Bakere Rimbasa Aboro du Nga Kura Akandoro Natambua Mbori Gbiati Kristo

1. Gu gumbapai i amangihe rogo 1935 ti regbo bakere dunguratise, gini sangbanapai si adu na ni kurii kura paranga sa?

PARANGA adu kinaho garãko adu nga 18 ho ko azi bapatiza ni rogo 1926. Avunguko angia aBawiriki Ziazia Kekeapai, nga gu rimo i anaayamba aDezire Yekova na ni ti gu regbo re. Agu avunguko re adu na awiriyo biata ni akumbagude na adegude ue, nga aguyo i asonosi yo i irisi Yekova Mbori na ki wiriki Yesu Kristo. Wakina agu aBawiriki Ziazia Kekeapai dunduko a naadu ti gu regbo re, gu ruru paranga re anaari kpakuto na kini mbiri imekakue na agarã dũ ti regbo Ga Gbia Riahe. Ono tie, gako maabangirise tipa kumbatayo aˈaria tihe ho ko agi gu nyanyakipa gumbapai ni riihe angia, “Bakere Rimbasa Aboro.” J. F. Rutherford namangi gu gumbapai re rogo 1935 ti regbo bakere dunguratise rogo gu gbata nga Washington, D.C., Amerika yo. Ginipai aBawiriki Ziazia Kekeapai awirikihe ti regbo gu bakere dunguratise re?

2. Gini rengo Wiriba Rutherford asakipai tipaha rogo gako gumbapai yo?

² Rogo gu gumbapai re, Wiriba Rutherford asakipai tipa ada nga gu “bakere rimbasa aboro” i napepa yo rogo Yugoti 7:9. Tona ti gu regbo re ka ga kusayo, aBawiriki Ziazia Kekeapai anaaberã gupai nga bakere rimbasa aboro nika ndu ka raka ngbangbaturũ yo ono i azoganga rago na Yesu te, mbiko i aadunga ni ruruyo ki nyasi koyo te. Wiriba Rutherford amangisunge na Ziazia Kekeapai tipa ka sakarogo gupai yo nga i asianga bakere rimbasa aboro i ndu ka raka ngbangbaturũ yo te, ono i nga ga Kristo kura akandorob nga aguyo nika bata ti regbo “bakere gberãngbi” na ki raki nyeanye kindi auru kpotosende. (Yugo. 7:14) Yesu akidohe nga: “Gu kura akandoro du be re, adu nga rogo gi ndugu re ya; mi ayé aye na ami a, ami agía fugore agia; rimbasara adú adu sa, babanda akandoro ki du sa.” (Yo. 10:16) Gi “kura akandoro” re nga ruru aDezire Yekova nga aguyo du na gu maabangirise nga ga raka nyeanye kindi rogo Paradizo auru kpotosende. (Mt. 25:31-33, 46) Ani bingo wai gi vovo giarogopaiyo nga ga gu rengo nga ga Ziazia Kekeapai re aˈaria raka badungu ga Yekova aboro, kodihe na ga gu paranga wirina re.—Tam. 97:11; Snz. 4:18.

VOVO GIAROGOPAIYO AˈARIA GU RAKA NGA GA AKUTU ABORO

3-4. Ti regbo bakere dunguratise rogo 1935, ginipai akutu aboro arugutiyo na ni tipa gayo maabangirise, na tipagine?

³ Bakerepa ngbarago naadu ti regbo gu bakere dunguratise re ho bagumbapai asana agu aboro ni naadu pati ni nga: “Agu aboro du na maabangirise ka raka nyeanye kindi auru kpotosende, ya mo ka oni ru kuari?” Wirina nga guko naadu kina pati gu dunguratise re ape gupai nga agu aboro naaru kuari, bangeyo aima susa bebere agu aboro naadu pati gu bakere dunguratise re bangeyo adu wa 20,000. Fuo gure, Wiriba Rutherford aya: “Oni ngere! Bakere rimbasa aboro!” Fuo gure, agu aboro dunduko naadu pati bakere dunguratise apoi kuari na bakere ngbarago. Agu aboro naaru kuari arugutiyo na gupai nga i aasianga yo i ndu ka raka ngbangbaturũ yo te. I aima ino gupai nga i aambedanga yo na ga Mbori ziazia toro te. Rogo gu uru nangbefuo gu bakere dunguratise re, vovo aDezire Yekova bangeyo adu nga 840 azi bapatiza, na badunguyo nangia kura akandoro.

