‘Ruru Kangara Moyambu’ Asusi Rogo Asada!

‘Gi regbo re nga gu regbo i aringbisihe tipa sapangbangaa tona ti ga Mbori bambu.’ —1 Petero 4:17.

1. Gine Yesu abihe ho ko awisigi gu sunge ni gako “moyambu” amangihe?

TI RAGO Pendekote rogo gu garã nangia 33 ti Gaani Regbo, Yesu afu sunge fu gako “moyambu” tipa ni naakparaka riahe ti regboho fu gako “aboro kporo.” Rogo gu garã nangia 1914, i amoi Yesu rii mbata ni Bakindo, na nikina ipo, ko ki guari ka wisigo gu sunge gu “moyambu” re amangihe. Ko abi gupai nga, gu “moyambu” re aima yugo tiko ‘niruru kangara moyambu’ rogo dungu apai. Si ki ta du were, ko kini mo ka ‘asiapa gako ahe dunduko fuko.’ (Matayo 24:45-47) Ono tie, gbegbere moyambu adu kinaho a, nga guko naadunga niruru ko na nikangara ko ya.

“Gu Gbegbere Moyambu . . . Re”

2, 3. Wari gu riko nga ga “gbegbere moyambu” re aye ni, na wai bangeyo azugo?

² Fuo Yesu fura tipa ‘ruru kangara moyambu,’ ko afura nibasa tipa gbegbere moyambu niyaa: “Ka gu gbegbere moyambu aya re ku kpotoni yo, ‘Gi gbia naima,’ ni ki tona taka gu kura amoyambu du na ko, ki ta ri ahe nimbiri he na akpibuda; gbia gu moyambu re aye ni gu uru ni aso nga gima ko ya, ti gu saa ni aina nga ha ya, ki taki ni ni pai, ki ringbisi gani ba na airabiriki; yo kpe ka du ni na ri ngba rinde.” (Matayo 24:48-51) Gu fugo nga, ‘gu gbegbere moyambu re,’ si nagbeberã rani kuti agu afugo Yesu yee mbata tipa ruru kangara moyambu. Ii, gu “gbegbere moyambu” re akuru dagba gu riko nga ga ruru kangara moyambu.a Wai si awiripa manga wo?

³ Mbata fu gu garã nangia 1914, dungu agu aboro nadu rogo gu riko nga ga moyambu aduna kakaka maabangirise ka gbia bairayo nga Badidee ngbangbaturũ yo rogo gu garã re, ono tie, gupai i aamaabangiriyo tipaha re amanganga te. Nisangbana gipai re gbiati gu kura apai naamanga, dunguyo rago agbere tiyo na ngbadu aguyo ki imi nikerehe. Beteyo asatiyo ka ‘taka’ agu awirinayo i adu mbata na yo re nigumba yo gbegbere afugo fuyo na kini ngbe na ‘kere akpibuda,’ nga agu akanisa i aya tipaha wee si nga ga aKristano.—Yesaya 28:1-3; 32:6.

4. Wai Yesu amangipai na “gbegbere moyambu” gbiati agu aboro dunduko yugu kina gu bangisa sino re?

⁴ I aye ka ino agi aboro nadu mbata ni aKristano re ni “gbegbere moyambu,” na Yesu ki fu mbusa fuyo ‘nitaka ko yo ni afugo.’ Rogo gini gene? Ko aká yo, na pa gayo maabangirise ka raka ngbangbaturũ yo ki gbere. Ono tie, ko agbarasanga yo nibasa te. Si aidi i rungo mbata rogo gu regbo nga ga akpee gbiati ringbarinde rogo “gu bitimo du zegi yo” du kusayo ti gu dungurati nga ga aKristano. (Matayo 8:12) Natona rogo agu a’uru nadu mbata kusayo re, bete kura mbedimbedi aKristano aima digo niyugu gbegbere asino wa kina gure, kini koditiyo kuti “gbegbere moyambu.” Bete “kura akandoro” awiriki yo rogo gi gayo iraira mangaapai re. (Yoane 10:16) Kina gu bangisa “bitimo [nga ga toro] du zegi yo” re gi ngbatunga avura Kristo re dunduko nika rungo behe.

