Gbata Yekova Na Mbakadimbakadi Ngbaduseyo

GU GA aYisaraere boromotumo nangia Ezara angia wene bawisigipai, wene bawirikipai, wene bake wirina abuku, na wene bayugu Ndika. Tipa aKristano areme, ko a nga wene kpiapai rogo mangasunge na ngbaduseyo dunduko. Wai wo? Rogo gu gene nga ko anye kuti gako futise fu Mbori zavura ho ko araka ni Babera yo, nga gu bakporo nahi be kungbo ambori gbiati iriso adaimona.

Ga Ezara futise fu Mbori amanganga nisaha te. Ko amangi sungehe amanga. Nirengo ko nape gupai fu rani nga ko “arugu kpotoko yo [ambakadi ngbaduko yo, “NW” ] ya ko agbata ga Yekova rugute, [na] ka amanga ha.”—Ezara 7:10.

Wa kina Ezara, ga Yekova aboro areme naida ka manga agu apai dunduko Yekova akpinyemuhe beyo baraho i araka ni rogo gi zegino nasoga ndikidi irisombori re. Sidu ani wisiginga agu agene rengbe ani tigaani a ka mbakada ngbadurani yo rogo, nga gu bororani du ku dimoyo—kodihe na gaani aberã, gaani mangaapai, gaani nyemu apai, na agu apai nafõngbaduraniyo tipa ani mangipai—tipa ka ‘gbata ga Yekova rugute, na ka amanga ha.’

Mbakada Ngbaduraniyo

“Ka mbakadahe” nayugo gupai nga “ka sa ha si duho mbembedii tipa gu ringbisapai ka du: ka mbakadahe tipa wa ka i mangisunge nani, mangasunge na he, mbakadapai.” Rengo ngaha, kangia oni aima duna gu ruru inohe nga ga Fugo Mbori na oni ki ima kpara gaoni raka fu Yekova, ngbaduroniyo ima yugo gupai tie nirengo nga si nimbakadimbakadihe na i rengbe ka ringbisaha kuti “mbudu sende” nga gu Yesu afura tipaha rogo gako sanza nga ga bamitunga.—Matayo 13:18-23.

Si ki vura du wo, ngbadurani naida i niimoiberã fuoho na kini ngerefuoho wa rago naagira. Tipagine? Tipa nduapai ue. Bambataha nga, si mbiko gbegbere asino, nga gu rengbe ka sigira tarãha niipo, wa kina gu rende nidu rogo ati, gbe nga rogo gi ‘yangara areme’ re, nga gu ga Satana sinoraka nahi be gu ‘wege’ nami kere atunga nga ga berãpa borose. (2 Timoteo 3:1-5; AEfeso 2:2) Gu ue ndupai nabipa sende ati ni tihe. Ka i mbu sende ati zanga ngerafuoho, si nauga ni ipo, ki nyaki, na ka ahe arengbanga ka ida rogoho ya. Watadu aboro rengbe kaa ndu rogo gu ati re na ki simbidi gu sende re ku sande si ki nyaki wa mbia. Gu sende naru kuba kurapai nga ga ngbaduraniyo kinawo teketeke. Si rengbe ka dani gbaniangbaha ka i mbu ngerafuoho watadu ka agu aboro simbidihe ku sande adunga padu ani wenengai rogo toroyo bangiriyo ya.

Na nyakipaha tie nga ani mangisunge dunduko na gu ga Baibiri ngarasahe nga: “Mo nibánda kpotoro yo ngangarã; bambiko yo unga naye ni.”—Asanza 4:23.

Agu Apai Rengbe ka Sa Ngbadurani Ni Mbudu “Sende”

Ani makianga bete apai, watadu asino, nga gu nika sa ngbadurani ni mbudu “sende” tipa ka saha ahe sono pongopongo rogoho. Na wai tie, dungu apai gudu kinaho nga gu rengbe ka mbakada ngbadurani yo, ono ani nika makiapa apai herẽ gbua sita: nga inopa gaani zingo nga ga toro, umbasipatise, du niruruse, gunde ti Mbori, idapase, na nyemuse.

