Wa Aboro Avura Nirungosi Yo, I Kindi Na Kina Ngbarago
“Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re.”—MATAYO 5:11.
1. Gini kidohe Yesu afuhe fu apefuo ko tipa ngbarago na tipa rungosi aboro yo?
HO Yesu akedi gako amokedi ni nibambataha i ndu ka tungusapa Kindo, ko arugu yo ya i agbiatiyo agbia na sogote be aboro. Ko aya fuyo: ‘Aboro dunduko nika soga roni asoga tipa rimore.’ (Matayo 10:5-18, 22) Ono tie, mbata kusayo, rogo gu gako Tungusapai Nadu rii Bagangara yo, ko akido gako amokedi gbiati kura aboro ya ngbatunga agu asogote aboro ka soga yo nani re agbarasanga pa gayo ngbarago te. Nirengo, Yesu ayawee pa gbia aKristano ngbarago nikodikodihe kuti rungosi aboro yo! Wai rengbe rungosi ka ye na ngbarago fu boro?
Rungo Mbiko Manga Rurupai
2. Ringbisihe kuti afugo Yesu na kuti afugo gu mokedi nangia Petero, gini ngbatunga arungosi naye na ngbarago fu boro?
2 Gu muambe ngbarago Yesu aringbisipai tipaha, si nga: “Aboro maku nga agu yo i arungosi yo tipa rurupai, bambiko gu ngbi nga ga ngbangbaturũ nga gayo.” (Matayo 5:10) Rungosi nitihe niguhe ka i tambuapaha te. Gu mokedi nangia Pauro akepai ki yaa: ‘Ka oni ingi, i ki ta roni mbiko ho, oni ki idi pa ha ni zera, gini tambuahe du ti ni? Ono ka oni mangi wenepai, ki nihi apai mbiko ho, oni ki idi pa ha ni zera, si du ni wenepai ku bangiri Mbori.’ Ko aya kurii gure wee: “Ono ka i rungosi nga gu ni dagba roni mbiko pa imoboro na pa di, na manga gbegberẽpai, na fuda aboro rogo gayo apai, ya. Ono ka boro hi api wa Kristano ka zee mangi nga ni ya, ono ni taasi rimo Mbori rogo gi rimo re.” (1 Petero 2:20; 4:15, 16) Ringbisihe kuti afugo Yesu, arungosi naye na ngbarago fu boro ho ni ahihe ni mbiko manga ni rurupai.
3. (a) Pa rungosiyo boro tipa manga ni rurupai nga gine? (b) Gine nangia sangbana gu rungosi aboro amangi bambata aKristano nani?
3 Ndikidi ruru mangaapai na ngbanyaa kuti gupai Mbori akpinyemuhe na kuti gako andiko. Sidu tie, pa rungo boro tipa manga rurupai naye mbiko boro nasovura kuti gu sosoda ni i asosoda ni nani ni kuo ga Mbori andiko watadu ka basa gako arugute. Ga aYuda abarumbatayo arungosi amokedi mbiko i aká ki zanga mbu sunge tungusapai nirimo Yesu. (Amokedi 4:18-20; 5:27-29, 40) Ya mo gipai re aumbasi gayo ngbarago watadu ki za yo ti tungusapai? Wagusa te! “[I aguari] barangba abororondo, rago ningba angba ti yo mbiko wa ya yo i re are nahi wasiro tipa rimoko. Na uru ka i apiriga nga ti yugo pai na tungusa pa Yesu ya ko nga Kristo ti yekaru yo, na ku kpuyo yo ya.” (Amokedi 5:41, 42) Gi rungosiyo re aye na ngbarago fuyo na ki zambuasi gayo ngara kuti sunge tungusapai. Kusa, aRomo arungosi bambata aKristano mbiko i aká tipa ka iriso bakindo wagu i airiso Mbori.
4. Gine nga bete gu nduapai du tipa rungosi aKristano?
4 Rogo gi gaani regbo re, aboro aima digo nirungosi aDezire Yekova mbiko i aká ki zanga irisa sangba agi aboro re tipa ka mbu tungusapa “gi wene pangbanga nga ga ngbi [“kindo,” NW] re.” (Matayo 24:14) Ho irangbii azahe ni ya ka i manginga gu gayo adunguratise nga ga aKristano ya, i na nyemu ka rungo kuba mbu dunguratiyo nga gupai Ziazia Kekeapai azinahe fuyo i mangihe. (AEbere 10:24, 25) Aboro naarungosi yo mbiko gu gayo kparatise nga ga aKristano kusayo ti agu apai nga ga birĩ zogarago du yo nani watadu mbikopa ká yo tipa mangasunge na kure ngba iraira gene. (Yoane 17:14; Amokedi 15:28, 29) Wa vura duhe wo, gi diaberã nga ga ga Mbori aboro tipa ka manga gupai ruaru re naye na zereda fuyo gbiati ngbarago.—1 Petero 3:14.
