Ga Gbia Riahe Nga Ga Nyemu Nayugo Ginipai Fu Roni?
‘Gu boro ka duna gbegberẽ berã ki ri gu kpakuto na ki mbirihe tingba gu inga nga ga Gbia, ni adu ni borobape nibipa kpoto Gbia gbiati kureko.’—1 AKORINDO 11:27.
1. Ginipai nyakipaha kisusi so yo gima mangaha kurogo gu garã nga 2003, na si atona ti gine?
GU NYANYAKIPA pai kisusi so yo gima mangaha kurogo gu garã nga 2003 amanga rogo Zerekpe ti rameru 16 fuo ti uru. Ti gu regbo tie re, aDezire Yekova nika dungura tiyo kurogo aba ka Tingidapa Kpio Yesu Kristo. A wa i niyuguhe rogo gu papara kekepai ye mbata fu gere, Yesu nasigira gipai re, tingbafuo manga ko Pumbo Susiri na gako amokedi rogo gu diwi nga Nisana ti rameru 14 rogo gu garã nangia 33 ti Gaani Regbo, na i naayambaha a nga Ga Gbia Riahe Nga ga Nyemu. Gu kpakuto adunga na agbooro rogoho ya du tipa Tingidapa Kpio Yesu narukuba gu kpoto Yesu naadunga na ingapai ya na gu imekakue duna zamba bangirihe narukuba gu kureko nauka, nga gu yangara motumo rengbe ka batasa ngbatunga aboro be gu ingapai gbiati kpio i adikumboho.—ARomo 5:12; 6:23.
2. Gini zahe du nikekehe rogo 1 AKorindo 11:27?
2 Si naida agu aboro nari gu kpakuto na kini mbiri gu imekakue du tipa Tingidapa Kpio Yesu mangihe wo rogo irisa. Gu mokedi nangia Pauro ape gupai re ziazia ho ko ake waraga ni fu agu aKristano nadu rogo gu Korinda nadu mbata, nga gu rago i anaringa Ga Gbia Riahe Nga ga Nyemu rogoho ngba ruru gene ya. (1 AKorindo 11:20-22) Pauro akepai ki ya: “Gu boro ka du na gbegberẽ berã ki ri gu kpokuta ki mbiri he ti ngba gu inga [nga] ga Gbia, ni ka du ni borobape [nibipa] boro Gbia na kureko.” (1 AKorindo 11:27) Gini nyanyakipa pai du rogo agu afugo re?
Gu Kura Aboro Anamangaha na Zingo Irisa
3. Ginipai dungu agu aKristano nangia aKorindo anamangaha ti regbo Ga Gbia Riahe Nga ga Nyemu?
3 Dungu agu aKristano nangia aKorindo anari gu kpakuto na kini mbiri gu imekakue nadu tipa Tingidapa Kpio Yesu zanga irisa tipaha. I aduku na akparakapai dagbayo, na si amangi amanga kandara ti regbo sa, nga, aguyo aye na gayo riahe nga ga nyemu ki rihe mbata fu regbo gu riahe nga ga Gbia re watadu i arihe ti regboho, na dedede, i anari riahe nibakerehe na kini mbiri buda nibakerehe a. Berãyo adunga ziazia tipa gipai re watadu ka berã paha wenengai rogo toro te. Pa manga yo ho were asa yo ‘ni aborobape nibipa gu borose nga ga Gbia na kureko.’ Aguyo naadunga na gu riahe nga ga nyemu beyo tigayo ya, adu na gomoro, sidu, ka i arengbanga ka maaberã yo fuo pai be gomoro ti gu regbo re ya. Ii, dunguyo anari gu kpakuto na kini mbiri gu imekakue re zanga duna irisa tipaha na zanga i ini nyakapa gupai re. Si airiwonga te, si du i aye ti ni na sapangbanga ku auru yo nisayo!—1 AKorindo 11:27-34.
4, 5. Tipagine ngbaha ti ni fu agu aboro ninaari gu kpakuto du tipa Tingidapa Kpio Yesu na kini mbiri gu imekakue narukuba kureko, i wisigi tiyo?
