Ya Mo Yekova Naakparia agu Apai Oni Naamangaha?

WAI rengbe oni ka karagapai kuti gu sanahe re? Dungu aboro rengbe ka yaa: ‘Mi idi gupai nga Mbori akparia gu wene mangaapai akparia nangia ga agu akumba wa Mose, Gidiona na Davide, ono mi nakapa singia ko naida ka kparia agu apai dunduko rengbe mi ka mangaha. Bambiko anga mi nirengo wa Mose, Gidiona watadu Davide te.’

Si nirengo nga bete ruru akumba mbata kusayo ti gu regbo i aakeka Ziazia Kekeapai amangi baiiriwoapai nga ga idapase. I ‘adibe akindo, ki kisi ngba abahu, ki gasi ome we, na ki bati be rindi basape.’ (AEbere 11:33, 34) Ono tie, kura aboro ayugu gayo idapase ngba agu agene nadu taata, na Ziazia Kekeapai nanyakasa gupai fu rani nga Mbori aima kparia gayo mangaapai nga ga idapase a. Ka yugoho na kpiapai, oni wisiginga gu kpiaapai rogo Ziazia Kekeapai nga ga babanda avusende, ga nebi, na ga dekurugbo.

Babanda Avusende Afu Motumo

Ginipai oni atingidaha tipa Ebere, nangia gu ue gude Adamu na Eva avungu ko? Oni rengbe ka tingida gupai nga ko akpidipa gako wene mangaapai, nga gupai nika wira manga umba bange aboro amanga dagbarani. Ono Mbori aima kpariapa Ebere mbata fu gure tipa kurapai.

Rogo uru sa, Ebere asia bete agu anyaa nadu nibawenera kisusi dagba gako rimbasa anyaa ki fu motumo na ami fu Mbori. Gi gako gamunihe re, si rengbe ka du bangiri aboro ni tooni he areme, ono Yekova aima kpariaha na ki idi paha. Ono tie, anga si anye kina kuti gure te. Mbembedii wa agarã biama kutu kusayo, ga Yekova toro aduna gu mokedi nangia Pauro ko kepai tipa gipai re rogo gu waraga ko akehe fu AEbere. Tingbafuo dungu agarã, bangiri Mbori agonga ti gu tooni motumo re te!—AEbere 6:10; 11:4.

Wai Ebere adiberã tipa gu ngbatunga motumo narengbe ko ka fuhe? Ziazia Kekeapai agumbanga pai tipaha te, ono si wa ko aima berã nyanyakii tipa gipai re. Ko angia babanda avusende, sidu si adunga fuko nimbumbupai ko fu bete anyaa nimotumo te. Ono tie, oni kparia gupai nga, ko asia agu anyaa asia ko afu motumo na ami, nangia ‘nzenze wiri anyaa.’ (Bambata Pai 4:4) Si rengbe arengba ka du a nga ko aberẽ dudunguroo kurii agu afugo Yekova agumbaha fu woo ati Edene yo ki ya: “Mi amaa sogote dagba roni na de, dagba atitaro na atitari a, ko ki mburu riro, mo ki mburu gida ko.” (Bambata Pai 3:15; Yugoti 12:9) Ono tie, wa ko avuranga ino pai tipa gu “de” re na “atitari” ya, si nawira Ebere aima bi gupai ziazia nga pa mbura gida atita gu dee re arengbe ka koda gupai nga ka kusa kure. Ko aini gupai nirengo nga kurahe adunga ho paha akii kisusi rakiraki ungahe te. Gu nyakipaha nga, gu motumo ko afuhe adu nirengo nirengberengbehe.

Wa kina Ebere, aKristano areme nafu amotumo fu Mbori. I afunga ha na agu awiri avusende nazaka rukumbu te, ono si nga gu “motumo nga ga tambuahe, nga gu zuzu he nga ga ngbarani nakusa pa [rimo Mbori].” (AEbere 13:15) Ngbarani natakapande gaani ida gbaiga ho ani naafura ni fu kura aboro tipaha.

