“Oni Mbédi Na Mbori”
“Oni mbédi na Mbori, ko ki mbedi na oni.”—YAKOBO 4:8.
1, 2. (a) Ginipai aboro naapehe dedede ya si nga rengo? (b) Gini rugute Yakoba afuhe, na tipagine si aidi gupai aida ti ni nga ko fu gu rugute re?
“MBORI na kina rani.” Aboro aima keka agu afugo re ti agu akpiaahe nga ga aringara nga gu i naamangaha si naarukuba gayo mangaapai, na zavura ti agu arokoo nga ga abanzengere a. I aima keka gu fugo nga, “Ani nakido kuti Mbori” kpakpu badungu zau-marã yo nga gu ka i agedanga bangehe ya, na si nikekehe a ti akpekasa ti agi aregbo du awere re. Aboro rogo arago dunduko naya wee, i na dawedawe pagume dagbayo na Mbori. Wa vura duhe wo, ya mo oni arengbanga ka ida gupai nga, tipa boro duna ngbatunga gu pagume re nzunzu si naida ni mangi kurapai kisusi gupai gbua nga ka fura tipaha na kini yugu kekeapai tipaha tee?
2 Ziazia Kekeapai nayugo gupai fu rani nga, boro rengbe arengba ka duna ngbanya dagba ni na Mbori. Ono tie, si naida bakere asadatise. Zavura gu mbedimbedi aKristano nadu rogo bambata sa kama agarã, si aidi bete yo nyakasi gayo pagume na Yekova Mbori. Si du gu babiapai ni Kristano nangia Yakoba aza kura aboro ti ni ti gu gayo sino nangia ga borose na gayo zanga du gigirii rogo toroyo. Kina vuru agu arugute yo re, ko afu gi nyanyakipa rugute re nga gu nayaa: “Oni mbédi na Mbori, ko ki mbedi na oni.” (Yakoba 4:1-12) Ginipai Yakoba aberẽhe ho ko aya ni wee “oni mbédi na Mbori”?
3, 4. (a) Ginipai gu waraga Yakoba akehe awiri tingida bete agu aboro nani naagedaha rogo bambata sa kama agarã tipa gu fugo nga “oni mbédi na Mbori”? (b) Tipagine rengbe ani ti ni ka rugatirani nzunzu na gupai nga, boro rengbe arengba ka mbeda na Mbori?
3 Yakoba amangisunge na gu fugo dungu aboro aima rugatiyo na ni nga aguyo naageda gako waraga rogo bambata sa kama agarã. Gu ga Mbori Ndiko ko afuhe kube Mose, si aima fu kparakpara arugute fu aboromotumo tipa wai rengbe yo ka ‘mbeda na’ Yekova kuba gako aboro. (Gate 19:22) Rogo gi gene re, agu aboro naageda gu waraga Yakoba akehe, si arengbe ka tingida yo na gupai nga, ka i bingo pa mbeda na Yekova nitaatapai ya. Yekova nga gu babakerepa boro duna kiki ko ti ni rogo zegino dunduko.
4 Ngba kura gene berewe, si rengbe ka du wa gupai gu kura bakere bawiriki Ziazia Kekeapai atingidihe nga gu nayaa, “gi rugute du [rogo Yakoba 4:8] re nayugopa nyanyakipa maabangirise.” Yakoba aini gupai nga, Yekova nayamba kpakpa aboro dedede koyo du ko ni rogo nyemuse yo i mbedi na Ko. (2 Pekapai 15:2) Gu motumo nangia ga Yesu azakigene ni urungbuhe fu aboro i mbedi na Yekova ngba ruru gene. (AEfeso 3:11, 12) Areme, gu gene nambedisa boro koyo du Mbori ni ima zaka fu dungu amirioni aboro! Ono wai tie, rengbe ani ka mangasunge wenengai na gi iiriwo mamu du berani re? Ani nika makiapa agene biata niguruguruhe nga gu rengbe ani ka ru ngbaha ka mbeda na Yekova Mbori.