“Aboro ngbarago nga aguyo inipa gayo zingo nga ga toro,” wogu Yesu apehe. (Matayo 5:3, NW ) Wa kina gomoro riahe nga gu natingida rani na gupai nga si naida ani rihe, ino ani pa gaani zingo nga ga toro nasa rani a ani duna gomoro tipa gu riahe nga ga toro. Ni sino aboro, aboro na kakaka nyemu ngbatunga gu riahe re mbiko si nasa gupai nga ga aboro raka duna rogoyo tini na ki fu ndupai tipa boro naaraka. Agu afuda naye be ga Satana sinoraka watadu gu bete nyomoro du tirani ho si aida ani wisigipai ni, si rengbe ka sa rani ka ani ininga pa gi gomoro re ya. Wa vura duhe wo, Yesu ayaa: “Boro anye nga ni ungani mbiko kina riahe te, ono mbiko agu apai dunduko naye ngba Mbori yo.”—Matayo 4:4.

Rogo ndikidi gene, ri wene riahe dedede na niringbisiringbisihe nasonosa kpoto boro si duni wenehe, na si nasa kpoto boro a si duna nyemu riahe ho regbo kuraha ka da ni. Kina gu bangisapai re a du tipa gu riahe nga ga toro. Si rengbe ka du nga oni abinga tironi ni kakaka abawisigipai te, ono ka oni mangihe ni sinoroni kaa wisigo Fugo Mbori na auru dunduko na oni kini wisigi agu abuku du mburuhe rii Baibiri dedede, oni abi gupai nga gaoni nyemu wisigopai nika kio kina kumbatayo. Nirengo, oni anipidi regbo gaoni wisigo Baibiri na nyemuhe. Sidu, ka oni mbunga ha taata ya; oni mangisunge nyanyakii tipa ka sonosa wene nyemu gu riahe nga ga toro.

Umbasipatise Narungburasi Ngbaduseyo

Umbasipatise nga nyanyakipa pai rogo duna mbakadimbakadi ngbaduseyo mbiko si nasa rani ani duni agu aboro rengbeyo arengba ka yugopai fuyo na si kini undo rani ani di gu rugute kugume niipo nga gu i afuhe rogo nyemuse gbiati gu rugapai i afuhe. Ani makianga pa gu wene kpiapai nga ga gu Bakindo nangia Yosia. I abi waraga ti regbo gako zogarago nga gu nadu na ga Mbori Ndika rogo nga gu ko afuhe kube Mose. Ho Yosia agi agu afugo ni nga ga Ndika na ki ini baturo wai atitako anyaga tiyo kusayo ti ziazia iriso, ko asipi gako aremu na ki kpari barabangiri Yekova. Tipagine Fugo Mbori azi ngbadu bakindo tini wa gure? Gu tangarapai re naya ngbaduko aduni ‘rurungburaha’ sidu ko ki umbasipa tiko fuo ko gi afugo Yekova. Yekova ainipa ngbadu Yosia nga si aduna umbasipatise, ki duni gu ngbaduse nadiapai kugume, sidu Ko ki fu maku fuko wa rengbehe.—2 Abakindo 22:11, 18-20, NW.

Umbasipatise aundo ga Yesu abawiriki nga aguyo “naawirikanga pai ya na ki du ni kungbo aboro” i girogo agu arengo nga ga toro na kini mangihe, nga gu arengo “airatatamana na airainahe” akpa ti inoho ono nga aguyo nangia airatatamana gbua “wa du pa borose.” (Amokedi 4:13; Ruka 10:21; 1 AKorindo 1:26) Agiyo re ambakadanga tiyo tipa ka dia fugo Yekova kugume te, mbiko ngbaduyo aima nyaka be ruko. Si ni iiriwopai nga Yekova nasoga rukoo?—Asanza 8:13; Daniere 5:20.