4 Wa regbo Tingidapa Kpio Yesu naambeda na agarã dunduko, si nidu niwenepai agu aboro naawisigo tiyo ninaari gu kpakuto na kini mbiri gu imekakue du tipa Tingidapa Kpio Yesu. Tipa i rengbe ka ri gi riahe re ngba ruru gene nga gu riahe dungu aboro akoda tiyo ka ngbabehe, si naida i du wenengai rogo toroyo. Agu aboro dunduko ayugonga irisa tipa ga Yesu motumo ya, watadu nabisirapaha, i ngba kerepai, mbiko i rengbe ‘ka dia yo kusayo dagba ga Mbori aboro,’ wa kina gu i anamanga gu Yisaraere nani nanagirisanga tini ya mbata fu ni ri gu riahe nanidu tipa dungu aboro dungura tiyo ka ngbabehe.—Pa Amotumo 7:20; AEbere 10:28-31.
5 Pauro aringbisipa gu riahe i naarihe ti regbo Tingidapa Kpio Yesu kuti gu riahe nanidu tipa dungu aboro dungura tiyo ka ngbabehe rogo gu ringara aYisaraere nadu mbata. Ko afura tipa agu aboro nari gu riahe re ni agu aboro nakoda tiyo kuti Kristo na fuo gure ko ki ya: “[Si adanga fu roni] oni mbiri . . . he ti ngba gu inga nga ga Gbia, na gu inga nga ga adaimona te, ka oni dí nga he ti gu mbisa nga ga Gbia, na gu mbisa nga ga adaimona ya.” (1 AKorindo 10:16-21) Ka pai mangi nga, gu boro ninaari gu kpakuto na kini mbiri gu imekakue du tipa Tingidapa Kpio Yesu, ni mangi kere ingapai, si naida ni kusihe fu Yekova na ki ndu a fuo agu abaakumba nga ga dungurati yo tipa gu undo nga ga toro. (Asanza 28:13; Yakoba 5:13-16) Kangia ni sa gani berã nirengo na ki mangi gupai nayugo gupai nga, ni ima sa gani berã, ni rẽarẽ ka ri gu kpakuto re na ki mbiri gu imekakue re na irisa.—Ruka 3:8.
Iriiri Adupatipai Kini Bihe
6. Gini aboro Mbori nabanda gu mamu nga ga ri Ga Gbia Riahe Nga ga Nyemu tipa kina yo?
6 Ya mo si naida gupai nga, agu aboro namanga weneapai awere fu gu yangara mbedimbedi awirina Kristo nga aguyo du dagba 144,000 i ri Ga Gbia Riahe Nga ga Nyemu a? (Matayo 25:31-40; Yugoti 14:1) Oó. Mbori abanda gu mamu re tipa kina agu aboro ko ambedi yo nitoro tipa i duni “adikumbo na Kristo.” (ARomo 8:14-18; 1 Yoane 2:20) Ono tie, ginipai tipa agu aboro duna gu maabangirise nga ga raka nyeanye kindi rogo paradiso auru kpotosende tiibe ga Mbori zogarago nga ga Kindo? (Ruka 23:43; Yugoti 21:3, 4) Wa duhe nga, i nga adikumbo na Yesu na ki duna gu maabangirise nga ga raka ngbangbaturũ yo te, i nadu pati Tingidapa Kpio Yesu ni iriiri adupatipai kini bihe.—ARomo 6:3-5.
7. Tipagine agu aKristano nadu rogo bambata sa kama agarã aini gupai ti ni nga si naida i ri gu kpakuto na ki mbiri gu imekakue du tipa Tingidapa Kpio Yesu?
7 Gu ndikidi aKristano nadu rogo bambata sa kama agarã adu nimbedimbediyo niziazia toro. Dunguyo arengbe arengba ka mangasunge na iiriwo gamahe nga ga toro sa watadu nidunguhe, ngbatunga gu du wa fura rogo kura fugo-aboro. Sidu, si adunga nikpakarakpakarapai fu ngbatunga agu aboro re i ini pa tiyo ya i nimbedimbediyo be toro na ki rengbe ka ri gu kpakuto na ki mbiri gu imekakue du tipa Tingidapa Kpio Yesu te. Ono tie, ti gi gaani regbo re, agu aboro du nimbedimbediyo rengbe ka ino pa tiyo wo mbiko agu afugo naye be ga Mbori toro nga gu nayaa: ‘Agu aboro ga Mbori toro angbe fuyo mbatayo, i nga awiri Mbori. Bambiko oni adianga gu toro kugume nga ga akanga nga gu nabagunde tironi berewe te; ono oni adi gu toro nasa roni ni awiri-mbuti Mbori adi roni ka mbu tironi nga gu nasa rani ani yambu ko niyaa “Aba!” ’—ARomo 8:14, 15.
