Wari Rengbe Ani Ni ka Bi Gu Ndikidi Nyanyakipa Apai Nga ga Toro?

“KA SI du nga oni naida ka du rogo pambori mbiko kina gupai gbua nga si ni gu pambori nga ga atitaroni, tipagine ka oni asianga gu nga ga celtic ti ni ya, nga gu atitarani anamangaha mbata fu agarã 2000 bakuru kusayo?” wo gu kumba nga Rodolphe asanahe nisawia agu aboro nazio tiyo kuti agu apambori nangia ga atitayo. Gu berã re nasa gu gude nadegatuko koyo du ko ni ko mamu tingbako.

Rodolphe nayaa: “Gimi pagume dagbare na Mbori ninyanyakipa pai, . . . mi nasoga gupai nyanyakii nga, si naida i mangi re ngbaome mi idi kuti gu pambori nangia ga atitare, na gu nduhe gbua nga si angia gu pambori agu atitare naraki bakuru kusayo anamangaha.” Rodolphe awisigi apai wenengai mbata; ko amanganga pai tipa gi nyanyakipa pai re gbua wa guhe boro adikumboho adia te.

Wa vura duhe nga pa dia aboro gayo apambori be avunguyo ni gupai nandu ka nyasa anya rogo agi a’uru re, bakere bange aboro nye kindi kuti gu pambori du avunguyo rogoho. Ono ya mo ruhe aru fu boro ni nye kuti agu asino pambori nga ga avunguni? Ginipai Ziazia Kekeapai agumbaha tipa gipai re?

Yosua, nga guko nadiba Mose, fuo dia yo agarã 40 rogo ugu-ngbii-ngume, amoi apai ue barabangiri aYisaraere i sia gu sa, niya ko wee: “Ka si angba nga bangironi ka manga pa Yekova ya, oni sía gu ni areme oni ka amanga pa ni; watadu agu ambori abaroni anamanga pa ha mbiti gu Di yo re, na agu ambori nga ga aAmoro, nga agu aboro oni araka rogo gayo ringara; ono mi ni tire na gimi aborokporo, ani amánga kina pa Yekova.”—Yosua 24:15.

Boro sa dagba agu atitayo Yosua aafura tipa yo re angia Tera, nangia ba Abarayama, nga guko naraki rogo gu bakporo nangia Ura, nga gu bakporo nadu ti gu regbo re mbiti gu Di yo nga Ferata. Ziazia Kekeapai afuranga nibakerehe tipa Tera te, kpara kina gu rengo kusayo nga ko anairiso kura ambori. (Yosua 24:2) Tipa wiriko nangia Abarayama, wa ko avuranga ruga tiko wenengai na pa ga Yekova aringbisapai dunduko ya, ko aduna nyemu ka guari kusayo rogo gu bakporo kpuko adu rogoho ho Yekova azinahe ni fuko ko guari. Ii, Abarayama asia gu pambori nadu kia ti gu nangia ga bako. Mbiko pa manga ko ho wo, Abarayama agbia agu amaku Mbori akido ko tipaha, na ko ada nigu boro ini yo ko rogo dungu apambori ni ‘baa fu agu aboro dunduko naida pa Mbori.’—ARomo 4:11.

Ziazia Kekeapai nafura a wenengai kubara Ruta yo, nangia tita Yesu Kristo. Ruta, nangia dee ni boro Moaba adi kumba nangia Yisaraere, na ri ki da nidekurugbo. Fuo gure, regbo ki da furi tipa ri mangi siapai: ka sungo ringara kpuyo yo watadu ka ga na na-kumbaari ku ringara aYisaraere yo. Fuo Ruta ini kiopa gu irisombori aboro anamangaha fu Yekova ringbisihe kuti gu irisokpiaahe avunguri anamangaha, ri aya fu na-kumbaari wee: “Gamo aboro nikangia kina gimi aboro, ga Mbori ki ngia kina gi Mbori a.”—Ruta 1:16, 17.

