Ngangarã Kumba

WA ABORO atona kaa nge auru kpotosende, badunguyo atona kaa manga agu apai naadu ni gbegberẽhe wakina Kaina. Ono kumba adu ho sa naadu kia. Gu kumba re du re, rimoko angia Enoka. Enoka angia ngangarã kumba. Agu aboro naadu pati ko aamanga agu apai naadu ni gbegberẽhe, ono tipa ko tigako, ko aamanga kina gupai Mbori akpinyemuhe kindi.

Mo ini gupai agu aboro re aamanga gbegberẽ apai ti ni? Mo berẽnga pa gu boro nasa ­aAdamu na Eva i basasangba Mbori ki ri gu zuzu ngua Mbori aya fuyo ka i ringa ha ya. Gbegberẽ maraika du naadu. Ziazia Kekeapai nayambako nga Satana. Na ko naˈasada ka sa aboro dunduko i du ni gbegberẽ yo.

Rogo kura uru sa, Yekova Mbori aya fu Enoka ko gumba gu pangbanga fu aboro i ­aadunga na nyemu giaha ya. Gu pangbanga re angia: ‘Rogo kura uru sa, Mbori nika imo gbegberẽ aboro dunduko kusayo.’ Si nawira gupai nga aboro aima zinga ni kerehe fuo giayo gupai re. Si wa ka i ya i aima ida ka imo Enoka a. Sidu, si aidi Enoka du ngangarã tipa ka pe gupai fu ­aboro ­Mbori nika mangaha.

Mbori aambunga Enoka ko raki tipa gbanga regbo dagba gu gbegberẽ aboro re te. Enoka araki tipa agarã 365 gbua. Tipagine ya ani ti ni wẽ “agarã 365 gbua”? Bambiko agu aboro naadu tigu regbo re adu ni nyanyaki yo susi agu aboro du awere. Aguyo araki tipa agarã wa 800 watadu 900. Na tipa wiri Enoka nangia Metusera, ko araki tipa agarã 969.

Tingbafuo kpio Enoka, aboro aagberã kina ku mbatayo. Ziazia ­Kekeapai nape gupai nga ‘agu apai i aaberãha adu ni kina gbigbitaha ti aregbo dũ,’ na ‘zegino ahi be zuu.’

Ya mo mo iningo gupai gbegberẽ apai aamanga ti ni gbe rogo zegino ti gu regbo re? Si aduwo bambiko Satana adu na vovo birĩ beko tipa kaa sa aboro i nimangi gupai du ni gbegberẽhe. Ani nika wirikapai tipaha rogo ­gupangbanga ­ngbefuo gere.