Ga Mbori Kindo Nga Ndikidi Zogarago Areme

“Wai rengbehe kadu nga dungu aringara, nga agu duku na ngbatunga agu asino mangaapai nibakiakia nga ga agu aboro du rogoho, na du pa gayo sona kumbatayo nibakiakia, narengbe ka giatiyo riipai sa? I nayawee kinagu ka vura ye sa aboro rogo kura pavuru haurago, si ka sa gupai nga ngbatunga aboro kpamiatiyo.”—Wogu gu waraga pangbangaa nga ga aboro Australia nga The Age, apehe.

KINAGU ka vura ye rogo kura pavuru haurago? Singia gupai re rengbe ka kpamia gu rikaaboro dunduko du auru kpotosende watadu si arengbanga te, gu sangbanebi nga ga Ziazia Kekeapai nafura afura tipa gu fudifudipai nika ye ki sa rikaaboro rogo zegino dũ i koditiyo sa tipa vura. Na nirengo, gu kere fudifudipai re aye be agu aome susi agu aome dunduko du auru kpotosende herẽ.

Bakindo Davide, nangia bazogo gu ringara aYisaraere nadu mbata, afura nisangbanebi kumbatayo tipa gipai nika manga rogo zegino re. Mbiko gu tingidapai naye fuko be ga Mbori toro, ko akepai ki yaa: “Abakindo zegino natangara tiyo, abazogo aboro ki ta bura dagba yo, kuti Yekova na [kuti] gako mbedimbedi boro niya, ‘Ani káfu gayo gire akafa kpa, ki bafu gayo ũrugapai ti rani ku sa yo.’” (Atambuahe 2:2, 3; Amokedi 4:25, 26) Oni kparia gupai nga, abazogo zegino nika kodatiyo kidu sa kuti Yekova, nga bakusi zegino naabaha, na kuti gako mbedimbedi boro, watadu gako Bakindo ko nasia ko nga Yesu Kristo. Wai rengbehe kadu nga gupai re nika manga?

Kuti gu tangaraapai nga ga Ziazia Kekeapai si atangaraha ti gene mangaha ringbisihe kuti agu aregbo agi apai re amangi ti ni, gbiati gu sangbaanebi digi, rogo gu garã nangia 1914, Mbori asigira gako Kindo ngbangbaturũ yo tiibe Yesu Kristo nigaha Bakindo.a Ti gu regbo re, gu rikaaboro nga ga zegino yo aduna bangisa berã sa bangiri yo dunduko. Kuba gupai nga i rafu gu pagbia nga ga Mbori tiibe gako vovo Kindo, i atona zuanihe dagba yo tipa ome, nangia Bakere Vura, watadu Bambata Vura Nga ga Zegino.

Wai Yekova Mbori abi ngbatunga gu mangaapai agu abazogo nga aboro amangaha re? Ziazia Kekeapai nayaa: “Gu ko sungu ngbangbaturũ yo ko amóma amoma; Yekova amáa yo i du adu bamongo. Ko ki gumba pai fu yo ni kina gako zinga, ki nifudi yo ni gako bakere erã.” Fuo gure, Yekova nika ya fu Wiriko wee, nga gu Bakindo mbedi yo ko tipa ko zogorago rogo gu Kindo re: “Mo sana re, mi afu arikaaboro foro ni gamo ũkumbo, na digida kpotosende yo ni gamo. Mo akuadi yo ni ngbondo marã, ki mere yo i ki kuadi rukutu wa kina ga bamepere pere.”—Atambuahe 2:4, 5, 8, 9.

Gi yangara gburuwa rikaaboro na ngbondo marã re, nga gu rikaaboro nasoga ga Mbori Kindo, si amanga ti regbo Aramegido. Gu yangara buku nga ga Ziazia Kekeapai nga Yugoti, si naringbisapa gi kerepai re ni “gu vura nga ga gu bakere rago nga ga Mbori, nga gu ko du na tandu apai dũ,” nga gu vura i adungura “abakindo zegino dunduko” tipaha. (Yugoti 16:14, 16) Be gu ome maapai kurii kura aboro nga ga adaimona, arikaaboro nika kpamiatiyo niyangaraha tipa ka mangapai sa, nga ka sovura kuti Mbori nga gu boro duna tandu apai dũ.

