‘Oni Kakuti Fugo Re’

‘Ka oni kakuti fugo re, oni du adu nirengo nigimi abawiriki.’—YOANE 8:31.

1. (a) Ho Yesu aga ni ku ngbangbaturũ yo, gine ko ambuhe sano auru kpotosende? (b) Gini asanahe ani ka wisigoho?

HO Yesu Kristo, nga gu kumba nasigira gu pambori nga ga aKristano aga ni ku ngbangbaturũ yo, ko ahenga abuku sano auru gi kpotosende re nga gu ko akekehe, watadu mekemeke ahe te, na ko adunguranga aũkumuko ka ko ambuhe sano a te. Ono tie, abawiriki ko ambu yo sano gbiati kura kparakpara arugute tipa agu aboro nika ida ka du nigako abawiriki. Nirengo, rogo gu buku Wene Pangbanga Yoane akehe, ani nabi nyanyakipa apai yo biata nga gu Yesu afura tipaha ya si nga gupai si akpinyemu agu aboro naida ka duni apefuo ko mangihe. Gine nga agu apai ko akpinyemuhe beyo re? Ginipai rengbe ani ka mangaha ka digiso gupai re? Na wai rengbe ani ka rugatirani na gupai nzunzu nga, ani ima rẽ areme niga Kristo abawiriki?a

2. Gine nga gu nyanyakipa pai si akpinyemu boro mangihe ka du niga Yesu bawiriki, a wa duhe nikekehe rogo gu buku Wene Pangbanga Yoane akehe?

² Mbata fu regbo kpio Yesu wa adiwi sita, ko andu ku Yerusarema yo na ki tungusipai yo fu gu rimbasa aboro nadungura tiyo koyo tipa ka manga gu Pumbo Nangia ga Abasura nga gu nanadia poso sa. Nisangbana gi gako tungusapai re, ho pumbo ada ni ti bebere regboho, “[aboro] aidi pa ko ni dungu yo dagba rimbasa yo.” Yesu aandu kumbatayo kindi na tungusapai, sidu, ho pumbo adani ti yangara uruhe, “dungu aboro ki idi pa ko” berewe a. (Yoane 7:10, 14, 31, 37; 8:30) Ti gu regbo re, Yesu amoi berã ko fuo vovo aidipase na ki fura tipa gu nyanyakipa pai ko akpinyemu boro mangihe ni ki nye nigako bawiriki, a wa gu mokedi nangia Yoane akehe niyaa: ‘Ka oni kakuti fugo re, oni du adu nirengo nigimi abawiriki.’—Yoane 8:31.

3. Gini sino si aida boro mangihe tipa ni ki ‘kakuti fugo Yesu’?

³ Nigumba Yesu agu afugo re, anga gupai ko aaberãha nga gi vovo abawiriki re azanga idapase te. Kuba gure, gupai ko aayugoho fuyo nga i aduna mamu barabangiriyo ka da nindikidi gako abawiriki, ka i kakuti fugo ko, na kini hipai. I aima dia afugo ko kugume, ono tie ti gi regbo re, si aida gupai beyo nga i kakuti ni kindi. (Yoane 4:34; AEbere 3:14) Nirengo, Yesu abi hipai ninyanyakipa sino tipa apefuo ko naamangaha, mbiko rogo gu yangara afugo ko agumbaha fu gako amokedi, nga gu du nikekehe rogo gu buku Wene Pangbanga Yoane akehe, Yesu angarasi guni sa dagba gako abawiriki bara ue niyaa: “Mo nipéke re.” (Yoane 21:19, 22) Dungu bambata aKristano amangi kina gupai re. (2 Yoane 4) Gine naundo yo i hipai?

