Ya Mo Oni Adegaturoni Sa Ga Yekova Azahe?

“Gene du re, oni ndú ngba ha.”​—YES. 30:21.

1, 2. Ginipai Satana nadiberã ka mangaha, na wai Fugo Mbori aundo rani?

KA SI du nga guhe duayo ho pangba gene tipa si naayugo gene si yangbaha kurogo gu ba adunga gene rogoho ya, si rengbe ka ingisa boro na ki ba ní kurogo kerepai. Ka oni aida ka ndu ngba gu gene re bakurearoni kini gumba gupai furoni nga kura gbegberẽ sino boro aima aria ngba guhe nayugo gene re tipa kaa ingisa aboro, ya oni ginga sangbani te?

² Zanga kapa, Satana nga gu gbegberẽ sino boro naima diaberã tipa ka ingisa rani. (Yugo. 12:9) Gu gbegbere apai dunduko ani afura tipaha rogo gu kekeapai nasusi, Satana namangasunge nani tipa ka sarani ani mbu gu gene nandu sa nyenye unga. (Mt. 7:13, 14) Ono tie, ani na bakere ngbarago mbiko gaani bawene sino Mbori naza rani ti pekafuo gu ga Satana apai nga gu rengbe ka ingisa rani. Ani furanga awere berewe tipa gu kura apai biata nga gu Satana amangasunge nani tipa ka ingisa rani. Wa ani kaa wisigo wai Fugo Mbori aundo rani tipa ka ani inginga ya, si nikadu wa ka i ya Yekova naye giirani yo kini yugu gu gene furani du niruruhe, niyaa: “Gene du re, oni ndú ngba ha.” (Yes. 30:21) Berãkuriipa ga Yekova azahe nika nyakasa gaani diaberã ka kakutini.

Ka Oni Pekenga Fuo “Zire Abayugupai” Ya

3, 4. (a) Wai du zire abayugupai wakina ugudi guga? (b) Wari zire abayugupai akura ni, na ginipai i aidaha?

³ Oni berẽnga patironi oni nindu nunguro rogo ngatari rago. Oni kiyaa ngere, oni ki bi guga kumbatayo, oni ki tona ka dusio ho na gu maabangirise nga oni nika gbia ime yo ka mbiraha. Ono fuo da oni patini, oni ki bi gupai nga si aima uga bakuruyo. Rago gberẽ tironi nikerehe! Zire abayugupai wakina gu guga re. Agu aboro dunduko nandu fuoyo tipa gu ime nga ga rengo, rago nika gberã tiyo nikerehe. Yekova amangisunge na agu amokedi nangia Pauro gbiati Petero tipa ka za rani ti zire abayugupai. (Oni gedi Amokedi 20:29, 30; 2 Petero 2:1-3.) Ada nga gi zire abayugupai re? Afugo agi amokedi du ue re naundo rani ani ini wari agi abayugupai re akura ni na wai i ananga aboro.

⁴ Pauro akepai fu agu abaakumba nadu rogo gu dungurati nangia ga Efesa ki yaa: “Akumba agúari dagba roni tigaoni a, ki nigumba irairaapai.” Petero afura fu akurako aKristano ki yaa: “Zire abayugupai nikadu dagba roni a.” Nibi sangba agi amokedi re, wari gi zire abayugupai re akura ni? I rengbe ka kura kina rogo dungurati. I nga agu aboro nasamungu kuti ndikidi pambori.a Ginipai i aidaha? Anga gupai gbua i aidaha nga ka mbu gu riigbu nga ga Yekova te. Gu mokedi nangia Pauro aya gupai i aidaha nga ka “gbefa abawiriki fuo yo.” Kuba gupai nga i gbata kina gayo abawiriki, abasamungu kuti ndikidi pambori naida ka gbefa kina ga Yesu abawiriki fuoyo. Wakina agu “awaru nari ngbara,” gi zire abayugupai re nagbata agu aboro nga ga dungurati yó tipa ka imo gayo idapase na ki nyaga yó ti rengo.​—Mt. 7:15; 2 Tim. 2:18.

