Oni Bandatironi Be Nangahe

“Oni bánda tironi, gu boro ka gbarasa roni na . . . kungba nangahe.”—AKOROSAIO 2:8.

1-3. (a) Gini kpiapai nayugo gupai nga, nangahe ima rimo kurogo gu sino raka du awere na mbedi ambeda kadu nga, rogo apapara gu sino raka re naabaha dunduko? (b) Tipagine si aidanga ti ni gu nangahe du rogo zegino iriwo tirani ya?

“BANGE agu aboro wai ninaaye fuo roni nga aguyo ninaapenga zire fu roni ya?” Bete agarã susi kusayo, bakere bayugupai nga ga ndiko ko amangi wisigopai ka dungura apangbangaa nisana ko gu sanahe du kuari re. Gine nangia gu karagapai ko agbiaha? Ko nasakarogoyo niyaa: “Dagba agu akutu abainiparugute mi asasana yo, mi agbia guni gbua kina sa i apenga ziree funi ya.” Gine nangia nduhe? “Gu bainiparugute re adu gbua ti tonatona gako sunge rogo bakere basunge, sidu ka aboro atatonanga kaa ye fuo ko ya.” Gi pangbangaa re, nayugopa gu kerepai namanga. Peziree gbiati birika aboro ima rengba rogo arago dunduko rogo zegino areme.

² Nangahe na dungu angbatungaha ti ni na si mbedi ka rimo kurogo gu sino raka du awere naabaha dunduko. Agu atingidapai du rogo aũgbandaka apangbangaa hi be kpiaapai tipaha; aboro birĩ zogarago nape ziree tipa agu apai i amangaha, agu ababanda-marã nga ga ariigbu yo gbiati abainiparugute nagumba aziree tipa gu mokiisa agu ariigbu re nagbiaha, agu aboro natakapande agu ahe i ababagaha naingisa agu aboro nangbeka ahe beyo, agu aboro nakusa ngbangaa nabirika kuti aboro gu basunge-igo-marã nga gu nangerafuo boro ti regbo kerepai. Agi apai re gbua nga bete agu apai namanga. Fuo gure, nangahe gu duho nga ga pambori. Abarumbatayo rogo pambori nananga aboro niyugo yo iraira apai fuyo, ngbatunga gu du wa mbisimo ni guhe zanga kpio, ya ba kina ti ni nga we-iferno, na gu nga Mbori nga Tirinita.—2 Timoteo 4:3, 4.

³ Ya mo si naida pa agi anangahe re iriwo tirani? Nirengo si wo te. Nibipa ‘yangara areme,’ Ziazia Kekeapai naruga rani niyaa: “Gbegbere aboro agbérã ki susi na airanangahe a, ki ninangi aboro, aboro ki ninangi yo a.” (2 Timoteo 3:1, 13) Wa du ani ni aKristano, si naida ani naangera angera tipa ka kparia agu aberã rengbe ka ingisa rani kusayo ti rengo. Asanahe ue nakura: Tipagine moi nangahe pai ti ni rogo agi a’uru re, na wai rengbe ani ka bandatirani be nanga aboro rani?

Tipagine Du Bakere Nangahe ti ni Areme?

4. Wai Ziazia Kekeapai asakarogo ndu gupai nangahe namoipai ti ni areme rogo zegino?

⁴ Ziazia Kekeapai naringbisa ndu gupai ziazia nangahe namoipai ti ni rogo gi zegino re. Gu mokedi nangia Yoane akepai ya “zegino dunduko du ni zogozogo ho be gbegberẽ ko.” (1 Yoane 5:19) Gu ‘gbegbere boro’ re nga Satana Bakitingbanga. Yesu aya tipa ko wee: “Ko anye nga na rengo te, bambiko rengo adu nga tiko te. Ho ko nagumba zire ni, ko nagumba ha agumba ni tiko; bambiko irazire nga ko, nga baha.” Fuo duhe tie were, ya mo si nairiwo tirani ka bi gupai nga, gi zegino re nayugo kpia agu asino, kpia agu apai, gbiati agu asino nanga aboro nga ga gaha bazogo?—Yoane 8:44; 14:30; AEfeso 2:1-3.