4. Ginipai naundo bambata aKristano i hipai?

⁴ Gu mokedi nangia Yoane, nangia ga Kristo ruru bawiriki tipa agarã wa saba-bawe, afura tipa nyanyakipa sino sa. Ko atambua ruru aKristano kini yaa: “Oni nyanyaki, ga Mbori pai nye kpotoroni yo, oni ki di be gbegberẽ ko.” Gu ga Kristo abawiriki re anahipai, watadu i akakuti fugo Mbori, mbiko fugo Mbori anye rogoyo yo. Si anye rogoyo yo mbiko i audihe na ngbaduyo yo dunduko. (1 Yoane 2:14, 24) Teketeke kinawo a areme, tipa ani rengbe ka ‘hipai da ti digido regbo,’ si naida ani rugutirani na gupai nga, fugo ko ima nye rogo rani yo. (Matayo 24:13) Wai rengbe ani ka manga gupai re? Gu yugopai na kpiapai Yesu amangihe nafu karagapai tipaha.

Aboro ‘Nagia Fugo Agia’

5. (a) Gini ngbatunga asende nibakiakia Yesu agumba paha rogo kura gako yugopai na kpiapai? (b) Rogo ga Yesu yugopai na kpiapai, gine tunga na sende arukubaha?

⁵ Yesu ayugupai na kpiapai tipa gu bambitunga nami gako tunga, gi kpiaapai re nikekehe rogo agu abuku Wene Pangbanga nga ga Matayo, ga Marako, na ga Ruka. (Matayo 13:1-9, 18-23; Marako 4:1-9, 14-20; Ruka 8:4-8, 11-15) Wa oni ageda agu apangbanga re, oni nika bi gupai nga, gu banguapai du rogo gu yugopai na kpiapai re nga ngbatunga tunga sa atiwi kurogo dungu ngbatunga asende, asangbanaha kini mo ka du nibakiakia. Gu bambata ngbatunga sende ninyanyakihe, gu uehe ningbarangbaraha mbiko mbia tiihe yo, gu biataha na bere akiwe riihe. Gu biamaha, si tigaha kia ti agu akuraha du biata re, si nga “mbudu sende.” Kuti ga Yesu sakarogopaiyo nitiko, gu tunga re nga gu pangbanga nga ga Kindo du rogo Fugo Mbori, gu sende re narukuba aboro nga aguyo du ngbaduyo yo nibakiakia. Wa vura duhe nga, bete apai gu duho rengbe ti agu aboro dunduko du wa ngbatunga asende nibakiakia, aguyo tigayo du wa mbudu sende na gu sino tiyo nakpara yo i du kia ti kura aboro.

6. (a) Rogo ga Yesu yugopai na kpiapai, gine nasa gu biama ngbatunga sende si du kia ti ngbatunga agu akuraha du biata, na gine si ayugopaha? (b) Gine nyakipaha tipa boro mangihe tipa ka hipai niga Kristo bawiriki?

⁶ Kuti gu pangbanga du rogo Ruka 8:12-15, si nayugo gupai nga, rogo agu apai dunduko du biama re, aboro ‘nagia fugo agia.’ Wa vura duhe wo, agu aboro tigayo duna ‘wene ngbaduyo yo’ namangapai susi gu nga ka ‘gia kina fugo’ gbua. I “[na]ka kuti ni, ki nizu azu rogo hipai.” Wa duhe nga mbudu sende nirurungburaha na ki du nidudunguroho, si nambu tarã gu tunga mi yo ho ku auruhe si gito kusende yo, si ki ta du were, tunga kini kuru kini zuku azuzuhe. (Ruka 8:8) Teketeke a, agu aboro duna wene ngbaduyo yo nagiarogo fugo Mbori yo wenengai na ki bihe na nyanyakipaha, na ki dihe kugume. (ARomo 10:10; 2 Timoteo 2:7) Fugo Mbori nanye rogo ngbatunga agi aboro yo re. Si ki ta du were, i kini zuku wa i ahipai. Dudunguro irisa tipa Fugo Mbori nga gu naye ngbaduseyo nga nyanyakipa pai ni gupai si aidaha tipa aboro rengbe ka hipai niga Kristo abawiriki. (1 Timoteo 4:15) Ono, wai tie rengbe ani ka kiiso ngbatunga gu irisa re tipa Fugo Mbori ngbaduraniyo?

