‘Mo Mangi Gamu Sunge Wenengai’

‘Mo mangi gamu sunge wenengai.’—2 TIMOTEO 4:5.

1, 2. Wa vura duhe nga, aKristano dunduko nga abatungusi wene pangbangaa, ginipai i aidaha gbe be abaakumba kuti sangba Ziazia Kekeapai?

ONI nga batakipande Kindo? Kangia wo duhe, oni fu tambuahe tie fu Yekova Mbori tipa gi iiriwo mamu du beroni re. Oni nga bakumba rogo dungurati? Gure nga kura mamu Yekova nagbiaha fu roni kurii gu nga ga takapande Kindo re. Ono tie, ka bangirani ya gonga ti gupai nga, anga gu wirikapai nga ga sukuru watadu birĩ gumbapai, si nasa rani ani rẽ tipa sunge tungusapai watadu ka rẽ tipa ngera kuriiapai rogo dungurati te. Yekova nga gu boro nasa rani ani rẽ wenengai tipa sunge tungusapai, na wa duhe nga, kura aboro dagbarani anyasi gu kura kparakpara arugute nga ga Ziazia Kekeapai, si du i afuku amamu ti ni fuyo i mangisunge ni ababiapai.—2 AKorindo 3:5, 6; 1 Timoteo 3:1-7.

² Agu aKristano dunduko naima kpara gayo raka fu Mbori namanga gu sunge nga ga abatungusi wene pangbangaa, ono gbe, ababiapai, watadu abaakumba, si aida i moi wene kpiapai rogo sunge tungusapai. Mbori gbiati Kristo nakparia agu abaakumba akparia “namanga sunge rogo tungusapai na yugopai” a wa agu akurayo a nga aDezire Yekova akparia yo. (1 Timoteo 5:17; AEfeso 5:23; AEbere 6:10-12) Rogo apai dunduko, si naida gupai nga, ga bakumba yugopai, du wa ka si undo aboro rogo toroyo, mbiko gu mokedi nangia Pauro aya fu gu babiapai nangia Timoteo wee: “[Regbo] nikada ho . . . [gu kura aKristano] ka aida nga pa ziazia yugopai ni ya; ono wa du tuyo ni kperengekperenge he i adungura abayugupai tigayo ku sangba gayo nyemuhe yo. I asá tuyo ti rengo, ki nidege tuyo sa kungba gumbagumba apai. Ono mo dú na rugatise rogo apai dunduko, ki nihi pai ahi gbe, mo mángi sunge batungusipai, mo dígisi ga mangaapai.”—2 Timoteo 4:3-5.

3. Ginipai si aida abaakumba mangihe tipa ka rugatiyo na gupai nga, zire yugopai agbarasanga pa dungurati rogo toroyo te?

³ Tipa babiapai rugutiko na gupai nga, zire yugopai agbarasanga pa dungurati rogo toroyo te, si naida ko irisi gu ga Pauro arugute nayaa: ‘Mo du na rugatise rogo apai dunduko, mo mangi gamu sunge wenengai.’ (2 Timoteo 4:5) Ii, si naida bakumba ‘mangi gani sunge wenengai.’ Si naida ko mangihe naabaha dunduko, sirisiri, watadu ka mangaha wenengai gbe naabaha dunduko. Gu bakumba namanga gako sunge tungusapai wenengai namaa berã ko wenengai fuo agu asunge dunduko du beko, zanga mbu gu watadu ka manga kina betehe ki mbu gu yangaraha. Ngbatunga gu kumba re nga ruru boro zavura rogo rukutu apai a.—Ruka 12:48; 16:10.

