Ginihe Nzunzu Naye na Ngbarago?

YEKOVA, nga “gu Mbori duna ngbarago,” na Yesu Kristo nga “bangisa Bazogo duna ngbarago,” i nga agu aboro ini apai kisusi tipa agu apai naye na ngbarago fu aboro. (1 Timoteo 1:11; 6:15, NW) Si du nga ndu gupai si airiwonga ti ni tirani ya ka ruga tirani na gupai nga, gu banguapai naye na ngbarago fu aboro, rogo Fugo Mbori yo du duhe ni, nga Ziazia Kekeapai.—Yugoti 1:3; 22:7.

Rogo gu ga Yesu Tungusapai nadu rii Bagangara yo ini aboro paha na arago dunduko, ko aringbisipa agu apai naye na ngbarago fu boro. Ko ayaa: “Aboro ngbarago” nga agu aboro (1) ini pa gu gayo zingo nga ga toro si aida i mbiisihe, (2) narungo kpotoyo yo, (3) duna zerangbaduse, (4) duna zingo tipa manga rurupai, (5) nambupai fu akurayo, (6) du ziazia ngbaduyo yo, (7) nasungo na akurayo rogo pazereda, (8) i arungosi yo tipa manga rurupai, na (9) i agbarasa rimoyo na kini rungosiyo tipa Yesu.—Matayo 5:3-11, NW.a

Ya Mo Ru Afugo Yesu Aru Nzunzu?

Padu afugo Yesu nirengo naida i sakirogoyo tooni si nimo ka ru bangiri boro. Gini boro rengbe ka tikango gupai nga, gu boro du nibayee ni, nga boro inapai, boro azaro, nga gu boro duna wene sino ngbaduniyo, ni ngbaarago tini kisusi gu boro naera aera, nga borovura, na adunga na inapai tini ya?

Ono tie, ani rengbe kaa baka kina bangirani tipa wai ka aboro du na zingo tipa manga rurupai watadu narungo kpotoyo yo kini mo kadu na ngbarago. Si wo mbiko ngbatunga agu aboro re na ruru bipai tipa agu apai namanga rogo zegino. I ‘nauka omeyo ki niuko mbiko gu kere gbegbere asino nga gu du nimangimangihe rogoho’ nga gu namanga rogo gi gaani a’uru re. (Yezekere 9:4) Gupai re nitihe ayenga na ngbarago fuyo te. Ono tie, ho i awirikapai ni tipa ga Mbori ringbisapai ka ye na ruru sino apai ku auru kpotosende na ruru sarangbangaa fu agu aboro akurayo arungosi yo, si nafu ngbarago fuyo bakere gbe.—Yesaya 11:4.

Padu aboro a na nyemu manga rurupai nasa yo i duna gberarago tiyo tipa agu apai i akpa dedede ti mangaha ngba ruru gene. Rogo gi gene re, i ima ino pa gu gayo zingo nga ga toro si aida i mbiisihe. Ngbatunga agu aboro re na nyemu ka ngera kube Mbori tipa arugute bambiko i ini gupai nga, kina ko sa rengbe ka undo aboro i dibe gayo arungbura.—Asanza 16:3, 9; 20:24.

Agu aboro narungo kpotoyo yo, duna zingo tipa manga rurupai, na ini pa gu gayo azingo nga ga toro si aida i mbiisihe, i ni agu aboro ima ino nyaka padu boro na wene pagume dagbani na Bakusiahe. Wene pagume dagba boro na akurani naye na ngbarago, ono gu du dagba boro na Mbori naye na ngbarago bakere gbe ti gure. Ii, agu aboro duna kakaka nyemu manga rurupai, duna nyemu dia ga Mbori arugute kugume, i nirengo rengbe ani ka ya tipa yo wee i nga aboro ngbarago.

Ono tie, si rengbe kadu fu roni nikpakarakpakarapai ka ida ya gu boro i arungosi ni na kini gbarasi rimoni, ni rengbe arengba a kadu na ngbarago. Ono, wa vura duhe wo, si nga kina boro rengo, mbiko Yesu nitiko nagumbaha wo. Sidu tie, wai si aida ani girogo afugo ko yo?

Wa I Avura Nirungosi Yo, I Kindi na Ngbarago, Wai Rengbehe Kadu Wo?