5. Wai ruru kangara moyambu amangipai nga gu nadukia ti gu “gbegbere moyambu” amangihe?

⁵ Wa si avura du wo, ruru kangara moyambu adu rogo kina gu bangisa asada gu “gbegbere moyambu” re adu rogoho. Ono tie, kuba gupai nga, rago gbere ti gi ruru moyambu re, i ambakadi gayo berã berewe. (2 AKorindo 13:11) Gayo nyemuse tipa Yekova na tipa awirinayo anyaki. Nisangbana gipai re, i ningia “[a]songodi rengo” rogo gi ‘yangara areme’ nga ga vunduvunduapai re.—1 Timoteo 3:15; 2 Timoteo 3:1.

Gu Ngasu Adee Nangia Airatatamana na Airamungo

6. (a) Wai Yesu aringbisipa gu tatamana du ti gu gako riko nga ga moyambu? (b) Mbata fu gu garã nangia 1914, gini maabangirise dungu mbedimbedi aKristano atakipandehe?

⁶ Fuo Yesu fura tipa “gbegbere moyambu,” ko ape asanza ue ka yugo gupai nika sa bete mbedimbedi aKristano i du niruru yo na ni airatatamana baraho akurayo nika dunga ni wo ya.b Tipa ka yugo gu sino mangaapai nga ga tatamana, ko ayaa: “I aringbisa gu ngbi nga ga ngbangbaturũ kuti ngasu ade bawe, narogo[di] gayo atara, ki ndu ka gbia gu kumba nadi de. Agu yo bisue adu ni airamungo, agu yo bisue adu ni airatatamana. Bambiko airamungo ho i arogo gayo atara ni, ka i . . . [adia]nga nzeme tipa ha ya. Ono airatatamana andu na nzeme vuru gayo andukura yo na atara a.” (Matayo 25:1-4) Pa gi ngasu adee bawe re natingida rani na pa mbedimbedi aKristano mbata fu gu garã nangia 1914. I amakiapa gu regbo berãyo yo nga gu i aberẽpaha ya si Yesu Kristo, nga badidee, nika ye ti ni. Sidu, i ki ‘guari ka ndu’ ka gbia ko, kini tungusipai zanga gunde ya “gu ringbisiringbisi aregbo i aringbisihe fu rikaaboro” nika digo rogo gu garã nangia 1914.—Ruka 21:24, NW.

7. Ka gumbapai nisanza, ti gini regbo na tipagine mbedimbedi aKristano ‘andu ti ni ka ra’?

⁷ Gayo pai aruaru. Gu ringbisiringbisi regbo i aringbisihe fu rikaaboro aima digo nirengo rogo gu garã nangia 1914, na ga Mbori Kindo tiibe Kristo Yesu ki tona gaha sunge. Ono tie, gupai re amangi ngbangbaturũ yo zanga aboro bihe. Auru kpotosende, ngbatunga aboro atona kaa mbu be agu ‘arungo’ i agumbapaha kumbatayo ya si aye. (Yugoti 12:10, 12) Regbo asada atona nibasa fuo gi regbo re. Wa mbedimbedi aKristano agianga rogo apai wenengai ti gu regbo re ya, i aberẽ gupai nga, ‘gu kumba nika dia dee aakeesa akeesa.’ Fuo vundo riyo yo na aboro zegino kini sogo yo, nyomoro azi yo na i ki mbu gu sunge tungusapai gbaiga nadu nimbakadimbakadihe. Wa kina gu ngasu adee du payo rogo sanza, “i ayukura ki nira ara dunduko” rogo gu gene nga ga toro, a wa kina gu agu aboro naya tipa tiyo wee i nga aKristano amangihe fuo kpiko ga Yesu amokedi.—Matayo 25:5; Yugoti 11:7, 8; 12:17.

8. Gine naye na gu tatangbaa nangia: “Oni ngere, gu kumba nadi de[e ko ima da]!” na gine si angia regboho tipa mbedimbedi aKristano mangihe?