4. Gine rengbe ka undo rani ani mangi gaani sunge tungusapai wenengai?

⁴ Pa manga boro gani sunge tungusapai wenengai adianga bakere regbo dedede te, ono si naida boro mangisunge na regbo wenengai. Mangapai sirisiri ti regboho rengbe ka undo aKristano dunduko i mangi gayo sunge tungusapai. Tipa bakumba rengbe ka gbia bakere regbo ka diaha ku gene sunge tungusapai yo, si naida wene mbakadatise beko sani na ki zanga naga kina kubani rogo gako ringbisa regbo apai na ki ini agu asunge si aida ko fukuhe fu kura aboro na ki ini wai a ko ka mangaha wo. (AEbere 13:17) A wa duhe ni sino abaakumba, iriiripa bakumba namanga gu papara sunge amanga nga gako, wa kina Nemaya, nga guko naguari ki rimisi kina boro tiko kurogo sunge dua gu ngapa nangia ga Yerusarema. (Nemaya 5:16) Na si naida ga Yekova amoyambu dunduko kodi beyo kuti sunge tungusapa Kindo dedede.—1 AKorindo 9:16-18.

5. Wai si aida ani berẽ tipa sunge tungusapai?

⁵ Nangbaa gu sunge ngbarago i afuhe fu rani re nga ani du ni atakipande gu Kindo i asigiraha ngbangbaturũ yo! Nirengo, ani nabi gu mamu du berani na nyanyakipaha, nga gu mamu nga ga kodabee kuti tungusa wene pangbangaa rogo agu arago dunduko aboro araka rogoho auru kpotosende mbata fu digido zegino ye. (Matayo 24:14) Wa vura du ani nikpakpa aboro, afugo Pauro rengbe arengba ka ngarasa rani nga gu nayaa: “Ani na gi kumuko re [nga sunge tungusapai] rogo agu ahe i ameke he rogo sende yo, ya gu bakere tandu susi ye be Mbori, be rani te.” (2 AKorindo 4:7) Ii, ani rengbe arengba ka manga gu sunge Mbori akpinyemuhe fu ko ho fu rani, ono tie ani rengbe ka mangaha sa na kina gu ome gbiati tatamana ko afuhe fu rani.—1 AKorindo 1:26-31.

Yugokpiapai Tipa ga Mbori Taarimo

6. Gini kparakparapai namangi dagba ndikidi aYisaraere na agu aYisaraere nga ga toro yo?

⁶ Wa Pauro aafura tipa mbedimbedi aKristano, ko ayawee Mbori “nasa rani ani rengbe . . . ni amangipa vovo ndika.” Gu mokedi re ayugu gu kparakparapai du dagba gu vovo mokido Mbori amangihe na agu aYisaraere nga ga toro yo vurube Yesu Kristo na gu kuru Ndiko Mbori amangihe na ndikidi aYisaraere vurube Mose. Pauro agbia gupai kuti ni nga, ho Mose azoro ni ri Bagangara Sinai yo na gu kpakakpaka ambia nadu na aRugute Bawe nikekehe ti vuroho, kpakpu ko aaki imaima gbe ka aYisaraere arengbanga ka ngana kpakpukoyo ya. Ono tie, fuo bete regbo kusa, kerepai amangi, mbiko “i anyakasi riyo” si ki sa ũdadahe si dadi ngbaduyo yo. Ono tie, ho aboro asatiyo ni koyo du Yekova ni na ngbaduyo yo dunduko, ko nadia gu ũdadahe re adia kusayo. Wa Pauro aafura fuo gure tipa gu sunge tungusapai i afuhe fu agu aboro nadu rogo vovo ndiko, ko ayaa: “Ani dunduko, na kpakpurani ni dadidadi he te ani nayugo gu taarimo nga ga Gbia wa [bitirobi].” (2 AKorindo 3:5-8, 14-18; Gate 34:29-35) Gu ga Yesu “kura akandoro” du areme na kina amamu bera a ka yugokpiapai tipa ga Yekova taarimo.—Yoane 10:16.