⁴ Tingbafuo gu gumbapai re, gu paranga i nifura tipa ko kusayo gbiati kura akutu aboro ambu ri kpakuto gbiati mbira imekakue ti regbo Ga Gbia Riahe. Badungu aboro naadu wakina gu wirina nangia boro umbasitise nga guko naya: “Gu Tingida Pakpio Yesu namangi rogo 1935 nangia gu yangara Tingida Pakpio Yesu mi ari kpakuto rogoho na ki mbiri imekakue, mi aini gupai nga Yekova aamanganga sunge na gako ziazia toro tipa ka fu gu maabangirise fere nga ga raka ngbangbaturũ yo te. Kuba gure, mi adu na gu maabangirise nga ga raka auru kpotosende na ka undo na saha ni paradizo.” (Rom. 8:16, 17; 2 Kor. 1:21, 22) Naatona ti gu regbo re ka ndu kumbatayo, agu aboro nga bakere rimbasa aboro ima kio ni bakerehe, na i aima digo nimangisunge wa sa na yangara mbedimbedi aKristano.

5. Waigu Yekova abi agu aboro nambu ri gu kpakuto gbiati gu imekakue du tipa Tingida Pakpio Yesu?

⁵ Wai du Yekova abi agu aboro naambu ri gu kpakuto gbiati gu imekakue du tipa Tingida Pakpio Yesu tifuo 1935? Na ginipai Yekova aberãha tipa gu Dezire Yekova naima zio bapatiza areme, nga guni nabi tini nga si naida ni naari kpakuto ari na kini mbiri imekakue ti regbo Ga Gbia Riahe, ono kusa ni kini rugutini na gupai nga i ambedanga ni na ziazia toro te? (1 Kor. 11:28) Kura aboro aima ri kpakuto na ki mbiri imekakue bambiko i aaruganga tiyo na gayo maabangirise te. Ono ka i rugutiyo na gupai nga si aarunga fuyo i rihe te, na i ki mbu rihe na kini ndu kumbatayo kindi kaa iriso Yekova ni ruruyo, ko ima rengba ka dia yo ku dagba kura akandoro yo. Ka si vura du vurũ nga i aringa kpakuto na kini mbiri imekakue te, i nandu kindi tipa Tingida Pakpio Yesu mbiko gupai nga i na bakere tambuahe tipa gupai aYekova na Yesu namangihe fuyo.

BAWENE MAABANGIRISE

6. Ginipai Yesu narugu amaraika i mangihe?

⁶ Mbiko gupai nga bakere gberãngbi nika manga bambeda kumbatayo, si adu nipa ngarasaro furani ani sakipai tipa gupai Yugoti kapita 7 apehe berewe tipa mbedimbedi aKristano gbiati bakere rimbasa aboro du nga papara kura akandoro. Yesu nafu gu rugapai fu amaraika nga i naandu kindi kumbatayo kaa zada agu ayuge biama nga ga gbarasahe. Si aidanga i mbu agu ayuge re si ya auru kpotosende te, da kinaho i nika nogodahe ni ti mbedimbedi aKristano dunduko, nga gu nayugo pa gupai nga Yekova ima ida na yo. (Yugo. 7:1-4) Mbedimbedi awirina Kristo nika da ni abakindo na ni aboromotumo na ko ngbangbaturũ yo, na gure nika ngia gayo mosoro du niruruse. (Yugo. 20:6) Yekova, Yesu, gbiati amaraika nika du na bakere ngbarago ho i nika bi mbedimbedi aKristano ni du bangeyo nga 144,000 i nigbia gayo mosoro nga ga ngbangbaturũ.

7. A wa duhe rogo Yugoti 7:9, 10, ada du Yoane abiyo rogo yuguyugupai yo, na ginipai i amangaha? (Oni bi gu sura duti kpotoho.)

⁷ Ho Yoane afura ni tipa agu abakindo gbiati aboromotumo ni du bangeyo nga 144,000, ko abi bawenepai, ko abi “bakere rimbasa aboro” i nabati ti regbo Aramegido. Kparakparapai kina dagba agi abadona ue re, bambiko bakere rimbasa aboro ima du ni badunguyo kisusi agu aboro du bangeyo nga 144, 000, na ani ainongo nzunzu wai bangeyo nika du te. (Oni gedi Yugoti 7:9, 10.) I “ni ukadiukadi yo ni pusi remu,” gipai re nayugo gupai nga i ima banda tiyo ‘ka biriko adunga’ tiyo rogo ga Satana zegino ya na i ima nye ni ruruyo fu Mbori na fu Kristo. (Yak. 1:27) I nata ngbayo kuari mbiko i gbia batasahe mbiko gupai Yekova gbiati Yesu nga ga Mbori Wiri Kandoro namangihe. Na berewe a, i na akpe mbiro beyo, nga gu nayugo gupai nga i ima ida na Yesu nga ko Yekova nasia ko ni Bakindo.—Oni ringbisinga ha na Yoane 12:12, 13.