⁸ Fuo gure, rogo 1919, pai amangi boro amaanga berã ni ya si nika manga ya. Ani nagedaha were: “Bebere yuru, tatangba ki . . . [poi] niya, ‘Oni ngere, gu kumba nadi de[e ko ima da]! Oni kuru ka ndu ka gbia ko.’ Were gu ngasu ade re dunduko ki zingi, ki mbakadi gayo atara.” (Matayo 25:6, 7) Kina boro baraho wiri maabangirise adunga ni tipa wiripai ya ka si mangi ya, i azinahe fu mbedimbedi aKristano i du zaaza! Rogo 1918, Yesu, nga “gu bandusunge nga ga mokido ko,” arimi ku vuru gu yekaru nga ga toro ka wisigoho na ka giriso ga Mbori dungurati. (Maraki 3:1) Ti gi regbo re, si aidi mbedimbedi aKristano ndu ka gbia ko rogo gu vurukporo yekaru nga gu du auru kpotosende. Si angia regbo fuyo i guari ka ‘hasarago.’—Yesaya 60:1; AFiripoio 2:14, 15.

9, 10. Rogo gu garã nangia 1919, tipagine kura aKristano adu ti ni ni “airatatamana” gu kurayo kidu ni “airamungo”?

⁹ Ono oni runga mbata! Rogo gu sanza du tipa ngasu adee re, gu kurayo adu rogo kpakarakpakarapai. Yesu aafura kindi niyaa: “Airamungo ki niya fu airatatamana, ‘Oni fu bete gaoni nzeme fu rani; bambiko gaani atara nabisa.’” (Matayo 25:8) Ka atara watadu aramba zanga nzeme rogoho, si arengbanga ka ki te. Pa fura yo herẽ tipa gu nzeme nga ga ramba natingida rani na pa Fugo Mbori nga rengo gbiati gako ziazia toro, nga guhe nafu ome fu airisimbori i mangisunge ni abazadi ima we. (Atambuahe 119:130; Daniere 5:14) Mbata fu 1919, gu mbedimbedi aKristano nangia airatatamana, agbata gene kakaka ka ino gupai Mbori akpinyemu i mangihe wa i avura du rurungburaa tipa guru regbo vurũ. Sidu, ho i ayambu yo ni tipa i hasirago, i aima mbakadatiyo ho ngaha re.—2 Timoteo 4:2; AEbere 10:24, 25.

¹⁰ Ono tie, gu kura mbedimbedi aKristano ambakadanga tiyo tipa ka fuka amotumo watadu ka mangasunge nyanyakii te, wa i avura duna kakaka nyemu ka sungo na bairayo nga Badidee vurũ. Sidu, ho regbo ada ni tipa i du zaaza rogo sunge tungusa wene pangbangaa, i ambakadanga tiyo tipaha te. (Matayo 24:14) I a’asaditiyo a ka zeresa gu ngara nadu ti abadiangbayo, nisana yo yo i fu bete gayo nzeme fuyo. Rogo gu ga Yesu sanza re, wai gu ngasu adee nangia airatatamana akaragapai fu gu mumungo yo? I ayaa: “Si . . . [wa] si arengba nga tipa rani na oni te. Si ngba oni ndu fu[o] ababagiahe, ki ngbeke he tigaoni.” (Matayo 25:9) Teketeke wa kina gure a, rogo gu garã nangia 1919, gu mbedimbedi aKristano nadu niruru yo aká ka i aidanga ka manga gupai ka rengbe ka umbasi omeyo ti hasarago ya. Sidu, i atinga ti regbo gu asada re te.

11. Ginipai namangi mumungo ngasu adee?

¹¹ Yesu adigisi fugo ko niyaa: “Wa [gu mumungo ngasu adee re a]andu ka ngbeka . . . [nzeme], gu kumba nadi de ki da; agu yo ki rimi na ko naasunguda ko ku pati pumbo diade; i ki kisi ngbadimo. Fuo ho gu kura ngasu ade ki ye [a], ki ya, ‘Gbia, Gbia, mo uru ngbadimo fu rani.’ Ono ko ki karaga ha ki ya, ‘Ya mi fu roni ni rengo, mi aina nga roni te.’” (Matayo 25:10-12) Ii, kura aboro ambakadanga tiyo tipa pada Badidee te. Si ki ta du were, i ki ti rogo asada na gu mamu nangia ga du pati pumbo diadee ngbangbaturũ yo ki gbere beyo. Nagbere gupai namangi yo re!

