Oni Degeturoni Kuti Gupai Toro Naagumbaha!
‘Gu boro duna tu giapai tini, ni gi gupai toro naagumbaha fu adungurati.’—YUGOTI 3:22.
1, 2. Gini rugute i afuguhe tipa agu apai Yesu agumbaha fu agu adungurati nadu saba gumba yo paha rogo Yugoti?
GA YEKOVA amoyambu du wa ka i degetuyo kuti gupai ziazia toro amoihe ku ngba Yesu Kristo ko gumbaha fu agu adungurati nadu saba du paha rogo gu buku nga ga Ziazia Kekeapai nga Yugoti. Nirengo, agi apangbanga saba re nibasasa na gi rugute re rogoho: ‘Gu boro duna tu giapai tini, ni gi gupai toro naagumbaha fu adungurati.’—Yugoti 2:7, 11, 17, 29, 3:6, 13, 22.
2 Ani ima wisigo gu ga Yesu afugo ko agumbaha fu amaraika, watadu fu agu ababiapai nangia ga agu adungurati nadu Efesa yo, Semuruna yo, na Perugamona yo. Waigu rengbe ani ka gbia undo be agu afugo ziazia toro amoihe ku ngbako ko gumbaha fu agu adungurati nadu biama re?
Fu gu Maraika Du Tuatira Yo
3. Wari Tuatira adu ni, na gini ahe i anamangaha yo rimoho awo mbikoho?
3 “Wiri Mbori” atambua agu aboro nadu rogo gu dungurati nangia ga Tuatira na ki bira yo a. (Oni gedi Yugoti 2:18-29.) I adua gu bagbata nangia Tuatira (du awere nga Akhisar) pangba be gu Di nga Gediz (i anayambaha mbata nga Herimasi) du pavuru Asia Minor ku dioyo. Aboro aini gu bagbata re tipa gaha badungu sekeseke ahe na tukutuku ahe. Agu aboro nanambakada arangi, anamangaha rogo tarã angua tipa ka zamasa agu arokoo nani nangba ti aboro watadu ka bisoho si du ngungungu. Rudia, nga gu dee nasa tiri ni Kristano ti gu regbo Pauro adu Firipoi yo ringara aGiriki yo, angia ‘nabagi ngungungu remu Tuatira yo.’—Amokedi 16:12-15.
4. Gine i atambua gu dungurati nadu Tuatira yo tipaha?
4 Yesu atambua gu dungurati nadu Tuatira yo tipa gaha wene mangaapai, gaha nyemuse, gaha idapase, gaha hipai, na gaha sunge tungusapai. Nirengo, ‘gu gayo mangaapai i aamangaha kusa, angba susi gu nadu mbata.’ Ono tie, ka ani vura duna wene rimorani mbiko gupai ani amangi mbata, si aidanga ani mbu manga gaani ruruapai te.
5-7. (a) Da nangia ‘gu dee nangia Izebere,’ na ginipai si aida i mangihe na gari ome gbaragapai dagba aboro? (b) Gine ga Kristo arugute fu gu dungurati nadu Tuatira yo aundo agu adee nga avuru Mbori i mangihe?
5 Gu dungurati nadu Tuatira yo aambugene fu gu mangaapai nangia ga irisokpiaahe, zire yugopai, na gu nangia ga wasiwasi kodaba. “Gu de nga Izebere” adu dagba aboro gu dungurati re, isoke si avura du nga badona adee adu yo nga aguyo nadu na asino yo wa kina ga gu gbegbere sino Nakindo nangia Izebere nadu rogo gu Kindo nangia ga aYisaraere na angbatunga rogoho bawe. Gu kura wene abawirikipai naya wee gu ‘denebi’ nangia ga Tuatira ri re a’asadi ka zomia aKristano i irisi agu ambori watadu ambori-adee nangia aboro rogo gu riigbu nangia ga bagaahe, na ka zomia aKristano a i rimiso tiyo kurogo agu apumbo nga ga agu ariahe i anatumo nani fu kpiaahe. Ka ani mbunga gu dee moi tiri nisari ni nebi ri ingisi aboro rogo gu dungurati nga ga aKristano du areme ya!