Oni Kakuti ‘Wirikapai Tipa Mbori’ Kumbatayo Kindi
5, 6. Wai du gu kpiapai nadu tipa Samuere ho ko aduni tooni, ayugo gupai nakoda pa ‘wirikapai tipa Mbori kindi’?
5 Kuti gupai du rogo Yoane 17:3, Yesu ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” Dungu asasa fugo gi veresi re nikparakparaha tooni ti gu du rogo New World Translation. Kuba gupai nga ‘i naawirikapai tipa Mbori kindi,’ gu fugo i apehe gbua nga “ka ino” Mbori watadu “ino” Mbori. Ono tie, badungu wene abawirikipai tipa ngbatunga fugo-aboro nape gupai nga, gu bambata pa-Giriki i asa gipai re ti ni si nakoda gupai nandu kina kumbatayo kindi, nga gu rengbe a nandu na boro sa wene inidotise dagba ni na kurani.
6 Inido Mbori wenengai aadunga nivovopai rogo agu a’uru nangia ga Yesu te. Nikpiapai, rogo gu Ziazia Kekeapai i akehe rogo pa-Ebere, ani nageda gupai rogoho nga, ho Samuere aduni ni tooni gude, ko ‘ainanga Yekova ho te.’ (1 Samuere 3:7) Ya mo gu re nayugo gupai nga Samuere ainipai tipa gako Mbori gbua tooni? Oó. Si aima du nirengo nga avunguko gbiati aboromotumo aima yugopai fuko nibakerehe tipa Mbori. Ono tie, kuti gupai wene bawirikipai sa apehe, gu pa-Ebere i amangisunge na ni rogo gu veresi re, i rengbe ka ‘mangasunge nani tipa kina gu boro kurani nainidi tini na ni wenengai gbe.’ Samuere ainanga Yekova tigu regbo nangia ha re wenengai, wa gu ko aini ko kusa ti gu regbo ko anamangasunge fu Yekova nigu boro nanaata na fugoko fu aboro te. Wa Samuere aasona, ko atona ka ino Yekova nirengo, ki duna dawedawe pagume dagba ko na Yekova.—1 Samuere 3:19, 20.
7, 8. (a) Tipagine si aidanga agu adudunguro yugopai nga ga Ziazia Kekeapai zeresi kpotorani yo ti ni ya? (b) Gine nga bete gu dudunguro arengo du rogo Fugo Mbori nga gu si aida ani asadi tirani ka wisigoho?
7 Ya mo oni nawirikapai tipa Yekova tipa ka ino ko wenengai? Tipa oni mangihe wo, si naida oni “nikpi nyemu” gu riahe nga ga toro nga gu Mbori naafuhe. (1 Petero 2:2) Ka oni nyenga kina kuti gu bambata wirikapai du tipa Mbori ya. Oni mangi bakere asadatise ka wirika bete gu dudunguro yugopai nga gu du rogo Ziazia Kekeapai yo. (AEbere 5:12-14) Ya mo ngbatunga gu yugopai re nazeresa kpotoroniyo, oni kini bihe nga si niba kpakarakpakaraha fu roni? Ka si du wo, oni tingidi gupai nga, Yekova nga “bakere bayugupai.” (Yesaya 30:20) Ko nga gu boro inipa rimiso dudunguro arengo ku berã airazangarengba yo. Na ko rengbe ka fu maku kuri roni na gaoni ndikidi asadatise tipa oni rugu tironi na gupai ko ayugoho fu roni.—Atambuahe 25:4.
