‘Oni Du Na Gu Sino Tironi Nga Ga Tambuahe’
‘Oni idihe fu ga Kristo zereda si zogo kpotoroniyo, na oni ki du na gu sino tironi nga ga tambuahe.’—AKOROSAIO 3:15.
1. Gini kparakparapai ani abihe dagba gu dungurati nga ga aKristano na gu zegino du tii gu ome nga ga Satana?
ROGO agu adungurati nga ga aDezire Yekova du bangehe nga 94,600 rogo zegino dunduko, ani naabi agu aboro du rogoho na gu sino tiyo nga ga tambuahe. I naatona adunguratise nibasasa dunduko na kini digisihe na kparakpee nga gu nakoda agu afugo nga ga tambuahe fu Yekova. Dedede, ani naagia agu aDezire nga aparanga na gu sosono yo gbiati gu vovo yo watadu aguyo ima ima kurogo rengo yo i nigumba agu afugo nga, “tambuahe fu roni,” “ii, tambuahe fu roni,” watadu ngbatunga agu afugo du wa gure ho i agbiatiyo ni tipa irisombori na tipa gu kodatise nga ga ngbarago. (Atambuahe 133:1) Nairiwo gu kparakparapai du dagba gi mangaapai re na gu mangaapai nga ga gbangbati moipai dagba gu dungu aboro “aina nga Mbori ya, na agu yo agia nga sangba wene pangbanga . . . ya”! (2 ATesaroniko 1:8) Ani naraka rogo gu zegino aboro atambuanga akurayo rogoho ya. Na si airiwonga tirani ka bihe wo te ka ani kparia gupai nga, mbori gi zegino re nga Satana Bakitingbanga, nga gu boro nagasi be urugo gbangbati, na nigu boro gako ruko gbiati gu gako sino nga ga samungu namoipai dagba aboro areme!—Yoane 8:44; 2 AKorindo 4:4; 1 Yoane 5:19.
2. Gini rugute si aida ani irisihe, na agini asanahe ani ka wisigoho?
2 Wa duhe nga, ga Satana zegino gu ke pati rani kirikiri, si naida ani du na rubangirise tipa gaha aberã ka gbarasapa rani. Rogo bambata sa kama agarã, gu mokedi nangia Pauro atingidi agu aKristano nangia aEfeso na gupai nga: “Oni anata . . . mbata ku sangba sino gi zegino yo re, ku sangba gu bakindo yo du na tandu yuge, nga gu toro namanga pai awere rogo agu awiri yo nakeretu. I ani adu ni ungarani dagba yo yo dunduko . . . mbata na gu nyemuhe nga ga bororani, nimangi agu apai ngba ti borose na berã. Ani ki du ni awiri zinga mbiko sino wa kina agu yo dunduko.” (AEfeso 2:2, 3) Kinawo a duhe nirengo tipa dungu aboro areme. Ono wai tie rengbe ani ka banda gu sino nga ga tambua aboro? Gini undo Yekova afuhe? Rogo gini wene agene rengbe ani ka yugo gupai rogoho nga ani na sino tambuahe tirani nirengo?
Nduapai Tipa Ani Du Na Tambuahe
3. Gini ahe du ani na tambuahe fu Yekova tipaha?
3 Gu boro du ani na bape tambuahe ka fuhe funi, ni nga Yekova Mbori, nga Bakusirani na ni Bafu-unga. Na ani naberãpa karaga gu bape re gbe, ho ani aberãpa gu bazagino agamahe ni ko nagamuhe fu rani kpaima. (Yakoba 1:17) Rogo a’uru dunduko, ani naatambua Yekova mbiko ani ni unga rani. (Atambuahe 36:9) Ani nabi dungu go ga Yekova agamunihe pati rani kirikiri rogo agu ahe nga sabeko, ngbatunga gu du wa uru, diwi, na akerekuru. Agu ahe du tii sendeyo nasongoda raka, na gu wene wege ani agbidaha, na agu ahe du wa mai nasaka tihe nibakirikiri, si dunduko nayugopa gu bape nga ga tambuahe du kurii rani tipa ani fuhe fu gu Barani nga boro nyemuse du ngbangbaturũ yo. Bakindo Davide abibia ki yaa: “Ako Yekova gi Mbori, mo angeesi gamo iiriwo mangaapai na gamo aberã du kono du ani ni; i arengba nga na ringbisa ha na mo te [“anga boro ho ka i ringbisi ro na ni te,” NW]! Bambiko ka mi vura nitaki pande he ki nigumba pa ha, si asúsa gu ka i gedi he.”—Atambuahe 40:5.