8. Ginipai Yugoti 7:11, 12 apehe furani tipa gu ga Yekova aborokporo du ngbangbaturũ yo?

⁸ Oni gedi Yugoti 7:11, 12. Ginipai namangi ho agu aboro du ngbangbaturũ yo abi bakere rimbasa aboro ni? Yoane abi gupai nga agu aboro du ngbangbaturũ yo dunduko adu na ngbarago na i ki tambua Mbori ho i abi bakere rimbasa aboro ni. Gu ga Yekova aborokporo du ngbangbaturũ yo nika du na bakere ngbarago ho i nika bi gi yuguyugupai ni re si nadigisi tihe ho bakere rimbasa aboro nika kura ni rogo bakere gberãngbi ni unga yo.

9. Ringbisihe kuti Yugoti 7:13-15, ginipai bakere rimbasa aboro amangaha awere?

⁹ Oni gedi Yugoti 7:13-15. Yoane ake gupai tipa bakere rimbasa aboro nga, “i azundu gayo aremu, ki vurusi he ni kure Wiri Kandoro.” Gipai re nayugo gupai nga i na gigiri sangbakpotoseyo na Yekova na ngbarago na yo. (Yes. 1:18) I nga agu aKristano naima kpara gayo raka fu Yekova ki ima zio bapatiza, i na nyanyaki idapase kuti ga Yesu motumo tumori na i na pagume dagbayo na Yekova. (Yo. 3:36; 1 Pet. 3:21) Si du nga ndu gupai du Mbori ti ni na ngbarago na yo na “i namanga pa ko uru na yuru” auru kpotosende ane. Awere, i du namanga bakere agu asunge kakaka nga ga tungusapai gbiati sa aboro ni abawiriki bambiko ga Mbori Kindo nga gupai nyakipaha fuyo.—Mt. 6:33; 24:14; 28:19, 20.

10. Ginipai bakere rimbasa aboro nika du na kido tipaha, na gini kidohe i nika bihe si nada ti rengo?

¹⁰ Gu bakere rimbasa aboro nika bata ti regbo bakere gberãngbi nika du na gu kido nga Mbori nikaa ndu kindi kumbatayo kaa ngerafuo yo, mbiko gupai nga, “gu ko nasunga auru mbatabakindo nikaraka kporo na yo.” Gu kidohe kura akandoro aima digo nipidihe nika da ti rengo nga gu naya: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te.”—Yugo. 21:3, 4.

11-12. (a) A wa i nayuguhe rogo Yugoti 7:16, 17, gini amaku bakere rimbasa aboro nika gbiaha kumbatayo? (b) Ginipai rengbe kura akandoro ka mangaha ti regbo Tingida Pakpio Yesu, na ginipai nasa yo i mangihe?

¹¹ Oni gedi Yugoti 7:16, 17. Wa du rago re, kura ga Yekova aboro na gomoro mbiko gupai nga, marã beyo rengbe arengba ka ngbe gu riahe i aidaha te, watadu mbiko sangbana agu akpakarapai naye mbiko zanga zereda na avura. I naba agu akurayo ku bambukiso yo mbiko pa gayo idapase. Ono tie, bakere rimbasa aboro na bakere ngbarago ka ino gupai nga, tifuo i bati ti regbo gberesa gi gbegberẽ zegino re, i nika du ti aregbo dunduko na riahe kpaima gbiati arugapai be Yekova. Ho Yekova nika gbarasa gi ga Satana gbegberẽ zegino re ni, ko nika mangapai tipa ka sa bakere rimbasa aboro i du ni bandabanda yo be gako zinga du wakina “faarago.” Tifuo nyasa bakere gberãngbi, Yesu nika ngbe kumbatayo fu agu aboro nika bata auru kpotosende re koyo du “aime [nyenye unga] ni,” nayugo gupai nga ko nika undo yo i gbia nyenye unga. Oni berẽnga kurii gipai re: Bakere rimbasa aboro na bawene maabangirise beyo. Dagba agu abirioni aboro ninaaraka, bakere rimbasa aboro ima rengba ka zanga kpi berewe!—Yo. 11:26.

