Yekova Naamanga Kina Agu Apai Du Niruruhe Ti Aregbo Dunduko

“Yekova . . . ni ruru ko rogo gako apai dunduko.”—ATAMBUAHE 145:17.

1. Ginipai ka oni mangihe ka boro gumba irairapai bara roni, na gine rengbe ani ka wirikaha be gu mangapai re?

BORO agumbanga irairapai tipa roni, isoke ka bisirapa gaoni mangaapai watadu ka bisirapa ndu gaoni mangapai mbata fu ni rugu tini naapa agu arengo dunduko du tipa gupai oni amangihe? Kangia gupai re amangi roni, si aima gbera tironi nirengo. Be gipai namangi roni re, ani rengbe ka wirika nyanyakipa pai: Si nipatatamana ani ne gusa digisopai ho ani aruganga tirani ni naapa apai tipaha dunduko ya.

2, 3. Wai kura aboro akaragapai kuti agu apangbangaa nga ga Ziazia Kekeapai nga gu adunga futufutuapai rogoho ka karagapai sa asanahe dunduko ya, ono wa vura duhe wo, ginipai Ziazia Kekeapai agumbaha tipa Yekova?

² Si naida ani moi gipai re ku berã rani yo ho ani aida ni ka da ti digisopai tipa Yekova Mbori. Tipagine duhe ti ni wo? Bambiko gu kura apangbangaa nga ga Ziazia Kekeapai kinaho rengbe kadu ti bambata bibihe nikpakarakpakaraha ka giarogoyo. Si rengbe kadu nga, agi apangbangaa re, isoke nga gu du tipa gu mangaapai nangia ga airisimbori bakuru kusayo, watadu tipa ga Mbori asarangbangaa kuti aboro bakuru kusayo, si zanga gu futufutuapai si aida si duho tipa ka karagapai sa gaani asanahe dunduko. Si nafu kina gberarago nga, gu kura aboro nabisirapa agu apangbangaa re, kini kapa akapa singia Mbori aruaru rogo gu gako asarangbangaa re ke. Ono, wa vura duhe wo, Ziazia Kekeapai naya fu rani wee “Yekova . . . ni ruru ko rogo gako apai dunduko.” (Atambuahe 145:17) Fugo ko nakido rani a ya ko “amanga nga gbegbere te.” (Eyobo 34:12; Atambuahe 37:28) Oni berẽnga tie tipa wai pa gumba aboro irairaapai tipa ko narengbe ka imisa ko!

³ Ani wisiginga nduapai bisue nga gu si aida ti ni ani idi kuti ga Yekova asarangbangaa. Fuo maa ani agu apai re ku berã rani yo, ani nika wisigo apangbangaa ue rogo Ziazia Kekeapai nga gu bete aboro abihe nikpakarakpakaraha ka giarogoyo.

Tipagine Si Aida ti ni Ani Idi Kuti ga Yekova Asarangbangaa?

4. Tipagine si aida ti ni ani du na umbasitise ho ani awisigo ga Mbori mangaapai ni? Oni yugunga ha na kpiapai.

⁴ Bambatapai nga, wa duhe nga Yekova ima ino agu arengo dunduko du tipa apai nga gu ani ainonga ha tigaani ya, si naida ani du na umbasitise ho ani awisigo ga Mbori mangaapai ni. Ani yugunga ha na kpiapai: Ani ya gu basapungbangaa naima digo nisapungbangaa niruruhe, ko saringbangaa kuti boro bambu gumba-ngbangaa yo bambeda kusayo. Ginipai rengbe oni ka berãha tipa gu boro ainonga agu arengo du tipa gu ngbangaa re ya watadu ainonga agu andiko si akodaha ya, ni kini mo ka bisirapa gu diaberã nga ga gu basapungbangaa re? Si nipamungo fu boro ni saringbangaa tipa gupai ni aruganga tini naapaha wenengai ya. (Asanza 18:13) Nairiwo gu pamungo kangiaha ka kungbo boro gbua bisirapa Mbori nga “Basapungbanga zegino dunduko”!—Bambata Pai 18:25.

