Ka Oni Mbunga Gene Fu Bakitingbanga Ya

“Ka oni ya funga mamu fu Bakitingbanga ya.”—AEFESO 4:27, Byington.

1. Tipagine dungu aboro aakapa akapa ti ni singia Bakitingbanga kinaho ti ni ke?

TIPA gbanga bagizo regbo, dungu aboro aberẽpa Bakitingbanga nigu boro duna gbanga riniyo, na furudifurudi sukutu nduni, ukadi zamba rokoo na kini mangisunge na gu ũrogoda ahe duna sakasaka angbahayo ue tipa ba aboro ingaapai nani kurogo gbigiwi iferno. Ziazia Kekeapai asongodanga gu berã re te. Ono tie, wa vura duhe wo, zanga kapa, ngbatunga gu iraira-aberã re asa gupai nga dungu aboro naakapa akapa singia Bakitingbanga ho ti ni ke watadu kaa berã gupai nga, gu fugo re, i namangasunge nani gbua nibangua arugute tipa gbegberepai.

2. Gini arengo du rogo Ziazia Kekeapai tipa Bakitingbanga?

² Ziazia Kekeapai nafu gu gopai nga binibangirise gbiati gu dezirepai du ziazia nga Bakitingbanga kinaho ti ni. Yesu Kristo abi ko rogo gu ngbii nga ga atoro du ngbangbaturũ yo na ki fura naako a auru kpotosende no. (Eyobo 1:6; Matayo 4:4-11) Wa vura duhe nga Ziazia Kekeapai ayugonga ndikidi rimo gi boro du nitoro re te, i nayamba ko nga Bakitingbanga (du rogoyo nga “Bagumba gbigbita ziree”) bambiko ko agumba gbigbita ziree kuti Mbori. I nayamba ko a nga Satana (du rogoyo nga “Basovura kuti boro”), bambiko ko nigu boro nasovura kuti Yekova. I nafura tipa Satana Bakitingbanga “[ni] bakuru wo,” si nawiraha wo gbe bambiko gupai nga ko amangisunge na woo ka nanga Eva. (Yugoti 12:9; 1 Timoteo 2:14) I iniko a “[ni]gbegbere ko.”—1 Yoane 5:19.a

3. Gini sanahe si aida ani makiaha?

³ Wa du ani niga Yekova amoyambu, ani aidanga kadu wa Satana rogo ngbatunga gene kandara sa te, bambiko ko nga bangbasia vura bangisa ndikidi Mbori. Sidu, ani duwa ka ani irisi gu rugute nga ga gu mokedi nangia Pauro nayaa: “Ka oni ya funga mamu fu Bakitingbanga ya.” (AEfeso 4:27, Byington) Giniapai tie nga agu asino Satana nzunzu, si aidanga ani wiriki mangaha ya?

Ka Oni Wirikinga Mangapai wa ga Kere Bagumba Gbigbita Ziree Ya

4. Wai “gbegbere ko” agumba gbigbita ziree kuti Mbori?

⁴ Si rẽarẽ i yambu “gbegbere ko” na gu rimo nga Bakitingbanga, bambiko ko nga bagumba gbigbita ziree. Gumba gbigbita ziree watadu kitangbaanga boro nga gumba gbegberepai niwia kuti boro tipa ka gbarasa rimoni nani. Mbori arugu Adamu ki ya fuko wee: “Gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bambata Pai 2:17) Adamu aima gumba gipai re fu Eva, ono Bakitingbanga aye rogo woo yo, ki ya furi wee: “Oni akpí nga wa sa te. Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” (Bambata Pai 3:4, 5) Gupai re angia gbigbita ziree ko agumbaha kuti Yekova Mbori!

