“Oni Ngére, Gaani Mbori Du Re”

Gupai saki yo ho rogo agi apapara kekeapai du ue tipa wisigoho re, mburuhe rii gu buku nga, Draw Close to Jehovah, nga gu i akusihe ti regbo gu kikindigi adunguratise nga ga a’uru biata namangi rogo 2002 na rogo 2003.—Oni bi gu papara kekepai du riihe nga, “Si Ahiisi gu Kungbo Ba Nadu Ngbadureyo” ti kpewaraga 29.

“Oni ngére, gaani Mbori du re; ani asungudi ko, ko batasi rani. Yekova du re.”—YESAYA 25:9.

1, 2. (a) Wai Yekova afura tipa gu iriiripa bakumba nangia Abarayama, na gine rengbe gupai re ka sa rani ani bakibangirani tipaha? (b) Wai Ziazia Kekeapai akido rani ya ani rengbe arengba ka mbakada dawedawe pagume dagbarani na Mbori?

“WENE badiare.” Wogu Yekova, nga Bakusi ngbangbaturũ na kpotosende afura tipa gu iriiripa bakumba nangia Abarayama. (Yesaya 41:8) Oni berẽnga gipai re, nga kungbo boro gbua nagbia ngbarago be pabakure na Bakerepa Bakindo nga ga zegino ko! Oni vura kaa baka kina bangironi ya, ‘Ya mo mi rengbe ka mbeda na Mbori wa ngbatunga gure?’

² Ziazia Kekeapai naya fu rani wee aboro rengbe arengba ka duna dawedawe pagume dagbayo na Mbori. Mbori aidi gupai fu Abarayama nga i duna gu dawedawe pagume re dagbayo mbiko Abarayama “aidi pa Mbori.” (Yakoba 2:23) Areme a, Yekova nagumba ‘rondo na kina ruru aboro.’ (Asanza 3:32, NW ) Ziazia Kekeapai nangarasa rani rogo Yakoba 4:8 kini ya: “Oni mbédi na Mbori, ko ki mbedi na oni.” Si tie ziazia nga, ka ani asadi tirani ka mbeda koyo du Yekova ni, ko akaragapai akaraga fu rani. Nirengo, ko ambeda ambeda na ani a. Ono tie, ya mo agi afugo naye mbiko ga Mbori toro re nayugo gupai nga, ani, nga aboro ingapai du nikpakpa rani naguari nibambata aboro ka mbeda na ko? Wagusa te. Pa mbeda ani na Yekova, nga gaani Mbori duna nyemu rani tiko, namanga mbiko gu nyanyakipa apai ue kina ko amangihe.—Atambuahe 25:14.

3. Gini apai ue Yekova namangihe tipa ka saha fu rani taata ani zi bakure na ko?

³ Bambatapai nga, Yekova ambakadipai tipa Yesu ‘tumo dungu aboro ni ungako.’ (Matayo 20:28) Gu motumo tumorii re nasa gupai nga ani mbedi na Mbori. Ziazia Kekeapai nayaa: “Nyemuse ti rani, bambiko ko nyemurani adu ti ko mbata.” (1 Yoane 4:19) Ii, wa duhe nga Mbori nadu na “nyemurani . . . ti ko mbata,” ko du namoi gu mburupai rengbe ani auruhe ka zio bakure na ko. Uepai nga, Yekova ima yugo tiko fu rani. Rogo agu abakure dunduko ani naazioho, mburuhe nidu nirengo riipa ino ani gu boro ani azio bakure na ni, na kini kpinyemu agu asinoni duni kparakparaha na duna nyanyakipaha. Ani wisiginga gupai gipai re ayugoho. Kangia Yekova angia gu Mbori naoka tiko aoka ka aboro arengbanga ka ino ko ya, ka ani rengbenga ka mbeda na ko te. Ono tie, kuba gupai nga Yekova okõ tiko be rani, ko naida ani ye ka ino ko. (Yesaya 45:19) Rogo Fugo ko nga Ziazia Kekeapai, ko nayugo tiko rogoho na agu afugo rengbe ani ka giarogoyo, anga si gbua nga kina gopai tipa gako nyemuse tipa rani sa te, ono si nayugo gupai a nga, ko naida aida ani ini ko na kini kpinyemu ko nigu Barani du ngbangbaturũ yo.