5. Ginipai si aida ani rugutirani naapaha ho ani ageda agu apangbangaa ni nga ga Ziazia Kekeapai du tipa ga Mbori asapangbangaa kuti kura aboro?

⁵ Gu ue ndupai rengbe ani ka ida ti ni kuti ga Mbori asapangbangaa nga, Mbori wa aboro te, ko tigako rengbe arengba ka ino agu apai du ngbadu aboro yo. (1 Samuere 16:7) Fugo ko nayaa: “Mi nga Yekova nangera ku kpotoboro yo, ki asadi aberã a, ka fu he fu aboro ni ba sa sa kina kuti gayo apai, kuti zuzu gayo mangaapai.” (Yeremaya 17:10) Sidu, ho ani agedapa ga Mbori asapangbangaa ni rogo Ziazia Kekeapai kuti kura aboro, si naida ani rugutirani na gupai nga, gu bangiriko nabi apai dunduko, si aima ngana okõokõ aberã, ndu manga boro pai, gbiati gu nyemu mangapai nadu ti gu boro re nga agu apai i akenga ha rogo Fugo ko ya.—1 Pekapai 28:9.

6, 7. (a) Wai Yekova ayugu gupai nga, ko naka kuti gako ruru andiko ti aregbo dunduko zavura ho si aida gupai ni beko nga ko tumo atumo tipaha vurũ? (b) Ginipai si aida ani tingidihe ho ani agedapai ni rogo Ziazia Kekeapai nga gu nasa rani ani bakibangirani singia Mbori amangi gupai re ngba ruru gene watadu ruru gene nangiaha te?

⁶ Ani kparianga gu biata ndupai si aida ti ni ani idi kuti ga Yekova asapangbangaa: Ko nakakuti gako ruru andiko ti aregbo dunduko zavura ho si aida gupai ni beko nga kina boro ko tumo atumo tipaha vurũ. Ani wisiginga kpiapai sa. Yekova amangipai na ngbanyaa kuti gako ruru andiko ho ko afu Wiriko ni nimotumo tipa gu ngbatunga aboro nga agisangbaa. (ARomo 5:18, 19) Wa si avura du wo, ho Yekova abi Wiriko ni ko niimi na kini kpi ti ngbunduru ngua rungosi, si aima imisa ko bakere gbe. Gine gipai re ayugoho fu rani tipa Mbori? Nibipa “gu tumori . . . du rogo Kristo Yesu yo,” Ziazia Kekeapai nayaa: “Rogo gere, Mbori ayugu wai ko nasa aboro ni ruru yo” watadu Mbori amangihe wo ka yugopa gako ruru mangaapai nani. (ARomo 3:24-26) Gu kura sasa ARomo 3:25 nayaa: “Si nayugo gupai nga, ti aregbo dunduko, Mbori naamangaapai nikina ruruhe na niwenehe.” (New Century Version) Ii, kuti gu nyemupai nadu ti Yekova nasako ko mbakadipai tipa ka tumo rii ngbatunga aboro, si nayugo gupai fu rani nga, ko nabi gako andiko du ‘niruruhe na niwenehe’ naapaha kuari gbe.

⁷ Sidu tie, ka ani gedipai rogo Ziazia Kekeapai nga gu nasa bete rani ani naabakabangirani singia Mbori amangi gupai re ngba ruru gene watadu si adunga ngba ruru gene te, si naida ani tingidi gipai re: Mbikopa ka Yekova kuti gako andiko nga ga rurupai gbiati ruru sarangbangaa, ko akanga na kina boro Wiriko be iimi kpio te. Ya mo ko rengbe ka mbu manga agu andiko re rogo gu kura apai umbapaha ti gure? Rengo nga, Yekova akuonga gako andiko nga ga ruru mangaapai wagusa te. Sidu ani na wene ndupai berani ka ida kuti gupai nga, ko naamangaapai ti aregbo dunduko nikina ruruhe na niwenehe.—Eyobo 37:23.