5. Wai zire abayugupai ananga aboro?

⁵ Wai zire abayugupai ananga aboro? I nananga aboro ngba birĩ. I narimiso gayo gbegberẽ aberã kurogo dungurati yee, wakina agu aboro ninaarimo na ahe kurogo gu kura ringara ngba dĩi. I nagumba gayo zire yugopai ngba gu gene nasaha si du bangiri aboro wa rengo, wakina gu boro nambakada gu waraga nitini ngba birĩ rengbe ní ka ndu nani kurogo gu kura ringara si ki wiri kina boro ndikidihe. I nagbandaka zire yugopai na kini “irasi” agu apai du rogo Ziazia Kekeapai tipa si naandu sa na gayo yugopai. (2 Pet. 2:1, 3, 13; 3:16) Nirengo, wenepai ho rengbe ani ka gbiaha ti asamungu kuti ndikidi pambori te. Ka ani merefuo yó, i nika dia rani kusayo ngba gu gene nandu sa nyenye unga.

6. Gini rugute Ziazia Kekeapai afuhe furani nibipa zire abayugupai?

⁶ Wai rengbe ani ka bandatirani ti zire abayugupai? Gu rugute Ziazia Kekeapai afu furani tipa wai rengbe ani ka bandatirani tiyo, si ziazia. (Oni gedi ARomo 16:17; 2 Yoane 9-11.) Si nagumba gupai nga ani ‘kpára tirani tiyo.’ Pai ho rogo gi rugute re si aida i sakirogoyo asaka te. Ka munganga gumba gupai furoni nga oni kpara tironi ti gu boro du na gu kaza tiní nasira asira, oni ini gupai aino ní aida oni mangihe, na oni kpara tironi ti gu borokaza re nibasa. Abasamungu kuti ndikidi pambori wakina gu boro du na kere kaza tiní re; i naida ka rimiso gayo iraira yugopai kurirani yo. (1 Tim. 6:3, 4) Yekova nga gaani bakere munganga nagumba gupai furani nga ani kpara tirani tiyo. Ani ima ino gupai ko aida ani mangihe, ono ya mo ani amangaha rogo apai yo dunduko?

7, 8. (a) Ginipai si aida ani mangihe tipa ka ne zire abayugupai? (b) Tipagine si aida ani mangi nyanyaki diaberã ti ni ka ne zire abayugupai?

⁷ Ginipai si aida ani mangihe tipa ka ne zire abayugupai? Si aidanga ani yambu yó ku kpurani yo watadu ka fu sene fuyo te. Si aidanga ani gedi gayo abuku watadu ka biyo rogo terevizioni te, si aidanga a ani ndu kurogo gayo bangiriba nga ga Internet ka geda agu apai i akehe na ki ke gaani bipai tipaha te. Tipagine si aidanga ani mangi agi apai re ti ni ya? Mbiko nyemuse. Ani nakpinyemu gu “Mbori nga irarengo” na ani aidanga na iraira yugopai nga gu natagbaga tihe na gu Fugo Mbori du nga rengo te. (Tam. 31:5; Yo. 17:17) Ani nakpinyemu ga Yekova riigbu a nga gu yugu rengo furani tipa rimoko na rogoyo, ga Mbori ringbisapai tipa kpotosende, gupai namanga boro ho ní akpi ni, gbiati gu maabangirise nga ga zingabekpio. Ya mo oni natingidapa gu ngbarago oni adu nani ti gu bambata regbo oni awiriki agi apai re na gu kura arengo? Sidu tie, ka oni mbunga zire abayugupai i aria roni ti gu riigbu nayugu agi arengo re furoni ya.​—Yo. 6:66-69.