4. Wai ani ka berã tipa Yekova fuo ino ani asino ko wenengai gbe?

⁴ Oni abinga tooni gunde ko nitai beko koyo du bako ni ka yugo ko fu abakureako niyaa “Buba du re” na kini gumba gu ndikidi fugo re na ngbarago tiko? Agu aboro nairiso Mbori naberã wa kina gure tipa Yekova. Ziazia Kekeapai nafura tipa apai kumbatayo ya regbo aye aye ho ruru aboro nika paa kuari ni ki ya: “Oni ngére, gaani Mbori du re.” (Yesaya 25:8, 9) Wa ani kaa gbia dudungurobipai kurogo agu asino nga ga Yekova, kinawo bakere gbe ani ka bi gupai nga ani na gu Barani ngba sinoko kisusi na nga bawene Bakurearani kisusi. Ii, pa ino ani asino Yekova nafu dungu nduapai fu rani ani mbedi na ko kisusi gu nidu mbata. Sidu tie, ani wisiginga wai Ziazia Kekeapai ayugo bangua asino Yekova, nga ome, ruru sarangbangaa, tatamana, na nyemuse. Rogo gi papara kekepai re, ani nika sakapai tipa agu abambataha biata tangara ani he re.

“Ko . . . na Bakere Tandu [Tiko]”

5. Tipagine ruhe aru ti ni nga kina Yekova sa rẽ i yambu ko nga gu Mbori “du na tandu apai dũ,” na rogo gini agene ko amangasunge na gako iiriwo ome?

⁵ Yekova “na bakere tandu [tiko].” (Eyobo 37:23) Yeremaya 10:6 nayaa: “Ako Yekova, kura ni ho wa mo te; mo nga bakere boro, rimoro ki du ni bakere he na ngarã.” Anga Yekova wa agu aboro ko akusi yo akusa te, ko na ome tiko adunga digido bakioho ti ni ya. Mbiko gipai re, si du i ayamba kina ko sa ti ni nga, gu Mbori “du na tandu apai dũ.” (Yugoti 15:3) Yekova namangasunge na gako iiriwo ome ka kusaahe nani, ka gbarasa gbegbere ahe nani, ka banda aboro nani, na ka mbakada agu ahe nani gbere. Ani wisiginga kpiaapai gbua ue tipa gako ome nga ga kusaahe na gu nga ga banda aboro.

6, 7. Wai du bakio ome uru, na gini nyanyakipa rengo gupai re ayugoho?

⁶ Ho oni niru ni zagiyo rogo gu uru-kito zanga dubo, ginihe ninaazo kpotoroni? Faa-uru du nidu. Nirengo, guhe ninaazo kpotoroni re nga sangbana gu ga Yekova ome ko akusi ahe nani. Wai kii ome uru? Beberehe yo, ba faaha yo nga amirioni 27 Fahrenheit. Ka oni di wiri bete papara uru beberehe yo du bakioho wa rii gu mbereke nga ga waraga ru na ki moihe herẽ auru kpotosende, oni rengbenga ka ru tutuurũ kusayo ti ni wa akirometere 140 ki zanga gbi te! Rogo asekonde nibasasa, uru nakusa ome du bakioho wa sumbusumbu dungu akama amirioni agu agumbura nga ga nuclear. Wa vura duhe wo, kpotosende nake kirikiri pati gu iiriwo kere gbitiri gbigiwi re rogo gu baturoho daada tipaha. Ka kpotosende mbedi nani kisusi, gu ime du auru kpotosende naima ba ki gundu kusayo; ka si turu ti ni kisusi, agu ahe dunduko du auruhe nakputa nibasa. Ka sende mbedi na uru kisusi watadu si turu ti ni kisusi gu daada, unga ahe dunduko rengbenga ka raka auru he te.