4. Tipagine si aida ti ni ani tambua Yekova tipa gu kodatise nga ga ngbarago ani agbiaha rogo gaani adungurati?
4 Wa ga Yekova aboro avuranga niraki areme rogo gu paradiso i abihe abi nibangirise ya, i nagbia ngbarago agbia be raka rogo gu paradiso nga ga toro. Tii gaani aBambu Kindo yo na ti regbo gaani kikindigi adunguratise, ani nabi zuzu ga Mbori toro si nimangisunge rogo aidipase yo. Nirengo, ho aDezire atungusapai ni fu agu aboro ini pai tipa pambori gbua tooni watadu ainonga ha ya, bete agi aDezire re nayugo gupai fuyo Pauro aringbisipaha rogo gako waraga fu aGaratio. Gupai i naamangaha mbata nga ka gbeberã agi aboro re kuti “agu apai borose amanga” na ki sana agi aboro re i karagapai sa gupai bi yo ho. (AGaratio 5:19-23) Dunguyo naidaha niipo ya si nga sino agu aboro du areme. Fuo i yugu gu ringbisapai du tipa zuzu ga Mbori toro fu agi aboro re, na fuo i ye kutii Bambu Kindo yo tipa ka bi gu gopai re nitiyo, dunguyo naidaha niipo ki yaa: “Mbori [gu]du dagba roni yo nirengo.” (1 AKorindo 14:25) Anga gipai re nadigo kina kutii gu Bambu Kindo du rogo dagbarago sa te. Oni ndunga kurogo gu rago ka oni ndu kurogoho, ho oni ka gbia boro ni sa dagba agu aDezire Yekova bangeyo nasusi amirioni sita, oni abi kina gu bangisapai nga, ni nga boro ngbarago. Nirengo, gi kodatise nasonosa aboro re, si nga ndupai tipa ka fu tambuahe fu Yekova, nga gu boro nafu gako toro tipa si sa gipai re si mangi.—Zefania 3:9; AEfeso 3:20, 21.
5, 6. Wai rengbe ani ka yugo gupai nga, ani na tambuahe tipa tumorii, nga ga Mbori babakere gamahe kisusi tipa rani?
5 Gu babakere gamahe kisusi Yekova nagamuhe fu aboro, si nga Wiriko, nga Yesu, nga rengberengbe gamahe zanga gu kpa koyo, nga guko nafu motumo tumorii ka tumo rii ngbatunga aboro nani. Gu mokedi nangia Yoane akepai ki yaa: “Abadiangba, ka nyemurani du ti Mbori [tie] were, [si naida] nyemu akuarani du adu ti rani a.” (1 Yoane 4:11) Ii, ani ayugonga gupai nga, ani na tambuahe tipa gu tumorii re rogo kina gaani nyemuse tipa Yekova gbiati tambua ko sa te, ono ani nayugoho a niraka ani ngba gu gene nayugo nyemuse tipa kura aboro.—Matayo 22:37-39.
6 Ani rengbe ka wirika kura apai tipa wai ka yugo tambuahe tipa gu tumorii re niwisigo ani gu gene Yekova amangipai ngbaha na agu aYisaraere nadu mbata. Rogo gu gene nangia ga Ndiko, nga gu ko afuhe fu gu rikaaboro re kube Mose, Yekova ayugu dungu weneapai fu agu aboro re. Rogo “kpia inahe na [gu] rengo [du rogo] rugute yo,” ani rengbe ka wirika dungu apai nga gu rengbe ka undo rani ani irisi gu ga Pauro arugute nga: ‘Oni du na gu sino tironi nga ga tambuahe.’—ARomo 2:20; AKorosaio 3:15.