Du Niruruse Na Gunde ti Mbori

Gu nebi nangia Yeremaya ake gupai nga “kpotoboro yo nangi ahe ki susi ahe dunduko, . . ; da ka ini he?” (Yeremaya 17:9) Gi nangahe re nayugo tihe rogo dungu agene nibakiakia, wa ti agu aregbo ani a’asada ka diapai kusayo rirani ho ani amanga irairapai ni. Si nayugotihe a ho ani a’asada ka rugusapa gu kerepai ni ani nimangi. Ono tie, du niruruse aundo rani ani dibe gu ngbaduse nga ga nangahe, si kini undo rani ani idi rengo tipa tirani tipa wa ka ani mbakadi tirani. Bake Atambuahe ayugu ngbatunga gu padu niruruse re ho ko akparikpee ni ki ya: “Ako Yekova, mo wísigi re, ki asadi re; mo ásadi kpotore yo na gi berã a.” Ziazia tie, bake Atambuahe aima mbakada ngbadukoyo tipa ka idaha fu Yekova ko girisiko na ki asadiko, ka si avura du nga si aidi ko idipa gbegbere asinoko tipa ko ki rengbe ka diabehe vurũ.—Atambuahe 17:3; 26:2.

Gunde ti Mbori, nga gu nakoda ‘soga gbigbitapai,’ nga nyanyakipa undo rogo gi sunge giriso ahe re. (Asanza 8:13) Ho boro arugatini ni na ga Yekova weneringise nga ga nyemuse na padu ko ni wene ko, gu boro nirengo nagunde ti Yekova naino gupai nga Yekova na ome beko a ka fu mbusa fu aguyo nabasa sangbako, zavura kpio a. Yekova ayugu gupai nga aguyo nagunde tiko agiasangbako a ho ko aya ni fu aYisaraere wee: “Ako ka berã [ngbaduse, NW ] nidu ti yo . . . [tipa] i agúnde ti re na ni, ka ka kuti gimi arugute kindi, ka pai adú ni wenepai fu yo, na fu awiriyo nye anye kindi!”—Pa Fu Rugute ni Ue he 5:29.

Ziazia tie, anga ndu gunde ti Mbori nga ka sa rani ani ra fuko ni gunde te, ono si nga ka sa rani ani gisangba Barani duna nyemuse nga guko ini ani gupai tipa ko nga ko nakpinyemu kina weneapai tipa rani. Nirengo, ngbatunga gu gunde ti Mbori re natumba rani kuari na kini fu ngbarago fu rani a, nga gu ngbatunga gunde Yesu Kristo nitiko ayuguhe bakere gbe.—Yesaya 11:3; Ruka 12:5.

Gu Ngbaduse Duni Mbakadimbakadihe Hi be Idapase

Gu ngbaduse duna nyanyaki idapase ini gupai nga agu apai dunduko Yekova akpinyemuhe be rani watadu ko aruga paha rogo Fugo ko yo dedede niruruhe na si tipa gaani wenepai. (Yesaya 48:17, 18) Gu boro duna ngbatunga gu ngbaduse re nagbia bakere ngbarago be mangasunge na gu ngarasahe du rogo Asanza 3:5, 6, nga gu nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” Ono tie, gu ngbaduse zanga idapase, na nyemu ka kido kuti Yekova te, gbe ka si du nga mangaha wo naida gupai be boro nga ni mbupa kura apai, wa gu nga manga boro gani raka si du taata tipa ka dungura berã ni kuti agu apai nga ga Kindo. (Matayo 6:33) Na wene ndupai, Yekova nabi gu ngbaduse zanga idapase ni ‘gbegberehe.’—AEbere 3:12.

Ani nayugo gaani idapase kuti Yekova rogo dungu agene, kodihe kuti agu apai ani amangaha kpurani yo ka kura aboro abingaha ya. Ni kpiapai, ani dinga gu ndika mangapai du rogo AGaratio 6:7 nga gu nayaa: “Ka i nángi nga roni ya; i asawia nga Mbori te, bambiko gu he rũ boro kina ha ke ni a.” Gaani idapase kuti gi ndika re adu niyuguyuguhe rogo ngbatunga apai wa gu sinima ani abihe, agu abuku ani agedaha, gu bakio wisigo Baibiri ani amanga, na rogo gaani kparakpee a. Ii, gu nyanyaki idapase nafõngbadurani ani rũhe “fu Toro,” si nga banguapai rogo duna gu ngbaduse duni mbakadimbakadihe ka dia Fugo Yekova na kini irisihe.—AGaratio 6:8.