⁷ Wa vura duhe nga, aboro naraka mbiko uru, dunguyo nabi uru gbua taata zanga berãpaha. Si ki ta du were, i kini kpa ti ino gupai rengbe uru ka yugoho fu rani. Atambuahe 74:16 nafura tipa Yekova niyaa: “Mo afu imarago na uru a.” Ii, uru nafu taarimo fu Yekova, nga gu boro “nafu ngbangbaturũ na kpotosende.” (Atambuahe 146:6) Wa vura duhe were, uru gbua nga he sa dagba gu dungu ahe Yekova akusihe nayugopai fu rani tipa gu banaru ome du beko. Wa ani kaa wirikapai bakere gbe tipa gu ga Yekova ome nga ga kusaahe, kinawo bakere gbe ani ka bi ko na kiki.

8, 9. (a) Gini ringbisa kpiapai na fugo nga ga nunga gumba yo paha nayugopa wai fu rani du Yekova na nyemu banda airisi ko? (b) Gini ngbatunga bandahe gu babanda avusende nadu ti gu regbo i aakeka Ziazia Kekeapai ti ni anabanda gako avusende nani, na gine gipai re ayugoho fu rani tipa gaani Bakerepa Babanda avusende?

⁸ Yekova namangasunge a na gako banaru ome ka banda gako amoyambu nani na ka ngera fuo yo. Ziazia Kekeapai namangasunge zukazuka na agu afugo nga ga nunga ka ringbisipa ga Yekova kidohe nani tipa banda gako aboro. Nikpiapai, oni kparianga Yesaya 40:11. Rogo gi veresi re, Yekova naringbisapa ko kuti babanda avusende na kini ringbisipa gako aboro kuti avusende. Ani nagedaha yo wa gere: “Ko aríga gako rimbasa akandoro wa babandara, ko adúngura wiri akandoro ku beko, ki nitindi ra ti ngbaduko, ki ningbe fu agu ra ku mbata yo ni zera nahaga awira.” Oni rengbe ka bi kpia gupai rogo gaoni berã ringbisi yo paha rogo gu veresi re?

⁹ Bete anyaa zogoro gbua du wa gu zogozogo anyaa nga avusende naida gupai nga i naangera angera fuo ra. Ti agu aregbo i aakeka Ziazia Kekeapai, si anaida babanda avusende du nigu boro duna wingbaduse ka banda gani avusende be awaru, be aurisi, na be abahu. (1 Samuere 17:34-36; Yoane 10:10-13) Ono aregbo anidu kinaho nanaida gupai nga babanda avusende duna nunga ho ni abanda ra ni na kini ngere fuo ra. Nikpiapai, ho na-vusende anivungu wiru ni tutuurũ kusayo ti gaami ndugu, wai babanda avusende anirengbe ka banda gi wiri vusende vungu yo ru bambeda re ka kerepai manginga ru ya? Si aniidi ni tindi ru, isoke tipa dungu a’uru, ‘ti ngbaduni,’ ki dadi kpoto ru na ngba gani baukadi. Ono wai nzunzu wiri vusende anirengbe ka ye kuti ngbadu babandara? Gi wiri vusende re anirengbe ka ye ku pati ndu babandara na ki wege tiru ti nduko. Ono tie, si ani idi gupai nga, babandara nugodi ki tai beko ka tumba ru na ki moi ru ti ngbaduko, ho baru ka ngba ni. Nairiwo gu ringbisa kpiapai nga ga nunga du Bakerepa Babanda avusende nani tipa ka banda gako amoyambu na ka ngera fuo yo re!