8. Tipagine rengbehe kadu ti ni niirairapai aboro berẽ ya i susi Yekova rogo ruru sarangbangaa na rogo ruru mangapai?

⁸ Ani wisiginga gu biama ndupai si aida ti ni ani idi kuti ga Yekova asapangbangaa: Yekova amangi aboro nikpiako. (Bambata Pai 1:27) Sidu, rogo gupai yo re ngawee Mbori amangi aboro ki fu agu asino fuyo duwa gako, nga gu nakoda ruru sarangbangaa na ruru mangaapai. Sidu tie, si adu ni gupai arunga ya ka gu nyemu ruru sarangbangaa gbiati nyemu manga ruruapai du tirani sa rani ani abi Yekova wa gu boro adunga agu asino re tiko ya. Kangia gu kura pangbangaa nga ga Ziazia Kekeapai ye na fudifudipai fu rani, si naida ani tingidi gupai nga, gu gaani ingapai ani adikumboho, si aima irasi gaani bipai tipa ruru sarangbangaa na ruru mangaapai. Yekova Mbori, nga gu boro namangi rani nikpiako, ko nasarangbangaa niruruhe na kini mangiapai nikina ruruhe. (Pa Fu Rugute ni Ue he 32:4) Si adu ni gupai adunga gene ku kpuhe yo ya ka ani berẽ ya aboro rengbe ka susa Mbori rogo ruru sarangbangaa na rogo ruru mangaapai!—ARomo 3:4, 5; 9:14.

9, 10. Tipagine adunga ha ti ni nidingisoro fu Yekova ko sakirogo gako mangapai fu aboro ya watadu ka rugusapaha bangiriyo?

⁹ Gu bisue ndupai si aida ti ni ani idi kuti ga Yekova asapangbangaa, si ngawee ko nga “Bahe ki susi auru kpotosende dunduko.” (Atambuahe 83:18) Sidu, padu ko rogo gu ba re asanga ha fuko nidingisoro ko sakirogo gako asarangbangaa fu aboro watadu ka rugusapaha bangiriyo te. Ziazia Kekeapai naringbisa pako ni Bangbasia Bameke a’akoro, na ani wa kina gu pere ko amekehe kurogo a’akoro, na kidu kpabeko yo ko mangi gupai na ani ngbaa tiko. (ARomo 9:19-21) Ada nga ani, nga kungbo pere gbua kpabeko yo, ka sakapa gako adiaberã watadu gako mangaapai? Ho gu iriiripa bakumba nangia Eyobo agusi giarogopai ni tipa ga Mbori mangaapai na ngbatunga aboro, Mbori arugu ko kini sana ko niyaa: “Mo aya ru nga gi sarangbanga te? Mo akita ngbanga re, i di pai ri ro?” Fuo ruga Eyobo tiko na gupai nga, ko afura zanga rugatinapai, ko asa gako berã kusa. (Eyobo 40:8; 42:6) Ka ani ya manginga gu ingapai nga ga zio pa ingapai kuti Mbori ya!

¹⁰ Si tie ziazia nga, ani na wene nduapai ka ida kuti gupai nga, Yekova namanga kina ruruapai ti aregbo dunduko. Fuo du ani tie na gi mburuapai re tipa ka rugatirani naapa ga Yekova agene, ani wisiginga apangbangaa ue rogo Ziazia Kekeapai nga gu du nikpakarakpakaraha fu kura aboro ka giarogoyo. Gu sa tipa gu mangaapai nangia ga boro sa dagba airisimbori, na gu kuraha tipa gu sarangbangaa kina boro Mbori nitiko amangihe.

Tipagine Roto Afu Awiriko ti ni Nangia Adegude fu Ndurumo Aboro-zuũ?

11, 12. (a) Oni tangaranga gupai namangi ho Mbori akedi amaraika ni ue ku Sodomo yo nga aguyo nadi kpoto aboro kutiyo. (b) Gini sanahe gi pangbangaa re naaye nani kurii kura aboro yo?