Nifura gu buku nga Dictionnaire de la Bible tipa nyakapa gipai re rogo Ziazia Kekeapai, si ayaa wee, gi pangbanga re nayugopa “wai gu dee i abatika ri rogo kungbo ringara, i avunguri dagba agu apagano nangia akare kuti aYisaraere na aYisaraere anaidanga na yo a ya, . . . na mbiko gu nyemu ga Yekova aboro nadu tiri na nyemu gayo sino irisombori, ada ni tita gu iriiri Bakindo nangia Davide.” Ruta adunga dindikodindiko ka sia gu pambori nadu kia ti ga avunguri te, na mbiko gu gari diaberã re, ri agbia maku be Mbori.

Gu pangbanga nafura tipa tonatona gu pambori nga ga aKristano nafura ziazia tipa ndu gupai ga Yesu abawiriki ambu gu pambori ti ni nangia ga atitayo. Rogo wene beedi fugo zomiahe, gu mokedi nangia Petero azungodi agu aboro naadegatuyo koyo du ko ni i ‘bátasi tiyo ti iraira rikaaboro’ nisa yo gayo berã ti gayo aingapai na ki zi bapatiza ti rimo Yesu Kristo. (Amokedi 2:37-41) Wene kpiapai tipa gu boro namangi gipai re nga Saura, nga gu Yuda nanarungosi aKristano. Baraho ko aduni ngba nunguro ku Damaseke yo bangiri gene, ko abi Kristo rogo yuguyugupai, fuo gure Saura ki sa tiko ni Kristano na i ki tona ka ino ko nigu mokedi nangia Pauro.—Amokedi 9:1-9.

Gupai namangi fu Pauro re amanganga fu dungu bambata aKristano te. Wa si avura du wo, i dunduko si aidi i mbu gu gayo pambori nangia ga aYuda watadu iriso gu dungu ambori nangia ga apagano yo. Agu aboro nadi gu pambori nga ga aKristano kugume amangihe wo fuo ino yo apai tipaha wenengai gbe, dedede, fuo gbanga asakapai tipa gu sunge nangia ga Yesu ni Masiya. (Amokedi 8:26-40; 13:16-43; 17:22-34) I aima yugopai fu gu bambata aKristano re wenengai nga si aida i mangi a’ariapai rogo gayo raka. Aboro dunduko i agumba kina gu bangisa pangbanga re fuyo, nga aYuda kodihe na agu aboro naangianga aYuda ya. Tipa i rengbe ka fu ngbarago fu Mbori, si aidi i pefuo vovo sino irisombori, nga gu nangia ga aKristano.

Gu Ariapai Daada Tipa Rani

Nirengo, si aida wingbaduse rogo bambata sa kama agarã boro mbu gu pambori nangia ga avunguni nga gu i aima digo nimangihe, nangia ga aYuda pambori, iriso bazogo, iriso agu ambori nangia ga apagano yo, kini mo ka rimo gu pambori aYuda gbiati aRomo, tibarayo ue dũ anasogaha asoga. Fuö gi siapai i amangihe re aturanga te si ki ye na kere rungosi kuriyo be aboro. Areme, si naida boro duna wingbaduse wa kina gure ka ká ka “rimiso tini kurogo kere mangimangiapai na ki he nye kurogoho,” wo gu kumba nga Hippolyte Simon, nga bisopu nga ga Katoriko nga boro Clermont-Ferrand agumbaha rogo gako buku nga Vers une France païenne? (Pa Sa Aboro France Ni Apagano?) Si naida boro duna wingbaduse ka koda tini kuti gu pambori nga ga aDezire Yekova du aboro rogoho gbua zogoro, nga agu aboro i naabisira payo abisira ti kura aregbo.