¹² Gu kura akandoro na bawene maabangirise nga gu du yo na tambuahe tipaha fu aYekova na Yesu! Wa vura duhe vurũ nga Yekova aasianga yo tipa i ndu ka raka ngbangbaturũ yo te, ko ima kpinyemu yo kina wai ko nakpinyemu mbedimbedi aKristano. Mbedimbedi aKristano wa sa na bakere rimbasa aboro ima rengba kafu taarimo fu Mbori na fu Kristo. Gene sa i amanga gipai re ngbaha nga nidu yo pati Ga Gbia Riahe.

ONI TAMBUA MBORI NA KRISTO NA NGBADURONIYO DŨ TI REGBO TINGIDA PAKPIO YESU

13-14. Tipagine si aida aboro dunduko du ti ni pati Tingida Pakpio Kristo?

¹³ Vuru agu agarã susi bambeda kusayo, ka aboro du pati Tingida Pakpio Yesu nga 1,000, si rengbe kadu nga boro sa gbua rengbe na ri kpakuto na ki mbiri imekakue. Gure nayugo gupai nga dungu adungurati rogo zegino ninaadunga na boro rogoho nari kpakuto na kini mbiri imekakue ti regbo Tingida Pakpio Yesu ya. Bakere agu aboro naye kupati Tingida Pakpio Yesu nga agu aboro du na gu maabangirise nga ga raka auru kpotosende. Ono tipagine du tie i naandu ti ni tipa Ga Gbia Riahe? I naandu koyo tipa kina gu bangisa ndupai aboro naandu ti ni ku kporo gu pumbo rogatise yo nga ga bakurea yo. I naandu tipa gu pumbo re mbiko i naida ka yugo gayo nyemuse tipa agu aboro namanga rogatise re na ka yugo gupai nga i nasongoda yo asongoda. Wakina gure a, gu kura akandoro ninaandu tipa Tingida Pakpio Yesu bambiko i naida ka yugo gayo nyemuse tipa Kristo gbiati mbedimbedi aKristano na ka yugo gupai nga i nasongoda yo asongoda. Gu kura akandoro ninaandu a tipa Tingida Pakpio Yesu tipa ka yugo gupai nga i na tambuahe tipa ga Yesu motumo, nga gu motumo nasa gupai nga ani du na rengba ka raka nyeanye kindi auru kpotosende.

¹⁴ Gu kura nyanyakipa ndupai kura akandoro ninaandu ti ni tipa Tingidi Pakpio Yesu nga tipa ka giasangba ga Yesu zinahe. Ti gu bambata regbo Yesu ari Ga Gbia Riahe na gako ruru amokedi, ko ape gupai fuyo nga: ‘Oni mangi gere, nitingidi pa re.’ (1 Kor. 11:23-26) Sidu, wa du mbedimbedi aKristano kindi ni ungayo auru kpotosende, kura akandoro nikaa ndu kindi kumbatayo kaa du pati Ga Gbia Riahe daho mbedimbedi aKristano nika ga ni dũ. Na kura akandoro ninaayamba aboro dunduko tipa i ye kadu pati Tingida Pakpio Yesu na yo.

15. Ginipai rengbe ani ka mangaha tipa kafu taarimo fu Mbori gbiati Kristo ti regbo Tingida Pakpio Yesu?

¹⁵ Ti regbo Tingida Pakpio Yesu, ani na gu momu nga ga fu taarimo fu Mbori na fu Kristo ho ani abi bia ni na kini mangi kparakpee wa sa. Rii gu gumbapai i nika mangaha rogo gi garã re nga, “Oni Yugu Gaoni Tambuahe Tipa Gupai Mbori Gbiati Kristo Namangihe Furoni!” Si nika kiiso gaani tambuahe tipa aYekova na Yesu. Si du ho kpakuto gbiati imekakue nikaa ta ni, ani nika du na rengba ka berãkuriipa agu ahe kpakuto gbiati imekakue aru kubaha—du nga kpoto Yesu gbiati kureko. Ani nika tingidapa gu nyemuse Yekova ayuguhe furani ho ko ambu wiriko ni ko kpi tipa ani du na rengba ka gbia unga. (Mt. 20:28) Agu aboro dunduko nakpinyemu gu Barani du ngbangbaturũ yo gbiati Wiriko nika du na nyemu kadu pati gu Tingida Pakpio Yesu re.