⁸ Ka zire abayugupai vura gumba kina boro ginipai vurũ, ani apekanga fuoyo te! Tipagine ka ani mere ti ni fuo agu aboro du wakina ugudi guga tipa i nangi rani na ka ani agbianga undo tiyo ya? Kuba gure, ani kakuti Yekova na gako riigbu nga gu naaima digo nimbiisi gaani gomoro ime na gu gigiri ime naye rogo Fugo Mbori.​—Yes. 55:1-3; Mt. 24:45-47.

Ka Oni Degenga Turoni Sa ‘Kungba Apangbanga’ Ya

9, 10. Gini zahe nibipa ‘kungba apangbanga’ Pauro afuhe fu Timoteo, na ginipai navura du berã Pauro yo ho ko agumba gupai re ni? (Oni bi gu kekeapai du bandu waraga yo.)

⁹ Si rengbe kadu taata furani ti kura aregbo ani ini gupai nga guhe i amoihe pangba gene tipa si naayugo gene, boro ima ariaha baha. Ono ti kura regbo, si arengbanga kadu taata te. Kinawo du ga Satana abirĩ; agu akuraha taata tipa ani bihe, ono ka agu akuraha adunga wo ya. Gu mokedi nangia Pauro azahe ti ‘kungba apangbanga,’ nga gu gene sa Satana ananga rani ngbaha, ka ani ainongo ho ya. (Oni gedi 1 Timoteo 1:3, 4.) Gine nga gi kungba apangbanga re, na wai gu rengbe ani ka ne degaturani sani? Si naida ani ini karagapai aino kuti agi asanahe re tipa ka nye ngba gu gene nandu sa nyenye unga.

¹⁰ Gu zahe Pauro afuhe nibipa kungba apangbanga, si rogo gu bambata waraga ko akehe fu Timoteo nangia bakumba rogo dungurati. Pauro agumba gupai fu Timoteo nga ko banda dungurati nigigirihe na ki undo awirina i nye niruruyo fu Yekova. (1 Tim. 1:18, 19) Gu pa-Giriki Pauro amangisunge nani tipa ‘kungba apangbanga,’ rogoyo nga zire watadu rungbatiende. Rogo gu kura buku sa, i fura tipa kungba apangbanga ki ya si nga “agu apangbanga du tipa pambori ambedanga kuti rengo ya.” (The International Standard Bible Encyclopaedia) Isoke ho Pauro afura ni tipa gipai re, gupai nadu berãko yo nga agu aziree nga ga pambori nga gu aboro adihe rogo kuru apaturẽ.b Ngbatunga agi apaturẽ re nasa aboro i naasana dungu asanahe na kini di bakere regbo tipa ka gbata akaragapai. Gu bakere banangi aboro nga Satana du namangasunge na gi ngbatunga kungba apangbanga re tipa ka gbeberã rani kusayo ti gupai nyaki paha gbe. Gu rugute Pauro afuhe, si ziazia. Ko agumba gupai nga: Ka ani degenga turani sa kungba apangbanga ya!

11. Wai Satana amangasunge na zire pambori tipa ka nanga rani, na gini zahe si aida ani degeturani kutini?

¹¹ Gini kungba apangbanga rengbe ka ingisa rani ka ani adunga na rugatise ya? Kungba apangbanga narukuba agu aziree nga ga pambori naabaha nga gu rengbe ka aria rani “ti rengo.” (2 Tim. 4:3, 4) Satana nga kere boro birĩ, ko namangasunge na zire pambori tipa ka nanga aboro. Sidu Ziazia Kekeapai agumba gupai ti ni nga ko “nambakada tiko ni maraika imarago.” (2 Kor. 11:14) Nikpiapai, aboro gu pambori nga ga aKristano namanga tiyo nga i napekafuo Kristo, ono i nayugo agu aziree fu aboro nga ga Tirinita, we-iferno, gbiati gu yugopai nga mbisimo niguhe zanga kpio. Dungu aboro naberã gupai nga agu apumbo duwa Krisimasi na Pasika nayeaye na ngbarago fu Mbori, ono agu apai aboro amangaha ti regbo agi apumbo re, mburuhe rogo zire pambori. Ka ani kakuti gupai Yekova agumbaha furani nga ka ani “zádi nga birikobiriko he ya,” gu kungba apangbanga re ingisinga rani te.​—2 Kor. 6:14-17.