8. Ada ‘wene tunga’ arukuba yo na ada “rende” arukuba yo nga aguyo gumba yo payo rogo Matayo kapita 13?
8 Vuru gu kama agarã susi, ndikidi mbedimbedi aKristano asono wa ‘wene tunga’ ati “rende” yo, watadu apeziree ya i nga aKristano. (Matayo 13:24-30, 36-43) Natona rogo agu agarã nangia ga 1870, aboro atona ka kparia ‘wene tunga’ ziazia, na fuo agarã mbembedii wa 100 kusa, i agumba gupai fu agu ababiapai nangia mbedimbedi Kristano nga: ‘Si naida abaakumba moi agi arugute du naye re ku barabangiri agu aboro dungura tiyo [tipa ka Tingidapa Kpio Yesu], nga (1) i duna idapase kuti [kure Kristo]; na (2) i kpara tiyo fu Gbia na tipa gako sunge, ka si vura ka ida boro kpi akpi vurũ. Fuo manga yo agu apai re tie, si ki idi i yambu gu kura aboro duna gayo berã wa kina gure i kodi tiyo na yo ka tingidapa kpio Gbia.’—Studies in the Scriptures, Series VI, The New Creation, kpewaraga 473.a
Gbata “Kura Avusende”
9. Waigu i aringbisipa “bakere rimbasa aboro” ziazia rogo gu garã nangia 1935, na ginipai gu ziasipai re amangi bete agu aboro nani nanari gu kpakuto mbata na kini mbiri gu imekakue du tipa Tingidapa Kpio Yesu?
9 Fuo bete regbo kusa, ga Yekova riigbu atona ka gbeberã kuti kura aboro ku pati mbedimbedi apefuo Kristo. Nyanyakipa pai rogo gipai re amangi bebere agu agarã nangia ga 1930. Mbata fu gu regbo re, ga Mbori aboro anabi gu “bakere rimbasa aboro” gumba yo payo rogo Yugoti 7:9 nigu ue riko nga ga toro nga ga agu aboro nika koda tiyo na mbedimbedi aKristano du bangeyo nga 144,000 i ka zingisa yo ku ngbangbaturũ yo, i ki du wa anakurea dia Kristo watadu gari amoyambu. (Atambuahe 45:14, 15; Yugoti 7:4; 21:2, 9) Ono tie, rogo Merekoko ti rameru 31, rogo 1935, rogo gu gumbapai i amangihe ti regbo bakere dunguratise nga ga aDezire Yekova rogo gu gbata nga Washington, D.C., du Amerika yo, i asakirogoyo kuti Ziazia Kekeapai ya gu “bakere rimbasa aboro” watadu (“ndurumo aboro,” King James Version) re nayugopa “kura avusende” nga aguyo naraka rogo yangara arame. (Yoane 10:16, NW ) Fuo nyasa gu bakere dunguratise re, kura aboro nga aguyo nanari gu kpakuto mbata na kini mbiri gu imekakue du tipa Tingidapa Kpio Yesu ambuhe mbiko i arugutiyo na gupai nga, gayo maabangirise adu tipa ka raka auru kpotosende angianga ngbangbaturũ yo ya.