5. Wai Satana nanyakasi gako asadatise nga ga nanga aboro rogo gi yangara arame re, na ada gbe nga gako sásá?

⁵ Rogo gi yangara areme re, Satana ima kiiso gako asadatise. I aima ba ko ku auru kpotosende. Ko ima ino gupai nga, gu yangara regbo nye fuko, si nikina wiri guruhe gbua, sidu, ko na “bakere zinga.” Na mbiko wa ko naima diaberã ka imo badungu aboro gbe a wa rengbe ome ko nani, ko ‘nananga aboro auru kpotosende dunduko.’ (Yugoti 12:9, 12) Anga Satana nga gu boro nananga aboro ti kina kura aregbo gbua sa te. Kuba gure, ko anyomoronga ti gako bakere asadatise ka ingisa ngbatunga aboro te.a Ko namangasunge na agu agene nangahe dunduko du beko, nga gu nakoda nanga aboro gbiati manga yo i naasamungu kuti akurayo, tipa ka kiso berã yo tipa ka banda yo kusayo ti Mbori. (2 AKorindo 4:4) Gi bangbasia banangi aboro re, ima mbakada tiko wenengai ka imo agu aboro nairiso Mbori “ni toro na rengo.” (Yoane 4:24; 1 Petero 5:8) Ka bangironi ya gonga ti gupai nga, Satana aima gumbaha nirengo nga: ‘Mi rengbe arengba ka aria aboro dunduko kusayo ti Mbori’ ya. (Eyobo 1:9-12) Ani wisiginga bete ga Satana ‘abirĩ nangahe’ na ki bi wai rengbe ani ka bandatirani ti ni.—AEfeso 6:11.

Oni Bandatironi be gu Nangahe Nga ga Abasamungu Kuti Ndikidi Pambori

6, 7. (a) Ginipai rengbe abasamungu kuti ndikidi pambori ka gumbaha ya si i amangaha? (b) Wai Ziazia Kekeapai ayugo gupai ziazia abasamungu kuti ndikidi pambori aida ka mangaha?

⁶ Satana aima digo nimangisunge na abasamungu kuti ndikidi pambori rogo gako asadatise ka zomia ga Mbori amoyambu. (Matayo 13:36-39) Abasamungu kuti ndikidi pambori rengbe ka ya i nairiso Yekova airiso na kini idi aida kuti sangba Ziazia Kekeapai, ono i naká ka ra kutiibe gu gako riigbu aboro abihe abi. Beteyo nakaraga tiyo sa gu iraira yugopai tipa Mbori nga ga ‘Bakere Babera,’ nga ngbii zire pambori. (Yugoti 17:5; 2 Petero 2:19-22) Mbiko gu tingidapai naye be ga Mbori toro, abakeke Ziazia Kekeapai amangisunge na nyanyaki afugo ka kusa ndu gu mangaapai nga ga abasamungu kuti ndikidi pambori gbiati agu agene i amangapai rogoho.

⁷ Ginipai abasamungu kuti ndikidi pambori aida ka mangaha? Anga dunguyo na kina nyemu ka mbu gu pambori i adu mbata rogoho sa te, ono i naida ka manga kura apai. Dedede, i naida ka dia kura aboro na yo. Kuba gupai nga i ndu ka sa kura aboro nigayo abawiriki, dungu agi abasamungu kuti ndikidi pambori re nagbata agene ka “gbefa [kina agu] abawiriki [nga ga Kristo yo] fuo yo.” (Amokedi 20:29, 30) Tipa boro banda tini ti agu abayugupai nga airaziree re, gu mokedi nangia Pauro afu agi arugute naye re fu akurako aKristano tipa i mangipai tipaha niipo, niyaa: “Oni bánda tironi, gu boro ka gbarasa roni.” (AKorosaio 2:8) Anga gu fugo re naringbisapa gupai dungu abasamungu kuti ndikidi pambori a’asadatiyo ka mangaha tee? Wa kina gu batuka natuka boro dagba gani aborokporo, nga gu boro amaanga berã ni kuti agu abirĩ nga ga batuka ya, kinawo abasamungu kuti ndikidi pambori amangaha ho i andu ni fuo agu aboro du rogo dungurati nakido kutiyo, kini gbata gene ka gbe yo kusayo dagba rimbasa avusende.