Aboro Nagbarasa Rimoyo Tipa Kristo
5. Gini bangua ndupai aboro arungosi ga Yekova aboro ti ni areme?
5 Gu ribua ngbarago Yesu aringbisipai tipaha rogo gu Tungusapai Nadu rii Bagangara yo nafura a tipa gu riipai du tipa rungosi apefuo ko. Ko ayaa: “Maku fu roni ho aboro ka paa ni na oni, ki nirungosi roni, ki nigumba dungu apai kuti rimoroni ni wia tipa re.” (Matayo 5:11) Gu banguapai aboro arungosi ga Yekova aboro ti ni nga i nga papara gi gbegbere zegino re te. Yesu aya fu gako abawiriki wee: ‘Ka oni nidu ni aboro zegino, ka aboro zegino nakpinyemu roni nigayo aboro; ono bambiko wa adunga oni ni aboro zegino ya, mbiko mi asia roni asia zegino, si du aboro zegino asoga roni ti ni.’ (Yoane 15:19) Teketeke wa kina gure a, gu mokedi nangia Petero ayaa: ‘Si nairiwo tiyo wa oni aoranga na yo rogo agi apai re sa gi bakere bau re ya, i kini gbere ngbayo yo fu roni.’—1 Petero 4:4.
6. (a) Tipagine aboro agbarasa rimo yangara mbedimbedi aKristano gbiati rimo abadiangbayo ti ni? (b) Ya mo ngbatunga agu agbarasarimo re naumbasi gaani ngbarago?
6 Ani niima bi gupai nga, aboro arungosi bambata aKristano mbiko i aká ki zanga mbu tungusapai ti rimo Yesu. Kristo afu sunge fu apefuo ko ki yaa: ‘Oni adu ni adezirere, da ku digida sende yo.’ (Amokedi 1:8) Gu yangara ruru awirina Kristo du nimbedimbediyo, i aima digo nimangi gu sunge re zaaza, agu abadiangbayo nga “kura akandoro” kini undo yo nani. (Yugoti 7:9) Sidu, Satana nasovura na “yangara awiriri [nga awiri gu “de” narukuba papara ga Mbori riigbu nga gu du ngbangbaturũ yo], nga agu yo naka kuti ga Mbori rugute, na agu yo naka kuti gu dezire pai nga ga Yesu.” (Yugoti 12:9, 17) Wa du ani ni aDezire Yekova, ani namanga dezirepai tipa Yesu, nga gu boro nazogarago awere ni Bakindo rogo gu zogarago nga ga Kindo, nga gu kindo nika gbarasa agu azogarago nga ga aboro nakiso gene be ga Mbori ruru vovo zegino. (Daniere 2:44; 2 Petero 3:13) Mbiko gipai re, si du aboro agbarasa rimo rani ti ni, ono ani nabihe nipa ngbarago ka rungo tipa rimo Kristo.—1 Petero 4:14.
7, 8. Gini apai asogo bambata aKristano agumbaha niziree ti rimoyo?
7 Yesu ayawee si naida apefuo ko bihe nipa ngbarago ho aboro ‘kaa gumba dungu apai ni niwia’ kutiyo tipa ko. (Matayo 5:11) Wo si adu nirengo tipa bambata aKristano. Ho i amoi gu mokedi nangia Pauro ni ku bambukiso yo Roma yo bara rogo 59-61 F.B.K. ko naapido gako ngbangaa, gu ga aYuda abarumbatayo nadu yo aya tipa aKristano wee: “Gi rika pai re, ani ini ya i nagumba pai kuti ni rogo zegino dũ.” (Amokedi 28:22) I akitingbaanga aPauro na Sira ya i ‘agbarasi zegino,’ kini mangiapai ‘kia ti agu andika nga ga Kaisara.’—Amokedi 17:6, 7.
