Oni Duna Giasangbaa Gbe Wa Digido Zegino Ambeda

‘Siro nga gu boro angbatunga aboro ka giasangba ko.’—BAMBATA PAI 49:10.

1. (a) Pa giasangba Yekova bakuru kusayo anakoda gine? (b) Gini sangbanebi tipa giasangbaa Yakobo afura tipaha?

GIASANGBA Yekova nidu dedede nga giasangba agu aboro namangasunge kubako. Mbata, si anakoda giasangba amaraika, iriiripa abaakumba, abasapungbanga, aboromotumo, anebi, na abakindo. I anayamba gu mbatabakindo agu abakindo nga ga aYisaraere yo anasungo auruhe ni ga Yekova mbatabakindo. (1 Pekapai 29:23) Si nafu gberarago tie nga, dungu agu abazogo nangia ga aYisaraere yo abasasangba Mbori, kini ye na agberango kuriyo na kurii avuruyo. Ono tie Yekova ambunga gako ruru amoyambu i zanga duna maabangirise te; ko afu wasa fuyo na gu mokido nga ga fu gu Bakindo fuyo adunga irairaapai tiko ya, nga guko ruru aboro ka duna ngbarago ka irisa sangbako. (Yesaya 9:6, 7) Ho gu iriiripa bakumba nangia Yakobo aasamba ni, ko agumbapai ni sangbanebi tipa gi bazogo re ki ya: ‘Ngbondo nga ga bakindo agúaringa be Yuda te, ka ko azánganga bafurugute dagba ngbatungako ya, daho guko nga Siro ka ye ni; nga guko angbatunga aboro ka gía sangbako.’—Bambata Pai 49:10.

2. Gu fugo nga ‘Siro,’ rogoyo nga gine, na gine si adu nga gako zogarago nika kodaha?

² “Siro” nga fugo Ebere du rogoyo nga, “Guko Duhe Ni Gako” watadu “Si Nga Gako.” Ii, si adu nga Siro nika diakumbo gu rengo du tipa zogarago, nga gu ngbondo aayugopaha, na kini rukuba gu topee nga ga barutiriivura. Kurii gure, si adu nga, gu gako zogarago nga ga bakindo re akodanga kina atita Yakobo sa te, ono si akoda “angbatunga aboro” dunduko. Gipai re na ngbanya kuti gu mokido Yekova akido Abarayama nani niyaa: “Angbatungaro aróga ringara avurayo ni gayo, rogo ngbatunga ro i ka fu maku ni fu arikaaboro zegino dunduko.” (Bambata Pai 22:17, 18) Yekova ayugu gu boro nangia gi ‘tunga’ re rogo gu garã nangia 29 ti Gaani Regbo ho ko ambedi Yesu boro Nazareta ni na ziazia toro.—Ruka 3:21-23, 34; AGaratio 3:16.

Ga Yesu Bambata Kindo

3. Gini ngbatunga zogarago i afuhe fu Yesu fuo dakpa ko ku ngbangbaturũ yo?

³ Ho Yesu adakpa ni ku ngbangbaturũ yo, ko adianga ngbondo zogarago ku beko nibasa ki tona ka zogarago kurii aboro rogo zegino te. (Atambuahe 110:1) Wa si avura du wo, i afu ‘kindo’ fuko gbiati aboro ni avuruko nga aguyo naagia sangbako. Gu mokedi nangia Pauro ayugu gu kindo re ho ko akepai ni ki ya: “Bambiko Mbori abatasi rani be tandu bitimo, ki rimisi rani ku rogo gu ngbi [kindo, “NW” ] nga ga Wiriko, du nyemuko ti ko gbe.” (AKorosaio 1:13, gu kekepai duni pigipigihe re, ani du pigihe.) Gi batasa aboro be bitimo re atona rago Pendekote rogo 33 ti Gaani Regbo ho i auka ziazia toro ni kurii ga Yesu ruru amoyambu.—Amokedi 2:1-4; 1 Petero 2:9.

