4 Kparakpee Gini Apai Si Aida Si Du Tipaha?

GU KPEE Yesu afuhe i naayambaha nga Ga Gbia Kpee watadu Barani, si nga gu kpee aKristano naadogoda gumbaha gbe. Badungu aboro aruganga tiyo na ndu gupai Yesu afu gu kpee re ti ni te. Badungu amirioni aboro nafu gu kpee re na aʹuru dunduko zanga i berẽ aberã kuriihe. Ono Yesu aafunga gu kpee re aboro nifuhe wa gure te. Wai ani aino gipai re?

Mbata fu Yesu kpari gu kpee re, ko ayaa: ‘Ka oni kpari nga ni dogodi kpe’ ya (Matayo 6:7) Ya mo Yesu avundu tiko avundo nipeka ko agu apai si aida aboro napehe ngbariyo kini dogodi he? Wagusa te! Kuba gure, Yesu ayugu gupai si aida ani kpari tipaha, na agu apai nyakipaha ho ani akpara ni. Ani bingo gupai ko agumbaha. Gu kparakpee re nikekehe rogo Matayo 6:​9-​13.

Gi ga Yesu gurusigurusi kpia kparakpee re apekanga agu apai dunduko si aida ani kpari tipaha te. Oni tingidi gupai 1 Yoane 5:​14 apehe tipa Mbori kini yaa: ‘Ka ani ho guhe ku sangba gako nyemuhe yo, ko gi pa rani agia.’ Ka oni berẽnga ha nga gaoni apai nirukutihe si aidanga oni gumbaha fu Mbori ya ya.—1 Petero 5:7.

Wa vura duhe wo, na ginipai tigaha du tipa regbo na ba? Ya mo si naida ani ringbisi regbo aringbisa na gu ba si aida ani kpari rogoho?

“Barani du ngbangbaturũ yo, Ani írisi rimoro airisa.”

Yesu arugu apefuoko nga si naida i niikpari sa fu kina Bako nga Yekova. Ya mo oni ini gupai du rimo Mbori ti ni na nyanyakipaha na gupai si aida ti ni ani irisihe, watadu ka ziasihe?

Vuru agu aregbo yo dũ nga ga ga aboro raka, i aima birikosi ziazia rimo Mbori. Gu vura Yekova nga Satana ayawee ko nga iraziree, nigbangbatigbangbati Bazogo ainongo ka zoga agu aboro ko akusiyo ya. (Bambata Pai 3:1-6) Badungu aboro aima ida kuti ga Satana pai, kini yugu gupai nga Mbori na nunga te, ko nigbegberẽ ko, watadu i natikango gupai nga Mbori nga Bakusiahe. Kura aboro aima zubo kina boro rimo Mbori nitihe, ki dihe kusayo rogo gayó asasa-fugo Ziazia Kekeapai, na ki mbu mangasunge nani.

Ziazia Kekeapai nayugo gupai nga, Mbori nika dia gi iraira mangaapai re naabaha dũ kusayo. (Yezekere 39:7) Ko nika manga agu apai dũ oni akpinyemuhe na ki di agu akpakarapai oni agbiatironi nani kusayo. Wai ko nika manga agi apai re? Gu ue fugo du rogo ga Yesu kpee yo nafu karagapai.

[Gu kpiahe du ti kpewaraga 7]

“Ga ngbi yé.”

Areme, badungu vunduvunduapai duho aboro pambori ayugoho tipa ga Mbori ngbii watadu Kindo. Ono ga Yesu abawiriki aima ino agu asangbaanebi i aima gumbaha tipa Masiya, nga batasi nga guko Mbori asiako, si adu nga ko nika zoga gu Kindo nika aria gi zegino re. (Yesaya 9:6, 7; Daniere 2:44) Si aziasi rimo Mbori nikusa ga Satana ziree kuyangura na ki bako kusayo na agu aboro dũ namanga gbegberẽ apai wa ko. Ga Mbori Kindo adia avura kusayo, akaza, angbongi, gbiati kpio a. (Atambuahe 46:9; 72:12-16; Yesaya 25:8; 33:24) Ho oni akpara ni tipa ga Mbori Kindo ye, gure nga oni nakpara tipa agu akidohe re mangi nirengo.