¹¹ Rogo Bambata Pai kapita 19, ani nageda gu pangbangaa yo namangi ho Mbori akedi amaraika ni ue ku Sodomo yo nga aguyo nadi kpoto aboro kutiyo. Roto anyakasipai fu agi amaraika re ya i sungu na ko kpuko yo. Ono tie, rogo gu yuru re, ndurumo aboro-zuũ nangia akumba akepati kpuko kirikiri kini nyakasipai ya ko kusi agu ageno re fuyo i kodiba na yo. Roto amangi asadatise ka sakapai na gi ndurumo aboro-zuũ re ono ki zanga du na diabese. Wa Roto aagbata gene ka banda gako ageno, ko aya fuyo: “Mi zungadi roni, awirinami, ka oni mangi nga gbegbere wo ya. Oni bi awere, mi na awire nga ngasu ade ue; mi ye na yo ku zegi no fu roni, oni ki mangi fu yo a wa rengbe he bangironi; ono ka oni mangi nga pai ti agi akumba re ya, mbiko wa ye yo ka sunga rogo gi kporo.” Gi ndurumo aboro re adeganga tuyo kuti gupai ko agumbaha te, ono i ambedi ka kuo ngbadimo kpuko. Niyangaraha, agi amaraika re avurasi bangiri gi rätärätä rimbasa aboro re.—Bambata Pai 19:1-11.

¹² A wa du sino aboro, gi pangbangaa re aye na asanahe kurii kura aboro yo. I nasakapai berãyo yo niyaa: ‘Wai ka Roto arengbe ka banda gako ageno nifu ko awiriko nangia adegude fu wasiwasi aboro-zuũ? Anga irairapai ko amangihe re, na nipamungo tee?’ Nibi gi pangbangaa du rogo Fugo Mbori tipa Roto re, tipagine ka Mbori arugu Petero ti ni na gako toro ko kepai tipa Roto ya “ruru boro” nangia ko? Ya mo Roto amangi gupai nangba angba bangiri Mbori? (2 Petero 2:7, 8) Ani sakinga pai riipa gipai re tipa ka ani agunga kuti iraira digisopai ya.

13, 14. (a) Ginipai si aida ani kpariaha be gu pangbangaa du rogo Ziazia Kekeapai tipa ga Roto mangaapai? (b) Gine nayugo gupai nga, Roto amanganga pai nigunde te?

¹³ Bambatapai nga, Ziazia Kekeapai atambuanga pa gupai Roto amangihe re watadu ka bisirapaha te, ono gupai si amangaha gbua nga ka tingida aboro naapa gupai namangi. Ziazia Kekeapai agumbanga gupai fu rani a Roto aaberãha watadu gupai nasako ko mangipai wa gu ko amangihe re te. Da ini he, si nawira ho ani ka bi ko ni fuo ‘zingisa yo ruru aboro bekpio,’ ko agumba kura apai agumba fu rani na agu afutufutuhe nga gu nadu tipa gipai re.—Amokedi 24:15.

¹⁴ Roto angianga iragunde wa gu tooni te, kpakarakpakarapai ko adu rogoho. Niya Roto wee agu ageno re ‘aye ka sungo kpuko yo,’ ko abihe nga si adu nidingisoro fuko ko banda yo kpuko yo. Ono si adunga nitaatapai fuko ko banda yo te. Gu ga aYuda bakeke kuru apangbangaa nga Yozefasi ayawee aboro Sodomo “anamanganga rurupai fu akumba te, na i adunga a na irisa tipa Mbori te . . . I anasoga kungbo aboro asoga, na kini mangi gu pawasiro nga ga koda kumba ba na kurani kumba.” Wa Roto avura rugatiko naapa agi apai re, ko aoranga be gu gbegbere sino ndurumo aboro re te. Kuba gure, ko akuru fuo gu ndurumo aboro-zuũ re ku zegiyo ka sakapai na yo. Na kurii gure, ko “ki kisi kpuguru gii ko yo” tipa kadu nisako ka fura na yo.—Bambata Pai 19:6.