8 Tipagine oni arengbanga ti ni ka wisigo tironi nibipa “gu dudunguro apai nga ga Mbori” ya? (1 AKorindo 2:10) Anga kungbo kpasiaka yugopai du ngaha wa gu rengbe abawisigipai tipa agu aida nga ga apambori na agu abarumbatayo rogo apambori naatikango rii paha te. Si nga bawene ruru arugute naundo rani ani wiriki dudunguro apai tipa gu berã nga ga gu Barani duna nyemu rani tiko na tipa agu apai du ngbadukoyo. Nikpiapai, wa gu nga pa motumo tumorii, na gu ‘okõokõapai nga ga Mbori,’ gbiati gu dungu amokido nga gu Yekova amangisunge nani ka banda gako aboro na ki digisi gako aringbisapai tipa yo, si nga agu ayugopai gbiati agu akuraha du wa kinaha nibawenehe na si nga wene riiafugo tipa ga boro wetekapai gbiati wisigopai nisase.—1 AKorindo 2:7.
9, 10. (a) Tipagine du ruko ti ni nikerepai, na gine nika undo rani ani nekehe? (b) Ho daha ni tipa gu inohe du tipa Yekova, tipagine si aida ani asadi tirani ti ni ka duna umbasitise?
9 Wa oni nikaa sona rogo ino gu dudunguro rengo nga ga toro, oni banda tironi be gu kerepai rengbe inohe ka ye na ni, nga ruko. (1 AKorindo 8:1) Ruko nga kere he, bambiko si nakpara boro akpara kusayo ti Mbori. (Asanza 16:5; Yakoba 4:6) Oni tingidi gupai nga, si aidanga boro abia tini mbiko gani inohe te. Nikpiapai, oni berẽnga pa agi afugo re, nga gu du ti tonatona gu buku napepa gu sona kumbatayo nga ga ngbatunga aboro rogo birĩ inohe yo, si nayaa: “Ho ani ainopai ni gbe, gu regbo re gu ani aruga tirani na gupai nga gaani inohe nikina tooni he. . . . Agu apai dunduko wiriki ani he nga kungbo tooni pai ka ani ringbisihe kuti agu apai ani ata wirikangaha ya.” Ngbatunga gu umbasipatise re, si nafu ngbarago. Wa duhe tie were, ho daha ni ti gu kikiipa inohe nga gu du tipa Yekova Mbori, ani na dungu nduapai berani tipa ani nye rogo umbasitise yo kindi. Tipagine?
10 Oni makianga bete agu afugo nga ga Ziazia Kekeapai tipa Yekova. “Gamo aberã du ni bagasigasi he!” (Atambuahe 92:5) “[Ga Yekova] rugatinapai ni basukasuka ha.” (Atambuahe 147:5) “Ka i rugu nga tise na pa gako [ga Yekova] rugatinapai te.” (Yesaya 40:28) “Ako gu dungura nga ga gu ũkumuko nga ga Mbori tatamana na inahe!” (ARomo 11:33) Ziazia tie, anga regbo ho nika ye ani ka ino agu apai dunduko ti ni si aida ani inihe tipa Yekova te. (Batungusipai 3:11) Ko ima yugo dungu iiriwo apai fu rani, wa vura duhe wo, ani na badungu apai berani kumbatayo nga gu adunga digidoho ti ni ya, si aida ani wiriki bakere apai tipaha. Ya mo ani abinga gu maabangirise re na ngbarago na ni umbasitise tee? Wa ani awirikapai, ani mangisunge tie na gaani inohe si du nimburu gupai nambedisa rani koyo du Yekova ni na tipa undo kura aboro i mangi kinawo a, angianga ni gupai ani ka kiisopa tirani mbikoho kisusi akuarani ya.—Matayo 23:12; Ruka 9:48.
Oni Yugu Gaoni Nyemuse Tipa Yekova Rogo Mangaapaiyo
11, 12. (a) Wai si aida gu inohe ani awirikaha tipa Yekova mangisunge na ani? (b) Gine rengbe ka yugo gupai nga, boro na ndikidi nyemuse tipa Mbori watadu ni na ni te?