Sanza Ataranda

12. (a) Gine Yesu amangisunge nani ka yugo padu niruruse? (b) Da nangia gu kumba nandu “nunguro” kurogo kura ringara?

¹² Fuo Yesu yugupa tatamana na kpiapai, ko asusi kumbatayo ka yugo padu niruruse na kpiapai a. Ko ayaa: “Si wa ka kumba andu ku rogo kura ringara, ki yambu gako aboro sunge, ki fuku gako ahe ku be yo. Ko ki fu ataranda bisue fu gu ni, ki fu ra ue fu gu ni, ki fu ru sa fu gu ni; ko afuku ra fu yo wa rengbe [sunge baga ra] na omeyo; ko ki tona ka ndu gako nunguro.” (Matayo 25:14, 15) Gu kumba du rogo gu sanza re nga kina boro Yesu nitiko, nga gu kumba nandu “nunguro” ku ngbangbaturũ yo rogo gu garã nangia 33 ti Gaani Regbo. Ono mbata fu Yesu dakpa ku ngbangbaturũ yo, ko afuku “gako ahe” fu gako ruru abawiriki. Wai ko amangihe?

13. Wai Yesu ambakadi bakere ba tipa sunge tungusapai na ki fu asiahe fu gako ‘amoyambu’ i mangisunge bagaahe?

¹³ Ti regbo ga Yesu sunge tungusapai auru kpotosende, ko atona ka mbakada bakere ba tipa tungusa gu wene pangbangaa nga ga Kindo rogoho rogo ringara aYisaraere naabaha dunduko. (Matayo 9:35-38) Mbata fu ko ndu “nunguro” ku ngbangbaturũ yo, ko afu gu ba nadu tipa gu sunge tungusapai re fu gako ruru abawiriki kini yaa: “Oni ndú tie, ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na [ti rimo] Wiri na [ti rimo] Ziazia Toro; ki nirugu yo a i niká kuti agu apai dunduko mi arugu roni kuti ni.” (Matayo 28:18-20) Nifura Yesu na agi afugo re, gure nga ko a’asia gako ‘amoyambu’ i naababaga ataranda “wa rengbe [sunge baga ra] na omeyo” daho ko ka karaga tiko ni.

14. Tipagine Yesu aamanga bangiriko ti ni ya aboro dunduko nika manga kina bangisa bakio sunge ya?

¹⁴ Gu fugo nga “wa rengbe [sunge baga ra] na omeyo” re, nayugo gupai fu rani nga, anga agu aKristano dunduko nadu rogo bambata sa kama agarã nadu na apai tipa yo dunduko kina sa watadu i arengbe ka manga apai dunduko na bangisa bakioho te. Gu beteyo, wa Pauro na Timoteo, adunga na atindiro beyo te, sidu i kidu gbua ka mangasunge yugopai gbiati tungusapai nibakerehe. Agu apai nadu tipa kura aboro avura umbasi bakio gupai bakere gbe i arengbe ka mangaha. Nikpiapai, bete aKristano angia akanga, na gu kurayo angia aborokaza, gu kurayo aima gbinza, watadu i aduna agu atindiro riyo nga ga kporo. Rengo ngaha nga, gu kura amamu asunge rogo dungurati adunga tipa abawiriki dunduko te. Agu adee nangia gu mbedimbediyo gbiati gu kura akumba anayugonga pai rogo dungurati te. (1 AKorindo 14:34; 1 Timoteo 3:1; Yakoba 3:1) Wa si avura du wo, ka kina gini apai avura du tipa yo, si aidi ga Kristo mbedimbedi abawiriki dunduko, akumba na adee, i mangisunge, kini gbia undo be agu amamu naakura fuyo na agu apai nadu tipa yo tingba gu ga aKristano sunge nga ga tungusapai. Gu ga Yesu abawiriki du areme namanga kina gu bangisapai re.

Regbo Wisigopai Ada!

15, 16. (a) Gini regbo nangia regbo sakapai tipa agu ataranda amoyambu agbia ra ti sunge baga ra? (b) Gini vovo amamu tipa mangasunge ‘babaga ataranda’ i afuhe fu ruru amoyambu?