7. Wai rengbe aboro ka yugokpiapai tipa ga Mbori taarimo?

⁷ Wai rengbe aboro ingapai ka yugokpiapai tipa ga Mbori taarimo, wa i arengbanga ka bi kpakpu ko kini raki kindi ya? (Gate 33:20) Si naida ani rugutirani na gupai nga, kupati gu taarimo nga ga Yekova, gako bawene ringbisapai gudu kinaho a tipa ka dia gbarasarimo kusayo ti gako bakere pagbia nga gu, gako Kindo nika mangaha. Agu arengo duna pagume dagbaha na ga Mbori Kindo, si nga papara “agu apai du na tandu nga ga Mbori” nga gu agu aboro i auka ziazia toro kuriyo rago Pendekote rogo 33 ti Gaani Regbo, atona ka takapandehe. (Amokedi 2:11) Mbiko gu rugapai nangia ga toro, i arengbe ka manga gu gayo sunge tungusapai wenengai i afuhe fuyo.—Amokedi 1:8.

8. Nibipa sunge tungusapai, gine Pauro adiberã ka mangaha?

⁸ Pauro aima diaberã ka zanga mbupai si ká na ko ti manga ko gako sunge tungusapai wenengai. Ko akepai ki yaa: “Wa du ani na gi mangapase re [“na gi sunge tungusapai re,” NW] tie, a wa ani arogo inapai, ani arungbura nga te. Ono ani ambu gu okooko apai nga ga zee, ka ani ata nga rogo biriki ya, ka ani amanga nga pai na ga Mbori pai ni biriki ya; ono mbiko yugo rengo ani nambakada rimorani fu aboro dunduko ku bangiri Mbori.” (2 AKorindo 4:1, 2) Mbiko guhe Pauro ayambuhe nga “sunge tungusapai,” si ani ayugo rengo rogoho na ani kini gbaragi gu imarago nga ga toro rogo arago dunduko.

9, 10. Wai rengbe ani ka taasarimo Yekova?

⁹ Tipa ka yugo gu boro nga Mburu ndikidi imarago na nga mburu gu imarago nga ga toro a, Pauro akepai ki yaa: “Mbori du naya, ‘Imarago ahasa rago bitimo [yo],’ nga gu ko nahasi rago kpotorani yo, ka fu gu imarago nga ga ina gu taarimo nga ga Mbori ti kpakpu Yesu Kristo.” (2 AKorindo 4:6; Bambata Pai 1:2-5) Wa duhe nga i afu iriiri mamu fu rani niga Mbori abamangisunge, ani bandatirani tie gigirii tipa ani ki rengbe ka yugokpiapai wa bitirobi tipa ga Yekova taarimo.

¹⁰ Agu aboro du rogo gu bitimo nga ga toro arengbanga ka bi ga Yekova taarimo watadu gu yugokpiaha Yesu Kristo ayugoho, nga Bakerepa Mose te. Ono wa du ani niga Yekova amoyambu, ani nadia gu taasitaasipa imarago re rogo Ziazia Kekeapai na kini ariaha koyo du kura aboro ni. Ka si du nga agu aboro du awere rogo gu bitimo nga ga toro naida ka bata be kpio, si naida i di imarago be Mbori. Sidu tie, nidu ani na bakere ngbarago gbiati ngara, ani nairisa ga Mbori arugute ka ziga imarago rogo bitimo tipa si fu taarimo fu Yekova.

Oni Mbu Gaoni Imarago Si Hasirago ti Regbo Wisigo Ziazia Kekeapai na Aboro Kpuyo Yo

11. Gine Yesu agumbaha tipa mbu ani gaani imarago si naahasarago, na gine nga gene sa dagba agu akuraha tipa ani mangi gipai re rogo gaani sunge tungusapai?

¹¹ Yesu aya fu apefuo ko wee: “Ga zegino imarago nga oni. Gu bakporo dua yo ri bagangara ka i oko nga ha te. Ka boro tigi nga baro ki moi he tii maduka yo te, ono ni nidua ha auru nguaha; si ki nihasi rago fu agu yo dunduko du dimo yo. Imaroni hasi rago ahasa ku bangiri aboro i bi gaoni ruruapai, ka taasa rimo Baroni du ngbangbaturũ yo.” (Matayo 5:14-16) Gaani wene sino mangaapai rengbe arengba ka sa kura aboro i fu taarimo fu Mbori. (1 Petero 2:12) Na agu apapara gaani sunge tungusa wene pangbangaa du nibakiakia, si nafu dungu amamu fu rani tipa ima rani nihasirago. Pai sa dagba agu akuraha ani aida ka mangaha nga, ka aria gu imarago nga ga toro du rogo Fugo Mbori koyo du aboro ni ninungusa ani wisigo Ziazia Kekeapai na yo kpuyo yo, nga gu wisigopai duna sangbanaha ti ni. Gipai re nga nyanyakipa gene ka manga gaani sunge tungusapai wenengai. Gini aberã fuku yo ho nga gu rengbe ka undo rani ani nungusi wisigo Ziazia Kekeapai na aboro, nga gu wisigopai nafõngbadu agu aboro yo nagbata rengo?

