22 nga: “Ani ini aina ya ũzegino dũ mongo niukaga omehe nimbu be ima kina ku awere.” Ono tie, agbia zegino, aboro-birĩ-inohe, agu aboro naundo aboro, kodihe na gu kura aboro, i arengbanga ka nyasa riipa gipai re te.
5. Naatona rogo 1914, ginipai amirioni aboro amangihe, na tipagine?
5 Naatona rogo 1914, amirioni aboro ima sia kadu ni agu azogo nga ga gu Bakindo Mbori namoiko nga Kristo Yesu. I na nyemu kadu nipapara gi ga Satana zegino re te. I aidanga kadu a ni asongodihe te. Kuba gure, i namangasunge na gayo raka gbiati agu ahe du beyo tipa ka songoda ga Mbori Kindo nani.—Rom. 14:7, 8.
6. Rogo gini gene i narengbe ka ya ti ni ti aDezire Yekova i nga nungunungu aboro?
6 Ii, aDezire Yekova rogo aringara niima susa 200, na i nga agu aboro ringara nairisa andiko airisa, wa vura duhe wo, i dunduko naraka wakina nungunungu aboro. I nabanda tiyo nyanyaki ti zanga rimiso tiyo kurogo agu apai nabipa birĩ-zogarago na agu apai nabipa gu ringara i araka rogoho areme. Zavura kina awere, i nabi tiyo wa avuru gu vovo zegino Mbori nika ye nani. I na ngbarago ka bi agu regbo i araka ti ni ninungunungu aboro rogo gi gbegberẽ zegino re wa si andu ka digo.
7. Wai ga Mbori amoyambu nika raka nyeanye kindi, na wari i nika raka ni?
7 Barambeda, Kristo nika mangasunge na gu pagbia du beko tipa ka gbarasa gi ga Satana gbegberẽ zegino re. Ga Kristo zogarago nika dia ingapai gbiati kpio ti aboro kusayo. Si nika nyasa riipa agu aboro dunduko naazingi kuti ga Yekova bakere pagbia. Ga Mbori ruru amoyambu nika da ni agu aboro nika raka nyeanye kindi rogo Paradizo auru kpotosende. (Oni gedi Yugoti 21:1-5.) Ti gu regbo re, aũzegino dunduko nika ‘bata be du niga zirã kanga sa kura gu taarimo nga ga awiri Mbori.’—Rom. 8:21.
GINIPAI SI AIDA NDIKIDI AKRISTANO NIMANGIHE?
8, 9. Oni sakingo rogo gupai Petero apehe nga “oni né gu nyemuahe nga ga borose.”
8 Petero asakipai tipa gupai si aidaha be aKristano ki yaa: “Abadiangba, mi nazungadi roni wa du nungunungu aboro nga oni, nga tata aboro, oni né gu nyemuahe nga ga borose, nga gu naso vura na mbisimo.” (1 Pet. 2:11) Gu rugute re adu fu mbedimbedi aKristano, ono si rẽarẽ a tipa ga Yesu kura akandoro.
9 Si agberãnga ani mbiisi gu kura gaani nyemuapai ringbisihe kuti agu arugute nga ga Bakusirani te. Nirengo, si nasarani ani duna ngbarago rogo raka yo. Nikpiapai, kpotorani niidi aida ani ri wene riahe na ki mbirihe, ani zambuasi tirani, na ki ngi wiri mbaro na wene abakurearani. Zavura ho boro akodaba ni na gani badiarogatise, si nafu ngbarago afu a funi. (1 Kor. 7:3-5) Ono Petero aafura ane tipa “gu nyemuahe nga ga borose” nga gu “naso vura na mbisimo.” Gure nga gu gbegberẽ nyemuahe nga ga borose. Gu kura sasa fugo Ziazia Kekeapai naya tipaha wee “bakere nyemu kodaba” (King James Version) watadu “nyemu ingapai” (New International Version). Si tie ziazia nga, gu ga boro nyemuapai nasovura na agu aringbisapai nga ga Yekova gbiati gu nagbarasapa gani pagume naako, si naida ní nehe ane. Gu Kristano naida ka mbisa gani nyemuapai ngba gbegberẽ gene, si rengbe ka ye na kpio funi.