8 Wa gu bakeke kuru apangbangaa nangia K. S. Latourette aakepai tipa agu aKristano nadu ti regbo gu zogarago nangia ga ga aRomo Ngbii, ko akehe ki yaa: “Akitangbaanga yo adu nibakiakia. Mbiko wa aKristano aká ti rimiso tiyo kurogo agu airisombori nangia ga apagano, aboro anaya tipa yo we i angia agu aboro naya Mbori ti ni te. Mbiko wa i anakodanga tiyo kurogo gu dungu apai nangia ga aboro rogo gayo adagbarago ya, wa agu apumbo nangia ga apagano, ndu ka bi abangimbaro rogo agu aba du tipa dungu aboro, . . . aboro anasawia yo ya i angia agu aboro nanasogote ngbatunga aboro. . . . I anaya tipa yo wee akumba gbiati adee nagbiatiyo yuru . . . fuo gure, i ki tona ka manga vunduvundu kodaba dagbayo. . . . Gu rengopai nga kina aidipase sa nanaye kupati [gu dunguratise du tipa Tingidapa Kpio Kristo], asa gu ziree gbandaka nga aKristano anatumo na awiriyo dedede na kini ri kureyo gbiati apasio yo.” Kurii gure, mbiko wa bambata aKristano aká ti iriso bakindo wagu i airiso Mbori, i akitingbaanga yo ya i angia avura Irangbii.
9. Wai agu aKristano nadu rogo bambata sa kama agarã amangipai sa agu aziree kitangbaanga yo aboro amangihe, na ginipai namanga areme?
9 Ngbatunga agu aziree kitangbaanga yo re arugusanga bambata aKristano ti manga yo gu gayo sunge nangia ga tungusa gu wene pangbangaa nga ga Kindo te. Rogo 60-61 F.B.K., Pauro arengbe ka fura tipa gu “wene pangbanga” nandu “rogo kpotosende dunduko, nazuka zuzuhe ki nimoi pai” na ‘i atungusihe rogo arago dũ tii ngbangbaturũ yo.’ (AKorosaio 1:5, 6, 23) Kina gu bangisapai re namanga areme. Aboro nakitangbaanga aDezire Yekova niziree, a wa aboro amangihe tipa agu aKristano nadu rogo bambata sa kama agarã. Areme, gu sunge nga ga tungusa gu pangbangaa nga ga Kindo namaapai kina kumbatayo na si kini ye na bakere ngbarago fu agu aboro natungusaha.
I na Ngbarago wa Aboro Arungosi Yo
A wa Si Adu Tipa Anebi
10, 11. (a) Wai Yesu adigisi gako ringbisapai tipa gu ribua ngbarago? (b) Tipagine i arungosi anebi ti ni? Oni funga kpiaapai.
10 Yesu adigisi gako ringbisapai tipa gu ribua ngbarago na agu afugo nga: “Oni sámbua tironi asambua, . . . bambiko kina wo i amangi [agu] anebi nadu mbata fu roni.” (Matayo 5:12) AYisaraere, nangia iraira aboro, anamanga gbegberee fu agu anebi Yekova anakeda yo fuo yo na kini rungosiyo dedede. (Yeremaya 7:25, 26) Gu mokedi nangia Pauro asongodi gipai re ya si angia kina boro rengo nike ko pai niyaa: ‘Were gini kurapai ka mi gumbaha berewe? Bambiko rago arengbanga mi gumbapa anebi te. Mbiko idapase aguyo ahipai wa aboro asawia yo kini taki yo, ii, be voda yo a, na be bafa yo ku bambukisa yo.’—AEbere 11:32-38.
11 Ti regbo gu zogarago nangia ga gu gbegbere Bakindo nangia Aba gbiati diako nangia Izebere, dungu ga Yekova anebi i aimi yo na basape. (1 Abakindo 18:4, 13; 19:10) I amoi gu nebi nangia Yeremaya kurogo angboro na ki ba ko kurogo gu guga ima aima uguda rogoho ki mbu kina dogoro. (Yeremaya 20:1, 2; 38:6) I aba gu nebi nangia Daniere ku siima abahu yo. (Daniere 6:16, 17) Aboro arungosi agi anebi nadu mbata fu regbo aKristano re mbiko i aasongoda gu ziazia irisombori aboro anamangaha fu Yekova. Ga aYuda abarumbatayo rogo pambori arungosi dungu anebi. Yesu aya ti abakeapai gbiati aFarusi wee i angia “awiri agu yo naimi anebi.”—Matayo 23:31.
12. Wa du ani ni aDezire Yekova, tipagine ani abi gu rungosi aboro amanga rani nani ti ni nimamu wa agu anebi nadu mbata abihe?