12. Wai du kparakpee na pagume dagbaha na nungusa wisigo Ziazia Kekeapai na aboro kpuyo yo?

¹² Pa kpara ani kpee fu Yekova tipa nungusa wisigo Ziazia Kekeapai nayugo gupai nga, ani na nyemu ka nungusa wisigo Ziazia Kekeapai na aboro. Si nayugo gupai a nga, ani ima ino nyakapa undo aboro i gbia inohe tipa Mbori. (Yezekere 33:7-9) Yekova akaragapai akaraga nirengo kuti gaani akpee na ki fu maku fu rani na gaani ruru asadatise rogo sunge tungusapai. (1 Yoane 5:14, 15) Ono ani naakparanga gbua tipa ka gbia kina boro ka nungusa wisigo Ziazia Kekeapai na ni kpuni yo sa te, ono ani naida ka nungusa wisigopai na ni ti aregboho nibasasa ngba wene gene. Fuo ani sigira wisigopai na boro, kparakpee gbiati berãkuriipai nibipa agu azingo du ti gu boro ani awisigopai na ni re nika undo rani ani mangihe wo.—ARomo 12:12.

13. Gine rengbe ka undo rani ani nungusi gu wisigo Ziazia Kekeapai na aboro kpuyo yo duna wene fuöho ti ni?

¹³ Tipa ani rengbe ka nungusa wisigo Ziazia Kekeapai na aboro kpuyo yo na wene fuöho ti ni, si naida ani mbakaditirani wenengai ti aregboho dunduko nibasasa. Ka ani bi tirani wa rẽnga ani te, si rengbe kadu niwenepai ka ani kparia wai gu babiapai ninaanungusa gu Wisigo Buku Nga ga Dungurati anungusaha rogo aposo nibasasa. Ti kura aregbo, ani rengbe ka gasa gu kura abatungusipa Kindo ku gene nungusa wisigopai yo na aboro, nga agu abatungusipai ninaagbia wene asangbana rogo nungusa wisigo Ziazia Kekeapai na aboro kpuyo yo. Rengo ngaha nga, gu berã nga ga Yesu gbiati gako agene yugopai, nga agu apai si aida gbe ani wisigihe.

14. Wai rengbe ani ka rimisopai ku ngbadu gu boro yo ani awisigo Ziazia Kekeapai na ni?

¹⁴ Yesu aduna ngbarago tiko ka manga gupai Bako akpinyemuhe du ngbangbaturũ yo na ka fura na kura aboro tipa ko. (Atambuahe 40:8) Ko angia bayee boro na kidu na diabese rogo gako yugopai ka rimisoho ku ngbadu agu aboro yo nanadegatuyo kutiko. (Matayo 11:28-30) Sidu tie, ani mangi asadatise nyanyakii ka rimiso pai ku ngbadu agu aboro yo ani awisigo Ziazia Kekeapai na yo. Ka ani aida ka mangaha wo, si naida gupai tie nga ani mbakaditirani tipa aregbo wisigopai nibasasa na ki moi gu kparakparapai ku berã rani yo du tipa agu aboro nibasasa ani awisigopai na yo. Nikpiapai, kangia gi boro ani awisigopai na ni re ni dagba agu aboro ainonga pai mbata tipa Ziazia Kekeapai ya, si aida gupai tie nga ani rugusi gupai bangirini nga, fugo Ziazia Kekeapai nga rengo. Tipa ngbatungapai wa ga gu boro re, si aida gupai ziazia nga ani gedi dungu averesi funi na kini sakirogoyo.