5. Tipagine si arẽarẽ ti ni tipa Dioturepe di mbusa tipa gumba gbigbita ziree?

⁵ I afu rugute fu aYisaraere ki yaa: “Ka oni nindú nga ku bani na ku bani wa abagbarasirimo dagba gaoni aboro ya.” (Pa Amotumo 19:16) Gu mokedi nangia Yoane afura ti gako regbo tipa gu boro nanaagumba gbigbita ziree ki yaa: “Mi ake pai fu kanisa, ono Dioturepe, nga gu ko nyemu du ni barumbatayo adu ti ko dagba yo yo ko adia nga rani ku gume te. Si du ka mi ye ti ni, mi ki tingidi gu gako apai ko namanga, nigumba pai menemene sa rani ni gbegberẽapai.” (3 Yoane 9, 10) Dioturepe aagumba gbigbita ziree ti rimo Yoane na ki rẽ tipa dia mbusa gako mangaapai. Gini ruru Kristano naida kadu wa Dioturepe na ka wirika mangapai wa Satana, nga kere bagumba gbigbita ziree?

6, 7. Tipagine si aida ti ni ani ne gumba gbigbita ziree kuti kura boro?

⁶ Dedede, i naagbaraga gbigbitaapai niziree gbe tipa ga Yekova amoyambu na kini kitingbaanga yo niwia. “Abairamotumo ki ru ho na abakeapai, ki nikiti ngbanga ko [Yesu] gbe.” (Ruka 23:10) Gu gbiamotumo nangia Anania gbiati kura aboro akitingbaanga Pauro niwia. (Amokedi 24:1-8) Na Ziazia Kekeapai nafura tipa Satana ni “bakitingbanga awirinarani . . . barangba gaani Mbori na uru na yuru.” (Yugoti 12:10) Agu awirinarani i akitangbaanga yo niwia re, i nga gu mbedimbedi aKristano du auru kpotosende rogo gi yangara aʹuru re.

⁷ Anga Kristano ho naida ka gumba gbigbita ziree tipa kura boro watadu ka kitangbaanga aboro niwia te. Ono, wa vura duhe wo, gupai re rengbe arengba ka manga ka ani ainonga arengo mbata dunduko tipa pai ya, ani kini mo kadu nideziree tipa gupai ngaha re kuti boro. Tii ga Mose aNdiko, gupai nangia boro nataino aino kini gumbapai niziree kuti kurani arengbe arengba ka ye na kpio nisangbanaha fu gu boro kitingbaanga kurani re. (Gate 20:16; Pa Fu Rugute ni Ue he 19:15-19) Kurii gure, agu apai Yekova asogotehe nakoda gu “irazire dezire nagumba kina azire.” (Asanza 6:16-19) Nirengo tie, si naida ani ne wirika mangapai wa gu barikaka bagumba gbigbita ziree na barikaka bakitingbaangase niwia re.

Oni Ká agu Agene Nga ga Bambata Baimi-aboro

8. Rogo gini gene Bakitingbanga adu nga ‘baimiaboro ho rago aenge ni’?

⁸ Bakitingbanga nga baimi-aboro. Yesu ayaa: ‘Ko adu ni baimiaboro ho rago aenge ni.’ (Yoane 8:44) Natona ti kina gako bambata mangapai rogo aria ko aAdamu na Eva kusayo ti Mbori, Satana nidu nibaimi-aboro. Ko aye na kpio kurii gu bambata aboro nadu ue re na kurii atitayo. (Rom. 5:12) Oni rengbe ka kparia gupai nga, gi mangapai re, arengbe ka ye sa kina be boro angianga mbiko si angia kungbo bangua arugute nga ga ingapai ya.

