Yekova Nafuka Agu Ahe Du Ani Na Zingoho Na A’uru Dũ

‘Ka oni sakinga pa apai kpotoroniyo ya. Bambiko Baroni ima inoho ya oni naraka mbiko agi ahe re.’—RUKA 12:29, 30.

1. Wai Yekova afuka riahe fu agu anyaa ko akusi ra?

ONI abinga bavurukporo watadu kura zire u nidewerago ningbaru rogo gu ba oni abihe wa si gbua nga kungbo biriko? Oni avura kaa baka kina bangironi tipa guhe rengbe u ka gbiaha ka rihe wa u adewarago rogo gu sende re. Rogo gu ga Yesu Tungusapai nadu rii Bagangara yo, ko ayugu gupai nga, ani rengbe arengba ka wirikapai be gu gene Yekova ariga aziree ngbaha. Ko ayaa: “Oni bi azire ari yo, ami aru nga ahe te, ami ake nga ahe a te, ka ami aiga nga ahe ku rogo agbamu yo ya; Baroni du ngbangbaturũ yo nariga ra. Genoroni asusa nga genora te?” (Matayo 6:26) Ngba iiriwo gene, Yekova nafuka riahe fu gu unga ahe dunduko ko akusihe.—Atambuahe 104:14, 21; 147:9.

2, 3. Agini apai nga ga toro rengbe ani ka wirikaha be gupai Yesu ayuguhe fu rani tipa ka kparakpee tipa gaani riahe rogo a’uru nibasasa?

² Ka si du tie nga Yekova nafuka riahe afuka fu aboro, tipagine Yesu akodi pa sanahe tipa riahe ti ni kurogo gu kpia kparakpee ko afuhe niyaa: “Mo fú gaani riahe fu rani areme”? (Matayo 6:11) Ani rengbe arengba ka wirika dudunguroapai nga ga toro be gi taata sanahe re. Nibambatapai, si natingida rani na gupai nga, Yekova nga Bakerepa Bagamuahe. (Atambuahe 145:15, 16) Aboro rengbe arengba ka sopa abino na ki rũku ahe rogoho, ono kina Yekova sa rengbe ka sa ahe si sono, rogo toroyo na atiyo. (1 AKorindo 3:7) Agu ahe ani arihe na kini mbirihe, si nga agamahe be Mbori. (Amokedi 14:17) Pa sana ani ko tipa ko fuku agu ahe du ani na zingoho tirani na a’uru, nayugo gupai nga, ani abinga pa agu ahe taata ko afukaha fu rani re te. Rengo ngaha nga, gu sanahe re azakanga rani kusayo tii gu tindiro nga ga mangasunge te ka singia ani rengbe arengba ka mangaha.—AEfeso 4:28; 2 ATesaroniko 3:10.

³ Uepai nga, pa sana ani he tipa gu ‘gaani riahe nga ga areme,’ nayugo gupai nga, si aidanga ani naabakabangirani kisusi tipa agu apai du kumbatayo te. Yesu agbia kurapai kuti gure ki yaa: “Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya? Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ. Ono oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni. ‘Ka oni wisigi nga pai tie tipa gu pai nikadu gba ya; bambiko kina gba nikawisiga pai tipa ha ni saha.’” (Matayo 6:31-34) Gu kpee du tipa gu ‘gaani riahe nga ga areme’ namaa kpiapai tipa raka gu raka du taata nga ga “sinombori gbia kuti zereda.”—1 Timoteo 6:6-8.