Oni Undo Aboro I Girogo Yugopai na Kpiapai

15, 16. (a) Wai rengbe ani ka undo gu boro ani awisigopai na ni agianga rogo gupaiyo yugu yo ho na kpiapai rogo Ziazia Kekeapai ya? (b) Ginipai rengbe ani ka mangaha ka gu gaani buku sa mangisunge na gu kpiapai du nikpakarakpakaraha fu gu boro ani awisigo Ziazia Kekeapai na ni tipa ni girogoyo?

¹⁵ Si rengbe kadu nga gu boro ani awisigo Ziazia Kekeapai na ni agianga rogo kura agu asanza watadu yugopai na kpiapai du rogo Ziazia Kekeapai te. Nikpiapai, si rengbe kadu nga ni agianga rogo gupai Yesu aaberãha ho ko afura ni tipa maa ramba watadu baro rii nguaha te. (Marako 4:21, 22) Yesu aafura tipa gu ramba nadu mbata nanaki na nzeme ti gu gire i azogoho kurogo gu nzeme re. I anamaa ngbatunga agu aramba re rii kparakpara nguaha na rogo gi gene re, si ki rengbe ka hasarago rogo vurobambu. Pa weteka boro pai tipa gu riiapai nga “Lamp (baro)” na “Lampstand (nguaha)” rogo ngbatunga agu abuku du wa Insight on the Scriptures rengbe ka undo ni ni girogo ga Yesu sanza ziazia.a Nga gu wene undo ngaha fu boro ni ndu na wene sakarogopai yo fu gu boro ni awisigo Ziazia Kekeapai na ni, nga gu sakarogopaiyo gi boro re nika du na tambuahe tipaha!

¹⁶ Gu buku naundo rani rogo wisigo Ziazia Kekeapai na gu boro ani awisigopai na ni, rengbe kadu na yugopai na kpiapai rogoho nga gu du nikpakarakpakaraha fu gu boro re tipa ni girogoyo. Si naida ani di regbo ka sakarogoyo funi, watadu ani yugu gupai re na kura kpiapai du rogoyo kina sa nani. Isoke si rengbe kadu nga buku nanyakasa gupai nga wene badiarogatise gbiati kodikodi asadatise ninyanyakipa pai rogo rogatise. Tipa ka yugo gipai re na kpiapai, i rengbe ka fura tipa gu kumba naza beko kusayo ti gire ko ayanga ti ni wege yo kini mo ka kido kuti gu kura bangimbaro du kina wege yo a ono du beko watadu anduko ti gire, tipa ko tuka ko. Kuba gure, oni rengbe ka yugokpia kodabee kuti sunge ngba gu gene abamangisunge aundo tiyo rogoho ho i atanga zozoga akorotoni ni rogo tarambiri ngbabeyo ti gene tenge.

17. Ginipai rengbe ani ka wirikaha be Yesu nibipa yugopai na kpiaapai?

¹⁷ Pa rengba ani ka yugopai na kpiapai kuba kuraha, naida mbakadatise mbata tipaha. Si nga gu gene rengbe ani ngbaha ka yugo gupai nani nga ani na nyemu gu boro tirani ani awisigo Ziazia Kekeapai na ni re. Yesu anamangasunge na taata yugopai na kpiapai tipa ka sa kpakarakpakaraapai si du ziazia. Gu gako Tungusapai nadu rii Bagangara yo nga kpiaapai tipa gipai re, na Ziazia Kekeapai nayugo gupai nga, gako yugopai aduna wene sangbanaha kurii agu aboro naagiaha. (Matayo 5:1–7:29) Yesu anasakarogo apaiyo fu aboro nizerangbaduse mbiko ko aduna nyemu aboro tiko.—Matayo 16:5-12.

