“Da Nga Gu Kangara Moyambu Tie Duna Tatamana?”
“Da nga gu kangara moyambu tie duna tatamana, gani gbia amoi ni ri gako aborokporo?”—MT. 24:45.
1, 2. Gini moyambu Yesu amangasunge nani tipa ka riga rani areme, na tipagine si aida ani ini gu moyambu re ti ni?
“AKO awirina, mi ainongo wai si aida mi tambua roni tipa gu kekeapai kusi oni he nga gu ye kina boro tigu regbo mi aida ngbatungapai wagu re te.” Gere nga sangba wirinarani nidee naafu tambuahe fu agu awirina namangasunge rogo gaani rii-basunge nga ga zegino. Ya mo pai adunga tipa roni wa gure? Dungu rani pai aima manga wagu re tipa rani. Ya mo si naida pai wagu re iriwo tirani? Wagusa te.
2 Gu riahe nga ga toro ani agbiaha ti regboho nayugo gupai nga Yesu nga barii dungurati naringbisa gu gako kidohe du tipa ka riga rani. Ada du ko amanga gipai re vurube yó? Ho Yesu aafura ni tipa agu apai i nika inopa ye ko ti ni, ko aya ko nika mangasunge na ‘gu kangara moyambu duna tatamana’ tipa ní “nifu gayo riahe fuyo ti ragoho.”a (Oni gedi Matayo 24:45-47.) Gu kangara moyambu re nga gu boro Yesu amangasunge nani tipa kaa riga apefuoko rogo gi yangada arame re. Si ninyanyakipa pai tipa ani ini gu moyambu re. Padu ani wenengai rogo toro yo na padu ani na wene pagume na Mbori naru kuriipa gu moyambu ko amangasunge nani re.—Mt. 4:4; Yo. 17:3.
3. Ginipai gaani awaraga agumbaha tipa ga Yesu kpiapai du tipa moyambu?
3 Si naida ani rugutirani na ga Yesu kpiapai tipa gu moyambu re. Mbata kusayo, gaani awaraga apepai wa gere tipa gipai re. Yesu amoi gu ruru moyambu re kurii gako aborokporo ti regbo Pendekote rogo gu garã nangia 33. Gu moyambu re aarukuba mbedimbedi aKristano dunduko rogo zegino wadu yó nibadona naatona tigu regbo re kaa ndu kumbatayo. Na aborokporo nga mbedimbedi aKristano wadu yó nibasasa. Rogo 1919, Yesu aásia “pa gako ahe dunduko” fu gu moyambu re. Gu gako ahe re nga agu ahe i mangasunge nani tipa ka songoda sunge Kindo. Ono tie, sirisiri wisigopai gbiati kparakpee yugu gupai nga si naida i rugu gaani giarogopaiyo tipa agu afugo Yesu du tipa gu kangara moyambu re. (Snz. 4:18) Ani wisigingo gu kpiapai re na ki bingo wai si akoda rani kurogoho, ka gaani maabangirise vurangia raka ngbangbaturũ yo watadu auru kpotosende ane.
GINI REGBO GU KPIAPAI RE ADIGISITIHE?
4-6. Tipagine rengbe ani ti ni ka ya gu ga Yesu kpiapai du tipa moyambu atona ka digisotihe fuo 1914?
4 Gu banguapai gu kpiapai re afura tipaha nayugo gupai nga gu kpiapai du tipa gi moyambu re aadigisonga tihe rago Pendekote te, ono rogo gi yangara arame re. Ani bingo wai averesi naundo rani ani dakuti gi digisopai re.
5 Gu kpiapai du tipa gu moyambu re nga papara ga Yesu sangbanebi tipa ‘inapa ye [ko] ti ni, na pa digida rago?’ (Mt. 24:3) Gu bambata papara gu sangbanebi du rogo Matayo 24:4-22, na arogoyo ue. Bambataha adigisitihe rogo gu garã nangia 33 rogo bambata sa kama agarã kada kuti 70, na gu uehe nadigisotihe ti gaani regbo awere. Ya mo agu afugo Yesu du tipa gu moyambu re na digisidigisi arogoyo ue? Oó.