Sino Ngbaduseyo na Wene Berãkuriipai

7. Gu mangaapai du mbembedii nikodikodihe kuti gu nga ga wene ngbaduseyo nga gine?

⁷ Oni kparianga gu mangaapai Ziazia Kekeapai afura tipaha ya si nga gu sino nga ga gu ngbaduseyo du niwenehe. “Ngbadu ruru boro naberãkuriipai tipa ka karagapai.” (Asanza 15:28, NW ) “Gu makia pai du ku kpotore yo si ngba bangiro, Ako Yekova.” (Atambuahe 19:14, gu kekepai duni pigipigihe re, ani du pigihe.) “Gu makia pa apai du kpotore yo si adú na rugatinapai.”—Atambuahe 49:3, gu kekepai duni pigipigihe re, ani du pigihe.

8. (a) Ho ani ageda Ziazia Kekeapai ni, ginipai si aida ani ne mangaha ono ginigu si aida ani mangihe? (b) Gini undo ani agbiaha be kparakpee gbiati berãkurii Fugo Mbori? (Oni kodi gupai du rogo gu sanduki du riihe nga, ‘Oni Du Nisigirasigira Roni Rogo Rengo Yo Ngutete.’)

⁸ Wa kina agi abakeke Ziazia Kekeapai re, si naida ani niberẽkurii Fugo Mbori ningbarago na kini fu kpee fuko tipa ko undo rani ani girogoyo na ka giarogo gako mangaapai a. Ho ani ageda Ziazia Kekeapai ni watadu agu abuku nasakarogo Ziazia Kekeapai yo, si aidanga ani du wa agu aboro ndu kurogo gu ringara angianga gayo ya kita ora kubani kini oro kubani ka dekpia arago dunduko ono zanga i kparia agu ahe i adekpiaha te. Kuba gure, si naida ani ru gene ka gbia ngbarago be gupai ani agedaha wa ani awisigo Ziazia Kekeapai.b Ho ani aberã ni kurii gupai ani agedaha, fugo Mbori namangasunge ngbaduraniyo ti gu regbo re. Si na’aria agu apai du ngbaduraniyo na kini aria gaani aberã a. Si nafõngbaduraniyo a ani peke agu apai du berã rani yo fu Mbori rogo kparakpee. Si ki ta du were, gu pagume du dagbarani na Yekova kini nyaki, na gu nyemuse du ani nani tipa ko kini fõngbaduraniyo ani nipekefuo Yesu kindi zavura ho du ani ni rogo kere fudifudiapai vurũ. (Matayo 10:22) Si tie ziazia nga, pa berã ani kurii agu apai Mbori agumbaha ni nyanyakipa pai ka ani aida ka nye niruru rani dati digido regbo.—Ruka 21:19.

9. Wai rengbe ani ka rugatirani na gupai nga, ngbaduraniyo nye kindi na nyemu dia fugo Mbori kugume?

⁹ Ga Yesu yugopai na kpiapai nayugo gupai a nga, kura apai kinaho nakandasi gu tunga nga fugo Mbori, ka si sonanga ya. Sidu, ka ani aida ka nye niruru abawiriki, si adu niwenepai (1) ani ini agu apai nakiso gene sona kumbatayo berani nga agu apai gbegbere sende arukubaha nga gu gumba yo paha rogo gu yugopai na kpiapai re, na (2) ka gbata gene ka mbakada gupai re watadu ka nehe. Rogo gi gene re, ani kini mo ka rugatirani na gupai nga, ngbaduraniyo nye kindi na nyemu dia gu tunga kugume nga ga Kindo na si kini zuku rinde kindi.