Ya mo oni naida ka mbakada pa gaoni fu motumo nga ga tambuahe? Ka si du wo tie, si naida oni berẽ wenengai tipa gu zingo nga ga agu aboro du rogo gaoni dagbarago. Gini apai i aberã paha? Gini apai ngbaa tiyo? Gini papara apai du rogo pangbanga nga ga Ziazia Kekeapai rengbe ka ngba tiyo? Ti agu aregbo nibasasa oni atungusapai rogoho, oni wisiginga pa agu aboro fura oni na yo, na gu bipai nga ka mbakada ngbanya gaoni sunge tungusapai. Na ho ani afura ni tipa Yekova, ani mangihe na idapase, na ngbaduraniyo dunduko. Oni mangi gaoni motumo ni ndikidi “zuzuhe nga ga ngbarani nakusa pa rimoko.” (Gu kekepai duni pigipigihe re, ani du pigihe.)

Nebi Atungusipai fu agu Aboro Naadianga Gako Pangbangaa Kugume Ya

Awere tie, oni wisiginga pa gu nebi nangia Enoka. Ko awiri du ngiringiri nisako nigu dezire nangia ga Yekova Mbori ko. Ya mo oni wa Enoka, nga gu bangisa boro dagba gaoni aborokporo yo namangasunge fu Yekova niruru ni? Ya mo oni nisaroni ni gudesukuru rogo gaoni riko watadu bangisa bamangisunge basunge yo nigu boro nandu kuti agu arugute nga ga Ziazia Kekeapai andunga ngburungburu ya? Ka si du wo, oni rengbe arengba ka gbia arungosi. Abakurea roni, agume roni, agu akuaroni du oni na yo sukuru yo, watadu agu aboro oni amangasunge na yo rengbe ka sosoda roni oni kuo ga Mbori arugute. I rengbe ka gumba gupai fu roni nga: “Boro ho sa nika ino gupai mangi oni he te. . . . Ani agumbanga ha te.” I rengbe ka dara roni nigumba yo gupai nga, si nipamungo oni baki bangironi tipa agu arugute nga ga wene mangaapai nga ga Ziazia Kekeapai bambiko Mbori aberãnga pa agu apai oni amangaha te. Nisogote gupai nga oni aberãnga na kini mangi apai wa yo te, i rengbe ka manga agu apai rengbe ome yo nani tipa ka zeresa roni rogo toroyo.

Rengo ngaha nga, si nitaatapai tipa boro ru nyanyakii rogo ngbatunga gu nyanyaki asada re te, ono anga gasigasipai ngaha te. Oni berẽnga tipa Enoka, nga gu kumba nangia saba boro nitita Adamu. (Yuda 14) Ti gu regbo i abatika ko aboro afu tiyo fu wasiro kini mangi birikobiriko apai. Gayo afugo adu nigbegberehe, gayo mangaapai adu ni agu apai “[naa]imisa boro.” (Yuda 15) I amangipai gbe ngba kina gu gene teketeke badungu aboro areme amanga apai ngbaha.

Wai Enoka ahi agi apai re? Karagapai sa gi sanahe re nibawenepai fu rani areme. Ono wa si avura wira gupai nga Enoka angia gu bangisa boro nanairiso Yekova rogo zegino, ko adunga nzunzu nisako te. Ko anata na Mbori.—Bambata Pai 5:22.

Pa fu ngbarago fu Mbori angia gu banguapai Enoka amoihe kurogo gako raka yo. Ko aini gupai nga ta na Mbori akodi kura apai susi gupai gbua nga boro niraki gigiri raka. Yekova aida gupai beko nga ko tungusipai. (Yuda 14, 15) Si aida ko fu zahe fu aboro nga Mbori ima ino pai tipa gayo gbegbere mangaapai nga ga zangasinombori. Enoka anata na Mbori kindi tipa agarã 300 kisusi gu bagizo regbo bakere gbe ani nahipai rogoho. Ko anata na Mbori kindi da kinaho ko akpi ni.—Bambata Pai 5:23, 24.