4. Rogo gini agene ga Yesu bambata abawiriki ayugo gayo giasangbaa, na wai Yesu ayugu yo ni badona?

⁴ Ni “amokedi . . . ku ba Kristo,” agu abawiriki nga mbedimbedi aKristano atona ka dungura gu kura aboro si adu nga i nikangia agu ‘akurayo nga azogo’ rogo gu kindo nga ga toro re. (2 AKorindo 5:20; AEfeso 2:19; Amokedi 1:8) Kurii gure, si adu nga agi aboro re i “[a]mongo dú teketeke na berã sa na rugatinapai sa” tipa wa ka i rengbe ka gbia ngbarago be ino yo gupai nga, gu Bakindo nga Yesu Kristo ima ida na gayo pai. (1 AKorindo 1:10) Wa du yo ni badona, i nga ‘ruru kangara moyambu’ watadu gu riko nga ga ruru kangara buruku.—Matayo 24:45; Ruka 12:42.

I Afu Maku Fuyo Mbiko I Agisangba ga Mbori “Buruku”

5. Natona ti agu aregbo nadu bakuru kusayo, wai Yekova naayugopai fu gako aboro?

⁵ Wo Yekova anasia aboro dedede i duni abayugupai fu gako aboro. Ni kpiapai, fuo aYuda karaga tiyo Babera yo, anga Ezara gbiati gu kura akumba nadu na inohe beyo agedi kina ga Mbori Ndiko sa fu aboro te, ono i ‘asakirogo’ gu ndiko yo re, na ki ‘sa Fugo Mbori aboro girogoyo.’—Nemaya 8:8.

6, 7. Wai gu riko nga ga moyambu nafu gu riahe nga ga toro ti ragoho rogo gu gene nga ga Riigbu Bipasunge, na tipagine daha ada ti ni ani ra fu gu riko re?

⁶ Rogo bambata sa kama agarã, ho gu sakapai nadu tipa yeratise akuru ni rogo gu garã nangia 49 ti Gaani Regbo, gu riigbu bipasunge nangia ga gu bambata moyambu re afu kpee na ki wisigi gupai re na ki da kuti gu digisopai mburuhe adu rii Ziazia Kekeapai. Kusa, ho i atakipande gu diaberã ni i ada kuti ni, adungurati airisi agu arugute i afuhe na i ki gbia ngbarago be dungu ga Mbori amaku. (Amokedi 15:6-15, 22-29; 16:4, 5) A wa kina gure, rogo gu gene nga ga ruru kangara moyambu, Riigbu Bipasunge ti gi gaani regbo re ima sakarogo gu nyanyakipa apai du wa gu kparatise kusayo ti agu apai nga ga birĩ zogarago si aida aKristano mangihe, ka bi kure ni ziazia he, na pa ingamangasunge na kere angua gbiati vu gundö. (Yesaya 2:4; Amokedi 21:25; 2 AKorindo 7:1) Yekova afu maku fu gako aboro tipa i airisi Fugoko na ki gisangba ruru moyambu.

⁷ Ni ra ga Mbori aboro na goyo fu gu riko nga ga moyambu, i nayugu gupai nani nga, i nara fu Bairayo nga Yesu Kristo. Ngbatunga gu ra na gose re, si na gu kura nyanyakipaha berewe ti gi gaani regbo re mbiko gu ga Yesu pagbia i nakiisihe, nga gu Yakobo aima fura tipaha wa ko aasamba.

Siro Nga gu Bakindo Duna Rengo Beko ka Zogarago Auru Kpotosende

8. Wai i akiisi ga Kristo pagbia na ti gini regbo?

⁸ Sangba Yakobo ni nebi tipa apai kumbatayo aya Siro azinahe fu aboro ‘i gisangbako.’ Si ziazia tie nga, si adu nga, ga Kristo zogarago akoda kura aboro ku pati aYisaraere. Gine si adu nga si akodaha? Yugoti 11:15 nakaragapai sani niyaa: “Gu ngbi nga ga kpotosende . . . [i ima ariaha ni] gu ngbi nga ga gaani Gbia, na ga gako Kristo, ko azóga ha nye anye kindi.” Ziazia Kekeapai nayugo gupai nga, i afu gu pagbia re fu Yesu ti digido ‘saba regbo’ nga ga sangbanebi rogo 1914, nga gu “ringbisiringbisi aregbo i aringbisihe fu rikaaboro.”a (Daniere 4:16, 17; Ruka 21:24, NW ) Rogo gu garã re, regbo ada ‘Kristo duho na ome kindo beko’ ni gu Bakindo nga Masiya, na nangia regbo a ko ‘ndu ka zogarago dagba avurako.’—Matayo 24:3; Atambuahe 110:2.