10. Gini bandahe Yekova amangaha areme, na tipagine nyakipa ngbatunga gu bandahe re ti ni gbe?

¹⁰ Yekova amangi dungu apai susi gu gbua nga ka kidohe tipa ka banda aboro. Ti agu aregbo i aakeka Ziazia Kekeapai, ko ayugu gupai ngba iiriwo gene nga, ko rengbe arengba ka “batasa aidipambori be asada.” (2 Petero 2:9) Ginipai tie ko amangaha ti gi gaani regbo re? Ani ima ino gupai nga, ko amanganga sunge na gako ome ka banda rani be agberango dunduko ti gi regbo re te. Wa vura duhe wo, ko namanga gupai amanga nyakipaha kisusi gure, nga ka banda rani rogo toroyo. Gaani Mbori nga boro nyemuse nabanda rani be agu apai ka gbarasipa rani rogo toroyo nifu ko agu ahe fu rani ani aidaha tipa ani rengbe ka hi a’asada na ani rengbe ka banda gaani pagume dagbarani na ko. Nikpiapai, Ruka 11:13 (NW ) nayaa: “Wa vura du oni ni gbegbere aboro ki ima ino pa gama wene ahe fu awironi, angbatika gu Baroni du ngbangbaturũ yo nga wene boro susi roni, ko susi rogo gama ziazia toro fu agu aboro nasana ko!” Gu bakere ome re rengbe ka fu gu ome fu rani rengbe ka sa rani ani rẽ na agu a’asada dunduko watadu gu kpakarakpakaraapai dunduko ani agbia tirani nani. (2 AKorindo 4:7) Rogo gi gene re, Yekova namanga apai tipa ka banda gaani raka, angianga tipa kina wiri bete guruguru agarã gbua ya, ono nyeanye kindi. Na nidu ani na ngbatunga gu maabangirise re rirani yo, ani rengbe nirengo ka bi agu apai dunduko nafuda rani rogo gi zegino re ni agu apai duni aakpuraha “nanye ngbutuko” gbua. (2 AKorindo 4:17) Ya mo nyemu gu Mbori namangasunge na gako ome rogo nyemuse tipa rani wa ngbatunga gure re azionga rani ani mbedi na ko tee?

“Yekova Nakpi Nyemu Ruru Sarangbangaa”

11, 12. (a) Tipagine ga Yekova ruru sarangbangaa aye ti ni na ani koyo du ko ni? (b) Gini digisopai Davide ada ti ni nibipa ga Yekova ruru sarangbangaa, na wai rengbe agi afugo naye be ga Mbori toro re afu wasa fu rani?

¹¹ Yekova namanga kina agu apai du niruruhe na du niwenehe, na ko namangaha wo zanga piriga na zanga kparakapai dagba aboro. Anga gu ruru sarangbangaa nga ga Yekova nigu zezere mangaapai zanga nunga, na nikere sino nado rani kusayo ti ko te, ono si nga gu wene sino naye na ani koyo du ko ni. Ziazia Kekeapai naringbisapa gako wene asino rogo agu afugo du ziazia. Ani wisiginga agene biata tie Yekova ayugo gako ruru sarangbangaa rogoho.

¹² Nibambatapai, ga Yekova ruru sarangbangaa nasa gupai nga ko zi tiko kuti gako akidohe fu gako amoyambu. Kina boro bake Atambuahe nitiko nga Davide aduna tambuahe tipa gi papara ga Yekova sino nga ruru sarangbangaa re. Gini digisopai Davide ada ti ni be kina boro agu apai namangi ko na be kina boro gako wisigopai tipa agu agene Mbori amangapai rogoho? Ko atakipande gupai ko abi ki ya: “Yekova nakpi nyemu ruru sarangbanga; ko ambú nga pa gako ziazia aboro te. I abánda ruru aboro nye anye kindi.” (Atambuahe 37:28) Nangbaa gu nyanyaki afugo wasa re! Anga regbo aduho kandara bara sa gaani Mbori nika mbu gu gako aboro zi tiyo kuti ko te. Sidu ani rengbe ka kido kuti gako pabakure na kuti gu gako nyemuse ko ayugoho rogo ngera fuo rani. Gako ruru sarangbangaa nga ngbaanga tipa gipai re.—Asanza 2:7, 8.