Oni kparia gupai nga, Yesu ayanga wee gbarasa yo rimo boro na rungosi yo ni naye na ngbarago funi te. Ko ayaa: “[“Aboro ngbarago nga agu aboro,” NW] i arungosi yo tipa rurupai, . . . ho aboro ka paa ni na oni, ki nirungosi roni, . . . ni wia tipa re.” (Matayo 5:10, 11) Sidu, ngbarago naye fu boro kinaho sa i agbarasa rimoni ni mbiko ni nga pefuo Kristo na mbiko ni naraka gani raka ringbisihe kuti gu ruru arugute adunga ngburungburu ya Yesu ayuguhe.

Gipai re niyuguyuguhe rogo gupai namangi bambata aKristano. Ho ga aYuda Abororondo, nangia ga aYuda kikindigipa agbiagbangaa, “ayambu amokedi ni koyo du yo ni, i ata yo ata ki rugu yo ya ka i gumba nga pai ni rimo Yesu ya, ki he yo.” Ginipai nangia ga amokedi karagapai kuti gipai re? “I ki guari tie barangba abororondo, rago ningba angba ti yo mbiko wa ya yo i re are nahi wasiro tipa rimoko. Na uru ka i apiriga nga ti yugo pai na tungusa pa Yesu ya ko nga Kristo” ya.—Amokedi 5:40-42; 13:50-52; gu kekepai duni pigipigihe re, ani du pigihe.

Afugo gu mokedi nangia Petero nafu gu kura giarogopai berewe tipa gupai nakoda gbarasarimo boro kuti ngbarago. Ko akepai ki yaa: “Ka i agbarasa rimoroni mbiko rimo Kristo, airamaku [“aboro ngbarago,” NW] nga oni; mbiko gu toro nga ga taarimo nasunga ku ri roni, nga ga Mbori Ziazia Toro.” (1 Petero 4:14) Ii, pa rungo Kristano mbiko manga ni rurupai, gu rungo re ki vura du nigbegberehe, si nayeaye na gu ngbarago funi ninaaye fu gu boro ini gupai nga, ni ima gbia ga Mbori ziazia toro. Wai du ga Mbori toro na ngbanyaa dagbaha na ngbarago?

Gu Mangaapai Nga ga Borose Watadu Zuzu Toro?

Ga Mbori ziazia toro nasungo kina rogo agu aboro yo sa nagiasangba Mbori nibazogo. (Amokedi 5:32) Yekova afunga gako toro fu agu aboro namanga “agu apai [nga ga] borose” te. Agu apai re nga “bari, na pa meteka, na wasiro, na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai, na kpiboro, na kpibuda, na do pumbo gbarakagbaraka, na tunga agi apai re.” (AGaratio 5:19-21) Rengo ngaha nga, rogo gu zegino du areme, ka boro gbatanga “agu apai [nga ga] borose” agbata te. Ono, wa vura duhe wo, agu aboro namangaha agbianga ndikidi nyeanye ngbarago te. Kuba gure, pa manga boro ngbatunga agu apai re nagbarasa gani pagume dagbani na agumeni, na abakureani, na agu aboro ini ni yo. Kurii gure, Fugo Mbori nayawee agu aboro “namanga tunga agi apai re, adia nga gu ũkumbo nga ga ga Mbori ngbi te.”

Ni gupai du kia ti gure, Mbori nafu gako toro fu agu aboro nasonosa “zuzu toro.” Agu asino nga ga zuzu toro, si nga “nyemuse, ngbarago, zereda, gbanga hipai, weneringise, wene sino, idapase, zera, rugatise.” (AGaratio 5:22, 23, NW) Ho ani ayugo agi asino ni re, ani naye na agu apai nga ga pazereda ku dagbarani na aboro na dagbarani na Mbori, nga agu apai naye na ndikidi ngbarago. (Oni bi sanduki.) Gu nyakipaha gbe nga, ani nafu ngbarago fu Yekova na ani kidu na maabangirise nga ga ngbarago ka gbia nyenye unga rogo ga Mbori vovo zegino nga ga ruruapai wa ani ayugo nyemuse, weneringise, wene sino gbiati kura asinombori.