9. Ginipai Yesu amangihe ho i asungusi ko ni rii mbatabakindo, na gini sangbanaha nakuru sa ngbatunga aboro angianga ngburungburu ya, gbe gako abawiriki?

⁹ Ga Yesu bambata sunge fuo fu yo gu ome fuko nga ga zogarago angia ka ba Satana kusayo ngbangbaturũ yo nga gu boro nagasi be basasangbaa, na i aba ko kodihe na gako adaimona ‘ku sende no.’ Natona ti gu regbo re, gi gbegbere atoro re natiga we ti gu kere apai ngbatunga aboro agbia tiyo nani areme, na kini sa zegino si duni bakpakarakpakara rago aboro gisangba Yekova rogoho. (Yugoti 12:7-12; 2 Timoteo 3:1-5) Nirengo, agu aboro gbe Satana aso gu vura nga ga toro na yo nakoda ga Yekova mbedimbedi amoyambu, nga “agu yo naka kuti gu dezire pai nga ga Yesu” na agu abadiangbayo nga “kura avusende.”—Yugoti 12:17; Yoane 10:16, NW.

10. Gini digisidigisi sangba agu anebi nga ga Ziazia Kekeapai duni ngbaanga ya Satana adunga na diabese rogo gako vura kuti ndikidi aKristano te?

¹⁰ Apai nandu na Satana ka diadia beko, ono, wa duhe nga gi regbo re nga ‘ga Gbia uru,’ anga pai ho rengbe ka sa Yesu ko he ‘digiso gako diabe vura te.’ (Yugoti 1:10; 6:2) Ni kpiapai, agu aYisaraere nga ga toroyo du bangeyo nga 144,000, ko nika sigira rimoyo asigira niyangaraha. Gupai ko ka mangaha berewe a nga ka banda gu “bakere rimbasa aboro, ka boro ageda nga yo wa sa ya, dagba rika aboro dunduko, na angbatunga yo, na aboro, na angbatunga afugo dunduko.” (Yugoti 7:1-4, 9, 14-16) Ono tie, ni zanga du yo wa agu abadiangbayo nga mbedimbedi aKristano, agi aboro re angia agisangbaa ni avuru Yesu auru kpotosende. (Daniere 7:13, 14) Pa kura yo ku yangura rogo zegino nafu nyanyaki gopai nga, Siro nirengo nga Bazogo kurii “gu ngbi nga ga kpotosende.”—Yugoti 11:15.

Regbo Du re Tipa ‘Irisi Sangba Wene Pangbanga’

11, 12. (a) Kina gini aboro sa nika bata ti digido gi zegino du were re? (b) Gini sino namaapai rogo agu aboro yo nasa ‘gu toro nga ga zegino’ ni gayo?

¹¹ Agu aboro dunduko naida nyenye unga du wa ka i wiriki giasangbaa, mbiko Ziazia Kekeapai nagumbaha ziazia ya “agu . . . [aboro] aina nga Mbori ya, na agu yo agia nga sangba wene pangbanga nga ga gaani Gbia Yesu ya,” abatanga rogo ga Mbori uru irabape te. (2 ATesaroniko 1:8) Ono tie, wa vura duhe nga si naida aboro gisangbaa, gu gbegbere apai namanga rogo gi zegino re na gu gaha toro nga ga samungu kuti agu andiko nga ga Ziazia Kekeapai na kuti agu arugute adunga ngburungburu ya nasaha ni kpakarakpakarapai fu boro ni irisi sangba wene pangbanga.

¹² Ziazia Kekeapai naringbisapa gi sino nga ga samungu kuti Mbori re ni ‘gu toro nga ga zegino.’ (1 AKorindo 2:12) Ni saka ko rogo gupai sangbana gi toro re amanga aboro nani, gu mokedi nangia Pauro akepai fu agu aKristano nadu Efesa yo rogo bambata sa kama agarã ki ya: “Oni anata . . . mbata ku sangba sino gi zegino yo re, ku sangba gu bakindo yo du na tandu wege, nga gu toro namanga pai awere rogo agu awiri yo nakeretu. I ani adu ni ungarani dagba yo yo dunduko a mbata na gu nyemuhe nga ga bororani, nimangi agu apai ngba ti borose na berã. Ani ki du ni awiri zinga mbiko sino wa kina agu yo dunduko.”—AEfeso 2:2, 3.