9. Wa duhe niyuguyuguhe rogo 1 Yoane 3: 15, wai rengbe ani ka da ni abaimi-aboro?

⁹ Rugute sa dagba agu aRugute Bawe i afuhe fu aYisaraere nayaa: “Ka mo imi nga boro ya.” (Pa Fu Rugute ni Ue he 5:17) Ho gu mokedi nangia Petero akepai ni fu aKristano ko ayaa: “Ka i rungosi nga gu ni dagba roni mbiko pa imoboro ya.” (1 Petero 4:15) Sidu, wa du ani niga Yekova amoyambu, si aidanga ani imi boro te. Ono, wa vura duhe wo, ani rengbe arengba kadu ni aboro-ingaapai barabangiri Mbori ka ani asogote kuarani nga Kristano kini kpinyemu gupai nga ni kpi. Gu mokedi nangia Yoane akepai ki yaa: “Gu ni ka asoga wirinani ni nga imiboro. Oni ki ini ya a nga imiboro sa ka nyenye unga nye rogo ni yo te.” (1 Yoane 3:15) Mbori azinahe fu aYisaraere ki yaa: “Ka oni nisógo nga wirinaroni ku kpotoroni yo ya.” (Pa Amotumo 19:17) Ani asadinga tirani niipo ka mbakada gu kpakarapai tona dagbarani na kuarani nga idipase, tipa ka gu baimi-aboro nga Satana agbarasanga gaani kpamiatise nga ga aKristano ya.—Ruka 17:3, 4.

Oni Ru Ngutete ka Sovura Kuti Bangbasia Bagumba Ziree

10, 11. Ginipai ka ani mangihe tipa ka ru ngutete rogo sovura kuti bangbasia bagumba ziree nga Satana?

¹⁰ Bakitingbanga nga iraziree. Yesu ayaa: “Ho ko nagumba zire ni, ko nagumba ha agumba ni tiko; bambiko irazire nga ko, nga baha.” (Yoane 8:44) Satana agumba ziree fu Eva, ono Yesu aye tigako ku zegino kadu nidezire rengo. (Yoane 18:37) Kangia ani nika ru ngutete ni apefuo Kristo rogo sovura kuti Bakitingbanga, si aidanga ani naagumba ziree na kini mangi biriki te. Ani duwa ka ani ‘aagúmba kina rengo.’ (Zekaraya 8:16; AEfeso 4:25) ‘Yekova nga Mbori ni irarengo,’ ko nafu maku sa fu kina gu gako aDezire nga aperengo. Gbegbere aboro na rengo beyo ka rukuba ko te.—Atambuahe 31:5; 50:16; Yesaya 43:10.

¹¹ Kangia ani nabi gaani ranirii rogo toroyo be ga Satana aziree na nyanyakipaha, ani akaaka kuti ga aKristano pambori kpitori, nga “gene rengo.” (2 Petero 2:2; Yoane 8:32) Gu yugoapai naabaha dunduko nga ga aKristano, si nga “gu rengo nga ga wene pangbanga.” (AGaratio 2:5, 14) Pa kina boro gaani bata naruriipa ‘ta ani rogo rengo yo,’ na kini kakuti ni na kini ru ngutete rogo sovura kuti “irazire . . . nga baha.”—3 Yoane 3, 4, 8.

Oni Sovura Kuti Barikaka Basamungu Kuti Ndikidi Pambori

12, 13. Wai si aida ani mangi fu abasamungu kuti ndikidi pambori?

¹² Gu boro nitoro nada ni Bakitingbanga adumbata kina rogo rengo yo. Ono Yesu ayaa, “ko anye nga na rengo te, bambiko rengo adu nga tiko te.” (Yoane 8:44) Gi barikaka basamungu kuti ndikidi pambori re amangi kakaka asadatise rogo sovura kuti ‘Mbori nga irarengo.’ Bete agu aKristano nadu rogo bambata sa kama agarã ati kurogo “ga Bakitingbanga gbina,” na si nawiraha nga, i ada nigako akanga bambiko ko aingisi yo i ki kpangbara ti rengo kusayo. Sidu, Pauro anyakasi gu gako badiasunge nangia Timoteo ya ko yugupai fuyo rogo zezeredi sino tipa wa ka i hu rogo toroyo na ki kusi goyo rogo ga Satana gbina yo. (2 Timoteo 2:23-26) Rengo ngaha nga, wenepai ngaha gbe nga boro kakuti rengo totoroto, na ki zanga zio rogo gu biapai nga ga abasamungu kuti ndikidi pambori.