11 Gu mokedi nangia Pauro akodi inohe na nyemuse si ki rengbe arengba. Ko akepai ki yaa: “Mi nakpara tipa gi pai re ya gaoni nyemuse moi pai ki susi asusa gbe rogo [ndikidi] inahe na pa kparia pai dũ.” (AFiripoio 1:9) Kuba gupai nga ani hisi tirani na ruko, si naida gupai nga, ani mbu gu wene rengo wiriki ani he dunduko tipa Yekova na gako aringbisapai kiisi gaani nyemuse tipa gu Barani du ngbangbaturũ yo.
12 Rengo ngaha, badungu aboro nayaa i nakpinyemu Mbori, nirengo i amanganga ha te. I rengbe ka du ni aperengo tipa gu berãpai hisi kpotoyo yo na berã yo. Ngbatunga gu berãpai re si gu ngbaangba na si naida gupai aida nga boro du nani, ho si amangapai ni na ndikidi inohe. Ono anga si nisaha nga ndikidi nyemuse tipa Mbori te. Tipagine adunga ha ti ni wo ya? Oni kparianga pa wai Fugo Mbori ayugorogo ngbatunga gu nyemuse re: “Gi nga du na nyemu Mbori re, nga ka ani kuti gako rugute.” (1 Yoane 5:3) Nyemuse tipa Yekova tie rengbe ka du nindikidihe kinaho si ayugotihe ni rogo mangaapai nigiasangbaa.
13. Wai rengbe gunde ti Mbori ka undo rani ani yugu gaani nyemuse tipa ko?
13 Gunde ti Mbori nika undo rani ani irisi sangba ko. Gi bakere kiki nga gunde ti Yekova re gbiati dudunguro irisa tipa ko naye mbiko gu inohe ani awirikaha tipa ko, nga gu wirikapai du tipa du ko niziazia ko nyeanye kindi, na gako taarimo, na ome, na ruru sarangbanga, na tatamana, gbiati nyemuse. Ngbatunga gu gunde re si na nyanyakipaha tipa boro mbedi na ko. Nirengo, oni kparianga gupai Atambuahe 25:14 apehe niyaa: “Ga Yekova rondo du fu agu yo nagunde ti ko.” Sidu, ka ani du na ndikidi gunde ti fu gberarago fu gu Barani du ngbangbaturũ yo, ani rengbe arengba ka mbeda na ko. Gunde ti Mbori nika undo rani ani kakuti agu arugute nga ga tatamana du nikekehe rogo Asanza 3:6 nga gu nayaa: “Mo rá fu ko rogo gamo apai dunduko, Ko arúga gamo apai foro nzunzu.” Gupai re, rogoyo nga gine?
14, 15. (a) Gine nga bete agu adiaberã ani agbia tirani dedede nani rogo raka? (b) Wai rengbe ani ka manga diaberã rogo gu gene nayugopa gaani gunde ti Mbori?
14 Si naida oni nimangi diaberã dedede na a’uru dunduko, nga agu adiaberã duna nyanyakipaha gbiati gu duna taatapaha. Nikpiapai, gini ngbatunga afugo oni ka gumbaha na gaoni badiasunge, na agu akuaroni du oni na yo sukuru yo, na gaoni amurakporo? (Ruka 6:45) Ya mo oni amanga gu sunge nyanyakii du oni ti ngbaha, watadu oni nika asada tironi ka nyasaha nimanga oni he tooni tooni daho si ka nyasa ni? (AKorosaio 3:23) Ya mo oni ambeda gbe koyo du agu aboro ni duna tooni nyemuse tiyo tipa Yekova, watadu koyo du aguyo ni adunga na nyemu ko ti yo ya, watadu oni nika asada tironi ka gbata gene tipa nyakasa gaoni pagume dagba roni na agu aboro du nyanyakii rogo toroyo? (Asanza 13:20) Ginipai oni nika mangaha, zavura rogo rukutu apai yo, ka sonosa nyemu ga Mbori Kindo kumbatayo? (Matayo 6:33) Ka si du nga agu arugute nga ga Ziazia Kekeapai adunga ngburungburu ya nikaa banda gaoni diaberã rogo a’uru dunduko, wa ngbatunga gu ke yo kina paha gbua herẽ, si nika yugo gupai tie nirengo nga oni natingidapa Yekova atingida “rogo gaoni apai yo dunduko.”