Gu Tiwi ku “Pangba Gene,” Nga agu Aboro Dingiso Tiyo Kuti Kura Asunge

10. Oni ringbisinga pa gu bambata sende nga gu du rogo ga Yesu yugopai na kpiapai, na oni sakinga rogoyo.

¹⁰ Gu bambata ngbatunga sende tunga ati kurogoho nga “pangba gene,” nga gu rago aboro “[a]si he asi ni nduyo.” (Ruka 8:5) Gu sende du pangba gu gene kuru rogo ati vunde, si ninyanyakihe mbiko ndu aboro nasimboho dedede wa i andu ngba gu gene re. (Marako 2:23) Teketeke a, agu aboro nambu gu mangaapai nga ga zegino si di gu regbo beyo gbiati gu ome yo nga gu ka si nadianga ha ya, i rengbe ka bi gupai nga, asunge ima dingiso yo ka wiri regbo adunga beyo wa ka i bi fugo Mbori ni nyanyakipa pai ya. I nagiaha agia, ono i aberãnga kuriihe te. Sidu, si kini sa gupai nga, ngbaduyo yo nye zanga diapai kugume. Na mbata fu i sonosi nyemuhe ngbaduyo yo, ‘Satana naye ki di gupai re kusayo kpotoyo yo, tipa i ka ida paha ki bati.’ (Ruka 8:12) Ya mo i rengbe ka kiso gene be gipai re ka si manginga ya?

11. Wai rengbe ani ka kiso gene be sino ngbaduraniyo si zanga du wa kpatakpari?

¹¹ Bakere sunge si aida boro mangihe tipa ka kiso gene be ngbaduniyo ka si dunga wa gu kpanangbara sende du pangba gene nga gu ka tunga he arengbanga ka kura rogoho re ya. Gu sende i aima simbidoho si ki sa tihe nikpatakpari, i rengbe ka saha berewe tubutubu ka i kisi gu gene du auruhe re na ki sarihe rogo kura ba kia na ki bukia gu bangiri gene re. Teketeke a, pa gbia boro regbo tipa wisigo Fugo Mbori na kini berẽkuriihe rengbe ka sa ngbaduniyo si du rurungburaa wa mbudu sende nga gu rengbe tunga he ka kura ti ni. Gu birĩ du tipa mangaha nga, ka mbu dingisotise na gu rukutu apai nga ga raka anyakanga paha ya. (Ruka 12:13-15) Kuba gupai nga oni dingiso tironi na agu apai anyakanga paha ya, oni sia regbo tipa berãkurii ‘agu apai nyakipaha kisusi’ rogo raka.—AFiripoio 1:9-11.

Gu Tiwi ku “Auru Mbia,” Nga agu Aboro Duna Gunde

12. Gine nzunzu nga gu ndikidi ndupai nasa tama gu tunga du rogo ga Yesu yugopai na kpiapai si kpi nga gu tunga du rogo gu ue ngbatunga sende?

¹² Ho tunga ati ni kurogo gu ue ngbatunga sende, si anyenga anye gbua auruhe wa gu bambataha te. Si nagitosi tarãha ku sende yo na tamaha ki kuru. Ono wa uru akura, si nazo tama gu tunga kuru re si ki kpi. Ono tie, oni kparianga gi nyanyakipa rukutuapai du tipaha re. Boro guhe nzunzu naimo tama gu tunga re nga faa-uru te. Nirengo, gu tunga nakura rogo mbudu sende, si a kina rogo uru, ono si akpinga te, si nasona asona nirengo. Gu kparakparapai du dagbaha tie nga gine? Fugo Yesu nasakarogoyo niyaa gi tama tunga re akpi “bambiko sende anaga nga auru he te” na “bambiko ime adu nga ti ni [a] te.” (Matayo 13:5, 6; Ruka 8:6) Gu “mbia,” watadu kpazakpaza-mbia du sende auruhe nzaranzara, naká na tarã gu tunga re ka si gitonga kusende yo ka gbia ime na ki sigira tihe ya. Si ki ta du were, gi tamahe re kini kpi mbiko naganga sende tiihe te.