6 Agu afugo Yesu du rogo Matayo 24:29, nafura gbe tipa agu apai si adu nga si nika manga ti gaani regbo. (Oni gedi Matayo 24:30, 42, 44.) Yesu afura fu aboro tipa gupai nika manga ti regbo bakere gberãngbi ki ya i nika “bi Wiri boro ko niye rogo mai ngbangbaturũ” yo. Fuani, ko azungadi agu aboro nika raka ti yangara arame tipa i ningere kakaka ki yaa: “Oni aina nga nigu uru gaoni Gbia ka ye te” na “Wiri boro naye ti gu saa oni aberãnga paha ya.”b Ho Yesu aafura ni tipa agu apai si adu nga si nika amanga rogo yangara arame, ko aafura tipa gu kpiapai du tipa gu moyambu re. Sidu, ani rengbe ka ya agi afugoko du tipa gu moyambu re si atona ka digiso tihe fuo tona yangara arame rogo 1914. Gupai re ima ru wagu re. Tipagine duhe ti ni wo?
7. Gini nyanyakipa sanahe nakuru wa regbo ke ahe atona, na tipagine?
7 Ani berẽnga tooni kurii gu sanahe nga: “Da nga gu kangara moyambu tie duna tatamana?” Rogo bambata sa kama agarã, ndupai aadunga ho tipa boro sana ngbatunga sanahe wagu re te. A wa ani abihe rogo gu kekeapai ye mbata fu gere, amokedi anaamanga iiriwoapai na kini fu gu gamahe nga ga toro fu kura aboro nga gu naayugo gupai nga Mbori kina ku giiyo. (Amo. 5:12) Ndupai adunga ho boro rengbe ka sanahe tipa ka ino gu boro Kristo amoi ní tipa ní ningbembatayo te. Ono tie, rogo 1914, apai adu kia. Regbo ke ahe atona rogo gu garã re. Gure nangia regbo tipa ka kpara rende ti morũ. (Mt. 13:36-43) Wa regbo ke ahe atona, nyanyakipa sanahe angia: Wadu he nga agu aboro naya i nga aKristano nata ngbaduyo nga i nga ndikidi apefuo Kristo, wai rengbe aboro ka ino morũ nga mbedimbedi aKristano? Gu kpiapai du tipa gu moyambu re nafu karagapai furani. Agu apefuo Yesu du nimbedimbediyo nitoro re, i ka i aariga yó rogo toro yo.
DA NGA GU KANGARA MOYAMBU TIE DUNA TATAMANA?
8. Tipagine daha ada ti ni nga gu moyambu re gudu dagba mbedimbedi aKristano yo?
8 Si adu nga gu moyambu re nikadu dagba mbedimbedi aKristano auru kpotosende. I nayamba yó nga “ga bakindo aboromotumo” i afu gu sunge fuyo nga i “yugu gu wene sino gbayaga nga ga guko nayambu [yó] bitimo yo kurogo gako iiriwo imarago yo.” (1 Pet. 2:9) Si daada tie ani ya agu aboro du dagba “ga bakindo aboromotumo” i na gu sunge beyo nga ka yugopai fu akurayo aidipase tipa rengo.—Mara. 2:7; Yugo. 12:17.
9. Ya mo mbedimbedi aKristano dunduko du dagba gu moyambu re? Oni sakirogoyo.
9 Ya mo mbedimbedi aKristano dunduko auru kpotosende nga gu moyambu re? Oó. Anga mbedimbedi aKristano dunduko nafu gu riahe nga ga toro fu awirinayo rogo zegino dunduko te. Gu mbedimbedi aKristano namangasunge ni abaakumba watadu moundo abaakumba, i nga morũ wakina gu kura awirinayo rogo dungurati. I nayugopai kporo na kporo na rogo gayo adungurati, na kini songodi agu arugapai naye be rii-basunge. Ono i nga agu aboro nafu gu riahe nga ga toro fu awirinayo rogo zegino te. Adee kinaho dagba gu mbedimbedi aKristano nga agu aboro nika berãnga pa sunge bayugupai rogo dungurati ya.—1 Kor. 11:3; 14:34.