13. Wai gu Ndiko Yekova afuhe fu aYisaraere ayugo gupai ziazia nga, ko naberãpa agu aboro aberã adunga gene beyo ya?

¹³ Uepai nga, gu boro namanga gu ruru sarangbangaa nga ga Mbori, namangapai tipa gu zingo nga ga agu aboro akurayo arungosi yo. Gu Ndiko Yekova afuhe fu aYisaraere nayugo gupai ziazia nga, ko naberã aberã tipa agu aboro adunga gene beyo ya. Nikpiapai, gu Ndiko re ambakadipai tipa ka ruga gupai nga aboro ngere fuo awirinyaure na adekurugbo. (Pa Fu Rugute ni Ue he 24:17-21) Ni ino Yekova wai raka arengbe ka du nikpakarakpakaraha fu ngbatunga agu aborokporo re, kina boro Yekova nitiko asa tiko ni Bayo na ni Babanda yo. (Pa Fu Rugute ni Ue he 10:17, 18) Ko aza aYisaraere ya ka i mangi gbegberee fu ngbatunga agu adee na agude adunga aboro tiyo re ya, ko agia gayo akpee agia. Na a wa duhe nikekehe rogo Gate 22:22-24, ko ayaa: ‘Gi zinga arunguda arunguda.’ Anga zinga nga sino sa dagba abangua sino Mbori te, ono aboro du nasa ko na gayo irairaapai i ataino aino kini mangihe ngbaduko imi ngba ruru gene, gbe, ho duhe ni nga agu aboro i namangi yo na gi irairapai re i ni agu aboro adunga aboro ho nabanda yo ya.—Atambuahe 103:6.

14. Gine nga gu bakere gopai gbaarii akuraha nayugo gupai nga, Yekova akparakanga pai dagba aboro te?

¹⁴ Biatapai nga, Ziazia Kekeapai nakido rani rogo Pa Fu Rugute ni Ue he 10:17 ya Yekova nga gu boro “[“angbenga kubani rogopai dagba aboro ya,” NW ], adia nga marã mobirimo a ya.” Gu kumuko du be aboro watadu bangera yo, na ome kurii Yekova te, ko kia ti gu dungu aboro duna ome nga ga pagbia beyo watadu agu aboro namaapai kurii akurayo. Ko akpikanga pai kuti kura aboro watadu ka ngba na kina kura aboro te. Gu ndikidi bakere gopai duho gbaarii akuraha nayugo gupai nga, ko angbenga na kina kura aboro te gi du re: Anga gu mamu duho fu aboro tipa i dani ndikidi airisi ko, si nibandabandaha tipa kina bete aboro nga aguyo kii payo te. Kuba gupai nga si du wo, Amokedi 10:34, 35 nayaa: “Mbori akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.” Ko nataa gi maabangirise re fu aboro dunduko zanga bipa gu ba du yo rogoho dagba aboro, zanga bipa rangi kpotoyo, na zanga bipa gu ringara i araka rogoho. Anga gure nga ndikidi ruru sarangbangaa nga gu ngbaa kisusi tee? Nirengo, pa ruga ani tirani wenengai na pa ga Yekova ruru sarangbangaa naye na ani koyo du ko ni!

“Ako gu Dungura Nga ga . . . ga Mbori Tatamana!”

15. Gine nga tatamana, na wai Yekova ayugoho?

¹⁵ Pai afõngbadu gu mokedi yo nangia Pauro ko ki ako, a wa duhe nikekehe rogo ARomo 11:33 ki ya: “Ako gu dungura nga ga . . . ga Mbori tatamana na inahe!” Ii, wa ani akparia apapara gu bakere tatamana nga ga Yekova wa dukuhe nibakiakia, kina iriwoho nati tirani. Ono wai tie rengbe ani ka ringbisapa gi sino re? Tatamana nakoda inohe, rugatinapai, gbiati giarogopaiyo tipa si mangisunge ka kusa wene sangbanaa. Nimanga ko sunge na gako bakere inohe gbiati gako dudunguro giarogopaiyo, Yekova dedede naamanga gu diaberã ngbaa kisusi, kini mangi gako apai kina ngba gu gene mangaapai ngbaa kisusi.