15. Tipagine rengbe ani ka ya ti ni wee idapase nasa Roto ko mangi gupai ko amangihe re?

¹⁵ Gu kura aboro rengbe ka sanahe ki yaa, ‘Wa vura duhe wo, tipagine ka Roto arengbe ti ni ka fu awiriko nangia adegude fu ndurumo aboro-zuũ?’ Kuba gupai nga ani ya ndu manga ko gupai re arunga te, tipagine ka ani awisigonga gupai ti ni navurangia nduhe ya? Bambatapai nga, si rengbe kadu nga idapase nasako ko mangi gupai re. Wai duhe wo? Zanga kapa, Roto aima rugatiko naapa wai Yekova abanda Sara, nangia dia gu unduru bako nangia Abarayama. Oni tingidi gupai nga, mbiko wa Sara angia bawene dee, Abarayama ahõpai beri ri ya tipa ko wee kawiiri nangia ko, tipa ka kura aboro aimonga ko ka dia ri ya.a Tingbafuo gipai re, i adi Sara ki ndu na ri kua Faro yo. Ono tie, Yekova aye ki za Faro ti manga ingapai na Sara. (Bambata Pai 12:11-20) Si ni gupai ruaru ani ya Roto aduna idapase ya Mbori abanda awiriko abanda wa kina gu ko abanda Sara re. Nirengo, Yekova asa agu amaraika nadu ue re i banda yo, na ka kerepai amanganga yo ya.

16, 17. (a) Rogo gini agene Roto avura kaa manga asadatise ka zeresa ngba aboro Sodomo watadu ka vundo riyo yo? (b) Ka ga Roto berã avurangia kina gine, ginipai rugu ani tirani nani?

¹⁶ Ani wisiginga gu kurapai navurangia nduhe. Si rengbe kadu nga Roto aamanga asadatise ka zeresa ngba agu akumba re watadu ka vundo riyo yo. Si nawira ko aduna gu berã nga, nyemu kodaba na adee adunga ti agi akumba naima rätä fuo gu wasiwasi mangaapai nga ga koda kumba ba na kina kurani kumba namoipai Sodomo yo re te. (Yuda 7) Kurii gure, i aima pazua gi paranga adee nangia awiriko re fu akumba nga aguyo naaraka rogo kina gu bakporo re, sidu, agume agi akumba re, abakureayo, watadu agu aboro i aamangasunge bagaahe na yo avura du dagba gu rimbasa aboro naye re. (Bambata Pai 19:14) Sidu, Roto avura berã ya, mbiko agi apagume nadu dagba agi akumba napazua awiriko re na bete aboro dagba gu rimbasa re, i nika zinga azinga ya i aidanga aboro wasi dere agume yo te. Fuo duhe were, gu ndurumo aboro-zuũ re kini mo ka kparaka kurogo arimbasa ue, ka gene adunga ho berewe tipa i gbarasipa awiriko ya.b

¹⁷ Ka ga Roto berã gbiati ndu mangapai avurangia kina gine, gupai rengbe ani ka rugatirani nani nga: Wa duhe nga Yekova naamanga kina gupai du niruruhe ti aregbo dunduko, wene ndupai aima duho nasako ko bi Roto ni “ruru boro.” Na ka ani digisipai awere rii mburu gu mangaapai nangia ga gu rätärätä aboro naaraka rogo gu gbegbere bakporo nangia Sodomo re, ya mo kapa ho ya si arunga fu Yekova ko saringbangaa kutiyo tee?—Bambata Pai 19:23-25.

Tipagine Yekova Aimi Uza ti Ni?

18. (a) Ginipai namangi ho Davide a’asadi ni ka ndu na Sanduki mokido ku Yerusarema yo? (b) Gini sanahe gi pangbangaa re akusaha?