Apai Biata Rogo ga Mose Ndiko Tipa Wirikaha
7. Wai gu mbakadapai nangia ga fu sa-dagba-bawe anafu mamu fu aYisaraere i yugu gayo tambuahe fu Yekova?
7 Rogo ga Mose Ndiko, Yekova afu agene biata fu aYisaraere tipa i yugu gayo ndikidi tambuahe ngbaha tipa gako weneringise. Bambataha angia sa-dagba-bawe. Si aniidi i fu sa-dagba-bawe nga ga agu ahe nanaida atiyo, kodihe kuti “sa dagba bawe . . . nga ga rimbasa abagara na rimbasa akandoro, . . . ni kparakpara ra ziazia fu Yekova.” (Pa Amotumo 27:30-32) Ho aYisaraere anairisa agu arugute ni re, Yekova anafu maku fuyo bakere gbe. “Oni yé na sa dagba bawe nga ga rũhe dunduko ku baigaahe yo, ya riahe ki du rogo gi bambu; oni ki asadi re na gi pai re, wo poi Yekova nga ga arimbasa ko, si ngia mi azá[nga] abangiri angbangbaturũ tipa roni [te ke] ki uka maku ku ri roni ka ba adu nga tipa ha ya.”—Maraki 3:10.
8. Gine nanakpara gu gamahe kina boro anikpinyemu ka fuhe nitini si dukia ti sa-dagba-bawe?
8 Uepai nga, kupati gu mbakadapai nadu tipa fu sa-dagba-bawe, Yekova ambakadi kurapai fu aYisaraere i naafuka agamahe nga gu kina boro anikpinyemu ka fuhe nitini. Ko arugu Mose ko ya fu aYisaraere wee: “Ho oni ka da ni ku rogo gu ringara mi aye na oni ku rogo ho, si ki du were, ya ho oni ka ri gu riahe ni nga ga gu ringara re, oni ki fu tumbatumba gamahe fu Yekova.” Si adu nga, i anifu bete makawa rogo gayo “ngungo zende ahe . . . [ni]rukutu akpokuta tipa tumbatumba gamahe . . . fu Yekova” rogo ngbatunga arikayo dunduko. Oni kparia gupai nga, Ko aringbisanga bakio gi makawa zukuzuku ahe re te. (Pa Geda Aboro 15:18-21) Ono ho aYisaraere anagagama ahe ni nitambuahe, Yekova anafuka amaku afuka fuyo nirengo. Ani nabi kura mbakadapai teketeke wa kina gure rogo gu yuguyugupai nadu tipa gu yekaru i ayuguhe fu Yezekere. Ani nagedaha wa gere: “Gu bambata he nga mbata zuzu he nga ga ngbatunga ahe dunduko, si adu ni ga aboromotumo, tumbatumba agamahe dunduko ni angbatunga ha dagba gaoni tumbatumba agamahe dunduko, oni anifu gaoni makawa sasa ngungo fu aboromotumo, ya maku sungu ri ngbatungaroni.”—Yezekere 44:30.
9. Ginipai Yekova ayuguhe fu aYisaraere rogo gu mbakadapai nadu tipa mbu futu ahe atiyo fu rungorungo aboro?
9 Biatapai nga, Yekova ambakadipai tipa pa sunge dungura futu ahe. Mbori ayaa: “Ho oni ka nike gaoni ũringara ni, oni anike nga ha ati kpuroni yo ki da ti ndikidi bangbanda ha te, ka oni adungura nga futuhe fuo ke oni he a ya. Ka oni nizura nga gaoni bakakue dunduko ya, ka oni nidungura nga gu tiwitiwi rindi bakakue natiwa rogo gaoni ati bakakue a ya; oni animbu he fu rungorungo aboro na fu agu aboro sungu ku dagba roni: Mi nga Yekova nga gaoni Mbori.” (Pa Amotumo 19:9, 10) Berewe a, Mbori aringbisanga pa bakio gu futu ahe i ka mbuhe atiyo te. Si adu nga, aYisaraere nibasasa nika diaberã tipa gu bakio futu ahe i ka mbuhe fu rungorungo aboro. Gu tatamanatatamana Bakindo nangia Soromo agumba gipai re kina boro bangirihe yo ki yaa: “Gu boro du na nunga rungorungo boro ti ni nafu he fu Yekova, tipa gani wene mangapai ko afú mosoro [afu] fu ni.” (Asanza 19:17) Rogo gi gene re, Yekova ayugupai fu aYisaraere tipa i du na nunga agu aboro tiyo naadunga na gene beyo ya.
10. Gine nangia asangbana kpa agu aboro nangia aYisaraere ti yugo gayo tambuahe fu Yekova?
10 Yekova anafu maku fu aYisaraere ho i aniguari ni nigiasangbaa ka fu sa-dagba-bawe, ho i anifu gu gamahe ni kina boro anikpinyemu ka fuhe nitini, na ho i animbakadipai ni tipa rungorungo aboro gbia riahe tigayo a rogo futu ahe. Ono tie, ho agu aboro nangia aYisaraere anikpa ni ka yugo tambuahe, Yekova anayugonga gako weneringise fuyo a te. Gipai re andu na yo sa gberango na niyangaraha, avura yo ki zi yo ki ga na yo kurogo kura ringara. (2 Pekapai 36:17-21) Gini apai tie, rengbe ani ka wirikaha be gipai re?