Paul, nga paranga kumba Bastia yo, du Corsica yo, nigu boro i asonosi ko rogo gu pambori nga ga aKatoriko, na ko anarimiso tiko ti kura aregbo kurogo gu mangaapai nga ga kanisa, ngbatunga gu du wa babaga akpakuto tipa ka gbia marã ka undo gu riigbu nani nga ga Katoriko du tipa manga weneapai. Mbiko wa ko akpinyemu ka giarogo Ziazia Kekeapai wenengai, ko aidipa sakapai dedede tipaha na aDezire Yekova. Fuo bete regbo kusa, ko akparia gupai nga, gupai ko aawirikaha rengbe ka undo ko nyeanye kindi. Na ngbanya kuti gipai re, Paul aidipa agu arugute nga ga Ziazia Kekeapai na ki da ni guni sa dagba aDezire Yekova. Avunguko airisi gi gako siapai re, nga gu naagbarasanga gayo dawedawe pagume ya.

Amélie naraka France yo ku sudiyo. Nari, titari, gbiati tita nari nga aDezire Yekova. Tipagine ri asia gupai ti ni nga ka dia gu pambori nga ga avunguri? Ri naya wee: “Si aidanga oni sa tironi ni guni sa dagba aDezire Yekova gbua mbiko avunguroni watadu atitaroni angia aDezire Yekova watadu mbiko wo du yo awere te, . . . Mbiko rogo kura uru sa, oni nika ya ku kpotoroniyo wee, ‘Si nga gimi pambori mbiko mi idi kuti agi apai re.’ ” Wa kina gu dungu kura aDezire nga ga Yekova yo, Amélie ini gupai nga, gu gari aida du ri nani zanga kapa nasa gari raka si duna rogoyo ti ni na kingia guhe nafu ngbarago furi.

Ndu Gupai Si Aida ti ni Ani Di agu Asino Nga ga Mbori Kugume

Gu buku nga Asanza kapita 6, veresi 20, nangarasa agu aboro naida ka fu ngbarago fu Mbori niyaa: “Ako wire, mo ká kuti sangba bamo, ka mo mbú nga gu yugopai nga ga namo ya.” Anga gu rugute re nangarasa agude i gisangba avunguyo ku bitimo te, ono si nangarasa yo i di agu arugute kugume nga ga Mbori ngba avunguyo na ki kiisi gayo idapase ni ida yo nisayo ka iriso Mbori. Gu mokedi nangia Pauro azungodi akurako i “ásadi apai dunduko,” ka wisigo apai ka bihe singia agu apai i awirikihe si na ngbanya na Fugo Mbori na ringbisihe kuti gupai Ko akpinyemuhe.—1 ATesaroniko 5:21.

Singia i asonosi yo rogo agu akporo nangia ga aKristano watadu i asonosanga yo rogoho te, agu aDezire nga ga Yekova yo bangeyo nasusi amirioni sita, nga aparanga na sosono aboro, i dunduko namangi ngbatunga gu diaberã re. Mbiko wene wisigo Ziazia Kekeapai, i agbia akaragapai kuti gayo asanahe tipa gu ringbisapai du tipa raka nga agu akaragapai rengbe yo ka kido kuti ni, na i akurubara wene giarogopaiyo tipa gupai Mbori akpinyemuhe tipa ngbatunga aboro. Fuo i gbia gi inohe re, i aidipa agu arugute nga ga Mbori na kini mangi asadatise ka manga gupai Mbori akpinyemuhe.

Singia oni ningia gu boro ninaageda gi magazini re dedede watadu oni naagedanga ha dedede te, tipagine ka oni aidanga pa gu undo ti ni aDezire Yekova apepa fuhe fu roni tipa undo roni oni ngere kurogo Ziazia Kekeapai ka wisigo gu gaha nyanyakipa apai nga ga toro ya? Rogo gi gene re, oni arengba ka “ía Yekova ka bi ko ko du ni wene ko” na oni ki gbia gu inohe, ka oni mangi sangbaha, si ndu andu na oni sa nyenye unga.—Atambuahe 34:8; Yoane 17:3.

[Gu kpiahe du ti kpewaraga 3]

Degude na nari, na titari gbiati tita nari, i dunduko biama ni aDezire Yekova France yo

[Gu kpiahe du ti kpewaraga 5]

Ruta asia gupai nga ka iriso Yekova kuba iriso agu ambori nangia ga atitari