Gu Riahe Nga ga Toro Rogo A’uru Nibasasa

4. Gini apai namangi rogo ga Yesu raka na rogo ga aYisaraere nayugopa nyakapa ri gu riahe nga ga toro?

⁴ Si naida gaani akpee tipa agu ariahe nga ga a’uru tingidi rani a na pa gu zingo du tirani tipa gu riahe nga ga toro na a’uru dunduko. Wa Yesu avura du na bakere gomoro tiko fuo susa gu dungu a’uru nangia ga gino riahe, ko asogo gu sosodapai nangia ga Satana ka sa ambia ni akpakuto, kini karagapai fuko niyaa: “Si ni keke he ya, ‘Boro anye nga ni ungani mbiko kina riahe sa te, ono mbiko agu apai dunduko naye ngba Mbori yo.’” (Matayo 4:4) Herẽ, Yesu adi gipai re rogo afugo gu nebi nangia Mose, nga guko naya fu aYisaraere wee: “[Yekova a]umbasi roni, ki mbu roni fu gomoro, ki nirigi roni na manu nga gu oni aina nga pa ha ya, abaroni aina nga pa ha a ya; ya oni ki ini he ya boro anye nga ni ungani bambiko kina riahe [sa] te, ono be agu apai dunduko nakura ngba Yekova yo du boro ni ungani mbiko ho.” (Pa Fu Rugute ni Ue he 8:3) Anga gu gene Yekova afu manu ngbaha fu aYisaraere afu kina ndikidi riahe nga ga borose sa fuyo te, ono si ayugu agu apai nga ga toro fuyo a. Gu kurapai sa nga ga toro dagba agu akuraha rengbe ani ka wirikaha behe nga, si aidi i “[rogodi manu] tipa kina ga uru sa.” Ho i anirogodihe ni susi ga uru sa, gu yangaraha anitona ka fũ na agbire kini zu kurogoho. (Gate 16:4, 20) Ono, wa si anivura du were, si anamanganga wo rogo sita uru te, nga gu uru si aniidi i dunguraha nga ga a’uru ue tipa i ki rengbe kadu na riahe beyo rago Sabiti. (Gate 16:5, 23, 24) Sidu, gu manu re anyakasi gupai ku berãyo yo nga, si aida i duni agisangbaa na i ini gupai a nga, gayo raka arunga kina riipa riahe sa te ono si aru a rii irisa “agu apai dunduko nakura ngba Yekova yo.”

5. Wai Yekova afuka agu ariahe fu rani nga ga toro nga ga a’uru nibasasa?

⁵ Ani a wo, si naida ani naariga tirani na a’uru dunduko na gu riahe nga ga toro Yekova afuhe rogo Wiriko yo. Tipa gipai re rengbe ka manga, Yesu asia gu riko nga ga ‘ruru kangara moyambu’ tipa si naafu ‘riahe ti ragoho’ tipa agu aborokporo nga ga idapase yo. (Matayo 24:45) Anga gu riko nga ga ruru kangara moyambu re nafuka kina agu ariahe nga ga toro kpaima fu rani rogo agu abuku naundo rani ani girogo sangba Ziazia Kekeapai sa te, ono si nangarasa rani a ani naageda Ziazia Kekeapai na a’uru dunduko. (Yosua 1:8; Atambuahe 1:1-3) Wa kina Yesu, ani rengbe arengba a ka songoda tirani rogo toroyo nimanga ani bakere asadatise na a’uru dunduko ka wirikapai tipa gupai Yekova akpinyemuhe na kini mangihe.—Yoane 4:34.

Mbupai Tipa Ingapai

6. Gini abape si aida ani sanahe tipa Yekova mbupaha fu rani, na riimburu ginipai du ko na nyemu ka gbandakaha kusayo?

⁶ Gu hõpai du fuo gure rogo kpia kparakpee nga: “Mo vu rani ti gani bape, [a] Wa ani navu gaani aboro bape a.” (Matayo 6:12) Anga gu bape nga ga marã Yesu aafura herẽ tipaha te. Gupai nadu berã ko yo nga pa mbupai fu rani tipa gaani ingaapai. Gu keke kpia kparakpee Ruka akehe tigako, ani nageda gi hõpai re yo wa gere: “Mo vú rani ti gaani ingaapai; bambiko ani a tigaani navu agu yo [avu] ninainga pai fu rani.” (Ruka 11:4) Ruka agumbaha tigako herẽ ziazia, sidu ho mangi ani ingapai ni, si nga fugo sanza ka ya ani gbebape kuti Yekova. Ono tie, gaani Mbori nga boro nyemuse ima mbakada tiko ka “gbandaka” gaani ingapai kusayo, watadu ka vu rani ti ni ka ani sa gaani berã nirengo na ki ‘sa tirani kusayo ti gbegberepai’ na ki sana ko tipa mbupai riimburu gaani idapase kuti ga Kristo motumo tumorii.—Amokedi 3:19; 10:43; 1 Timoteo 2:5, 6.