13. Wai rengbe aKristano ka sovura kuti gu toro nga ga zegino, na gini wene sangbanaha rengbe ka du?

¹³ Si nafu kina ngbarago nga, agu aKristano nangia aEfeso anyenga ni akanga fu gu toro nga ga basasangbaa te. Kuba gure, i angia agu awiri Mbori nga agisangbaa ni ra yo fu gako toro na kini ke wene azuzuhe kpaima. (AGaratio 5:22, 23) Teketeke areme a, ga Mbori toro, nga gu ome kii kisusi kura aome dunduko rogo zegino, naundo dungu aboro i duni agisangba Yekova, ki duna gu sangbanaha nga ka duna “maabangirise, dati kina digida rame.”—AEbere 6:11; Zekaraya 4:6.

14. Wai Yesu agbeberã agu aKristano dunduko naraka rogo yangara arame kuti kparakpara apai nga gu rengbe ka asada yo rogo gayo giasangbaa?

¹⁴ Ka bangironi gonga a ti gupai nga, Siro gu du kinaho nasongoda rani na bakere ome ya, nga guko gbiati Bako nika mbunga gene fu avura rani, singia adaimona watadu aboro i asadi rani rogo gaani idapase kisusi kuho rengbe ani ka hihe kuoni ya. (1 AKorindo 10:13) Nirengo, tipa ani rengbe ka gbia undo rogo gaani vura nga ga toro, Yesu aringbisipa dungu kparakpara fudifudiapai nga gu ani ka gbia tirani nani rogo gi yangara areme re. Ko amangihe wo nikeka ko awaraga saba, nga gu ko afuhe rogo yuguyugupai fu gu mokedi nangia Yoane. (Yugoti 1:10, 11) Si naida ani rugu tirani na gupai nga, gu yuguyugupai re aduna nyanyakipa arugute rogoho fu aKristano ti gu regbo nadu kusayo re, ono boro gu regbo nzunzu sangbaha amanga nga rogo ‘ga Gbia uru,’ nga gu natona rogo gu garã nangia 1914. Sidu, naruu he tie ka ani gbeberã rani fuo agi apangbanga re!b

Oni Ne Wasiwasi Kodaba, Nyemu Aũzegino na ki He Bi Apai Kpasiaka

15. Tipagine si aida ani banda tirani ti ni ti gupai namangi gu dungurati nadu Efesa yo, na wai rengbe ani ka manga gupai re? (2 Petero 1:5-8)

¹⁵ Ga Yesu bambata waraga adu fu gu dungurati nadu Efesa yo. Fuo Yesu tambua gu dungurati re tipa gaha hipai, ko ayaa: “Ono pai ngbare sa ro, nga, mo mbu ga bambata nyemuse.” (Yugoti 2:1-4) Areme, gu nyemuse tipa Mbori nadu mbata be bete agu aKristano nadu zaaza ima zera. Ngbatunga gu zera nyemuse re rengbe ka rungburasi ga boro pagume na Mbori, sidu si naida ni mangipai tipaha niipo. Wai rengbe ni ka zingisa ngbatunga gu nyemuse re berewe kubaha? Ni wisigo ni Ziazia Kekeapai dedede, du pati adunguratise dedede, kparakpee dedede, na berã kuriipai dedede. (1 Yoane 5:3) Rengo ngaha, nga, si naida “nyanyaki” asadatise tipaha ono nga gu rẽhe arẽ nirengo tipa boro mangihe. (2 Petero 1:5-8) Kangia oni wisigi tironi ki bihe nirengo nga gaoni nyemuse tipa Mbori ima zera, oni mbakadi gupai re niipo, ni irisa oni agu afugo Yesu nga: “Mo tíngidi pa ho ti mo ni tie, ki sa ga berã, ki nimangi gu bambata mangaapai.”—Yugoti 2:5.

16. Gini kere maapai kurii kura aboro nadu rogo agu adungurati nadu Perugamona yo na Tuatira yo, na tipagine ru agu afugo aru ti ni fu rani areme Yesu agumbaha fuyo?