8. Gini agene abasamungu kuti ndikidi pambori amangapai ngbaha ka da ti gayo asásá?

⁸ Gini agene abasamungu kuti ndikidi pambori amangasunge ngbaha ka da ti gayo sásá? Dedede, gupai i amangaha nga ka irasi afugo, ka gumba agu apai duna bete rengo rogoho, na ka gumba kina ku aziree naabaha. Yesu aima ino gupai nga, apefuo ko arungo arungo be agu aboro ‘nika gumba dungu gbegbereapai kutiyo.’ (Matayo 5:11) Si adu nga, ngbatunga gu kere aboro sogote re nika gumba agu apai angianga rengo ya tipa ka nanga kura aboro. Gu mokedi nangia Petero afu rugute ya aboro banda tiyo ti abasamungu kuti ndikidi pambori, nga agu aboro nika gumba ‘iraira afugo’ na kini gbandaka ‘gu yugopai nga ga biriki’ na kini ‘aria sangba Ziazia Kekeapai’ kuti agu apai i akpinyemuhe. (2 Petero 2:3, 13; 3:16) Si nafu kina gberarago nga, abasamungu kuti ndikidi pambori aima duna diabese rogo ‘gbarasapa gu idapase nga ga kura aboro.’—2 Timoteo 2:18.

9, 10. (a) Wai rengbe ani ka bandatirani tipa ka abasamungu kuti ndikidi pambori ananganga rani ya? (b) Tipagine rago agberanga ti ni tirani ka si aida gupai nga, ani aria gaani aberã nibipa ga Mbori aringbisapai ya?

⁹ Wai rengbe ani ka bandatirani tipa ka abasamungu kuti ndikidi pambori aingisanga rani ya? Ni irisa ani agu arugute du rogo Fugo Mbori, nga gu nayaa: “Oni bí agu . . . [aboro duna] kparaka dagba roni na [du] nzingiri kota mbiko yo, [du gayo yugopai] akia ti gu yugopai oni awiriki; oni kpára [tironi kusayo] ti yo.” (ARomo 16:17) Ani ‘nakpara tirani tiyo’ nisoga ani gayo aberã, niká ani ka degaturani kina boro kuti fugoyo, ka ká agu apai i akekaha, watadu gu i akekaha rogo Internet. Tipagine ani adiaberã ti ni ka mangapai wa ngbatunga gure? Bambatapai nga, mbiko Fugo Mbori naruga rani ani mangihe wo, na ani na gu kido nga, Yekova naida kina weneapai naamanga fu rani ti aregbo dunduko.—Yesaya 48:17, 18.

¹⁰ Uepai nga, ani na nyemu gu riigbu tirani nayugu gu nyanyakipa rengo fu rani nga gu kpara rani kusayo ti Bakere Babera. Ti kina gu bangisa regbo re, ani ima rugatirani na gupai nga, gu gaani inohe du tipa ga Mbori ringbisapai, si nikina kpakpaha; wo ani naa’aria gaani aberã vuru agu agarã susi. Ruru aKristano ima ida ka pido Yekova tipa ko ziasi ngbatunga agu apai re fuyo. (Asanza 4:18) Wa du rago tie re, ani agindigonga gu riigbu du Mbori na nyemu ka mangasunge nani te, mbiko ani ima bi ziazia go gako maku kuriihe nga gu adunga ba tikangoho ti ni ya.—Amokedi 6:7; 1 AKorindo 3:6.