6 Kristo aima mbeda ‘ka bá gu dee nangia Izebere re ku auru gu barame nga ga kaza, na ka bafa aguyo naamanga bäri na ri kurogo bakere gberangbii, kinagu ka i asa gayo berã ti gari mangaapai.’ Si aidanga ababiapai mbugene fu ngbatunga gu gbegbere yugopai gbiati gu gbaragapai dagba aboro re i naamangaha te, na si aidanga Kristano mangi gu iraira mangaapai nga ga zire pambori watadu ka manga meteka watadu ka irisokpiaahe tipa ni ruho ka ino gupai nga “gu dudungura pai nga ga Satana,” si naabaha dunduko nigbegberehe te. Ka ani irisi ga Yesu arugute, ‘ani aka aka kuti guhe du berani,’ sidu, ka ingapai abinga baha dagbarani ya. Mbiko wa mbedimbedi aKristano aka gu mangaapai adunga na sinombori rogoho ya, wa kere nyemu apai, na maangbaduse, i ‘nika asia pa rikaaboro fuyo’ fuo zingisa Mbori yo bekpio na i ki kodi tiyo kuti Kristo ka kuadi gu rikaaboro re ngbudongbudo. Agu adungurati du awere na agu akerekuru rogoho narukuba kurapai, na i nika fu “gu taataa kerekuru nga ga wiso ru” nga Yesu Kristo, fu mbedimbedi aKristano fuo i nazingisi yo bekpio.—Yugoti 22:16.
7 I afu arugute fu gu dungurati nadu Tuatira yo ya ka si mbunga gene fu gu gbegbere gbaragapai dagba aboro agu adee nangia abasamungu aamangaha ya. Gu ga Kristo arugute ziazia toro amoihe ku ngbako ko gumbaha fu agu adungurati re naundo agu adee nga avuru Mbori i sungu kina rogo gu ba Mbori nafuhe fuyo areme. I a’asadanga tiyo ka duna pagbia kurii awirina na ka zomia yo kurogo manga gu iraira mangaapai nga ga pambori watadu ka zomia yo i mangi meteka te. (1 Timoteo 2:12) Kuba gure, ngbatunga agu adee re namaa kpiapai rogo wene mangaapai na rogo wene mangasunge tipa si fu taarimo fu Mbori. (Atambuahe 68:11; 1 Petero 3:1-6) Ka agu aboro du rogo adungurati banda agu ahe du beyo, nga ziazia yugopai na wene sino mangaapai na kini bi gu sunge nga ga Kindo na kikiipaha, Kristo aye tie na iiriwo amosoro fuyo, angianga kpio ya.
Fu gu Maraika Du Sarudi Yo
8. (a) Wari Sarudi aduni, na gini futufutuapai rengbe oni ka gumbaha tipaha? (b) Tipagine gu dungurati nadu Sarudi yo aida undo ti ni?
8 Si aida i undo gu dungurati nadu Sarudi yo niipo mbiko si aima kpi rogo toroyo. (Oni gedi Yugoti 3:1-6.) Sarudi angia kumukokumuko bagbata, baturoho adu nga akirometere 50 ku sudiyo ti Tuatira. Sunge bagaahe, na pa idaahe rogo gu rago re, na sunge mbakada arokoo rogo mange-anyaa gbiati mbakada agu aira i abaha vurubambu sande, asa gu bagbata re si duna kumuko. Bange agu aboro nanaraka rogoho ada ti kura regbo nga, 50,000. Kuti sangba gu bakeke kuru apangbanga nga Yozefasi, Sarudi aduna bakere bange aYuda rogoho rogo bambata sa kama agarã Mbata fu Gaani Regbo. Bambutiria gbiati gu yekaru nangia ga gu mbori-dee nangia ga aEfeso ri rimori angia Diana, ni agu arago areme du nikuodikuodihe nadu mbata rogo gu bagbata re.