Ngbarago Niguhe Boro Asiaha Asia

Ho aWolfgang na Brigitte, nga arogotise ue naraka Germani yo atona ka wisigo Ziazia Kekeapai ni kakaka, i aduna dungu agu aũzegino beyo aboro aberãpaha ya si naye na ngbarago fu boro. I angia aparanga na kpotoyo kidu niwasawasaha. I anavodatiyo na kikii gene arokoo, kini raki rogo wene fongofongo kporo nangba gbe, na kidu na gu sunge bagaahe beyo naazugo kina kumbatayo. I adi bakere gayo regbo ku gene gbata kura aũzegino yo, ono agu apai re afunga ndikidi ngbarago fuyo te. Ono tie, kusa, Wolfgang na Brigitte asia nyanyakipa pai ka mangaha. I atona ka dia bakere gayo regbo na asadatise gbe tipa orafuo agu apai nga ga toro na kini gbata agene tipa ka mbeda na Yekova bakere gbe. Gi gayo siapai re aimanga te si ki ndu na yo i aria gayo sino berã, nga gu tigaha nasa yo i sa gayo raka taata na ki tona ka mangasunge ni abazakigene, watadu abatungusi wene pangbangaa nga ga Kindo ti aregbo dũ. Areme, i namangasunge ni abaundosunge rogo gu biroo nga ga be-basunge nga ga aDezire Yekova du Germani yo. Kurii gure, i nawirika kura fugo-aboro sa nga ga aboro Asia tipa ka undo gu kungbo aboro ye kurogo gu ringara re tipa i wiriki agu arengo du rogo Fugo Mbori, nga Ziazia Kekeapai.

Ya mo agi arogotise ue re agbia ndikidi ngbarago? Wolfgang nayaa: “Natona ti gu regbo ani atona orafuo agu apai nga ga toro, ani na ngbarago tirani susi gu ani adu nani mbata. Pa manga ani sunge fu Yekova na ngbaduraniyo dunduko anyakasi gaani rogatise a. Ani aima duna gu rogatise nga ga ngbarago mbata, ono agu apai nadu fu rani nidingisoro ani aamangaha na gu nyemu apai nadu tirani akparaka rani ani du na asásá nibakiakia. Ono awere tie, ani nikpamiakpamia rani na kini orofuo sásá sa.”

Ginihe Boro Aidaha Tipa Kadu na Ngbarago Tini?

Rogo wiri guru fugo: Oni ne “agu apai [nga ga] borose” ono ki sonosi “zuzu [ga Mbori] toro.” Tipa boro rengbe ka gbia ngbarago, si naida ni du na nyemu gbia dawedawe pagume dagbani na Mbori. Gu boro namanga asadatise nyanyakii ka da ti gi sásá re, ni ima rẽ na gu ga Yesu ringbisapai du tipa boro ngbarago.

Sidu tie, ka oni danga kuti gu irairapai nga oni arengbanga ka gbia ngbarago ya te. Nirengo, si rengbe kadu nga wa du rago re, wasanga tii kpotoroniyo te watadu oni na fudifudiapai rogo gaoni ramukporo nga ga rogatise. Isoke si rengbe kadu nga regbo batika agude ima susa roni watadu oni nasota asota tipa ka gbia nyenye wene sunge-marã. Si rengbe kadu nga marã beroni wa gu nanidu mbata te. Wa vura duhe wo, oni nyakasi ngbaduroniyo, ndupai ho tipa oni zanga du na maabangirise te! Ga Mbori zogarago nga ga Kindo nika mbakada agi apai re ambakada gbiati gu dungu akama akuraha. Nirengo, mbembedii kumbatayo, Yekova Mbori nika digiso manga agu afugo bake papara Atambuahe agumbaha nga: “Ga ngbi nga nyenye ngbi, . . . Mo naza bero, ki nimbisi gu nyemuhe nga ga unga ahe dunduko.” (Atambuahe 145:13, 16) A wa dungu amirioni ga Yekova amoyambu rogo zegino dunduko narengbe ka gumbaha nigayo rengo, pa maa oni gi ga Yekova kidohe re ku berã roni yo nika undo roni bakere gbe oni gbia ngbarago areme.—Yugoti 21:3.

[Gu rukutu kekeapai du bandu kpewaraga yo]

[Gu kpiahe du ti kpewaraga 6]

Agu Apai Naye na Ngbarago

Pa yugo oni nyemuse fu kura aboro nika sa yo i kpinyemu roni a.

Ngbarago nafu ome fu roni oni sovura na diabese kuti apai.

Zereda naundo roni oni banda gaoni pagume na aboro zanga tagbagatagbaapai.

Hipai nigbangaha naundo roni oni nye na ngbarago zavura ho du oni ni tii asada vurũ.

Weneringise naye na kura aboro fuo roni.

Gu wene sino oni amangaha nasa kura aboro i undo roni ho oni ka ida undo ni.

Idapase arugusapa gu ga Mbori arugute nga ga nyemuse ko afuhe fu roni.

Zezeredi sino nika sa ngbaduroniyo, gaoni berã, na kpotoroni si du zezeredii.

Rugatise nika umbasi bange gu irairaapai oni amanga.

[Gu kpiahe du ti kpewaraga 7]

Tipa oni rengbe ka gbia ngbarago, si naida oni mbiisi gu gaoni zingo nga ga toro