12, 13. (a) Gini aziree Satana asa aboro i idi kutini, ono agu arengo duho tipa agu aziree re nga gine? (b) Ginipai si aida ani mangihe tipa ka Satana nangingo rani na kungba apangbanga ya?

¹² Gu kura aziree kinaho Satana amangasunge nani nga gu ka ani adunga na rubangirise ya, si ingisi rani aingisa. Ani furanga tipa aziree biata nga gu ko amangasunge nani. Gu bambataha nga: Mo ima rengba ka manga agu apai dunduko mo aida ka mangaha. Kina ro nasia gupai ngba na gu angbanga ya. Gipai re nga gu bipai aũgbandaka apangbanga gbiati agu aboro nata abia agumbaha areme. Mbiko gia ani gipai re dedede, ani ima rengba ka tona kaa berã wa yó na ki tona ka pekafuo gu gbegberẽ sino mangaapai nga ga zegino. Ono gu rengo du ti ni nga kina Mbori sa rengbe ka yugo gupai furani du niwenehe na gu du nigbegberẽhe. (Yere. 10:23) Gu ue ziree nga: Ariapai ho Mbori nika mangaha auru kpotosende te. Gi bipai re nasa aboro i niiberẽ tipa kina agu apai du awere. I aberãnga pa gayo raka kumbatayo watadu pa iriso Mbori te. Ani ima rengba ka tona kaa berã wa yó si ki sa gupai nga ani da “ni aboro nyomoro, na ni aboro zanga zu” rogo gaani sunge fu Mbori. (2 Pet. 1:8) Gu rengo duho nga Yekova nika manga ariapai barambeda rogo gi kpotosende re na si naida ani yuguhe rogo gaani gene raka nga ani ima ida kuti gipai re. (Mt. 24:44) Gu biata ziree nga: Mbori aberãnga pa aboro nibasasa dunduko te. Gupai Satana aida ani idi kutini nga ani arẽnga bangiri Mbori tipa ko kpinyemu rani te. Ka ani mbu Satana ko sarani ani idi kuti gi ziree re, ani mbu mangasunge ambu fu Yekova. Ono gu rengo du ti ni nga Yekova nakpinyemu rani nibasasa dunduko na ani dunduko du parani ninyanyakihe bangiriko.​—Mt. 10:29-31.

¹³ Si naida ani du na rugatise ti aregbo dunduko ani andu ka tona berã wa agu aboro du rogo ga Satana zegino. Gupai si aida ani nitingidihe dedede nga Satana nga bakere banangi aboro. Si naida ani nidegeturani dedede kuti agu apai nga ga Ziazia Kekeapai tipa ka Satana nangingo rani na kungba apangbanga ya.​—2 Pet. 1:16.

Ka Oni Pekenga Fuo Satana Ya

14. Gini zahe Pauro afuhe fu paranga adekurugbo, na tipagine si aida ani di gu zahe re ti ni ku ngbadurani yo?

¹⁴ Oni makianga gupai nga oni nandu bangiri gene, oni ki ya ngere, oni ki bi guhe i amoihe pangba gene tipa ka yugo gene na kekepai ti ni nayaa, “Gi Gene Re Nandu Fuo Satana.” Ya mo boro ho dagbarani ka sia ka ndu ngba gu gene re? Pauro azahe tipa gu dungu agene rengbe agu aKristano naima kpara gayo raka fu Mbori ka pekafuo Satana ngbaha. (Oni gedi 1 Timoteo 5:11-15.) Pauro agumba gipai re fu kura paranga “adekurugbo” nadu ti gu regbo re, ono bangua arugute kina rogoho rengbe ani ka wirikapai ti ni. Gu paranga adekurugbo re ainongo gupai nga i aapekafuo Satana te, ono agu apai i anaamangaha na kini gumbaha ayugu gupai nga i aapekafuo Satana. Wai gu rengbe ani ka ne pekafuo Satana zanga inoho? Ani makianga pai tipa gu ga Pauro rugute ko afuhe nibipa gumbarimo.