9. Ginipai si aida ani mangihe ka si du nga gu gaani asunge tungusapai ani amangaha fu Mbori si gbua ngbarangbara?
9 Kristo aya fu gu maraika nga ga gu dungurati nadu Sarudi yo wee: “Mi ini ga mangaapai, wa ya yo ti ro mo ni ungaro, ono mo aima kpi.” Ginipai ka si idi ani mangihe ka rimo rani aawo ya ani ngangaraa rogo toroyo ono si ki du nzunzu nga ani gbe zezeree nibipa agu asunge nga ga aKristano, kini mangisunge tungusapai gbua kpasiaka, na ki ima mbeda “ka kpi” rogo toroyo? Fuo duhe were, ani ‘tingidipa gu pangbanga nga ga Kindo ani agi na ki dihe kugume’ na ki nyakasi tirani berewe sa ziazia sunge. Nirengo, si naida ani tona kaa du pati agu adunguratise nga ga aKristano kini mangihe wo na ngbaduraniyo dunduko. (AEbere 10:24, 25) Kristo afu rugute fu gu dungurati nadu Sarudi yo ki ya: “Ka mo asó nga gima ha tie ya, mi ayé wa iradĩ, ka mo aína nga gu rago mi ka da yo du mo ni ya.” Ginipai tipa gi gaani a’uru re? Ngbutuko kumbatayo, ani nika karagapai akaraga tipa gaani mangaapai.
10. Ginipai rengbe ka du tipa bete aKristano ka i vura du vurũ rogo apai wa gu nadu Sarudi yo?
10 Ka apai vura du rogo dungurati wa gu nadu Sarudi yo, si rengbe ka du nga bete aboro kinaho nga ‘aguyo agbarasanga gayo aremu ya; i nika ta na Kristo na pusi remu tiyo, mbiko i rẽ na ko.’ I nga agu aboro nanye ti aregbo dunduko kuti manga gupai nayugo yo ni aKristano, na ki nye zanga biriko, na ki zanga gbegbere mangapai na ki zanga gu biriko nga ga pambori be gi zegino re. (Yakoba 1:27) Sidu, Yesu ‘agbándakanga rimoyo kusayo rogo kitabu unga yo wa sa te, ono ko akúsa rimoyo kubarangba Bako na kubarangba ga bako amaraika.’ Fuo i takipande mbedimbedi aKristano, nga gu riko du nidia Kristo, ya si ima rẽ tipa kaa ta na Kristo, i avodaha na gu gigiri arokoo nakika akika nga agu arokoo narukuba gu ruru mangaapai ga Mbori ziazia aboro amangaha. (Yugoti 19:8) Pa berã yo pa gu iiriwo mamu asunge napido yo ngbangbaturũ yo nafõngbaduyo yo i dibe gi zegino re. Amaku gu du kinaho a tipa agu aboro rẽ ka raka nyeanye kindi auru kpotosende. Arimo yo a nikekehe rogo gu buku nga ga unga.
11. Ginipai ka ani mangi ka si du nga ani nayukuro ayukuro rogo toroyo?
11 Anga boro ho dagbarani naida ka du rogo gu gbegberepai nga ga toro gu dungurati nadu Sarudi yo adu rogoho te. Ono ginipai si aida ani mangihe ka ani bi gupai nga ani nayukuro ayukuro rogo toroyo? Kangia pai tona rani wa ngbatunga gure, si idi gupai nga, ani mangipai tipaha niipo tipa si undo rani. Ani ya ani narimiso tirani kurogo gu mangaapai adunga na sinombori ya watadu ani na ndundu ka du pati adungurati watadu ani nanyomoro anyomoro rogo gaani sunge tungusapai. Ka gupai re mangi, si idi gupai nga, ani gbata undo be Yekova rogo kparakpee. (AFiripoio 4:6, 7, 13) Pa geda ani Ziazia Kekeapai na a’uru dunduko na kini wisigihe gbiati wisigo agu abuku nga ga ‘ruru kangara buruku,’ nafu bee ani ta sungo kini ngere angera rogo toroyo. (Ruka 12:42-44) Fuo duhe were, ani adu wa gu bete aboro nadu Sarudi yo nga aguyo Kristo aidi na gayo pai, na padu ani wo asa rani ani ngarasi akuarani aidipase.