7. Tipagine si aida ani naakpara ti ni na a’uru dunduko tipa mbupai tipa gaani ingaapai?

⁷ Ani bingoho berewe ngba kura gene, ani namanga ingapai ho ani akpa ni ti irisa ga Yekova andiko nga ga ruru mangaapai. Mbiko gu ingapai ani adikumboho, ani dunduko nainga rogo afugo yo, rogo mangaapai yo, na rogo gaani aberã watadu ani nakpa ti manga gupai si aida ani mangihe. (Batungusipai 7:20; ARomo 3:23; Yakoba 3:2; 4:17) Sidu tie, singia ani rugutirani na pa gu ingapai mangi ani he uru watadu ani ainonga paha te, si naida ani kodi sanahe tipa mbupai tipa gaani ingaapai rogo agu akpee ani afuhe na a’uru.—Atambuahe 19:12; 40:12.

8. Gine si aida kparakpee tipa mbupai tipa ingapai sa rani ani mangihe, na gini wene sangbanaha du ti ni?

⁸ Si naida ani kparikpee tipa mbupai fuo wisigo ani tirani wenengai, fuo sa ani gaani berã, na fuo kusa ani gu ingapai mangi ani he re, na si naida mburu gu gaani kpee re du rii idapase kuti gu kure Kristo nauka ya si na ome ti ni ka batasa rani. (1 Yoane 1:7-9) Tipa ani rengbe ka yugo gupai nga, gu gaani akpee re nga kina boro gupai du ngbaduraniyo, ani du wa ka ani songodihe ‘nimanga ani agu apai rengbe na saberã.’ (Amokedi 26:20) Kina fuo manga ani he wo ka ani rengbe tie kadu na kido ya Yekova nika mbupai ambu fu rani tipa gaani ingaapai. (Atambuahe 86:5; 103:8-14) Sangbanaha nga gu zereda nga ga berã adunga gu wa ha ya, nga “gu zereda nga ga Mbori nagasi rugatinapai dunduko,” nga gu tigaha nika ‘bánda kpotoraniyo na gaani berã rogo Kristo Yesu yo.’ (AFiripoio 4:7) Ono gu kpia kparakpee Yesu ayuguhe fu rani, si nayugo kura apai fu rani a kindi tipa gupai rengbe ani ka mangaha tipa Mbori ki rengbe ka mbupai fu rani tipa gaani ingaapai.

Tipa Mbori Mbupai fu Rani, Ani Du Wa ka Ani Mbupai A fu Kura Aboro

9, 10. (a) Gini sakarogopai Yesu agbiaha kuti gu kpia kparakpee ko afuhe, na gine si anyakasipaha? (b) Wai Yesu ayugupai na kpiapai berewe tipa gaani zingo mbupai fu akuarani?

⁹ Si niwenepai ani rugutirani na gupai nga, gu hõpai nga, “mo vu rani ti gani bape, [a] Wa ani navu gaani aboro bape a,” nigu yangara papara kpia kparakpee Yesu asakirogoyo. Fuo ko nyasi na gu kpee re, ko ayaa: “Ka oni vu aboro ti gayo ingaapai, Baroni du ngbangbaturũ yo . . . avú roni [avu a] ti gaoni ingaapai. Ono ka oni avu nga aboro ti gayo ingaapai ya, Baroni avú nga roni ti gaoni ingaapai a te.” (Matayo 6:14, 15) Rogo gi gene re, Yesu afura ziazia nga, pa mbu Yekova pai fu rani tipa gaani ingaapai, si naruriipa mbu ani pai fu kura aboro.—Marako 11:25.