¹³ Bambiko giasangba Bakitingbanga na zanga ká gako aziree, gu bambata aboro i akusiyo ue, asamungu kuti ndikidi Mbori. Wa duhe tie were, ya mo ruhe aru fu rani ani nidegeturani kuti abasamungu kuti ndikidi pambori, kini gedi gayo abuku, watadu kini weteke gayo bangiri aba nga ga Internet? Ka si du nga ani nakpinyemu Mbori gbiati rengo, ani amanganga ha wo te. Si aidanga ani mbu abasamungu kuti ndikidi pambori i rimi kurogo gaani akporo te watadu zavura ani poikuti yo a te, bambiko ngbatunga gu mangaapai re rengbe ka sa rani ani ‘ngbe naayo rogo gayo gbegbereapai.’ (2 Yoane 9-11, NW) Ka ani ya zerenga fu ga Bakitingbanga abirĩ nimbu ani gu ga aKristano “gene nga ga rengo” ka pekafuo zire abayugupai nga aguyo naida ka ‘tona yugo gbegbere aida nga ga birĩ nga ga aboro’ na kini asadi ka ‘nanga rani na wene mbakadimbakadi afugo birĩ’ ya.—2 Petero 2:1-3, Byington.

14, 15. Gini rugute Pauro afuhe fu agu abaakumba nadu Efeso yo na fu gako badiasunge nangia Timoteo?

¹⁴ Pauro aya fu agu aKristano nangia abaakumba rogo dungurati Efeso yo wee: “Oni bánda tironi na agu akandoro, Ziazia Toro asa roni ni ababandara, oni rígi ga Mbori kanisa nga gu ko angbe ni kureko [“ni kure kina boro Wiriko,” NW]. Mi ini ya fuo ga mi gbegberẽ awaru aríma ku dagba roni yo, ami ahe nga akandoro te. Akumba agúari dagba roni tigaoni a, ki nigumba irairaapai, ka gbefa abawiriki fuo yo.” (Amokedi 20:28-30) Niyangaraha, ngbatunga agu abasamungu kuti ndikidi pambori re aguari “ki nigumba irairaapai.”

¹⁵ Bara rogo gu garã nangia 65 F.B.K., gu mokedi nangia Pauro anyakasi Timoteo ko ‘niyugu ga rengo pai nzunzu.’ Pauro akepai ki yaa: “Ono mo né kungba fura bau; bambiko si andu ki susi sa zangasinombori. Pa agu aboro re arita he wa kere oro. Umenaio na Fireto du dagba yo; nga agu akumba naingi ti rengo, niya zingabekpio aima susa, ki niba ga agu yo idapase ku sa yo.” Gere nangia tonatona samungu kuti ndikidi pambori! Pauro akodi gupai kuti ni nga: “Ono gu nyanyaki mburupai nga ga Mbori naru kindi.”—2 Timoteo 2:15-19.

16. Zanga bipa agu abiriki nga ga bangbasia abasamungu kuti ndikidi pambori, tipagine du ani ti ni niruru rani fu Mbori na kuti Fugoko?

¹⁶ Satana aima digo nimangisunge na abasamungu kuti ndikidi pambori rogo asadatise ka gbarasapa ndikidi irisombori, ono zanga duna diabese. Natona bara ti gu garã nangia 1868, Charles Taze Russell atona wisigo gu kuru yugoapai nga ga pambori sirisiri aboro aima ida kuti ni tipa gbanga regbo, nga ga agu akanisa i aya tipaha wee si nga ga aKristano, na ko ki bi dungu iraira asakarogo sangba Ziazia Kekeapai rogoho. Russell na kura bete aboro nga aguyo naagbata rengo asigira riko nga ga wisigo Ziazia Kekeapai rogo gu gbata nga Pittsburgh, du Pennsylvania yo, Amerika yo. Vuru agu agarã du mbembedii wa 140 susi fuo gu regbo re, ga Yekova amoyambu asono rogo inohe gbiati nyemuse tipa Mbori na tipa Fugoko. Zanga bipa agu abiriki duho nga ga bangbasia abasamungu kuti ndikidi pambori, gu rubangirise rogo toroyo nga ga gu riko nga ga ruru kangara moyambu aima undo gi ndikidi aKristano re i nye niruru yo fu Yekova na kuti Fugoko.—Matayo 24:45.