18. Ginipai tambua yo paha ya si, si aida ani mangi agu averesi na ni ke yo kina paha gbua rogo gaani abuku?

¹⁸ Gaani nyemuse tipa aboro nika fõngbaduraniyo ani ‘sakipai na yo rogo Ziazia Kekeapai yo.’ (Amokedi 17:2, 3) Tipa ani rengbe ka manga gipai re, si naida ani ta wisigopai kini kparikpee na kini mangisunge nitatamana na agu abuku ‘ruru buruku’ akusaha. (Ruka 12:42-44) Nikpiapai, gu buku nga, Gu Inohe Nandu [na Boro] sa Nyenye Unga, si na dungu keke-keke averesi rogoho.b Mbiko wa adunga ba tipa akuraha ya, i keke kina paha gbua rogoho. Ti regbo wisigo Ziazia Kekeapai na boro, si ninyanyakipa pai ani gedi kandara bete agi averesi re na ki sakirogoyo, nga agu averesi keke yo kina paha gbua. Nirengo, mburu gaani yugopai auru Fugo Mbori, mbiko si na bakere ome ti ni. (AEbere 4:12) Oni gbeberã gu boro oni awisigopai na ni kuti Ziazia Kekeapai vuru regbo wisigopai naabaha, kini zara agu averesi dedede du rogo agenewaraga. Oni undo gu boro oni awisigopai na ni nibi gupai Ziazia Kekeapai agumbaha tipa kurapai watadu tipa kura gene mangimangipai. Oni mangi nyanyaki asadatise ka yugo wai funi rengbe ni ka gbia undo be irisa fugo Mbori.—Yesaya 48:17, 18.

Oni Sana agu Asanahe Nasa Boro Ni Berẽ

19, 20. (a) Tipagine si aida ti ni ani naasana agu asanahe du tipa ino ga aboro bipai wa ani anungusa wisigo Ziazia Kekeapai na aboro kpuyo yo? (b) Ginipai rengbe ani ka mangaha ka gu kurapai sa ani awisigoho na boro aida i sakirogoyo kindi kumbatayo?

¹⁹ Pa sana Yesu asanahe nibirĩ aundo aboro i sakipai berãyo yo. (Matayo 17:24-27) Ka ani sana gu boro ani awisigo Ziazia Kekeapai na ni na agu asanahe du tipa ino gani bipai tipa pai na agu asanahe abanga zee tini ya, gani akaragapai rengbe ka yugo gupai fu rani ni aberãha tipa gupai re. Ani rengbe ka bi gupai nga, ni naka kindi kuti agu apai natagbagatihe na agu apai du rogo Ziazia Kekeapai. Nikpiapai, si rengbe kadu nga ni naida aida kindi kuti Tirinita. Rogo gu buku nga Inohe rogo kapita 3, si naya yo wee gu fugo nga “Tirinita” si rogo Ziazia Kekeapai te. Gu buku re narogoda averesi rogo Ziazia Kekeapai ka yugo gupai nani nga, Yekova kia ti Yesu na anga ziazia toro nga boro te, ono si nga ga Mbori zaza ome. Pa geda ani agi averesi re na kini sakipai tipaha rengbe arengba ka yugo gu gopai si aidaha. Ono ginipai ka ani mangi ka si du nga si naida ni ini gu kura apai kurii gure? Isoke si rengbe kadu nga fuo manga ani gu gaani wisigopai ani naamangaha dedede nga gu nika ye fuo gure, ani rengbe ka dia bete regbo kuti saka gupai nika undo ni riipa gipai re, nga gu du rogo kura buku nga ga aDezire Yekova, ngbatunga gu du wa gu burosua nga Should You Believe in the Trinity? Fuo gure tie, ani ki rengbe ka tona gaani wisigopai berewe rogo gu buku nga Inohe re.