Gu Gaani Mangaapai Nga ga Tambuahe
11. Gine nga gu bangua gene rengbe ani ngbaha ka yugo gaani tambuahe fu Yekova?
11 Gu bangua gene rengbe ani rogoho ka taasarimo Yekova na ki yugu gaani tambuahe a nga ka fu “agamahe.” Rengo ngaha nga, wa du ani ni aKristano, ani tii ga Mose Ndiko si ki du nidingisoro fu rani ani tumo na anyaa watadu aũati te. (AKorosaio 2:14) Wa vura duhe wo, gu mokedi nangia Pauro angarasi agu aKristano nangia aEbere ki yaa: “Ani tumo ni motumo tambuahe fu Mbori rogo ko yo dedede, [ni]gu zuzuhe nga ga ngbarani nakusa pa rimoko.” (AEbere 13:15) Nimanga ani sunge na gaani abirĩ gbiati gaani ahe ka fu gu motumo nga ga taasarimo Yekova, ani rengbe arengba ka yugopa gaani tambuahe nga gu naye ngbaduraniyo fu Yekova Mbori nga gu Barani nga boro nyemuse du ngbangbaturũ yo, singia rogo gaani sunge tungusapai gbaiga watadu nikaragapai dagba “rimbasa aboro” nga agu akuarani nga aKristano du rogo dungurati. (Atambuahe 26:12) Ka ani mangi gipai re, ginipai ka ani wirikihe be agu agene si adu nga aYisaraere yugu gayo tambuahe ngbaha fu Yekova?
12. Nibipa gaani sunge nga ga aKristano, ginipai rengbe ani ka wirikaha be gu mbakadapai nangia ga fu sa-dagba-bawe?
12 Bambatapai nga, a wa bi ani he, gu mbakadapai nadu tipa fu sa-dagba-bawe angianga gupai boro aniidi nitini ka siaha tipa ka mangaha te; si adu nidingisoro fu aYisaraere wa i adu nibasasa dunduko. Wa du ani ni aKristano, ani na gu tindiro kurii rani nga ga ndu ku gene sunge tungusapai yo na kini du pati agu adunguratise nga ga aKristano. Agi asunge re ni agu apai ani asiaha asia nisarani te. Rogo gu ga Yesu iiriwo sangbanebi ko agumbaha tipa yangara areme, ko afura zukazuka ki yaa: “Gi wene pangbanga nga ga ngbi re i atungusa ha [atungusa] rogo zegino dunduko mbiko ndika fu arikaaboro dũ; ragoho ki digi adiga.” (Matayo 24:14; 28:19, 20) Nibipa agu adunguratise nga ga aKristano, ga Mbori toro adu kugii gu mokedi nangia Pauro ko ke gupai tipaha nga: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rugu akuarani aruga; ki nimangi he susi, wa bi oni he ya gu uru re si nambeda.” (AEbere 10:24, 25) Ani nayugo gupai nga, ani na tambuahe fu Yekova ho ani aguari ni na ngbarago tirani ka tungusapai na ka yugopai fu aboro kodihe kuti koda tirani na awirinarani dedede ti regbo agu adunguratise nga ga dungurati, na kini bihe nimamu na nigu irisa fu yo ho fu rani.
13. Gini apai ani awirikaha be gu mbakadapai nadu tipa gu gamahe kina boro anikpinyemu ka fuhe nitini gbiati gu mbakadapai nadu tipa mbu futu ahe atiyo?