15. Ginipai Satana aidaha, na ringbisihe kuti gupai Pauro agumbaha, gini agene Satana aʹasada ka sarani ngbaha ani mangi gupai ko aidaha?

¹⁵ Gupai Satana aidaha nga ka ani furanga tipa gaani aida ya. Ko naida ani rugusi sunge tungusa wene pangbanga. (Yugo. 12:17) Tipa ko rengbe ka manga gupai re, ko naʹasada ka rimiso rani kurogo agu apai nagbarasa regbo na ki ye na kparakaro dagbarani. Pauro agumba gupai nga agu adekurugbo re ‘awirikapa nyomoro, kini yara ayara ti dungu abambu.’ I anaadia gayo regbo kaa ndu fuo akurayo i naafura tipa agu apai paha anyakanga ya. Si naida ani du na rugatise ani andu ka tona gbarasa gaani regbo na gu nga ga akuarani niyamba ani yó rogo terefuni watadu nindu ani fuoyo kaa fura tipa agu apai anyakanga paha ya tipa gbanga regbo watadu kaa gumba agu apai fuyo angianga rengo ya. Pauro agumba gupai berewe tipa agu adekurugbo re nga i angia airamenemene. Gu boro nagumba rimo, ní nafura gbegberẽ tipa kura aboro. Gi ngbatunga gumbarimo re angbanga te mbiko si nasa ní ní gumba ziree ti rimo kurani na gipai re rengbe ka sa gupai nga i takpata. (Snz. 26:20) Agu aboro nagumba ziree ti rimo akurayo fu aboro, i nawirika Satana, ka si vura du vurũ nga i ainongo ho te.c Gu kurapai berewe Pauro agumbaha tipa agu adekurugbo re nga i aarimiso tiyo kurogo agu apai nga ga kura aboro. Si arunga furani ani dingbiti ga aboro apai kaa gumba wai fuyo si aida i mangi agu apai du tipa yó te. Gipai re rengbe ka sarani bangirani go ti gu nyanyakipa sunge nga sunge tungusapa Kindo nga gu Mbori afuhe furani. Ka bangirani go ti gu sunge re, ani nika tona pekafuo Satana. Ka ani tona pekafuo Satana, gure nga ani ima samungu kuti Mbori. Si naida ani sia da ani nika pekafuo ní.​—Mt. 12:30.

16. Ginipai si aida ani mangihe ka ani aidanga ka pekafuo Satana ya?

¹⁶ Ka ani amanga gupai Ziazia Kekeapai agumbaha, ani pekenga fuo Satana te. Pauro agumba bete agu apai rengbe ka undo rani, ko aya, ani “nimángi ga Gbia sunge zaza dedede.” (1 Kor. 15:58) Ka ani amangasunge Kindo ti aregbo dunduko, regbo dunga berani tipa agu apai anyakanga paha ya watadu agu apai angianga rengo ya te. (Mt. 6:33) Gu kurapai Pauro agumba gupai nga si naida ani mangihe nga kaa gumba agu apai “ngba angba sa nyakasa” kura aboro. (Ef. 4:29) Ka ani gumbanga rimo ya na ka ani degenga turoni a fu agu aboro nagumba rimo ya.d Si naida ani du naa kido kuti awirinarani na kini irisi yó. Manga ani he wo nika sa gupai nga ani nigumba kina agu apai ngba angba tipa yó. Pauro agumba gupai si aida ani diberã ka mangaha ki yaa, ani ‘nimangi kina gaani apai.’ (1 Tesa. 4:11) Oni yugu gupai ayugo fu kura aboro nga oni naberã payo aberã, ono oni mangi gipai re ngba iriiri gene. Si naida oni tingidi gupai nga gu kura apai kinaho tipa yó i aidanga ka fura na oni riihe ya watadu i aidanga oni inipai tipaha ya. Gu kurapai berewe si aida ani tingidihe nga si aidanga ani diberã fu gu kura aboro rogo agu apai si aida kina yó mangi gayo diaberã tipaha te.​—Gara. 6:5.