Oni Bandatironi ti gu Gbina Nga ga Nangatise

11. Tipagine du kpakpa aboro ti ni na nyemu ka nanga tiyo nisayo?

¹¹ Kpakpa aboro na gu nyemupai tiyo Satana aipiso tiko ka mangasunge nani, nga nangatise. Yeremaya 17:9 nayaa: “Kpotoboro yo nangi ahe ki susi ahe dunduko, si na kere kaza?” Na Yakoba akepai ki yaa: “Boro [ni]du ni asadiasadi ni, ho gu nyemuhe ata gbe ni ni nga ga borose ku sa yo, ki ninangi ni.” (Yakoba 1:14) Ka pai zomia rani ngbaduraniyo, si rengbe nirengo ka sa ingapai si du bangirani niwenepai, kini saha si ngba bangirani na ni gupai ka imisanga rani ya. Ngbatunga gu bipai re nga nangahe, mbiko mbu boro pa tini fu ingapai nandu na ni niyangaraha sa gbarasa pani.—ARomo 8:6.

12. Rogo gini agene rengbe ani ka zio ti gu gbina nga nangatise?

¹² Nangatise rengbe taata ka zio rani wa gbina. Gu ngbaduseyo nga ga nangahe rengbe ka sa gbegbere sino si du niruru mangaapai watadu ka sa boro ni naarugusa pa gu kere ingapai mangi ni he ya ingapai ngaha te. (1 Samuere 15:13-15, 20, 21) Gu ngbaduraniyo du nikerehe rengbe a ka gbata agene ka rugusapa gu mangaapai bangirani aboro akapa akapa kuti ni. Ani dinga gupai du tipa ngi ambaro nikpiapai. Kura ambaro niwenehe na rengbe boro arengba ka gbia ngbarago behe. Ono tie, bakere agu apai du rogo gi zegino re, rogo agu ambakadapai nga ga asinima na ga aterevizioni na gu du rogo Internet, si nigbegberehe na niwasiwasihe. Si taata fu rani ani rugusi gupai bangirani nga, ani rengbe arengba kaa biko gbegbere mangimangiapai ka gbegberepai amanganga rani ya. Gu kura bete aboro naberã niyaa, “Si afudanga re rogo gimi sangbakpotoyo te, sidu, gini gbegberepai du ti ni?” Ono tie, ngbatunga agu aboro re ‘nananga tiyo ananga na kungbo aberã.’—Yakoba 1:22.

13, 14. (a) Gini kpiapai du rogo Ziazia Kekeapai nayugo gupai nga, gaani sangbakpotoyo arengbanga kadu ti aregbo dunduko niwene ũyugo gene fu rani te? (b) Wai rengbe ani ka bandatirani ti gu gbina nga ga nangatise?

¹³ Wai rengbe ani ka bandatirani ti gu gbina nga ga nangatise? Bambatapai nga, si naida ani tingidi gupai nga, gu sangbakpotoyo nga ga aboro ni gupai rengbe ani kaa kido kuti ni ti aregbo dunduko te. Ani makianga gupai nadu tipa gu mokedi nangia Pauro. Mbata fu ko sa tiko ni Kristano, ko arungosi apefuo Kristo. (Amokedi 9:1, 2) Si rengbe kadu nga gako sangbakpotoyo afudanga ko ti gu regbo re te. Ono tie, si ziazia nga, gako sangbakpotoyo aamanganga sunge wenengai te. Ko ayaa: ‘Mi amangi agi apai re nizanga rugatinapai na nizanga idapase.’ (1 Timoteo 1:13) Sidu, gu kungbopai gbua nga gaani sangbakpotoyo afudanga rani tipa kura mbaro te, si nitihe ayugonga gupai nga, ani nandu ngba ruru gene te. Kina gu sangbakpotoyo sa raba yo ho kuti Fugo Mbori rengbe kangia guhe nayugo gene fu rani wenengai.