10. Gini apai Satana amangaha tipa ka sa aKristano i du nipapara gi gako zegino re?
10 Ga Satana sásá nga, ka rungburasi gu ga aKristano diaberã du tipa pa biyo tiyo ‘ninungunungu aboro’ rogo gi zegino re. Bakere nyemu aũzegino, wasiwasi kodaba, worimo, du nibambata boro rogo apai yo, gbiati gu rukö nga ga ringara, si dunduko nga ga Satana agbina, na si naida ani nibihe abi wo. Ka ani diberã nzunzu ka bandatirani tigi gbegberẽ nyemuapai re, gure nga ani aidanga kadu nipapara ga Satana zegino te. Gure yuguhe gbaiga nga ani naraka rogoho tipa kina wiri guru regbo gbua. Guhe ani amanga ome nzunzu tipaha nga ka raka nyeanye kindi rogo ga Mbori vovo zegino nga gu ruru apai kadu rogoho.
WENE MANGAAPAI
11, 12. Wai gu aboro naabi ayeaye ti kura aregbo, na ginipai rengbe ani ka gumbaha tipa aDezire Yekova?
11 Petero asakipai berewe tipa gupai si aidaha be gu Kristano duni ‘nungunungu boro’ rogo veresi 12 ki yaa: “Gaoni mangapai ki du ni wene he ku bangiri aGendiria; wa i nagumba rimoroni ki ya aboro gbegberẽ apai nga oni, i ki taasi rimo Mbori rago ye ko mbiko bi yo wene mangaapai ti roni.” Wo aboro naabisirapa agu ayeaye naraka rogo gu ringara angianga gayo ya. Mbiko wa du yó kia tigayo amurakporo, i rengbe ka biyo tigu kura aregbo wa amangi gbegberẽ apai. Afugoyo, gayo mangaapai, gayo vorokoo, isoke gu gene i angera ngbaha rengbe kadu a kia. Ono ho i amanga weneapai ni, watadu ho du gayo mangapai ni niwenehe, gu gbegberẽ apai aboro apehe tipa yó mbiko padu yó kia naguari kusayo.
12 Teketeke a, ndikidi aKristano nikparakpara yó dagba gayo amurakporo yo rogo fugoyo gbiati agu aũmbaro i asiaha. Gayo vorokoo na gayo mbakadatise nayugo yó ni agu aboro du kia ti agu aboro i araka dagbayo. Gipai re asa gupai nga aboro tona ka fura barayo gbegberẽ ya i nga amangi gbegberẽ apai. Ono tie, kura aboro naatambua yó atambua tipa gayo wene mangapai.
13, 14. Wai gu “i asapa ngbanga fu tatamana mbiko sabehe”? Oni funga kpiapai tipa gipai re.
13 Ii, wene mangapai ima rengba ka dia gu gbegberẽ apai aboro agumba ti rimorani kusayo. Zavura kina Yesu naadu niruruko fu Mbori, aboro aima kitangbaanga ko a. Aboro anaayamba ko nga “boro aramana, bambiri imekakue, badia abarogo marã ngbeti na aboro ingapai!” Ono gu tatamana ko adu nani rogo mangasunge fu Mbori, si asa agu apai aboro apehe tipa ko re niziree. Ko ayaa: “I asapa ngbanga fu tatamana mbiko sabehe.” (Mt. 11:19) Kina gu bangisapai re du tipa rani areme. Nikpiapai, bete agu aboro du pati gu Betere du Germani yo rogo gu gbata nga Selters, i nabihe nga, agu awirina namangasunge Betere yo, gu gene i araka ngbaha, si angbanga te. Ono gu boro nangerakurii agu aboro du rogo gu gbata re akaragapai ki yaa: ‘Agu aDezire Yekova namangasunge yo, gayo gene raka kia, na i afudanga agu aboro i araka dagbayo te.’
14 Gu kurapai wakina gure amangi barambeda tipa agu aDezire Yekova du rogo gu gbata nga Moscow, Russia yo. Aboro akitingbaanga yó nga i namanga dungu gbegberẽ apai. Sidu, rogo Banzinga 2010, gu Bapengbanga Nga ga Putu Du Tipa agu Arengo Nga ga Aboro du Strasbourg, France yo adakuti gupai nga, ingahe nangiaha fu agu aboro du rogo gu gbata nga Moscow ka gbarasapa gu irisombori nga ga aDezire Yekova rogo gu gbata re na i na rengo beyo tipa ka rugusa yó ti gayo adunguratise te. Gu bapengbanga du Putu yo re ape gupai nga, gu bapengbanga du Russia yo, si ayugongo gu gbegberẽpai aDezire Yekova amangihe te. Si ape gu kurapai nga, gi gayo bapengbanga re amangisunge na agu arugute nga ga Moscow arunga ya kuti aDezire Yekova.