Fu gu Maraika Du Firaderufia Yo
12. Wai rengbe oni ka ringbisapa gu sino pambori nangia ga agu aboro nadu Firaderufia yo bakuru kusayo?
12 Yesu atambua gu dungurati nangia ga Firaderufia. (Oni gedi Yugoti 3:7-13.) Firaderufia (du awere nga Alasehir) angia kumukokumuko bagbata nibamanga imekakue Asia Minor yo pavuruhe ku dioyo. Nirengo, gu mbori pako akii gbe rogo gu bagbata re angia Dinizio, nangia mbori imekakue. Wa gopai ayugoho, agu aYuda nadu Firaderufia yo a’asadi tiyo vurũ ka zomia agu aKristano nangia aYuda i banda bete kura gu mangaapai nadu rogo ga Mose Ndiko watadu i karaga tiyo sani.
13. Waigu Kristo namangisunge na gu ‘wiri rifungura nga ga Davide’?
13 Nifu yo gu ‘wiri rifungura nga ga Davide’ fu Kristo, gure nga i a’asia pa agu asunge fuko dunduko nga ga Kindo kodihe kuti ngerakurii gu sunge du rogo gu kporo nga ga idapase. (Yesaya 22:22; Ruka 1:32) Yesu amangisunge na gu wiri rifungura re ka zaka ngbadimo agu amamu nga ga Kindo na ka fuka asunge fu agu aKristano nadu Firaderufia yo na rogo kura aba. Natona rogo gu garã nangia 1919 ko aima zaka “bakere ngbadimo” fu ‘ruru kangara buruku’ nga gu ngbadimo nazaka sa sunge tungusapa Kindo na kingia gu ngbadimo ka irasogote arengbanga ka kisoho ya. (1 AKorindo 16:9; AKorosaio 4:2-4) Rengo ngaha nga, i aima kiso gu ngbadimo nazaka kuti agu amamu nga ga Kindo be aboro “gu bambutiria nga ga Satana,” mbiko i nga agu aYisaraere nga ga toro yo te.
14. (a) Gini kidohe Yesu afuhe fu gu dungurati nadu Firaderufia yo? (b) Wai rengbe ani ka banda tirani ki he tigo ti gu ‘regbo nga ga asada’?
14 Yesu akido agu aKristano nadu Firaderufia yo ki ya: “Bambiko wa mo aka kuti gu pai nga ga gi hipai, mi abánda ro be gu rago asada, nga gu nikaye ku auru kpotosende dunduko.” Sunge tungusapai naida ngbatunga gu hipai Yesu ayuguhe. Ko azeranga fu akare te ono ko anye kindi kuti manga gupai Bako akpinyemuhe. Si du i azingisi ko ti ni ki fu gu unga fuko ka kpinga ya tipa ko raki ngbangbaturũ yo. Ka ani zi tirani kuti gu gaani diaberã nga ga iriso Yekova na kini songodi gako Kindo nitungusa ani wene pangbanga, ko abanda rani abanda tipa ka ani atinga ya ti gi ‘regbo nga ga asada’ naye re. Nimanga ani asadatise nyanyakii ka kiiso agu asunge nga ga Kindo, si ka sa rani ani ‘nye kuti guhe du berani’ nga gu Kristo afuhe fu rani. Pa manga ani gi sunge re asa gupai nga mbedimbedi aKristano di kikiipa akpakpari bakindo nga ga ngbangbaturũ, na nyenye unga auru kpotosende tipa agu abadiangbayo du niruru yo.