10. Da nga gu ruru kangara moyambu?
10 Da tie nga gu kangara moyambu du na tatamana re? Ka ani fura tipa gupai Yesu amangihe nga ka riga dungu aboro vurube umba aboro, gu moyambu re nga gu umba badona nga ga mbedimbedi aKristano du gayo sunge nga kaa mbakada gu riahe nga ga toro na kini fuhe tigi yangada arame re. Vuru gi yangada arame re, agu awirina nga gu moyambu re i dunduko namangasunge rogo rii-basunge yo. Rogo agi agarã re, gu moyambu re nga Riigbu Bipasunge nga ga aDezire Yekova. Ono tie, oni kparia gupai nga, gu fugo nga “moyambu” du rogo ga Yesu kpiapai, si nafura tipa bangisa boro sa, nga ruru kangara moyambu. Agu awirina du rogo Riigbu Bipasunge i namanga diaberã kina sa.
ADA NGA AGU ABOROKPORO RE?
11, 12. (a) Gini apai ue i aasia paha fu ruru kangara moyambu? (b) Gini regbo Yesu asia ruru kangara moyambu kurii gako aborokporo, na gini ngbatunga aboro ko asiayo?
11 Oni kparia gupai nga rogo ga Yesu kpiapai, i aasia apai ue fu gu ruru kangara moyambu re. Gu bambataha nga ngerakurii aborokporo; gu uehe nga ngerakurii gako ahe dunduko. Wa duhe nga gu kpiapai re nadigisotihe rogo gi yangara arame re, si adu nga gu aasia pa apai re dunduko nika manga fuo Yesu tona zogarago rogo 1914.
12 Gini regbo Yesu aasia gu moyambu re kurii gako aborokporo? Tipa ka karagapai kuti gu sanahe re, si naida ani karaga tirani berewe kurogo 1914 nangia tonatona regbo ke ahe. A wa ani awirikihe mbata, ti gu regbo re, dungu apambori naata ngbaduyo ki ya i nga aKristano. Gini pambori Yesu arengbe ka sia gu moyambu re rogoho? Karagapai kuti gu sanahe re akuru tifuo aYesu na Bako ye ka wisigo yekaru rogo 1914 dati tonatona 1919.c (Mara. 3:1) I adu na ngbarago ka gbia tooni badona nga ga ruru abawiriki Ziazia Kekeapai nga aguyo nayugu gupai nga i aaberãpa Yekova na Fugoko. Nirengo, agu abawiriki Ziazia Kekeapai re aida i girisiyo, na i aima dia gu girisohe re kugume ti regbo gu asada nagirisi yó. (Mara. 3:2-4) Agu abawiriki Ziazia Kekeapai re angia ndikidi aKristano. Rogo 1919, nga gu regbo kpakarapai adu rogo toro yo, Yesu asia kina gu mbedimbedi aKristano narẽ tipa i du niruru kangara moyambu na ki aasia pa gako aborokporo fuyo.
13. Ada du dagba ga Yesu aborokporo, na tipagine?
13 Ada du tie nga agu aborokporo re? Niwiri guruhe, i nga agu aboro i ariga yó. Ti tonatona yangada arame, agu aborokporo re angia kina mbedimbedi aKristano dunduko. Kusa, agu aborokporo re akodi bakere rimbasa akandoro a. Gu kura akandoro re nga gu ‘rimbasa akandoro du sa’ tii gu ngbembatayo nga ga Kristo. (Yo. 10:16) Gu badona nga ga aborokporo du ue re dunduko nari kina bangisa riahe sa nga ga toro gu moyambu re afuhe. Na ginipai tigaha du tipa agu aboro du rogo Riigbu Bipasunge nga ruru kangara moyambu? I dunduko si aida i ri gu riahe nga ga toro re. Sidu, i ima inoho nga wadu yó nibasasa, i nga aborokporo wa kura apefuo Yesu.