15 Si nzunzu nga, agu adiaberã dunduko nga gu ani amangaha, si naida ani dihe ringbisihe kuti gi berãpai du re nga: ‘Ginipai Yekova aida mi mangihe? Gini gene ka mi amangaha rogoho si ki fu ngbarago fuko gbe?’ (Asanza 27:11) Padu ani na gunde ti Mbori rogo gi gene re nga bawene gene tipa yugo gaani nyemuse tipa Yekova. Gunde ti Mbori nika fõngbaduraniyo a ani banda tirani gigirii rogo toroyo na rogo berã rani na ti kpotorani. Oni tingidi gupai nga, rogo kina gu bangisa veresi Yakoba azungodi aKristano tipa i “mbédi na Mbori” rogoho re, fugo ko nangarasa rani a, kini yaa: “Oni gírisi beroni, oni nga aboro ingapai; oni mbákadi kpotoroni yo, oni nga aboro berãpai ue.”—Yakoba 4:8.
16. Nigama ani ahe fu Yekova, ginihe ka ani arengbanga ka mangaha ya, wa vura du he wo, ginipai rengbe ani arengba ka mangaha na diabese dedede?
16 Rengo ngaha, padu ani na nyemu Yekova tirani, si nakoda badungu apai kurogoho kisusi gupai gbua nga gunde ti manga gbegberepai. Nyemuse nafõngbaduraniyo a ani mangi gupai du niwenehe. Nikpiapai, gaani karagapai nga gine tipa gu bakere inapai nga ga Yekova fu rani? Yakoba akepai ki ya: “Wene [a]gamahe dunduko, na ziazia ũgamahe dunduko i nagama ha, si naye ari yo du Ba ni, nga Bafu aimarago.” (Yakoba 1:17) Nirengo, ho ani naagama agu ahe ni du berani fu Yekova, ani afunga ha fuko tipa si kumukosi ko te. Ko aima duna gu wene ahe re na agu aũkumuko re beko nigako. (Atambuahe 50:12) Na ho ani afu omerani ni gbiati gaani aregbo fu Yekova, ani abingoho ni gupai ka ani zanga fuhe fuko ko ki duna zingoho te. Ka si vura du nga ani ká ti tungusa gu wene pangbanga nga ga ga Mbori Kindo, ko rengbe ka sa ambia si fura! Tipagine tie si aida gupai ti ni nga ani fu agu ahe du berani, na gaani regbo gbiati omerani fu Yekova? Bambataha nga, bambiko si nga gu gene ani ayugo gaani nyemuse rogoho tipa ko na ngbaduraniyo, na mbisimorani, gbiati omerani.—Marako 12:29, 30.
17. Ginipai rengbe ka fõngbaduraniyo ani gamuahe esuesu fu Yekova?
17 Ho ani agamahe ni fu Yekova, si naida ani fuhe na ngbarago, “Bambiko Mbori nakpi nyemu kina gu boro nagama he esuesu.” (2 AKorindo 9:7) Agu arugute adunga ngburungburu ya du nikekehe rogo Pa Fu Rugute ni Ue he 16:17, si rengbe ka undo rani tipa ani gamu ahe esuesu, nga gu nayaa: “Aboro ni ba sa sa agáma he a wa rengbe ome ni na ni, kina ku sangba gu maku nga ga Yekova gaani Mbori nga gu fu ko fu roni.” Ho ani aberãpai ni kuriipa gu inapai Yekova naamangaha fu rani, si nasa rani ani duna nyemu gamaahe fuko esuesu na niweneringise. Ngbatunga agu agamahe re nafu ngbarago ku ngbadukoyo, wa kina gu wiri tooni gamahe gu gude naafuhe nga guni duna nyemu vunguni tini gbe. Yugo ani gaani nyemuse rogo gi gene re nika undo rani tipa ani mbedi na Yekova.