ANI RAFU AGBIA NGBII
15. Gini arugute nga ga Ziazia Kekeapai ndikidi aKristano rogo zegino dunduko apekafuo ho?
15 Agu aDezire Yekova du Moscow yo gbiati aguyo du rogo zegino dunduko, i namanga gupai Petero aya si naida aKristano nimangihe. Ko ayaa: “Oni gí agu arugute nga ga aboro dunduko mbiko Gbia, ki nigi pa bakindo wa du ko ni bahe, na pa abazogo.” (1 Pet. 2:13, 14) Wa vura duhe nga ndikidi aKristano nga papara gi gbegberẽ zegino re te, i nagiasangba abazogo agia mbiko “kina Mbori namoi yo” a wa Pauro aruguyo.—Oni gedi ARomo 13:1, 5-7.
16, 17. (a) Ginipai nayugo nani nga ani asoganga abazogo te? (b) Ginipai kura abazogo aidi kutini?
16 Ho aDezire Yekova amangapai ni wa “nungunungu aboro” rogo gi zegino re, i wa agu aboro namanga apai nigbuko tipa ka bisirapa abazogo te. I arimisongo tiyo watadu ka bisirapa agu aboro naida ka fura tipa gu gayo adiaberã du tipa birĩ-zogarago te. I wa gu kura apambori ninaarimiso tiyo kurogo agu apai nga ga birĩ-zogarago te. I aʹasadanga ka zomia abazogo i aria gu gene i azoga aboro ngbaha te. I na nyemu ka samungu kuti abazogo watadu ka zomia kura aboro i samungu kutiyo a te!
17 Ho aKristano agiasangba abazogo ni ringbisihe kuti gu rugute Petero afuhe nga “oni írisi bakindo,” gure nga i nayugo irisa tipa gu pagbia du agu abazogo re nani. (1 Pet. 2:17) Kura aregbo kinaho abazogo aye ka bi gupai nga ndupai ho i naabakabangiriyo tipa aDezire Yekova te. Nikpiapai, Boro birĩ-zogarago sa Germani yo nga Steffen Reiche ayaa: “Ga aDezire Yekova mangapai aima ngba tigu regbo i aarungosiyo kina wai duhe awere. I aambunga pa gayo idapase tigu regbo i aarungosiyo ti ni te, na i anaamanga wenengai fu kura zizi aboro. Ko aya agi asino re aima duna nyanyakipaha fu gu ringara duwa Germani were, gbe, mbiko sino bete aboro atona ka gberã kina kumbatayo koyo du agu akurayo ni naaye rogo gu kura aringara watadu aguyo naadu na gayo ida kia gbiati agu abipai du tipa birĩ-zogarago.”
ONI YUGU NYEMUSE
18. (a) Tipagine duhe ti ni taata furani ani kpinyemu awirina? (b) Agu aboro angianga aDezire Yekova ya, ginipai i abihe?
18 Petero ayaa: “Oni kpí nyemu awirina. Oni gúnde ti Mbori.” (1 Pet. 2:17) ADezire Yekova nagunde agunde ti fu gberarago fu Mbori, na gipai re naundo yó i nimangi gupai ko kpinyemuhe. I na ngbarago ka mangasunge fu Yekova na agu awirinayo du rogo zegino dunduko nga agu aboro duna kina gu bangisa nyemupai re tiyo. Sidu tie, si fuyo taata tipa i “kpí nyemu awirina [dunduko].” Ngbatunga gu nyemuse re rogo gi zegino ani araka rogoho re te, na kina ngba aboro ni naazera ka bi aDezire Yekova na gipai re. Nikpiapai, ngba gu dee namangasunge na gu ga Amerika basunge du tipa biko arago azere ka bi wai agu aDezire Yekova du Germani yo ayugu nyemuse na ki undo agu awirinayo naaye tipa gu bakere dunguratise nga ga dungu aringara rogo 2009. Ri ape gupai nga, wa ri atona mangasunge rogo gu ba re kindi, ri aabingo ngbatungapai wa gure te. Kusa, Dezire Yekova sa ayaa: “Agu apai dunduko ri apehe tipa rani, ri apehe na gu worofugo nayugo gupai nga ngbari aima zera ka bipai wa gure.” Ya mo boro apenga pai foro wa gure pati gu bakere dunguratise mo adu pati ni dagba agu aboro naaye tipaha?
19. Ginipai si aida ani diaberã tipa ka mangaha, na tipagine?
19 A wa wiriki ani he, aDezire Yekova nayugoho rogo dungu apai yo nga i naraka nzunzu wa “nungunungu aboro” rogo gi ga Satana zegino re. Na i na ngbarago na gu diaberã i namangihe tipa ka nye wa gure. I na nyanyaki maabangirise nga regbo nye koyo ngbutuko tipa i raki nyeanye kindi rogo ga Mbori vovo zegino nga gu ruruapai nikadu rogoho. Ya mo oni amaanga bangironi kumbatayo tipaha te?