¹⁸ Gu kura pangbangaa nawira wa si nikpakarakpakaraha fu kura aboro i girogoyo, si tipa gu asadatise Davide amangihe ka tinda sanduki mokido ka ndu nani ku Yerusarema yo. I amoi gu sanduki re rii ngbagida anyaa ue kini gbehe, Uza na wirinako kidu pati ni kini nungusihe. Ziazia Kekeapai nayaa: “Ho i ada ni ti ga Nakana bataka zende ahe, Uza ki tai beko, ki zadi ga Mbori sanduki; bambiko abaabagara akotoko sanduki ki mbedi ka ti. Ga Yekova zinga ki rungudi kuti Uza; Mbori ki imi ko kina ho mbiko gako aura; ko ki kpi kina ku pati ga Mbori sanduki.” Fuo bete adiwi kusa, gu ue asadatise i amangihe anyasi rogo pazereda ho agu aRevi nangia awiri Koata atindi gu Sanduki mokido ni re pagoyo ki da nani Yerusarema yo rogo gu gene Mbori aringbisipai tipaha ya wo i kaa tindaha. (2 Samuere 6:6, 7; Pa Geda Aboro 4:15; 7:9; 1 Pekapai 15:1-14) Kura aboro rengbe ka sanahe ki yaa: ‘Tipagine Yekova amangipai ninyanyaki zinga ti ni wa gure, wa duhe nga kungbo asadatise gbua Uza aamangaha ka banda Sanduki mokido be tigo’? Tipa ani ka ndu ka manga gu digisopai arunga ya, si niwenepai tipa ani kparia gu futufutuapai du tipaha nga gu rengbe ka undo rani.

19. Tipagine duhe ti ni nigasigasipai fu Yekova ka manga irairapai?

¹⁹ Si naida ani tingidi gupai nga, si fu Yekova nigasigasipai ko mangi gupai arunga ya. (Eyobo 34:10) Ka ko mangipai wa gure, si du fuko nizingo nyemuse, ono gupai tie ini ani he rogo gaani wisigo Ziazia Kekeapai naabaha dunduko nga, “Mbori nga nyemuse.” (1 Yoane 4:8) Kurii gure, Ziazia Kekeapai naya fu rani wee “rurupai na ruru sarangbangaa . . . ni mburu ga [Mbori] mbatabakindo.” (Atambuahe 89:14) Wai tie ka Yekova arengbe ka mangapai niirairaha? Kangia ko amangipai wo, gure kangia ko aumbasipa kina boro mburu gako bakere pagbia.

20. Gini nduapai duho ka ima sa Uza ko rugutiko naapa agu arugute nadu tipa Sanduki mokido?

²⁰ Oni moi gupai ku berã roni yo nga, si aidi Uza du nigu boro ka ima ruga tini wenengai naapa agu apai nadu tipa gu sanduki re. Gu Sanduki mokido re anarukuba padu Yekova rogo gu ba si anidu rogoho. Ga Mbori Ndiko aima fura zukazuka ya agu aboro i afunga asiahe fuyo tipa ngerafuoho ya, ka i zadinga ha ya, kini zahe ziazia ya agu aboro nika kuo gu ndiko re, gayo mbusa tipaha nikangia kina kpio. (Pa Geda Aboro 4:18-20; 7:89) Sidu, pa tinda gu ziazia sanduki re angianga gu sunge si aida i bihe naapaha gbua taata te. Si ziazia nga, Uza angia gu kumba nangia ngbatunga Revi (ono angianga boromotumo ya), sidu si aidi ko ima rugatiko naapa ga Mbori aNdiko. Kurii gure, i aima ye na gu Sanduki mokido re bakuru kusayo kina boro kua bako yo tipa bandaha yo. (1 Samuere 6:20–7:1) Si aima sungu rogo gu kporo re tipa agarã wa 70, daho Davide adiberã ni tipa ka diaha yo kusayo. Sidu, tona ho Uza aduni nga tooni gude, si nawira ko aima rugatiko naapa agu andiko nadu tipa gu Sanduki mokido re.

21. Nibi gupai nadu tipa Uza, tipagine duhe ti ni ninyanyakipa pai ani tingidi gupai nga, Yekova nabi ndu agu apai abi du ngbadu aboro yo nasa yo i naamangapai?