13 Kurii gure, ani rengbe arengba ka gbia undo niwisigo ani gu kura mbakadaapai ue i afuhe fu aYisaraere tipa i yugu gayo tambuahe ngbaha, nangia gu gamahe kina boro anikpinyemu ka fuhe nitini gbiati gu mbakadapai nadu tipa mbu futu ahe atiyo fu rungorungo aboro. Si adu kia ti sa-dagba-bawe, nangia agu arugute naima ringbisapa bakio guhe boro ka fuhe. Ono tipa gu gamahe kina boro anikpinyemu ka fuhe nitini gbiati gu mbakadapai nadu tipa mbu futu ahe atiyo, si afuranga tigaha tipa ringbisiringbisi bakio ahe te. Kuba gure, si ambu ba tipa boro gamuhe kuti gu bakio tambuahe du ni nani niga Yekova moyambu a wa ngbaduniyo nika fõni ni fuhe. Rogo ringbisapa gu sunge nga ga aKristano na gipai re, ya mo ani namangasunge tungusapai gbiati du pati agu adunguratise nga ga aKristano na ngbaduraniyo dunduko na ki du na nyemu mangaha tirani wa ani navura rugatirani na gupai nga, si nga gu bangua sunge du fu ga Yekova amoyambu wa du yo nibasasa? Ani nabihe wa mamu tipa ka yugo gaani tambuahe tipa agu apai Yekova namangihe tipa rani? Ani namanga agi asunge re sirisiri, kuti gu bakioho rengbe agu apai du tipa rani ka mbu rani ani mangihe? Watadu ani nabihe dunduko gbua nigu sunge dingisoro si aida ani mangihe ka nyemuhe avuranga du tirani ya vurũ? Rengo ngaha nga, agi asanahe re naida ani karagapai sani nitirani wa du ani nibasasa. Gu mokedi nangia Pauro agumbaha tigako wa gere: “Boro niasadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.”—AGaratio 6:4.
14. Gine Yekova aidaha berani rogo gu gaani sunge tungusapai ani amangaha fuko?
14 Yekova Mbori ima ino agu apai du tipa rani wenengai. Ko ima rugatiko na pa gaani angbanda. Agu amotumo gako amoyambu afuhe, si na kikiipaha bangiriko gu bakerehe watadu gu nitoonihe. Ko amaanga bangiriko tipa gupai nga, wa du ani nibasasa, ani fuku ahe na kina bangisa bakioho te, kina boro ani nitirani a, ani arengbanga ka mangaha wo te. Ho gu mokedi nangia Pauro aafura ni tipa pa fu agamahe, ko aya fu agu aKristano nangia aKorindo wee: ‘Singia boro ho du zaaza rogo pa fu agamahe, Mbori aida pa gamahe beni kuti bakio agu ahe du beni, angianga kuti bakio agu ahe adunga beni ya te.’ (2 AKorindo 8:12) Agi arugute adunga ngburungburu re ya, kinaha a du tipa gu gaani sunge nga ga tungusapai ani amangaha fu Mbori. Anga gupai nasa Yekova ko idi na pa gaani sunge nga gu bakioho ani amangaha te, ono gu gene ani amangaha ngbaha, nga ani namangaha na ngbarago tirani na kini mangihe na ngbaduraniyo dunduko.—Atambuahe 100:1-5; AKorosaio 3:23.
Oni Zugosi Nyemu Sunge Tungusapai Nibazakigene na ki Kakuti Ni
15, 16. (a) Gini pagume duho dagba sunge tungusapai ti aregbo dunduko nibazakigene na pa yugo tambuahe? (b) Wai agu aboro arengbanga ka tungusapai ni abazakigene ya narengbe ka yugo gupai nga, i na nyemu sunge tungusapai ni abazakigene tiyo?
15 Gu sunge naye na mosoro fu rani na rengbe ani ka yugopa gaani tambuahe fu Yekova rogoho nga ka rimo sunge tungusapai ti aregbo dunduko. Gu nyemu Yekova du ti gako amoyambu gbiati gu tambuahe du yo nani tipa gako weneringise arẽnga aboro tipaha ya, afõngbadu dunguyo yo i kini mo ka manga bakere ariapai rogo gayo raka tipa ka gbia bakere regbo ka mangasunge fuko bakere gbe. Beteyo ima rẽ ka mangasunge ni abazakigene, kini di dedede bange asaa nga 70 rogo adiwi nibasasa kuti ngba sunge tungusa wene pangbangaa na kini yugu rengo fu aboro. Gu kurayo tigayo, nga aguyo gu kura apai nadingiso yo, naambakadapai ti kura aregbo ka tungusapai rogo diwi sa tipa asaa 50 ni amoundo abazakigene.