16, 17. Wai agu ahe Yekova akusihe ayugopa gako bakere tatamana? Oni funga kpiapai sa.

¹⁶ Gine nga kparakpara goapai tipa ga Yekova bakere tatamana? Atambuahe 104:24 nayaa: “Ako Yekova, na nge gamo mangaapai! Mo amangi he dunduko na tatamana; kpotosende hi be gamo ũkumuko.” Nirengo, wa ani kaa wirikapai gbe tipa agu ahe Yekova amangihe, kinawo a bakere gbe iriwo gako tatamana nika ti tirani. Oni wisiginga gipai re, aboro birĩ-inohe ima wirika dungu apai be wisigopa agu ahe Yekova akusihe! Gu kura wirikapai gudu kinaho i ayambaha nga, biomimetics nga gu na’asada ka kusa vovo ahe wa gu du rogo zegino Mbori akusihe.

¹⁷ Ani dinga kpiapai sa, isoke ngbanya pioture avura iriwo tironi ti gu regbo oni anganaha. Si nirengo nga iiriwo mangimangihe. Gu bete agirihe du bibihe wa ka si kati akata taata re, si nyaki kisusi gu giri-marã du bakioho kina sa nani, na nyaki kisusi gu gire i atu gu rokoo nani ka marã-bundu arengbanga ka koraha ya. Boro rogo gupai yo re nga gine nzunzu? Oni moinga kpia gupai ku berã roni yo nga, i kiisi pioture bakioho ki da wa ga gu pio i naazio atiyo nani. Ngbatunga gu pioture re rengbe ka nyaka ki da ti gupai nga, ka i darihe gene gu tiyara natinda aboro si kini gu ariyo na yangara ome gaha oto, gu pio re rugusi gu tiyara re arugusa ka si akoranga ha ya! Ii, Yekova amangi ngbatunga agu ahe re dunduko “na tatamana.”

18. Wai ani abi ga Yekova tatamana rogo manga ko sunge na aboro i ke Fugo ko, nga Ziazia Kekeapai?

¹⁸ Ani rengbe ka bi gu babakere gopai kisusi du tipa ga Yekova tatamana rogo Fugo ko, nga Ziazia Kekeapai. Agu arugute nga ga tatamana du rogoho nayugo gu bawene gene kisusi fu rani si aida ani raki ngbaha. (Yesaya 48:17) Ono ani rengbe arengba berewe a ka bi gu ga Yekova tatamana arengbanga kura ngbatunga atatamana nani ya rogo gu gene i ake Ziazia Kekeapai rogoho. Wai i akehe? Nitatamana, Yekova asia gupai nga ka mangasunge na aboro i ke Fugo ko. Ya mo ka ko amangisunge na amaraika i ke Fugo ko nga Ziazia Kekeapai gako toro adu kugiipa kehe, ka si angba ti aboro wa gu duhe nani areme re? Rengo ngaha nga, ka amaraika akeke weneapai tipa Yekova a wa i abi ko na gu gayo bipai du kuari gbe ti ga aboro na ka i aringbisipa kina gayo ziotise kuti ko a. Ono ya mo ka ani arengbe ka rugatirani na gu bipai nga ga gi rengberengbe amaraika re rogo mangaapai, du gayo inohe, na gayo ome nibakerehe gbe ti gaani?—AEbere 2:6, 7.

19. Gine nayugo gupai nga, pa manga Mbori sunge na aboro i keke Ziazia Kekeapai asa sangbaha si nifu bakere wasa na ki ngba ti aboro?