15. Gine i aidaha be agu aboro nikangia ‘adangba rogo ga Mbori yekaru’?
15 Kristo agumba kurapai berewe niyaa: “Gu ni ka di be pai, mi asá ni ni dangba . . . gu yekaru nga ga gi Mbori, . . . Mi aké rimo gi Mbori ti ni, na rimo gu bakporo nga ga gi Mbori, nga vovo Yerusarema, nga gu nazorã ngbangbaturũ yo [yo] du gi Mbori ni, na vovo rimore a.” Si naida agu ababiapai du nimbedimbediyo songodi ndikidi irisombori. Si naida i nye ku ngba gu gene nga ga agu aboro nika du rogo “vovo Yerusarema” nitungusa yo pa ga Mbori Kindo na ki nye gigirii rogo toroyo. Gipai re nidingisoro fuyo ka i aida ka duni adangba rogo gu taasitaasipa yekaru nga ga ngbangbaturũ na ka i aida ka duna rimo ga Mbori bakporo riyo ni aboro ngbangbaturũ na ka du ti rimo na Kristo nidiako. Na rengo ngaha, si naida a i duna atue ka ‘gia gupai toro naagumbaha fu adungurati.’
Fu gu Maraika Du Raodikiya Yo
16. Gini bete arengo nga gu du tipa gu bagbata nangia Raodikiya?
16 Kristo abira agu aboro nadu rogo gu dungurati nadu Raodikiya yo nga agu aboro naabi apai gbua taata. (Oni gedi Yugoti 3:14-22.) Raodikiya angia kumukokumuko bagbata i anambakada ahe rogoho na kingia gu ba aboro anagbia marã rogoho. Gu bagbata re adu ngboso gu kikindigi agene aboro anatinda bagibagi ahe ngbaha na bara ku uroyo ti Efesa wa akirometere 150, rogo ngboongbo mbudu sende nga ga gu Di nga Rukusi. Aboro aima ino pai tipa agu arokoo i anambakadaha rogo bibiri mange-anyaa rogo gu rago re. Na wa Raodikiya adu nga gu bagbata nadu na sukuru rogoho tipa wirikapa husa akaza, si nawiraha nga, yo du i anambakada gu ngua-kaza-bangirise ni i ainihe ti gu rimoho nga ngungo-Perigia. Gu mbori i ayambaha nga Asekerapio, angia gu mbori nangia ga ziga, na kingia gu bangbasia mbori i anairisoho rogo gu bagbata re. Si nawira, Raodikiya aduna bakere bange aYuda rogoho, duhe ziazia nga, beteyo angia airakumuko.
17. Tipagine i abira agu aKristano nadu Raodikiya yo ti ni?
17 Nifura Yesu fu gu dungurati nadu Raodikiya yo rogo gaha “maraika,” ko afura nigu boro duna pagbia beni ni “ndikidi dezire ni irarengo, nga enge[enge] gu mangimangi ahe nga ga Mbori.” (AKorosaio 1:13-16) Ko abira agu aKristano nadu Raodikiya yo tipa zanga du yo ‘zezeree watadu fofooi’ nibipa agu apai nga ga toro. Mbiko wa i adu uruuru, Kristo aida ka suka yo kusayo ngbako yo. Si adunga nikpakarakpakarapai fuyo i girogo gupai ko aida ka gumbaha fuyo te. Mbiko gu bagbata nadu pati yo nangia Yerapori aduku na agu agugaabi rogoho naduku nifofõihe, ono Korosai tigaha aduna zezere ime. Ono tie, wa si adu nga, si aniidi i gbe ime rogo akanoo rogo tuturu ba ka ye nani ku Raodikiya yo, si nawiraha nga, ho gu ime re anida ni rogo gu bagbata re, si anidu adu uruuru. Gene wa i anagbe gu ime re, si anaora vuru akanoo yo. Fuo si mbedi na Raodikiya, si anaora rogo yaro mbia i agehe tii sende yo ki didiko vuruhe yo.
18, 19. Ka agu aKristano du areme bi gupai nga, asino yo wa ga aguyo nadu Raodikiya yo, wai rengbe yo ka gbia undo?