16 Ono ginipai tigaha tipa gu dungu ga Yekova amoyambu ka rengbanga ka mangasunge tungusapai ni abazakigene watadu ni amoundo abazakigene ya? I rengbe ka yugo gayo tambuahe ni zugosi yo nyemu gu sunge nga ga abazakigene na ki kakuti ni. Rogo gini gene? Ningarasa yo agu aboro rengbe ka mangasunge ni abazakigene, nirimiso yo nyemu gu sunge nga ga tungusapai ti aregbo dunduko ku ngbadu awiriyo yo, na nitungusa yo pai zanga nyomoro a wa agu apai du tipa yo nika mbugene fuyo. Gupai ani amangaha rogo gaani sunge tungusapai naru gbe riipa gu tambuahe du ngbaduraniyo tipa agu apai Yekova namangihe tipa rani, gu ko amangaha awere, na gu ko ka mangaha gizo.
Yugo Tambuahe na Gaani ‘Kikiipa Ahe’
17, 18. (a) Wai rengbe ani ka yugopa gaani tambuahe na gaani ‘kikiipa ahe’? (b) Wai Yesu aringbisipa bakio gu gamahe nangia ga dekurugbo, na tipagine ko aringbisihe ti ni wo?
17 Asanza 3:9 nayaa: “Mo írisi Yekova na gamo ahe dũ, na amakawa [gu] gamo bambata zuzu ahe naida.” Si aidanga ga Yekova amoyambu naafu sa-dagba-bawe berewe te. Kuba gure, Pauro akepa gupai fu gu dungurati nadu Korinda yo si aida aKristano mangihe ki yaa: “Aboro dunduko i nimangi wa i akpi nyemu he kpotoyo yo, ni ngbaduse te, ni dingisaro a te. Bambiko Mbori nakpi nyemu kina gu boro nagama he esuesu.” (2 AKorindo 9:7) Pa gama ani agu ahe kina rani nitirani akpinyemu ka gamaha tipa si songodi gu sunge tungusapa Kindo namanga rogo zegino dunduko, nayugopa gaani tambuahe a. Gu tambuahe naye ngbaduraniyo nasa rani ani naagama ahe dedede, nikpara ani he rogo aposo nibasasa tipa ka fuhe ka si rengbe, a wa bambata aKristano anamangaha.—1 AKorindo 16:1, 2.
18 Anga gu bakio gamahe ani afuhe nayugopa gaani tambuahe fu Yekova te. Kuba gure, si nga gu nyemu fuhe du tirani. Si nga gupai Yesu abihe ho ko aangana aboro ni i niba marã kurogo gu sanduki-dungura-marã nadu tii yekaru yo. Ho Yesu abi rungorungo dekurugbo ni ri niba “rukutu marã sirigi ue” kurogo gu sanduki re, ko ayaa: “Mi nagumba ha fu roni ni rengo, gi rungorungo dekurugbo re ri ba ra kii ti ga agu yo dunduko; bambiko agi yo dunduko nibafu ra ni dungu ra re i nibafu ra ku dagba gamahe yo wa kumuko yo akumuko; ono ri niba ra dunduko a wa ami adu be ri ni gari zingo.”—Ruka 21:1-4.
19. Tipagine duhe ti ni niwenepai ani wisigi agu agene berewe ani ayugo gaani tambuahe ngbaha?
19 Gi wisigopai du tipa wai rengbe ani ka yugo gaani tambuahe re sanga rani ani wisiginga agu agene berewe ani ayugo gaani tambuahe ngbaha. Isoke, ya mo ani rengbe ka kiiso gaani motumo nga ga taasarimo Yekova, kodihe a kuti agu ahe ani afukaha ka songoda gu sunge nani awirina amangaha rogo zegino dunduko? Kuti gu bakioho rengbe ani ka mangaha, ani rengbe ka ida gupai nirengo nga, gu Barani nga boro nyemuse, nga Yekova, aduadu na ngbarago tiko ka bi gupai nga ani na tambuahe tirani.
• Tipa gini nduapai si aida ti ni ani fu tambuahe fu Yekova?
• Gini apai ani awirikaha be fu sa-dagba-bawe, gu gamahe kina boro anikpinyemu ka fuhe nitini, na gu mbakadapai nadu tipa mbu futu ahe atiyo fu rungorungo aboro?
• Wai ani asonosa nyemu sunge tungusapai ti aregbo dunduko ni abazakigene?
• Wai rengbe ani ka mangasunge na gaani ‘kikiipa ahe’ ka tambua Yekova nani?
[Asanahe nga ga wisigopai]
[Gu kpiahe du ti kpewaraga 28]
“Wene gamahe dunduko, na ziazia ũgamahe dunduko i nagama ha, si naye ari yo”
[Gu kpiahe du ti kpewaraga 31]
Agini amotumo rengbe ani ka fukaha?