10. Waigu rengbe oni ka ringbisapa gu maabangirise gbiati agu asunge nga ga gu “kura avusende” du areme?
10 Tona rogo gu garã nangia 1935, angia gu regbo gbe i atona ka gbata agu aboro nada kusa ni “kura avusende,” nga aguyo duna idapase kuti gu tumorii Yesu afuhe, na i ki kpara gayo raka fu Mbori, na kini songodi gu mbedimbedi “umba rimbasa nga ga avusende” rogo sunge tungusapa Kindo. (Ruka 12:32, NW ) Gi kura avusende re na gu maabangirise tiyo nga ga raka auru kpotosende nyeanye kindi, ono rogo gu kura apai dunduko, i nawira gu yangara mbedimbedi adikumbo Kindo du areme. Wa kina agu ayeaye nadu rogo gu ringara aYisaraere nadu mbata nanairisa Yekova na kini ra kutii gako aNdiko, gu kura avusende du areme ima idapa gu sunge nga ga aKristano, ngbatunga gu du wa tungusa wene pangbanga rogo kodabee na agu aYisaraere nga ga toro yo. (AGaratio 6:16) Ono tie, a wa si adu nga, i anaidanga ha fu gu boro nangia yeaye ku ringara aYisaraere yo i sia ni nibakindo watadu ka sia ni ni mangisunge niboromotumo te, kinawo a duhe tipa gi kura avusende re, anga guni ho sa ka i idihe funi ni zogorago rogo gu Kindo nga ga ngbangbaturũ watadu ka idaha funi ni mangisunge ni aboromotumo te.—Pa Fu Rugute ni Ue he 17:15.
11. Tipagine duhe ti ni nga gu ramediwi boro azi bapatiza rogoho nayugopa gu maabangirise du beni?
11 Bara rogo agu agarã nangia ga 1930, ho ngaha re, apai atona kaa zia tooni tooni, nga bakere gbe, i aima sia agu aboro du rogo gu riko nga ga ngbangbaturũ bangeyo ki rengbe. Tipa dungu agarã awere, agu aboro i naagbata yo nga kura avusende, duna maabangirise ka raka auru kpotosende. Kangia guni sa dagba gu mbedimbedi aKristano re arẽnga berewe tipa nduge ku ngbangbaturũ yo te, si nawiraha gbe nga, gu boro ka i yambu ni kuba guni ti re ni angia gu boro naima digo nimangisunge fu Mbori tipa dungu agarã ni guni sa dagba kura avusende tipa ni hiisi gu ba kpa dagba gu bange mbedimbediyo nga 144,000.
Gupai Nasa Kura Aboro I Duna Iraira Aberã
12. Rogo gini apai ka boro bi tini rogoho si ki idi ni mbu ri gu kpakuto gbiati mbira gu imekakue du tipa Tingidapa Kpio Yesu, na tipagine?
12 Mbedimbedi aKristano na wiri kapa tipa gupai nga i ima yamba yo tipa nduge ku ngbangbaturũ yo te. Ono ginipai tipa agu aboro i ayambanga yo ya ono naima digo niri gu kpakuto na kini mbiri gu imekakue du tipa Tingidapa Kpio Yesu? Fuo ino yo gupai awere tie nga i ayambanga yo tipa nduge ku ngbangbaturũ yo te, nirengo gayo sangbakpotoyo nafuda yo i mbu diaha. Mbori aidanga na ga gu boro pai nata ino gupai aino nzunzu nga i ayambanga ni tipa ni du nibakindo na niboromotumo ngbangbaturũ yo te kini mangi tini wa gu boro i aima yamba ni. (ARomo 9:16; Yugoti 20:6) Yekova aimi gu kumba ningbatunga Revi nangia Kora tipa gu nyemu mangasunge niboromotumo ko agu sani nga gu sunge nadu tipa kina awiri Arona sa. (Gate 28:1; Pa Geda Aboro 16:4-11, 31-35) Ka Kristano bi gupai nga si arunga funi ni naari gu kpakuto na kini mbiri gu imekakue du tipa Tingidapa Kpio Yesu te, si naida ni mbu diaha na ki kpari fu Yekova rogo umbasitise tipa ko mbupai funi.—Atambuahe 19:13.
13, 14. Tipagine rengbe kura aboro ka berã gupai ti ni ni ingahe nga i ima yamba yo tipa nduge ku ngbangbaturũ yo?