²⁰ Ani ya agu akaragapai nga ga gi boro ani awisigopai na ni re si kia kuti gu sanahe sana ani ni nani ka bi gani bipai, nga gu ani aaberã ya si ni ka fuhe watadu si fu kina gberarago fu rani. Kangia si tipa vugundö, watadu gupai ka boro aimanga na zinga behe ya, ani rengbe ka fu berã tie funi nga wee ani susi na gaani wisigopai kumbatayo ani afura tipaha gizo. Pa ino ani gupai nga, ni navugundö kindi, rengbe ka undo rani ani gbata gu buku funi duna pa vugundö rogoho nga gu rengbe ka undo ni ni sono kumbatayo rogo toroyo. Wa ani a’asada tirani ka rimisopai ku ngbadu gu boro yo ani awisigopai na ni, ani rengbe ka kparakpee tipa Yekova undo ni ni sono rogo toroyo.

21. Ginipai rengbe ka manga ka ani aria gaani gene yugopai si rengbe na gu ndikidi azingo nga ga gu boro ani awisigo Ziazia Kekeapai na ni?

²¹ Ka ani mbakaditirani wenengai na ki gbia undo be Yekova, zanga kapa, ani arengba arengba ka aria agene yugopai tipa si rengbe kuti ndikidi agu azingo nga ga gu boro ani awisigo Ziazia Kekeapai na ni. Wa regbo kaa ndu kindi, ani arengba arengba ka undo ni ni sonosi nyemuse bakere gbe tipa Mbori. Ani arengba arengba a ka undo ni ni kiisi gani irisa gbiati tambuahe tipa ga Yekova riigbu. Nairiwo wai si afu ngbarago fu rani wa ani abi gupai nga agu aboro ani awisigo Ziazia Kekeapai na yo naida aida kuti gupai nga, ‘Mbori gudu dagbarani nirengo.’ (1 AKorindo 14:24, 25) Sidu tie, ani nungusinga agu awisigo Ziazia Kekeapai duna fuöho ti ni na kini mangi agu apai dunduko rengbe ani ka mangaha tipa ka undo kura aboro i sa tiyo niga Yesu abawiriki.

Gu Ũkumuko Si Aida Ani Bihe na Nyanyakipaha

22, 23. Ginipai si aida ani mangihe ka ani aida ka manga gaani sunge tungusapai wenengai gbe?

²² Tipa ani rengbe ka manga gaani sunge tungusapai wenengai, si naida ani kido kina kuti gu ome Mbori afuhe fu rani. Wa Pauro aafura tipa sunge tungusapai, ko ake gupai fu akurako nangia mbedimbedi aKristano nga: “Ani na gi kumuko re rogo agu ahe i ameke he rogo sende yo, ya gu bakere tandu susi ye be Mbori, be rani te.”—2 AKorindo 4:7.

²³ Singia ani nga mbedimbedi aKristano watadu “kura akandoro,” ani wa kina gu poporopoporo akoro i amehe rogo pere. (Yoane 10:16) Wa vura duhe wo, Yekova rengbe arengba ka fu gu ome fu rani ani aidaha tipa ani rengbe ka manga gu sunge ko afuhe fu rani fudifudiapai ki vura nigbia rani vurũ. (Yoane 16:13; AFiripoio 4:13) Sidu tie, ani kido kuti Yekova zanga kapa, kini bi gaani sunge tungusapai na nyanyakipaha, na kini mangihe wenengai.

[Gu rukutu kekeapai du bandu kpewaraga yo]

Gaoni Karagapai Nga Gine?

• Ginipai rengbe abaakumba ka mangaha tipa ka manga gayo sunge tungusapai wenengai gbe?

• Wai rengbe ani ka mbakada ngbanyaa gaani wisigo Ziazia Kekeapai na aboro kpuyo yo?

• Ginipai ka oni mangi ka gu boro oni awisigo Ziazia Kekeapai na ni agianga rogo gupaiyo yugu yo ho na kpiapai ya watadu ni naida kura tingidapai tipa gu kurapai sa?

[Gu kpiahe du ti kpewaraga 18]

Agu aKristano nga abaakumba rogo dungurati nayugopai na kini raba akurayo aidipase rogo sunge tungusapai

[Gu kpiahe du ti kpewaraga 20]

Pa nungusa ani wisigo Ziazia Kekeapai na aboro kpuyo yo nga gu wisigopai duna sangbanaha ti ni, nga gene sa dagba agu akuraha ka sa gaani imarago si naahasarago