¹⁵ Gu sanza re nandu kumbatayo kindi niyaa: “Were fuo rago ni gbanga ha baira agu aboro sunge ki ye re, ki wisigi yo.” (Matayo 25:19) Rogo gu garã nangia 1914, nga gu garã Kristo Yesu atona ka zogarago rogoho, si angia gbanga regbo nirengo tona rogo gu garã nangia 33 ti Gaani Regbo. Fuo susa agarã biata na beberehe kusa, rogo 1918, ko aye ku vuru ga Mbori yekaru yo nga ga toro na ki digisi gu ga Petero afugo nga: “Sapangbanga[a nika] tona ti ga Mbori bambu.” (1 Petero 4:17; Maraki 3:1) Si angia regbo i sungu ka sakapai tipa agu ataranda i agbia ra ti sunge baga ra.

¹⁶ Gine agu amoyambu nangia mbedimbedi awirina Yesu amangihe na gako “ataranda”? Natona rogo gu garã nangia 33 ti Gaani Regbo kaa ndu kumbatayo da kurogo gu garã nangia 1914, dungu aboro nanamangasunge nyanyakii kaa ‘babaga ataranda.’ (Matayo 25:16) Zavura ti regbo bambata vura nga ga zegino, i ayugu gupai nga, i aduna nyanyaki nyemu mangasunge fu Bairayo. Ti gi regbo re, si adaada i fu vovo amamu fu ruru aboro tipa i mangisunge ‘babaga ataranda.’ Digido gi zegino re aima da. Si aidi i tungusi wene pangbangaa rogo zegino dunduko na ki ke ‘gu zuzu ahe nga ga kpotosende.’ (Yugoti 14:6, 7, 14-16) Si aidi i ini bara gu yangara aboro nika du rogo gu riko nga ga marũ na i ki dungura kura avusende nga “bakere rimbasa aboro.”—Yugoti 7:9; Matayo 13:24-30.

17. Wai gu mbedimbedi aKristano nadu niruru yo ‘arimi kurogo gu ngbarago nangia ga bairayo’?

¹⁷ Regbo ke ahe ningia regbo ngbarago. (Atambuahe 126:6) Si adaada tie nga, ho Yesu afu gu kura asunge ni fu mbedimbedi awirinako nadu niruru yo rogo gu garã nangia 1919, ko yaa: “Mo amangi agu apai du ni umba ha wenengai, mi aasia pa bakere apai foro; mo rimi ku rogo ga bairaro ngbarago.” (Matayo 25:21, 23, gu kekepai duni pigipigihe re, ani du pigihe.) Kurii gure, gu ngbarago du Baira amoyambu nani wa moi yo ko barambeda rii mbata ni Bakindo rogo ga Mbori Kindo, ni gupai ani arengbanga ka rugatirani na paha ya. (Atambuahe 45:1, 2, 6, 7) Gu riko nga ga ruru moyambu nagbia gu ngbarago re wa i amangasunge kuba Bakindo auru kpotosende herẽ kini zugosi gako ahe. (2 AKorindo 5:20) Ani nabi gi gayo ngbarago re rogo gu sangbanebi nangia ga Yesaya du rogo Yesaya 61:10 nayaa: “Mi angí bakere rogo Yekova yo, torore ki du na bakere ngbarago rogo gi Mbori yo; bambiko ko aukadi re ni baukadi nga ga bata.”

18. Tipagine bete kura aboro ati ti ni rogo asada, na sangbanaha angia gine?

¹⁸ Si nafu kina gberarago nga, gu kura aKristano aima ti rogo gu asada re. Ani nageda gupai tipa yo nga: “Gu ni nadi taranda sa ni ki ye ki ya, ‘Gbia mi aini he ya nyanyaki boro nga mo, mo nake gu mo aru nga ya, ki dungura gu mo ami nga ha ya. Mi ki gunde, ki ndu ki oko ga taranda ku sende yo. Mo ngere, gamo kina be ro.’” (Matayo 25:24, 25) Teketeke wa kina gure a, bete mbedimbedi aKristano amanganga ‘sunge bagaahe’ te. Mbata fu gu garã nangia 1914, i apenga pa gayo maabangirise zaaza fu kura aboro te, na ka i aidanga ka tona pehe a rogo gu garã nangia 1919 ya. Wai Yesu amangipai sa gi gayo basapai re? Ko adi gayo amamu kusayo dunduko beyo. Ko aba yo “ku rogo gu bitimo du zegi yo; yo [du] kpe . . . ni na ri ngba rinde.”—Matayo 25:28, 30.