13. Gini ngbatunga aboro du wa ngbarangbara sende, na gine nzunzu nga gu ndikidipai nasa yo i mangi wa gu i amangaha re?

¹³ Gi papara yugopai na kpiapai re nayugopa agu aboro ‘nadiapai ningbarago’ na ki pefuo Yesu zaaza tipa ‘guru regbo.’ (Ruka 8:13) Ho i ka ngera ni bangiriyo na ‘gberangbii watadu rungosi’ si kini ki ririri wa kere uru, gunde nazio yo bakere gbe, sidu, gayo ngbarago ki go kusayo tiyo na ome yo ki bati, si ki ta du were, i kini mbu pefuo Kristo. (Matayo 13:21) Ono tie, anga pa sogote aboro yo nga gupai nzunzu nabagunde tiyo te. Mbiko, dungu ga Kristo abawiriki kinaho nahi dungu ngbatunga arungosi nibakiakia ono i ki nye kindi niruru yo. (2 AKorindo 2:4; 7:5) Gu ndikidipai nzunzu nabagunde ti bete aboro na ki sa yo i tiwi kusayo nga gu sino apai du ngbaduyo yo du wa mbia nga gu ambunga yo i berẽ wenengai kurii wene apai gbiati agu apai nga ga toro nga gu rengbe ka sonosa yo ya. Si ki ta du were, gu tambuahe du yo nani tipa Yekova na tipa fugo ko kini mo ka du gbua nikina ngbarangbaraha nirurungburaha ka ome adunga ti ni tipa si undo yo i sovura kuti sogote ya. Wai rengbe boro ka ne gupai re ka si manginga ni ya?

14. Gini apai si aida boro mangihe tipa ka kiso gene be sino ngbaduniyo si zanga du wa ngbarangbara sende?

¹⁴ Si naida aboro nibasasa rugu tiyo na gupai nga, anga apai ho du wa ambia, ngbatunga gu du wa gu kere sogote naima zio baha kuti yo, okõokõ gbangbati, watadu ngbatunga agu aberã du wa gure, si ngbaduyo yo te. Kangia ngbatunga agu ahe nakiso gene be boro re ima duho tini, gu ome du ti fugo Mbori rengbe arengba ka diaha kusayo. (Yeremaya 23:29; AEfeso 4:22; AEbere 4:12) Ngbutuko fuo gure, pa berã ni kurii fugo Mbori na kini fu kpee tipaha nika sa ‘gu fugo re si bi ba maa tarãha’ dudunguroo ngbaduniyo. (Yakoba 1:21) Si nika fu ome funi ni sovura na diabese kuti gupai rengbe ka zeresa kpotoniyo na si angarasa ni ni nye niruru ni fudifudiapai ki vura du vurũ.

Gu Tiwi ku ‘Dagba Akiwe,’ Nga agu Aboro Duna Apai Ngbaduyo Yo Nikparakakparakaha

15. (a) Tipagine si aida ani gbeberã rani ti ni gbe kuti gu biata ngbatunga sende Yesu agumba paha? (b) Ginipai niyangaraha namanga gu biata ngbatunga sende, na tipagine gupai re amanga ti ni?

¹⁵ Gu biata ngbatunga sende, nga gu duna akiwe rogoho, si si aida ani gbeberã rani kuti ni gbe, mbiko si wa kina mbudu sende rogo bete agene. Wa kina mbudu sende, gu sende duna akiwe rogoho nambu gu tunga ti kurogoho si moi tarãha kutii sende yo na ki kusi tamaha. Ti tonatonaha, kparakparapai ho tipa sona tama gu rũrũhe re rogo gu ngbatunga asende du ue re te. Ono tie, wa regbo asusa, kiwe nika sona kisusi gu rũrũhe re na ki kandasihe. Gi sende re tigaha kia ti mbudu sende, akiwe nawada auruhe niyangaraha. Wa gi rũrũhe re akura sende yo, si namanga abaangira na agu ‘akiwe nasona sa nani.’ Ngbutuko, gi rũrũhe re gbiati agi akiwe re namanga abaangira tipa riahe, imarago, na tipa ba tipa ka kio rogoho, ono tie, akiwe niyangaraha nadia rogo gi abaangira re kini wadi auru gi rũrũhe re “ki nikandasi he.”—Ruka 8:7.