¹⁴ Ka ani aidanga ka zio ti gu gbina nga ga nangatise ya, wene aberã gu duho fuku yo ho si aida ani moihe ku berã rani yo. Oni ta kparakpee kini wisigi tironi. (Atambuahe 26:2; 2 AKorindo 13:5) Wene wisigotise rengbe ka zaka bangironi sa gupai si aida oni aria gaoni bipai rogoho watadu gaoni agene mangaapai. Oni degeturoni kuti kura aboro. (Yakoba 1:19) Wa duhe nga, pa wisigo ani tirani nisarani nika ngbe dedede na kina agu apai ngba tirani, si nipatatamana ani degeturani kuti agu afugo nga ga agu aKristano ima nyaka nga agu afugo yo du niruruhe. Ka oni bi gupai nga, oni namanga agu adiaberã arunga paha bangiri agu akuaroni nga aidipase ima nyaka ya, watadu agu apai oni amangaha rukunga paha bangiriyo te, oni rengbe ka sana tironi tie ki ya, ‘Ya mo nduhe rengbe kadu nga mi azanga raba gimi sangbakpotoyo wenengai watadu ngbadureyo du nananga re ananga tee?’ Oni naariga tironi dedede na Ziazia Kekeapai gbiati agu abuku du mburuhe rii Ziazia Kekeapai. (Atambuahe 1:2) Pa manga oni he wo nika undo roni oni banda gaoni aberã si du na ngbanya kuti gu ga Mbori arugute adunga ngburungburu ya.

Ani Bandatirani be ga Satana Aziree

15, 16. (a) Rogo ga Satana asadatise ka nanga rani, gini aziree ko agumbaha? (b) Wai rengbe ani ka neka nanga rani na ngbatunga agu aziree re?

¹⁵ Satana namangasunge na dungu aziree rogo gako asadatise ka nanga rani. Ko na’asada tiko ka sa rani ani idi kuti gupai zanga kapa nga, padu boro na aũzegino beni naye na ngbarago funi, ono tie, gu boro zanga aũzegino, ni du nga gu boro duna ngbarago. (Batungusipai 5:10-12) Ko naida ka sa rani ani idi kuti gupai nga, gi gbegbere zegino re nika nye wa kina gure kindi, wa vura du goapai ho ziazia nga ani naraka rogo ‘yangara arame’ vurũ. (2 Timoteo 3:1-5) Satana nangarasa aboro kuti gu berã nga, wasiwasi gene-raka na imaha ti ni te, zavura gupai nga agu aboro nagbata ngbarago nagbia tiyo agbia na gbegbere asangbanaha dedede vurũ. (AGaratio 6:7) Ginipai rengbe ani ka mangaha ka i ananganga rani na ngbatunga agu aziree re ya?

¹⁶ Oni gbia undo be gu kpiaapai nga ga Ziazia Kekeapai. Ziazia Kekeapai na gu kpiaapai rogoho nga ga zahe nafura tipa agu aboro Satana anangi yo na gako aziree. I angia agu aboro nanakpinyemu aũzegino, agu aboro naaruganga tiyo na pa agu aregbo i aaraka ti ni ya, watadu i afu tiyo sa manga wasiro, i dunduko nagbia gbegbere aimaha. (Matayo 19:16-22; 24:36-42; Ruka 16:14; 1 AKorindo 10:8-11) Oni wirikipai be gu vovo kpiapai mangi ti gi gaani regbo re. Si nipa gberarago nga, ti kura aregbo, bangiri kura aKristano nago ti mangapai niipiipihe na i ki tona ka berã gupai nga, wenepai gu duho nagu riyo, mbu yo ku gene mangasunge yo fu Mbori. I rengbe ka mbu rengo kini mere gene gu raka i ayambaha ya si nga gu raka nga ga ngbarago. Ono tie, ngbatunga agu aboro re naru “rogo zezerenge rago,” mbiko ti kura regbo gizo, i nika rungo arungo be gbegbere sangbana gu gayo mangaapai zanga sinombori. (Atambuahe 73:18, 19) Si fu rani nipatatamana ani wirikipai be gu ingapai nga ga kura aboro.—Asanza 22:3.