Ka gaani maabangirise vurangia ka ga ku ngbangbaturũ yo watadu nye auru kpotosende ane, ani dunduko nga aborokporo nari kina bangisa riahe sa nga ga toro
14. (a) Gini nyanyakipa sunge fuyo ho fu gu moyambu re, na si nakoda gini ahe? (b) Gini zahe Yesu afuhe fu gu moyambu re? (Oni bi gu sanduki nga “Ka Gu Gbegberẽ Moyambu Ayá Re . . .”)
14 Yesu afu nyanyakipa sunge fu gu moyambu re. Ti agu aregbo i aake Ziazia Kekeapai ti ni, gu ngbatunga moyambu re watadu buruku re anaangerafuo kporo. (Rk. 12:42) Sidu, kinawo fuuyo gu sunge nga ga ngerafuo gu kporo nga ga idapase fu gu moyambu re. Gu sunge re nakoda ngerafuo marã, agu apai nabipa tungusapai, kikindigi adunguratise, gbiati sunge kusa agu awaraga du mburuhe rii Ziazia Kekeapai nga gu ani atungusapai nani na kini wisigihe nitirani na rogo dungurati a. Agu aborokporo re naraka mbiko gu riahe nga ga toro gu moyambu re akusaha.
GINI REGBO I NIKA AASIA PA GA BAIRAYO AHE DUNDUKO FUYO?
15, 16. Gini regbo Yesu nika asiapa gako ahe dunduko fu gu moyambu re?
15 Gini regbo Yesu nika aasia gu moyambu re niuehe kurii “gako ahe dunduko”? Ko ayaa: “Boro maku nga gu moyambu gani gbia ka bi ni ni nimangi wo ho ko ka ye ni. Ya mi fu roni ni rengo, ko aásia pa gako ahe dunduko fu ni.” (Mt. 24:46, 47) Oni kparia gupai nga Yesu nika asia gu moyambu re niuehe ho ko nika ye ki bi gu moyambu re “ni ni nimangi wo,” nga kafu gu riahe nga ga toro. Gi asiapa sunge re aamanganga dunduko ti kina bangisa regbo sa te bangbandaha kina ti ni. Si naida ani ini apai ue ka ani aida ka rugutirani na wai Yesu aasia gi moyambu re kurii gako ahe dunduko nga: gu regbo ko ka da ti ni na gu gako ahe re nga gine.
16 Gini regbo Yesu nika da ti ni? Gu banguapai gupai re afura tipaha nika fu karagapai. Oni tingidi gupai nga, agu averesi ye mbata si nafura tipa Yesu wagu boro ‘naye,’ na gu fugo nga ‘ye’ re, si nafura tipa gu regbo ko nika ye ka sapangbanga ti ni ti yangara arame.d (Mt. 24:30, 42, 44) Sidu, gu pa ‘ye’ Yesu furayo tipaha rogo gu kpiapai nga ga gu moyambu re nika manga ti regbo bakere gberãngbi.
17. Ga Yesu ahe nakoda gini ahe?
17 Gu ga Yesu “ahe dunduko” re nga gine? Gu fugo Yesu amangisunge nani nga “dunduko” re ayugongo kina pa gu gako ahe du auru kpotosende no te. Nirengo, Yesu na bakere pagbia ngbangbaturũ yo. Ko ayaa: “I asia pa ahe fere dunduko ku ngbangbaturũ yo na ku sende no.” (Mt. 28:18; Ef. 1:20-23) Gu gako ahe re nakoda gu Kindo nga ga Masiya, ko adihe rogo 1914 na ko nika zogaha na agu apefuoko du nimbedimbediyo nitoro.—Yugo. 11:15.