MO FU TAMBUAHE FU YEKOVA TIPA GU MAABANGIRISE KO NAFUHE FORO

16. Gini apai du kina sa tipa mbedimbedi aKristano na kura akandoro?

¹⁶ Anga gu kparakparapai du dagba mbedimbedi aKristano na kura akandoro nga pa nyaka yo bangiri Mbori te. Agu abadona aboro ue re dunduko du na nyanyakipa yo bangiri ko. Ani naino gipai re bambiko ko afu kina bangisa motumo tipa ka ngbe mbedimbedi aKristano gbiati kura akandoro na ni, na gu motumo ko afuhe re nga unga Wiriko ko aima kpinyemuko gbe. Gu kparakparapai du dagba agi abadona aboro ue re nga gayo amaabangirise ni bakiakia. Ono i dunduko si aida i nye ni ruruyo fu Mbori gbiati Kristo. (Tam. 31:23) Na oni tingidi gupai nga, Yekova nafu gako ziazia toro fu ai boro ringbisihe kuti gupai gu boro re aidaha, zanga bipa singia ni nga mbedimbedi Kristano watadu ni nga boro sa dagba kura akandoro yo.

17. Gini apai yangara mbedimbedi aKristano angera kumbatayo tipaha?

¹⁷ I avunganga mbedimbedi aKristano na gu maabangirise nga ga ngbangbaturũ te. Mbori du nafu gu maabangirise re fuyo. I naberãpa gayo maabangirise aberã, kini mangi kparakpee tipaha, na i na nyemu ka gbia gayo mosoro ngbangbaturũ yo. I ainongo wai kpotoyo nika du ngbangbaturũ yo te. (Frp. 3:20, 21; 1 Yo. 3:2) Ono wa vura duhe wo, i nangera kumbatayo tipa ka gbia Yekova, Yesu, amaraika, gbiati yangara mbedimbedi aKristano, na i nangera kumbatayo kadu na yo rogo gu Kindo nga ga ngbangbaturũ.

18. Gini apai kura akandoro angera kumbatayo tipaha?

¹⁸ Gu kura akandoro nangera kumbatayo tipa raka nyeanye kindi auru kpotosende. Gere nga gu nyemupai du aboro dunduko na ni. (Batu. 3:11) I nangera kumbatayo tipa gu regbo i nika undo na sa kpotosende dunduko ni Paradizo. I nangera kumbatayo tipa gu regbo i nikaa dudua gayo abambu, kini rũ gayo ahe, na i dunduko na awiriyo kidu ni rengberengbe yo. (Yes. 65:21-23) I nangera kumbatayo tipa ka ta rogo badungu aba auru kpotosende, kini bi agangara, abire, gbiati abaime, na kini wirikipai tipa agu ahe dunduko Yekova amangihe. Gu nyakipaha anyaka kisusi nga, i na bakere ngbarago ka ino gupai nga gayo pabakure na Yekova nikaa kio kindi kumbatayo.

19. Gini bakere momu Tingida Pakpio Yesu ninaafuhe furani dunduko, na gini regbo Tingida Pakpio Yesu nika manga ti ni rogo gi garã re?

¹⁹ Yekova ima fu bawene maabangirise tipa kumbatayo fu gako amoyambu dunduko ni basasa. (Yere. 29:11) Tingida Pakpio Kristo nafu bakere momu furani dunduko tipa ani tambua Mbori gbiati Kristo tipa gupai i namangihe furani tipa ani du na rengba ka gbia nyenye unga. Tingida Pakpio Yesu nga gu nyanyakipa dunguratise kisusi ndikidi aKristano naamangaha na agarã dũ. I nika mangaha fuo ti uru Rago Nzengu, rogo Marungu 27, 2021. Rogo gi garã re, badungu aboro naraka rogo agu aba du yo na ranirii rogoho kadu pati gi nyanyakipa dunguratise re. Agu akurayo kinaho nika du pati ni si ki vura du vurũ nga i nagbiatiyo na sogote. Agu akurayo kinaho a nika manga Tingida Pakpio Yesu bambukiso yo. Ka kina ginipai vura du tipa roni vurũ, Yekova, Yesu, amaraika, gbiati gu mbedimbedi aKristano i naima zingisa yo ku ngbangbaturũ yo nikaa bi wai Tingida Pakpio Yesu nikaa manga, agu aboro dunduko du rogo adungurati, abadona watadu agu aboro du ni sayo gbianga bakere ngbarago agbia ti Tingida Pakpio Yesu!