Gu regbo aboro ka dunguratiyo kidu sa ka sovura kuti ga Mbori bakere pagbia re, si nambeda nikina boro ipo. Ni gupai nawira zire ono si kingia kina rengo, gayo “kpamiatise” ayenga na undo fuyo te. Kuba gure, gi gayo mangaapai re nikangia tonatona regbo gu zereda ngbatunga aboro aima digo nipidihe tipa gbanga regbo. Wai si kadu wo? Rogo gu yangara vura re, ga Mbori Kindo “akuadi agi angbi [nga ga zegino] re rukutu ki digisi he dunduko, si ki nye anye kindi.” (Daniere 2:44) Ga Mbori Kindo, angianga gu riigbu nga ga aboro ya, nikangia gu zogarago nika ye na gu zereda kurogo zegino du nyemuhe ti ngbatunga aboro.

Bangbasia Bazogo Rogo gu Zogarago Nga ga Kindo

Si nga gu Kindo dungu ndikidi aperengo naakpara tipaha ho i naaya ni: “Ga ngbi [“kindo,” NW] yé, Ani mángi rogo kpotosende wa mo akpi nyemu he, wa du he ngbangbaturũ yo.” (Matayo 6:10) Anga ga Mbori Kindo nga gu kungbopai du ngbadu aboro yo te, ono si nga ndikidi zogarago nga gu ima manga wene apai tona rogo 1914 nga gu regbo i asigiraha ngbangbaturũ yo. Ani wisiginga gu banguapai nayugo gupai nga, ga Mbori Kindo nga ndikidi zogarago namangasunge amanga areme.

Bambatapai nga, gu zogarago re na gaha be-basunge kina ti ni duna bakere ome gbe na kini mangisunge wenengai tiibe Yesu Kristo nga gaha Bakindo. Rogo gu garã nangia 33, Yekova Mbori amoi Yesu Kristo nibarii gu dungurati nga ga aKristano. (AEfeso 1:22) Natona ti gu regbo re kaa ndu kumbatayo, Yesu aima tona kaa mangasunge na gako pagbia, kini yugu gupai nga, ko nga gu bazogo ima rẽ na ngerakuriisunge. Nikpiapai, ho bakere ngbongi ati ni kurii aboro Yuda yo rogo bambata sa kama agarã, agu aboro nadu rogo agu adungurati nga ga aKristano aguari nibasa ka mangapai ka undo akurayo. I ambakadipai tipa ka fu undo, na i ki kedi aBarunaba na Saura i guari Andiokia yo na gu undo re ka ndu nani fu awirinayo.—Amokedi 11:27-30.

Ani namaabangirani nga Yesu Kristo nika mangaapai amanga susi gure ti gi regbo re, nga gu regbo gu zogarago nga ga Kindo amangasunge. Ti agu aregbo dunduko gberango ati ni kurii aboro, wa bazigizo, angbongi, aime akangbii, bakamikami wege, abavugumo, watadu ho zaragazaraga fofoi-ime-mbia agbada ni, agu aboro du rogo agu adungurati nga ga aKristano nga ga aDezire Yekova naguari niipo ka mangapai sa gu zingo nga ga akurayo aidipase na ga gu kura aboro du rogo gu dagbarago gipai re namangi rogoho. Nikpiapai, ho kere bazigizo agburuwa arago ni El Salvador yo rogo Ngi gbiati Wegebe rogo 2001, i ambakadi apai rogo agu apapara ringara re dunduko tipa ka fu undo, na abadona aDezire Yekova Kanada yo, Guatemala yo, na Amerika yo aguari ka fu undo. Agu aba i airisombori rogoho bazigizo akuodihe, i adudua agu biata kubaha gbiati akporo 500 rogo guru regbo.