18. Tipagine Yesu nikadu na ngbarago ti ni tipa ka asia moyambu kurii gako ahe dunduko?
18 Gini digisopai rengbe ani ka da kutini? Ho Yesu nika ye ni tipa ka sapangbanga ti regbo bakere gberãngbi, ko nika bi gupai nga gu moyambu re aima digo nimangi ome tipa ka fu gu riahe nga ga toro fu gako aborokporo. Ko nikadu na ngbarago tigu regbo re tipa ka asia gu moyambu re niuehe kurii gako ahe dunduko. Agu aboro nga gu moyambu re, i nikadu na ngbarago tipa ko asia yó ho i nika gbia gayo mosoro ni ngbangbaturũ yo.
19. Ya mo gu moyambu re nika gbia bakere mosoro ngbangbaturũ yo kisusi agu akurayo? Oni sakirogoyo.
19 Ya mo gu moyambu re nika gbia bakere mosoro kisusi gu kura mbedimbedi aKristano? Oó. I rengbe ka fu mosoro fu umba badona aboro ono i ki kparakaha akparaka dagbatiyo. Nikpiapai, ani bingo gupai Yesu apehe fu gako ruru amokedi naadu 11 rogo gu yuru nadumbata fu kpiko. (Oni gedi Ruka 22:28-30.) Yesu akido gi umba badona aboro re nga wene mosoro aapido yó tipa padu yó niruruyo. I nikadu naako ti zogarago. Ono fuo agarã kusa, ko ayugu gupai nga i dunduko nga 144,000 nika zogarago naako. (Yugo. 1:1; 3:21) A wa duhe rogo Matayo 24:47, ko akido gu ruru awirinako re nga ko nika asiapa gako ahe dunduko fuyo. Nirengo, wadu yó dunduko nga 144,000 nika zogarago ngbangbaturũ yo.—Yugo. 20:4, 6.
Wa du yó dunduko nga 144,000 nika zogarago na Yesu (Oni bi genewaraga 19)
20. Tipagine Yesu asia moyambu ti ni, na gaani diaberã nga gine?
20 Yesu namangasunge na kangara moyambu kina wai ko amangisunge na umba aboro rogo bambata sa kama agarã tipa ka riga rimbasa aboro. Ko asia gu moyambu re tipa kadu naa kido nga ndikidi apefuoko nikadu adu na riahe nga ga toro beyo rogo gi yangara arame re ka si vura du nga i naga ku ngbangbaturũ yo watadu i nanye auru kpotosende ane. Ani dinga berã adia tipa ka yugo gaani tambuahe nisongoda ani agu awirina nga kangara moyambu re.—Eb. 13:7, 17.
a Genewaraga 2: Mbata kusayo, Yesu ape kpiapai na ki fura tipa “moyambu” nga “buruku.”—Rk. 12:42-44.
b Genewaraga 6: Gu fugo nga ‘ye’ rogo gi veresi re, i adihe rogo gu pa-Giriki nga erˈkho·mai. Gi fugo re kia ti gu ye du rogo Matayo 24:3, 27, 37, 39, nga gu i adihe rogo gu pa-Giriki nga pa·rou·siˈa. Padu Yesu ho na ome kindo beko (pa·rou·siˈa) si atona mbata fu ye ko (erˈkho·mai) ka gbarasa gbegberẽ aboro kusayo.
c Genewaraga 12: Oni bi gu kekeapai nga “Oni Ngere, Mi na Oni Ti Arago Dũ, ki Da ti Digida Zegino,” rogo gi magazini re ti kpewaraga nga 17-18, agenewaraga nga 5-8.
d Genewaraga 16: Oni bi gu kekeapai nga “Mo Gúmbanga ha Furani, Nigini Rago Agi Apai ka Manga Re?” rogo gi magazini re ti akpewaraga 13-14, agenewaraga nga 14-18.