¹⁰ Ti kura regbo sa, Yesu ayugupai na kpiapai ka yugopa gupai ka ani mangihe ka ani aida Yekova mbupai fu rani. Ko afura tipa gu banaru bape bakindo ambupaha fu gu kanga nadihe beko. Gi bakindo re afu kere mbusa fu gi bangisa kanga re ho gi kanga re aká ni tipa ka mbupai fu gu kurako kanga nadi bape beko naumba kisusi ti gu ko adihe. Yesu adigisi gako yugopai na kpiapai niyaa: “Buba du ngbangbaturũ yo ko amanga kina wo fu roni a, ka oni ahe nga pai kpotoroni yo fu awirinaroni ya.” (Matayo 18:23-35) Gupai ko ayuguhe re adu ziazia: Gu bape nga ga ingapai Yekova nambupaha fu rani, si ima kio bakere gbe kisusi gu ingapai kura boro narengbe ka mangaha kuti rani. Kurii gure, Yekova nambupai fu rani na a’uru dunduko. Nirengo tie, si daada ani mbupai fu akuarani tipa agu ingaapai i naamangaha ti kura aregbo kuti rani.

11. Gini arugute gu mokedi nangia Pauro afuhe rengbe ani ka mangaha ka ani aida Yekova mbupai fu rani tipa gaani ingaapai, na gine nikangia sangbanaha?

¹¹ Gu mokedi nangia Pauro akepai ki yaa: “Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.” (AEfeso 4:32) Mbupai tipa ingapai dagbase naye na pazereda ku dagba aKristano. Pauro aya berewe wee: “Ziazia amangure, wa du oni ni ga Mbori siasia [aboro], oni ukadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga. Ku ri agi apai re dũ oni ukadi nyemuse, nga gu ũvodatise nga ga ziaziapai.” (AKorosaio 3:12-14) Agi apai re dunduko gudu rogo gu kpee Yesu ayuguhe fu rani niyaa: “Mo vu rani ti gani bape, [a] Wa ani navu gaani aboro bape a.”

Gbia Bandahe Ho Du Boro Ni Rogo Asada

12, 13. (a) Gine arengbanga kadu nga rogo gu hõpai du mbata fu yangaraha rogo kpia kparakpee ya? (b) Da nga bakere Ba’asadi aboro, na rogo gaani kparakpee yo nga gine ho ani ayani ka Mbori ngbenga kumbatayo sa asada fu rani ya?

¹² Gu hõpai ye mbata fu gu yangaraha rogo gu kpia kparakpee Yesu afuhe, si nga: “Ka mo ngbe nga fu rani ku mbata yo sa asada ya.” (Matayo 6:13) Ya mo gupai Yesu aaberãha nga, si naida ani sana Yekova ko he asada rani? Si arengbanga kadu wo te, mbiko ga Mbori toro adu kugii gu bawiriki nangia Yakoba ko ke gupai nga: “Ka boro du ni asadiasadi ni, ka ni yá nga, ‘Mbori naasada re,’ ya; bambiko ka i asadi nga Mbori na gbegberẽpai te, ko aasada nga boro tigako wa sa te.” (Yakoba 1:13) Kurii gure, bake Atambuahe akepai ki yaa: “Ako Yekova, ka si nidu wa mo nakparia pa irairaapai, Ako Gbia, da rengbe na ru?” (Atambuahe 130:3) Yekova amaanga rani tipa ka bi gu wiri irairaapai dunduko ani amangaha te, na nirengo, ko a’asadanga tiko ka fu asada fu rani ani mangi irairapai te. Sidu tie, gine nga rogo gi papara kpia kparakpee re?