Avuru ga Mbori Kindo

Natona rogo 1914 nga gu garã i asigira ga Mbori Kindo nga ga ngbangbaturũ, si aima tona kaa dungura avuruhe dagba aboro rogo zegino na kini mbakadiyo tipa i naamanga apai ti genehe. Gipai re nga iiriwo digisidigisi gu sangbaanebi Yesaya akehe ki yaa: “Si aye ka du rogo yangara arame ya i ambákada gu bagangara nga ga Yekova bambu [gu irisombori aboro amangaha du paha kuari] ni bagbanga ha ki susi abaagangara dunduko, . . . arikaaboro dunduko andú koyo.” Gu sangbanebi re nayugo gupai nga, ‘dungu aboro’ nika ndu kurii gu bagangara re na kini di ga Yekova arugute gbiati andiko kugume.—Yesaya 2:2, 3.

Gi mangaapai re ima kusa gu riigbu nyakipaha kisusi ti gi gaani regbo re, nga gu riigbu nga ga agu awirina nga aKristano bangeyo nasusi 6,000,000 rogo aringara susi 230 auru kpotosende. Ti regbo gu kikindigi adunguratise nga ga dungu aringara aDezire Yekova naamangaha, dedede kina ngba agu aboro ninaabiyo ninaazera ka bi gu nyemuse, pazereda, na kpamiatise du dagba gu rimbasa aboro re, nga agu aboro akparanga pai dagbayo nibipa agu aringara nibakiakia du yo rogoho, gayo sino mangaapai nibakiakia, watadu afugoyo nibakiakia ya. (Amokedi 10:34, 35) Oni aidanga kuti gupai nga, tipa zogarago rengbe ka kpamia akama angbatunga aboro nibakiakia i kini sungu rogo pazereda, si nga gu zogarago duna ome ti ni na zanga fudifudipai, na nga ndikidi zogarago tee?

Ga Mbori Kindo Gbiati Yugopai

Azogarago dunduko duna arugute behe si aida avuruhe irisihe, na agu aboro dunduko naida ka ra kutiibe gu zogarago re du wa ka i mangi agu arugute re. Teketeke wa kina gure a, ga Mbori Kindo na gaha arugute kina ti ni si aida agu aboro dunduko naida kadu ni avuruhe irisihe. Ono tie, si nga bakere sunge nirengo ka sa dungu aboro duna badungu agu apai du tipa yo nibakiakia i di bangisa arugute kugume kaa mangaha. Gipai re tie du berewe nga gu kura dezirepai nayugo gupai nga, ga Mbori Kindo nga ndikidi zogarago, nga gu gaha mbakadapai tipa yugopai fu aboro arimonga kina kurii aboro yo sa kini ariaha ya, ono si na’aria ngbaduyo yo a’aria a.

Wai gu zogarago nga ga Kindo amanga gi kpakarakpakara sunge re? Nimanga avuru gu Kindo re gu sunge amokedi anamangaha, nga ga tungusapai ‘nitanga nani ti akporo’ na kini yugu Fugo Mbori fu aboro nibasasa. (Amokedi 5:42; 20:20) Wai ngbaa gi gene yugopai fu aboro re? Gu bavugahe nga ga Katoriko ko nga Jacques Johnson, akepai rogo gu waraga pangbangaa nakura bara sa rogo poso nga ga aboro Kanada tipa gu bakere asadatise ko amangihe ka za dee ti wisigopai na aDezire Yekova. Ko ayaa: “Kina iriwoho nati tire na mi arugutire na gupai nga, mi adunga na diabese rogo gipai re te. . . . Mi atona ka rugatire na gupai fuo dungu adiwi nga, agi adee nga aDezire Yekova re azi wene pagume na gi naagude nanarengbanga ka ta re ya. I akoditiyo kuti ri kini undo ri na ki zi dawedawe bakure na ri. Fuoho aturanga te ri ki sa tiri nizaaza boro rogo gayo pambori na ka wiripai adunga ho ka mi amangihe ka za gupai re si he manga ya.” A wa gu pangbangaa aDezire Yekova ayugoho du rogo Ziazia Kekeapai afõngbadu gi dee yo nangia Katoriko mbata re gbiati gu gayo sino mangaapai nga ga aKristano, kinawo a si afõngbadu dungu aboro yo rogo zegino dunduko.