17. (a) Tipagine Yekova aza rani ti ni ti agu apai si aidanga ani pekefuo ho ya? (b) Gini diaberã oni namangihe tipa gu gene Yekova aida ani ndu ngbaha?

¹⁷ Ani na bakere ngbarago ka bi gupai nga Yekova nagumba gupai furani si aidanga ani mangihe ya! Si naida ani nitingidi gupai dedede nga agu azahe wiriki ani pai tipaha rogo gi kekeapai re na gu nasusi, Yekova nafuhe furani mbiko gu bakere nyemuse du ko nani tipa rani. Ko naida ka banda rani ti gu gberango naye mbiko pekafuo Satana. Gu gene Yekova aida ani ndu ngbaha nifitikirihe, ono kinaha sa nandu koyo du nyenye unga ni. (Mt. 7:14) Ani nidegenga turani adega ti aregbo dunduko wa Yekova nikaa ya furani wee: “Gene du re, oni ndú ngba ha.”​—Yes. 30:21.

[Gu rukutu kekeapai du bandu kpewaraga yo]

Gaoni Karagapai Nga Gine?

Wai gu rengbe ani ka yugo gupai nga ani nadegaturani kuti agu azahe du rogo agu averesi du kusende re?

• 2 Petero 2:1-3

• 1 Timoteo 1:3, 4

• 1 Timoteo 5:11-15

[Gu sura du ti kpewaraga 19]

Gbandaka Mange Azire Ku Wege Yo

Kuru pangbanga gu duho i agumbaha ti regbo aYudo nga gu nayugo sangbana gumbarimo. Aboro naagumba gi pangbanga re ngba dungu agene, ono gu mangupai du rogoho gi dure.

Kumba aduho namere ka gumba ziree ti rimo gu tatamanatatamana kumba nadu rogo gu gbata i aaraka rogoho. Kusa, gu bagumbarimo re abi gupai nga si aarẽnga ko mangipai wa gure te, ko ki guari ki ndu ka hõmbupai be gu iratatamana re ki ya fuko gupai ka ko ya fuko ko mangihe tipa ko mbupai fuko, ko mangihe amanga. Gu ratatamana re aya fuko ko mangi pai gbua sa, nga ko ndu ki rogo mange aziree nibadunguhe ki gbandakaha ku wege yo. Wa gipai re avura ba kina zerangba tiko, ko andu ki mangihe wo, tifuo gbandaka ko ho, ko akaraga tiko fuo gu iratatamana re.

Fuo karaga ko tiko, ko asanahe ki yaa: “Mo mbupai fere?”

Gu kumba re ki karagapai ki yaa: “Mo ndu mbata ka dungura gu mange aziree mo nigbandaka ha re ki ye nani.

Ko ki karagapai ki yaa: “Mi nika ndu ka bi gu mange aziree re wari? Si ima ya na wege dunduko.”

Gu iratatamana re ki ya fuko: “Kina wai duhe foro nikpakarakpakaraha tipa ka dungura gu mange aziree re berewe, kinawo a duhe nikpakarakpakaraha tipa ka gbandaka gu ziree ri aboro yo mo agumbaha ti rimore.”

Gupai ani awirikaha ti gi pangbanga re nga, ani arengbanga ka aria fugo rani fuo gumba ani he te, na ani arengbanga ka aria gu gbegberẽ sangbanapai rengbe gupai gumba ani he ka ye nani te. Sidu, mbata fu ani fura gbegberẽe tipa boro, si naida ani tingidi gupai nga fugo rani wakina mange aziree wege yo.

[Gu sura du ti kpewaraga 16]

Wai gu rengbe kura aboro ka yamba asamungu kuti ndikidi pambori ku kpuyo yo?