¹⁶ I atambua agu aKristano nadu Perugamona na Tuatira yo tipa kakuti ruru mangapai, hipai, na ngara rogo sunge tungusapai. (Yugoti 2:12, 13, 18, 19) Wa si avura du wo, gu sino mangaapai nangia ga Birama na Izebere aima maapai kuriyo, nga agu aboro nagbarasi agu aYisaraere nadu mbata na wasiwasi kodaba gbiati iriso gu mbori nangia Bara. (Pa Geda Aboro 31:16; 1 Abakindo 16:30, 31; Yugoti 2:14, 16, 20-23) Ono ginipai tipa gi gaani regbo re, nga ‘ga Gbia uru’? Ya mo gu bangisa gbegbere maapai kuri kura aboro re si ti ni ho i abihe abi ziazia? Ii, bakere gbe, ndu kusa yo badungu aboro kusayo dagba ga Mbori aboro rogo dungurati si tipa wasiwasi kodaba. Sidu, nanyaki gupai tie nga, ani ne kodatise na ngbatunga agu aboro dunduko namaa wasiwasi apai kurii akurayo yo nga agu aboro du rogo dungurati na aguyo adunga rogoho ya! (1 AKorindo 5:9-11; 15:33) Agu aboro a naida ka duni agu azogo nga ga Siro yo ni agisangbaa, si naida i ne agu ambaro aboro akapa akapa kuti ni na ki ne ngana gu kpia kundiri aboro du rogo amagazini na gu du rogo Internet.—Amosa 5:15; Matayo 5:28, 29.

17. Wai gu bipai rogo toroyo na gu berã nangia ga agu aboro nadu Sarudi yo na Raodikiya adu kia ti ga Yesu bipai tipa gayo sino nga ga toro?

¹⁷ Kparakusayo ti kina bete aboro gbua nibasasa, i atambuanga gu dungurati nadu Sarudi yo wa gu tooni te. I ‘anayambaha’ ya si ni ungaha, watadu kuti wai i anabihe, ono tie agu aboro nadu rogo gu dungurati re adu kpasiaka rogo toroyo si ki sa Yesu ko ya tipa gu dungurati re wee si aima “kpi.” Gayo irisa sangba wene pangbanga adu gbua ni gupai i aamangaha nidingisoro. Nagbere gu birahe i abira yo nani re! (Yugoti 3:1-3) Gu dungurati nadu Raodikiya yo adu wa kina gure. Agu aboro nadu rogoho anasambuo tiyo tipa gu kumuko nga ga agu aũzegino nadu beyo niyaa, “Mi [nga ira]kumuko,” ono tie kuti ga Kristo bipai, si ‘aduna rungo gbe, he adunga behe te, si aduni iravurari, ni kundiri he a.’—Yugoti 3:14-17.

18. Wai rengbe ani ka ne du uruuru rogo toroyo bangiri Mbori?

¹⁸ Areme, bete agu aKristano nadu mbata niruru yo ima ti kina kurogo gu bangisa sino basasangbaa re. Isoke ka si vura du nga i ambu gu toro nga ga zegino si zeresi gu berã nga ga mangapai niipiipihe rogo gayo raka, rogo gi gene re, i kini zugosi gu sino berã nga ga du uruuru rogo wisigo Ziazia Kekeapai, rogo kparakpee, rogo nduge ku pati agu adunguratise nga ga aKristano, na rogo sunge tungusapai. (2 Petero 3:3, 4, 11, 12) Si naida gupai nga, ngbatunga agu aboro re gisangba Kristo rogo wisigo gu kura akumuko nga ga toro du kindi kumbatayo, ii, nga ka “ngbé dahabu be [Yesu], nga gu i agirisi he [rogo] gbigiwi.” (Yugoti 3:18) Ngbatunga gu ndikidi kumuko re nakoda ‘kúmuko rogo wene mangaapai, sógima fuhe.’ Ni manga ani sunge na gi ndikidi akumuko nga ga toro re, gure nga ani ‘naiga wene nyanyaki he fu kina tirani sa gu rago nikaye yo, ani ka nye anye ni na ki kakuti gu unga nga ndikidi unga.’—1 Timoteo 6:17-19.