¹³ Gu boro naida ka zio rani, na kini reke agbina fu rani ani zi ti ni, na naida ka rita rani, ni nga Satana Bakitingbanga. (AEfeso 6:11) Ko nga bakere Ba’asadi aboro. (1 ATesaroniko 3:5) Ho ani akparakpee ni tipa ka Yekova yenga na ani kurogo asada ya, rogoyo nga ani nasana ko ka ko mbunga rani ani ti ho du ani ni rogo asada ya. Ani nasana ko a ko undo rani ka ‘Satana dinga berani ya,’ ka ani zerenga fu gako asada ya. (2 AKorindo 2:11) Ani nakparakpee tipa ka nye rogo “gu barondo nga ga gu Ko nga Bahe ki susi,” nga Yekova, kini gbia gu bandahe nga ga toro ko afuhe fu agu aboro idipa gako bakere pagbia na kini yuguhe rogo agu apai dunduko i amangaha.—Atambuahe 91:1-3.

14. Wai gu mokedi nangia Pauro akido rani ya Yekova ambunga rani te ka ani angera kubeko ho du ani ni rogo asada?

¹⁴ Ani rengbe kadu na kido nga, Yekova ambunga rani te, kangia gupai ani akpara tipaha re si nga ndikidi gupai ani akpinyemuhe, na ani kita kparakpee tipaha na kini mangiapai ringbisihe kuti gu kpee re. Fugo gu mokedi nangia Pauro nakido rani na gupai nga: “A nga asada [ho na]ye sa roni te, kina gu ka boro hi he ahi. Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.”—1 AKorindo 10:13.

“Mo Batasi Rani be Gbegbere Sino Boro”

15. Tipagine duhe ti ni ninyanyakipa pai kisusi ani kparikpee tipa Mbori batasi rani be gbegbere sino boro?

¹⁵ Ringbisihe kuti sangba gu papara Ziazia Kekeapai nga ga aKristano i ake bambata fugoho nibee rogo pa-Giriki nga gu aboro naidi kuti ni, gu kpia kparakpee Yesu afuhe nadigo na agu afugo nga: “Mo batasi rani be gbegbere sino boro.”a (Matayo 6:13, NW) Bandatise be Bakitingbanga ninyanyakipa pai rogo gi yangara areme re mbiko i aima ba ko gbiati gako adaimona kusayo ngbangbaturũ yo ku auru kpotosende herẽ na i nasovura awere na yangara mbedimbedi aKristano, “nga agu . . . [aboro] naka kuti ga Mbori rugute, na agu yo naka kuti gu dezire pai nga ga Yesu,” na kini sovura a kuti agu abadiangbayo nga “bakere rimbasa aboro.” (Yugoti 7:9; 12:9, 17) Gu mokedi nangia Petero azungodi aKristano ki yaa: “Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata. Oni ká fu ko ki ru nyanyaki rogo idapase yo.” (1 Petero 5:8, 9) Satana naida ka rugusa gaani sunge dezirepai, na rogo gu gene nga ga agu ariigbu namangasunge fuko auru kpotosende, singia si nga ga pambori, ga bagaahe, watadu ga birĩ zogarago, ko na’asada tiko ka ba gunde tirani. Ono tie, ka ani ru ngutete, Yekova abatasa rani abatasa. Gu bawiriki nangia Yakoba akepai tipa gipai re ki yaa: “Oni fú tironi fu Mbori; ono oni ká fu bakitingbanga, ko ki oro be roni.”—Yakoba 4:7.

16. Gini agene du be Yekova ka undo gako amoyambu nani nga aguyo du rogo asada?

¹⁶ Yekova ambu Wiriko Satana asadi ko. Ono fuo Yesu sogo ga Bakitingbanga pai, kini mangisunge na Fugo Mbori si banda ko, Yekova akedi amaraika i ndu ka nyakasa ko. (Matayo 4:1-11) Teketeke a, Yekova amangasunge amanga na gako amaraika ka undo rani ka ani kparikpee rogo idapase na kini gbu kutii beko. (Atambuahe 34:7; 91:9-11) Gu mokedi nangia Petero akepai ki yaa: “Gbia . . . [ima ino] pa batasa aidipambori be asada, na ka ka kuti azangarurupai tii mbusa yo dati rago sapangbanga.”—2 Petero 2:9.