12 Areme, aboro narungosi rani dedede nga aDezire Yekova mbiko ani natungusa gu wene pangbangaa nga ga Kindo zaaza. Avura rani nakitangbaanga rani ya ani “nasa aboro ngbaome kurogo gaani pambori,” ono tie, gupai ini ani he nga, gu ga Yekova ruru aboro nadu mbata, agbiatiyo na kina ngbatunga agu akitangbaangase re. (Yeremaya 11:21; 20:8, 11) Ani nabihe nimamu ka rungo tipa kina gu bangisapai gu ruru anebi nadu mbata arungo tipaha. Gu bawiriki nangia Yakoba akepai ki yaa: “Awirinami, oni dí agu anebi nagumba pai ni rimo Gbia, ni gaoni kpia hipai na zadapai. Oni bí, ya ani ti agu yo naru nyanyaki dati digida pai ya betedi aboro” nga yo.—Yakoba 5:10, 11.
Dudunguro Nduapai Tipa Du na Ngbarago
13. (a) Tipagine kpotoraniyo azeranga ti ni be arungosi ya? (b) Gine naundo rani ani ru nyanyakii, na gine si ayugopaha?
13 Kuba gupai nga kpotoraniyo zere be arungosi, ani nagbia wasa be berã gupai nga ani napefuo gu kpiapai nangia ga anebi, ga bambata aKristano, na ga Kristo Yesu nitiko. (1 Petero 2:21) Ani nagbia bakere ngbarago rogo Ziazia Kekeapai, ngbatunga gu duwa afugo gu mokedi nangia Petero naye re: “Abadiangba, ka si iriwo nga ti roni ya asada naye fuo roni wa we, nga gu naye ka asada gaoni apai, ya vovo pai du mangi roni, ya. Ka i agbarasa rimoroni mbiko rimo Kristo, airamaku nga oni; mbiko gu toro nga ga taarimo nasunga ku ri roni, nga ga Mbori Ziazia Toro.” (1 Petero 4:12, 14) Ti agu apai ninaamanga fu rani, ani ini gupai nga, ani rengbe ka ru nyanyakii kinaho sa ka ga Yekova toro du ni kurii rani na kini nyakasi rani. Gu undo ziazia toro afuhe nga gopai tipa ga Yekova maku kurii rani, na si kini fu bakere ngbarago fu rani.—Atambuahe 5:12; AFiripoio 1:27-29.
14. Gini nduapai du ani nani kadu na ngbarago mbiko rungosi aboro rani tipa manga rurupai?
14 Gu kura ndupai agu sogote gbiati arungosi aboro amanga rani nani tipa manga rurupai asa rani ti ni ani duna ngbarago, si nga mbiko gu sogote re nigu gopai nayugopa raka ani ni ndikidi aKristano naapa ra ani na gorani fu Mbori. Gu mokedi nangia Pauro akepai ki yaa: “I arúngosi agu . . . [aboro] dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.” (2 Timoteo 3:12) Ani na bakere ngbarago tirani gbe ho gu berã aye ni kurii rani yo nga, pa ka ani kuti gaani ruru mangaapai nafu karagapai sa ga Satana aziree nga gu ko agumbaha ya agu aboro dunduko Yekova akusi yo, i namangasunge Fuko nigbangbati. (Eyobo 1:9-11; 2:3, 4) Ani na ngbarago tirani bambiko ani nakoda berani ka dia gbarasarimo kusayo ti ga Yekova bakere pagbia, ka gaani kodabee vura du nitoonihe vurũ.—Asanza 27:11.
Oni Ngi Angi Bambiko Gaoni Mosoro
15, 16. (a) Gini nduapai Yesu afuhe fu rani tipa ani ‘sambuo tirani na kini ngi angi’? (b) Gini mosoro du niigiigihe tipa mbedimbedi aKristano ngbangbaturũ yo, na wai agu abadiangbayo nga “kura akandoro” nika gbia mosoro?
15 Yesu afu kura ndupai tipa ani du na ngbarago ho aboro arungosi rani ni wagu i arungosi agu anebi nadu mbata. Nimbedi kuti digido gu ringbisapai du tipa gu ribua ngbarago, Yesu ayaa: “Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe.” (Matayo 5:12) Gu mokedi nangia Pauro akepai ki yaa: “Mosoro ingapai nga kpio; ono ga Mbori gamunihe gbua nga nyenye unga rogo Kristo Yesu yo gaani Gbia.” (ARomo 6:23) Ii, gu ‘bakere mosoro’ re, si nga unga, na anga si nga gu mosoro ani amangasunge tipa ka gbiaha te. Si nga gamunihe gbua angianga tipa mosoro ya. Yesu ayawee gu mosoro re “ngbangbaturũ yo” bambiko si naye yo du Yekova ni.