17. Tipagine Satana aurugo gu ziree ti ni nga, nyemu rani ti Yekova te na kiinga parani bangiriko a te?

¹⁷ Gu kura ziree gudu kinaho Satana naima mangasunge nani na wene sangbanaha, nga gu ziree nga Yekova akpinga nyemu rani te na kiinga parani bangiriko te. Satana ima dia dungu akutu agarã kaa wisigo kpakpa aboro. Ko ima ino gupai wenengai nga, zerakpotoseyo rengbe arengba ka rungburasi rani. (Asanza 24:10) Sidu, ko naurugo gu ziree nga wee kiinga parani bangiri Mbori te. Ka Satana ‘bafu rani kusande,’ zanga kapa, ani kini mo ka ida kuti gupai nga, Yekova angeranga fuo rani te, sidu ani rengbe kadu niasadiasadi rani ka mbu rengo. (2 AKorindo 4:9) Gure nga kina boro gupai bangbasia Banangi aboro aidaha! Wai tie rengbe ani ka bandatirani be gi ziree naye be Satana re?

18. Wai Ziazia Kekeapai akido rani na pa ga Yekova nyemuse?

¹⁸ Si naida ani nitirani moi gupai ku ngbaduraniyo Ziazia Kekeapai agumbaha tipa ga Mbori nyemuse tipa rani. Fugo Mbori namangasunge na agu afugo nga ga nunga rogo yugo kpiapai ka kido rani na gupai nga, ko nabi rani abi na kini kpinyemu rani wa du ani nibasasa. Yekova namaa gaoni aume amaa kurogo gako “mangu ime,” du rogoyo nga, ko nabi agu aume abi oni auka ra ho oni asota ni ka nye niruru roni, na ko natingidapaha atingida a. (Atambuahe 56:8) Ko ima ino gu regbo ‘oni arungo ngbaduroniyo’ na kidu mbembedii na oni ti agu aregbo re. (Atambuahe 34:18) Ko ima ino gu futufutuapai du tipa roni dunduko, kodihe na bange kina boro “mangerironi . . . dunduko.” (Matayo 10:29-31) Kurii apai dunduko, Mbori “afu bangisa Wiriko” tipa roni. (Yoane 3:16; AGaratio 2:20) Ti kura aregbo, si rengbe kadu fu roni nikpakarakpakaraha ka ida gupai nga, ngbatunga agu averesi re nafura tipa roni nisaroni. Ono tie, si naida ani idi kuti gupai Yekova agumbaha. Ko naida ani idi kuti gupai nga, ko nakpinyemu rani akpi a wa du ani nibasasa angianga nikina badona sa ya.

19, 20. (a) Tipagine duhe ti ni ninyanyakipa pai ani kparia ga Satana azire na ki káha, nga gu ziree nga Yekova akpinga nyemu rani te? (b) Wai gu babiapai ninaata ata arengbe ka undo agu aboro kpotoyo yo azere?

¹⁹ Oni kparia ziree na ki káha. Ka oni ini gupai nga, gupai boro agumbaha re ziree du, oni rengbe arengba ka bandatironi ka ni ananganga roni ya. Sidu, kinawo a duhe tipa Satana, gupai gbua nga Satana naida oni idi kuti gu ziree nga Yekova akpinga nyemu roni te, si nisaha ima rengba kadu ninyanyaki undo fu roni. Nikaragapai kuti kura papara kekepai sa rogo Ngbaõbambu Sinziri, nga gu papara kekepai nafu rugute tipa ga Satana abirĩ, Kristano sa ayaa: “Mi aruganga tire mbata na gupai nga, Satana na’asada ka mangasunge na gimi aberã ka zeresa kpotoreyo te. Pa ino mi gipai re awere nangarasa re mi sovura kuti agi aberã re.”