13 Gine rengbe ka sa kura aboro i berẽ gupai ni ingahe nga i ima yamba yo tipa nduge ku ngbangbaturũ yo? Pa kpio ga boro badiarogatise watadu gu kura kerepai rengbe ka sa boro ka ni dunga berewe na nyemu raka tini auru kpotosende ya. Watadu i rengbe ka duna nyemu nduge ku ngbangbaturũ yo mbiko bawene abakurea yo natakapande tiyo nimbedimbedi aKristano. Rengo ngaha nga, Mbori amaanga aboro i sia kura aboro tipa gi mamu re te. Na ko ambedanga adikumbo Kindo nisa ko yo i gi afugo si niyambu yo tipa nduge ku ngbangbaturũ yo te.
14 Gu zire yugopai nga ga pambori nga gu naya wee wene aboro dunduko nika ndu ku ngbangbaturũ yo rengbe ka sa kura aboro i berẽ ya i ima yamba yo tipa nduge koyo. Sidu tie, si naida ani banda tirani gu kuru iraira aberã ani adu nani mbata watadu kura apai ka nyaga rani kusayo. Nikpiapai, bete aboro rengbe ka sana tiyo ki ya: ‘Aziga gu duho mi ambifaha nasaka rire yo? Mi ningia gu boro apai afõ ni ngbaduniyo ka ni aberãnga berewe wenengai ya?’
15, 16. Gine rengbe ka sa bete aboro i berẽ gupai ni ingahe nga i nga mbedimbedi aKristano?
15 Bete aguyo rengbe ka sana tiyo na agi asanahe re: ‘Mi nakpinyemu ka du nigu nyanyakipa boro rimo awo? Mi na bakere nyemu pagbia tire awere watadu mi nakpinyemu ka du kumbatayo dagba agu aboro nika zogarago na Kristo?’ Ho i ayambu aboro ni rogo bambata sa kama agarã tipa i duni adikumbo Kindo, anga i dunduko nadu rogo agu aba nga ga ngerakurii apai rogo dungurati te. Na agu aboro i ayambu yo ku ngbangbaturũ yo agbatanga gene tipa rimo yo naawo watadu ka rekango yo mbiko i mbedi yo te. I nayugo gu umbasitise aboro amaabangiriyo ka bihe ti agu aboro nayugo “ga Kristo berã.”—1 AKorindo 2:16.
16 Gu kura aboro rengbe ka da ti gu digisopai nga, i ima yamba yo tipa nduge ku ngbangbaturũ yo mbiko gu bakere inohe du yo nani rogo Ziazia Kekeapai. Ono tie, pa mbeda yo boro na toro afunga gu giarogopaiyo funi susi ga akurani te, mbiko si aidi Pauro fu rugute fu kura mbedimbedi aKristano. (1 AKorindo 3:1-3; AEbere 5:11-14) Mbori aima mbakadapai ki fu gu gene nika fu gu riahe nga ga toro fu gako aboro. (Matayo 24:45-47) Sidu, si aidanga boro berẽ gupai nga, padu boro nimbedimbedi Kristano nafu gu tatamana funi susi ga agu aboro duna gu maabangirise nga ga raka auru kpotosende te. Anga pa mbeda yo boro na toro nasa ni ni iratatamana rogo karagapai sa agu asanahe du rogo Ziazia Kekeapai, ni iratatamana rogo manga dezirepai, watadu rogo manga agu agumbapai nga ga Ziazia Kekeapai te. Agu aKristano duna gu maabangirise nga ga raka auru kpotosende na kina agi atandu re a beyo.
17. Pa mbeda yo boro na toro naruriipa gine na da duhe kubeni?
17 Ka kuarani idipase sanahe ka ino singia i ima yamba ni ke tipa nduge ku ngbangbaturũ yo, bakumba watadu gu Kristano ima nyaka rogo giarogopaiyo rengbe ka saka gipai re na ni. Ono tie, anga boro ho sa nadiaberã fu kurani tipa gipai re te. Gu boro nzunzu i aima yamba ni, ni asananga he berewe tipa gi ngbatunga maabangirise re te mbiko ni ima ruga tini na paha wenengai. “I avunga nga . . . [mbedimbedi aKristano] ni gbegberẽ tunga te, ono ni kina gu tunga nikaagberã nga ya, nga gu pai nga ga Mbori, du na unga, nikanye anye kindi.” (1 Petero 1:23) Mbiko gako toro gbiati Fugo ko, Mbori narũ gu “tunga” nasa boro “ni vovo ni,” ki sa ni ni moibangirini tipa ka raka ngbangbaturũ yo. (2 AKorindo 5:17) Yekova du nasia aboro. Si du tie, pa mbeda yo boro na toro ‘ayenga be gu boro nakpinyemuhe, watadu guni naora te, ono si be Mbori.’ (ARomo 9:16) Wai tie ka boro rugu tini singia i ima yamba ni tipa nduge ku ngbangbaturũ yo?