16. (a) Gini ngbatunga aboro nawira gu sende duna akiwe? (b) Kuti agu apangbanga biata du rogo abuku Wene Pangbanga, gine akiwe arukubaha?—Oni bi gu rukutu kekepai du ku kumbabee pati kpia kerekuru.

¹⁶ Gini ngbatunga aboro nawira gu sende duna akiwe rogoho? Fugo Yesu nasakarogoyo niyaa: ‘I nga agu aboro gi gu fugo re, ono berãpa zegino na ũkumuko na nyemu gbia ngbarago rogo gi raka re ki kandasihe, ka si azunga nzunzu ya.’ (Ruka 8:14) A wa gu tunga nga ga bamitunga asona ti bangisa regbo sa na akiwe rogo sende, kura aboro na’asada ka dia fugo Mbori kugume gbiati gu ‘nyemu ahe nga ga gi raka re’ ti bangisa regbo sa. Gu rengo nga ga fugo Mbori nadu adu nirũrũhe ngbaduyo yo, ono si namanga abaangira na gu kura nyemu apai du ngbaduyo yo nga gu naida i bipai tipaha. Si ki ta du were, ngbaduyo yo kini za ka du nikparakakparakaha. (Ruka 9:57-62) Si nadingiso yo ti gbia gu regbo rengbe tipa kparakpee na tipa berãkurii fugo Mbori wenengai. Sidu, i nakpa ti dia fugo Mbori wenengai ku ngbaduyo yo, si ki ta du were, ka i aruganga tiyo ngbaduyo yo na gupai si aida i mangihe ka hipai ya. Tooni tooni, nyemu agu apai nga ga zegino kini mo ka wada auru gu gayo nyemu apai nga ga toro “ki kandasi he [dunduko].”c Nagbere wai apai adigo na agu aboro akpinga nyemu Yekova na ngbaduyo yo dunduko ya!—Matayo 6:24; 22:37.

17. Gini apai si aida ani siaha rogo gaani raka tipa ka agu akiwe narukuba gu kura apai gumba yo paha rogo ga Yesu yugopai na kpiapai re kandasinga rani ya?

¹⁷ Niperesa ani agu apai nga ga toro mbata fu gu kura apai, ani nane agu apai naimisa aboro na si ki sa rani ka nyemu gbia ngbarago be agu ahe du rogo gi zegino re kandasinga rani ya. (Matayo 6:31-33; Ruka 21:34-36) Si aidanga ani mbupa geda Ziazia Kekeapai na kini berẽkurii gupai ani agedaha te. Ani rengbe ka gbia regbo tipa ka berãkuriipai bakere na tipa kparakpee ka ani mbu gaani raka si du taata a wa rengbe ani ka mangaha. (1 Timoteo 6:6-8) Ka pepai nisanza, gu ga Mbori amoyambu namofo akiwe kusayo rogo sende tipa ka mbu bakere rigo si duho tipa tunga, na tipa tunga rengbe ka gbia imarago gbiati ba, i nga agu aboro nagbia ga Yekova amaku awere. Sandra du garãri 26 naya wee: “Ho mi aberã ni kurii agu amaku gbia mi he rogo rengo, mi nabi gupai nga, he ho ka zegino fuhe ka rengbenga nani te!”—Atambuahe 84:11.