I Atambua Yo Tipa Gayo Giasangbaa

19. Gini tambuahe gbiati ngarasahe Yesu afuhe fu agu aKristano nadu Semuruna yo na Firaderufia yo?

¹⁹ Gu giasangbaa nadu rogo gu dungurati nadu Semuruna yo na Firaderufia yo agbarii ga kura adungurati dunduko na kingia kpiapai, mbiko Yesu abiranga yo rogo gako awaraga te. Ko agumba gupai fu agu aKristano nadu Semuruna yo nga: “Mi ini pa ga gberãngbi, na ga rungo, ono mo na ũkumuko.” (Yugoti 2:9) Nga gu kparakparapai nadu dagba yo na aguyo nadu Raodikiya yo nga aguyo nanasambuo tiyo na agu aũkumuko nga ga zegino ono ki du nirengo nga airarungo! Rengo ngaha, rago angbanga ti Bakitingbanga ka bi boro niruru ni na kini gisangba Kristo te. Sidu, Yesu afu rugute ki ya: “Ka mo gúnde nga be agu apai mo ka hi he ya. Mo ngére, bakitingbanga nikaba agu roni ku bambukisa yo, i asadi roni; oni ahi gberãngbi uru ki du bawe. Mo ngárã angarã ki da ti kpio, mi ki fu kpakpari unga foro.” (Yugoti 2:10) Teketeke a, Yesu atambua agu aboro nadu rogo gu dungurati nga ga Firaderufia ki ya: “[Mo aka] kuti gi pai, ka mo abasa nga pa rimore ya. Mi naye ni ipo; mo ká kuti gu pai du be ro, ka i adía nga ga kpakpari bakindo ya.”—Yugoti 3:8, 11.

20. Wai dungu amirioni aboro nairisi fugo Yesu areme, na ginipai ki vura nimangi yo vurũ?

²⁰ Rogo ‘ga Gbia uru,’ nga gu natona rogo 1914, ruru yangara mbedimbedi aKristano gbiati agu abadiangbayo nga kura avusende, du bangeyo awere nga amirioni, aima irisa fugo Yesu a ni tungusa yo pai zaaza na ni kakuti ruru mangaapai. Wa kina agu awirinayo nadu rogo bambata sa kama agarã, beteyo arungo mbiko gayo giasangba Kristo, na i ki moi yo a kurogo abambukiso na ki ga na aguyo kurogo agu abataya nga ga agu aboro i azi yo ti regbo vura. Gu kura aboro airisi fugo Yesu ni mbu abangiriyo si du ‘taata,’ kumuko ki vura ke pati yo gbiati aboro ngbaduse vurũ. (Matayo 6:22, 23) Ii, rogo arago dunduko na rogo apai dunduko, ni giasangbaa, ndikidi aKristano nafu ngbarago kindi fu Yekova.—Asanza 27:11.

21. (a) Gini sunge nga ga toro gu riko nga ga moyambu nikaa mangaha kindi? (b) Wai rengbe ani ka yugo gupai nga, ani nirengo naida ka giasangba Siro?

²¹ Wa ani ambeda na bakere gberangbii, ‘ruru kangara moyambu’ ima diaberã ka zanga mbupa manga rurupai ni giasangba Baira yo nga Kristo. Gere nakoda mbakada gu riahe nga ga toro tipa ga Mbori kporo. Sidu tie, ani ndu kumbatayo kaa fu tambuahe tipa ga Yekova bawene riigbu tipa agu ahe si afuhe. Rogo gi gene re ani kini yugu gupai nga, ani nara fu Siro, nga guko nika fu gu mosoro nga nyenye unga fu agu avuruko dunduko nagia sangbako.—Matayo 24:45-47; 25:40; Yoane 5:22-24.

[Gu rukutu kekeapai du bandu kpewaraga yo]

Oni Natingidaha?

• Gini sunge si adu nga Yesu nika mangaha a wa Yakobo afura tipaha kumbatayo wa ko aasamba?

• Wai ani ayugo gupai nga, ani idipa Yesu ni Siro, na gini toro si aida ani nehe?

• Gini arugute daada tipa rani areme du rogo agu awaraga i akehe fu agu adungurati saba du paha rogo Yugoti?

• Rogo gini agene rengbe ani ka wirika agu aboro ngbaha nadu bakuru kusayo rogo agu adungurati nadu Semuruna yo na Firaderufia yo?

[Gu kpiahe du ti kpewaraga 28]

Yekova nafu maku fu gako aboro tipa gia yo sangba ruru “buruku”

[Gu kpiahe du ti kpewaraga 29]

Gu maapai rii nga ga Satana nasa giasangba Mbori ni kpakarakpakarapai fu aboro

[Gu kpiahe du ti kpewaraga 31]

Nyanyaki pagume dagba tirani na Yekova naundo rani ani gisangbako