Gupai Nasa Yo I Inihe Nirengo Nzunzu
18. Waigu nga Mbori toro amanga dezirepai na gu toro nga ga mbedimbedi aKristano?
18 Gu dezirepai ga Mbori toro amangaha rogo mbedimbedi aKristano yo nayugo gupai zanga kapa nga, i ima yamba yo tipa nduge ku ngbangbaturũ yo. Pauro akepai ki ya: ‘Oni adi gu toro nasa roni ni awiri-mbuti Mbori adi roni ka mbu tironi nga gu nasa rani ani yambu ko niyaa “Aba!” ’ Toro nga dezire nitihe na tororani ya awiri Mbori nga ani. Ka ani duni awiriko, ani du adu ni adikumbo, niga Mbori adikumbo, ki gbia tirani ni adikumbo na Kristo; ka si du wa ani nahi pai na ko ani amongo du nitaasitaasi rani a na ko.’ (ARomo 8:15-17) Tii gu ome nga ga ziazia toro, gu toro nga ga mbedimbedi aKristano watadu gu berã moipai kuriyo nasa yo i bi gupai Ziazia Kekeapai agumbaha tipa agu awiri Yekova nga ga toro yo ni agu afugo du tipa kina boro yo. (1 Yoane 3:2) Ga Mbori toro nasa yo i bi tiyo ni awiriko na si kini moi gu maabangirise kurogo yo yo du kia ti ga kura aboro. (AGaratio 4:6, 7) Ii, pa raka aboro nyenye kindi nirengberengbe yo auru kpotosende dagba gayo aborokporo na abakurea yo nga wenepai nirengo, ono tie, anga si nga gu maabangirise fu Mbori he fuyo tigayo te. Mbiko gako toro, ko moi gu maabangirise du tipa raka ngbangbaturũ yo kurogo yo yo ninyanyakihe si ki sa yo i duna nyemu ka mbupa agu apai dunduko du auru kpotosende.—2 AKorindo 5:1-5, 8; 2 Petero 1:13, 4.
19. Gini sunge vovo mokido amangaha rogo gu raka nga ga mbedimbedi Kristano?
19 Mbedimbedi aKristano akapanga tipa gayo maabangirise te, nga i aima dia yo kurogo vovo mokido. Yesu afura tipaha ho ko asigira Tingidapa Kpioko ni ki ya: “Gi inga re, si nga vovo ndika rogo kurere, nga kina gu nauka tipa roni.” (Ruka 22:20) Mbori gbiati mbedimbedi aKristano ni agu aboro du rogo gu vovo mokido re. (Yeremaya 31:31-34; AEbere 12:22-24) Yesu nga azaro. Fuo vovo mokido tona mangasunge mbiko gu kure Kristo nauka, anga gu vovo mokido re akodi kina aYuda sa te, ono si asa gupai a nga i kodi aboro dagba agendiria tipa i da nigu rikaaboro rimo Yekova nika du riyo, na ki du nipapara gu “tunga” nga ga Abarayama. (AGaratio 3:26-29; Amokedi 15:14) Gi ‘nyenye mokido’ re nazakagene fu agu aYisaraere nga ga toro yo i zingisi yo ku ngbangbaturũ yo kurogo gu unga zanga kpio.—AEbere 13:20.