18 Agu aboro du areme, duna asino tiyo wa ga agu aKristano nadu Raodikiya yo, anga i nifofõi yo wa gu nzinziri fofõi ime aboro naambiraha te, na dunga yo nizezere yo wa gu zezere ime nazeresa gomoro ime a te. Mbiko wa du yo wa kina uruuru ime, Yesu nika suka yo asuka ngbakoyo! Yesu aidanga i du nigu mbedimbedi “amokedi . . .[ nafura] ku ba Kristo” te. (2 AKorindo 5:20) Kinagu ka i sa gayo berã, wo tee, pa gu mamu du beyo ni atakipande Kindo nika gbera. Agu aKristano nadu Raodikiya yo aaorafuo kumuko, sidu, ‘ka i ainonga gupai nga, rungorungo aboro nangia yo, kingia airavurari, na nikundiri aboro, na nazanga ahe ya.’ Tipa agu aboro dunduko du areme wa yo rengbe ka kura kusayo rogo gu gayo rungo nga ga toro, na ki hu be gu vurari nga ga toro, na ki gbia rokoo tipa ka dada gu kundiriyo nga ga toro nani, si naida i ngbeke agi ahe gumba yo paha re be Kristo, nga ‘girisigirisi dahabu’ nga gu fugo sanza narukuba gu idapase asadi yo ho, na ki ngbe ‘pusi rokoo’ nga gu narukuba rurupai, gbiati ‘gu nzeme du tipa mbeda bangirise nani’ nga gu nika giriso gu bangiriyo nga ga toro. Agu aKristano nga ababiapai aduna ngbarago ka undo yo tipa i inipa gu gayo zingo nga ga toro tipa wa ka i “du ni kumukokumuko yo rogo idapase yo.” (Yakoba 2:5; Matayo 5:3) Kurii gure, si naida ababiapai undoyo tipa i mbedi bangiriyo na ‘gu nzeme du tipa mbeda bangirise nani,’ nga ka dia ga Yesu yugopai, arugute, kpiapai, na gako sino berã kugume na kini mangihe. Pa manga boro gipai re nika husa ni be “gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga.”—1 Yoane 2:15-17.
19 Agu aboro dunduko Yesu akpinyemu yo, ko nabira yo tipa apai na kini rugu yo. Si naida agu ababiapai dunduko du tiibeko naamangapai na nunga wa kina gure. (Amokedi 20:28, 29) Si aidi agu aKristano nadu Raodikiya yo ‘du ngangaraa ki sa gayo berã,’ kini aria gu gene i aaberã rogoho na gu gene i aaraka rogoho. Wa duhe tie were, ya mo gu kura sino raka azi baha ti bete rani, nga gu nasa rani ani umbasi gu gaani sunge ani amangaha fu Mbori kini bihe niwiri tooni pai gbua rogo gaani raka? Sidu, kangia pai wo tipa rani, ani ‘ngbe gu nzeme be Yesu du tipa mbeda bangirise nani’ tipa wa ka ani rengbe ka ngera wenengai ka bi nyakapa gbata Kindo mbata.—Matayo 6:33.
20, 21. Ada nakaragapai areme ngba ruru gene kuti ga Yesu ‘ngoka ngbadimo,’ na gini maabangirise du yo nani?
20 Fugo Kristo nayaa: “Mo ngére, mi naru pa ngbadimo ki ningoka ha. Si ngia boro gi fugore ki uru ngbadimo, mi aríma koyo du ni ni, ki ri riahe na ni, ni ki niri riahe na mi a.” Yesu anafu agu arugute nga ga toro dedede ho ko anari riahe ni. (Ruka 5:29-39; 7:36-50; 14:1-24) Awere ko nangoka ngbadimo ngbatunga gu dungurati du wa ga agu aKristano nadu Raodikiya yo. Ya mo agu aboro du rogoho azaka ngbadimo fuko, kini zingisi gu nyemuse i adu nani mbata tipa ko, ki di ko kugume ku dagbayo, na ki mbu ko ko yugupai fuyo? Ka i mangihe wo, Kristo ari gu riahe ari na yo nga ga toro nga gu nika undo yo.