Ka Oni ya Mbunga gu Bazogo Nga ga Zegino Ko Duna Ome Maapai Kurii Roni Ya

17-19. Gine nga gu zegino du kutiibe ga Bakitingbanga ome, na tipagine si aidanga ti ni ani naakpinyemuhe ya?

¹⁷ Gu kura gene Satana agbataha tipa ka zio rani ngbaha nga nisõa rani ani kpinyemu gi zegino re, nga gu iraira riko nga ga agu aboro kparatiyo kusayo ti Mbori. Yesu ayambu Bakitingbanga nga “[ba]kindo zegino” na ki yaa: ‘Ko na tandu ku auru re te.’ (Yoane 14:30) Ka Satana ya dunga na ome kurii rani ya! Rengo ngaha, ani ima ino gupai nga “zegino dunduko du ni zogozogo ho be gbegberẽ ko.” (1 Yoane 5:19) Si du Bakitingbanga arengbe arengba ti ni ka pepa fu “angbi [akindo] . . . zegino dunduko” fu Yesu tipa manga irisombori bara sa nga ga samungu kuti ndikidi pambori, nga gupai Wiri Mbori akáha yososo. (Matayo 4:8-10) Gu zegino du tiibe ga Satana zogarago, si nasoga apefuo Kristo asoga. (Yoane 15:18-21) Si airiwonga te, si du gu mokedi nangia Yoane aza rani ti ni ya ka ani kpinga nyemu zegino ya!

¹⁸ Yoane akepai ki yaa: “Ka nyemu zegino du nga ti roni ya, na agu ahe du zegino. Ka nyemu zegino du ti boro, ga Mbori nga Ba nyemuse du nga ti ni te. Agu ahe dunduko du zegino, gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga, adu nga ni ga Mbori nga Ba ya, du ni kina ga zegino. Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni [a]nye anye kindi.” (1 Yoane 2:15-17) Si aidanga ani kpinyemu zegino te, bambiko gaha gene raka nangba ti gu borose nga ga ingapai na si naabaha dũ nasovura kuti ga Yekova andiko.

¹⁹ Ginipai ka ani mangihe ka si du nga nyemu gi zegino re gudu ngbaduraniyo? Fuo duhe tie wa gure, si naida ani fu kpee fu Mbori tipa gako undo tipa ka diabe gi nyemupai re gbiati gu nyemu ahe nga ga borose du nikodikodihe nani. (AGaratio 5:16-21) Nirengo, ani amanga nyanyaki asadatise amanga ka bandatirani “be zegino, ka birikoho adu nga [tirani] ya” ka ani moi gupai ku berã rani yo nga, “atoro nga ga gbegberepai yo,” nga agu ‘abazogo nga ga zegino’ yo, i du kurii gu iraira riko nga ga aboro.—Yakoba 1:27; AEfeso 6:11, 12; 2 AKorindo 4:4.