[Gu kpiahe du ti kpewaraga 8]

“Ani mángi rogo kpotosende wa mo akpi nyemu he, Wa du he ngbangbaturũ yo.”

Fugo Yesu nayugo gupai nga gupai Mbori akpinyemuhe duwa ka si mangi auru kpotosende wa duhe ngbangbaturũ yo, nga kua Mbori. Gupai Mbori akpinyemuhe namanga ngbangbaturũ yo zanga pirigo, nga gu ba Wiri Mbori asovura rogoho na Satana gbiati agu amaraika nangbe na Satana, ki bayo kusende no. (Yugoti 12:9-12) Gi biata papara ga Yesu kpee re naundo rani a ani moiberã rani gbe tipa gupai nyakipaha gbe, nga pa gupai Mbori akpinyemuhe angianga gu ani akpinyemuhe ya. Gupai Mbori akpinyemuhe ninaaye na bawene apai fu aboro. Zavura gu rengberengbe kumba nangia Yesu, ko aya fu Bako wee: “Ka si du nga wa mi akpi nyemu he ya, ono wa kina mo akpi nyemu he.”—Ruka 22:42.

[Gu kpiahe du ti kpewaraga 8]

“Mo fú gaani riahe furani.”

Yesu ayugu kurapai berewe nga, ani rengbe arengba ka kpara tipa agu ahe du ani na zingoho. Si agberãnga ka kpara fu Mbori tipa agu ahe du ani na zingo rogo raka yo te. Nirengo, pa manga ani he wo natingida rani na gupai nga, kina Yekova sa nga gu boro “nafu unga fu aboro dũ, na onga na ahe dunduko.” (Amokedi 17:25) Ziazia Kekeapai nayugo gupai nga ko nga gu baagude duna nyemuse ko yo du awiri ní ni, na kidu na nyemu ka fu guhe fu awirini zingoho amanga yó. Wakina wene baagude, ka ko mangingo gupai i asanako tipaha nga gu kaa undongo yó ya te.

[Gu kpiahe du ti kpewaraga 8]

“Mo vú rani ti gaani bape.”

Ya mo pai ho si aida oni mangihe fu Mbori? Ya mo oni naida ko vu roni ti ingapai? Badungu aboro aruganga tiyo na gupai nga he kinaho nga ingapai watadu wai gberẽ ingapai te. Ziazia Kekeapai nayugo gupai nga ingapai nga tarã ngbatunga gbegberẽ apai dũ, bambiko si nga gupai naye na kpio fu aboro. Wa i avungu rani na kina ingapai, ani dunduko naingapai ainga dedede, na ani rengbe ka gbia nyenye raka kumbatayo mbiko kina gu mbupai nga ga Mbori. (ARomo 3:23; 5:12; 6:23) Si nipa ngbarago ka ino gupai Ziazia Kekeapai apehe niyaa: “Ako Gbia, bambiko mo du ni wene ro, ki du zaza tipa vu aboro.”—Atambuahe 86:5.

[Gu kpiahe du ti kpewaraga 8]

“Mo túka rani ti gbegberẽpai.”

Ya mo oni ini wai si aida oni idi ga Mbori bandahe niipiipihe? Badungu aboro aidanga kuti gupai nga boro kinaho nga Satana naye na “gbegberẽpai” te. Ono Yesu ayugu gupai nga, Satana nga kina boro ndikidi boro na ki yambu ko nga “gbia gi zegino re.” (Yoane 12:31; 16:11) Satana aima gbarasa gi zegino du kutiibeko re, na ko naida ka gberesa roni tipa ka oni sonosinga dawedawe pagume dagbaroni na Baroni nga Yekova ya. (1 Petero 5:8) Ono tie, Yekova duna bakere ome kisusi Satana, na ko na nyemu ka banda agu aboro nakpinyemuko.