¹⁹ Pa manga Mbori sunge na aboro i ke Ziazia Kekeapai nasa sangbaha si nifu wasa na ki ngba ti aboro gbe. Agu aboro nakekehe angia aboro wa kina rani rogo agu apai i anaberã. Mbiko wa i angia kpakpa aboro, i agbia tiyo ti a’asada na fudifudiapai wa kina gu ani agbia tirani nani. Rogo kura apai, i akeke kina boro agu apai namangi yo na agu apai i aasota nani. (2 AKorindo 12:7-10) Sidu, i akeke agu afugo ka maraika arengbanga ka gumbaha ya. Nikpiapai, ani dinga agu afugo Davide du nikekehe rogo Atambuahe 51. Kuti gu kekepai du bariihe, Davide asari gi bia atambuahe re fuo manga ko kere ingapai. Ko akusi agu apai nadu ngbadukoyo, kini yugupa gu bakere gberarago nadu tiko na kini sana Mbori tipa ko mbupai fuko. Gu 2 veresi na gu 3 ha nayaa: “Mo zúndu re kpou be gi irairapai, ki girisi re be gi ingapai! Bambiko mi idi pa gi samungu, gi ingapai bangire kindi.” Oni kparianga veresi 5: “Mo ngére, i ame re na irairapai, nina ki du na mobarare na kina ingapai.” Veresi 17 nagbia gupai kuti ni nga: “Gu motumo ngba ti Mbori nga toro rungo; gu kpoto yo naima be rungo ingapai, Ako Mbori, mo apáyasi nga ha te.” Oni arengbanga ka bi gupai naafuda gi bakeapai re tee? Anga kura boro ho rengbe ka gumba ngbatunga agu apai re te kina guni nga kpakpa ni?

20, 21. (a) Tipagine rengbe ani ka ya ti ni wee wa Yekova avura mangasunge na aboro i keke Ziazia Kekeapai, si na gu tatamana rogoho nga kina gako? (b) Gine ani ka sakapai tipaha rogo gu papara kekepai naye fuo gere?

²⁰ Nimanga Yekova sunge na ngbatunga gu kpakpa aboro re, ko afu kina boro guhe nzunzu ani aidaha, nga gu kekepai ‘ye be ga Mbori toro’ ono ki du kindi kina rogo agu afugo rengbe aboro ka giarogoyo. (2 Timoteo 3:16) Ii, ga Mbori ziazia toro naaruga agu abakeapai re. Rogo gi gene re, gupai i akekehe angia ga Yekova tatamana, angianga gayo ya. Gu tatamana re gu rẽarẽ aboro kido kuti ni. Si ima susa gaani tatamana bakere gbe si du Mbori azungodi rani ti ni rogo nyemuse niyaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” (Asanza 3:5, 6) Ni irisa ani agu arugute nga ga tatamana re, ani nambeda gbe koyo du gaani tatamanatatamana Mbori ni.

²¹ Gu sino Yekova tie ngba kisusi akuraha dunduko nga nyemuse. Ani nika sakapai tipa wai Yekova nayuguhe rogo gu papara kekepai naye fuo gere.

Oni Natingidaha?

• Gini apai Yekova namangihe ka saha fu rani taata ani sonosi dawedawe pagume dagbarani na ko?

• Gine nga bete kpiaapai tipa ga Yekova ome nga ga kusaahe na gu nga ga banda aboro?

• Rogo gini agene Yekova amangasunge na gako ruru sarangbangaa?

• Wai ani abi ga Yekova tatamana rogo agu ahe ko akusihe na rogo Ziazia Kekeapai?

[Gu kpiahe du ti kpewaraga 20]

Wa kina gu babanda avusende natinda wiri vusende ti ngbaduko, kinawo Yekova angera fuo gako avusende na nunga

[Gu kpiahe du ti kpewaraga 22]

Ani nabi ga Yekova tatamana rogo gu gene i akeke Ziazia Kekeapai rogoho