Wisigopai Aandu Kindi Kumbatayo

19. Rogo gini gene Yesu amanga gu sunge nga ga wisigopai tipa gako amoyambu, na ginipai mbedimbedi aKristano dunduko nadiberã ka mangaha?

¹⁹ Rengo ngaha nga, gu bakere bange aboro si adu nga i nika sa tiyo niga Yesu mbedimbedi amoyambu ti yangara areme, adunga tingba sunge fu Yekova ti gu regbo Yesu atona wisigo gako amoyambu ti ni rogo 1918 re te. Ya mo i akpa ti gu mamu nangia ga wisigopai re? Wagusa te. Tonatona gu sunge wisigopai re du gbua i atonaha rogo gu garã nangia 1918/1919, baraho gu riko nga ga ruru kangara moyambu asusi ni rogo gu asada re. Mbedimbedi aKristano nibasasa kindi rogo asada daho i ka nogoda he ni ti ngbandia kpakpuyo niyangaraha kindi. (Yugoti 7:1-3) Fuo mbedimbedi awirina Kristo rugutiyo na gipai re nga wo duhe, i ima diaberã kaa mangasunge ‘babaga ataranda’ kindi niruru yo. I ima diaberã kadu ni airatatamana, kini banda bakere bakio nzeme tipa gayo imarago naaki aki kindi imaima. I ima ino gupai nga, wa du yo nibasasa, ho guni adani ti digido gani raka ni kidu niruru ni, Yesu nadia ni adia kurogo gu kporo du ngbangbaturũ yo.—Matayo 24:13; Yoane 14:2-4; 1 AKorindo 15:50, 51.

20. (a) Gine kura avusende nadiberã areme ka mangaha? (b) Ginipai mbedimbedi aKristano naima rugatiyo na paha?

²⁰ Gu bakere rimbasa aboro nga kura avusende, i ima wirika agu awirinayo nga mbedimbedi aKristano. I ima rugatiyo na gupai nga, gu gayo inohe du yo nani tipa ga Mbori ringbisapai, si naye na bakere tindiro kuriyo. (Yezekere 3:17-21) Sidu, mbiko gu undo du rogo Fugo Yekova gbiati gako ziazia toro, i nabanda gayo nzeme a si du kindi nikina bakerehe rogo gu gene nga ga wisigopai na be du pati agu adunguratise nga ga aKristano. Na i nasa gayo imarago si naahasarago, kini kodibeyo kuti sunge tungusapai gbiati yugopai, na rogo gi gene re, i kini mangisunge ‘babaga ataranda’ na mbedimbedi awirinayo. Ono tie, mbedimbedi aKristano ima rugatiyo na gupai wenengai nga, i nga agu aboro i afu agu ataranda re kubeyo. I nga agu aboro nika karagapai akaraga fu gayo Gbia tipa wai mangi yo sunge na gu gako ahe du auru kpotosende herẽ. Wa avuranga nge yo ya, i arengbanga ka mbu gi gayo sunge re fu bakere rimbasa aboro te. Fuo du gipai re berã ruru kangara moyambu yo, si nasa yo i naangbe kumbatayo kindi rogo ngera fuo ga Bakindo sunge baga ataranda, kidu na tambuahe tipa gu undo bakere rimbasa aboro naafuhe fuyo. Gi bakere rimbasa aboro re ima ida na pa gu tindiro dube mbedimbedi awirinayo na i kini bihe ni mamu kaa mangasunge tii beyo.