Gi ngbatunga yugopai re, nga gu yugopai nga ga Kindo, mburuhe rii Ziazia Kekeapai, nga gu buku nasongoda gu nyanyakipa apai na andiko nga ga ruru mangaapai. Si nayugopai fu aboro i kpinyemu tiyo dagbayo na kini fu irisa dagbayo zanga bipa agu apai du tipa akurayo. (Yoane 13:34, 35) Si naundo aboro a i karagapai kuti gu zungodi yo nga: “Ka oni ríngbisi nga tironi na gi zegino re ya, ono oni sá tironi asa ni mbakada berãroni berewe, oni kpária pa gu he nga ga Mbori nyemu he du ni wene he, nzunzu, ni ziazia ha.” (ARomo 12:2) Wa i nambu gu kuru sino raka i adu nani mbata na ki sa tiyo ka mangapai na ngbanyaa kuti andiko gbiati kuti agu arugute adunga ngburungburu ya nga ga gu zogarago nga ga Kindo, dungu aboro ima gbia zereda gbiati ngbarago awere na wene maabangirise tipa raka kumbatayo.—AKorosaio 3:9-11.

He sa dagba agu akuraha nafu undo kisusi tipa agi aboro re rengbe ka kpamiatiyo, si nga gi magazini re, nga Ngbaõbambu Sinziri. Mbiko gu mbakadapai mangi yo ho tipa birĩ sa-fugo kini kodihe na gu badungu aũsunge nafu undo tipa sa-fugo kurogo dungu akuraha, i nakusa gu bangua papara kekeapai du rogo Ngbaõbambu Sinziri ti bangisa regbo sa rogo afugo 135, na dagba agu aboro nagedaha, bange aboro susi 95 rii sa kama rogo zegino dunduko nawisigo agu apai du rogoho rogo kina boro afugoyo ti bangisa regbo sa na akurayo.

Boro kura pambori sa i ayambaha nga Mormon atangarapa agu aboro pambori du kusayo ti gako kanisa nga aguyo duna diabese rogo sunge tungusapai kisusi. Agu amagazini aDezire Yekova akusaha nga Ngbaõbambu Sinziri na Awake!, ko akodihe ku dagba agu amagazini ngbaki afugoho kisusi tipa tungusapai ki yaa: “Anga boro ho nika kitangbaanga Ngbaõbambu Sinziri na Awake! ya si nangarasa aboro i naaraka wa apai dunduko ima ngba kubarayo yo te, ono ni gupai dukia ti gure, si nasa aboro i rugutiyo na pa agu apai namanga, nga gupai mi naabinga ha dedede rogo kura abuku pambori ya. Agu apai du rogo Ngbaõbambu Sinziri na Awake!, si nafu wasa, mbiko mburu agu apai re rii arengo, ni agu apai i aima wetekaapai tipaha wenengai na du tipa gu ndikidi apai du rogo zegino.”

Batikango gu gopai duho ya ga Mbori Kindo nga ndikidi zogarago namangasunge amanga ti ni te. ADezire Yekova natungusa “gi wene pangbangaa nga ga kindo” re kakaka fu akurayo aboro kini yambu yo i ye ka sa tiyo ni avuruhe. (Matayo 24:14, NW) Ya mo ngbatunga gu maabangirise re angbanga tironi tee? Oni rengbe arengba ka gbia agu amaku nika ye be koda oni tironi na agu aboro i ayugo agu andiko fuyo nga ga gu Kindo re, na i kini mangi nyanyaki asadatise ka raka na ngbanyaa kuti ni. Gu ngbaa kisusi gure berewe nga oni rengbe arengba ka ye ki gbia ngbarago be gu maabangirise nga ga raka nyeanye kindi tiibe gu zogarago nga ga Kindo re, rogo gu vovo zegino kido yo he tipaha, nga gu zegino “ruru apai nikanye rogoho.”—2 Petero 3:13.

[Gu rukutu kekeapai du bandu kpewaraga yo]

[Gu kpiahe du ti kpewaraga 5]

Arikaaboro akimbo vura nga ga zegino rogo 1914

[Gu kpiahe du ti kpewaraga 6]

Gu gamahe kina boro afuhe nitini du tipa fu undo nga gopai tipa gu nyemuse nga ga aKristano tingba sunge

[Gu kpiahe du ti kpewaraga 7]

ADezire Yekova rogo zegino dunduko nagbia undo be bangisa mbakadapai tipa yugopai