²¹ A wa ani niima gumbaha mbata kusayo, Yekova ima rengba ka ino agu apai du ngbadu aboro yo. Wa duhe nga Fugo ko nafura tipa ga Uza mangapai ya si angia “aura,” watadu gu mangaapai arunga ya, Yekova avura bi bete gu ndu mangaapai tiko nangia ga gbangbati nga gu adunga niyuguyuguhe rogo gu pangbangaa re ya. Ya mo si rengbe kadu nga Uza angia gu boro nagusaapai, nga gu boro duna nyemu manga agu apai adanga funi ni naamangaha ya? (Asanza 11:2) Ya mo pa nduge ko kubangiri aboro gbaiga pati gu Sanduki mokido re asako nirukoo, nga gu sanduki gako aborokporo anabandaha ka aboro ainonga pai tipaha ya? (Asanza 8:13) Ya mo si rengbe kadu nga Uza azanga idapase si ki sa ko ko berẽ gupai nga, Yekova arengbanga ka banda gu sanduki narukuba padu Ko rogo gu ba duhe rogoho tee? Ka si vurangia kina ginipai nadu bangiri Uza, gupai ini ani he nga, gupai Yekova amangihe re angia kina rurupai. Si nawiraha nzunzu nga, ko aima bi gupai ku ngbadu Uza yo naangbanga ya nasako ko saringbangaa niipiipihe.—Asanza 21:2.

Wene Ndupai Tipa Kadu na Kido

22. Wai ani abi ga Yekova tatamana ti gupai nga, ti kura aregbo, ko nambu kura futufutuapai ambu kusayo rogo Fugo ko?

²² Ani nabi gu ga Yekova tatamana nga gu adunga kuraha ho be kura boro wa ha ya rogo gupai nga, ti kura aregbo, Fugo ko akodanga futufutuapai tipa gupai si afura tipaha te. Pa manga Yekova ha were nafu mamu fu rani ani yugu gupai nga ani nakido kutiko. Be gupai wisigi ani he ka da ku awere re, anga si ziazia nga ani na wene nduapai berani ka ida kuti ga Yekova asarangbangaa tee? Ii, ho ani awisigo Fugo Mbori ni na gigiri ngbaduraniyo na berã rani kidu nizazaha, ani nawirika dungu apai tipa Yekova nga gu nika rugusa gupai bangirani nga, ko naamanga kina agu apai du niruruhe ti aregbo dunduko. Sidu, kangia kura apangbangaa rogo Ziazia Kekeapai nakusa agu asanahe ani arengbanga nibasa ka gbia agu akaragapai sani du ziazia ya, si naida ani du naa kido naabaha ya, gupai Yekova amangihe re aruaru.

23. Gini kido rengbe ani kadu nani tipa ga Yekova mangaapai kumbatayo?

²³ Ani rengbe kadu naa kido wa kina gure tipa gu ga Yekova mangaapai ko ka mangaha gizo. Sidu, si naida ani du naa kido ya ho ko ka ye ni ka sapangbangaa ti regbo bakere gberangbii nga gu nambeda, ko amongonga “gbárasi ruru aboro na gbegberẽ aboro” te. (Bambata Pai 18:23) Gako nyemu rurupai gbiati nyemu ruru sarangbangaa arengbanga ka mbu ko ko mangi gupai re te. Ani rengbe a kadu naa kido rogo apai dunduko ya, rogo gu vovo zegino naye, ko ambiisa agu azingo ambiisa dunduko du tirani rogo gu gene ngba kisusi.—Atambuahe 145:16.

[Gu rukutu kekeapai du bandu kpewaraga yo]

Oni Natingidaha?

• Gini nduapai duho si aida ti ni ani idi kuti ga Yekova asarangbangaa?

• Gine rengbe ka undo rani ani he dakuti iraira digisopai tipa pa fu Roto awiriko nangia adegude fu ndurumo aboro-zuũ?

• Gini apai rengbe ka undo rani ani girogo ndu gupai Yekova aimi Uza ti ni?

• Gini kido rengbe ani kadu nani tipa ga Yekova mangaapai kumbatayo?