Oni Mbakadi Pagume Dagbaroni na Yekova Rogo Kparakpee
18. Tipagine duhe ti ni niwenepai fu rani ani makiapa wai si aida ani mbakadi gaani sino kparakpee?
18 Gaani regbo kparakpee nisase nga gu mamu du fu rani na nyanyakipaha, si nga regbo gaani ngbanya dagbarani na gu Barani du ngbangbaturũ yo, kingia gu wene regbo fu rani tipa peka gaani gbugbu apai fuko. (AFiripoio 4:6) Wa duhe nga kparakpee nga nyanyakipa gene tipa mbeda na Mbori, ruhe aru oni zeredi ki makia sino gaoni akparakpee. Si aidanga gaani kparakpee duni bawene fugo na ngba gu gene mbakadi ani he rogoho te, ono si naida si duni ndikidi gupai nakura kina boro ngbaduraniyo. Wai rengbe ani ka mbakada gaani sino kparakpee?
19, 20. Tipagine ngbaaha angba ti ni ka berã kuriipai mbata fu ani kparikpee, na bete gu riiapai rẽarẽ tipa ngbatunga gu berãkuriipai re nga gine?
19 Ani rengbe ka asadaha niberã ani kuriipai mbata fu kparakpee. Ka ani berẽkuriipai mbata fu kparakpee, ani rengbe ka manga gaani kparakpee zukazuka na wene rogoyo ti ni, rogo gi gene re, ani ki ne dogoda kina gu bangisa fugo inidi ngbarani gbe nga gu ninaaye ku berã rani yo niipo. (Asanza 15:28, 29) Isoke pa saka ani bete gu riiapai berãse yo nga gu Yesu agumba paha rogo gako kpia kparakpee, rengbe ka fu undo fu rani, gbiati wisigo ani pa wai rengbehe ka duna ngbanya na gu gaani apai ani akparakpee tipaha. (Matayo 6:9-13) Nikpiapai, ani rengbe ka sana tirani tipa ngbatunga gu tooni papara sunge ani amaabangirani tipa mangaha rogo manga gupai Yekova akpinyemuhe auru kpotosende herẽ. Ya mo si daada ani peke gupai ani akpinyemuhe fu Yekova nga ani naida ka manga gupai ngba tiko ka si rengbe, na ki sana ko tipa ko undo rani ka manga agu asunge dunduko nga gu ko afuhe fu rani? Ya mo ani nifudifudi rani mbiko gaani bakabangirise tipa agu ahe zingoho amanga rani? Gini ngbatunga aingapai ani aida mbupai tipaha, na gini aboro si aida ani mbupai fuyo gbe? Gini a’asada ninaafuda rani, na ya mo ani rugutirani na pa gupai nga, ani naida ga Yekova bandahe be gipai re niipo?
20 Kurii gure, ani rengbe ka berãpa gu kura aboro nga aguyo ini ani payo duna kura kparakpara apai si aida Yekova undoyo rogoho. (2 AKorindo 1:11) Ka si vura du wo, gupai si aidanga bangirise go ti ni ya nga pa fu tambuahe fu Mbori. Ka ani ru ki berẽpai tipaha, ani rengbe ka bi dungu nduapai tipa tambua Yekova na kini sambuoko na a’uru dunduko tipa gako banaru weneringise. (Pa Fu Rugute ni Ue he 8:10; Ruka 10:21) Pa manga ani he wo nika ye na aundo kurii akuraha, si rengbe ka undo rani tipa ani bi agu apai du rogo raka nga, si rengbe arengba ka ngba ani kini bihe na ngbarago rogo raka.
21. Pa wisigo ani gini kpiapai nga ga Ziazia Kekeapai rengbe ka undo rani tipa ani mbedi koyo du Yekova ni rogo kparakpee?