Wa kina Enoka, i ima fu sunge fu rani a nga ga tungusapai. (Matayo 24:14) Kurii gupai nga ga tungusapai nitanga ti akporo, ani na’asada ka ndu fuo agume rani, agu ababagiahe ini ani yo na agu akuarani du ani na yo rogo bangisa riko sukuru yo na gu wene pangbanga re. Ono tie, ti kura aregbo, ani rengbe ka du na ndundu ka tungusapai. Ya mo gipai re ninaamanga roni? Ka oni dunga na gu zanga maabangirise re ya. Oni wiriki gu kpiapai nangia ga agu aKristano nadu mbata, na oni ki kpari fu Mbori ko undo roni oni naatungusapai zanga gunde. (Amokedi 4:29) Na oni kakuti berã gupai kindi nga, wa oni kaa ta kindi na Mbori, oni nisaroni te.

Dekurugbo Ambakadi Riahe

Oni berẽnga gupai nga, dekurugbo i ayambanga rimori ya arogodi amosoro ue bambiko ri ambakadi tooni riahe fu geno. Ri adunga nga boro Yisaraere te, ono ri aduni gu boro nga tata boro naraki rogo bawe kama agarã Mbata fu Gaani Regbo rogo gu gbata nangia Sarefata. Mbembedii kuti digido gu gbanga regbo ugure namangi gbiati gberangbii, gu riahe nga ga gu dekurugbo re ambedi ka nyasa. Gu wiri ngungo nanye beri adu wa ka i ndukuhe na kina be sa na bete nzeme nga gu narengbe i mangi riahe nani kina bara sa tipa ri na wiiri.

Ti gu regbo re, geno aye. Gu geno re angia ga Mbori nebi nangia Eriya, na ko ki sanahe tipa bete gu tooni riahe nangia ga gu dekurugbo re. Si adu tooni tipa kina ri na wiiri na nirengo kurahe adunga ho tipa ka fuhe fu gu geno re te. Ono Eriya akido ri ki ya, kuti fugo Yekova, ka i ri gu riahe re na ko, ri na wiiri asungonga na gomoro te. Si aidi ri duna idapase tipa ka ida gupai nga, gu Mbori nga ga aYisaraere ko arengbe ka kparia gari inapai, bambiko ri angia dekurugbo ni boro kura ringara. Ono ri aidi kuti Eriya na Yekova ki fu mosoro furi. “Were gu ngungo nadu pere yo si anyasa nga te na gu nzeme naadu kambu yo apaya nga te, a wa Yekova agumba ha ku ngba Eriya.” Gu dee re na wiiri aduna riahe beyo ti aregbo dũ daho gu gberangbii re adigi ni.—1 Abakindo 17:8-16.

Ono tie, gu kura maku adu kinaho naapido gu dekurugbo re. Fuo regbo ngbutuko fuo manga gi iiriwoapai re, kaza azi wiri gu dee re nga guko ri akpinyemu ko gbe ko ki kpi. Eriya aduna nunga koyo du gu gude ni re ko ki sana Yekova rogo kpee yo tipa ko zingisi gu gude re bekpio. (1 Abakindo 17:17-24) Gupai re aida baiiriwopai. Kekepai ho nayuga gupai nga, i azingisi boro bekpio mbata te! Ya mo ka Yekova amangi inapai berewe fu gi dekurugbo nga boro kura ringara re? Ko amangihe wo nirengo. Yekova afu gako ome fu Eriya ko zingisi gu kumbagude re bekpio. Kusa, Yesu agumbapai wa gere tipa gi iriiripa dee re: ‘Wa dungu adekurugbo avura du Yisaraere yo, i akedanga Eriya fuo yo te, ono i akedi ko kina ku Sarefata yo, nadu ringara Sidona yo, koyo dekurugbo aduni.’—Ruka 4:25, 26.