Nyemuse—Nga Bakere Sino Kisusi

Susi gu kura asino dunduko, nyemuse nirengo namanga gu sende nga ga ngbaduraniyo si di Fugo Yekova kugume. Sidu, ho Pauro aaringbisaha ni na idapase gbiati maabangirise, gu mokedi re aringbisipa nyemuse ya si nga gu sino “kii dagbaha [kisusi].” (1 AKorindo 13:13) Gu ngbaduse hi be nyemu Mbori nagbia bakere ngbarago rogo giasangbako; nirengo rago agberanga tihe be gupai Mbori akpinyemuhe te. Gu mokedi nangia Yoane ayaa: “Gi nga du na nyemu Mbori re, nga ka ani kuti gako rugute. Gako rugute asusa nga omerani te.” (1 Yoane 5:3) Wa kina gure, Yesu ayaa: “Si ngia boro nakpi nyemu re, ni ka kuti gi pai. Buba akpi nyemu ni akpi.” (Yoane 14:23) Ani rugu tirani na gupai nga ngbatunga gu nyemuse re ni guhe boro afuhe i ki karaga kinaha fu ni. Ii, Yekova nakpinyemu aguyo nyanyakii nga aguyo naye koyo du ko ni mbiko nyemuse.

Yekova ini gupai nga ani nga kpakpa aboro na ani naingapai kuti ko dedede. Si ki vura du wo, ko aturũsanga tiko tirani te. Guhe Yekova angereka tipaha be gako amoyambu nga gu ‘kpotoseyo du dunduko’ koyo du ko ni, nga gu nasa rani ani ndusunge ko na nyemuhe na gu ‘mbisimo du pusiapusia.’ (1 Pekapai 28:9) Rengo ngaha, Yekova ima ino gupai nga si naida regbo gbiati asadatise tipa ka sonosa wene asino ngbadurani yo na were kini yugu zuzu toro. (AGaratio 5:22, 23) Mbiko gipai re, ko na zerangbaduse na ani, “bambiko ko ini pa bororani; ko natingida pa rani ya nvutu sende nga ani.” (Atambuahe 103:14) Ni yugo Yesu kina gu bangisa sino re, ko anabiranga gako abawiriki nyanyakii tipa gayo irairaapai te, ono ko anaundo yo na kini ngarasi yo ni zerangbaduse. Ngbatunga gu nyemuse, inapai, na zerangbaduse nga ga Yekova na ga Yesu re afõnga ngbaduroniyo oni kpinyemu yo bakere gbe tee?—Ruka 7:47; 2 Petero 3:9.

Kangia ti kura aregbo oni nabi gupai nga oni nasota asota ka mofa agu asinoroni du wa nvuo atiyo nga gu si aida oni kombiraha kusayo, ono nga gu tarãha aima gito ku sendeyo, watadu ka imo gu sinoroni nga ga nyakarii du wa akoropere nga gu naima uga nyanyakii, ka kpotoroni yo kpinga ya, ka kpotoroniyo zerenga a ya. Kuba gure oni nye kuti mbakadapai wa oni kaa “kpátagara kuti kpe kindi,” kini kodi sana Yekova dedede tipa gako toro. (ARomo 12:12) Mbiko gu gako undo du ko na nyemu ka fuhe fu roni, oni aduna diabese wa kina Ezara rogo duna gu ngbaduse duni mbakadimbakadihe dunduko tipa ‘ka gbata ga Yekova rugute, na ka amanga ha.’

[Gu kpiahe du ti kpewaraga 31]

Ezara abanda gako kparatise fu Mbori zavura Babera yo a

[Gu kpiahe du ti kpewaraga 29 aye be]

Garo Nalbandian