21 Gu “kura akandoro” du areme nambu Yesu ambu ko rimo fuo yo ku dimo kpuyo yo, ka pepai nisanza, na ngbatunga gu gayo mangaapai re nika ndu na yo sa nyenye unga. (Yoane 10:16; Matayo 25:34-40, 46) Tipa gu mbedimbedi aKristano nika diabe zegino, Kristo nika idapa gu mamu fuyo wa du yo nibasasa nga ka ‘sungo na ko auru gako mbatabakindo, a wa ko adibepai ki sungu na Bako auru ga Bako mbatabakindo.’ Ii, Yesu nakido mbedimbedi aKristano ka fu gu iiriwo mamu fuyo nga ga sungo auru ambatabakindo na ko ku kumbabe Bako yo ngbangbaturũ yo. Na gu kura avusende nika diabepai, namaabangiriyo tigayo tipa bawene ba auru kpotosende tii gu zogarago nga ga Kindo.
Gupai Si Aida Ani Dunduko Wirikihe
22, 23. (a) Wai rengbe aKristano dunduko ka gbia undo be ga Yesu afugo fu agu adungurati nadu saba Asia Minor yo? (b) Ginipai si aida ani diberã ka mangaha?
22 Anga kapa ho tipa gupai nga aKristano dunduko rengbe arengba ka gbia undo be afugo Yesu fu agu adungurati nadu saba Asia Minor yo te. Nikpiapai, nikparia agu aKristano nga abaakumba gupai nga, Kristo afu gu tambuahe nada ada fu adungurati, i natambua aboro nibasasa na adungurati tipa agu apai i amangaha wenengai rogo toroyo. Abaakumba naundo akurayo aidipase rogo agu apai rungbura yo rogoho tipa i mangi agu arugute Ziazia Kekeapai agumbaha. Ani dunduko rengbe arengba ka gbia undo be apapara agu arugute nibakiakia Kristo afuhe fu agu adungurati nadu saba Asia Minor yo, ka ani ta kparakpee kini mangi agu arugute re zanga keesa.a
23 Anga gi yangara arame re nga gu regbo si aida ani naabi apai rogoho gbua taata, niregbo orafuo aũzegino, watadu niregbo orafuo agu apai dunduko nika sa rani ani naamangasunge fu Mbori gbua ngbarangbara te. Sidu, si naida adungurati dunduko naakika imaima wa agu abaduawe Yesu nasigiraha kurogo gaha aba. Niruru aKristano, ani zinga tirani dedede kuti gupai nga ka degaturani ho Kristo afura ni na ki degeturani kuti gupai toro naagumbaha. Fuo manga ani he tie were, ani aduna ngbarago ni agu aboro nahasarago sa gu taarimo nga ga Yekova.
[Gu rukutu kekeapai du bandu kpewaraga yo]
a I aima sakarogo Yugoti 2:1–3:22 a rogo gu buku nga Revelation—Its Grand Climax At Hand! rogo gaha 7 kapita da kuti digido kapita 13, si nga gu buku aDezire Yekova akusihe.
Gaoni Karagapai Nga Gine?
• Da nangia “gu de nga Izebere,” na tipagine agu adee nga avuru Mbori awirikanga gari mangapai ti ni ya?
• Gini sino apai nadu rogo gu dungurati nadu Sarudi yo, na gine rengbe ani ka mangaha ki he du wa agu aKristano nanaraka yo?
• Gini akidohe Yesu akido gu dungurati nani nadu Firaderufia yo, na wai rengbe ani ka manga gu rugute re areme a?
• Tipagine i abira agu aKristano ti ni nadu Raodikiya yo, ono gini maabangirise moi yo ho ku barabangiri agu aKristano natungusapai zaaza?
[Gu kpiahe du ti kpewaraga 14]
Si naida aboro ne gu gbegbere mangaapai nga ga gu ‘dee nga Izebere’
[Gu kpiahe du ti kpewaraga 16]
Yesu ima zaka “bakere ngbadimo” fu apefuo ko, nga gu ngbadimo nazaka sa dungu asunge nga ga Kindo
[Gu kpiahe du ti kpewaraga 18]
Oni naadia Yesu kugume na kini degeturoni kuti gupai ko agumba?