²⁰ Oni makianga gu pangbangaa namangi fu gu babiapai ninaata ata du rogo ringara Amerika yo pavuruhe ku Sudiyo. Ho ko naabika awirina ni nga aguyo kpotoyo yo azere, ko naasana yo dedede na gu sanahe nga, ‘Oni idi kuti Tirinita?’ Dedede gi boro kpotoniyo azere re nikaragapai ki yaa, ‘Wagusa te,’ mbiko ni ima ino gupai nga, si nga ziree sa dagba ga Satana kura aziree. Gi bakumba ninaata ata re naasana gu ue sanahe fuo gure nga, ‘Oni idi kuti we-iferno ya si kina ti ni?’ Gu karagapai niyee fuo gure berewe ningia, ‘Wagusa te!’ Gi bakumba ninaata ata re niya fuyo fuo gure wee gu kura ga Satana ziree kinaho adunga taata ka kpariaha wa agu akuraha re ya. Ko nigbeberã yo kurogo gu buku nga, Draw Close to Jehovah,b kuti kpewaraga 249, rogo gu 21 genewaraga, nga gu nayugo gu ziree nayaa Yekova akpinga nyemu rani wa du ani nibasasa te. Gi babiapai ninaata ata re natingida gupai nga, fuo undo ko aboro ngba gi gene re, nga agu aboro kpotoyo nazere i ini gi ga Satana ziree re na ki káha, si naaye aye na wene sangbaha.

Oni Bandatironi be Nangahe

21, 22. Tipagine adunga ani ti ni rogo bitimo nibipa agu anangahe nga ga Satana ya, na gine si aida ani diberã ka mangaha?

²¹ Ti gi digido papara yangara arame re, ani namaabangirani nga Satana nikaa ndu andu kumbatayo kindi kaa urugo aziree na anangahe. Ani na tambuahe mbiko Yekova ambunga rani rogo bitimo nibipa ga Satana abirĩ te. Ziazia Kekeapai gbiati agu abuku du mburuhe rii Ziazia Kekeapai nga ga ‘ruru kangara moyambu’ nayugo ga Bakitingbanga abiriki ziazia. (Matayo 24:45) Mbiko wa i naima ruga rani mbata fu regbo, si nasa rani ani ima rogoda aũvura ku berani mbata fu regbo a.—2 AKorindo 2:11.

²² Sidu tie, ani nye kaa bandatirani kindi be agu aberã nga ga abasamungu kuti ndikidi pambori. Ani dinga berã ka ne gu igiigi gbina nga ga nangatise. Na ani kparia ga Satana aziree na ki káha. Nimanga ani he wo, ani kini mo ka banda gaani pagume dagbarani na gu “Mbori nga irarengo,” nga gu boro nasoga nangahe.—Atambuahe 31:5; Asanza 3:32.

[Gu rukutu kekeapai du bandu kpewaraga yo]

• Tipagine nangahe namoipai ti ni areme rogo zegino?

• Wai rengbe ani ka bandatirani be nangahe be abasamungu kuti ndikidi pambori?

• Wai rengbe ani ka bandatirani ti agu apai dunduko rengbe ka ndu na ani sa gu gbina nga ga nangatise?

• Wai rengbe ani ka bandatirani ka Satana nanginga rani na gako aziree ya?

[Asanahe nga ga wisigopai]

[Gu kpiahe du ti kpewaraga 17]

Ka oni nanginga tironi nibipa agu apai du tipa mbaro ya

[Gu kpiahe du ti kpewaraga 18]

Ho oni abandatironi ni ti gu gbina nga ga nangatise, oni ta kparakpee kini wisigi tironi, oni degeturoni kuti fugo kura aboro, na kini rigi tironi dedede na Fugo Mbori