Batasa Aboro Rogo Apai Dunduko Ima Mbeda

17. Nifu Yesu kpia kparakpee fu rani, wai ko amoi apai ti genehe rogo gu gaha aba daada tipaha?

¹⁷ Rogo kpia kparakpee, Yesu amoi apai ti genehe rogo gu gaha aba daada tipaha. Gu banguapai si aida ani naabakabangirani tipaha mbata, si nga pa ziasi rimo Yekova nga gu rimo duna kikiipaha na kidu ziazia. Wa duhe nga, gu Kindo nga ga Masiya, si nga gu ũsunge Mbori nika mangasunge nani ka nyasa gipai re, ho ani akpara ni tipa gu Kindo re ye, gure nga ani nakpara tipa gu kindo re ye ka gbarasa iraira akindo dunduko watadu agu azogarago nga ga aboro, na ki sa gupai Mbori akpinyemuhe i mangihe wenengai auru kpotosende a wa duhe ngbangbaturũ yo. Gaani maabangirise tipa ka raka nyeanye kindi rogo paradiso auru kpotosende naruriipa ziasi rimo Yekova, gbiati pa ida aboro rogo zegino dunduko kuti gako ruru pagbia. Fuo kpara ani tipa gi nyanyakipa apai re dunduko, agu apai tie rengbe ani ka kpara tipaha fuo gure nga, agu ahe du ani na azingoho tirani na a’uru, gbiati mbupai tipa gaani ingaapai, na pa batasa rani be asada na be agu abiriki nga ga Satana Bakitingbanga.

18, 19. Wai gu kpia kparakpee Yesu afuhe nika undo rani ani nye kaa ngera angera na ki sa gaani maabangirise si du ‘nyanyakii dati digido zegino’?

¹⁸ Pa batasa rani be agu apai dunduko gbegbere sino boro amanga rani nani na be gi gbegbere zegino re ima mbeda. Satana ima ino gupai nga, ‘kina bete regbo’ gbua nye fuko, ko naafuda araki auru kpotosende na gako “bakere zinga,” gbe, agu aboro nga ga Yekova ruru amoyambu. (Yugoti 12:12, 17) Rogo gu kodikodi apai i aino apai ti ni tipa ‘digido gi zegino re,’ Yesu afura tipa iiriwoapai kumbatayo, du bete agu akuraha kina kumbatayo kindi. (Matayo 24:3, 29-31) Wa ani abi agi apai re si nimangi, gaani maabangirise tipa bata nada ziazia susi gu nidu mbata. Yesu ayaa: “Ho agi apai ka tona ye ni re, oni ngére ku ari yo, ki tumba rironi; bambiko rago tumo roni nambeda.”—Ruka 21:25-28.

¹⁹ Gu kpia kparakpee du nigurusigurusihe nga gu Yesu afuhe fu gako abawiriki re, nafu wene arugute fu rani tipa agu apai si aida ani kodihe kurogo gaani akpee wa digido gi zegino re ambeda. Ani nyenga kuti gaani kido da kuti digido gi zegino re, ya Yekova nikaa fuka agu ahe afuka kindi du ani na zingoho nga ga toro na ga borose. Gaani akpee ani ata kparaha kini ngere, nika undo rani ani ‘kakuti gaani maabangirise nyanyakii dati digido zegino.’—AEbere 3:14; 1 Petero 4:7.

[Gu rukutu kekeapai du bandu kpewaraga yo]

• Gini apai ani aberãha ho ani ahõ gu ‘gaani riahe ni nga ga areme’?

• Oni sakirogo gu kpee yo nga, “mo vu rani ti gani bape, Wa ani navu gaani aboro bape a.”

• Ho ani asana Yekova ni ya ka ko ngbenga kumbatayo fu rani sa asada ya, rogoyo nga gine?

• Tipagine si aida ani kpari gu kpee ti ni nga ‘mo batasi rani be gbegbere sino boro’?

[Asanahe nga ga wisigopai]

[Gu kpiahe du ti kpewaraga 23]

Lydekker

[Gu kpiahe du ti kpewaraga 25]

Si naida ani mbupai fu akuarani ka ani aida Mbori mbupai fu rani