Areme, gupai du tipa zingo marã nandu kina kumbatayo, zavura rogo agu aringara i ambakada ahe rogoho vurũ. Gu kura kikindigi abasunge ima mbu aborosunge ti sunge nga aguyo naima digo nimangisunge tipa dungu agarã niruru yo. Mbiko gu kpakarakpakarapai nga ga zanga sunge, Kristano rengbe ka duni asadiasadi ni ka dia bakere regbo gbe ku basunge yo na gu kido bangiri ni nga gani abairasunge nika banda ni kuti ngba sunge mbiko gi sino ni re. Pa manga ni pai wa ngbatunga gure nika sa ni ni duna kina wiri tooni regbo tipa ndu tipa agu adunguratise nga ga aKristano, tipa ka kura ku gene tungusapai yo watadu tipa ka ngera fuo gani aborokporo ti kpotoyo na rogo toroyo. Ono tie, ni na gu berã kpotoniyo nga ni du wa ka ni banda gu sunge re ka sangbanaha vura du wai vurũ.

Padu Kristano rogo kpakarakpakarapai nga ga zingo marã wa ngbatunga gere nasa ni ni duna ndupai beni ka duna bakabangirise. Si nikpakarakpakarapai ka gbia sunge rogo agi a’uru re. Dungu rani gbe aidanga ka duni airakumuko te, ono wa kina gu dekurugbo nga ga Sarefata ri re, ani naida riahe na ki duna agu ahe rengbe ka undo rani rogo gaani raka. Ono tie, gu mokedi nangia Pauro atingidi rani na gupai Mbori agumbaha ki ya: “Mi ahe nga unda ro wa sa te, mi ambú nga ro a wa sa te.” Ani rengbe ka gumbapai na kido wa gere: “Gbia nga gimi mounda; mi agúnde nga wa sa te; gini pai boro ka manga re na ni?” (AEbere 13:5, 6) Pauro amoi gako ida tipa raka nigu kidohe Mbori akidoho re, na dedede Yekova anangera fuo ko kindi. Mbori amanga kina gu bangisapai re tipa rani ka ani ambunga ko ya.

Ani rengbe ka duna gu berã kpotoraniyo nga ani arengbanga ka mangapai nibawenehe wa agu aboro nadu nyanyakii rogo toroyo nangia Mose, Gidiona, na Davide te, ono ani rengbe ka wirika gayo kpiapai nga ga idapase. Na ani rengbe ka tingidapa gu taata mangapai nga ga idapase nangia gu Ebere, Enoka na gu, gu dekurugbo nadu Sarefata yo ayuguhe. Yekova na ngbarago na gu mangaapai dunduko nga ga idapase, zavura gu du nikina rukutuhe vurũ. Ho gu gudesukuru nga guni nagunde ti Mbori aká ka dia kere angua ni be kurani, nga gu kere angua paranga aboro nadiaha kutii kpotoyo yo, ho Kristano niká wasiwasi mangaapai ni basunge yo, watadu ho gbinza Dezire du niruru ni fu Yekova naandu ni ku ba dunguratise yo zavura gu mbugo namanga ni na gu kpotoni naima ima ti aregbo dũ vurũ, Yekova naabihe abi. Na ko nidu na ngbarago.—Asanza 27:11.

Ya Mo Oni Naabi agu Apai Kura Aboro Naamangaha?

Ii, Yekova naakparia agu apai akparia ani naamangaha. Sidu, wa agu aboro nawirika Mbori, si naida ani du ngangaraa ka inopa gu asadatise kura aboro amangaha. (AEfeso 5:1) Tipagine ka oni adianga regbo ti ni ka makia wai akuarani aKristano agbia kpakarakpakarapai tipa ka du pati adunguratise nga ga dungurati, ka ndu tipa tungusapai zavura gu nga ka manga gayo kura asunge ya?

Ono, si naida gupai nga, agu aboro oni nairiso Yekova na yo ini gupai nga oni natambua yo atambua na gu gayo asadatise i amangaha. I aduna ngbarago ka ino gupai nga oni nakparia gupai akparia i naamangaha, na berã payo wa gere rengbe ka tingida yo a nga Yekova nakparia gayo mangaapai akparia a.