18. Wai rengbe ani ka kakuti fugo Mbori na kini hipai ni aKristano?

¹⁸ Si tie ziazia nga, ani dunduko, nga aparanga na sosono aboro, ani akakuti fugo Mbori na kini hipai niga Kristo abawiriki kindi a wa fugo Mbori nika nye rogo rani yo. Sidu tie, ani mbakadiapai ka bi gupai nga, gu sende narukuba ngbaduraniyo, si ninyanyakihe, ningbarangbaraha, watadu giri angua ima wada auruhe te, ono si nirurungburaha na nidudunguroho. Rogo gi gene re, ani arengba tie ka dia fugo Mbori wenengai gbe ku ngbaduraniyo na “ki nizu azu rogo hipai.”—Ruka 8:15.

[Gu rukutu kekeapai du bandu kpewaraga yo]

Gaoni Akaragapai Nga Gine?

• Tipagine si aida ani ‘ka ti ni kuti fugo Yesu’?

• Wai rengbe ani ka mbu Fugo Mbori si nye ngbaduraniyo?

• Gini ngbatunga aboro gu ngbatunga asende du biama Yesu agumba paha arukuba yo?

• Wai rengbe oni ka gbia regbo tipa berãkurii fugo Mbori?

[Sanduki/kpiahe ti kpewaraga 19]

‘ONI DU NISIGIRASIGIRA RONI ROGO RENGO YO NGUTETE’

DUNGU agu aboro naima digo nimangisunge niga Kristo abawiriki nayugo gupai na agarã dunduko nga i ‘nisigirasigira yo kurogo rengo yo ngutete.’ (2 Petero 1:12) Gine naundo yo i naahipai kindi? Oni makianga bete agu apai i agumbaha.

“Mi naadigiso gimi a’uru dunduko na geda bete papara Ziazia Kekeapai gbiati kparakpee. Fuo gure, mi ki berẽkurii gupai gedi mi he.”—Jean, ko azi bapatiza rogo 1939.

“Pa berã mi kurii gupai nga, Yekova, nga gu boro kiipako gbe, nakpinyemu rani nyanyakii, nayugo gupai fere nga ngba bare angba na si kini nyakasi re mi nye niruru re fuko.”—Patricia, ri azi bapatiza rogo 1946.

“Nizio mi tire kuti wene sino nga ga geda Ziazia Kekeapai na kini dingiso tire kurogo gu ‘dudunguro apai nga ga Mbori,’ si sa re mi zi tire kindi kuti rengo.” —1 AKorindo 2:10; Anna, ri azi bapatiza rogo 1939.

“Mi naageda Ziazia Kekeapai gbiati agu abuku nasakarogo Ziazia Kekeapai na gu nduhe nga ka wisigo ngbadureyo gbiati agu apai nasa re mi naamanga apai.”—Zelda, ri azi bapatiza rogo 1943.

“Agu aregbo ngbaa rago tire gbe nga agu aregbo mi nizogotire azoga kaa ndu na kini fura fu Yekova rogo kparakpee na kini gumba agu apai fuko du kpotoreyo.”—Ralph, ko azi bapatiza rogo 1947.

“Mi naatona gimi uru niwisigo mi agu averesi du tipa a’uru nibasasa na ki gedi bete papara Ziazia Kekeapai. Pa manga mi he wo nafu gu vovo pai fere rengbe mi ka berãkuriihe uru.”—Marie, ri azi bapatiza rogo 1935.

“Tipa re, gupai ngbaa tire gbe nga gu sakapai nga ga averesi nibasasa rogo gu buku nga ga Ziazia Kekeapai.”—Daniel, ko azi bapatiza rogo 1946.

Ti gini saa oni naadia regbo ka berãkurii Fugo Mbori na kini fu kpee tipaha?—Daniere 6:10; Marako 1:35; Amokedi 10:9.

[Gu kpiahe du ti kpewaraga 22]

Niperesa ani agu apai nga ga toro kumbatayo, ani arengba tie ka ‘zu rogo hipai’