21 Wisigopai rengbe ka mbakada gaani kparakpee a. Bawene akparakpee kinaho nga gu susi akuraha, nga gu ruru akumba na adee amangihe du nikekehe rogo Fugo Mbori. Nikpiapai, ka si du nga kpakarakpakarapai gu du barabangirani, nga gu nafu bakabangirise fu rani kini bagunde tirani a tipa padu ani wenengai watadu tipa du agu aboro wenengai ani naakpinyemuyo, ani rengbe ka geda gu kparakpee nangia ga Yakobo tipa gbiako tiko na gu wirinako nangia Esau naaida ka irabape tiko. (Bambata Pai 32:9-12) Watadu ani rengbe ka wisigo gu kparakpee nangia ga Bakindo Asa, nga gu ko afuhe ho gu riivura nadu wa aboro mirioni sa nangia ga aboro Etiopia aserekpo ga Mbori aboro ni. (2 Pekapai 14:11, 12) Kangia ani nifudifudi rani be agu apai naida ka ye na gberesarimo kuti rimo Yekova, sidu, ga Eriya kparakpee barabangiri agu aboro naairiso gu mbori nga Bara rii gangara Karumera yo, rẽhe arẽ tipa ani makia paha ti gu regbo re, wa gupai nadu rogo ga Nemaya kparakpee nibipa du Yerusarema nigburuwagburuwaha. (1 Abakindo 18:36, 37; Nemaya 1:4-11) Pa geda ani ngbatunga agi akparakpee re kini berẽkuriihe, si rengbe ka nyakasa gaani idapase na si ki fu agu aberã fu rani ngbaa gbe tipa wai rengbe ani ka peka agu apai fu Yekova nambusa rani.
22. Gu veresi nga ga garã tipa gu garã nga 2003 nga gine, na gini sanahe si aida ani nisana tirani nani ti aregbo dunduko vuru gu garã yo re nabaha?
22 Si ziazia tie nga, anga irisa ho nibakerehe, na sásá ho tipa gupai boro aida ka mangaha kumbatayo, susi gupai nga, boro kakuti agu arugute Yakoba afuhe tipa ‘mbeda na Mbori’ te. (Yakoba 4:8) Ani manginga ha kinawo nindu ani kumbatayo kindi na gaani inohe tipa Mbori, nigbata ani gene tipa ka yugo gaani nyemuse tipa ko nibakerehe, na nisonosa ani gaani dawedawe pagume dagbarani na ko rogo kparakpee. Vuru gu garã yo nga 2003, baraho ani nikaa banda Yakoba 4:8 ni nigu veresi nga ga garã, ani nindunga kumbatayo kindi kaa wisigo tirani singia ani nambedisa tirani nirengo koyo du Yekova ni. Wa vura duhe wo, ginipai tie du tipa yangara papara gu veresi re? Rogo gini gene Yekova nika ‘mbeda na oni,’ na si nafu gini undo? Gu paparaha naye fuo gere nika sakapai tipa gipai re.
Oni Natingidaha?
• Tipagine si aida gupai ti ni nga ani bi pa mbeda na Yekova ninyanyakipa pai?
• Gine nga bete agu asásá rengbe ani ka maaha nibipa wirika gu inohe du tipa Yekova?
• Wai rengbe ani ka yugo gupai nga, ani na ndikidi nyemuse tipa Yekova?
• Ngba gini gene rengbe ani ka sonosa bakere dawedawe ngbanya dagbarani rogoho na Yekova rogo kparakpee?
[Gu kpiahe du ti kpewaraga 12]
Gu veresi nga ga garã tipa gu garã nga 2003, si nikangia: “Oni mbédi na Mbori, ko ki mbedi na oni.”—Yakoba 4:8.
[Gu kpiahe du ti kpewaraga 9]
Samuere atona ka inido Yekova wenengai gbe, ho ko aasona ni
[Gu kpiahe du ti kpewaraga 12]
Gu kparakpee Eriya akparihe rii gangara Karumera yo nga wene kpiapai fu rani