20. Wai rengbe yo ka ya tipa rani wee “aboro zegino nga [ani] te?”

²⁰ Nibipa gako abawiriki, Yesu ayaa: “Aboro zegino nga yo te, wa kina re adu nga ni boro zegino ya.” (Yoane 17:16) Mbedimbedi aKristano gbiati agu abadiangbayo naima kpara gayo raka fu Mbori, i namanga nyanyaki asadatise kadu gigirii rogo mangapai yo na rogo toroyo, na ki kparatiyo kusayo ti gi zegino re. (Yoane 15:19; 17:14; Yakoba 4:4) Gi zegino nga ga iraira mangapai re nasoga rani bambiko ani nakpara tirani ti ni na kidu ‘ni abatungusipa ruru mangapai.’ (2 Petero 2:5) Rengo ngaha, ani naraka rogo gu riko nga ga aboro, nga gu nakoda airameteka, irabäri, airasokpekpe, airisikpiaahe, airadĩ, airaziree, na akpibuda. (1 AKorindo 5:9-11; 6:9-11; Yugoti 21:8) Ono ani adianga ‘gu toro nga ga zegino’ te, bambiko ani tii gi ome nafõ aboro sa manga ingapai re te.—1 AKorindo 2:12.

Ka Oni Mbunga Gene fu Bakitingbanga Ya

21, 22. Wai rengbe oni ka mangasunge na gu ga Pauro arugute du nikekehe rogo AEfeso 4:26, 27?

²¹ Kuba gupai nga ‘gu toro nga ga zegino’ fõngbaduraniyo sa mangapai, ga Mbori toro nangbembatayo fu rani, nga gu nakusa ngbatunga agu asino rogo rani yo nga nyemuse na rugatise. (AGaratio 5:22, 23) Agi apai re naundo rani ani sovura naa diabese kuti ga Bakitingbanga zubohe kuti gaani ida. Ko naida ani ‘zingi gbua ka manga kina gbigbitapai,’ ono ga Mbori toro naundo rani ani “mbu pa zinga, ki he erã!” (Atambuahe 37:8) Rengo ngaha, ani rengbe arengba kadu na rengo berani ka zinga, ono fugo Pauro naruga rani niyaa: “Oni zingi, ka oni ingi nga ya; ka uru ti nga gaoni zinga ya. Ka oni mbákadi nga gene fu bakitingbanga ya.”—AEfeso 4:26, 27.

²² Sangbana gaani zinga rengbe kadu nga ingapai ka ani nye kindi na zinga. Padu ani na gi sino berã re rengbe ka fu mamu fu Bakitingbanga ko gbaragi zanga giatise rogo dungurati watadu ko zingisi kpotoraniyo ani tona manga gbegbereapai. Sidu, si naida ani mbakadi azanga giatise niipo dagbarani na akuarani rogo gu gene Mbori aida nani. (Pa Amotumo 19:17, 18; Matayo 5:23, 24; 18:15, 16) Sidu tie, ani mbunga ga Mbori toro si naayugo gene fu rani, ani kidu na zatise na ki zanga mbugene fu ruru zinga si gbere ka dati vura, na ti nyemu manga gbegberẽpai fu akurase, na sogote.

23. Gini asanahe ani ka makiaha rogo gu papara kekepai naye fuo gere?

²³ Ani ima wisigo kura asino nga ga Bakitingbanga nga gu si aidanga ani wiriki mangaha ya. Ono gu kura abagedi gipai re rengbe kaa baka kina bangiriyo nga: Ya mo si naida ani gunde be Satana? Tipagine ko azingisa arungosi ti ni kuti aKristano? Na wai rengbe ani ka ne gupai nga Satana duna diabese kurii rani?

[Gu rukutu kekeapai du bandu kpewaraga yo]

Gine Nga Gaoni Karagapai?

• Tipagine si aidanga ani gumba gbigbita ziree ti ni tipa boro ya?

• Niirisa ani sangba 1 Yoane 3:15, wai rengbe ani ka ne du ni aimi-aboro?

• Wai si aida ani bi samungu kuti ndikidi pambori, na tipagine?

• Tipagine si aidanga ti ni ani kpinyemu zegino ya?

[Gu kpiahe du ti kpewaraga 5]

Ani ambunga Bakitingbanga wagusa ko gbarasipa gaani kpamiatise nga ga aKristano te

[Gu kpiahe du ti kpewaraga 7]

Tipagine fugo Yoane azomia rani ti ni ya ka ani kpinga nyemu zegino ya?