16 Mbedimbedi aKristano nagbia “kpakpari unga,” nga gu fugo nayugopa gu unga zanga kpio i kadu nani na Kristo ngbangbaturũ yo. (Yakoba 1:12, 17) Agu aboro tigayo duna maabangirise ka raka auru kpotosende, nga “kura akandoro,” namaabangiriyo ka gbia nyenye unga rogo paradiso auru kpotosende. (Yoane 10:16; Yugoti 21:3-5) Tipa agu aboro du rogo agu ariko re tibaraha ue dunduko, i amanganga sunge amanga tipa ka gbia gu “mosoro” re te. I tibarayo ue nga mbedimbedi aKristano na “kura akandoro” nagbia gayo mosoro mbiko ga Yekova “bakere undahe,” nga gu nafõngbadu gu mokedi nangia Pauro ko yaa: “Tambuahe dú fu Mbori tipa gako gasigasi gamahe.”—2 AKorindo 9:14, 15.
17. Tipagine rengbe ani ti ni kadu na ngbarago na kini ‘sambuo tirani’ ho aboro arungosi rani ni?
17 Gu mokedi nangia Pauro ake waraga fu agu aKristano Bakindo Nero ambedi ka rungosi. Ko akehe ki yaa: “Rago ngba ti rani a na gaani rungosi; ani ini ya rungosi namaa hipai; hipai namaa inahe; inahe namaa maabangirise; maabangirise afu nga rani sa zee te.” Ko aya berewe wee: “Rago angba ti roni na maabangirise; oni zadi pai azada rogo rungosi.” (ARomo 5:3-5; 12:12) Singia gaani maabangirise tipa raka ngbangbaturũ yo watadu auru kpotosende herẽ, gu mosoro i ka fuhe fu rani tipa padu ani niruru rani, si ima kio kisusi agu ahe dunduko rẽ ani tipaha. Gu ngbarago du ani nani ima kio nirengo wa ani amaabangirani ka raka nyeanye kindi tiibe gu Bakindo nga Yesu Kristo na kini mangisunge fu Yekova nga gu Barani nga boro nyemuse na kini taasirimoko. Ani ‘nasambuo tirani asambuo’ nirengo.
18. Ginipai ani amaabangirani ya si arikaaboro nika mangaha wa digido zegino ambeda, na gine Yekova nika mangaha?
18 Rogo bete aringara, aboro aima digo nirungosi aDezire Yekova na i narungosi yo a kindi. Rogo gu ga Yesu sangbanebi nadu tipa digido gi zegino re, ko afu rugute fu ndikidi aKristano ki yaa: “Rika aboro [“dunduko,” NW] asóga roni asoga . . . tipa rimore.” (Matayo 24:9) Wa ani ambeda kuti digido zegino, Satana nika sa rikaaboro i yugu gayo zinga kuti ga Yekova aboro. (Yezekere 38:10-12, 14-16) Gipai re nika yugopa ga Yekova regbo tipa ko guari ka mangapai. Mbiko Ziazia Kekeapai nayaa: “Mi ayúgo pa gi du ni bahe na pa gi du ziazia ki yugu tire ku bangiri dungu arikaaboro i ini re. Si du i aína ha ya mi nga Yekova.” (Yezekere 38:23) Si ki ta du were, Yekova kini mo ka dia gbarasarimo kusayo ti bakerepa rimoko na ki batasi gako aboro be arungosi. Sidu tie, “maku du fu gu boro naru nyanyaki rogo asada.”—Yakoba 1:12, NW.
19. Wa ani apido gu bakerepa ‘uru nga ga Yekova,’ ginipai si aida ani naamangaha?
19 Wa gu bakerepa ‘uru nga ga Yekova’ re ambeda gbe, ani du tie na ngbarago mbiko ‘wa ya yo wee ani rẽ arẽ ka hi wasiro’ tipa rimo Yesu. (2 Petero 3:10-13; Amokedi 5:41) Wa kina bambata aKristano, ka ani piriginga “ti yugo pai na tungusa pa Yesu” naapa gako zogarago nga ga Kindo wa ani apido gaani mosoro rogo ga Yekova ruru zegino ya.—Amokedi 5:42; Yakoba 5:11.
Fugöpai
• Pa rungo boro tipa manga rurupai nayugo ginipai?
• Gine nangia sangbana rungosi kurii bambata aKristano?
• Tipagine rengbe ani ka ya ti ni aboro narungosi aDezire Yekova wa kina gu i arungosi agu anebi nadu mbata?
• Tipagine rengbe ani ti ni ka ‘sambuo tirani na kini ngi’ ho aboro arungosi rani ni?
[Gu kpiahe du ti kpewaraga 28]
“Maku fu roni ho aboro ka paa ni na oni, ki nirungosi roni”
[Gu kpiahe du ti kpewaraga 29]
Badona aboro bambukiso yo: Chicago Herald-American