20. Gini mokido i akoda mbedimbedi aKristano kurogoho na Kristo?
20 Mbedimbedi aKristano akapanga tipa gayo maabangirise te. I arimisi yo berewe kurogo kura mokido, gu mokido nga ga Kindo. Nibipa gu kodabee i ka du nani na Kristo, ko ayaa: “Oni nga agu yo naadu na mi ho i aasadi re ni. Mi nafu ngbi [kindo, NW ] fu roni a wa Buba afu he fere.” (Ruka 22:28-30) Gi mokido du dagba Kristo na agu abakindo nika zogarago na ko re anye anye kindi na gaha sunge.—Yugoti 22:5.
Regbo Tingidapa Kpio Yesu Nga Regbo Ngbarago
21. Waigu rengbe ani ka gbia bakere undo gbe be regbo Tingidapa Kpio Yesu?
21 Dungu amaku duho ani naagbiaha ti regbo Tingidapa Kpio Yesu. Ani rengbe ka gbia undo be gu mbakadapai nga ga geda Ziazia Kekeapai nga gu ringbisi yo paha tipa gi regbo re. Si a nga wene kparakpara regbo tipa kparakpee, regbo berãkuriipa ga Yesu raka auru kpotosende na kpioko, na regbo tipa ka du ti sunge tungusapa Kindo na kura awirina. (Atambuahe 77:12; AFiripoio 4:6, 7) Padu ani pati ni yo nisaha natingida rani na pa gu nyemuse Mbori gbiati Kristo ayuguhe rogo gu motumo tumorii nga ga Yesu. (Matayo 20:28; Yoane 3:16) Gipai Mbori amangihe re nasa rani ani duna maabangirise na kini fu wasa fu rani na si naida si ngarasi rani ani kakuti gu mangaapai nyanyakii du wa ga Kristo. (Gate 34:6; AEbere 12:3) Na kurii gure, si naida Tingidapa Kpio Yesu ngarasi rani ani mangi agu arugute du tipa gaani kparatise fu Mbori nigako amoyambu na ka du niruru apefuo Wiriko.
22. Gine nga gu ga Mbori bakere gamahe fu ngbatunga aboro kii kisusi, na gine nga gene sa dagba agu akuraha tipa ani yugu gaani tambuahe ngbaha?
22 Nangbaa gu wene agamahe Yekova nafuhe fu rani re! (Yakoba 1:17) Ani na Fugo ko nayugo gene fu rani, gu undo gako toro afuhe, na gu maabangirise nga ga nyenye unga. Gu ga Mbori gamahe kii kisusi ko afuhe fu rani nga gu motumo nga ga Yesu tipa gu ingapai nga ga mbedimbedi aKristano na tipa gu ingapai nga ga kura aboro dunduko nga aguyo duna idapase. (1 Yoane 2:1, 2) Sidu, gine pa kpio Yesu ayugoho fu roni? Oni adu dagba agu aboro nika yugo gayo tambuahe tipaha nidungura yo tiyo kurogo aba tipa Ga Gbia Riahe Nga ga Nyemu fuo ti uru rogo Zerekpe ti rameru 16, rogo gu garã nga 2003?
[Gu rukutu kekeapai du bandu kpewaraga yo]
a Si nga gu buku aDezire Yekova akusihe, ono i akusanga ha awere berewe te.
Gaoni Akaragapai Nga Gine?
• Ada si aida i ri gu kpakuto na kini mbiri gu imekakue du tipa Tingidapa Kpio Yesu?
• Tipagine “kura avusende” adu ti ni pati Ga Gbia Riahe Nga ga Nyemu gbua ni iriiri adupatipai kini bihe?
• Wai mbedimbedi aKristano aino gupai nga, si naida i niri gu kpakuto na kini mbiri gu imekakue du tipa Tingidapa Kpio Kristo?
• Regbo Tingidapa Kpio Yesu nga wene regbo tipa gine?
[Graph/Gu kpiahe du ti kpewaraga 14]
Adupati Tingidapa Kpio Yesu
ROGO AMIRIONI
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Gu kpiahe du ti kpewaraga 14]
Oni adu pati Ga Gbia Riahe Nga ga Nyemu rogo gi garã re?
[Gu kpiahe du ti kpewaraga 17]
Regbo Tingidapa Kpio Yesu nga wene regbo tipa ka kiiso geda Ziazia Kekeapai na ka du ti sunge tungusapa Kindo na kura awirina