21. Gini arugute du fu aKristano dunduko natona mbata fu 1919 dakuti gi gaani regbo re?

²¹ Were, wa agi asanza re avura ziga imarago kurii agu apai namangi rogo 1919, watadu bara gu regbo re, si kindi ni agu arugute adunga ngburungburu ya tipa ndikidi aKristano dunduko rogo yangara arame naabaha dũ. Rogo gi gene re, wa agu arugute Yesu afuhe ti digido gu sanza du tipa gu ngasu adee du bawe re adu nibambataha tipa mbedimbedi aKristano mbata fu gu garã nangia 1919, si kindi ni agu arugute adunga ngburungburu ya tipa aKristano dunduko areme. Sidu tie, ani dunduko dinga agu afugo Yesu ku ngbaduraniyo nga: “Oni ngere tie, bambiko oni aina nga uru he na gu saa a te.”—Matayo 25:13.

[Gu rukutu kekeapai du bandu kpewaraga yo]

• Gini regbo Yesu awisigi gu sunge nga ga apefuo ko, na gine ko abihe?

• Tipagine bete mbedimbedi aKristano asonosi gu sino ti ni nangia ga “gbegbere moyambu”?

• Wai rengbe ani ka yugo tirani ni agu aboro nga airatatamana rogo toroyo?

• Niwirika ani gu mbedimbedi awirina Yesu du niruru yo, rogo gini gene rengbe ani ka kakuti mangasunge ‘babaga ataranda’?

[Asanahe nga ga wisigopai]

[Sanduki ti kpewaraga 29]

GINI REGBO YESU NIKA YE TI NI?

Rogo Matayo kapita 24 na 25, i napepa “ye” Yesu yo rogo agu apai du nibakiakia. Si aidanga ko guari aguari bako yo tipa ka “ye” kono te. Kuba gure, ko ‘naye’ rogo gu gene nga, ko nika gbeberã ko kuti agu apai nabi ngbatunga aboro watadu nabi apefuo ko, dedede, gu gbeberã re, si tipa sarangbangaa. Sidu, rogo gu garã nangia 1914, ko ‘aye’ na gu rogoyo nga ko adi gu pagbia nga ga Kindo kubeko. (Matayo 16:28; 17:1; Amokedi 1:11) Rogo gu garã nangia 1918, ko ‘aye’ nigu mokedi nga ga mokido ko na ki tona ka sarangbangaa agu aboro naaya i namangasunge fu Yekova. (Maraki 3:1-3; 1 Petero 4:17) Ti regbo Aramegido, ko nika “ye” ka sarangbangaa kurii avura Yekova.—Yugoti 19:11-16.

Gu paye Yesu (watadu pada ko) nga gu gumba yo paha bara dunguhe rogo Matayo 24:29-44 na rogo 25:31-46, si nayugo paye ko ti rago “bakere gberãngbi.” (Yugoti 7:14) Ngba kura gene, gu paye Yesu gumba yo paha bara dunguhe tona rogo Matayo 24:45 ki da kurogo 25:30, si nafura tipa gako sarangbangaa rogo gu garã nangia 1918 kurii agu aboro naya tipa tiyo wee i nga gako abawiriki. Nikpiapai, si dunga niruru berã ka ya, pa fu mosoro fu ruru moyambu, pa sarangbangaa kuti gu ngasu adee nangia airamungo, na pa sarangbangaa kuti gu moyambu nangia iranyomoro, nga guko naigi ga Bairako taranda, si nika manga ho Yesu ka “ye” ni ti rago bakere gberangbii te. Mbiko gupai re rengbe ka ye na gu berã nga, dungu mbedimbedi aKristano i ka gbianga yo niruru yo ti gu regbo re ya na si kini idi i gbata kura aboro kubayo. Ono tie, Yugoti 7:3 nayawee ga Yesu mbedimbedi amoyambu dunduko i ka ima ‘nogoda he’ tiyo ti gu regbo re niyangaraha kindi.

[Gu kpiahe du ti kpewaraga 27]

“Gbegbere moyambu” agbianga amamu rogo gu garã nangia 1919 te

[Gu kpiahe du ti kpewaraga 28]

Gu ngasu adee nangia airatatamana aima mbakadatiyo ho badidee ada ni

[Gu kpiahe du ti kpewaraga 30]

Ruru amoyambu amangisunge ‘babaga ataranda’

[Gu kpiahe du ti kpewaraga 30]

Gu moyambu nangia iranyomoro amanganga ha te

[Gu kpiahe du ti kpewaraga 31]

Mbedimbedi aKristano gbiati “bakere rimbasa aboro” nahasarago na gayo imarago kindi